ᓄᓇᕗᑦ ᓯᕗᓕᐅᖅᑎᖓ ᐊᐱᕆᔪᖅ ‘ᖃᔅᓯᐊᓗᐃ ᓱᓕ’ 751-ᓂ ᑎᒥᓂ ᓇᓂᓯᑎᓪᓗᒋᑦ ᐃᓕᓐᓂᐊᕆᐊᖅᕕᕕᓂᖅᒥᒃ

ᐃᓗᕖᑦ ᓇᓂᔭᐅᔪᑦ ᑲᐅᕙᓴᔅ ᓄᓇᖃᖅᑳᖅᑐᑦ ᓄᓇᖓᑕ ᖃᓂᒋᔭᖓᓂ (Cowessess First Nation) ᓴᔅᑳᑦᓱᐊᓐᒥ

ᓄᓇᕗᑦ ᓯᕗᓕᐅᖅᑎᖓ ᔫ ᓴᕕᑲᑖᖅ ᑐᓴᖅᑎᑕᐅᔪᒪᔪᖅ ᓱᓕᔪᓂᒃ, ᑭᐅᔨᐅᔪᓐᓇᖅᑐᓂᒃ ᐊᒻᒪᓗ ᑐᑭᖃᖅᑐᒃᑯᑦ ᐋᖅᑭᒋᐊᒃᑲᓐᓂᕈᑎᒃᓴᓂᒃ ᓄᓇᖃᖅᑳᖅᑐᓄᑦ ᐃᓄᖕᓄᑦ, ᓇᓂᓯᔪᖃᓚᐅᖅᑎᓪᓗᒍ 751-ᓂ ᐊᑎᖃᙱᑦᑐᓂᒃ ᐃᓗᕕᕐᓂᒃ ᐃᓕᓐᓂᐊᕆᐊᖅᕕᕕᓂᐅᑉ ᖃᓂᒋᔭᖓᓂ ᓵᔅᑲᑦᓱᐊᓐᒥ ᔫᓂ 24-ᖑᑎᓪᓗᒍ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

By ᒥᓚᓂ ᐅᕆᑦᓵᑦ

For an English version of this story, see Nunavut premier asks ‘how many more’ as 751 more bodies uncovered at former school

ᓄᓇᕗᑦ ᓯᕗᓕᐅᖅᑎᖓ ᔫ ᓴᕕᑲᑖᖅ ᐅᖃᓚᐅᖅᑐᖅ ᓄᓇᖃᖅᑳᖅᑐᑦ ᒪᓕᒐᓕᕆᓂᒃᑯᑦ ᐊᒻᒪ ᑭᐅᔨᐅᔪᓐᓇᖅᑐᓂᒃ ᐱᓕᕆᑎᑦᑎᔭᕆᐊᖃᖅᑐᑦ 751-ᓂ ᐃᓗᕕᖕᓂ ᓇᓂᓯᔪᖃᓚᐅᖅᑎᓪᓗᒍ ᓴᔅᑳᑦᓱᐊᓐᒥ ᐃᓕᓐᓂᐊᕆᐊᖅᕕᕕᓂᕐᒥᒃ.

ᑲᐅᕙᓴᔅ ᓄᓇᖃᖅᑳᖅᑐᑦ ᐊᓪᓚᐃᑦ ᐊᖓᔪᖅᑳᖓ ᑳᑦᒪᔅ ᑎᓗᐊᒻ ᑐᓴᖅᑎᑦᑎᓚᐅᖅᓯᒪᔪᖅ ᔫᓂ 24-ᒥ.

ᑐᓴᒐᒃᓴᒥ ᑐᓴᖅᑎᓪᓗᒍ ᓴᕕᑲᑖᖅ ᐊᐱᕆᓚᐅᖅᑐᖅ, “ᖃᔅᓯᒃᑲᓐᓂᕐᓂᒃ ᐃᓕᕕᕐᓂᒃ ᐃᓕᓐᓂᐊᕆᐊᖅᕕᕕᓂᕐᓂᒃ ᓄᓇᖃᖅᑳᖅᑐᑦ ᐊᒃᓱᕈᕈᑎᖃᕆᐊᖃᒃᑲᓐᓂᖅᐸᑦ?”

“ᐅᐊᑲᓪᓚᓗᐊᕌᓘᕌᓂᒃᑐᖅ ᓱᕈᓯᕗᑦ ᑎᒡᓕᒃᑕᐅᑐᐃᓐᓇᖃᑦᑕᓕᖅᑎᓪᓗᒋ ᐱᒋᐊᖅᖢᑎᒃ 1883-ᒥᑦ.”

ᐅᑯᐊ ᐃᓗᕖᑦ ᓇᓗᓇᐃᖅᑕᐅᓯᒪᙱᑦᑐᑦ ᐅᕙᓃᑦᑐᑦ ᒥᐅᕆᕕᐅᓪ ᐊᓪᓚᐃᑦ ᐃᓕᓐᓂᐊᖅᕕᒋᓚᐅᖅᑕᖓᑦᑕ ᖃᓂᒋᔭᖓᓂᒃ ᑖᓐᓇᓗ 160 ᑭᓛᒥᑕᓂᒃ ᑲᓇᖕᓇᖅᐸᓯᐊᓃᖢᓂ ᐅᕆᔾᔭᐃᓇᐅᑉ.

ᐅᓇ ᑐᓴᒐᒃᓴᖅ ᐃᓚᒋᔭᐅᔪᖅ 215-ᓂ ᓇᓂᔭᐅᔪᕕᓂᕐᓂᒃ ᑎᒥᓂᒃ ᑳᒻᓘᑉᔅ ᐳᕆᑎᔅ ᑲᓚᒻᐱᐊᒥ ᒪᐃᖑᑎᓪᓗᒍ.

ᓴᕕᑲᑖᖅ ᑖᒃᑯᓄᖓ ᐃᓕᓐᓂᐊᕆᐊᖅᕕᐅᕙᓚᐅᖅᑐᓄᑦ ᑲᒪᔨᐅᔪᓂᒃ ᑖᒃᑯᓂᖓ ᑭᐅᔨᐅᖁᔨᓪᓗᓂ ᐃᓕᓐᓂᐊᖅᕕᓕᕆᓂᖅᒧᑦ, ᒪᒥᐊᖁᔨᓪᓗᓂ ᐅᓄᖅᑐᒻᒪᕆᐊᓗᖕᓄᑦ ᐊᒃᑐᖅᑕᐅᔪᓄᑦ ᐊᒻᒪᓗ ᑐᑭᓕᒃᑯᑦ ᐋᖅᑭᒋᐊᖅᑕᐅᑎᑦᑎᒃᑲᓐᓂᖁᔨᓪᓗᓂ.

“ᒪᓕᒐᓕᕆᓂᖅᑕᖃᕆᐊᖃᕐᒪᑦ,” ᐅᖃᖅᑐᖅ ᓴᕕᑲᑖᖅ. “ᒪᓕᒐᓕᕆᓂᖅᑕᖃᕆᐊᓕᒃ ᑎᒡᓕᒃᑕᐅᔪᕕᓂᕐᓄᑦ ᓱᕈᓯᕐᓄᑦ ᐊᒻᒪᓗ ᐃᓚᖏᑦ ᓱᕋᒃᑕᐅᓯᒪᓂᖏᓐᓄᑦ.”

ᐃᖃᓗᐃᑦ ᒪᐃᔭᖓ ᑭᐊᓂ ᐱᐊᓪ ᑖᔅᓱᒥᖓ ᑐᓴᒐᒃᓴᒥ ᑐᓴᓗᐊᓚᐅᕐᒥᖕᒪᑦ, ᖃᕋᓴᐅᔭᒃᑯᑦ ᑎᑎᕋᖅᓯᒪᓪᓗᓂ ᔫᓂ 24-ᒥ ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖏᓐᓂᒃ ᓴᐃᒪᑎᓂᒃ ᐊᑦᑎᒃᓯᒋᐊᖅᑎᑦᑎᖁᔨᓪᓗᓂ ᓄᓇᔭᐃᑦ ᑎᑎᕋᖅᕕᖓᑦᑕ ᓯᓚᑖᓃᑦᑐᓂᒃ ᐅᓇ ᐱᐅᓱᒋᔾᔪᑎ ᓴᐃᒪᑎ ᓱᖁᓯᖅᑕᐅᖁᙱᖢᓂᐅᒃ ᐋᖅᑭᒃᑕᐅᓵᖅᓯᒪᓗᐊᕐᓂᖓᓄᑦ.

“ᑭᖑᓪᓕᕐᒥ ᑲᑎᒪᔨᒃᑯᑦ ᑲᑎᒪᓕᖅᐸᑕ ᐃᒃᓯᕙᐅᑕᓐᓃᙱᓚᐅᑲᒡᓗᖓ ᐱᒋᐊᖅᑎᑦᑎᔾᔪᑎᓕᐅᕐᓂᐊᕋᒪ ᒫᓐᓇᒥ ᑐᒃᓯᐊᖅᕖᑦ ᑕᒪᕐᒥᒃ ᐊᑭᓕᖅᓱᐃᓕᕐᓂᐊᖁᓗᒋᑦ ᑖᒃᓰᔭᕈᑎᓂᒃ,” ᐱᐊᓪ ᐅᖃᖅᑐᖅ.

ᐅᕙᓂᓕ ᑲᐅᕙᓴᔅ ᓄᓇᖃᖅᑳᖅᑐᑦ ᐊᓪᓚᐃᑦ ᓄᓇᖓᓂ ᐅᓇ ᐊᖓᔪᖅᑳᖅ ᓰᕝ ᑎᓗᐊᒻ ᐅᖃᓚᐅᖅᑐᖅ “ᑕᒪᕐᒥᑦᑎᐊᖅ ᑲᐅᕙᓴᔅᓄᑦ ᐃᓚᒋᔭᐅᔪᑦ ᐃᓚᖃᖅᑐᐃᓐᓇᑦᑎᐊᑦ ᐃᓗᕕᖅᑕᐅᓯᒪᔪᓂᒃ ᑕᕝᕙᓂ,” ᑎᑎᕋᖅᓯᒪᓪᓗᓂ.

“ᐅᓇ ᐋᓐᓂᕐᓈᓗᒃ ᐱᒻᒪᕆᐊᓗᒃ ᐅᕙᑦᑎᓐᓄ.”

ᐅᖃᓚᐅᕐᑐᖅ ᐊᓪᓚᐃᑦ ᑐᕋᒐᕆᓕᖅᑕᖓ ᓇᓃᓐᓂᖏᓐᓂᒃ ᓇᓗᓇᐃᖅᑕᐅᑲᑕᒡᓗᓂᒃ, ᑭᒃᑰᓂᖏᓐᓂᒃ ᐊᒻᒪᓗ ᓇᓗᓇᐃᖅᑕᐅᓗᑎᒃ ᑖᒃᑯᐊ ᐃᓚᒋᔭᐅᓚᐅᖅᓯᒪᔪᑯᓗᐃᑦ.

ᑲᓇᑕᒥ ᐊᖓᔪᖅᑳᖅᔪᐊᖅ ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ ᑎᑎᕋᓚᐅᖅᑐᖅ ᒥᐅᕆᕕᐊᒥ ᓇᓂᔭᐅᔪᑦ ᑳᒻᓘᑉᔅᒥᓪᓗ ᐃᓚᒋᔭᐅᓂᖏᓐᓂᒃ ᐊᖏᓂᕐᓵᓗᖕᒥ ᓈᒻᒪᙱᓕᐅᕈᑎᐊᓗᖕᒥ.

“ᑭᓇᑐᐃᓐᓇᖅ ᓱᕈᓯ ᐱᕈᖅᐸᓪᓕᐊᓂᖏᓐᓂᒃ ᐃᓄᑑᓐᓇᖅᑐᐊᓗᖕᒥ ᐊᒻᒪ ᐃᓖᔭᖅᓱᐊᕆᔭᐅᓂᖅᒥᒃ ᐊᑐᕆᐊᖃᙱᑦᑎᐊᖅᑐᖅ,” ᐅᖃᖅᑐᖅ.

“ᑭᓇᑐᐃᓐᓇᖅ ᐃᓚᒋᔭᐅᔪᖅ ᐊᖅᓵᖅᑕᐅᓪᓗᐊᓚᐅᙱᑦᑐᖅ ᑖᒃᑯᓂᖓ ᓱᕈᓯᕐᓂᒃ, ᐱᑕᖃᕈᓐᓃᖅᑎᑕᐅᓗᑎᒃ ᐃᒡᓚᒪᔭᖕᓂᖏᑦ ᐊᒻᒪᓗ ᓄᓇᖏᓐᓂᒃ ᐱᕈᖅᓴᖅᑎᑕᐅᙱᖢᑎᒃ.”

ᑐᕉᑑ ᐅᖃᓚᐅᕐᒥᔪᖅ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᑦ ᓄᓇᖏᓐᓂᒃ ᐃᑲᔪᕐᓂᐊᕐᓂᕋᖅᖢᓂᒋᑦ ᑲᓇᑕᒥ ᒪᐅᓇ ᐃᑲᔫᑎᒃᓴᑎᒍᑦ ᐊᒻᒪᓗ ᐃᑲᔪᕈᑎᒃᓴᑎᒍᑦ ᑕᒪᒃᑯᐊ “ᓈᒻᒪᙱᓗᐊᖅᑐᐊᓗᐃᑦ” ᓴᖅᑭᑕᐅᑦᑎᐊᕐᓗᑎᒃ.

ᓄᓇᕗᒧᑦ ᒪᓕᒐᓕᐅᖅᑎ, ᒪᒥᓛᖅ ᖃᖅᑲᖅ, ᑎᑎᕋᓚᐅᕐᑐᖅ ᓴᔅᑳᑦᓱᐊᓐᒥ ᓇᓂᔭᐅᔪᑦ ᒥᒃᓵᓄᑦ ᐅᖃᖅᖢᓂ, “ᑲᓇᑕᒥᐅᑕ ᑖᒃᑯᐊ ᓇᐃᓴᐅᑎᑦ ᓱᖏᐅᑎᑦᑕᐃᓕᓗᒋᑦ. ᑖᒃᑯᐊ ᓇᐃᓴᐅᑎᑐᐃᓐᓇᐅᑦᑕᐃᓕᓕ.”

ᒥᐅᕆᕕᐊᓪ ᐊᓪᓚᓄᑦ ᐃᓕᓐᓂᐊᕆᐊᖅᕕᕕᓂᖅ ᐊᐅᓚᑕᐅᓚᐅᖅᓯᒪᔪᖅ ᕉᒪᓐ ᑳᑐᓕᒃ ᑐᒃᓯᐊᖅᕕᒃᒧᑦ 1886-ᓗ   1970-ᓗ ᐊᑯᓐᓂᖓᓂᒃ. 1960-ᖏᓐᓂᒃ, ᑐᒃᓯᐊᖅᕕᒃ ᐃᓗᕕᕐᓄᑦ ᓇᓗᓇᐃᒃᑯᑎᓂᒃ ᐲᔭᐃᓚᐅᖅᓯᒪᔪᑦ ᐅᖃᖅᓯᒪᔪᖅ ᑎᓗᐊᒻ.

ᓴᔅᑳᑦᓱᐊᓐ ᐅᓄᓛᓂ ᐃᓕᓐᓂᐊᕆᐊᖅᕕᖃᓚᐅᖅᓯᒪᔪᖅ ᐊᓯᖏᓐᓂᒡᓕ ᐳᕌᕕᓐᓯᓂᒃ ᐊᒻᒪ ᑎᐅᕆᑑᕆᓂᒃ ᑲᓇᑕᒥ.

ᑲᓇᑕᒥ 139 ᐃᓕᓐᓂᐊᕆᐊᖅᕕᕕᓃᑦ ᒪᑐᔭᐅᓚᐅᖅᓯᒪᔪᑦ 1996-ᒥᑦ. 13-ᖑᓚᐅᖅᓯᒪᔪᑦ ᓄᓇᕗᒥᑦ.

2015-ᒥᑦ, ᐅᑯᐊ ᓱᓕᓂᖅᒧᑦ ᐊᒻᒪ ᐋᖅᑭᒋᐊᒃᑲᓐᓂᕐᓂᖅᒧᑦ ᑲᒥᓴᓐᑯᑦ ᑎᑎᕋᐅᓯᖃᓚᐅᖅᓯᒪᔪᑦ ᐃᓕᓐᓂᐊᕆᐊᖅᑐᕕᓃᑦ ᐅᓂᒃᑳᖏᓐᓂᒃ ᒪᑯᓂᖓ ᐋᓐᓂᖅᓱᖅᑕᐊᖃᑦᑕᖅᓯᒪᓂᕐᒥᒃ, ᖁᓄᔪᕐᓂᐊᖅᑕᐅᕙᖕᓂᕐᒥᒃ ᐊᒻᒪᓗ ᐊᓯᖏᓐᓂᒃ ᐋᓐᓂᖅᓱᐃᕈᑎᐅᖃᑦᑕᖅᑐᓂᒃ.

ᓯᕗᓕᐅᖅᑎ ᓴᕕᑲᑖᖅ ᑎᑎᕋᓚᐅᕐᓯᒪᔪᖅ ᒐᕙᒪᑐᖃᒃᑯᓐᓄᑦ 2019-ᒥ ᐅᓇ ᐃᒃᓯᕋᖅᔪᐊᖑᓚᐅᖅᓯᒪᔪᑦ ᔪᐊᓐᔅ ᕆᕗᐊ, ᐸᓯᔭᒃᓴᐅᓯᒪᔪᖅ ᐃᓄᖕᓂᒃ ᓱᕈᓯᕐᓂ ᐱᑦᑎᐊᖃᑦᑕᓚᐅᖅᓯᒪᙱᓐᓂᖓᓄᑦ 1960-ᖏᓐᓂᒃ ᐃᒡᓗᓕᒑᕐᔪᒃᒥᑦ ᐃᒃᓯᕋᖅᔪᐊᖑᑎᓪᓗᒍ ᑲᓇᑕᒧᑦ ᑎᑭᑎᑕᐅᖁᓪᓗᓂᐅᒃ.

ᕆᕗᐊ, ᒫᓐᓇ 90-ᖏᓐᓃᓕᖅᑐᑦ ᕗᕌᓐᔅᒥ ᓄᓇᖃᖅᑐᖅ ᐊᒻᒪᓗ ᐊᕐᕕᐊᓂᒃ ᐃᒃᓯᕋᕐᔪᐊᖑᓚᐅᖅᓯᒪᓪᓗᓂ ᐊᒻᒪ ᓇᐅᔮᓂᑦ ᐊᒻᒪ ᑲᖏᖅᖠᓂᖅ ᐊᒻᒪᓗ ᖃᒪᓂᑦᑐᐊᕐᒥᓐ.

ᑭᓇᑐᐃᓐᓇᑦᑎᐊᖅ ᐃᓱᒫᓘᑎᖃᓗᐊᕐᑐᖅ ᓱᕈᓰᑦ ᐃᓅᔪᓐᓃᖅᑎᑕᐅᓂᑰᓂᖏᓐᓄᑦ ᐅᖃᖃᑎᖃᕈᓐᓇᖅᑐᑦ ᖃᖓᓕᒫᑦᑎᐊᖅ ᐃᑲᕐᕋᑦ 24 ᐊᑐᐃᓐᓇᐅᔪᓄᑦ ᐃᓕᓐᓂᐊᕆᐊᖅᕕᕕᓂᕐᓄᑦ ᓈᒻᒪᙱᓕᐅᕈᑎᖃᕐᓂᖅᒧᑦ ᐅᖄᓚᕕᒃᒧᑦ ᐅᕗᖓ 1-866-925-4419 ᐃᓱᒪᓗᐊᕐᓂᖅᒧᑦ ᐃᑲᔪᖅᑕᐅᔪᒪᓂᕐᒧᑦ.

 ᐅᑯᖓ IRSSS (Indian Residential School Survivors Society) ᐊᓪᓚᐃᑦ ᐃᓕᓐᓂᐊᕆᐊᖅᕕᕕᓂᖓᓄᑦ ᐃᓕᓐᓂᐊᕆᐊᖅᑐᕕᓂᕐᓄᑦ ᐃᑲᔪᖅᑕᐅᕕᒃ ᐊᑐᐃᓐᓴᐅᖕᒥᔪᖅ ᖃᖓᑐᐃᓐᓇᑦᑎᐊᖅ 24/7: 1-800-721-0066.

Share This Story

(0) Comments

Join the Conversation

Your email address will not be published. Required fields are marked *

*