ᓄᓇᕗᑦ ᓯᕗᓕᐅᖅᑎᖓ ᑐᓴᖅᑎᑦᑎᕗᖅ $8.5 ᒥᓕᐊᓐ ᑖᓚᓂ ᓄᕙᒡᔪᐊᕐᓇᖅ-19-ᒧᑦ ᐃᑲᔪᕈᑎᑕᖃᕐᓂᖓᓂᒃ
ᐃᑲᔪᕈᑎᒋᔭᐅᔪᑦ ᐃᒪᐃᓕᖓᔪᑦ ᓂᕿᓂᒃ ᐊᕝᕗᖅᑕᐅᓯᒪᓪᓗᑎ ᐃᓄᑑᔭᕆᐊᖃᖅᑐᓄᑦ ᐊᒻᒪᓗ ᕼᐋᒻᒪᓚᒃᑯᓐᓂᒃ ᑮᓇᐅᔭᖃᖅᑎᑦᑎᓪᓗᑎᒃ ᐱᔨᑦᑎᕋᐅᑎᒋᔭᐅᔪᓄᑦ
ᓄᓇᕗᑦ ᓯᕗᓕᐅᖅᑎᖓ ᐸᐅᓗᓯ ᐊᕿᐊᕈᖅ ᑐᓴᖅᑎᑦᑎᔪᖅ ᓄᑖᓂᒃ ᐃᑲᔪᕈᑎᒃᓴᓂᒃ ᓄᓇᕗᒻᒥᐅᓄᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍ ᐊᒻᒪᓗ ᐅᖃᐅᓯᖃᖅᖢᓂ ᒐᕙᒪᑐᖃᒃᑯᓐᓂ ᐃᑲᔪᖅᑕᐅᔪᒪᓂᕋᖅᖢᓂ ᔭᓄᐊᕆ 13-ᖑᑎᓪᓗᒍ. (ᓴᖅᑭᔮᒐᖅᒥᑦ/ᓄᓇᕗᒥᑦ ᒪᓕᒐᓕᕆᕕᔾᔪᐊᕐᓇᒥᑦ)
For an English version of this story, see Nunavut premier announces more than $8.5M in COVID-19 relief
ᓂᕆᔭᒃᓴᐃᑦ ᐊᕝᕗᖅᑕᐅᓯᒪᔪ ᐃᓄᑑᔭᕆᐊᖃᖅᑐᓄᑦ, ᑮᓇᐅᔭᐃᑦ ᕼᐋᒻᒪᓚᒃᑯᓐᓄᑦ ᐱᔨᑦᑎᕋᐅᑎᓕᕆᔪᓐᓇᕐᓂᐊᕐᒪᑕ ᐊᑐᕆᐊᖃᓪᓚᕆᒃᑐᓂᒃ ᐊᒻᒪᓗ ᒥᑭᑦᑐᓄᑦ ᐱᓕᕆᐊᓄᑦ ᐃᑲᔪᕈᑎᒃᓴᐃᑦ ᐊᒻᒪ ᓴᓇᐅᒐᓕᐅᕐᑎᓄᑦ ᐃᓚᒋᔭᐅᔪᑦ ᓄᓇᕗᒥᑦ ᒐᕙᒪᒃᑯᑦ ᓄᕙᒡᔪᐊᕐᓇᖅ-19-ᒧᑦ ᐃᑲᔪᕈᑎᒋᔭᖏ ᑖᒃᑯᐊ ᐅᑕᕿᓪᓗᑎᒃ ᒐᕙᒪᑐᖃᒃᑯᓐᓂᒃ ᐃᑲᔪᖅᑕᐅᔾᔪᑎᒃᓴᒃᑲᓐᓂᕐᓂᒃ.
ᓄᓇᕗᑦ ᓯᕗᓕᐅᖅᑎᖓ ᐸᐅᓗᓯ ᐊᕿᐊᕈᖅ ᑐᓴᖅᑎᑦᑎᓚᐅᕐᑐᖅ ᐱᖓᓱᓂᒃ ᓄᑖᓂᒃ ᐃᑲᔫᕈᑎᐅᓂᐊᖅᑐᓂᒃ ᑲᑎᖢᑎᒃ $8.5 ᒥᓕᐊᓐᑖᓚᐅᑉ ᐅᖓᑖᓃᖢᑎᒃ, ᐅᖃᐅᓯᖃᖅᑎᓪᓗᒋᑦ ᓄᕙᒡᔪᐊᕐᓇᖅ-1ᓪ ᒥᒃᓵᓄᑦ ᔭᓄᐊᕆ 13-ᖑᑎᓪᓗᒍ.
ᑕᕝᕙᙵᑦ ᐅᓄᓛᖑᓂᐊᕐᑐᑦ ᓂᕿᑖᕈᑎᒃᓴᓅᖓᔪᑦ ᑐᓂᐅᖅᑲᖅᑕᐅᓂᐊᖅᖢᑎᒃ ᓄᓇᕗᒻᒥᐅᓄᑦ ᐃᓄᑑᔭᕆᐊᖃᖅᑐᓄᑦ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ.
ᐅᑯᓇ ᓂᖀᑦ ᑐᕌᖓᓂᕐᓴᐅᓂᐊᕐᑐᖅ ᐃᓄᖕᓄᑦ ᐱᖃᓐᓇᖃᙱᑦᑐᓄᑦ ᐃᓚᖃᙱᑦᑐᓄᓪᓘᓐᓃᑦ ᐊᒡᔭᖅᓯᔪᓐᓇᕋᔭᕐᑐᓂᒃ ᓂᕿᓂᒃ ᑖᒃᑯᓄᖓ. ᐅᓄᕐᓂᖏᓐᓄᑦ ᐱᔪᒪᔪᑦ ᑖᒃᑯᐊ ᑎᑭᑲᐅᖅᑐᕈᓐᓇᔾᔮᙱᑦᑐᑦ.
ᓄᓇᕗᒻᒥᐅᑕᑦ ᖃᕋᓴᐅᔭᒃᑯᑦ ᐅᕗᖓ ᑎᑎᕋᕈᓐᓇᕐᑐᑦ isolationsupports@gov.nu.ca ᐅᖄᓚᓗᑎᒡᓘᓐᓃᑦ 1-888-902-0872 ᓂᕿᓂ ᐱᔪᒪᓗᑎᒃ. ᓄᓇᕗᒥᑦ ᒐᕙᒪᒃᑯᑦ ᐃᓄᖕᓂ ᐅᖄᓚᑲᑕᖁᔨᙱᑦᑐᑦ ᓄᕙᒡᔪᐊᕐᓇᖅ-19-ᒥ ᖃᐅᔨᒋᐊᕐᕕᒃᒧᑦ ᑖᓐᓇ ᐅᖄᓚᕝᕕᐅᑲᑕᐃᓐᓇᕈᓐᓇᕐᓂᐊᕐᒪᑦ.
ᐃᑲᔪᕐᓂᐊᕐᓗᑎᒃ ᒥᑭᑦᑐᓂᒃ ᓇᖕᒥᓂᖅ ᐱᓕᕆᐊᖑᔪᓂᒃ, ᓴᓇᙳᐊᕐᑎᓂᒃ, ᓴᓇᐅᒐᓕᐅᖅᑎᓂᒃ ᐊᒻᒪᓗ ᐊᖑᓇᓱᒃᑎᓂᒃ, ᐊᕿᐊᕈᖅ ᑐᓴᖅᑎᑦᑎᓚᐅᕐᑐᖅ ᐃᑲᔫᑎᒃᓴᖃᕐᓂᖓᓂᑦ ᑎᑭᑦᑐᓐᓇᖅᑐᒥᒃ $5,000-ᒧ, ᐊᑐᐃᓐᓇᐅᔪᓐᓴᖅᖢᓂ ᑮᓇᐅᔭᓕᐅᕋᓱᒃᐸᒃᑐᓂᒃ ᐊᒻᒪ ᑮᓇᐅᔭᓕᐅᖃᑦᑕᖅᑐᓂᒃ $500,000 ᑐᖔᓂᒃ ᐊᕐᕌᒍᒧᑦ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᖃᖅᑐᓄᑦ ᖁᓕᑦ ᑐᖔᓂ.
ᑖᔅᓱᒥᖓ ᐃᑲᔫᑎᒃᓴᒥ ᐱᔪᓐᓇᕐᓂᐊᕐᓗᑎᒃ, ᐃᓄᐃᑦ ᓄᓇᓕᖕᓂ ᐱᕙᓪᓕᐊᔪᓕᕆᔨᒧᑦ ᐅᖃᖃᑎᖃᕆᐊᖃᖅᑐᑦ ᐅᕝᕙᓘᓐᓃᑦ ᐊᕕᒃᑐᖅᓯᒪᓂᒃᑯᑦ ᐱᕙᓪᓕᐊᔪᓕᕆᓂᕐᒧᑦ ᐊᐅᓚᑦᑎᔨᒧᑦ, ᐊᕿᐊᕈᖅ ᐅᖃᓚᐅᕐᑐᖅ.
ᕼᐋᒻᒪᓚᐅᔪᓄᓪᓕ, ᐊᕿᐊᕈᖅ ᑐᓴᖅᑎᑦᑎᓚᐅᕐᑐᖅ $4 ᒥᓕᐊᓐ ᑖᓚᐃᑦ ᐊᕕᒃᑐᖅᑕᐅᓂᐊᕐᓂᕋᖅᖢᓂᐅᒃ ᓄᓇᕗᒥᑦ 25 ᓄᓇᓕᖕᓄᑦ ᒪᑯᓄᖓ ᓄᕙᒡᔪᐊᕐᓇᖅ-19-ᒧᑦ ᖃᓄᐃᓕᐅᕈᑎᐅᔭᕆᐊᓕᖕᓄᑦ ᐊᒻᒪ ᐱᔨᑦᑎᕋᐅᑎᓂᒃ ᐱᓕᕆᐊᖃᐃᓐᓇᕈᓐᓇᖁᓪᓗᒋᑦ. ᑕᐃᕕᑦ ᔪᐊᓇᓯ, ᓄᓇᓕᖕᓂ ᐊᒻᒪ ᒐᕙᒪᒃᑯᓐᓂ ᐱᔨᑦᑎᕋᖅᑎᒃᑯᓐᓄᑦ ᒥᓂᔅᑕ, ᐅᖃᐅᓯᖃᓚᐅᕐᑐᖅ ᒪᑯᓂᖓ ᐃᒥᖅᑕᖃᑦᑕᕐᓂᕐᒥᒃ ᐊᒻᒪ ᑯᕕᖅᑕᖃᑦᑕᕐᓂᖅ ᐱᔨᑦᑎᕋᐅᑎᒻᒪᕆᐅᓂᖏᓐᓂᒃ ᓇᓗᓇᐃᒃᑯᑎᒋᓪᓗᓂᒋᑦ ᐃᑲᔫᑎᑎᒍᑦ ᐃᑲᔪᖅᑕᐅᔪᓐᓇᖅᑐᓂᒃ.
ᔭᓄᐊᕆ 10-ᒥ ᐊᕿᐊᕈᖅ ᐊᐱᕆᓚᐅᕐᓯᒪᔪᖅ ᑲᓇᑕᒧᑦ ᐊᖓᔪᖅᑳᒧᑦ ᔭᔅᑎᓐ ᑐᕉᑑᒧᑦ ᒐᕙᒪᑐᖃᒃᑯᓐᓂᒃ ᐃᑲᔫᑎᒃᓴᒃᑲᓐᓂᕐᓂᒃ ᐱᔪᒪᓪᓗᓂ ᓄᕙᒡᔪᐊᕐᓇᖅ-19-ᒧᑦ ᓄᓇᕗᒥᑦ.
ᐊᕿᐊᕈᖅ ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᑭᐅᓚᐅᕐᑐᑦ ᓇᒡᓯᐅᔾᔨᓂᐊᕐᓂᕋᖅᖢᑎᒃ 140,000-ᓂ ᖃᐅᔨᓴᕈᑎᓂᒃ ᓱᒃᑲᔪᒥᒃ ᖃᐅᔨᑲᐅᖅᑐᕈᑎᒃᓴᓂᒃ ᓄᓇᕗᒧᑦ ᐊᒻᒪᓗ N95 ᑮᓇᒃᐸᖕᓂᒃ, ᐊᒻᒪᓗ ᐃᓕᓐᓂᐊᕐᕕᖕᓂ ᐊᓂᐊᕝᕕᖕᓂᒃ.
ᔭᓄᐊᕆ 13-ᖑᑎᓪᓗᒍ ᔮᓐ ᒪᐃᓐ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᐅᖃᓚᐅᕐᑐᖅ ᐅᑕᖅᑭᓂᕋᖅᖢᓂ ᓱᓕ ᒐᕙᒪᑐᖃᒃᑯᓐᓂᒃ ᓄᓇᕗᑦ ᐋᓐᓂᐊᓯᐅᖅᑎᓂᒃ ᐃᑲᔪᖅᑎᑖᒃᑲᓐᓂᕈᒪᓂᖏᓐᓂᒃ ᐊᒻᒪᓗ ᐃᖅᑲᓇᐃᔭᖅᑎᒃᓴᓂᒃ ᐃᓄᖃᙱᑦᑐᓄᑦ ᐃᓂᒃᓴᓄᑦ ᑕᒪᒃᑯᐊ ᐱᔨᑦᑎᕋᐅᑏᑦ ᒪᑯᑎᑐᓇᖅ ᑲᐱᓯᑲᑕᖃᑦᑕᕐᓂᒃᑯᑦ ᑲᔪᓯᔪᓐᓇᕐᓂᐊᕐᒪᑕ.
ᐃᖅᑲᓇᐃᔭᖅᑎᓄᑦ ᓈᒻᒪᙱᓕᐅᕐᓂᖅ ᑲᐱᔭᐅᔾᔪᑎᓂᒃ ᓄᖅᑲᖅᑎᑦᑎᔾᔪᑎᐅᓕᕐᒪᑦ ᐅᓄᕐᑐᓂᒃ ᓄᓇᓕᖕᓂᒃ ᑖᓐᓇ ᒪᐃᓐ ᐅᖃᖅᖢᓂ ᓇᓗᓇᐃᕐᓯᔪᓐᓇᙱᓐᓂᕋᖅᖢᓂ ᓇᓕᐊᖑᖕᒪᖔᑕ.
“ᐊᐃᑦᑖᖑᒐᓗᐊᖅ ᑕᐃᒪᐃᓕᐅᕆᐊᖃᕋᑦᑕ ᑭᓯᐊᓂᓕ ᑕᒪᓐᓇ ᐃᖅᑲᓇᐃᔮᒃᓴᓕᕆᓂᕐᒧᑦ ᖃᓄᐃᓕᐅᕈᑎᐅᔭᕆᐊᖃᕐᒪᑦ,” ᐅᖃᖅᑐᖅ.
ᑭᓯᐊᓂᓕ ᐅᖃᓚᐅᕐᑐᖅ ᑲᐱᓯᑲᑕᖕᓂᕐᓴᐅᑲᑕᖕᓂᐊᕐᓂᕋᐃᓪᓗᓂ ᑕᒪᑐᒪᓂ ᑕᖅᑭᕐᒥᑦ.
ᐊᕿᐊᕈᖅ ᐅᖃᓚᐅᕐᑐᖅ ᒪᐃᓐ ᐃᓱᒫᓘᑎᖓ ᐃᓱᒫᓘᑎᒋᓂᕋᕆᓪᓗᓂᐅᒃ ᐃᖅᑲᓇᐃᔭᖅᑎᑕᖃᒃᑲᓐᓂᕆᐊᖃᕐᓂᖅ. ᐅᖃᓚᐅᕐᑐᖅ ᑕᒪᑐᒥᖓ ᐱᓕᕆᐊᖃᐃᓐᓇᕐᓂᕋᖅᖢᓂ ᐃᑲᔪᖅᑎᑖᕋᓱᖕᓂᒃᑯᑦ.
ᑏᓇᕇ ᓴᒧᕕᐊᓪ, ᐅᖃᓪᓚᒃᑎᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᓚᐅᕐᑐᖅ 30-ᓂ ᐃᖅᑲᓇᐃᔮᒃᓴᓂᒃ ᐃᓄᖃᙱᓐᓂᕋᐃᓪᓗᓂ ᔭᓄᐊᕆ 13 ᑎᑭᑎᓪᓗᒍ.
Really? Put it to housing instead!