ᓄᓇᕗᑦ ᓴᓂᑐᖓ ᓂᕈᐊᕈᒪᙱᓚᖅ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓄᑦ ᒪᓕᒐᖅᒥ

ᒪᓕᒐᖅ C-15 ᒥᒃᓵᓄᑦ ᐊᐱᖅᑯᑎᒃᓴᐃᑦ ᑭᐅᔭᐅᓯᒪᙱᓚᑦ ᐊᒻᒪᓗ ᑐᐊᕕᐊᕆᔭᐅᓪᓚᕆᒃᖢᓂ, ᐅᖃᖅᑐᖅ ᑕᓂᔅ ᐹᑐᓴᓐ

ᓴᓂᑐ ᑕᓂᔅ ᐹᑐᓴᓐ, ᓄᓇᕗᒥ ᑭᒡᒐᖅᑐᐃᔨᑐᐊᑦᑎᐊᖅ ᖁᑦᑎᖕᓂᖅᓴᓂ ᒪᓕᒐᓕᕆᔨᕐᔪᐊᓂᒃ ᐊᒻᒪᓗ ᐃᓚᒋᔭᐅᓪᓗᓂ ᑲᓐᓲᕕᑎᕝ ᐹᑎᒃᑯᓐᓄᑦ, ᓂᕈᐊᕈᒪᓚᐅᙱᑦᑐᖅ ᐅᓇ ᒪᓕᒐᖅ C-15 ᐱᓕᕆᐊᖑᑎᓪᓗᒍ, ᑖᓐᓇᓗ ᐊᓂᒍᖅᑎᑕᐅᓚᐅᖅᖢᓂ ᔫᓂ 16-ᒥᑦ. (ᐊᔾᔨᙳᐊᖁᑎᒋᔭᐅᔪᖅ)

By ᒥᓚᓂ ᐅᕆᑦᓵᑦ

For an English version of this story, see Nunavut senator abstains from vote on Indigenous human-rights law

ᓄᓇᕗᒧᑦ ᓴᓂᑐ ᑕᓂᔅ ᐹᑐᓴᓐ ᓂᕈᐊᓚᐅᙱᑦᑐᖅ ᒐᕙᒪᑐᖃᒃᑯᑦ ᒪᓕᒐᖓᓂ ᐊᑐᓕᖅᑎᑦᑎᓂᖅᒥᒃ ᔫᓇᐃᑕᑦ ᓇᐃᓴᓐᔅ ᐅᖃᓚᐅᖅᓯᒪᔭᖓ ᓄᓇᖃᖅᑳᖅᑐᑦ ᐱᔪᓐᓇᐅᑎᖃᕐᓂᖏᓐᓂᒃ ᔫᓂ 16-ᒥ.

ᐊᑐᓕᖅᑎᑕᐅᓂᑰᓪᓗᓂ ᔫᓇᐃᑕᑦ ᓇᐃᓴᓐᔅ ᑲᑎᓚᕕᒡᔪᐊᕐᓇᒥ 2007-ᖑᑎᓪᓗᒍ, ᐅᑯᐊ ᔫᓇᐃᑕᑦ ᓇᐃᓴᓐ ᐱᔪᓐᓇᐅᑎᖃᓕᖅᑎᑦᑎᓂᖏᑦ ᓄᓇᖃᖅᑳᖅᑐᓂᒃ (UNDRIP) ᓇᓗᓇᐃᔭᐃᓯᒪᔪᑦ ᒥᑭᓛᒃᑯᑦ ᐊᑐᖅᑕᐅᔭᕆᐊᓕᖕᓂᒃ ᓄᓇᖃᖅᑳᖅᑐᑦ ᖃᓄᐃᑎᑦᑕᐃᓕᓗᒋᑦ, ᐃᓚᖃᖅᖢᓂ ᓇᖕᒥᓂᖅ ᐱᓇᓱᒍᓐᓇᕐᓂᖅᒥᒃ, ᐱᔪᓐᓇᕐᓂᖃᕐᓂᖅᒥᒃ ᓄᓇᖏᓐᓂᒃ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᑎᒍᑦ ᐊᔾᔨᒌᖃᑕᐅᓂᕐᒥᒃ.

ᒪᓕᒐᖅ C-15, ᐊᓂᒍᖅᑎᑕᐅᒪᐅᖅᓯᒪᔪᖅ ᑲᑎᒪᔨᕐᔪᐊᓄᑦ (Senate) ᐱᓇᓱᐊᕈᓯᐅᓚᐅᖅᑐᒥᓐ, ᐃᒪᐃᓕᖓᑎᑦᑎᔭᕆᐊᓕᒃ ᑲᓇᑕᒥ ᒪᓕᒐᖏᑦ ᒪᓕᒃᓯᒪᔭᕆᐊᖃᕐᓂᖏᓐᓂᒃ ᔫᓇᐃᑕᑦ ᓇᐃᓴᓐᔅᑯᑦ ᐅᖃᖅᓯᒪᔭᖏᓐᓂᒃ.

“ᐃᓄᐃᑦ ᐊᒻᒪ ᓄᓇᕗᒻᒥᐅᑕᑦ ᑖᔅᓱᒥᖓ ᒪᓕᒐᖅᒥ ᐊᑐᓕᖁᔨᓚᐅᖅᑑᒐᓗᐊᑦ ᑕᐃᒪᓕ ᓂᕈᐊᕐᓗᒍ ᑭᓯᐊᓂ,” ᐹᑐᓴᓐ ᐊᐱᖅᓱᖅᑕᐅᑎᓪᓗᒍ ᐅᖃᓚᐅᖅᑐᖅ. “ᑭᓯᐊᓂᓕᑦᑕᐅᖅ ᓄᓇᖃᖅᑳᖅᑐᑦ ᐊᓪᓚᐃᑦ ᑖᔅᓱᒥᖓ ᐊᓂᒍᖁᔨᙱᑦᑎᐊᓚᐅᕐᒪᑕ.”

ᑲᓐᓲᕕᑎᕝᑯᓐᓄᑦ ᓈᒻᒪᒃᓴᖅᑎᐅᙱᑦᑐᕐᓇᖅᖢᓂ ᒪᓕᒐᖅ C-15 ᓴᓇᑦᒥᑦ, ᐹᑐᓴᓐ ᐅᖃᓚᐅᖅᑐᖅ ᐃᓱᒫᓘᑎᖃᓚᐅᕐᓂᖓᓂᒃ ᖃᓄᖅ ᑖᓐᓇ ᐋᖅᑭᒃᓱᖅᑕᐅᓚᐅᖅᓯᒪᓂᖓᓂᒃ ᐅᖃᖃᑎᖃᑦᑎᐊᙱᖢᐊᖅᖢᑎᒃ ᓄᓇᖃᖅᑳᖅᑐᓄᑦ ᐱᓕᕆᔨᐅᒋᔭᐅᔪᓄᑦ.

ᐅᓇᓕ “ᓈᒻᒪᙱᓗᐊᖅᑐᐊᓗᒃ”, ᐹᑐᓴᓐ ᐅᖃᖅᑐᖅ, ᐃᓱᒪᒋᓪᓗᒍᑦ ᐅᑯᐊ ᔫᓇᐃᑕᑦ ᓇᐃᓴᓐ ᐱᔪᓐᓇᐅᑎᖃᓕᖅᑎᑦᑎᓂᖏᑦ ᓄᓇᖃᖅᑳᖅᑐᓂᒃ (UNDRIP) ᐱᓇᓱᐊᒐᖃᖅᑎᓪᓗᒋ ᓄᓇᓕᕐᔪᐊᖑᔪᑦ ᓄᓇᖃᖅᑳᖅᑐᓂᒃ ᐅᖃᖃᑎᖃᖃᑦᑕᕆᐊᖃᕐᓂᖏᓐᓂᒃ ᓯᕗᓂᐊᒍᑦ ᐃᓱᒪᓕᐅᕆᓚᐅᖅᑎᓐᓇᒋᑦ ᒪᓕᒐᐅᓂᐊᖅᑐᓂᒃ ᑖᒃᑯᓂᖓ ᐊᒃᑐᐃᓇᔭᖅᑐᓂᒃ.

“ᐃᓱᒪᓇᕐᒪᑦ ᒐᕙᒪᒃᑯᑦ ᑕᒪᑐᒥᖓ ᐱᒋᐊᕐᕕᒋᔭᖓᓂᙶᖅᑐᓂᒃ ᐱᓕᕆᐊᖑᓇᔭᕆᐊᒃᓴᖓᓂᒃ ᐃᒪᓐᓇᐅᙱᑦᑐᖅ ᖁᓛᓂᙶᖅᑐᓂᒃ ᐱᓕᕆᐊᖑᕙᓪᓕᐊᓂᒃᑯᑦ,” ᐹᑐᓴᓐ ᐅᖃᖅᑐᖅ.

ᐅᓄᖅᑐᐃᑦ ᕿᐱᓘᑎᐅᕙᒃᑐᑦ ᓈᒻᒪᙱᓗᐊᖅᑐᓂᒃ ᖃᐅᔨᓴᕋᓱᒍᐃᐅᔪᓂᒃ ᒪᑯᓇᙶᖅᑐᓂ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᑎᒍᒥᐊᖅᑎᐅᔪᓂᒃ ᐳᕌᕕᓐᓯᓂᒃ, ᑕᒪᒃᑯᐊᓗ ᒐᕙᒪᓕᕆᓂᒃᑯᑦ ᐋᖅᑭᒃᓯᒪᓂᖏᑦ ᖃᓄᐃᓕᖓᕈᓘᔭᕐᓂᖅᓴᐅᒻᒪᕆᒃᖢᑎᒃ ᐃᓄᖕᓂᓪᓕ, ᐅᖃᖅᑐᖅ.

“ᐃᓄᐃᑦ ᐋᖅᑭᒃᓱᖅᓯᒪᖕᒪᑕ,” ᐅᖃᖅᑐᖅ, ᓇᓗᓇᐃᖅᓯᓪᓗᓂ ᐊᔾᔨᒌᙱᑦᑑᑎᓂᒃ ᑲᑐᔾᔨᖃᑎᒌᖑᔪᓂᒃ ᐃᓄᐃᑦ ᐱᔪᒪᔭᖏᓐᓄᑦ ᑭᒡᒐᖅᑐᐃᕙᒃᑐᓂᒃ, ᐅᑯᑎᑐᓇᖅ ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᒥ ᐃᓄᐃᑦ ᐃᓅᓱᒃᑐᑦ ᑲᑎᒪᖏᑦ ᐊᒻᒪᓗ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ.

“ᐊᔪᕐᓇᙱᓗᐊᕌᓗᙱᒻᒪᓪᓕ ᓄᓇᖃᖅᑳᖅᑐᓄᑦ,” ᐅᖃᖅᑐᖅ, ᓇᓗᓇᐃᖅᓯᓪᓗᓂ ᒪᑯᓂᖓ ᐃᒻᒪᑲᓪᓚᒃ ᐊᖏᖃᑎᒌᒍᑎᕕᓃᑦ ᐊᒻᒪᓗ ᒫᓐᓇᓕᓴᐅᓕᖅᑐᑦ ᐊᖏᖃᑎᒌᒍᑎᑦ ᐅᖃᐅᓯᖏ ᖃᓕᕇᓕᖓᔭᒻᒪᑕ, ᖃᓄᐃᓕᐅᕈᓯᖏᑦ ᐃᒻᒪᑲᓪᓚᓕᓴᐅᓪᓗᑎᒃ ᐊᒻᒪᓗ ᓂᕈᐊᖅᑕᐅᓯᒪᓂᕐᒧᑦ ᖃᓄᐃᓕᐅᕈᓰᑦ, ᐊᒻᒪᓗ ᓄᓇᖃᖅᑳᖅᑐᑦ ᐊᕕᒃᑐᖅᓯᒪᓂᒃᑯᑦ ᓇᓗᓇᐃᔭᖅᑕᐅᓯᒪᓂᖏᑦ ᐅᕘᓇ ᐊᓪᓚᐃᑦ ᒪᓕᒐᖓᒍᑦ ᐊᒻᒪᓗ ᒪᐅᓇ ᐃᓕᖅᑯᓯᑐᖃᒃᑯᑦ ᐊᕕᒃᑐᖅᓯᒪᔾᔪᓯᖅᑎᒍᑦ.

“ᐅᔾᔨᕐᓇᓗᐊᖅᑑᒐᓗᐊᑦ ᐅᓄᖅᑐᒻᒪᕇᑦ ᐃᓅᖃᑎᒌᔭᐅᓂᑯᑦ ᐃᓚᐅᑎᑕᐅᓯᒪᙱᑦᑎᐊᖅᖢᑎᒃ.”

ᐅᖃᓪᓚᒃᑎᓪᓗᒍ ᓂᕈᐊᕈᒪᙱᔾᔪᑎᒋᔭᖓᓂᒃ ᒪᓕᒐᖅᒥᒃ — ᐊᒻᒪᓗ ᐃᓱᒪᒋᓪᓗᓂᐅᒃ ᐊᑯᓂᐅᓛᖅ ᐅᖃᓪᓚᓚᐅᕋᓱᒋᓪᓗᓂ ᑕᕝᕙᓂ — ᐹᑐᓴᓐ ᐅᖃᒪᐅᕐᒥᔪᖅ ᐅᓄᓗᐊᖅᑐᐊᓗᖕᓂ ᐊᐱᖅᑯᑎᒃᓴᓂ ᑭᐅᓯᒪᙱᓗᐊᕐᒪᑕ ᑖᔅᓱᒪ ᒪᓕᒐᐅᑉ ᒥᒃᓵᓅᖓᔪᓂᒃ.

ᐅᑯᐊ ᐃᓚᖃᖅᖢᑎᒃ ᑭᓱᒻᒪᕆᐅᔭᕆᐊᒃᓴᖏᓐᓂᒃ ᐊᑭᖃᙱᑦᑐᑦ, ᓯᕗᓂᐊᒍᑦ ᑐᓴᐅᒪᑎᑕᐅᓂᒃᑯᑦ ᐊᖏᖅᓯᒪᓂᖅ, ᐊᒻᒪ ᑭᒃᑯᑦ ᐊᖏᖅᓯᒪᔨᐅᔭᕆᐊᖃᕆᐊᖃᕐᒪᖔᑦ.

ᒐᕙᒪᑐᖃᒃᑯᑦ ᓂᕈᐊᖅᑎᑦᑎᓛᕆᐊᒃᓴᖏᓐᓂᒃ ᖃᓂᑦᑐᒃᑯᑦ ᑕᒪᓐᓇ ᑐᐊᕕᕈᑎᐅᓗᐊᓚᐅᕐᒪᑦ, ᐹᑐᓴᓐ ᐅᖃᓚᐅᕐᑐᖅ ᒪᓕᒐᖅᒧᑦ.

“ᐅᔾᔨᕐᓇᓗᐊᕐᒪ ᐊᔭᐅᖅᑕᐅᓗᐊᖅᓯᒪᓂᑦᑎᓐᓂᒃ ᐊᓂᒍᖅᑎᑦᑎᓂᕐᒥᒃ ᒪᓕᒐᕐᒥᒃ,” ᐅᖃᖅᑐᖅ. “ᐅᖃᒻᒪᕆᓚᐅᙱᑦᑐᑦ ᑭᓯᐊᓂᓕ ᑕᐃᒪᓐᓇ ᑐᑭᓯᓇᑦᑎᐊᓚᐅᖅᑐᖅ.”

ᓯᕗᓂᐊᒍᑦ ᒪᓕᒐᐅᓚᐅᖅᑐᖅ, ᓴᖅᑭᑕᐅᓚᐅᖅᓯᒪᔪᖅ 2016-ᒥ, ᐊᓂᒍᖅᑎᑕᐅᓚᐅᖅᓯᒪᙱᒻᒪᑦ ᒪᓕᒐᓕᕆᔨᕐᔪᐊᖅᑎᒍᑦ 2019 ᓂᕈᐊᕐᓇᐅᑉ ᓯᕗᓂᐊᒍᑦ, ᑕᐃᒪᓐᓇᓗ ᓴᓇᑦ ᐱᓕᕆᓂᖏᓐᓂᒃ ᓄᖅᑲᖅᑎᑦᑎᔾᔪᑎᐅᓪᓗᓂ.

ᐹᑐᓵᓐ ᓇᓗᓇᐃᖅᓯᓚᐅᕐᒥᔪᖅ ᐅᑯᐊ ᐃᓄᐃᑦ ᑕᐱᕇᑦ ᑲᓇᑕᒥ ᐱᔪᒪᓚᐅᖅᓯᒪᓂᖏᓐᓂᒃ ᑖᓐᓇ ᒪᓕᒐᖅ ᐋᖅᑭᒋᐊᖅᑕᐅᓯᒪᓗᓂ ᐃᓚᖃᓕᖅᑎᑕᐅᓂᐊᕐᓗᓂ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓄᑦ ᑲᒥᓴᓐᑕᖃᖁᔨᓂᕐᒧᑦ.

ᑭᓯᐊᓂᓕ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ ᐅᖃᓚᐅᖅᑐᖅ ᐅᓇ “ᐱᔮᖅᑯᒧᑦ ᑐᑭᓯᔭᐅᓯᒪᒋᓐᓂᖓᓂᒃ,” ᐆᒧᖓ ᐹᑐᓴᓐᒧᑦ, ᐊᒻᒪᓗ ᑖᒃᑯᐊ ᑲᑐᔾᔨᖃᑎᒌᑦ ᐊᖏᖅᓯᒪᑦᑎᐊᓚᐅᖅᖢᑎᒃ ᒪᓕᒐᖅ

C-15-ᒥ.

“ᐅᖃᓚᐅᕋᑦᑕ ᐅᓇ ᒪᓕᒐᖅ ᐱᐅᓯᕚᓕᖅᑕᐅᔪᓐᓇᕋᔭᕐᓂᖓᓂᒃ ᐱᑕᖃᓕᖅᐸᑦ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓄᑦ ᑭᓪᓕᓯᓂᐊᖅᑎᓂᒃ,” ᐅᐱᐊᑦ ᐅᖃᓚᐅᖅᑐᖅ ᐊᐱᖅᓱᖅᑕᐅᑎᓪᓗᒍ.

ᑖᓐᓇᓕ ᐃᓚᔭᐅᓯᒪᓚᐅᙱᓐᓂᖓᓄᑦ ᒪᓕᒐᖅᒧᑦ, ᐅᐱᐊᑦ ᐅᖃᓚᐅᖅᑐᖅ ᐅᓇ ᑭᒡᓕᓯᓂᐊᖅᑎᖃᓕᕐᓂᖅ ᐱᓕᕆᐊᖑᓂᐊᖅᑐᓂᒃ ᐃᓚᒋᔭᐅᓗᓂ, ᑖᓐᓇᓗ ᐊᑐᓕᕋᔭᖅᖢᓂ ᐅᓇ ᒪᓕᒐᖅ C-15 ᐊᓂᒍᖅᑎᑕᐅᓚᐅᖅᑎᓪᓗᒍ ᐊᒻᒪ ᒪᓕᒐᙳᓪᓚᕆᒡᓗᓂ

ᒫᓐᓇᓕ ᐋᖅᑭᒃᑕᐅᓯᒪᔪᑦ ᐱᓕᕆᔾᔪᑎᒃᓴᐅᔪᑦ ᑭᒃᑯᓕᒫᓄᑦ ᐱᔪᓐᓇᐅᑎᓂᒃ ᓱᕋᐃᔪᓂᒃ ᓄᓇᖃᖅᑳᖅᑐᓄᑦ ᐋᖅᑭᒃᓯᒪᓪᓚᕆᙱᓗᐊᕐᓂᕋᖅᖢᓂᒋᑦ.

“ᐱᑕᖃᙱᒻᒪ ᓄᓇᖃᖅᑳᕐᓂᖅᒧᑦ ᐱᔪᓐᓇᐅᑎᑦᑎᓐᓂ ᑲᒪᒋᔭᖃᕈᓐᓇᕐᓂᕐᒥ ᒪᑯᑎᑐᓇᖅ ᐊᓯᖏᑦ ᑲᓇᑕᒥᐅᑕ ᐱᔪᓐᓇᕈᑎᖏᑦᑎᑐᑦ.”

ᓄᓇᖃᖅᑳᖅᑐᓄᑦ ᐱᔪᓐᓇᐅᑎᓄᑦ ᑭᒡᓕᓯᓂᐊᖅᑎᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐱᓇᓱᒃᓯᒪᔭᖓ 2017-ᒥ ᐱᒋᐊᖅᖢᑎᒃ, ᐃᓂᖃᕈᑎᐅᓇᔭᕐᒪᑦ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᑦᑎᒍᑦ ᑐᓵᔭᐅᔪᓐᓇᕈᑎᓂᒃ.

ᐅᐱᐊᑦ ᐅᖃᓚᐅᖅᑐᖅ ᒪᓕᒐᖅ ᐊᓂᒍᖅᑕᐅᓂᖓ ᓇᓗᓇᐃᒃᑯᑎᑐᐃᓐᓇᐅᙱᓚᖅ ᐊᒻᒪᓗ “ᐊᑯᓂᐊᓗᒃ ᓂᕆᐅᓇᖅᓯᒪᓪᓗᓂ ᑲᓇᑕᒥ.”

“ᖁᕕᐊᓇᖅᑐᐊᓗᒃ ᐃᓱᒪᔪᓐᓇᖅᓯᒐᑦᑕ ᐃᓅᓯᖃᕐᓂᑦᑎᓐᓂᒃ ᒫᓐᓇ ᐅᑯᐊ ᑲᓇᑕᐅᑉ ᒐᕙᒪᖓ ᐃᓕᓴᖅᓯᓯᒪᓕᖅᑎᓪᓗᒍ ᓄᓇᖃᖅᑳᖅᑐᑦ ᐱᔪᓐᓇᐅᑎᖃᕐᓂᖏᓐᓂᒃ,” ᐅᖃᖅᑐᖅ. “ᐅᓇ ᐱᕚᓪᓕᕈᑎᒻᒪᕆᐊᓗᒃ ᓄᓇᒋᔭᑦᑎᓐᓄᑦ.”

Share This Story

(0) Comments

Join the Conversation

Your email address will not be published. Required fields are marked *

*