ᓄᓇᕗᑦ ᓴᓂᑦᑎᐊᖏᓐᓃᑦᑐᑦ ᐅᖃᐅᓯᖃᖅᐳᑦ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓕᕆᓂᕐᒥᑦ ᐅᑭᐅᕐᑕᖅᑐᕐᒥᑦ

ᑭᒡᒐᖅᑐᐃᔨᐅᔪᑦ ᑲᓛᖡᑦ ᓄᓇᖓᓂᒃ, ᑲᓇᑕᒥ ᐊᒻᒪ ᔫᓇᐃᑕᑦ ᓯᑕᐃᑦᔅᒥᑦ ᐅᖃᐅᓯᖃᖅᐳᑦ ᐃᓱᒪᒃᓴᖅᓯᐅᕈᑎᒃᓴᓂᒃ ᐊᒻᒪ ᖃᐅᔨᔾᔪᑎᒋᓂᑯᖏᓐᓂᒃ

ᐳᕉᓄ ᐳᕆᐅᕋ, ᐊᖓᔪᖅᑳᖅ ᖁᓪᓕᖅ ᐆᒻᒪᖁᑎᓕᔨᑦ ᑯᐊᐳᕇᓴᓐᑯᓐᓄᑦ ᓴᕿᑎᑦᑎᕗᖅ ᐅᕙᓂ ᐅᑭᐅᕐᑕᖅᑐᕐᒥ ᓴᙱᒃᑎᕚᓪᓕᖅᑎᑦᑎᓂᕐᒥᒃ ᐊᒻᒪ ᓄᓇᓖᑦ ᐃᓄᐃᓪᓚᒦᑦᑐᓂᒃ ᑲᑎᒪᕕᒡᔪᐊᕐᓇᒥ ᐃᖃᓗᖕᓂᑦ, ᓄᕕᐱᕆ 22, 2019-ᒥᑦ. (ᐊᔾᔨᙳᐊᖅ ᐅᑯᓇᙵᑦ ᐊᒥᐊᓕᑲᒥᑦ Consulate General-ᒥᑦ)

By ᐃᐊᒪ ᑐᕌᓐᑐ

For an English version of this story, see Nunavut’s neighbours gather to discuss the future of renewable energy in the Arctic

ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓕᕆᓂᕐᒥᒃ ᖃᐅᔨᒪᔨᒻᒪᕆᐅᔪᑦ ᐅᑭᐅᕐᑕᖅᑐᕐᒥ ᑲᑎᓚᐅᕐᑐᑦ ᐃᖃᓗᖕᓂ ᓄᕕᐱᕆ 21-ᒥ ᐊᒻᒪ 22-ᒥ ᐃᓱᒪᒃᓴᕐᓯᐅᕈᑎᒃᓴᓕᕆᓪᓗᑎᒃ ᐊᒻᒪ ᖃᐅᔨᔾᔪᑎᒋᓂᑯᖏᓐᓂᒃ ᐅᑭᐅᕐᑕᖅᑐᕐᒥ ᐱᓕᕆᐊᖃᖅᑎᓪᓗᒋᑦ.

ᐅᐸᒍᑎᔪᑦ ᓄᓇᕗᒥᑦ, ᔫᑳᓐ, ᓄᓇᑦᓯᐊᖅ, ᑯᐸᐃᒃ, ᓂᐅᕙᐅᓐᓛᓐ ᐊᒻᒪ ᓛᐸᑐᐊᒥᑦ, ᑲᓛᖡᑦ ᓄᓇᖓᓂᒃ ᐊᒻᒪᓗ ᔫᓇᐃᑕᑦ ᓯᑕᐃᑦᔅ ᐅᖃᐅᓯᖃᓚᐅᕐᐳᑦ ᑲᑕᒍᑎᐅᓯᒪᓂᑯᓂᒃ ᐊᔾᔨᒌᙱᑦᑐᓂᒃ ᐱᓕᕆᐊᖃᖅᑎᓪᓗᒋᑦ ᓄᓇᓕᖕᓂᒃ.

ᑲᑎᖃᑎᒌᖕᓂᐅᔪᖅ, ᑕᐃᔭᐅᔪᖅ Optimizing Operations, Intergrating New Technologies and Engaging Stakeholders (ᐱᐅᓯᕚᓪᓕᖅᑎᑦᑎᓂᖅ ᐊᐅᓚᑕᐅᔪᓂᒃ, ᐃᓚᓕᐅᔾᔨᓂᖅ ᓄᑖᓂᒃ ᐱᓕᕆᔾᔪᑎᒃᓴᓂᒃ ᐊᒻᒪ ᐃᓚᐅᑎᑦᑎᓂᖅ ᑎᒍᒥᐊᖅᑎᓂᒃ), ᐋᖅᑭᒃᑕᐅᓚᐅᕐᓯᒪᔪᖅ ᐊᒥᐊᓕᑲᒥᐅᑦ ᐊᖓᔪᖅᑳᖏᓐᓄᑦ ᐱᓕᕆᖃᑎᖃᖅᖢᑎᒃ ᓄᓇᕗᑦ ᒐᕙᒪᒃᑯᓐᓂᒃ ᐊᒻᒪᓗ ᖁᓪᓕᖅ ᐆᒪᖁᑎᓕᕆᔨᒃᑯᓐᓂᒃ.

ᐳᕉᓅ ᐳᕆᐅᕋ, ᐊᖓᔪᖅᑳᖅ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑯᐊᐳᕇᓴᓐᑯᓐᓄᑦ, ᐅᖃᓚᐅᕐᑐᖅ ᑲᑎᖃᑎᒌᖕᓂᖅ ᖃᐅᔨᖃᑦᑕᐅᑎᒍᑎᐅᓚᐅᕐᑐᖅ ᓈᒻᒪᙱᓕᐅᕈᑎᕕᓂᕐᓂᒃ.

“ᐅᕘᓇᓕ ᐊᑐᓕᕈᒪᓂᕐᒥᒃ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓕᕆᓂᕐᒥᑦ ᓄᓇᑦᑎᓐᓂᒃ, ᖃᐅᔨᔪᒪᒻᒪᕆᒃᑐᒍᑦ ᐊᓯᑦᑎᓐᓂᑦ ᖃᓄᐃᓕᐅᖃᑦᑕᕐᒪᖔᑦ, ᐊᒻᒪ ᖃᐅᔨᕝᕕᒋᓗᑎᒍᑦ ᖃᓄᖅ ᐱᓕᕆᐊᖏᑦᑎᒍᑦ ᐊᓂᒍᐃᕐᓯᒪᑦᑎᐊᕆᐊᒃᓴᖏᓐᓂᒃ ᐅᕝᕙᓘᓐᓃᑦ ᑲᑕᒍᑎᒋᓯᒪᔭᖏᓐᓂᒃ,” ᐳᕆᐅᕋ ᐅᖃᖅᑐᖅ.

ᐳᕆᐅᕋ ᐅᖃᓚᐅᕐᒥᔪᖅ ᐱᒻᒪᕆᐊᓘᒐᓗᐊᖅᑎᓪᓗᒍ ᑭᒡᒐᖅᑐᐃᔨᓂ ᑲᑎᑎᑦᑎᓂᖅ ᐅᖃᐅᓯᖃᕐᓂᐊᕐᓗᑎᒃ ᐅᕐᓱᐊᓗᖕᒥ ᐊᑐᓗᐊᖅᑕᐃᓕᒍᑎᓄᑦ, ᓄᓇᕗᒥᑦ ᖃᓄᐃᓕᐅᕈᓘᔭᕈᑎᑕᖃᕐᒪᑦ ᐅᕙᓂᐅᖓᓂᓪᓕ ᐊᓛᔅᑲᒥᑦ.

“ᐃᓚᖏᑦ ᓄᓇᓖ ᐊᖅᑯᑎᖃᕈᓐᓇᕐᒪᑕ ᑕᐃᒪᓕ ᐃᓄᐃᓪᓚᒦᓗᐊᙱᓚᑦ ᓄᓇᕗᑦ ᓄᓇᓕᖏᓐᓂᒃ. ᑭᓯᐊᓂᓕ ᐅᕙᑦᑎᑐᑦ ᐊᒃᓱᕈᕈᑎᖃᖃᑦᑕᕐᒪᑕ, ᒪᐅᓇ ᐃᓂᖃᕈᓐᓇᕐᓂᒃᑯᑦ, ᐱᓕᕆᐊᖃᕈᓐᓇᖅᑐᓂᒃ ᓄᓇᓕᖕᓂᒃ, ᑕᐃᒪᓕ ᑕᑯᔪᓐᓇᖅᐳᒍᑦ ᐊᔾᔨᐸᓗᖏᓐᓂᒃ ᐊᔪᕈᑎᖃᖅᐸᒃᑐᓂᒃ.”

ᑯᕆᔅ ᐅᕉᔅ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨᒋᔭᐅᔪᖅ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓕᕆᓂᕐᒧᑦ ᐊᓛᔅᑲᒥ, ᐅᖃᓚᐅᕐᑐᖅ ᐊᓛᔅᑲᒥᑦ ᐆᒻᒪᖁᑎᓕᕆᓂᕐᒧᑦ ᐃᑲᔫᑎᖃᕐᓂᖅ ᐃᑲᔫᑎᐅᓯᒪᓂᖓᓂᒃ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓕᕆᓂᕐᒥᒃ ᐱᕙᓪᓕᐊᒍᑎᖃᕈᓐᓇᕐᓂᕐᒥᒃ.

“ᑕᐃᒪᓕ ᓴᓇᔪᓐᓇᕐᓯᓚᐅᕐᐳᒍᑦ 80-ᓂᑦ ᓄᓇᓕᖕᓂᑦ ᐊᑐᕈᓐᓇᕐᓯᑎᓯᒪᔪᓂᒃ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐆᒻᒪᖁᑎᓕᕆᓂᕐᒥᒃ ᖄᖓᒍᑦ ᐅᖅᓱᐊᓗᒃᒥᑦ ᑏᓱᒥ ᐊᑐᖢᑎᒃ. ᑕᐃᒪᓕ ᐃᓱᒪᔪᒍᑦ ᖃᐅᔨᒪᓕᕐᓂᑦᑎᓐᓂᒃ ᖃᓄᖅ ᑕᒪᓐᓇ ᐃᑲᔫᑎᖃᓕᕐᓂᖓᓂᒃ,” ᐅᕉᔅ ᐅᖃᖅᑐᖅ.

ᐅᓇ ᐃᑲᔫᑎᒃᓴᖅ, ᐋᖅᑭᒃᑕᐅᓯᒪᔪᖅ ᓴᕿᑎᑦᑎᕚᓪᓕᕈᑎᐅᓗᓂ ᐊᑐᒃᑲᓐᓂᕈᓐᓇᖅᑐᓂᒃ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᓂᒃ, ᐊᒻᒪ ᐊᓛᔅᑲᒥᐅᓂᒃ ᐃᑲᔪᒻᒪᕆᒍᑎᐅᓪᓗᓂ ᒪᐅᓇ ᐊᑭᑭᓐᓂᕐᓴᐅᓕᖅᖢᑎᒃ ᐆᒻᒪᖁᑎᓄᑦ ᐊᑭᓕᐅᑎᒃᓴᓂᒃ.

ᐅᕉᔅ ᐅᖃᓚᐅᕐᑐᖅ ᐅᓛᔅᑲᐅᑉ ᓂᒋᐊᑕ ᐱᖓᖕᓇᖅᐸᓯᐊᓂᒃ, ᑕᓪᓕᒪᑦ ᓄᓇᓖᑦ ᐱᓕᕆᖃᑎᒌᖕᓂᕋᖅᖢᓂᒋᑦ ᐋᖅᑭᒃᓱᐃᓂᕐᒥᒃ ᐊᓄᕆᑦᑎᐅᑎᓂᒃ ᐊᒻᒪᓗ ᑖᒃᑯᐊ ᐊᑐᓕᖅᖢᓂᔾᔪᒃ ᐆᒻᒪᖁᑎᓕᕆᓂᕐᒧᑦ.

“ᑕᐃᒪᓕ ᑲᑎᕐᓱᕐᓯᒪᔪᒃᑯᑦ ᖃᐅᔨᒪᓂᖅᑕᖃᓕᕐᑐᖅ ᖃᓄᖅ ᐊᐅᓚᑦᑎᓇᔭᕆᐊᒃᓴᒥᒃ ᐊᒻᒪ ᑲᒪᒋᔭᖃᕈᓐᓇᕐᓂᕐᒥᒃ ᐊᓄᕆᑦᑎᐅᑎᓂᒃ ᐊᒻᒪᓗ ᐃᑲᔪᖃᑦᑕᐅᑎᔪᓐᓇᖅᖢᑎᒃ ᐋᕿᒃᓱᐃᓂᒃᑯᑦ,” ᐅᕉᔅ ᐅᖃᖅᑐᖅ.

ᐊᓛᔅᑲᒥ, ᓄᓇᕗᑎᑐᑦ, ᐊᖏᕐᕋᒧᑦ ᐆᒻᒪᖁᑎᓄᑦ ᐊᑭᓕᒐᒃᓴᑦ ᐊᑭᑐᔪᐊᓘᖕᒪᑕ. ᐅᕉᔅ ᐅᖃᓚᐅᕐᑐᖅ ᓄᓇᓖᑦ ᐊᑐᖅᑐᑦ ᐊᓄᕆᑦᑎᐅᑎᓂᒃ ᖃᐅᒻᒪᖁᑎᓄᑐᐃᓐᓇᐅᙱᑦᑐᖅ ᕿᓯᐊᓂ ᐅᖂᓴᐅᑎᓄᑕᐅᖅ.

“ᐃᒪᐃᓕᐅᕐᓯᒪᖕᒪᑕ ᒥᑭᑦᑐᓂᒃ ᐅᖅᑰᓴᐅᑎᓂᒃ ᐃᓄᐃᑦ ᐃᒡᓗᖏᓐᓄᐊᕐᓯᓪᓗᑎᒃ ᑖᒃᑯᐊᓗ ᐊᕙᓗᔭᐅᓯᒪᓪᓗᑎᒃ ᐊᓕᒎᔭᓂᒃ ᓇᑎᕋᒃᓴᐅᖅᑰᔨᔪᓂᒃ. ᐊᓄᕌᕐᓂᕐᓴᐅᓕᕌᖓᑦ, ᐆᒻᒪᖁᑎᒧᑦ ᐅᖅᑰᓴᐅᑎᓄᐊᖅᐸᒃᖢᑎᒃ, ᐊᒻᒪᓗ ᐋᖅᑭᒃᓯᓯᒪᓪᓗᑎᒃ ᒥᑭᑦᑐᑯᓗᖕᒥᑦ ᖃᐅᔨᒍᑎᐅᔪᓐᓇᖅᑐᓂᒃ ᐅᖅᑰᓴᐅᑎᓂᒃ ᐊᒻᒪ ᐆᒻᒪᖁᑎᓕᕆᔨᓄᑦ ᖃᐅᔨᔭᐅᕙᒡᓗᑎᒃ,” ᐅᕉᔅ ᐅᖃᖅᑐᖅ.

“ᑕᒪᒃᑯᐊ ᐊᕙᓗᒋᑎᑕᐅᔪᑦ ᐆᓇᖅᑐᒥᑦ ᓄᖃᖓᑎᑦᑎᔪᕐᓇᕐᓂᖏᓐᓄᑦ, ᑖᓐᓇ ᐅᖅᑯᖏᓐᓇᕈᓐᓇᖅᖢᓂ. ᖃᒥᑎᑕᐅᔪᓐᓇᖅᑐ ᐃᑭᑎᑕᐅᓗᓂᓘᓐᓃᑦ ᐊᖏᕐᕋᕆᔭᐅᔪᓂᒃ ᓈᒻᒪᒋᔭᐅᔪᒧᑦ, ᐊᒻᒪᓗ ᐊᔪᓕᕐᓂᕈᑎᒃ ᐊᓯᐊᓂ ᐅᖅᑰᓴᐅᑎᖃᕈᓐᓇᖅᖢᑎᒃ.”

ᑭᓯᐊᓂᓕ ᑲᓛᖡᑦ ᓄᓇᖓᓂ, ᐋᖅᑭᒃᓱᐃᓂᖅ ᐊᓄᕆᑦᑎᐅᑎᓂᒃ ᐊᔪᕐᓇᕈᔪᒃᓯᒪᖕᒪᑦ, ᐆᒧᖓᓕ ᓂᐅᔅ ᐃᐅᕆᒃ ᕼᐊᒍᕕᔅᑦ, ᐱᓕᕆᔾᔪᑎᓕᕆᓂᕐᒧᑦ ᖃᐅᔨᒪᔨ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ ᓅᒃᒥᑦ.

ᓂᒡᓚᓱᓗᐊᖃᑦᑕᕐᓂᖅ ᐊᒻᒪᓗ ᑖᑯᑖᖃᑦᑕᕐᓂᖅ ᐊᔪᕐᓇᕈᑎᐅᓂᕋᖅᖢᓂᐅᒃ ᐊᓄᕆᑦᑎᐅᑎᓄᑦ ᖃᓪᓗᓈᑦ ᓄᓇᖓᓄᑦ ᓴᓇᓯᒪᔪᓂᒃ ᐅᑭᐅᕐᑕᖅᑐᕐᒥᑦ ᐊᑐᕋᓱᒋᐊᒃᓴᖅ, ᐅᖃᖅᑐᖅ ᕼᐊᒍᕕᔅᑦ.

ᕼᐊᒍᕕᔅᑦ ᐅᖃᓚᐅᕐᒥᔪᖅ ᒪᕐᕉᖕᓂ ᐊᓄᕆᒧᑦ ᐃᖏᕐᕋᔾᔪᑎᒃᓴᓂᒃ ᐋᕿᒃᓱᐃᑦᑎᐊᓚᐅᕐᓯᒪᔫᒐᓗᐊᑦ ᐊᓯᐊᓃᑦᑐᓂᒃ ᓄᓇᒥ ᑲᓛᖡᑦ ᐅᐊᖕᓇᖓᓂᒃ, ᑭᓯᐊᓂᓕ ᐊᔪᓕᓚᐅᕐᓯᒪᔫᒃ.

“ᐅᖃᕈᓐᓇᖅᑐᒍᓪᓗ ᑲᓛᖡᑦ ᓄᓇᖓᓂ ᓂᕈᐊᕐᓂᕐᓴᐅᓯᒪᓂᑦᑎᓐᓂᒃ ᓴᖅᑭᑕᐅᔪᓐᓇᖅᑐᓂᒃ ᐱᓕᕆᔾᔪᑎᒃᓴᓂᒃ ᐊᑐᕈᓐᓇᕐᓂᖏᓐᓂᒃ. ᑖᒃᑯᐊᒡᓘᓐᓃᑦ ᒪᕐᕉᒃ ᐊᓄᕆᑦᑎᐅᑎᒋᔭᐅᔫᑦ ᐋᕿᒃᑕᐅᓂᑯᑦ 200-ᓂ ᐊᔾᔨᒌᙱᑦᑐᓂᒃ ᓄᓇᓂ ᖃᐅᔨᓴᖅᑕᐅᓗᑎᒃ ᐊᒻᒪ ᐱᖃᑎᖓ 150-ᓂ ᓄᓇᓂ ᖃᐅᔨᓴᖅᑕᐅᖕᒥᓗᓂ,” ᐅᖃᖅᑐᖅ.

ᐃᓚᖓᑦ ᐊᓄᕆᑦᑎᐅᑎ ᑕᓕᖓ ᑲᑕᓚᐅᕐᓯᒪᔪᖅ, ᐱᖃᑖᓄᓪᓕ, ᐅᕐᓴᒃᓴᐅᑎᒋᔭᐅᔪᖅ ᐃᔾᔪᖅᑎᓗᐊᓚᐅᕐᒪᑦ ᓂᒡᓚᓱᒃᑐᒧᑦ ᐊᒻᒪᓗ ᐊᐅᓚᐅᑎᖓᓄᑦ ᓱᕋᒍᑎᐅᓪᓗᓂ, ᕼᐊᒍᕕᔅᑦ ᐅᖃᖅᑐᖅ.

2019-ᖑᑎᓪᓗᒍ ᒐᕙᒪᑐᖃᒃᑯᑦ ᓂᕈᐊᒐᒃᓴᐅᑎᓪᓗᒋᑦ, ᐱᖓᓱᑦ ᒐᕙᒪᓕᕆᔨᐅᔪᑦ ᐅᖃᕐᓯᒪᓚᐅᕐᑐᑦ ᓂᕈᐊᖅᑕᐅᒍᑎᒃ ᓄᓇᕗᑦ ᑏᓱᓪ ᐅᕐᓱᐊᓗᖕᒥᑦ ᐊᑐᕈᓐᓃᖅᑎᑕᐅᓛᕐᓂᖓᓂᒃ 2030 ᑎᑭᑉᐸᑦ.

ᐊᑯᓂᐅᓂᐊᖅᑐᒃᓴᐅᒐᓗᐊᖅᑎᓪᓗᒍ ᐋᕿᒃᓱᐃᓂᕐᒥᒃ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐱᓕᕆᐊᒃᓴᓂ ᐊᑐᕈᓐᓇᕐᓂᐊᖅᑐᓂᒃ ᐅᑭᐅᕐᑕᖅᑐᕐᒥᓐ, ᕼᐊᒍᕕᔅᑦ ᐅᖃᓚᐅᕐᑐᖅ ᐅᖅᓱᐊᓗᖕᒥ ᐊᑐᕈᓐᓃᕐᓂᖅ ᑐᐊᕕᕐᓇᕐᓂᕋᖅᖢᓂᐅᒃ.

“ᖃᓄᐃᓕᐅᕆᐊᖃᕋᑦᑕ ᐅᕐᓱᐊᓗᖕᒥ ᐊᑐᕈᓐᓃᕈᓐᓇᕐᓗᑕ, ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᓲᖃᐃᒻᒪ ᒫᓐᓇ ᓈᒻᒪᙱᑦᑐᖅᑕᖄᓂᓕᕐᑐᖅ. ᐅᓇ ᒪᓕᒐᓕᕆᓂᕐᒨᖓᔪᖅ ᓲᖃᐃᒻᒪ ᐅᕐᓱᐊᓗᖕᒥ ᐊᑐᔾᔮᙱᓪᓗᓂ ᐱᓕᕆᔾᔪᑎᑕᖃᕆᐊᖃᕐᒪᑦ ᑭᓯᐊᓂᓕ ᑮᓇᐅᔭᖅᑕᖃᙱᒻᒪ. ᑮᓇᐅᔭᖃᑦᑎᐊᕐᓗᓂ ᐱᓕᕆᐊᒃᓴᑦᑎᐊᖅ, ᐅᖃᖅᑐᖅ.

ᐸᕆᐅᕋ ᐅᖃᓚᐅᕐᑐᖅ ᖃᐅᔨᕚᓪᓕᕐᓇᕐᓂᖓᓂᒃ ᐅᖃᓪᓚᖃᑎᖃᖅᖢᓂ ᓄᓇᕗᑦ ᓴᓂᑦᑎᐊᖓᓂ ᓄᓇᖃᖅᑐᓂᒃ ᐅᑭᐅᕐᑕᖅᑐᕐᒥᑦ.

“ᐃᓱᒪᔪᖓ ᑕᒪᓐᓇ ᐊᓯᐊᒍᑦ ᐃᓱᒪᒃᓴᖅᓯᐅᕈᑎᒋᔭᕆᐊᖃᕐᓂᖓᓂᒃ, ᐃᒪᓐᓇ ᖃᓄᖅ ᐱᓕᕆᐊᖃᓕᖅᐸᓪᓕᐊᒍᓐᓇᕐᓂᕐᒥᒃ ᐊᑐᒃᑲᓐᓂᕈᓐᓇᖅᑐᓂᒃ ᐊᑐᓕᖅᑎᑦᑎᓗᓂ. ᐃᓚᖏᑦ ᐃᓄᐃᑦ ᐊᑐᕐᓯᒪᓕᕐᒪᑕ ᐱᓕᕆᔾᔪᑎᓂᒃ ᐊᒻᒪᓗ ᓈᒻᒪᙱᓕᐅᕈᑎᖃᕐᓯᒪᓪᓗᑎᒃ ᖃᓪᓗᓈᑦ ᓄᓇᖓᓂᒃ ᐊᔪᙱᓐᓂᑰᒐᓗᐊᓂᒃ ᑭᓯᐊᓂᓕ ᐅᑭᐅᕐᑕᖅᑐᕐᒥᑦ ᐊᔪᖅᖢᑎᒃ. ᑕᐃᒪᓕ ᑮᓇᐅᔭᑎᒍᑦ ᐊᔪᕈᓐᓃᕐᓂᕈᑦᑕ ᖃᐅᔨᒪᔾᔪᑎᒋᔪᓐᓇᕐᓂᐊᖅᑕᕗᑦ ᓈᒻᒪᙱᓕᐅᕈᑎᕕᓂᐅᔪᑦ,” ᐸᕆᐅᕋ ᐅᖃᖅᑐᖅ.

Share This Story

(0) Comments

Join the Conversation

Your email address will not be published. Required fields are marked *

*