ᓄᓇᕗᒥᑦ ᐃᓕᓐᓂᐊᕐᕖᑦ ᐅᓄᕕᒡᔪᐊᖅᑐᓂᒃ ᓱᕋᒃᓯᒪᔪᓕᕆᓂᕐᒧᑦ ᓈᒻᒪᙱᓕᐅᕈᑎᖃᖅᑐᑦ

ᓄᓇᕗᒥᑦ ᐃᓕᓐᓂᐊᕐᑏᑦ ᐃᓕᓐᓂᐊᕆᐊᒃᑲᓐᓂᓕᕐᒥᔪᑦ ᐊᕐᕌᒍᒥ ᓄᑖᒥ, ᑭᓯᐊᓂᓕ ᑕᒪᒃᑯᐊ ᐃᒡᓗᕐᔪᐊᑦ ᐃᓕᓐᓂᐊᕐᕕᒋᔭᖏᑦ ᐅᓄᕈᓘᔭᒻᒪᕆᒃᑐᓂᒃ ᓴᓇᔭᐅᔭᕆᐊᖃᖅᑐᖃᖅᖢᑎᒃ, ᐊᒻᒪᓗ ᐃᓛᓐᓂ, ᐋᓐᓂᕈᑎᐅᓕᖅᐸᒃᖢᑎᒃ.

ᓴᓇᔭᐅᔭᕆᐊᓕᖕᓂ ᓴᓇᖁᔨᔾᔪᑎᑦ ᐱᔭᐅᔪᒪᓯᒪᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᕘᓇ ᓄᓇᕗᒥᑦ ᑐᓴᒐᒃᓴᓂᒃ ᐊᑐᐃᓐᓇᖃᕈᓐᓇᕐᓂᕐᒧᑦ ᒪᓕᒐᖅᑎᒍᑦ ᓴᖅᑭᑦᑎᓯᒪᔪᑦ 2022-ᒥ ᔭᓄᐊᕆᐅᓪᓗ ᐊᒻᒪ ᑎᓯᐱᕆᐅᑉ ᐊᑯᓐᓂᖓᓂᒃ ᐅᑯᓇᙶᖅᓯᒪᔪᑦ ᐃᖅᑲᓇᐃᔭᖅᑎᓂ ᓄᓇᕗᒥᑦ 45-ᓂ ᐃᓕᓐᓂᐊᕐᕕᖕᓂ, ᓴᓇᖁᔨᔾᔪᑎᓂᒃ ᑎᑎᕋᖅᑕᐅᔪᕕᓃᑦ ᑲᑎᖢᑎᒃ 3,907-ᖑᓚᐅᕐᓯᒪᔪᑦ ᐅᑯᓄᖓ ᓄᓇᓕᖕᓂ ᐊᒻᒪ ᒐᕙᒪᒃᑯᓐᓂᒃ ᐱᔨᑦᑎᕋᖅᑎᓄᑦ ᒪᑯᓄᖓ ᐱᖁᑎᓂ ᓴᓇᔭᕆᐊᓕᖕᓄᑦ, ᐃᒡᓗᓂ ᓱᕋᒃᓯᒪᔪᓕᕆᓂᕐᒧᑦ ᐊᒻᒪᓗ ᐃᓕᓐᓂᐊᕐᕖᑦ ᓄᓇᖁᑎᒋᔭᖏᓐᓂᒃ ᑲᒪᒋᔭᐅᔭᕆᐊᖃᖅᑐᓄᑦ.

ᐅᑯᐊ ᐱᔪᒪᔾᔪᑎᐅᓯᒪᔪᑦ ᒪᑯᓄᖓ ᓱᕋᒃᓯᒪᔪᓄᑦ ᐋᖅᑭᒋᐊᓕᖕᓄᑦ ᒪᑯᑎᑐᓇᖅ ᑯᑐᐃᓐᓇᔭᑦᑐᓄᑦ ᐃᒪᕐᓄ ᑯᕕᕝᕕᖕᓂᑦ  ᐊᒻᒪ ᐊᐳᑕᐃᔭᖅᑕᐅᔭᕆᐊᖃᕐᓂᕐᓄᑦ ᒪᑯᓄᖓ ᐊᔪᓇᕐᓂᖅᓴᓂᒃ ᓈᒻᒪᙱᓕᐅᕈᑎᓄᑦ ᐅᑯᑎᑐᓇᖅ ᐅᖅᓱᐊᓗᒃᒥ ᑯᕕᔪᖃᕐᓂᕐᒧᑦ.

12 ᐅᖓᑖᓃᑦᑐᑦ ᐃᓕᓐᓂᐊᕐᕖᑦ ᓈᒻᒪᙱᓕᐅᕈᑎᖃᕐᓯᒪᔪᑦ ᒪᑯᓂᖓ ᓯᓚᓪᓕᕐᓃᑦᑐᑦ ᐹᖏᑦ ᑮᒍᑎᖏᓐᓂᒃ ᐊᔪᕐᓂᖏᓐᓄᑦ, ᑕᐃᒪᓐᓇᓗ ᓴᐳᔾᔭᐅᓯᒪᔭᕆᐊᖃᕐᓂᒃᑯᑦ ᓈᒻᒪᙱᓕᐅᕈᑎᖃᓕᔭᓪᖢᑎᒃ ᐊᒻᒪᓘᓐᓃᑦ ᐃᓵᖅᑕᐅᖃᑦᑕᕐᓂᖏᓐᓂᒃ.

“ᐱᖓᓱᑦ ᐃᓕᓐᓂᐊᕐᕕᐅᑉ ᓯᓚᓪᓕᖏᑦᑕ ᐹᖏ ᐋᖅᑭᒃᑕᐅᓚᐅᕐᓯᒪᖕᒪᑕ ᐃᓕᓐᓂᐊᕐᕕᒃ ᓴᓇᔭᐅᑎᓪᓗᒍ. ᑖᒃᑯᐊ ᐹᖏᑦ ᐋᖅᑭᒃᑕᐅᓯᒪᖕᒪᑕ ᒪᑐᓯᒪᓪᓗᑎᒃ ᐃᓕᓐᓂᐊᕐᑎᓂᒃ ᒪᑐᐃᕈᓐᓇᐃᓪᓕᕙᒃᖢᑎᒃ ᐊᓂᕝᕕᒃᓴᖃᕋᓂᓗ ᓇᐅᒃᑯᑐᐃᓐᓇᖅ — ᐅᓇ ᐊᒃᓱᐊᓗᒃ ᖁᐊᕐᓵᕐᓇᓪᓚᕆᒃᑐᖅ ᐱᕐᕈᓗᐊᕿᑦᑕᐃᓕᓂᕐᒧᑦ ᐃᓱᒫᓘᑎᐅᓐᓇᕐᒪᑦ ᑐᐊᕕᕐᓇᖅᑐᖃᖅᑎᓪᓗᒍ,” ᑎᑎᕋᕐᓯᒪᓚᐅᕐᑐᖅ ᐊᑕᐅᓯᖅ ᓴᓇᖁᔭᐅᔾᔪᑎ, ᑎᑎᕋᖅᑕᐅᓂᑯ ᔫᓂ 2022 ᐅᕙᓂ ᐹᑦᓵᓕ ᐃᓕᓐᓂᐊᕐᕕᐊᓗᒃ ᓴᓂᑭᓗᐊᖅᒥ.

ᐅᕙᓂᓕ ᓇᐅᔮᑦ ᑐᓴᕐᕕᒃ ᐃᓕᓐᓂᐊᕐᕕᒃᒥ, ᓄᕕᐱᕆ 2022-ᒥ ᓴᓇᔭᐅᔪᒃᓴᓕᕆᓂᕐᒧᑦ ᑎᑎᖃᓂᒃ, “ᐹᖏᑦ ᒪᑐᓗᐊᖃᑦᑕᕐᒪᑕ ᐊᒻᒪᓗ ᓰᒥᒃᓯᖃᑦᑕᖅᖢᑎᒃ ᓱᕈᓰᑦ ᐊᒡᒐᖏᓐᓂᒃ ᐅᕙᓂ ᐃᓕᓐᓂᐊᓕᓵᕐᓯᒪᔪᑦ ᐃᓕᓐᓂᐊᕐᕕᖓᓂᒃ. ᐊᐱᕆᓯᒪᔭᕗᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᑦ ᐅᓄᕐᓱᐃᖅᖢᑎᒍᑦ ᐃᑲᔪᖅᑕᐅᔪᒪᓪᓗᑕ ᑖᒃᑯᐊ ᐹᖏᑦ ᓱᒃᑲᐃᒡᓕᒃᑲᓐᓂᖅᑕᐅᖁᓪᓗᑎᒍᑦ ᓲᖃᐃᒻᒪ ᖁᐊᕐᓵᕐᓇᖅᑐᐊᓘᖕᒪᑕ.”

“ᓯᓚᓪᓖᑦ ᐹᖏᑦ ᓱᒃᑲᐃᓐᓂᕐᓴᒥ ᒪᑐᕙᓪᓕᐊᖁᒐᑦᑎᒍᑦ. ᐃᓱᒫᓘᑎᖃᕋᑦᑕ ᑕᒪᑐᒥᖓ ᓲᖃᐃᒻᒪ ᓱᕈᓯᐅᑉ ᐃᓄᒐᙳᐊᖏᒃ ᐊᒃᓱᐊᓗᒃ ᐋᓐᓂᓚᐅᕐᓯᒪᖕᒪᑕ ᓰᒥᒃᑕᐅᑎᓪᓗᒍ ᓯᓚᓪᓕᕐᒧᑦ ᐹᒧᑦ,” ᐃᖅᑲᓇᐃᔭᖅᑎᐅᖃᑕᐅᔪᖅ ᑎᑎᕋᓚᐅᕐᑐᖅ ᔫᓂ 2022-ᒥ ᐅᕙᙵᑦ ᐃᓅᔭᖅ ᐃᓕᓐᓂᐊᕐᕕᒃ ᐃᒃᐱᐊᕐᔪᒃᒥ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᖃᐅᔨᓇᓱᓚᐅᕐᓯᒪᔪᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄ ᑕᒪᒃᑯᐊ ᓈᒻᒪᙱᓕᐅᕈᑎᐅᓯᒪᔪᑦ ᓴᓇᔭᐅᓚᐅᕆᐊᒃᓴᖏᓐᓂᒃ ᑭᓯᐊᓂᓕ ᑭᐅᔭᐅᓚᐅᙱᒻᒪᑕ ᑐᓴᒐᒃᓴᓂ ᐱᐊᓂᒃᐸᓪᓕᐊᓕᖅᑎᓪᓗᑕ.

ᔫᒥ ᐃᓕᓐᓂᐊᕐᕕᒃᒥᓪᓕ ᐃᖃᓗᖕᓂ, “ᐊᑯᑦᑐᓂᖅᑕᖃᕐᒪᓐ ᐊᖏᔪᒥᒃ ᐹᖃᕐᕕᐅᓪᓗ ᐊᑭᓐᓇᐅᓪᓗ ᐊᑯᓐᓂᖓᓂᒃ. ᐃᓕᓐᓂᐊᖅᑎ ᐹᒥ ᒪᑐᐃᖓᑎᑦᑎᑎᓪᓗᒍ ᖁᐊᐃᖢᓂ ᓂᐅᖓ ᑕᕝᕗᖓ ᐊᔪᕐᓯᓪᖢᓂ ᐋᓐᓂᕈᑎᖃᓚᐅᕐᒪᑦ,” ᓴᓇᖁᔨᔾᔪᑎᒥ ᑎᑎᕋᖅᓯᒪᓚᐅᕐᑐᖅ ᔫᓂ 2022-ᖑᑎᓪᓗᒍ. ᐅᓇ ᐋᖅᑭᒃᑕᐅᓕᓚᐅᕐᓯᒪᔪᑦ ᕿᓚᒥᕈᓗᒃ ᐅᓪᓗᐃ ᐊᓂᒍᓵᖅᑎᓪᓗᒋ ᐱᕐᕈᓗᐊᕿᔪᖃᓚᐅᕐᑎᓪᓗᒍ, ᐅᖃᕐᓯᒪᓚᐅᕐᑐᖅ ᓴᓇᖁᔨᔾᔪᑎᓂᒃ ᐱᔭᐅᔪᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓂ.

ᐊᓯᖏᑦ ᐱᑕᖃᐃᓐᓇᔭᑦᑐᑦ ᓈᒻᒪᙱᓕᐅᕈᑎᑦ ᑎᑎᕋᖅᑕᐅᓯᒪᔪᑦ ᓴᓇᖁᔨᔾᔪᑎᒃᑯᑦ ᒪᑯᐊᖑᔪᐃᑦ ᐃᓕᓐᓂᐊᕐᕕᐊᕈᓰᑦ ᐅᖅᑰᔪᓐᓇᑦᑎᐊᙱᓐᓂᖏᓐᓂᒃ ᐊᒻᒪ ᓂᒡᓚᓱᑦᑎᐊᒻᒪᕆᖕᓂᖏᓐᓂᒃ, ᖁᕐᕖᑦ ᑯᕖᓐᓇᓕᔭᑦᑐᓂᒃ, ᐃᒥᕐᕖᑦ ᐃᒪᖃᙱᑦᑐᑦ ᐊᒻᒪᓗ ᑯᕕᕝᕕᖕᓄᑦ ᖃᓱᑎᑦᑎᔾᔪᑏᑦ ᑯᑐᔭᐃᓐᓇᖅᑐᑦ ᐊᒻᒪ ᐅᓄᕈᓘᔭᕐᑐᑦ ᐅᕐᓱᐊᓗᒃᒥ ᑯᑐᒃᐸᓪᓕᐊᒍᔾᔨᔪᑦ ᐊᒻᒪ ᖁᐊᔾᔭᐃᒃᑯᑎᓂᒃ ᓱᕈᔾᔭᐃᑯᑎᒋᔭᐅᔪᓂᒃ ᓇᑎᕐᒥ ᓴᖅᑭᑉᐸᓪᓕᐊᔪᓂᒃ.

“ᓇᑎᕐᒥ ᖁᐊᔾᔭᐃᒃᑯᑎᒥ ᑯᑐᒃᐸᓪᓕᐊᔪᖃᖂᕐᒪᑦ ᐃᓕᓐᓂᐊᕐᕕᐊᕈᓯᕐᒥ. ᓴᖅᑭᑉᐸᓪᓕᐊᖕᒪᑦ ᓇᑎᒃᑯᑦ ᐊᒻᒪ ᕿᔪᐃᑦ ᐊᑯᓐᓂᖏᑦᑎᒍᑦ,” ᐃᖅᑲᓇᐃᔭᖅᑎᐅᖃᑕᐅᔪᖅ ᑎᑎᕋᓚᐅᕐᓯᒪᔪᖅ ᒪᐃ 2022-ᒥ ᐅᖃᐅᓯᖃᖅᖢᓂ ᐅᕇᑦᓱᓪ ᐊᕐᓇᒻᒪᑎᖅ ᐃᓕᓐᓂᐊᕐᕕᒃᒥ ᖃᒪᓂᑦᑐᐊᕐᒥ.

ᐃᓵᖅᑐᖃᖃᑦᑕᕐᓂᖅ, ᓯᓚ ᓈᒻᒪᙱᓕᐅᕈᑎᐅᓂᖓ ᐊᒻᒪᓗ ᐱᕋᔭᒃᑕᐅᖃᑦᑕᕐᓂᖅ

ᕼᐊᓚ ᓄᐊᓪ, ᐅᖃᖅᑎᒋᔭᐅᔪᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ, ᐅᖃᓚᐅᕐᑐᖅ ᐱᓕᕆᕝᕕᒃ ᑐᓂᔭᐅᕙᖕᓂᖓᓂᒃ ᒫᙵ 1,500-ᓂ ᒪᐅᖓ 2,300-ᓄᑦ ᐃᓕᓐᓂᐊᕐᕕᒃᒥ ᓱᕋᒃᓯᒪᔪᓂᒃ ᓴᓇᔭᐅᖁᔨᔾᔪᑎᓂᒃ ᐊᕐᕌᒎ ᐃᓗᐊᓂ.

“ᑐᓂᔭᐅᓯᒪᓪᓗᓂ 4,000-ᓂ ᐱᔨᑦᑎᕋᖅᑕᐅᔪᒪᔾᔪᑎᓂᒃ ᐊᒃᓱᐊᓗᒃ ᖁᑦᑎᓗᐊᕐᒪᓐ,” ᐅᖃᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᕼᐋᒻᒪᓚᐅᔪᓂᒃ ᐅᓄᓛᓂᒃ ᐃᓕᓐᓂᐊᕐᕕᒃᓂ ᓴᓇᔭᐅᖁᔨᔾᔪᑎᓂ ᑐᓂᓯᓯᒪᔪᑦ 2022-ᒥ ᐅᑯᐊ ᐊᕐᕕᐊᑦ (675), ᑲᖏᖅᖠᓂᖅ (543), ᐃᖃᓗᐃᑦ (351), ᖃᒪᓂᑦᑐᐊᖅ (335) ᐊᒻᒪ ᐅᖅᓱᖅᑑᖅ (245).

2022-ᒥ ᐅᓄᖅᑐᐃᑦ ᓴᓇᖁᔨᔾᔪᑎᐅᔪᑦ ᐱᔾᔪᑎᖃᓗᐊᓚᐅᕐᑐᑦ ᐱᑐᖃᐅᓕᕐᓂᖏᓐᓄᑦ ᓄᓇᕗᒥᑦ ᐃᓕᓐᓂᐊᕐᕖᑦ, ᑐᐊᓪ ᐅᖃᕐᑐᖅ.

“ᓄᑕᐅᔪᓐᓃᖅᐸᓪᓕᐊᔪᑦ ᐱᓕᕆᕝᕕᐅᔪᑦ ᓄᓇᕗᒥᑦ ᐅᓄᕐᓯᕚᓪᓕᕈᑎᒻᒪᕆᐅᔪᑦ ᓱᕋᒃᓯᒪᔪᓕᕆᓂᕐᒧᑦ ᓈᒻᒪᙱᓕᐅᕈᑎᓂᒃ ᓄᓇᕗᒥᑦ,” ᐅᖃᕐᑐᖅ.

ᖁᓕᑦ (10) 45-ᓂ ᓄᓇᕗᒥᑦ ᐃᓕᓐᓂᐊᕐᕕᖕᓂ ᓴᓇᔭᐅᓚᐅᕐᓯᒪᖕᒪᑕ 1968-ᓗ 1979-ᓗ ᐊᑯᓐᓂᖏᓐᓂᒃ. ᑖᒃᑯᓇᙵᑦ ᐅᑯᐊ ᖁᓗᐊᖅ ᐃᓕᓐᓂᐊᕐᕕᒃ ᑲᖏᖅᑐᒑᐱᖕᒥᑦ ᐊᒻᒪ ᐃᓄᒃᓱᒃ ᐃᓕᓐᓂᐊᕐᕕᐊᓗᒃ ᐃᖃᓗᖕᓂ ᓄᑖᙳᕆᐊᖅᑕᐅᓯᒪᔪᑦ ᐊᕐᕌᒍᑦ 20 ᐃᓗᐊᓂᒃ (ᖁᓗᐊᖅ ᐃᓕᓐᓂᐊᕐᕕᒃ ᒪᕐᕈᐃᖅᑕᐅᓪᓗᓂ, 2002-ᒥ ᐊᒻᒪ 2014-ᒥ; ᐊᒻᒪ ᐃᓄᒃᓱᒃ ᐃᓕᓐᓂᐊᕐᕕᐊᓗᒃ ᐃᖃᓗᖕᓂ ᓄᑖᙳᕆᐊᖅᑕᐅᓯᒪᔪᖅ 2008-ᒥ), ᐅᑯᑎᒎᓇᖅ ᑎᑎᖃᓂ ᓄᓇᑦᓯᐊᕐᒥ ᐱᕙᓪᓕᐊᔪᑦ ᐱᔪᓐᓇᓚᐅᖅᑕᖏᓐᓂᒃ ᐃᓕᓐᓂᐊᕐᓂᓕᕆᔨᒃᑯᓐᓂᒃ.

ᐊᓯᖏᓪᓕ 8 ᐃᓕᓐᓂᐊᕐᕕᐅᔪᑦ ᓄᑖᙳᕆᐊᖅᑕᐅᓯᒪᙱᒻᒪᑕ ᑕᐃᒪᙵᓂᒃ 1990-ᖏᑦ ᐃᓱᓕᓕᖅᑎᓪᓗᒋᑦ.

“ᑕᒪᒃᑯᐊ ᐃᓕᓐᓂᐊᕐᕕᐅᔪᑦ ᐋᖅᑭᒃᓱᖅᑕᐅᓯᒪᒐᓗᐊᖅᖢᑎᒃ ᐊᕐᕌᒍᓂ 25-ᓂ ᐊᑐᕈᓐᓇᕐᓂᖏᓐᓂᒃ, ᓄᓇᓕᖕᓂ ᐊᑐᖅᑕᐅᖃᑦᑕᐃᓐᓇᕐᓂᖏᓐᓄᑦ ᐊᑐᓕᒻᒪᓗᐊᕈᑎᐅᖕᒪᑦ,” ᐅᖃᕐᑐᖅ ᑐᐊᓪ.

“ᓱᕋᒃᓯᒪᔪᓕᕆᓂᖅ ᓇᓗᓇᖃᑦᑕᕐᒪᑦ ᓱᓕ, ᒪᑯᓄᖓ ᐊᑐᖅᑕᐅᖃᑦᑕᕐᓂᖓᓄᑦ ᐊᒻᒪ ᓱᕋᒃᐸᓪᓕᐊᓂᖏᓐᓄᑦ, ᐃᓵᖅᑕᐅᖃᑦᑕᖅᖢᑎᒡᓗ, ᓯᓚᒧᓪᓗ ᓈᒻᒪᙱᓕᐅᕈᑎᖃᖅᐸᒃᖢᑎᒃ ᐊᒻᒪ ᐱᕋᔭᒃᑕᐅᖃᑦᑕᕐᓂᕐᒧᑦ.”

ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᐹᒥᓚ ᒍᕉᔅ ᐅᖃᓚᐅᕐᑐᖅ ᓄᓇᓕᖕᓄᑦ ᒐᕙᒪᒃᑯᓐᓄᓪᓗ ᐱᔨᑦᑎᕋᖅᑎᒃᑯᑦ ᐱᔭᒃᓴᖃᕐᓂᖏᓐᓂᒃ ᓱᕋᒃᓯᒪᔪᓂ ᖃᐅᔨᓴᖃᑦᑕᕆᐊᖃᕐᓂᕐᒥᒃ ᖃᐅᔨᓇᓱᒡᓗᑎᒃ ᓇᐅᒃᑯᑦ ᓴᓇᔭᐅᔭᕆᐊᖃᕐᓂᖏᓐᓂᒃ ᐊᒻᒪᓗ ᐱᓕᕆᕝᕕᐅᔪᑦ ᓈᒻᒪᙱᓕᐅᕈᑎᖏᑦ ᐱᓕᕆᐊᕆᔭᐅᔭᕆᐊᖃᕐᓂᖏᓐᓂᒃ.

ᐅᖃᓚᐅᕐᑐᖅ ᐃᓕᓐᓂᐊᕐᓂᓕᕆᔨᒃᑯᑦ ᐃᑲᔫᑎᖃᖅᑎᑦᑎᕙᖕᓂᖏᓐᓂᒃ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᑦ ᓱᕋᒃᓯᒪᔪᓕᕆᓂᕐᒧᑦ ᐊᒻᒪ ᐊᐅᓚᑦᑎᔾᔪᑎᓄᑦ ᑕᒪᒃᑯᐊ ᐱᓕᕆᐊᒃᓴᐃᑦ ᐱᓕᕆᐊᕆᔭᐅᖃᑦᑕᕐᓂᐊᕐᒪᑕ “ᑭᖑᕙᓯᙱᑦᑐᒃᑯᑦ.”

ᒥᓕᐊᓐᑲᓪᓚᐃᑦ ᓱᕋᒃᓯᒪᔪᓕᕆᓂᕐᒧᑦ

ᓄᓇᕗᒥᑦ ᒐᕙᒪᒃᑯᑦ ᐊᑐᖃᑦᑕᖅᑐᑦ ᒫᓂ $18.1 ᒥᓕᐊᓐ ᑖᓚᓂ ᐃᓕᓐᓂᐊᕐᕕᖕᓂ ᓴᓇᔭᐅᔾᔪᑎᓄᑦ ᐊᕐᕌᒍᑕᒫ ᐃᓚᖃᖅᖢᓂ $11.5 ᒥᓕᐊᓐ ᑖᓚᐃᑦ ᐊᑐᖅᑕᐅᕙᓪᓕᐊᔾᔪᑎᓄᑦ.

ᐅᓇ ᒫᓃᐸᓗᒃᑐᖅ $121.75 ᐊᑕᐅᓯᖅ ᑭᑉᐹᕆᒃᑎᓯᒪᔪᖅ ᒦᑕᒧᑦ ᐃᓕᓐᓂᐊᕐᕕᖕᓂ ᓱᕋᒃᓯᒪᔪᓕᕆᓂᕐᒧᑦ, ᐅᓇ ᒍᕉᔅ ᑕᐃᒪᐃᓐᓂᕋᐃᓚᐅᕐᑐᖅ. ᓲᕐᓗ, ᑰᒑᕐᔪᒃᒥ ᐊᕐᕕᓕᔾᔪᐊᖅ ᐃᓕᓐᓂᐊᕐᕕᒃ 4,000 ᑭᑉᐹᕆᒃᑎᓯᒪᔪᓂ ᒦᑕᓂ ᐊᖏᑎᒋᓂᖃᕐᒪᑦ, ᑕᐃᒪᓐᓇᓗ ᐊᐅᓚᑕᐅᓂᖓ ᐊᒻᒪ ᓱᕋᒃᓯᒪᔪᓕᕆᓂᕐᒧᑦ ᐊᑭᓕᐅᑎᑦ ᑎᑭᐅᑎᕙᒃᑐᑦ ᒪᐅᖓ $487,000 ᐊᕐᕌᒍᒥ.

“ᓱᒃᑲᑎᒋᓂᒃᑯᓪᓕ, ᐱᐅᑦᑎᐊᕋᔭᕐᑐᖅ ᐅᓄᕐᓂᕐᓴᐃᑦ ᐃᓕᓐᓂᐊᕐᕖᑦ ᓄᑖᙳᕆᐊᖅᑕᐅᒃᐸᑕ ᐊᒻᒪ ᓄᑖᓂ ᐃᓕᓐᓂᐊᕐᕕᒃᓂ ᓴᓇᓗᑎᒃ, ᑭᓯᐊᓂᓕ ᐊᐅᓚᑦᑎᔾᔪᑎᒋᕙᒃᑕᕗᑦ ᐃᓱᖃᖃᑦᑕᕐᒥᖕᒪᑕ,” ᐅᖃᕐᑐᖅ.

ᐊᒻᒪᓗ ᓄᑖᙳᕆᐊᖅᑎᑦᑎᖃᑦᑕᕐᓂᖅ ᐊᑭᑭᑦᑐᑯᓘᙱᒻᒪᑦ, ᓴᓪᓗᐃᑦ ᐃᓕᓐᓂᐊᕐᕕᖓ ᓴᒃᑯ ᐃᓕᓐᓂᐊᕐᕕᒃ ᓄᑖᙳᕆᐊᖅᑕᐅᓂᐊᓕᕐᑐᖅ ᐊᑭᖃᖅᑐᒥᒃ $65 ᒥᓕᐊᓐ ᑖᓚᓂᒃ, ᐊᕐᕌᒎᖕᓂ ᒪᕐᕉᖕᓂ ᓴᓇᔭᐅᓂᐊᖅᖢᓂ ᐅᑭᐊᒃᓵᖅ ᐱᒋᐊᕐᓗᑎᒃ ᑖᓐᓇ ᐃᒍᑦᑎᖅᑕᐅᓂᐊᖅᖢᓂ ᓇᖏᕐᕕᖏᓐᓄᓕᒫᖅ. ᑭᖑᓪᓕᖅᐹᒥ ᓄᑖᙳᕆᐊᖅᑕᐅᓚᐅᕐᓯᒪᔪᖅ 2007, ᑭᓯᐊᓂᓕ ᓴᓇᔭᐅᑦᑎᐊᖅᑕᐅᓚᐅᕐᓯᒪᙱᒻᒪᑦ ᐊᐅᓚᔾᔪᑎᒃᓴᖏᓐᓂᒃ ᖄᖏᐅᑎᓯᒪᓗᐊᕐᓂᖏᓐᓄᑦ ᐱᒡᒍᓴᐅᑎᑦᑎᓂᒃᑯᑦ ᐱᓇᓱᒃᑐᓂᒃ, ᐅᖃᕐᑐᖅ ᒍᕉᔅ.

“ᐱᓕᕆᐊᖃᕈᓐᓇᑦᑎᐊᖅᑐᒍᑦ ᐱᓯᒪᔭᕗᑦ ᐊᑐᕐᓗᒋᑦ ᐊᑭᑦᑐᕋᐅᑎᑦᑎᒍᑦ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᒐᕙᒪᒃᑯᑦ ᐊᕐᕌᒍᒧᑦ ᐊᐅᓚᔾᔪᑎᖏᑦᑕ ᓇᑉᐸᖓᑕ ᓇᑉᐸᓪᓗᐊᖏᑦ ᐊᑐᖅᑕᐅᖃᑦᑕᕐᒪᑦ ᐃᓕᓐᓂᐊᕐᓂᓕᕆᔨᒃᑯᓐᓄᑦ.

ᑕᒪᒃᑯᐊᓘᓐᓃᑦ ᓴᓇᔭᐅᔭᕆᐊᖃᕈᑎᐅᔪᑦ ᐱᓕᕆᐊᖑᒐᓗᐊᖅᑎᓪᓗᒋᑦ ᐃᓕᓐᓂᐊᕐᕕᖕᓂ ᐊᒻᒪ ᐋᖅᑭᒋᐊᖅᑕᐅᓇᓱᒃᑎᓪᓗᒋᑦ, ᐅᓇ ᐱᓕᕆᔾᔪᓯᐅᔪᖅ ᐋᖅᑭᒃᓱᐃᖃᑦᑕᕐᓂᒃᑯᑦ ᐊᒻᒪ ᐃᒡᓗᓕᐅᕐᓂᒃᑯᑦ ᐅᑭᐅᕐᑕᖅᑐᕐᒥ ᐃᒪᐃᒻᒪᑦ ᓱᕋᒃᓯᒪᔪᑦ ᐋᖅᑭᒃᑕᐅᓇᓱᒃᐸᖕᒪᒃᖢᑎᒃ ᑕᖅᑭᒐᓴᖕᓂ ᐊᕐᕌᒍᓂᓪᓘᓐᓃᑦ.

“ᐊᒃᓱᕈᕈᓘᔭᕐᓇᕐᒪᑦ ᐅᑭᐅᕐᑕᖅᑐᖅ ᓴᓇᕙᓪᓕᐊᓇᓱᒃᖢᒍ,” ᐅᖃᕐᑐᖅ ᑭᓕᐅᕋᓐᔅ ᓯᓈᑦ, ᐊᖓᔪᖅᑳᖅ ᐊᐅᓚᑦᑎᔨᒻᒪᕆᒃ ᐅᑯᓄᖓ NCC ᐱᕙᓪᓕᐊᔪᓕᕆᔨᒃᑯᑦ ᓕᒥᑎᑦᑯᓐᓄᑦ, ᑖᒃᑯᐊᓕ ᐱᓕᕆᐊᖃᖅᖢᑎᒃ ᖃᓄᐃᓕᖓᓂᒃᓴᓂᒃ ᐊᒻᒪ ᐃᒡᓗᓕᐅᕐᓂᕐᒧᑦ ᖃᓄᐃᓕᐅᕈᑎᓂᒃ ᓄᓇᕗᒥᑦ.

ᑐᓗᕈᑎᐅᔭᑦᑐᑦ ᐃᓚᖃᕐᑐᑦ ᐊᑭᑐᓂᖏᑦ ᐱᖁᑎᑦ ᑎᑭᑎᑕᐅᓇᓱᒃᖢᑎᒃ, ᐅᒥᐊᕐᔪᐊᕐᓗ ᑎᑭᓯᒪᔪᓐᓇᕐᓂᖏᑦ ᐃᓱᖃᕐᓂᖏᓐᓄᑦ, ᐃᓱᖃᕐᓂᖓ ᖃᓄᑎᒋ ᐅᓯᔭᐅᔪᒃᓴᓂ ᐃᓂᒃᓴᓕᐅᕐᓇᖅ ᐅᒥᐊᕐᔪᐊᒃᑯᑦ, ᖃᖓᑕᓲᓄᑦ ᒥᕝᕕᐅᕙᒃᑐᑦ ᑐᐊᐸᐃᑦ ᐅᓄᕐᑐᓂᒃ ᓄᓇᓕᖕᓂᒃ ᓈᒻᒪᙱᓗᐊᕐᓂᖏᓐᓄᑦ ᑕᐃᒪᓐᓇᓗ ᑎᑭᑦᑐᓐᓇᖅᑐᓄᑦ ᐃᓱᖃᕈᑎᐅᒋᓪᓗᓂ, ᐃᒡᓗᓕᐅᕐᓇᖅ ᓇᐃᓐᓂᖓᓄᑦ, ᐊᒻᒪᓗ ᐊᑭᑐᓗᐊᕐᓂᖓ ᐱᖁᑎᓂᒃ ᐋᖅᑭᒃᓱᐃᕙᓪᓕᐊᓂᖅ ᐊᐅᓪᓚᖅᑎᑕᐅᓂᐊᖅᑐᓂᒃ ᐊᒻᒪ ᐃᓂᖃᖅᑎᑕᐅᔭᕆᐊᖃᕐᖢᑎᒃ ᓄᓇᓕᖕᓄᑦ ᑎᑭᓚᐅᖅᑎᓪᓗᒋᑦ.

ᓲᕐᓗ ᐅᓇ ᓇᓗᓇᐃᒃᑯᑎ ᐅᕙᓂ ᓴᓂᕋᔭᒃᒥ ᐊᕐᓇᕐᔪᐊᖅ ᐃᓕᓐᓂᐊᕐᕕᖕᒥ ᐊᕐᕌᒍᓕᒫᑲᓴᒃ ᒪᐃ 2022-ᒥ ᐊᐃᕆᓕ 2023-ᒧ, ᐃᓕᓐᓂᐊᕐᕕᐅᑉ ᐃᓗᐊᓂ ᖃᑦᑎᕈᑎᖏᑦ ᐊᔪᐃᓐᓇᓚᐅᕐᓯᒪᖕᒪᑕ.

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐃᓚᒃᓴᓂ ᑎᑭᓴᐃᓂᑯᑦ ᓴᓇᔭᐅᓂᐊᕐᒪᑦ, ᑭᓯᐊᓂᓕ ᓈᒻᒪᙱᓕᐅᕈᑎᒋᔭᐅᔪᖅ ᐱᑐᐃᓐᓇᐅᙱᓐᓂᕐᓴᐅᓚᐅᕐᒪᑦ ᐊᒻᒪᓗ ᐃᓕᓐᓂᐊᕐᕕᒃ ᐅᑕᖅᑭᒃᑲᓐᓂᕆᐊᖃᓕᖅᖢᓂ ᐃᓚᒃᓴᒃᑲᓐᓂᕐᓂᒃ.

ᑕᒪᓐᓇ ᐱᓕᕆᐊᖑᓇᓱᖕᓂᖓᓂᒃ, ᐃᓕᓐᓂᐊᕐᕕᒃ, ᑖᓐᓇᓗ ᐊᓯᖏᓐᓂᒃ ᓴᓇᔭᐅᔭᕆᐊᖃᖅᑐᖃᕆᓪᓗᓂ, ᐃᑲᕐᕋᓂᒃ  24-ᓂ ᖃᐅᔨᓴᖅᑕᐅᕙᓚᐅᕐᑐᖅ ᐃᑭᓕᙱᒃᑲᓗᐊᕆᐊᒃᓴᖓᓂᒃ ᑕᐃᒪᓐᓇᓗ ᐊᑭᓕᒍᑎᐅᓕᓚᐅᖅᖢᓂ ᓄᓇᕗᒥᑦ ᒐᕙᒪᒃᑯᓐᓄᑦ $200,000-ᓂ ᑲᒪᒋᔭᐅᔭᕆᐊᖃᕐᓂᖓᓄᑦ.

ᐃᓚᖃᕆᓪᓗᓂ ᑭᖑᕙᕆᐊᕈᑎᐅᓂᑯᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐊᒻᒪᓗ ᐊᒃᑐᐃᔾᔪᑎᓄᑦ ᑎᑭᑎᑦᑎᓇᓱᖕᓂᒃᑯᑦ, ᓴᓇᑎᑦᑎᓂᕐᒧᑦ ᐊᒻᒪ ᐊᑭᓕᐅᑎᐅᒃᑲᓐᓂᕆᐊᓕᖕᓂᒃ, ᓯᓈᑦ ᐅᖃᕐᑐᖅ.

“ᐅᑯᐊ ᐊᑭᓕᐅᑎᒃᓴᑦ ᐅᑯᓄᖓ ᐊᑐᕐᑕᐅᕙᒃᑐᑦ ᓴᓇᔨᐅᔪᓄᑦ ᐊᒻᒪ ᐃᒡᓗᓕᐅᕐᓂᕐᒥᒃ ᓇᖕᒥᓂᖃᖅᑎᓄᑦ ᐅᕝᕙᓘᓐᓃᑦ ᓇᖕᒥᓂᖅ ᐃᒡᓗᖃᖅᑐᓄᑦ. ᐱᓕᕆᕝᕕᖃᙱᓗᐊᕐᓂᖅ ᐊᔪᕈᕈᓘᔭᕈᑎᐅᓕᔭᒻᒪᑦ.”

ᑕᑯᒋᐊᖃᑦᑕᕐᓂᐊᖅᐳᓯ ᐃᓚᖓ 2-ᒥ: ᐃᓕᓐᓂᐊᕐᕖᑦ ᒪᑐᔭᕆᐊᖃᓕᕐᐸᑕ: ᐅᕐᓱᐊᓗᖕᒥ ᑯᑐᒃᐸᓪᓕᐊᓂᐅᔪᑦ, ᑯᕕᖅᑕᕐᕕᒃ ᑕᑕᒍᔾᔨᓂᖏᑦ ᓄᓇᕗᒥᑦ ᐃᓕᓐᓂᐊᖅᑎᓂᒃ ᐊᓂᑎᑦᑎᑐᐃᓐᓇᕈᑎᐅᔪᑦ.