ᓄᓇᕗᒥᑦ ᐃᓕᓴᕆᔭᐅᔾᔪᑎᒧᑦ ᓂᕆᐊᕆᔭᐅᔪᑦ ᖁᕕᐊᓲᑎᒋᔭᐅᔪᑦ ᐃᖃᓗᖕᓂ

ᒥᐊᓕᐋᓐ ᐃᓄᐊᕋᖅ ᑕᑦᑐᐃᓂ ᐊᒻᒪ ᑐᕈᑎ ᐊᑐᐊᑦ ᑐᑐ ᑲᖏᖅᖠᓂᖅᒥᐅᑕ ᑕᒪᑐᒪᓂ ᐊᕐᕌᒍᒥ ᐃᓕᓴᕆᔭᐅᔾᔪᑎᒧᑦ ᑎᒃᑯᐊᖅᑕᐅᔪᑦ

ᐃᓐᓇᑐᖃᖅ ᒥᐊᓕᐋᓐ ᐃᓄᐊᕋᖅ ᑕᑦᑐᐃᓂ, ᓴᐅᒥᐊᓂ, ᐃᒃᓯᕚᖃᑎᖃᕐᑐᖅ ᑲᒥᓯᓇ ᐄᕙ ᐋᕆᐊᒃᒥ ᐅᕙᓂ 2022 ᓄᓇᕗᒥᑦ ᐃᓕᓴᕆᔭᐅᔾᔪᑎᒧᑦ ᖁᕕᐊᓲᑎᖃᕐᓂᕐᒥᒃ ᐃᖃᓗᖕᓂ ᐅᒃᑑᐱᕆ 27ᒥ. ᑕᑦᑐᐃᓂ ᑎᒃᑯᐊᖅᑕᐅᓚᐅᕐᓯᒪᖕᒪᑦ ᐃᓕᓴᕆᔭᐅᔾᔪᑎᒧᑦ ᐊᒻᒪ ᐃᓕᓴᕆᔭᐅᔾᔪᑎᑖᕐᓯᒪᓪᓗᓂ ᐱᓕᕆᐊᖓᓄᑦ ᐃᓅᓱᒃᑐᓂᒃ ᐃᑲᔪᖃᑦᑕᕐᓂᕐᒥᒃ ᓄᓇᕗᒥᑦ. (ᐊᔾᔨᓕᐅᕆᔨ ᒧᕌᓪ ᔭᒫᓪ)

By ᒧᕌᓪ ᔭᒫᓪ

For English version, please see Order of Nunavut appointees celebrated at Iqaluit ceremony

ᓄᓇᕗᑦ ᑲᒥᓯᓇ ᐄᕙ ᐋᕆᐊᒃ ᑎᒃᑯᐊᕐᓯᓚᐅᕐᒪᓐ ᒪᕐᕉᖕᓂ ᐃᓅᖕᓂ ᐊᕐᓇᓂ ᐆᒧᖓ ᓄᓇᕗᒥᑦ ᐃᓕᓴᕆᔭᐅᔾᔪᑎᒥ ᐅᒃᑑᐱᕆ 27-ᒥ ᖁᕕᐊᓲᑎᖃᕐᓂᕐᒥᓐ.

ᒥᐊᓕᐋᓐ ᐃᓄᐊᕋᖅ ᑕᑦᑐᐃᓂ ᐊᒻᒪ ᑐᕈᑎ ᐊᑐᐊᑦ ᑐᑐ ᑲᖏᖅᖠᓂᖅᒥᐅᑕᖅ ᑕᒪᑐᒪᓂ ᐊᕐᕌᒍᒧᑦ ᑎᒃᑯᐊᖅᑕᐅᔫᒃ ᐃᓕᓴᕆᔭᐅᔾᔪᑎᒧᑦ. ᐃᓕᓴᕆᔭᐅᓯᒪᓂᖏᓐᓄᑦ ᓄᓇᕗᒥᑦ ᐱᓕᕆᖃᑦᑕᕐᓂᖏᓐᓂᒃ, ᐆᒧᖓ ᐃᓕᓴᕆᔭᐅᔾᔪᑎᑖᖅᑎᑕᐅᓚᐅᕐᑐᑦ ᒪᓕᒐᓕᕆᕕᒡᔪᐊᕐᒥ ᐃᖃᓗᖕᓂ.

ᒥᐊᓕᐋᓐ ᐃᓄᐊᕋᖅ ᑕᑦᑐᐃᓂ ᐃᓕᓴᕆᔭᐅᔪᖅ ᐃᓅᓯᓕᕆᖃᑦᑕᕐᓂᕐᒧᑦ ᐊᒻᒪ ᐃᑲᔪᖅᑐᐃᕙᖕᓂᕐᒧᑦ ᓄᓇᕗᒻᒥᐅᑦ ᐃᓅᓱᒃᑐᖏᓐᓂ ᐊᒻᒪ ᐃᓚᐅᓯᒪᓂᖓᓄᑦ ᑲᓇᑕᒥ ᖃᐅᔨᓇᓯᒃᑐᓂᒃ ᐊᓯᐅᓯᒪᔪᓂᒃ ᐊᒻᒪ ᑐᖁᑕᐅᓯᒪᔪᓂᒃ ᓄᓇᖃᖅᑳᖅᑐᑦ ᐊᕐᓇᓂᒃ ᐊᒻᒪ ᓂᕕᐊᕐᓵᕐᓂ, ᐅᖃᕐᓯᒪᓚᐅᕐᑐᖅ ᔫᓂ 13-ᒥ ᑐᓴᒐᒃᓴᓕᐊᕕᓂᕐᓂᒃ ᓄᓇᕗᒥᑦ ᖃᐅᔨᒪᔨᕆᔭᐅᔪᓄᑦ ᑲᑎᒪᔨᓄᑦ.

ᖃᐅᔨᒪᔭᐅᖕᒥᔪᖅ ᐃᑲᔪᖃᑦᑕᕐᓯᒪᓂᖓᓂᒃ ᐃᓄᖕᓂ ᐅᐸᒃᓯᒪᕙᓚᐅᕐᓯᒪᓂᖓᓂᒃ ᐳᕙᒡᓗᒋᐊᖅᑐᖅᑐᓂᒃ ᑭᓕᐅᕗᐊᑐ ᓚᐃᒃᒥ 1950-ᖏᓐᓂ.

ᑐᕈᑎ ᐊᑐᐊᑦ ᑐᑐ ᐊᑯᓂᐊᓗᒃ ᓄᓇᓕᖕᓂ ᐃᑲᔪᖅᑎᐅᖃᑦᑕᕐᓯᒪᔪᖅ ᐃᖅᑲᓇᐃᔮᖃᕐᓯᒪᓪᓗᓂ ᐃᓚᖃᕐᑐᓂᒃ ᐅᑯᓂᖓ ᓄᓇᕗᒥᑦ ᓯᓚᑦᑐᖅᓴᕐᕕᒃᒥ ᐊᒻᒪᓗ ᕈᐃᐅᓪ ᑲᓃᑎᐊᓐ ᐅᓇᑕᖅᑐᒃᓴᙳᐊᓂᒃ. ᐃᓕᓴᕆᔭᐅᓯᒪᔪᖅ ᐊᔾᔨᒌᙱᑦᑐᓂ ᐃᓕᓴᕆᔭᐅᔾᔪᑎᓂᒃ ᐃᓚᖃᖅᖢᓂ ᑯᐃᓐ ᐃᓕᓴᐱ II ᑕᐃᒪᓐ ᔫᐱᓖ ᐃᓕᓴᕆᔭᐅᔾᔪᑎᒥᒃ (Queen Elizabeth II Diamond Jubilee Medal) ᐊᒻᒪᓗ ᒐᕙᓇ ᔭᓄᕈᒧᑦ ᐳᓛ ᐃᓕᓴᕆᔭᐅᔾᔪᑎᒥᒃ (Governor General’s Polar Medal).

ᑐᕈᑎ ᐊᑐᐊᑦ ᑐᑐ ᑐᒡᓕᕆᔭᐅᓚᐅᕐᑐᖅ ᐊᕐᓇᖅ ᑎᒃᑯᐊᖅᑕᐅᓪᓗᓂ ᐆᒧᖓ 2022 ᓄᓇᕗᒥᑦ ᐃᓕᓴᕆᔭᐅᔾᔪᑎᒧᑦ ᖁᕕᐊᓲᑎᖃᕐᓂᕐᒥᒃ ᐃᖃᓗᖕᓂ. ᐃᓕᓴᕆᔭᐅᓚᐅᕐᑐᖅ ᐱᓕᕆᐊᖓᓄᑦ ᐊᑯᓂᐊᓗᒃ ᐃᑲᔪᖅᑎᐅᓪᓗᓂ ᓄᓇᓕᖕᓂ ᐊᒻᒪᓗ ᐃᖅᑲᓇᐃᔮᖃᓕᒪᓪᓗᓂ ᐅᑯᓇᓂ ᓄᓇᕗᒥᑦ ᓯᓚᑦᑐᖅᓴᕐᕕᒃᒥ ᐊᒻᒪᓗ ᕈᐃᐅᓪ ᑲᓃᑎᐊᓐ ᐅᓇᑕᖅᑐᒃᓴᙳᐊᓄᑦ. (ᐊᔾᔨᓕᐅᕆᔨ ᒧᕌᓪ ᔭᒪᓪ)

“ᑕᒪᑐᒪᓂ ᐊᕐᕌᒍᒧ ᐃᓕᓴᕆᔭᐅᔾᔪᑎᒧᑦ ᑎᒃᑯᐊᖅᑕᐅᓯᒪᔪ ᓄᓇᕗᒥᑦ ᐃᓕᓴᕆᔭᐅᔾᔪᑎᒥ ᐅᑯᐊ ᐊᕐᓇᐃᑦ ᐱᓕᕆᐊᖏᑦᑎᒍᑦ ᐱᔨᑦᑎᕋᐅᑎᑎᒍᓪᓗ ᐃᑲᔪᕐᓯᒪᓪᓚᕆᖕᒪᑕ ᐅᓄᒻᒪᕆᒃᑐᓂᒃ ᓄᓇᕗᒻᒥᐅᓂᒃ.” ᐅᖃᓚᐅᕐᑐᖅ ᒪᓕᒐᓕᕆᕕᒡᔪᐊᕐᒥ ᐅᖃᓪᓚᒃᑎᖓ ᐊᒻᒪ ᖃᐅᔨᒪᔨᓄᑦ ᑲᑎᒪᔨᓄᑦ ᐃᒃᓯᕙᐅᑕᖅ ᐆᓂ ᐊᑯᐊᒃ ᑐᓴᒐᒃᓴᓕᐊᒃᑯᑦ.

ᐅᓇ ᓄᓇᕗᒥᑦ ᐃᓕᓴᕆᔭᐅᔾᔪᑎ ᖁᑦᑎᖕᓂᖅᐹᖑᔪᖅ ᐃᓕᓴᕆᔭᐅᔾᔪᑎᓂᒃ ᓄᓇᕗᒥᑦ ᐊᒻᒪᓗ ᐱᓪᓚᕆᐅᓂᕐᓴᐅᓪᓗᓂ ᐊᓯᓕᒫᖏᓐᓂᒃ, ᐃᓕᓴᕆᔭᐅᔾᔪᑎᐅᕙᒃᑐᓂᒃ ᐅᑯᓇᙵᑦ ᓄᓇᕗᒥᑦ ᒐᕙᒪᒃᑯᓐᓂ.

ᐅᓇ ᐱᒋᐊᓚᐅᕐᓯᒪᔪᖅ ᔭᓄᐊᕆ 2010-ᒥ ᐊᒻᒪᓗ ᑐᕌᖅᖢᓂ ᐃᓕᓴᕆᔾᔪᑎᐅᓗᓂ ᐃᓄᖕᓂ ᓄᓇᕗᒥᑦ ᐃᑲᔪᕐᓯᒪᓪᓚᕆᒃᑐᓂᒃ.

Share This Story

(0) Comments

Join the Conversation

Your email address will not be published. Required fields are marked *

*