ᓄᓇᕗᒥᑦ ᐋᖅᑭᒋᐊᖅᑕᐅᓯᒪᔪᑦ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᕐᔪᐊᖅ ᐋᖅᑭᒃᓱᐃᓯᒪᔪᖅ ᑐᙵᕕᒃᓴᓂᒃ ᐃᓄᐃᑦ ᐅᖃᐅᓯᖏᓐᓄᑦ

ᒪᓕᒐᖅ 25 ᐃᓗᓃᑦᑐᑦ ᐊᑐᖅᐸᓪᓕᐊᓕᕐᓂᐊᖅᑐᑦ ᑭᖑᓪᓕᕐᒥ ᐃᓕᓐᓂᐊᕐᓇᐅᓛᕐᑐᒥ

ᑕᐃᕕᑎ ᔪᐊᓇᓯ, ᓄᓇᕗᒥᑦ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ, ᓴᖅᑭᑎᑦᑎᓕᓚᐅᕐᒪᑦ ᒪᓕᒐᖅ 25-ᒥ, ᒪᓕᒐᖅ ᐋᖅᑭᒋᐊᖅᑎᑦᑎᔪᓐᓇᕐᑐᖅ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᕐᒥᒃ ᐊᒻᒪᓗ ᐃᓄᐃᑦ ᐅᖃᐅᓯᖏᓐᓂ ᓴᐳᔾᔨᓯᒪᓂᕐᒧᑦ ᒪᓕᒐᕐᒥᒃ. (ᐊᔾᔨᓕᐅᕆᔨ ᒦᒐᓐ ᑑᓕᖕ)

By ᒦᒐᓐ ᑑᓕᖕ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Nunavut’s amended Education Act lays a foundation for Inuit-language instruction, legislators say

ᖃᖓᑦᑎᐊᓵᖅ ᐋᖅᑭᒋᐊᕈᑎᐅᓚᐅᕐᑐᑦ ᓄᓇᕗᒥᑦ ᐃᓕᓐᓂᐊᕐᓂᓕᕆᓂᕐᒥᒃ ᐊᒻᒪ ᐃᓄᐃᑦ ᐅᖃᐅᓯᖏᓐᓂᒃ ᓴᐳᔾᔨᓯᒪᓂᕐᒧᑦ ᒪᓕᒐᕐᓂᒃ ᐋᖅᑭᒃᓯᒪᔪᑦ “ᐊᑐᓕᕈᓐᓇᕐᓗᑎᒃ ᐊᒻᒪ ᐱᒻᒪᕆᐅᔪᓂᒃ” ᐱᓕᕆᐊᖃᕐᓂᕐᒥᒃ ᐃᓄᒃᑐᑦ ᐊᑐᖅᑕᐅᔪᓐᓇᓕᕐᓂᐊᕐᓗᓂ ᐃᓕᓐᓂᐊᕐᕕᖕᓂ ᓄᓇᕗᒦᑦᑐᓂᒃ, ᒪᓕᒐᓕᕆᔨᐅᔪᑦ ᐅᖃᖅᑐᑦ.

ᒪᓕᒐᖅ 25, ᐱᖓᔪᖓᓂᒃ ᐅᖃᓕᒫᖅᑕᐅᑎᓪᓗᒍ ᐊᖏᖅᑕᐅᓚᐅᕐᓯᒪᔪᖅ ᒪᓕᒐᓕᕆᕕᒡᔪᐊᒥ ᓄᕕᐱᕆ    5-ᖑᑎᓪᓗᒍ, ᐋᖅᑭᒃᓯᓯᒪᔪᖅ ᖃᓄᐃᓕᐅᕐᐸᓪᓕᐊᒍᑎᐅᓂᐊᕐᑐᓂᒃ ᐅᖃᐅᓯᓕᕆᓂᕐᒧᑦ ᖃᓄᐃᓕᐅᕈᑎᒃᓴᓂᒃ ᐃᓕᓐᓂᐊᖅᑕᐅᓂᐊᕐᑐᓂᒃ ᐃᓄᒃᑑᖓᓗᓂ ᑕᒪᐃᓐᓄᓕᒫᖅ ᒍᕇᓄᑦ 2039 ᑎᑭᑎᓪᓗᒍ.

ᓯᕗᓂᐊᓂ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖅ, ᑖᓐᓇᓗ 2008-ᒥᑦ ᐱᒋᐊᖅᖢᓂ ᐊᑐᖅᑕᐅᓯᒪᓪᓗᓂ, ᑐᕌᒐᖃᖅᑐᖅ ᐃᓕᓴᐅᔩᑦ ᐃᓄᒃᑎᑐᑦ ᐊᑐᕐᓗᑎ ᐃᓕᓴᐃᖃᑦᑕᕐᓕᕐᓂᐊᕐᓗᑎᒃ 2020 ᑎᑭᑉᐸᑦ, ᑖᔅᓱᒧᖓᓗ ᐋᑕᒻ ᐋᕆᐊᒃ ᓚᐃᑦᓯᑑᓐ, ᒪᓕᒐᓕᕆᔨᐅᖃᑕᐅᔪᖅ ᑭᒡᒐᖅᑐᐃᓪᓗᓂ ᐃᖃᓗᐃᑦ-ᒪᓂᕋᔭᒃᒥᑦ ᐅᖃᐅᓯᕆᓯᒪᓪᓗᓂᐅᒃ “ᑕᐃᒪᐃᓪᓚᕆᙱᓐᓂᕋᖅᖢᓂᐅᒃ.”

“ᐃᓚᖏ ᐅᖃᑐᐃᓐᓇᕆᐊᖃᕐᒪᑕ ᑕᒪᓐᓇ ᐱᓕᕆᐊᖑᔪᒪᓗᐊᓚᐅᕐᓯᒪᓂᕋᖅᖢᓂᔾᔪᑦ ᐊᒻᒪᓗ ᐱᔾᔪᑎᐅᖃᑕᐅᔪᒃᓴᐅᓪᓗᓂ ᒫᓐᓇ ᖃᓄᐃᓕᖓᓕᕐᓂᑦᑎᓐᓄᑦ,” ᓚᐃᑦᓯᑑᓐ ᐅᖃᓚᐅᕐᑐᖅ ᒪᓕᒐᓕᕆᕕᒡᔪᐊᒥᑦ ᓄᕕᐱᕆ 5-ᒥᑦ ᐅᑯᐊ ᒪᓕᒐᓕᐅᕐᑎᐅᔪᑦ ᒪᓕᒐᖅ 25-ᒥᑦ ᐱᓕᕆᐊᖃᓚᐅᕐᑎᓐᓇᒋᑦ ᐅᖃᐅᓯᐅᕙᓪᓕᐊᓂᖏᑦᑎᒍᑦ.

ᓚᐃᑦᓯᑑᓐ ᐅᖃᓚᐅᕐᑐᖅ ᓯᕗᓪᓕᕐᒥ ᑲᒪᓗᐊᓚᐅᕐᓯᒪᓂᖓᓂᒃ ᐱᓕᕆᓂᕐᒧᑦ ᐃᓱᖃᕐᕕᐅᑎᑕᐅᔪᓂᒃ ᐅᕙᓂ ᐋᖅᑭᒋᐊᕐᓯᒪᔪᒥᑦ ᐱᖁᔭᒥᓐ.

“ᖃᐅᔨᓕᓚᐅᕋᒪ ᑕᒪᒃᑯᐊ ᐋᖅᑭᒃᓯᒪᔪᑦ ᓴᖅᑭᑕᐅᓂᑯᑦ ᐊᑐᓕᕈᓐᓇᕐᓗᑎᒃ ᐊᒻᒪ ᐱᒻᒪᕆᐅᓪᓗᑎᒃ,” ᐅᖃᖅᑐᖅ.

ᐅᓇ ᒪᓕᒐᖅ 25 ᐊᓂᒍᖅᑎᑕᐅᓂᐊᓵᖅᑎᓪᓗᒍ ᐃᒃᐸᒃᓴᖓᓂ, ᓄᓇᕗᑦ ᑐᙵᕕᒃ ᑎᒥᖓ ᒪᓕᒐᓕᐅᖅᑎᓂᒃ ᑖᔅᓱᒥᖓ ᐊᖏᖁᔨᙱᖢᑎᒃ.

ᑎᑎᖃᑎᒍᑦ, ᓄᓇᕗᑦ ᑐᙵᕕᒃᑯᑦ ᑎᑎᕋᓚᐅᕐᑐᑦ ᐅᓇ ᒪᓕᒐᖅ 25 “ᓴᓂᖅᑯᑦᑎᓯᒪᖕᒪᑦ ᑭᐅᔨᐅᔭᕆᐊᖃᕐᓂᕐᒥᒃ ᐃᓕᓐᓂᐊᖅᑐᑦ ᐅᓄᕈᓐᓃᕐᐸᓪᓕᐊᓂᖏᓐᓄᑦ ᐊᒻᒪᓗ ᐃᓕᓐᓂᐊᖅᑐᑦ ᐊᔪᕈᓐᓃᖅᐹᓪᓕᐊᓂᖏᓐᓄᑦ ᓇᓗᓇᐃᒃᑯᑎᓂᒃ ᐊᒻᒪᓗ ᐱᔨᑦᑎᕋᐅᑎᖃᙱᓗᐊᕐᓂᖏᓐᓂᒃ ᐃᓕᓐᓂᐊᒃᑲᓐᓂᕈᑎᒃᓴᓂᒃ.”

ᐊᐱᕐᓱᖅᑕᐅᑎᓪᓗᒋ ᒪᓕᒐᖅ ᐊᓂᒍᖅᑎᑕᐅᓚᐅᙱᑎᓪᓗᒍ, ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦᑕ ᑐᒡᓕᖓ ᔭᐃᒥᓯ ᐄᑐᓗᒃ ᐅᖃᓚᐅᕐᑐᖅ ᑖᓐᓇ ᐃᓕᖅᑯᓯᕐᒥ ᐊᓯᐅᑎᑦᑎᒍᑎᐅᑐᐃᓐᓇᕐᓂᐊᕐᓂᕋᖅᖢᓂᐅᒃ ᐅᖃᐅᓯᕐᓂᒃ.

ᔮᓐ ᒪᐃᓐ, ᒪᓕᒐᓕᐅᕐᑎ ᐊᕐᕕᐊᑦ ᐅᐊᖕᓇᖓᓄᑦ—ᑎᑭᕋᕐᔪᐊᕐᒧᑦ ᐊᒻᒪᓗ ᐃᒃᓯᕙᐅᑕᕆᔭᐅᓪᓗᓂ ᑲᑎᒪᔨᕋᓛᓂᒃ ᒪᓕᒐᓕᕆᓂᕐᒧᑦ ᐅᖃᓚᐅᕐᑐᖅ ᑲᑎᒪᔩᑦ ᐱᔭᒃᓴᖃᕐᒪᑕ ᕿᒥᕐᕈᐊᕐᓂᕐᒥᒃ, ᐋᖅᑭᒃᓱᐃᒃᑲᓐᓂᕐᓂᕐᒥᒃ ᐊᒻᒪᓗ ᐋᖅᑭᒋᐊᕐᓯᓂᕐᒥᒃ ᒪᓕᒐᕐᓂᒃ ᓴᖅᑭᑕᐅᔪᓂᒃ ᒐᕙᒪᒃᑯᓐᓄᑦ.

“ᐱᓕᕆᐊᒃᓴᒥᑦ ᐊᑐᕋᓱᒻᒪᕆᒃᖢᓂ ᐊᔪᕐᓇᖃᑦᑕᕐᒥᖕᒪᑦ,” ᐅᖃᖅᑐᖅ.

“ᑲᑎᒪᔨᕋᓛᑦ ᐃᒪᐃᖁᔭᐅᓚᐅᕐᓯᒪᔪᑦ ᐋᒃᑳᑦᑎᐊᒻᒪᕆᒡᓗᒍ ᒪᓕᒐᖅ 25 ᑕᒪᐃᑎᒍᑦ,” ᒪᐃᓐ ᐅᖃᖅᑐᖅ. “ᑭᓯᐊᓂᓕ, ᐱᔭᒃᓴᑦᑎᒍᑦ ᑐᐊᕕᕆᐊᖃᙱᓐᓇᑦᑕ ᐃᓱᒪᓕᐅᕆᓇᓱᒃᓗᑕ.”

ᑲᑎᒪᔨᕋᓛᑦ ᐃᓱᒫᓘᑎᖃᓚᐅᕐᑐᑦ ᖃᓄᑎᒋ ᐊᑯᓂᐅᓇᔭᕆᐊᒃᓴᖓᓂᒃ ᐃᓕᓐᓂᐊᕈᑎᒃᓴᑦ ᐃᓄᒃᑐᑦ ᐃᓕᓐᓂᐊᖅᑎᑦᑎᒍᑎᐅᓕᕐᓂᖓᓄᑦ, ᒪᐃᓐ ᐅᖃᖅᑐᖅ.

“ᓄᓇᕗᒻᒥᐅᑕᑦ ᑕᒪᑐᒧᖓ ᓂᕆᐅᒋᔭᖃᕈᓘᔭᕐᒪᑕ ᐊᒻᒪᓗ ᐅᖃᐅᓯᖅ ᐊᓯᐅᑐᐃᓐᓇᕐᓂᐊᕆᐊᒃᓴᖓᓂ ᐅᓗᕆᐊᕆᔭᐅᒻᒪᕆᒃᖢᓂ ᐊᒻᒪᓗ ᐱᕕᖃᕈᓐᓃᖂᔨᒋᓕᕐᖢᑕ,” ᐅᖃᖅᑐᖅ.

ᑕᐃᕕᑎ ᔪᐊᓇᓯ, ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ, ᑭᐅᖃᑦᑕᓚᐅᕐᑐᖅ ᒪᓕᒐᓕᐅᕐᑎᓄᑦ ᐊᐱᕆᔭᐅᔭᕌᖓᑦ ᒪᓕᒐᖅ ᐅᖃᐅᓯᐅᕙᓪᓕᐊᑎᓪᓗᒍ. ᒪᐃᓐ ᐊᐱᕆᓚᐅᕐᑐᖅ ᖃᓄᖅ ᐃᓱᒪᔭᕆᐊᒃᓴᖓᓂᒃ ᐃᓕᓐᓂᐊᖅᑎᑦᑎᒍᑎᐅᓂᐊᕐᑐᖅ ᐅᖃᐅᓯᖅ ᐅᖃᐅᓯᐅᓗᐊᕆᐊᒃᓴᖓᓂᒃ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓂ ᓄᓇᕗᒻᒥᐅᓂᒡᓗ ᓈᒻᒪᒋᔭᐅᓗᐊᙱᖢᓂ.

“ᐅᓇ ᐊᒃᑐᐊᓂᖃᕐᒪᑦ ᐃᓱᒪᓂᕐᒥ ᐅᖃᐅᓯᑦᑎᓐᓂᒃ ᐊᓯᐅᔨᓂᐊᕆᐊᒃᓴᖅ ᐊᒻᒪᓗ ᑕᒪᓐᓇ ᐃᒻᒥᒧᑦ ᐃᒃᐱᖕᓇᓗᐊᕐᖢᓂ,” ᔪᐊᓇᓯ ᐅᖃᖅᑐᖅ.

“ᐅᓇ ᒪᓕᒐᖅ ᐱᒍᒃᑯ ᐊᒻᒪᓗ ᐃᓚᒋᔭᐅᑐᐃᓐᓇᕐᓗᖓ ᐃᓄᖕᓂ ᑕᑯᓗᒍ ᐅᖃᕐᓗᖓ, “ᐅᐊᑲᓪᓚᕈᓗᖔ! ᐃᓄᒃᑎᑐᑦ ᐅᖃᐅᓯᓕᕆᓂᕐᒥ ᐃᒪᐃᓕᐅᑐᐃᓐᓇᕐᓂᐊᕐᒪᑖ ᐅᖃᐅᓯᕐᓂ ᐊᔪᕈᓐᓃᕐᓴᕈᑎᖃᕐᓗᑎᒃ ᑎᑎᕋᐅᔭᒐᖅᑎᒎ? ᒪᐃᓐ ᐅᖃᖅᑐᖅ.

ᐊᐱᕆᒃᑲᓐᓂᕆᓪᓗᓂ ᔪᐊᓇᓯᒧᑦ ᑕᒻᒪᕐᓯᒪᙱᑦᑕᕆᐊᒃᓴᖓᓂ ᐅᖃᕐᓗᓂ ᒪᓕᒐᖅ 25 ᑐᑭᖃᕐᓂᖓᓂᒃ ᐅᖃᐅᓯᕐᓂ ᐊᔪᕈᓐᓃᕐᓴᕈᑎᑐᐃᓐᓇᐅᓂᐊᕐᓂᖓ ᐃᓕᓐᓂᐊᕈᑎᑐᐊᖑᓂᐊᕐᓂᖓᓂᒡᓗ ᑕᐃᒪᓐᓇ ᐃᓄᒃᑐᑦ 2039 ᑎᑭᑉᐸᑦ.

“ᑕᐃᒪᓐᓇ ᑕᒻᒪᕋᔭᕐᑐᑎ ᐅᖃᕈᕕᑦ,” ᔪᐊᓇᓯ ᐅᖃᖅᑐᖅ. “ᐱᓕᕆᐊᖃᓗᐊᕐᑐᒍᑦ ᐃᓄᐃᑦ ᐅᖃᐅᓯᖓᓂᒃ ᐊᔪᕈᓐᓃᕐᓴᕆᐊᖃᕐᓂᕐᒥᒃ ᓲᖃᐃᒻᒪ ᐃᓕᓐᓂᐊᕐᑎᑦ ᐅᖃᐅᓯᕐᒥ ᖃᐅᔨᒪᔭᕆᐊᖃᕐᒪᑦ ᐊᓯᖏᓐᓂᒃ ᐃᓕᓐᓂᐊᕐᓗᓂ.”

ᐱᓕᕆᐊᖃᓗᐊᕐᓂᖅ ᐃᓄᒃᑐᑦ ᐃᓕᓐᓂᐊᕐᑎᑦᑎᓂᕐᒥᒃ ᐅᖃᐅᓯᕐᓂ ᐊᔪᕈᓐᓃᕐᓴᖅᑎᑦᑎᓂᒃᑯᑦ ᐱᕕᖃᕈᑎᐅᓇᔭᕐᓂᖓᓂᒃ ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓱᐃᕙᓪᓕᐊᒍᓐᓇᕐᓗᑎᒃ ᐊᒻᒪ ᐃᓕᓐᓂᐊᕈᑎᒃᓴᓕᐅᕐᓗᑎᒃ, ᔪᐊᓇᓯ ᐅᖃᖅᑐᖅ.

ᒪᓕᒐᓕᐅᕐᑏᑦ ᑐᑭᓯᒋᐊᖅᑎᑦᑎᒃᑲᓐᓂᓚᐅᕐᑐᑦ ᑕᐅᑐᖕᓂᖏᓐᓂᒃ ᐅᓇ ᒪᓕᒐᖅ 25 ᑐᙵᕕᐅᓂᐊᕐᓂᖓᓂᒃ, ᐊᒻᒪᓗ ᑭᖑᓂᐊᒍᑦ ᐱᐅᓯᕚᓪᓕᕐᐸᓪᓕᐊᓗᓂ. ᐃᒻᒪᖄᓪᓘᓐᓃᑦ, ᑎᑎᕋᕐᓯᒪᖕᒪᑦ ᒪᓕᒐᕐᒥ ᒪᓕᒐᓕᕆᔨᒃᑯᑦ ᐅᕝᕙᓘᓐᓃᑦ ᑲᑎᒪᔨᕋᓛᑦ ᕿᒥᕐᕈᐊᕆᐊᖃᕐᓂᖏᓐᓂᒃ ᐃᓗᐊᓃᑦᑐᓂᒃ ᐊᒻᒪ ᐊᐅᓚᑕᐅᓂᖓᓂᒃ ᒪᓕᒐᐅᑉ ᐊᕐᕌᒍᑦ ᑕᓪᓕᒪᑦ ᐊᓂᒍᕌᖓᑕ.

ᐹᑦ ᐊᕐᓇᑲᒃ, ᑭᒡᒐᖅᑐᐃᔪᖅ ᐃᖃᓗᐃᑦ—ᓂᐊᖁᙴᒥ ᐊᒻᒪᓗ ᕿᒥᕐᕈᐊᖃᑦᑕᕐᓯᒪᓪᓗᓂ ᓯᕗᓂᐊᒍᑦ ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᕐᓂᒃ, ᐅᖃᓚᐅᕐᑐᖅ, “ᐱᕕᖃᕐᑎᒋᐊᖃᕋᑦᑎᒍᑦ ᒪᓕᒐᖅ ᐊᑐᓕᖅᑎᑕᐅᓂᖓᓂᒃ ᐊᒻᒪᓗ ᖃᓄᐃᓕᒍᑎᐅᓯᒪᔭᕆᐊᒃᓴᖓᓂ ᐊᑐᖅᑕᐅᓚᐅᕐᑎᓪᓗᒍ.”

ᐄᑐᓗᒃ ᐅᖃᓚᐅᕐᑐᖅ ᓄᓇᕗᑦ ᑐᙵᕕᒃᑯᑦ ᓄᖅᑲᖓᑐᐃᓐᓇᔾᔮᙱᓐᓂᕋᖅᖢᓂᒋᑦ ᑖᓐᓇ ᒪᓕᒐᖅ 24 ᐊᓂᒍᖅᑎᑕᐅᒃᐸᑦ ᐱᖓᔪᖓᓐᓂᒃ ᐅᖃᓕᒫᖅᑕᐅᓂᐊᕈᑎ, ᑭᓯᐊᓂᓕ ᐅᖃᙱᖢᓂ ᖃᓄᐃᓕᐅᕈᑎᐅᓇᔭᕆᐊᒃᓴᖓᓂᒃ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᓄᓇᕗᑦ ᑐᙵᕕᒃᑯᓐᓄᑦ ᖃᐅᔨᓇᓱᓚᐅᕐᑐᑦ ᐅᓇ ᒪᓕᒐᖅ 25 ᐊᓂᒍᖅᑎᑕᐅᑎᓪᓗᒍ, ᑭᓯᐊᓂᓕ ᑖᒃᑯᐊ ᑲᑐᔾᔨᖃᑎᒌᖑᔪᑦ ᑭᐅᔪᓐᓇᓚᐅᙱᑦᑐᑦ ᐅᓇ ᓴᖅᑭᓚᐅᙱᓐᓂᖓᓂᒃ.

ᒪᓕᒐᖅ 25 ᐊᖏᕈᑎᒋᔭᐅᓚᐅᕐᑐᖅ ᐊᐃᑉᐹᓂᒃ, ᓄᕕᐱᕆ 10-ᒥᑦ. ᔪᐊᓇᓯ ᐅᖃᓚᐅᕐᑐᖅ ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᓕᑲᐅᑎᒋᓂᐊᕐᓂᕋᖅᖢᓂᒋᑦ ᑖᓐᓇ ᐊᑐᓕᖅᑎᑕᐅᓂᖓᓂᒃ.

“ᐃᒪᓐᓇᐅᖂᔨᖕᒪᑦ ᐱᓕᕆᓂᖅ ᐱᒋᐊᓕᓵᖅᑐᑎᑐᑦ,” ᔪᐊᓇᓯ ᐅᖃᖅᑐᖅ.

ᐅᖃᒃᑲᓐᓂᕐᖢᓂ ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᖃᕐᓂᐊᕐᓂᕋᖅᖢᓂᒋᑦ ᓄᓇᕗᑦ ᑐᙵᕕᒃᑯᓐᓂᒃ, ᐃᓕᓐᓂᐊᕐᑐᓕᕆᔨᓂᒃ ᐊᒻᒪᓗ “ᐊᓯᖏᓐᓂᒃ ᑎᒍᒥᐊᕐᑎᓂᒃ” ᐊᑐᓕᖅᑎᑦᑎᓂᕐᒥ ᒪᓕᒐᕐᒥᒃ.

ᐊᖓᔪᖅᑳᕆᔭᐅᔪᖅ ᓄᓇᕗᒥᑦ ᐃᓕᓐᓂᐊᖅᑎᑦᑎᔩᑦ ᑲᑐᔾᔨᖃᑎᒌᖏᓐᓄᑦ ᑭᐅᔪᓐᓇᓚᐅᙱᒻᒪᑦ ᒪᓕᒐᐅᑉ ᒥᒃᓵᓄᑦ ᑭᓯᐊᓂ ᑐᓴᐅᒪᒃᑲᓐᓂᓕᕈᓂ ᐊᑐᓕᖅᑎᑦᑎᓂᕐᒥ ᖃᓄᐃᓕᐅᕐᓂᐊᖅᑐᓂᒃ. ᓄᓇᕗᒥᑦ ᐅᖃᐅᓯᕐᓄᑦ ᑲᒥᓯᓇ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᓂᐊᕐᓂᕋᖅᖢᓂ ᒪᓕᒐᐅᑉ ᒥᒃᓵᓄᑦ ᖃᓂᑦᑐᒃᑯᑦ.

Share This Story

(0) Comments

Join the Conversation

Your email address will not be published. Required fields are marked *

*