ᓄᓇᕗᒥᑦ ᑎᒍᔭᐅᓯᒪᕝᕖᑦ ᑲᑕᒍᑎᖃᖅᑎᑕᐅᕗᑦ ᑲᓇᑕᒥ ᐊᑐᖅᑕᐅᕙᓪᓕᐊᔪᓄᑦ ᖃᐅᔨᓴᖅᑎ

ᐅᓂᒃᑳᓕᐊᕆᔭᐅᓂᑯ ᖃᐅᔨᔾᔪᑎᐅᔪᑦ ᐃᖅᑲᓇᐃᔭᖅᑎᖃᙱᓗᐊᕐᓂᕐᒥᒃ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᖅᑕᐅᙱᓗᐊᕐᓂᖏᓐᓂᒃ ᐊᒻᒪ ᑲᒪᒋᔭᐅᔪᓂᒃ ᐱᓕᕆᐊᖃᕐᓂᕐᒧᑦ ᐊᐅᓚᑦᑎᓂᖃᑦᑎᐊᙱᓗᐊᖅᖢᑎᒃ

ᔭᐃᒻᔅ ᒪᑲᓐᔨ, ᐊᖓᔪᖅᑳᖅ ᐊᑐᖅᑕᐅᕙᓪᓕᐊᔪᓂᒃ ᖃᐅᔨᓴᖅᑎᐅᑉ ᑎᑎᕋᕐᕕᖓᓂᒃ ᑲᓇᑕᒥ, ᑐᓴᒐᒃᓴᓕᐅᕈᑎᖃᓚᐅᕐᑐᖅ ᓯᑎᐱᕆ 9-ᒥ ᐅᓂᒃᑳᓕᐊᕆᔭᐅᓂᑯᓄᑦ ᓄᓇᕗᒥᑦ ᒪᓕᒐᓕᕆᓂᕐᒧᑦ ᐱᓕᕆᔾᔪᓯᖏᓐᓂᒃ. (ᐊᔾᔨᙳᐊᖅ ᐊᑐᖅᑕᐅᕙᓪᓕᐊᔪᓂᒃ ᖃᐅᔨᓴᖅᑎᐅᑉ ᑎᑎᕋᕐᕕᖓᓂ ᑲᓇᑕᒥ)

By ᒥᓚᓂ ᐅᕆᑦᓵᑦ

For an English version of this story, see Nunavut jails get bad grade from Canada’s auditor general

ᓄᓇᕗᒥᑦ ᒪᓕᒐᓕᕆᔨᒃᑯᑦ ᐱᓕᕆᓯᒪᙱᓗᐊᕐᓂᕋᖅᑕᐅᔪᑦ ᐱᓕᕆᐊᒃᓴᓕᕆᓂᒃᑯᑦ ᐃᑲᔪᕈᑎᒃᓴᓂᒃ ᑎᒍᔭᐅᓯᒪᔪᓂᒃ ᓄᓇᓕᖕᓂ ᐃᓚᒋᔭᐅᔪᓐᓇᕐᓯᔪᓐᓇᖅᑎᑦᑎᓂᒃᑯᑦ, ᑲᓇᑕᒥ ᐊᑐᖅᑕᐅᕙᓪᓕᐊᔪᓂᒃ ᖃᐅᔨᓴᖅᑎ ᐅᖃᖅᑐᖅ ᓄᑖᓂᒃ ᐅᓃᒃᑳᓕᐊᓂᒃ.

ᐅᓇ ᐅᓂᒃᑳᖅ, ᒪᓕᒐᓕᕆᔨᕐᔪᐊᓄᑦ ᓴᖅᑭᑕᐅᓚᐅᕐᑐᖅ ᓯᑎᐱᕆ 9-ᒥ, ᐃᓱᒪᓕᐊᕆᔭᐅᓂᑯᓂᒃ 2015-ᒥᑦ ᕿᒥᕐᕈᐊᕈᑎᕕᓂᕐᓂᒃ ᖃᐅᔨᓴᕈᑎᓄᑦ.

“ᓱᓂ ᐱᓕᕆᐊᑎᒍᑦ ᓈᒻᒪᒃᑐᓂᒃ ᖃᓄᐃᓕᐅᕐᓯᒪᙱᒻᒪᑕ,” ᔭᐃᒻᔅ ᒪᑲᓐᔨ, ᐊᖓᔪᖅᑳᖅ ᐊᑐᖅᑕᐅᕙᓪᓕᐊᔪᓂᒃ ᖃᐅᔨᓴᖅᑎᐅᑉ ᑎᑎᕋᕐᕕᖓᓂᒃ ᑲᓇᑕᒥ, ᐅᖃᓚᐅᕐᑐᖅ ᑐᓴᒐᒃᓴᓕᐅᕐᓂᒃᑯᑦ.

“ᐱᓕᕆᐊᖃᕐᓗᓂ ᐃᓱᒫᓘᑎᓂᒃ ᓴᖅᑭᑎᓯᒪᔭᑦᑎᓐᓂᒃ ᐱᒻᒪᕆᐊᓘᖕᒪᑦ ᐱᓕᕆᔾᔪᓯᖃᕋᓱᖕᓂᐊᕈᑦᑕ ᐃᓕᖅᑯᓯᒃᑯᑦ ᑕᒪᐅᖓ ᖃᓄᐃᓕᐅᕈᑎᒃᓴᓂᒃ ᐊᒻᒪᓗ ᒪᒥᓴᕈᑎᒃᓴᐅᓂᐊᕐᑐᓂᒃ ᒪᐅᓇ ᒪᒥᓴᖃᑦᑕᕐᓂᒃᑯᑦ ᐊᒻᒪ ᓄᓇᓕᖕᓂ ᐱᓕᕆᖃᑕᐅᔪᓐᓇᖅᓯᕙᓪᓕᐊᑎᑦᑎᓂᕐᒥᒃ ᑎᒍᔭᐅᓯᒪᓂᑯᓂᒃ.”

ᐊᒻᒪᓗ ᖃᐅᔨᔭᐅᓚᐅᕐᓯᒪᓂᖓᒍᑦ ᐊᕐᕌᒍᑦ 6 ᓯᕗᓂᐊᒍᑦ, ᐅᓃᒃᑳᑦ ᐅᖃᕐᓯᒪᖕᒥᔪᑦ ᐅᓄᕐᓂᖅᓴᐃᑦ ᑎᒍᔭᐅᓯᒪᔪᑦ ᑲᒪᒋᔭᐅᔾᔪᑎᖏᑦ ᐊᐅᓚᑕᐅᙱᓗᐊᖅᑐᐊᓘᓂᖏᓐᓂᒃ ᓈᒻᒪᒃᑐᒃᑯᑦ — ᒪᑯᐊ ᐱᔭᐅᔭᕆᐊᓕᕐᓄᑦ ᖃᐅᔨᓴᕈᑎᐅᕙᒃᑐᑦ, ᐊᓂᑎᑕᐅᓂᐊᕐᓂᖏᓐᓄᑦ ᐸᕐᓇᐅᑎᑦ ᐊᒻᒪᓗ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᐅᓗᕆᐊᓇᕈᑎᓂᒃ ᖃᐅᔨᓴᕈᑎᐅᔪᑦ ᐱᓕᕆᐊᖑᒃᑲᓐᓂᖃᑦᑕᙱᒻᒪᑕ.

ᐅᑯᑎᒎᓇᕐᓕ ᕿᑭᖅᑖᓗᒃᒥ ᐃᑲᔪᖅᑕᐅᕝᕕᖕᒥᒃ ᐊᒻᒪ ᒪᑭᒋᐊᕐᕕᒃᒥᑦ ᐃᖃᓗᖕᓂ, ᓇᓗᓇᐃᒃᑯᑎᒋᓗᒍ, 6 ᐳᓴᓐᑎᑐᐃᓐᓇᑦ ᑎᒍᔭᐅᓯᒪᔪᑦ ᖃᓄᐃᓕᐅᖅᑕᐅᔾᔪᑎᒃᓴᖏᓐᓄᑦ ᐸᕐᓇᐅᑎᖃᓚᐅᕐᑐᑦ.

ᐊᑕᐅᓯᖅ ᑎᒍᔭᐅᓯᒪᔪᖅ ᑲᖏᖅᖠᓂᖅᒥᑦ ᑕᖅᑭᓂᒃ 9-ᓂᑦ ᑎᒍᔭᐅᓯᒪᔭᕆᐊᖃᖅᖢᓂ ᑎᑎᕋᐅᓯᐅᓯᒪᓚᐅᕐᓯᒪᙱᑦᑐᖅ ᖃᓄᖅ ᐃᑲᔪᖅᑕᐅᔾᔪᑎᖃᕆᐊᖃᕐᓂᖓᓂᒃ, ᖃᓄᖅ ᐱᓕᕆᐊᖑᓂᐊᕐᓂᖓᓂᒃ ᐅᕝᕙᓘᓐᓃᑦ ᖃᓄᐃᑉᐸᓪᓕᐊᓂᕐᒧᑦ ᐅᓂᒃᑳᓂᒃ.

ᑎᒍᔭᐅᓯᒪᔪᑦ ᖃᓄᖅ ᐃᑲᔪᖅᑕᐅᔭᕆᐊᖃᕐᓂᖏᓐᓄᑦ ᖃᐅᔨᓴᕐᓂᖅ ᓯᕗᓪᓕᐅᑎᑕᐅᕙᒃᑐᑦ ᐃᑲᔪᖅᑲᔪᓐᓇᕐᓂᐊᕐᒪᑕ, ᐃᓚᖃᖅᖢᑎᒃ ᓂᙵᒃᓯᒪᓗᐊᕐᓂᖅᒥᒃ ᐊᐅᓚᑦᑎᓂᖅᒥᒃ ᐊᒻᒪ ᐊᑐᖃᑦᑕᓗᐊᕐᓂᖅᒧᑦ.

ᒪᓕᒐᓕᕆᓂᕐᒧᑦ ᒥᓂᔅᑕ ᔪᐊᔾ ᕼᐃᒃᔅ ᐅᖃᐅᓯᖃᖅᑐᖅ ᐊᑐᖅᑕᐅᕙᓪᓕᐊᔪᓄᑦ ᖃᐅᔨᓴᖅᑎᓄᑦ ᖃᐅᔨᓴᕈᑎᐅᒃᑲᓐᓂᖅᑐᓂᒃ ᒪᓕᒐᓕᕆᕕᒡᔪᐊᒥ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

ᒪᑲᓐᔨ ᖃᐅᔨᓚᐅᕐᑐᖅ ᐱᓕᕆᕝᕕᐅᔪᖅ ᐊᒃᓱᕈᖃᑦᑕᕐᓂᖏᓐᓂᒃ ᑎᒍᔭᐅᓯᒪᔪᑦ ᐊᑐᐃᓐᓇᖃᖅᑎᑕᐅᓇᓱᒃᖢᑎᒃ ᒪᒥᓴᕐᓂᖅᒧᑦ ᐊᑐᖃᑦᑕᕆᐊᖃᖅᑕᖏᓐᓂᒃ ᓲᕐᓗ ᒪᑯᓂᖓ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᔨᑦᑎᕋᐅᑎᓂᒃ.

“ᐅᓇᑕ ᐱᓕᕆᔾᔪᑎᐅᕙᒃᑐᑦ ᐱᒋᐊᕈᑎᒋᔭᖏᓐᓂᒃ ᑎᒍᔭᐅᓯᒪᓂᕐᒧᑦ ᖃᐅᔨᓇᓱᒃᐸᒃᖢᑎᒃ ᐊᒻᒪᓗ ᑕᐃᒪᐃᓕᒃᑲᓐᓂᖅᑎᑕᐅᑦᑎᐃᓕᒪᓇᓱᒃᖢᑎᒃ,” ᐅᓂᒃᑳᑦ ᐅᖃᖅᓯᒪᔪᑦ.

ᐅᓄᕐᓂᕐᓴᐃᑦ ᑎᒍᔭᐅᓯᒪᔪᑦ ᐃᓐᓇᐃᑦ ᓇᓗᓇᐃᖅᑕᐅᓯᒪᓪᓗᑎᒃ ᐃᑲᔪᖅᑕᐅᔭᕆᐊᖃᕐᓂᖏᓐᓂᒃ ᐃᑲᔪᖅᑕᐅᓚᐅᙱᒻᒥᔪᑦ ᑕᒪᐅᓇᓗ “ᐅᓄᕐᓂᕐᓴᒻᒪᕇᑦ” ᑎᒍᔭᐅᓯᒪᔪᑦ ᓄᓇᕗᒥᑦ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᑲᒪᒋᔭᐅᔭᕆᐊᖃᖅᑐᑦ ᐅᕝᕙᓘᓐᓃᑦ ᐊᑐᓗᐊᖃᑦᑕᕐᓂᕐᒧᑦ ᐃᑲᔪᖅᑕᐅᓗᑎᒃ. ᓇᓕᐊᓪᓘᓐᓃᑦ ᑎᒍᔭᐅᓯᒪᕝᕕᐅᔪᖅ ᓄᓇᕗᒥᑦ ᖁᓄᔪᕐᓂᐊᕐᓂᖅᒧᑦ ᐱᕋᔭᒍᑎᖃᖅᑐᓂᒃ ᐃᑲᔪᕈᑎᖃᙱᑦᑐᑦ ᑖᒃᑯᓄᖓ.

ᐱᓕᕆᐊᖃᕐᓯᒪᓕᖅᑑᒐᓗᐊᑦ ᑎᒍᔭᐅᓯᒪᔪᑦ ᐃᓄᒋᐊᒃᑐᒦᓗᐊᖃᑦᑕᕐᓂᖏᓐᓂᒃ, ᒪᕐᕉᖕᓂ ᓄᑖᓂᒃ ᐃᑲᔪᖅᑕᐅᕝᕕᒃᓴᓂ ᓴᓇᓪᓗᑎᒃ ᐃᖃᓗᖕᓂ, ᒪᑲᓐᔨ ᐅᖃᖅᑐᖅ, ᑭᓯᐊᓂᓕ ᐊᕐᓇᐃᑦ ᐃᑲᔪᖅᑕᐅᕝᕕᖓ “ᓈᒻᒪᙱᓗᐊᖅᑐᐊᓘᖕᒪ,” ᐃᒡᓕᖃᙱᓗᐊᖅᖢᓂ ᐊᒻᒪᓗ ᖃᓄᐃᓕᐅᕐᕕᒃᓴᖃᙱᓗᐊᖅᖢᓂ.

ᐃᓕᓐᓂᐊᕐᑐᓕᕆᓂᒃᑯᓪᓕ, ᐃᑲᔪᕈᑎᒃᓴᐃᑦ ᐊᔾᔨᒌᑲᑕᓚᐅᙱᑦᑐᑦ ᐱᓕᕆᕝᕕᐅᔪᓂᒃ, ᐃᓚᖏᑦ ᑎᒍᔭᐅᓯᒪᔪᑦ ᐃᓕᓐᓂᐊᕐᕕᐊᓗᖕᒥᑦ ᐊᓂᒍᐃᔾᔪᑎᓕᕆᔪᓐᓇᖅᖢᑎᒃ ᐊᒻᒪᓗ ᐃᓚᖏᑦ ᐊᔪᖅᑎᑕᐅᓪᓗᑎᒃ, ᐊᒻᒪ ᐃᓚᐃᓐᓇᑯᓗᖏ ᐅᖃᕈᓐᓇᕆᐅᕐᓴᕐᓂᕐᒧᑦ ᐅᕝᕙᓘᓐᓃᑦ ᐃᖅᑲᓇᐃᔮᒃᓴᓄᑦ ᐸᕐᓇᐅᑎᓄᑦ ᐱᓕᕆᑎᑕᐅᓪᓗᑎᒃ.

ᐊᕐᓇᐃᑦ ᐃᖃᓗᖕᓂ ᑎᒍᔭᐅᓯᒪᔪᑦ ᐊᑐᐃᓐᓇᖃᖅᑎᑕᐅᙱᑦᑐ ᐃᑲᔪᕈᑎᒃᓴᓂᒃ ᒪᐅᓇ ᐃᓕᓐᓂᐊᕈᑎᓕᕆᓂᒃᑯᑦ ᐅᕝᕙᓘᓐᓃᑦ ᐃᖅᑲᓇᐃᔮᓄᑦ ᐊᔪᕈᓐᓃᖅᓴᐅᑎᒃᓴᓂᒃ.

ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᐃᑦ ᒪᓂᒪᔭᐅᓕᕌᖓᑕ ᑎᒍᔭᐅᓯᒪᕝᕕᖕᓄᑦ, ᑕᒪᒃᑯᐊ ᖃᓪᓗᓈᑎᑐᑐᐃᓐᓇᖅ ᑎᑎᕋᖅᑕᐅᓯᒪᕙᒃᖢᑎᒃ ᐃᓄᒃᑎᑑᙱᑦᑐᖅ, ᑖᓐᓇᓗ ᑎᒍᔭᐅᓯᒪᔪᓄᑦ ᐅᖃᐅᓯᔭᐅᒐᓗᐊᖅᑎᓪᓗᒍ.

“ᖁᕝᕙᓯᓗᐊᖅᑐᖅ” ᐃᖅᑲᓇᐃᔭᖅᑎᖃᙱᓗᐊᕐᓂᖅ ᐱᓕᕆᕝᕕᖕᓄᑦ ᓄᖅᑲᖅᓯᒪᒍᑎᐅᓚᐅᕐᒥᔪᑦ ᐱᓕᕆᐊᒃᓴᓂ ᐱᓕᕆᐊᖃᑦᑎᐊᕋᓱᒋᐊᒃᓴᖅ ᐊᒻᒪᓗ ᐅᓗᕆᐊᓇᙱᑦᑐᒦᓐᓂᖏᓐᓄᑦ, ᐅᓂᒃᑳᑦ ᐅᖃᖅᓯᒪᔪᑦ, ᐃᓱᒪᓕᐅᕆᓪᓗᓂ ᐃᖅᑲᓇᐃᔭᖅᑎᓄᑦᑕᐅᖅ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖃᕆᐊᖃᕐᓂᕐᒥᒃ.

ᐱᓕᕆᕝᕕᐅᔪᖅ ᖃᐅᔨᓴᖅᑎᒧᑦ ᐅᖃᐅᓯᐅᓂᑯᓂᒃ ᓯᕗᓪᓕᕐᒥ ᑲᒪᒋᔭᖃᓚᐅᕐᓯᒪᖕᒥᔪᑦ ᒪᐅᓇ ᑕᒪᒃᑯᐊ ᑎᒍᔭᐅᓯᒪᔪᑦ ᐃᓄᑑᓐᓇᖅᑐᒦᑎᑕᐅᕙᖕᓂᖏᑦ ᐅᓪᓗᓄᑦ ᖁᓕᓄᑦ, ᑖᓐᓇᓕ ᐋᖅᑭᒃᑕᐅᓕᓚᐅᕐᓯᒪᔪᖅ ᐅᓪᓘᖕᓂ ᒪᕐᕉᖕᓂ ᐅᖓᑖᓅᙱᑦᑐᖅ ᐃᓄᑑᓐᓇᖅᑐᒦᖃᑦᑕᕆᐊᖃᕐᓂᕐᒥᒃ.

ᐅᓂᒃᑳᑦ ᐅᖃᖅᓯᒪᓚᐅᕐᒥᔪᑦ ᑕᒪᓐᓇ ᑕᐃᒪᐃᒃᑲᓗᐊᖅᑎᓪᓗᒍ, ᑖᒃᑯᐊ ᐱᓕᕆᕝᕕᐅᔪᑦ ᑐᑭᒧᐊᕈᑎᒃᓴᓪᓚᕆᖕᓂ ᐊᔪᕈᓐᓃᖅᓴᕈᑎᒃᓴᓂᒡᓘᓐᓃᑦ ᐋᖅᑭᒃᓯᓯᒪᓚᐅᙱᒻᒪᑕ ᖃᐅᔨᓴᖃᑦᑕᕐᓂᕐᒥᒃ ᑎᒍᔭᐅᓯᒪᔪᓂᒃ.

ᓄᓇᕗᒥᑦ ᒪᓕᒐᓕᕆᔨᒃᑯᑦ ᒥᓂᔅᑕᖓ ᔪᐊᔾ ᕼᐃᒃᔅ ᐅᖃᐅᓯᖃᓚᐅᕐᑐᖅ ᐅᓂᒃᑳᓂ ᒪᓕᒐᓕᕆᕝᕕᒃᒥᑦ ᑖᒃᑯᐊ ᑎᑎᕋᖅᓯᒪᔪᑦ ᓴᖅᑭᑕᐅᓚᐅᙱᑎᓪᓗᒋᑦ ᑖᔅᓱᒪᓕ ᑕᑯᓂᑯᒋᖕᒪᒋ ᓯᕗᓂᐊᒍᑦ.

ᕼᐃᒃᔅ ᐅᖃᓚᐅᕐᑐᖅ ᐱᓕᕆᕝᕕᐅᔪᖅ ᐃᓱᒪᓕᐊᕆᔭᐅᔪᓕᒫᓂᒃ ᐊᐅᓚᑕᐅᕙᓪᓕᐊᔪᓄᑦ ᖃᐅᔨᓴᖅᑎᒧᑦ ᐊᒻᒪᓗ ᐱᓕᕆᐊᖑᓂᐊᓪᓚᕆᒃᖢᑎᒃ ᐊᑐᓕᖅᑎᑕᐅᓇᓱᒡᓗᑎᒃ.

ᒫᓐᓇᓕ 9-ᓂ ᓄᑖᓂᒃ ᐃᓱᒪᓕᐊᕆᓯᒪᖕᒪᑦ ᐅᓂᒃᑳᓂᐊᒃ ᐊᒻᒪᓗ 9-ᖑᓪᓗᑎᒃ ᓱᓕ ᐱᓕᕆᐊᖑᔭᕆᐊᓖᑦ 2015-ᒥᑦ ᐅᓂᒃᑳᓕᐊᖑᓚᐅᕐᓯᒪᔪᓂᒃ.

ᐅᖃᓚᐅᕐᑐᖅ ᐋᖅᑭᒍᑎᒃᓴᓂᒃ ᐱᓕᕆᐊᖃᖅᐸᓪᓕᐊᓕᕐᓂᖏᓐᓂᒃ, ᑕᐃᒪᙵᑦ ᕿᒥᕐᕈᐊᓚᐅᕐᓯᒪᓪᓗᑎᒃ ᐅᓇ ᓄᑖᖅ ᑎᒍᔭᐅᓯᒪᔪᓄᑦ ᒪᓕᒐᖅ ᐊᑐᓕᓚᐅᖅᓯᒪᑎᓐᓇᒍ ᐊᒻᒪᓗ ᐅᑯᖓ ᐋᖅᑭᒋᐊᕐᕕᒃ ᒪᒥᓴᕐᕕᓕᕆᕝᕕᒃ ᒪᑐᐃᖅᖢᓂ. ᐅᑯᐊ ᕿᒥᕐᕈᐊᕈᑎᕕᓃᑦ ᐅᑯᓇᙵᑦ ᐱᒋᐊᕐᓯᒪᔪᓂᒃ ᐅᕙᙵᑦ ᔭᓄᐊᕆ 2018-ᒥᑦ ᒫᔅᓯ 21, 2021-ᒧᑦ

ᕼᐃᒃᔅ ᐅᖃᓚᐅᕐᑐᖅ ᑎᒍᔭᐅᓯᒪᔪᓄᑦ ᒪᓕᒐᖅ ᓇᓗᓇᐃᖅᓯᓯᒪᑦᑎᐊᕐᓂᐊᕐᓂᕋᖅᖢᓂᐅᒃ ᐊᑐᖅᑕᐅᔭᕆᐊᓕᖕᓂ ᐱᕋᔭᒃᓯᒪᔪᓕᕆᓂᕐᒧᑦ ᐊᒻᒪᓗ ᐋᖅᑭᒃᓱᐃᓗᑎᒃ ᖃᐅᔨᓴᕐᓂᐅᖃᑦᑕᕐᓂᐊᖅᑐᓂᒃ, ᓄᑖᒥ ᐃᖅᑲᓇᐃᔮᒥ ᐱᑕᖃᓕᕐᓗᓂ ᐆᒧᖓ ᖃᐅᔨᓴᕐᓂᕐᒧᑦ ᐊᖓᔪᖅᑳᒃᓴᒧᑦ.

“ᐅᓇ ᐅᓂᒃᑳᖅ ᐅᖃᐅᓯᖃᓚᐅᙱᑦᑐᖅ ᐅᓇ ᓄᑖᖅ ᑎᒍᔭᐅᓯᒪᕝᕕᒃᓴᖅ ᐊᒃᑐᐃᒍᑎᒋᓂᐊᖅᑕᖏᓐᓂᒃ ᑎᒍᔭᐅᓯᒪᔪᓕᕆᓂᕐᒥᒃ ᐊᒻᒪ ᐱᓕᕆᐊᒃᓴᕆᔭᐅᕙᒃᑐᓂᒃ,” ᐅᖃᓚᐅᕐᑐᖅ ᐃᖃᓗᖕᓂ ᓄᑖᒥᑦ ᑎᒍᔭᐅᓯᒪᕝᕕᖕᒥᑦ.

ᓄᑖᑦ ᐃᖅᑲᓇᐃᔭᖅᑎᐅᔪᑦ ᐊᔪᕈᓐᓃᖅᓴᖅᑎᑕᐅᖃᑦᑕᕐᓂᐊᖅᑐᑦ ᐱᓕᕆᐊᖃᓕᓚᐅᙱᓐᓂᖏᓐᓂᒃ ᐸᕐᓇᒃᓯᒪᑎᑕᐅᓇᓱᒡᓗᑎᒃ ᐃᖅᑲᓇᐃᔭᓕᓚᐅᙱᓐᓂᖏᓐᓂᒃ, ᐊᒻᒪᓗ ᑕᕝᕙᓂ ᐱᓕᕆᔪᒃᓴᐃᑦ ᐱᓕᕆᓕᓚᐅᕐᓯᒪᓪᓗᓂ ᓯᑎᐱᕆ 7-ᒥᑦ, ᕼᐃᒃᔅ ᐅᖃᓚᐅᕐᑐᖅ.

ᓄᑖᒥᒃ ᖃᕋᓴᐅᔭᒃᑯᑦ ᐱᓕᕆᔾᔪᑎᐅᓂᐊᖅᑐᖅ ᐊᑐᓕᖅᑎᑕᐅᓛᕐᓗᓂ ᐅᑭᐊᒃᓵᖅ ᐃᑲᔪᕈᑎᐅᓂᐊᖅᑐᖅ ᑎᑎᕋᐅᓯᐅᕙᓪᓕᐊᓂᒃᑯᑦ ᖃᐅᔨᒪᔾᔪᑎᐅᓗᓂ ᑎᒍᔭᐅᓯᒪᔪᓂᒃ ᖃᐅᔨᓴᖅᑕᐅᔾᔪᑎᖏᓐᓂᒃ, ᖃᓄᐃᑉᐸᓪᓕᐊᔾᔪᑎᖏᓐᓂᒃ ᐊᒻᒪ ᖃᓄᐃᓕᐅᕈᑎᕕᓂᖏᓐᓂᒃ, ᕼᐃᒃᔅ ᐅᖃᖅᑐᖅ.

ᓄᑖᒥᑦᑕᐅᖅ ᑲᒪᒋᔭᐅᔪᓂᒃ ᐊᐅᓚᑦᑎᔾᔪᑎᓕᕆᓂᕐᒥᒃ ᐱᒋᐊᖅᑎᑦᑎᓛᕋᓱᒋᔭᐅᔪᑦ ᒫᔅᓯᐅᓛᖅᑐᒥ ᐊᕐᕌᒍ,

ᐊᑐᖅᑕᐅᕙᓪᓕᐊᔪᓂᒃ ᖃᐅᔨᓴᖅᑎ ᖃᐅᔨᓴᓚᐅᕐᒥᔪᖅ ᑕᒪᐃᓐᓂ ᐃᑲᔪᖅᑕᐅᕝᕕᒋᔭᐅᔪᓂᒃ ᓄᓇᕗᒥᑦ, ᐃᓚᖃᖅᖢᑎᒃ ᕿᑭᖅᑖᓗᒃᒥᑦ ᐃᑲᔪᖅᑕᐅᕕᒃ, ᓄᓇᕗᒥᑦ ᐊᕐᓇᓄᑦ ᐃᑲᔪᖅᑕᐅᕕᒃ, ᐃᓱᒪᖅᓱᙱᑦᑐᒃᑯᕕᒃ ᐃᓅᓱᒃᑐᓄᑦ ᐱᓕᕆᐊᖃᕐᕕᒃ, ᐋᖅᑭᒋᐊᕐᕕᒃ ᐃᑲᔪᖅᑕᐅᕕᒃ ᒪᒥᓴᕐᕕᓕᕆᕝᕕᒃ, ᒪᑭᒋᐊᕐᕕᒃ, ᐅᑕᖅᑭᕕᒃ ᓄᓇᓕᖕᓂᒃ ᐃᒡᓗᖃᖅᕕᒃ, ᖁᒡᓗᖅᑑᖅᒥᒃ ᐃᓚᕗᑦ ᐊᒻᒪᓗ ᑲᖏᖅᖠᓂᖅᒥᒃ ᒪᒥᓇᕐᕕᒃᒥᑦ.

Share This Story

(0) Comments

Join the Conversation

Your email address will not be published. Required fields are marked *

*