ᓄᓇᕗᒥᑦ ᑮᓇᐅᔭᓕᐅᕋᓱᖕᓂᖅ ᖃᓪᓗᓈᓂᙶᖅᑐᓂᒃ ᐃᖅᑲᓇᐃᔭᖅᑎᓂᒃ ᐊᑐᙱᓐᓂᕐᓴᐅᔭᕆᐊᓖᑦ, ᐅᖃᖅᑐᖅᐸᑐᓴᓐ

ᑲᓇᑕᒥ ᑭᖑᓪᓕᖅ ᒐᕙᒪᒃᑐᖃᒃᑯᑦ ᐊᐅᓚᔾᔪᑎᒃᓴᖏᑦ ᐃᓚᖃᓪᓗᐊᕐᑐᑦ ᖃᓄᐃᓕᐅᕈᑎᒃᓴᓂᒃ ᓄᓇᕗᒥᐅᑦ ᖃᓪᓗᓈᓂᙶᖅᑐᓂᒃ ᓴᓇᔨᓂᒃ ᐊᑐᙱᓐᓂᕐᓴᐅᓕᕈᓐᓇᕐᓂᖏᓐᓂᒃ ᐊᒻᒪᓗ ᒐᕙᒪᑐᖃᒃᑯᑦ ᓅᑎᔾᔪᑎᒋᕙᒃᑕᖏᓐᓂᒃ, ᐅᖃᖅᑐᖅ ᑕᓂᔅ ᐹᑐᓴᓐ.

ᐹᑐᓴᓐ, ᑲᓐᓲᕕᑎᕝᑯᓐᓄᑦ ᐃᓚᒋᔭᐅᔪᖅ ᓴᓇᑦᑯᓐᓂᒃ ᐊᒻᒪᓗ ᓄᓇᕗᒥ ᑭᒡᒐᖅᑐᐃᔨᑐᐊᖑᓪᓗᓂ ᒪᓕᒐᓕᕆᕕᒡᔪᐊᑉ ᖁᕝᕙᓯᕐᓂᕐᓴᓂᒃ ᐱᓕᕆᔨᓂᒃ, ᐅᖃᓚᐅᕐᑐᖅ ᑖᓐᓇ ᐊᐅᓚᔾᔪᑎᒃᓴᓕᕆᓂᐅᑉ ᓯᕗᓂᐊᒍᑦ ᑐᓐᓂᖅᑯᑎᒋᓂᕋᖅᖢᓂᐅᒃ ᕕᕝᕗᐊᕆ 3-ᒥᑦ. ᐃᓱᒪᓕᐅᕆᓚᐅᕐᑐᖅ ᒐᕙᒪᑐᖃᒃᑯᑦ ᓕᐳᕈᓪ ᒐᕙᒪᖏᑦ ᐱᓕᕆᐊᖃᕐᓗᑎᒃ ᓄᓇᕗᒥᑦ ᐅᓄᕈᓘᔭᕐᑐᑦ ᐱᔭᐅᔭᕆᐊᓕᖕᓂᒃ, ᒫᙵᑦ ᐱᐅᓂᕐᓴᒥ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᕐᒥᒃ ᒪᐅᖓ ᐃᖃᓗᓕᕆᔨᒃᑯᑦ ᐊᖏᖃᑎᒌᒍᑎᒃᓴᖏᓐᓄᑦ.

“ᐱᕕᖃᕋᒪ ᐊᓯᖏᓐᓄᑦ ᐊᑐᖅᑕᐅᔪᓐᓇᙱᑦᑐᒥᒃ, ᐅᖃᕈᓐᓇᕐᓗᖓ ᓄᓇᕗᑦ ᑭᒡᒐᖅᑐᕐᓗᒍ ᐋᑐᕚᒥ ᐊᒻᒪᓗ ᑕᒪᓐᓇ ᐱᓕᕆᐊᕆᔭᕋ ᐊᑐᖅᑎᑦᑐᒪᒻᒪᕆᒃᖢᒍ,” ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ.

ᒐᕙᒪᑐᖃᒃᑯᑦ ᓱᓕ ᑐᓴᖅᑎᑦᑎᓚᐅᙱᑦᑐᑦ ᖃᑯᒍ ᑐᓴᖅᑎᑦᑎᒍᑎᖃᕐᓂᐊᕐᓂᕐᒥᓂᒃ ᐊᐅᓚᔾᔪᑎᒃᓴᐅᓛᕐᑐᓂᒃ, ᑭᓯᐊᓂᓕ ᑕᒪᓐᓇ ᐱᓕᕆᐊᖑᒡᒍᓪᓗᓂ ᒫᔅᓯᒥ.

ᓄᓇᕗᑦ ᓴᓇᔨᓂ ᐃᑲᔪᖅᑕᐅᔭᕆᐊᖃᖃᑦᑕᕐᒪᑕ ᑲᓇᑕᒥ ᐳᕌᕕᓐᓯᓂᙶᖅᑐᓂᒃ, ᐅᖃᖅᑐᖅ ᐹᑐᓴᓐ, ᑕᒪᓐᓇᓗ ᐊᑭᖃᕐᓂᒃᑰᖓᓪᓗᓂ ᓄᓇᕗᑦ ᒐᕙᒪᒃᑯᓐᓄᑦ ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᐅᑎᓪᓗᒍ. ᓄᓇᕗᒥᑦ ᒐᕙᒪᒃᑯ ᐊᑭᓕᕐᓱᐃᔨᐅᖃᑦᑕᖅᑐᑦ ᓴᓇᔨᓂᒃ ᐃᓄᑑᕝᕕᒋᔭᕆᐊᓕᖕᓃᑎᓪᓗᒋᑦ ᐅᓪᓗᓂᒃ 14-ᓂ ᓄᓇᕗᒧᐊᓚᐅᕐᑎᓐᓇᒋᑦ.

ᐃᒪᐃᓕᖓᒡᒍᓪᓗᓂ, ᐊᑭᖃᖃᑦᑕᕐᒪᑦ $434 ᐅᓪᓗᒧᑦ ᐊᑕᐅᓯᕐᒧᑦ ᐃᓄᖕᒧᑦ ᐃᓄᑑᕝᕕᒃᒦᑦᑐᒧᑦ, ᐆᒧᖓᓕ ᑲᐃᑦ ᒪᑲᓚᐅᑦ, ᑐᓴᒐᒃᓴᓕᕆᓂᕐᒧᑦ ᑎᑎᕋᕐᑎ ᓯᕗᓕᐅᕐᑎ ᔫ ᓴᕕᑲᑖᕐᒧᑦ. ᑕᐃᒪᐃᓐᓂᖓᓄᓪᓗ ᐃᓄᒃ ᐊᑕᐅᓯᖅ ᐊᑭᓖᒍᑎᐅᓕᖅᐸᒃᑐᖅ $6,076-ᓂ ᐃᓄᑑᓐᓇᖅᑐᒦᓐᓂᖓᓄᑦ ᐅᓪᓗᓂ 14-ᓂᒃ.

ᓄᕕᐱᕆ 19 ᑎᑭᑎᓪᓗᒍ, ᓄᓇᕗᒥᑦ ᒐᕙᒪᒃᑯ ᐊᑐᕐᓯᒪᓚᐅᕐᑐᑦ ᒫᓂ $36.6 ᒥᓕᐊᓐᑖᓚᓂ ᐃᑲᔫᑎᑎᒍᑦ ᐃᓄᑑᕝᕕᖕᒦᑦᑐᓄᑦ, ᐅᕘᓇᓕ ᒪᑲᓚᐅᑦᑎᒍᑦ. ᐅᓇ ᐃᓚᖃᖅᖢᓂ ᐃᓄᖕᓂ ᐊᐅᓪᓚᕆᐊᖃᖅᐸᒃᑐᓂᒃ ᐋᓐᓂᐊᕐᓂᕐᒧᑦ.

ᓯᑎᐱᕆᒥ ᒪᓕᒐᓕᐅᕐᑎᐅᔪᑦ ᓄᓇᕗᒥᑦ ᒐᕙᒪᒃᑯᓐᓂ ᐱᖁᔨᓚᐅᕐᑐᑦ ᓄᓇᖃᕐᑐᓂᒃ ᐃᒡᓗᓕᐅᕐᓂᕐᒥᒃ ᐱᓕᕆᔨᑖᒃᑲᓐᓂᖁᔭᐅᓪᓗᑎᒃ ᐊᑭᓕᕐᓱᐃᓂᕐᒥᒡᓕ ᖃᓪᓗᓈᓂᒃ ᐃᓄᑑᓐᓇᖅᑐᒦᑎᑦᑎᓂᕐᒥᒃ ᓴᓇᔨᓂ ᑕᒪᐅᙵᕐᓂᐊᕐᑐᓂᒃ.

ᖃᓪᓗᓈᓂᙶᖅᑐᑦ ᓴᓇᔨᐅᔪᑦ ᐱᔪᒪᔾᔪᑎᓂᒃ ᒪᓂᒻᒪᐃᕝᕕᐅᓯᒪᕙᖕᒪᑕ, ᐊᒻᒪᓗ ᐃᒡᓗᖃᖅᑎᑕᐅᓪᓗᑎᒃ ᐊᒻᒪ ᑮᓇᐅᔭᓕᐅᖅᑎᑕᐅᑦᑎᐊᖅᖢᑎᒃ, ᒪᑯᓄᖓ ᐊᐅᓚᑦᑎᓂᕐᒨᖓᔪᓂᒃ ᓄᓇᕗᒥᑦ ᒐᕙᒪᒃᑯᓐᓂᒃ ᐊᒻᒪ ᐊᓯᖏᓐᓂᒃ ᑲᑐᔾᔨᖃᑎᒌᖑᔪᓂᒃ.

ᑕᐃᒪᓕ ᐃᓱᒪᓕᐅᕆᓚᐅᕐᑐᖅ ᒐᕙᒪᑐᖃᒃᑯᑦ ᐃᓚᓕᐅᔾᔨᓯᒪᓗᑎᒃ ᐊᔪᕈᓐᓃᕐᓴᖅᑎᑦᑎᓂᕐᒧᑦ ᐊᑭᓕᐅᑎᒃᓴᐅᕙᒃᑐᓂᒃ ᒪᑯᓄᖓ ᓴᓇᔭᐅᕙᓪᓕᐊᔪᓄᑦ ᐃᑲᔫᑎᑖᕆᔭᐅᕙᒃᑐᓂᒃ ᐃᖅᑲᓇᐅᔭᖅᑎᑦᑎᔨᐅᔪᑦ ᐱᓕᕆᓕᖅᑎᑦᑎᔪᓐᓇᕐᓂᐊᕐᒪᑕ ᐊᒻᒪ ᐊᔪᕈᓐᓃᕐᓴᖅᑎᑦᑎᔪᓐᓇᕐᓗᑎᒃ ᓴᓇᔨᓂᒃ ᓄᓇᖃᖅᑐᓂᒃ ᐃᒡᓗᓕᐅᕐᓂᒃᑯᑦ ᐊᒻᒪ ᐊᐅᓚᑦᑎᓂᕐᒥᒃ ᑖᒃᑯᓂᖓ ᐱᓕᕆᐊᒃᓴᓂᒃ.

ᓄᓇᕗᑦ ᒪᓕᒐᓕᐅᕐᕕᒡᔪᐊᒥᑦ ᐃᓚᒋᔭᐅᔪᖅ, ᓂᐅ ᑎᒧᑯᕌᑎᒃᑯᓐᓄᑦ ᒪᒥᓛᖅ ᖃᖅᑲᖅ, ᐅᖃᓚᐅᕐᑐᖅ ᐃᒡᓗᓂ ᕿᒥᕐᕈᐊᑲᑕᒃᑎᓪᓗᒍ ᐅᔾᔨᕈᓱᓕᕐᓂᖓᓂᒃ ᐅᓄᕐᑐᐊᓘᓂᖏᓐᓂᒃ ᖃᓪᓗᓈᓂᙶᖅᑐᑦ ᓴᓇᔨᐅᔪᑦ ᓄᓇᕗᒥᑦ ᒪᑯᓂᖓ ᐃᓕᓴᐃᔨᐅᓂᕐᒧᑦ, ᐃᖢᐊᕐᓴᐃᔩᑦ, ᐃᒡᓗᓕᐅᕐᑏᑦ ᐊᓯᖏᓐᓂᒡᓗ.

“ᐃᓄᓕᒫᑦ ᑕᒪᕐᒥᒃ ᓄᓇᕗᒦᑦᑐᓐᓃᕋᓗᐊᕐᐸᑕ ᑖᓐᓇ ᓱᓕ ᐊᐅᓚᔪᓐᓇᕋᔭᕐᑐᖅ, ᑕᒪᓐᓇᓗ ᖁᐊᕐᓵᕐᓇᖅᑐᐊᓘᓪᓗᓂ.” ᐅᖃᖅᑐᖅ.

ᐅᓄᕐᑐᑦ ᐃᒡᓗᓕᐅᕐᓂᕐᒧᑦ ᓯᕗᓪᓕᐅᑎᑕᐅᔭᕆᐊᓕᓐᓂ ᐃᓚᒋᔭᐅᓚᐅᕐᑐᑦ ᐹᑐᓴᓐ ᑎᑎᕋᕐᓯᒪᔭᖏᓐᓂᒃ ᐃᓱᒪᓕᐅᕈᑎᓂᒃ ᐃᑲᔫᑎᑖᕆᐊᖃᕐᓂᖏᓐᓂᒃ ᐅᕘᓇ ᓄᑖᒥ ᐊᐅᓚᔾᔪᑎᒃᓴᓕᕆᓂᒃᑯᑦ, ᐅᑯᓂᖓ ᐃᓚᖃᖅᖢᑎᒃ:

• ᓄᓇᕗᒧᑦ ᑐᕌᖓᔪᒥᑦ ᐸᕐᓇᐅᑎᓂᒃ ᐃᒡᓗᓕᐅᕐᓂᕐᒧᑦ ᐊᒻᒪ ᐃᑲᔫᑎᒃᓴᓂᒃ ᐊᑯᓂᕈᓗᒃ ᐊᑐᖅᑕᐅᔪᒃᓴᓄᑦ ᐸᕐᓇᐅᓯᐅᕐᓂᕐᒧᑦ
• ᐃᑎᔪᒥᑦ ᑐᓚᒃᑕᕐᕕᒃᓴᓂᒃ ᕿᑎᕐᒥᐅᓄᑦ ᐊᒻᒪ ᕿᑭᖅᑕᖅᔪᐊᖅᒧᑦ
• ᑭᕙᓪᓕᕐᒥ ᐆᒻᒪᖅᑯᑎᓕᕆᓂᕐᒧᑦ-ᐊᑦᑕᑕᕈᓐᓇᐅᑎᓕᕆᓂᕐᒧᑦ ᐊᑦᑕᑕᐅᑎ ᒫᓂᑑᐸᒥᙶᕐᓗᓂ ᐆᒻᒪᖅᑯᑎᓕᕆᓂᕐᒥᒃ ᑕᒪᐅᙵᕐᓯᒍᑎᐅᓐᓇᔭᕐᑐᒥᒃ ᐊᒻᒪ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓂᒃ
• ᓄᑖᓂ ᐊᑯᓂᕈᓗᒃ ᐊᑐᖅᑕᐅᓇᔭᕐᑐᒥ ᐃᒪᖃᕈᓐᓇᕈᑎᒃᓴᒥ ᐃᖃᓗᖕᓂ ᐱᕈᖅᐸᓪᓕᐊᓂᖓᓄᑦ ᐱᔭᐅᔭᕆᐊᖃᕐᓂᕐᒧᑦ

ᐊᐅᓚᑦᑎᓂᕐᒧᑦ ᐃᑲᔫᑎᒃᓴᑦ ᓯᕗᓂᒃᓴᒥ ᓴᓇᔭᐅᓇᔭᕐᑐᓄᑦ ᐱᓕᕆᐊᓄᑦ, ᓲᕐᓗ ᖃᖓᑦᑎᐊᓵᖅ ᑐᓴᖅᑎᑦᑎᒍᑎᐅᓚᐅᕐᑐᖅ ᓴᓇᓂᐊᕐᓂᕋᖅᑎᓪᓗᒋ ᑕᓪᓕᒪᓂᒃ ᑐᐊᕕᕐᓇᖅᑐᓄᑦ ᐅᐸᒡᕕᒃᓴᐅᓂᐊᖅᑐᓂᒃ ᐃᓄᖕᓄᑦ ᐊᕐᓇᓄᑦ ᓱᕈᓯᕐᓄᓪᓗ.

ᐃᓚᖓᒍᓪᓕ, ᓲᕐᓗ ᐆᑐᓇᖅ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᖅ, ᒐᕙᒪᑐᖃᒃᑯᑦ ᑕᒪᑐᒧᖓ ᑮᓇᐅᔭᖄᓂᓕᕐᑐᑦ ᑭᓯᐊᓂᓕ ᓄᓇᕗᒧᑦ ᓱᓕ ᑐᓂᓯᓯᒪᙱᒻᒪᑕ, ᐹᑐᓴᓐ ᐅᖃᖅᑐᖅ.

$5 ᐱᓕᐊᓐ ᑖᓚᐃᑦ ᑐᖏᑦᑎᐊᖓᓂᒃ ᑐᓴᖅᑎᑦᑎᒍᑎᖃᖃᓚᐅᕐᓯᒪᖕᒪᑕ ᐱᐅᓯᕚᓪᓕᖅᑎᑦᑎᒍᑎᒃᓴᒥᑦ ᐃᓄᑭᑦᑐᓃᑐᓄᑦ ᒪᐅᓇ ᐅᓄᕈᓘᔭᕐᑐᒃᑯᑦ ᒐᕙᒪᑐᖃᒃᑯᓐᓂ ᐃᑲᔫᑎᒃᓴᑎᒍᑦ, ᐅᖃᕐᑐᖅ ᐹᑐᓴᓐ. ᑭᓯᐊᓂᓕ ᓄᓇᕗᒧᐊᖅᑐᖃᓚᐅᙱᑦᑐᖅ ᓱᓕ, ᐱᑖᕋᓲᑎᒃᓴᓂᒃ ᐱᓇᓱᑲᑕᒃᑲᓗᐊᕐᑎᓪᓗᒋᑦ, ᐃᓚᖃᖅᖢᑎᒃ ᐅᕙᙵᑦ $150 ᒥᓕᐊᓐᑖᓚᓂᒃ ᑐᐊᕕᕐᓇᖅᑐᓕᕆᓂᕐᒧᑦ ᐱᓕᕆᓂᕐᒧᑦ ᑖᓐᓇᓗ ᐅᖃᐅᓯᐅᓚᐅᕐᖢᓂ ᑎᓯᐱᕆᐅᓚᐅᕐᑐᒥᓐ.

“ᓄᓇᕗᒥᐅᑕᑦ ᑖᑯᓄᖓ ᑐᓂᔭᐅᓪᓗᐊᖅᑐᓂᒃ ᐱᑖᖅᑎᑕᐅᔪᒪᖕᒪᑦ,” ᐅᖃᖅᑐᖅ.

ᐃᖅᑲᓇᐃᔭᕐᓂᖅ ᐊᒻᒪ ᐃᓕᓐᓂᐊᕐᓂᖅ ᖃᕋᓴᐅᔭᖅᑎᒎᕆᐊᖃᓕᕐᑎᓪᓗᒍ ᐋᓐᓂᐊᕕᒡᔪᐊᕐᓇᐅᓂᖓᓂᒃ, ᒫᓐᓇ ᐱᑕᖃᕆᐊᖃᓪᓚᕆᖕᒪᑦ ᐱᐅᓂᕐᓴᓂᒃ, ᐊᑭᑭᓐᓂᕐᓴᓂᒃ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᕐᒥᒃ ᐱᔨᑦᑎᕋᐅᑎᓂᒃ, ᐹᑐᓴᓐ ᐅᖃᖅᑐᖅ, ᐃᓱᒪᓕᐅᕆᓪᓗᓂ ᒐᕙᒪᒃᑯᑦ ᐃᑲᔪᖅᑐᐃᓗᑎᒃ ᐊᑐᐃᓐᓇᐅᓕᕐᑎᑦᑎᓂᕐᒥᒃ ᐊᒻᒪ ᐱᒡᒍᓴᐅᑎᐅᔪᓐᓇᖅᑐᓂᒃ ᖃᕋᓴᐅᔭᓂᒃ ᐱᔨᑦᑎᕋᐅᑎᓕᕆᕙᒃᑐᓂᒃ.

“ᓄᓇᕗᒻᒥᐅᑦ ᐊᑐᐃᓐᓇᖃᙱᒻᒪᑕ ᐊᑯᓂᕈᓗᒃ ᐊᑐᖅᑕᐅᔪᓐᓇᖅᑐᓄᑦ ᐋᖅᑭᒍᑎᒃᓴᓂᒃ ᓲᕐᓗ ᒪᑯᓄᖓ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᖅ ᐅᕝᕙᓘᓐᓃᑦ ᖁᒻᒥᒃᑎᑕᐅᓯᒪᔪᒃᑰᖓᔪᓂᒃ ᓄᓇᕐᔪᐊᒧᑦ ᖃᓂᑎᑕᐅᔪᓂᒃ.”

ᐊᓯᖏᑦ ᐃᓱᒪᓕᐅᕈᑎᑦ ᑐᓂᔭᐅᔪᓂᒃ ᐃᓚᖃᕐᒥᔪᖅ ᐋᖅᑭᒃᓱᐃᓂᕐᒥ ᐃᖃᓗᓕᕆᓂᕐᒧᑦ ᐊᖏᖃᑎᒌᒍᑎᒃᓴᓂᒃ ᐊᒻᒪᓗ ᐃᖃᓗᓕᕆᓂᕐᒧᑦ ᓚᐃᓴᓐᓯᐅᔪᑦ ᐋᖅᑭᒃᑕᐅᓂᕐᓴᐅᓗᓂ ᓄᓇᖃᖅᑐᑦ ᐃᖅᑲᓇᐃᔮᖃᕈᓐᓇᕐᓯᓗᑎᒃ.

ᐹᑐᓴᓐ ᐃᓱᒪᓕᐅᕆᓚᐅᕐᒥᔪᖅ ᑮᓇᐅᔭᓂ ᐃᑲᔫᑎᓕᕆᓂᕐᒥᒃ ᐊᔪᕈᓐᓃᖅᓴᖅᑎᑦᑎᓂᕐᒥᒃ ᐃᓄᖕᓂ ᐃᓱᒪᓕᕆᓂᕐᒥᒃ ᐱᓕᕆᔨᐅᓇᔭᕐᑐᓂᒃ ᐃᓕᖅᑯᓯᕐᒧᑦ ᑐᕌᖓᓂᕐᓴᐅᓯᒪᔪᓂᒃ.

ᑖᔅᓱᒪ ᓴᓂᑑ ᑐᓂᔭᖏᑦ ᒪᓕᒃᓯᒪᔪᑦ ᐅᖃᓪᓚᖃᖃᑎᖃᕐᓯᒪᓂᕐᒥᒃ ᓄᓇᕗᒥᑦ ᒐᕙᒪᒃᑯᓐᓂᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᐱᓪᓚᕆᖕᓄᑦ ᑲᑐᔾᔨᖃᑎᒌᓂᒃ, ᐊᒻᒪᓗ 164 ᓇᖕᒥᓂᖅ ᐱᓕᕆᐊᖃᖅᑐᓂᒃ ᐊᒻᒪ ᑲᑐᔾᔨᖃᑎᒌᓂᒃ ᓄᓇᕗᒦᑦᑐᓂᒃ.

“ᖃᐅᔨᓇᓱᓚᐅᕋᒪ ᑖᒃᑯᓂᖓ ᐃᓱᒪᓕᐅᕈᑎᓂᒃ ᓈᒻᒪᒃᓴᕋᓗᐊᕆᐊᒃᓴᖏᓐᓂᒃ ᑭᒡᒐᖅᑐᐃᓂᓐᓄᑦ ᑖᒃᑯᓂᖓ ᐋᖅᑭᒃᓯᒪᔭᓐᓂᒃ,” ᐹᑐᓴᓐ ᐅᖃᖅᑐᖅ.