ᓄᓇᕗᒥᑦ ᒐᕙᒪᒃᑯᑦ ᐱᔨᑦᑎᕋᐅᑎᓂᒃ ᐱᒋᐊᖅᑎᑦᑎᒃᑲᓐᓂᖅᑐᑦ ᐅᖅᓱᖅᑑᕐᒥ ᑐᓴᐅᒪᔾᔪᑎᓕᕆᕝᕕᒃ ᐃᑭᓚᐅᕐᑎᓪᓗᒍ

For an English version of this story, please see GN restoring services in Gjoa Haven after fire destroys telecommunications hub.

ᓄᓇᕗᒥ ᒐᕙᒪᒃᑯᑦ ᐱᓕᕆᐊᖃᕐᐸᓪᓕᐊᓕᕐᑐᑦ ᖃᓄᖅ ᐱᔨᑦᑎᕋᐅᑎᖏ ᐃᓚᖏᑦ ᐊᑐᖅᑕᐅᒃᑲᓐᓂᕈᓐᓇᕐᒪᖓᑦ ᐅᖅᓱᖅᑑᕐᒥ ᐃᑭᓚᐅᕐᑎᓪᓗᒍ ᒐᕙᒪᒃᑯᑦ ᑐᓴᐅᒪᔾᔪᑎᓕᕆᕝᕕᒥ ᕼᐋᒻᒪᓚᒃᑯᓐᓄᑦ ᒫᔅᓯ 26ᒥ.

ᐅᓇ NCC ᐃᒡᓗᖁᑎᖓ ᑐᓴᐅᒪᔾᔪᑎᓕᕆᓂᕐᒧᑦ ᐊᑦᑕᑕᐅᑎᓂᒃ ᐱᓕᕆᕝᕕᐅᓚᐅᕐᑐᖅ, ᖃᕋᓴᐅᔭᓄᑦ ᐊᑦᑕᑕᕐᓯᒪᔾᔪᑎᓂᒃ, ᓄᓇᓕᖕᓄᑦ ᐊᑦᑕᑕᕈᓐᓇᐅᑎᓂᒃ ᖃᕋᓴᐅᔭᓄᑦ ᐊᒻᒪᓗ ᐱᔨᑦᑎᕋᐅᑎᓕᓂᕐᒥᒃ ᓄᓇᓕᖕᓄᑦ ᒪᐅᓇ ᐅᖄᓚᐅᑎᓕᕆᓂᒃᑯᑦ ᐊᒻᒪ ᓴᖅᑭᔮᒐᒃᑯᑦ ᑲᑎᒪᔾᔪᑎᐅᕙᒃᑐᓂᒃ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᑐᓴᒐᒃᓴᓕᐅᕐᑎᓪᓗᒋᑦ ᓇᒡᒐᔾᔭᒥ.

ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ ᑕᐃᕕᑦ ᔪᐊᓇᓯ ᐅᖃᓚᐅᕐᑐᖅ ᑖᓐᓇ ᐃᒡᓗ ᑎᑎᕋᕐᕕᐅᓚᐅᕐᓂᖓᓂᒃ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᓄᑦ.

ᕼᐋᒻᒪᓚᒃᑯᓐᓄᑦ ᖃᑦᑎᕆᔨᒃᑯᑦ ᐊᖓᔪᖅᑳᖓ ᕼᐊᒃᑐ ᓇᒡᔭᒃ ᐅᖃᓚᐅᕐᑐᖅ ᐱᔨᑦᑎᕋᐅᑎᓕᕆᕝᕕᐅᒪᐅᕐᓂᖓᓂᒃ ᓄᓇᓯᐅᑎᓄᑦ ᓚᐃᓴᓐᓂᑖᕐᕕᐅᓪᓗᓂ ᐊᒻᒪ ᒪᓕᒐᓕᕆᔨᒃᑯᑦ ᐱᔨᑦᑎᕋᐅᑎᖏᓐᓂᒃ.

ᐊᖁᑦᑐᓐᓇᐅᑎᓄᑦ ᓚᐃᓴᓐᓯᑖᖅᑎᑦᑎᑲᑕᖕᓂᖅ, ᓇᓗᓇᐃᒃᑯᑎᒃᓴᓂᒃ ᐊᒻᒪ ᐊᖁᑦᑐᖅᓯᐅᑎᑖᕋᓱᖕᓂᕐᒧᑦ ᖃᐅᔨᓴᕈᑏᑦ ᐊᒻᒪ ᐊᓯᖏᑦ ᓄᓇᓯᐅᑎᒨᖓᔪᑦ ᒫᓐᓇ ᓄᖅᑲᖅᑎᑕᐅᓯᒪᔪᑦ, ᒐᕙᒪᒃᑯᑦ ᑐᓴᖅᑎᑦᑎᓚᐅᕐᑐᑦ ᑖᓐᓇ ᖃᓄᑎᒋ ᐃᑭᑦᑕᑐᖅ ᐊᒃᑐᐃᓯᒪᓂᖓᓂᒃ ᐱᔨᑦᑎᕋᐅᑎᓂᒃ.

ᐅᖅᓱᖅᑑᕐᒥ ᐱᙳᐊᕐᕕᒃ ᐊᒃᑐᖅᑕᐅᓯᒪᙱᑦᑐᖅ ᑭᓯᐊᓂᓕ ᑭᖑᕙᕈᑎᖃᑐᐃᓐᓇᕆᐊᓕᒃ ᐃᓚᖏᑦ ᑐᓴᐅᒪᔾᔪᑎᓕᕆᓂᕐᒧᑦ ᐊᖅᑯᑎᑦ ᐊᑐᐃᓐᓇᐅᙱᓐᓂᖏᓐᓄᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᑐᑦ ᑕᒪᐅᖓ. ᒪᓕᒐᓕᕆᔨᒃᑯᑦ ᐊᐅᓚᑕᖏᑦ ᑲᔪᓯᓂᐊᕐᑐᑦ “ᓄᖅᑲᖅᑎᑕᐅᓯᒪᙱᓪᓗᑎᒃ,” ᒪᓕᒐᓕᕆᔨᑦ ᐅᖃᓚᐅᕐᑐᑦ.

ᖁᖅᓲᓐ ᐃᓕᓴᕐᕕᒃ ᐊᒻᒪᓗ ᕿᕿᕐᑕᖅ ᐃᓕᓐᓂᐊᕕᐊᓗᒃ ᓱᓕ ᒪᑐᐃᖓᓂᐊᕐᑐᖅ “ᐊᓯᔾᔨᖅᑐᖃᓗᐊᙱᓪᓗᓂ ᐱᔨᑦᑎᕋᐅᑎᖏᓐᓂᒃ,” ᐃᓕᓐᓂᐊᖅᑐᓕᕆᔩᑦ ᑐᓴᖅᑎᑦᑎᓚᐅᕐᒥᔪᑦ.

ᐋᓐᓂᕐᑐᖃᓚᐅᙱᑦᑐᑦ ᐊᒻᒪᓗ ᓇᒡᔭᒃ ᐅᖃᓚᐅᖅᖢᓂ ᕼᐋᒻᒪᓚᒃᑯᑦ ᐱᓕᕆᐊᖃᕆᐊᖃᓕᕐᓂᖏᓐᓂᒃ ᖃᓄᖅ ᑖᓐᓇ ᐃᑭᓕᕆᐊᓚᐅᕐᓂᖓᓂᒃ ᐃᑲᔪᕐᑕᐅᓗᑎᒃ ᖃᑦᑎᕆᔨᒃᑯᑦ ᐊᖓᔪᖅᑳᖓᑕ ᐃᑲᔪᖅᑎᖓᓂᒃ ᔮᔅ ᑐᐊᐃᐅᓪ.

ᖃᐅᔨᓴᑐᐃᓐᓇᕆᐊᖃᕐᑐᑦ ᐱᓇᓱᐊᕈᓯᐅᑉ ᐅᖓᑖᓄᑦ ᐅᖃᒃᑲᓐᓂᓚᐅᕐᑐᖅ ᓇᒡᔭᒃ

ᑕᒪᑐᒧᖓ ᖃᓄᐃᓕᐅᕈᑎᒃᓴᓂ ᐱᓕᕆᐊᖃᓕᕐᑐᑦ ᐊᒻᒪᓗ ᐃᓚᖃᖅᖢᓂ ᖃᐅᔨᓴᑲᑕᖕᓂᕐᒥᒃ ᑕᒪᐃᓐᓂ ᐱᓕᕆᕝᕕᐅᑉ ᐃᓗᐊᒍᑦ ᐊᒻᒪ ᐊᓯᐊᒍᑦ ᐊᒃᑐᐃᒍᑎᐅᔪᓂᒃ ᐃᑭᑦᑐᕕᓂᕐᒧᑦ.

ᐃᖅᑲᓇᐃᔭᖅᑎᓄᓪᓕ ᑕᕝᕙᓂ, ᓄᓇᕗᒥᑦ ᒐᕙᒪᒃᑯᑦ ᐊᖏᕐᕋᖏᓐᓂᒃ ᐃᖅᑲᓇᐃᔭᖅᑎᑕᐅᓂᐊᕐᓂᖏᓐᓄᒃ ᐊᒃᑐᖅᑕᐅᓯᒪᔪᑦ ᐊᔪᕐᓇᙱᑉᐸᑦ.