ᓄᓇᕗᒥᑦ ᒐᕙᒪᒃᑯᑦ ᒪᓂᒻᒪᐃᔪᑦ ᐅᓄᒃᑲᓐᓂᕐᑐᓂᒃ ᑮᓇᐅᔭᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᑖᒃᑲᓐᓂᕋᓱᒃᖢᑎᒃ

For the English version of this story, please see Nunavut government offers more money in bid to bolster health staff.

ᓄᓇᕗᒥᑦ ᒐᕙᒪᒃᑯᑦ ᐊᒻᒪ ᓄᓇᕗᒥᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐃᓱᒪᔪᑦ ᐅᓇ ᓄᑖᖅ ᐱᔪᒪᔾᔪᑎᒃᑲᓐᓂᐅᓂᐊᖅᑐᖅ ᐃᑲᔪᕈᑎᐅᓂᐊᖁᓪᓗᒍ ᐋᓐᓂᐊᖃᕐᓇᙱᑦᑐᓕᕆᔨᓂ ᐃᖅᑲᓇᐃᔭᖅᑎᑖᒃᑲᓐᓂᕈᑎᐅᓗᓂ ᐊᒻᒪ ᓄᓇᕗᒦᔾᔪᑎᐅᓂᕐᓴᐅᓗᓂ.

ᑐᓴᖅᑎᑦᑎᓚᐅᕐᒪᑕ ᑐᑭᓯᖃᑦᑕᐅᑎᔾᔪᑎᒥ ᓄᕕᐱᕆ 10-ᖑᑎᓪᓗᒍ ᐃᓚᖃᕐᓂᕋᖅᖢᒍ ᑮᓇᐅᔭᖅᑖᒃᑲᓐᓂᕈᑎᐅᔪᓐᓇᖅᑐᓂ ᐃᖅᑲᓇᐃᔭᖅᑎᑖᕋᓱᒍᑎᓂ ᐊᒻᒪ ᐃᖅᑲᓇᐃᔭᕈᑎᐅᑯᑖᒐᔭᖅᑐᓂᒃ, ᐃᑲᕐᕋᒧᑦ ᑮᓇᐅᔭᓕᐅᕈᑎᒃᓴᓂᒃ ᐃᖅᑲᓇᐃᔮᒃᓴᓄᑦ ᐱᔭᐅᓇᓱᙱᓐᓂᕐᓴᐅᕙᒃᑐᓄᑦ ᐊᒻᒪᓗ ᐃᖅᑲᓇᐃᔭᖅᑎᖃᙱᓗᐊᕐᓂᕐᒧᑦ ᐊᒻᒪᓗ ᐊᑭᓕᒃᓴᕆᔭᐅᔪᓂᒃ ᐃᓕᓐᓂᐊᕈᑎᕕᓂᕐᓄᑦ ᓄᓇᕗᒥ ᐲᕐᓯᑎᑦᑎᔾᔪᑎᐅᔪᓐᓇᖅᑐᓂᒃ.

ᒫᓐᓇ ᐋᓐᓂᐊᖃᕐᓇᙱᑦᑐᓕᕆᔨᐅᔪᑦ ᐊᑭᑦᑐᕆᐊᖅᑕᐅᓂᐊᕐᑐᑦ ᐊᖏᕈᑎᑎᒍᑦ, ᐊᒻᒪᓗ ᐊᑭᑦᑐᕆᐊᕐᓂᖓ ᐱᒋᐊᕐᕕᖓᓂ ᐊᑐᓕᕐᓂᐊᖅᖢᓂ.

“ᖃᐅᔨᔪᒃᓴᐅᙱᒃᑲᓗᐊᖅᑐᓯ ᑭᓯᐊᓂᓕ ᖁᕕᐊᓱᑦᑎᐊᕋᒪ ᐅᓪᓗᒥ,” ᐅᖃᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ. “ᐃᓱᒫᓘᑎᒋᔭᓐᓇᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᖅ ᓄᓇᕗᒥᑦ ᐊᒻᒪ ᓄᓇᕗᒥᐅᓄᑦ ᐱᔭᐅᔭᕆᐊᖃᖅᑐᓂᒃ, ᑭᓯᐊᓂᓕ ᐅᓪᓗᓂ ᖁᕕᐊᓇᕐᑐᖅ.”

ᒪᐃᓐ ᐅᐸᒍᑎᓯᒪᓚᐅᕐᑐᖅ ᑐᓴᒐᒃᓴᓕᐅᖅᑎᓪᓗᒋ ᐅᕙᓂ ᒪᓕᒐᓕᕆᕕᒡᔪᐊᕐᒥ ᐅᑯᐊᓗ ᓄᓇᕗᒥᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᖅ ᔭᐃᓴᓐ ᕈᓴᓐ ᐊᒻᒪ ᓯᕗᓕᐅᖅᑎ ᐸᐅᓗᓯ ᐊᕿᐊᕈᖅ.

ᒪᐃᓐ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᐃᑲᔫᑎᒃᓴᐃᑦ ᐃᖅᑲᓇᐃᔭᖅᑎᖃᕋᓱᖕᓂᒧᑦ ᐃᑲᔫᑎᐅᓂᐊᕐᓂᕋᖅᖢᓂᐅᒃ ᐃᖅᑲᓇᐃᔭᖅᑎᑖᕋᓱᖕᓂᕐᒧᑦ ᐋᓐᓂᐊᕖᑦ ᐃᖅᑲᓇᐃᔭᖅᑎᑭᒃᓴᓗᐊᑲᑕᒃᑎᓪᓗᒋ ᓲᕐᓗ ᖁᕕᐊᓱᒡᕕᖕᒥᑦ.

ᐅᖃᓚᐅᕐᒥᔪᖅ ᐃᓱᒪᓂᕋᖅᖢᓂ ᓄᓇᕗᒥᑦ ᐃᖅᑲᓇᐃᔭᖅᑎᑖᕋᓱᖕᓂ ᐊᔪᕐᓇᙱᓐᓂᕐᓴᐅᓂᐊᖁᓪᓗᓂᐅ ᐊᒻᒪᓗ ᐃᖅᑲᓇᐃᔭᖅᑎᒋᔭᐅᔪᓂᒃ ᐃᑲᔪᕈᑎᒻᒪᕆᐅᓗᓂ ᓄᓇᕗᒥᑦ.

“ᖁᕕᐊᓱᑦᑎᐊᕋᒪ ᐃᖅᑲᓇᐃᔭᖅᑎᒋᕙᒃᑕᑦᑎᓐᓄᑦ,” ᒪᐃᓐ ᐅᖃᕐᑐᖅ.

“ᕿᓂᕋᓱᖃᑦᑕᕋᑦᑕ ᖃᐅᔨᒪᑎᑐᒪᓪᓗᑎᒍ ᐃᑲᔪᒻᒪᕆᖃᑦᑕᕐᓂᖏᓐᓂᒃ ᐊᒻᒪᓗ ᑐᓵᔭᐅᓂᖏᓐᓂᒃ ᐊᒻᒪ ᐃᓱᒫᓘᑎᖏᓐ ᑐᓵᕙᒃᖢᑕ.”

ᐋᓐᓂᐊᓯᐅᖅᑎᓂᒃ ᑎᑭᑎᑦᑎᓯᒪᓇᓱᖕᓂᖅ ᐊᒃᓱᕈᕈᑎᐅᖏᓐᓇᐅᔭᕐᒪᑦ ᓄᓇᕗᒥᑦ. ᑕᒪᓐᓇ ᐊᕐᕌᒍ ᐱᒋᐊᕐᓯᒪᓕᕐᑎᓪᓗᒍ ᖃᐅᓱᐃᑦᑐᕐᒥ ᐋᓐᓂᐊᓯᐅᕐᑎ ᐸᓯᔭᒃᓴᙳᖅᑎᑦᑎᓚᐅᕐᓯᒪᖕᒪᑦ ᓄᓇᕗᒥᑦ ᒐᕙᒪᒃᑯᓐᓂ ᐅᖃᖅᖢᓂ ᐸᒡᕕᓵᕆᔭᐅᓯᒪᓂᕐᒥᒃ ᐊᒻᒪᓗ ᐃᖅᑲᓇᐃᔭᕈᓐᓃᖅᑎᑕᐅᑐᐃᓐᓇᕐᓯᒪᓂᕐᒥᒃ.

ᐊᓯᖏᑦᑕᐅᖅ ᐋᓐᓂᐊᓯᐅᖅᑎᑦ ᐅᖃᓪᓚᖃᑦᑕᕐᓯᒪᖕᒪᑕ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᒪᑐᒪᓂ ᐊᕐᕌᒍᒥ, ᐅᖃᖅᖢᑎᒃ ᐱᓕᕆᐊᒃᓴᖃᓗᐊᕐᓂᖏᓐᓂᒃ, ᐃᑲᔪᖅᑕᐅᙱᓗᐊᕐᓂᖏᓐᓂᒃ ᐊᒻᒪᓗ ᐃᖅᑲᓇᐃᔭᕈᓐᓃᖅᑎᑕᐅᕙᒃᖢᑎᒃ ᐃᑲᔪᖅᑕᐅᔪᒪᒃᐸᑕ.

ᑮᓇᐅᔭᐃᓪᓕ ᐊᓯᐊᒍᑦ, ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᐱᕆᓚᐅᕐᑐᑦ ᒪᐃᓐᒧ ᐅᓇ ᑐᑭᓯᖃᑦᑕᐅᑎᔾᔪᑎᑦ ᐃᓚᖃᕆᐊᒃᓴᖓᓂᒃ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔪᕈᑎᒃᓴᓂᒃ.

ᒪᐃᓐ ᐅᖃᓚᐅᕐᑐᖅ ᒫᓐᓇ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔫᑎᑕᖃᐅᕐᓂᖓᓂᒃ ᐃᖅᑲᓇᐃᔭᖅᑎᓄᑦ ᐅᑯᑎᒎᓇᖅ ᐃᖅᑲᓇᐃᔮᒃᓴᓕᕆᔨᒃᑯᑎᒍᑦ ᒪᑯᓂᖓ ᐃᖅᑲᓇᐃᔭᖅᑎᓄᑦ ᐊᒻᒪ ᐃᓚᖏᓐᓄᑦ ᐃᑲᔪᕈᑎᒃᓴᓂᒃ ᑕᐃᒪᙵᓕᒫᖅ 24/7 ᐅᖃᕐᕕᐅᔪᓐᓇᖅᑐᓂᒃ ᐃᖅᑲᓇᐃᔭᖅᑎᓄᑦ ᐃᓚᖏᓐᓄᓪᓗ.

“ᐅᑯᐊ ᐃᑲᔪᕈᑎᒃᓴᐃᑦ ᒫᓐᓇ ᐊᑐᖅᑕᐅᔪᑦ ᐊᒻᒪᓗ ᐊᑐᐃᓐᓇᐅᑎᖢᑎᒍᑦ ᐃᑲᔪᕈᑎᐅᔪᓐᓇᖅᖢᑎ ᐃᖅᑲᓇᐃᔭᖅᑎᒋᔭᑦᑎᓐᓄ,” ᐅᖃᕐᑐᖅ.

ᕈᓴᓐᒧᓪᓕ ᐅᓇ ᐊᖏᖃᑎᒌᒍᑎ ᐱᕕᖃᕈᑎᐅᔪᓐᓇᓚᐅᕐᒪᑦ ᐱᓕᕆᖃᑎᖃᕈᓐᓇᕐᓂᕐᒥᒃ ᓄᓇᕗᒥᑦ ᒐᕙᒪᒃᑯᓐᓂᒃ ᐃᓄᐃᑦ ᓄᓇᓕᖕᓃᑦᑐᑦ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔫᑎᖃᐃᓐᓇᖅᑎᓪᓗᒋ ᐋᓐᓂᐊᕖᑦ ᒪᑐᓯᒪᒐᓗᐊᖅᑎᓪᓗᒋ ᐃᖅᑲᓇᐃᔭᖅᑎᖃᙱᓗᐊᕐᓂᕐᒧᑦ.

ᑕᓪᓕᒪᑦ ᓄᓇᓕᖕᓂ ᐋᓐᓂᐊᕖᑦ — ᑭᙵᐃᑦ, ᐸᓐᓂᕐᑑ, ᑭᒻᒥᕈᑦ, ᐊᐅᓱᐃᑦᑐᖅ ᐊᒻᒪ ᐃᒃᐱᐊᕐᔪᒃ — ᒪᑐᓚᐅᑲᒋᐊᖃᓚᐅᕐᓯᒪᔪᑦ ᐃᖅᑲᓇᐃᔭᖅᑎᖃᙱᓗᐊᕐᓂᕐᒧᑦ.

“ᑕᐃᒪᐃᑦᑕᕆᐊᖃᙱᓐᓇᑦᑕ ᓄᓇᕗᒥᑦ ᓇᓂᑐᐃᓐᓇᕐᓘᓐᓃᑦ ᑲᓇᑕᒥ,” ᕈᓴᓐ ᐅᖃᕐᑐᖅ.

ᑮᓇᐅᔭᐃᑦ ᐊᓯᐊᒍᑦ, ᒪᐃᓐ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᐊᖏᖃᑎᒌᒍᑎ ᓄᓇᕗᒥᑦ ᒐᕙᒪᒃᑯᓐᓂ ᐃᑲᔪᕈᑎᐅᓂᐊᕐᓗᓂ ᐃᖅᑲᓇᐃᔭᖅᑎᑦᑎᔨᑦᑎᐊᕙᐅᓂᖏᓐᓂᒃ ᓴᖅᑭᔮᖅᑎᑦᑎᓗᓂ.

“ᐅᖃᑐᐃᓐᓇᖃᑦᑕᕆᐊᖃᙱᓐᓇᑦᑕ,” ᐅᖃᕐᑐᖅ.

“ᐅᖃᓪᓚᑦᑎᐊᕋᓱᑐᐃᓐᓇᕆᐊᖃᙱᓐᓇᑦᑕ ᒪᓕᒐᓕᕆᕝᕕᒃᒥ ᐊᒻᒪ ᐃᒪᓐᓇ ᐅᖃᕐᓗᑕ, ‘ᐋᓐᓂᐊᖃᕐᓇᙱᑦᑐᓕᕆᔨᕗᑦ ᑐᙵᕕᒋᒐᑦᑎᒍ.’ ᑕᒪᓐᓇᑦᑕᐅᖅ ᓴᕿᑎᓯᒪᔭᕆᐊᖃᕋᑦᑎᒍᑦ.”