ᓄᓇᕗᒥᑦ ᓄᑖᖅ ᐸᓖᓯᓄᑦ ᐊᖓᔪᖅᑳᖑᓕᖅᑐᖅ ᐅᖃᓪᓚᒃᐳᖅ ᑲᒪᒋᔭᖃᕈᓐᓇᑦᑎᐊᕐᓂᕐᒥᒃ ᐊᒻᒪ ᐅᒃᐱᕇᖃᑦᑕᐅᑎᔪᓐᓇᕐᓂᕐᒥᒃ

ᓄᓇᕗᒧᑦ ᓄᑖᖅ ᐸᓖᓯᓄᑦ ᐊᖓᔪᖅᑳᖑᓕᕐᑐᖅ ᐱᓇᓱᒍᒪᒻᒪᕆᒃᐳᖅ ᐅᒃᐱᕈᓱᖃᑦᑕᐅᑎᒌᖕᓂᕐᒥᑦ ᐅᑯᓇᓂ ᐃᓄᖕᓂᑦ ᐊᒻᒪ ᐸᓖᓯᑯᓐᓂᒃ, ᐊᒻᒪᓗ ᐃᑲᔪᖅᑕᐅᔾᔪᑎᐅᓂᐊᕐᑐᓂᒃ ᐸᓖᓯᓄᑦ ᐃᖅᑲᓇᐃᔭᖅᑐᓄᑦ ᓄᓇᕗᒥᑦ 25-ᓂᑦ ᐸᓖᓯᓕᕆᕝᕕᒃᓄᑦ.

“ᐅᓇ ᐱᓇᓱᐊᕆᐊᖃᒻᒪᕆᒃᑕᕗᑦ ᓴᓇᕝᕕᒃᑎᓐᓂ,” ᐊᖓᔪᖅᑳᖅ ᐊᒫᓐᓇ ᔪᐆᓐᔅ ᐅᖃᐅᓯᖃᖅᖢᓂ ᓄᓇᕗᒥᑦ ᐸᓖᓯᑯᓐᓂᑦ (RCMP V Division), ᐊᐱᕐᓱᖅᑕᐅᑎᓪᓗᒍ ᓄᓇᑦᓯᐊᕐᒥᑦ ᐱᕙᓪᓕᐊᔪᓂᒃ ᑎᓴᒻᒥᕐᒥᑦ, ᔭᓄᐊᕆ 24, ᐅᓪᓗᖅ ᑎᓴᒪᒋᓕᖅᑕᖓᓂᒃ ᐱᓕᕆᐊᖃᓕᖅᑎᓪᓗᒍ ᓄᓇᕗᒥᑦ ᐸᓖᓯᓄᑦ ᐊᖓᔪᖅᑳᖑᓂᕐᒥᒃ.

ᐃᒪᓐᓇᐅᕙᖕᒪᑦ ᐃᓛᓐᓂᑦ “ᐅᒃᐱᕈᓱᖕᓂᖃᕋᑎᒃ” ᓄᓇᕗᒥᑦ ᐸᓖᓯᒃᑯᑦ ᐃᓄᖕᓂ ᐅᖃᖃᑎᖃᕋᓱᒃᑎᓪᓗᒋ, ᐅᖃᖅᑐᖅ ᔪᐆᓐᔅ. ᐊᒻᒪᓗ, “ᐸᓖᓯᒃᑯᑦ ᐊᑲᐅᙱᓕᐅᕈᑎᖃᕐᓯᒪᖕᒪᑕ ᐸᒡᕕᓵᕆᔭᐅᓂᒃᑯᑦ ᐊᒻᒪ ᐱᓕᕆᐊᖏᓐᓄᑦ ᐃᓱᒫᓗᒋᔭᐅᓇᑎᒃ ᓴᓇᕝᕕᖏᓐᓂᒃ,” ᐅᖃᖅᑐᖅ.

ᔪᐆᓐᔅ 8-ᒋᔭᐅᔪᖅ ᐊᖓᔪᖅᑳᕆᔭᐅᓯᒪᔪᓂᒃ ᓄᓇᕗᒥᑦ ᐸᓖᓯᑯᑦ “V Division-ᒥᑦ, ᐊᒻᒪᓗ ᓯᕗᓕᖅᐹᖑᓪᓗᓂ ᐊᕐᓇᐅᓪᓗᓂ ᑖᔅᓱᒥᖓ ᐃᖅᑲᓇᐃᔮᒥᑦ.

ᐃᓇᖏᕐᓯᔪᖅ ᐊᖓᔪᖅᑳᖑᓚᐅᕐᑐᒥᒃ ᒪᐃᑯᓪ ᔭᕗᕆ, ᑖᓐᓇ ᐊᖓᔪᖅᑳᕆᔭᐅᓚᐅᕐᑐᖅ 2014-ᒥᑦ ᐱᓇᓱᐊᕈᓯᐅᓚᐅᕐᑐᖅ ᑎᑭᖢᒍ.

ᔪᐆᓐᔅ ᓄᓇᕗᒧᐊᕐᓯᒪᔪᖅ ᔭᓗᓇᐃᒥ, ᑕᐃᑲᓂ ᐊᖓᔪᖅᑳᕆᔭᐅᓪᓗᓂ ᐱᕋᔭᒃᓯᒪᔪᓕᕆᓂᕐᒧᑦ ᐱᓕᕆᐊᓂᒃ ᓄᓇᑦᓯᐊᕐᒧᑦ. ᓯᕗᓂᒃᑲᓐᓂᐊᓂᓪᓕ ᐸᓖᓯᐅᓚᐅᕐᑐᖅ  ᓯᒡᔭᖅᐸᓯᖕᐅᑕᒥᒃ ᓄᓇᖃᖅᑳᖅᑐᑦ ᐊᓪᓚᐃᑦ ᓄᓇᓕᖏᓐᓂᒃ ᐳᕆᑎᔅ ᑲᓚᒻᐱᐊ ᐅᐊᖕᓇᖓᓂᒃ.

ᔪᐊᓐᔅ ᐃᓅᓂᑯ ᒪᓐᑐᕆᐊᓪ, ᑯᐸᐃᒃᒥᑦ ᐊᒻᒪ ᐱᕈᕐᓴᔭᐅᓪᓗᓂ ᕼᐋᓕᕚᒃᔅ, ᓅᕙ ᓯᑰᓯᐊᒥᑦ.

ᐊᕐᕌᒍᓂ 27-ᓂ ᐸᓖᓯᐅᓯᒪᔪᖅ ᐊᒻᒪᓗ ᐱᖓᔪᒋᔭᐅᓪᓗᓂ ᓂᕈᐊᕆᔭᐅᔪᓂᑯᓂᒃ ᐊᐱᖅᓱᖅᑕᐅᔪᒪᔪᓂᒃ ᓄᓇᕗᒥᑦ ᐃᖅᑲᓇᐃᔮᒃᓴᒧᑦ.

ᐱᓯᒪᔪᖅ ᑲᓇᑕᒥ ᐅᓇᑕᖅᑐᒃᓴᓄᑦ ᐃᓕᓴᕆᔭᐅᔾᔪᑎᒥᒃ ᐊᒻᒪᓗ ᑕᓪᓕᒪᓂᒃ ᖃᑭᖅᑯᐊᖅᑕᐅᓯᒪᓪᓗᓂ. ᐃᓚᖓ ᐃᓕᓴᕆᔭᐅᔾᔪᑎᖓ ᐆᒧᖓᐅᓂᑯ ᔫᓇᐃᑕᑦ ᓇᐃᓴᓐᑯᓐᓄᑦ ᐊᐅᓪᓚᖅᑎᑕᐅᓯᒪᓚᐅᕐᓯᒪᓪᓗᓂ ᑰᓱᕘᒧᑦ, ᑕᕝᕙᓃᖢᓂᓗ ᑕᕿᓂᒃ 9-ᓂ 2001-ᒥᑦ.

“ᖁᕕᐊᒋᒐᒃᑯ ᐅᐸᒃᓯᒑᖓᒪ ᐱᓕᕆᐊᓐᓄᑦ ᐊᓯᙳᖅᑎᑦᑎᒍᑎᐅᔪᓐᓇᖅᑐᒥᒃ,” ᐅᖃᖅᑐᖅ, ᑐᑭᓯᒋᐊᖅᑎᑦᑎᓪᓗᓂ ᐊᖏᓂᕐᓵᓗᖕᓂ ᐱᓕᕆᕝᕕᐅᔪᓂᒃ ᐱᓕᕆᔨᒻᒪᕆᐅᓂᕐᓴᑦ ᑐᐊᕕᑲᑕᑐᐃᓐᓇᖃᑦᑕᕐᒪᑕ ᖃᐅᑕᒫᑦ ᐱᓕᕆᐊᒃᓴᓄᑦ. ᒥᑭᓐᓂᕐᓴᓂᒡᓕ ᐸᓖᓯᑯᓐᓂᒃ, ᐊᔪᕐᓇᙱᓐᓂᕐᓴᐅᖕᒪ ᐊᑕᐅᓯᖅ ᐃᓄᒃ ᐊᒃᑐᐃᒍᑎᖃᕈᓐᓇᕐᓂᖓᓂᒃ, ᐅᖃᖅᑐᖅ. 

“ᐅᕙᓂᓕ, ᐱᕕᖃᕋᒪ ᐅᖃᕈᓐᓇᖅᖢᖓ, ‘ᑭᓲᖕᒪᑕ ᐃᓱᒫᓘᑎᒃᓴᕗᑦ?’ ᐊᒻᒪᓗ ᐱᓕᕆᖃᑎᖃᕐᓗᖓ ᓴᓇᖃᑎᑦᑎᓐᓂᒃ ᐊᒻᒪ ᒐᕙᒪᑦᑎᓐᓂᒃ ᖃᓄᖅ ᐋᕿᒃᓯᔪᓐᓇᕐᒪᖔᑦᑕ: ᖃᓄᖅ ᐱᐅᓯᕚᓪᓕᖅᑎᒍᓐᓇᖅᐸᕗᑦ, ᐊᒻᒪ ᖁᐊᕐᓵᕐᓇᙱᓐᓂᕐᓴᐅᓗᓂ.”

ᐃᓱᒪᓂᕐᓴᐅᓗᑎᒃ ᖁᑭᐅᑎᑦ ᐃᓂᖃᖅᑎᑕᐅᑦᑎᐊᕐᓂᖏᓐᓂᒃ

ᓄᓇᓕᐸᐅᔭᐃᑦ ᑲᑎᒪᔨᖏᑦ ᑲᑎᒪᑎᓪᓗᒋᑦ ᐱᓇᓱᐊᕈᓯᐅᓚᐅᕐᑐᒥ, ᐸᓖᓯᒃᑯᑦ ᐃᖅᑲᓇᐃᔭᖅᑎᓄᑦ ᐊᖓᔪᖅᑳᖅ ᒑᕕᐅᑦ ᐃᓕᐊᑦ ᓇᓗᓇᐃᓚᐅᕐᑐᖅ ᐱᕋᔭᖕᓂᖅ ᖁᕝᕙᖅᐹᓪᓕᕐᓯᒪᓂᖓᓂᒃ ᐃᖃᓗᖕᓂᑦ. ᑕᒪᓐᓇ ᑕᐃᒪᐃᓗᐊᖅᑐᖅ ᖁᑭᐅᑎᓄᑦ ᐱᕋᔭᒍᑎᑎᒍᑦ, ᐊᒻᒪᓗ ᒪᕐᕈᐃᖅᖢᓂ ᐅᓄᕐᓯᕚᓪᓕᕐᓯᒪᓪᓗᓂ          2017-ᖑᓚᐅᕐᑐᒥᒃ. ᐋᓐᓂᕐᓯᕆᓂᕐᒧᑦ, ᖁᓄᔪᕐᓂᐊᕐᓂᕐᒧᑦ ᐊᒻᒪ ᐃᑭᑎᑦᑎᓂᕐᒨᖓᔪᑦ ᐊᒻᒪ ᐅᓄᕐᓯᕚᓪᓕᕐᒥᔪᑦ, ᓴᕿᑎᑦᑎᓯᒪᓚᐅᕐᑐᖅ ᐅᓂᒃᑳᖏᓐᓂᒃ.

ᔪᐆᓐᔅ ᐅᖃᐅᓯᖃᕆᐊᓪᓚᓚᐅᕐᑐᖅ ᖁᑭᐅᑎᑦ ᖁᐊᕐᓵᕐᓇᙱᑦᑐᒦᑦᑕᕆᐊᖃᕐᓂᖏᓐᓂᒃ, ᒪᑯᐊ ᖁᑭᐅᑎᒐᓚᐃᑦ ᐊᑐᐃᓐᓇᐅᙱᓪᓗᑎᒃ ᐋᖓᔮᓕᕌᖓᒥᒃ, ᖁᕕᐊᓱᙱᓗᐊᓕᕌᖓᒥᒃ ᐅᕝᕙᓘᓐᓃᑦ  ᑕᒪᐃᓐᓂ.ᒃ

ᓄᓇᕗᒥᑦ ᖁᑭᐅᑎᖃᐅᕐᒪᑕ, ᐃᓛᓐᓂᑦ ᐊᖑᓇᓱᖃᑦᑕᕐᒪᑕ ᓂᕿᒃᓴᖏᓐᓂᒃ.

“ᑕᒪᐃᓐᓂᐸᓗᒃ ᐃᒡᓗᐃᑦ ᖁᑭᐅᑎᖃᕐᒪᑕ,” ᔪᐆᓐᔅ ᐅᖃᖅᑐᖅ.

ᑎᓯᐱᕆ ᐃᓱᐊᓂ ᖁᑭᐅᑦᑎᔭᖅᑐᖃᓚᐅᖅᑎᓪᓗᒍ ᐊᑕᐅᓯᕐᒥ ᐊᖑᑎᒥ ᐋᓐᓂᐊᕕᖕᒧᐊᕆᐊᖃᓕᖅᖢᓂ, ᐸᓖᓯᒃᑯᑦ ᑎᓕᐅᕆᒻᒪᕆᓕᓚᐅᕐᑐᑦ ᖁᑭᐅᑎᓂᒃ ᐊᑐᐃᓐᓇᐅᑎᑦᑎᖁᔨᔪᓐᓃᖅᖢᑎᒃ, ᑭᒃᑯᓕᒫᓂᒃ ᖁᑭᐅᑎᖏᓐᓂᒃ ᐸᓐᖓᐃᔭᐃᕙᒡᓗᑎᒃ.

ᓄᕕᐱᕆᒥᑦ, ᑐᖁᖓᔪᓕᕆᔨ ᖃᐅᔨᓇᓱᓕᓚᐅᕐᓯᒪᕗᖅ ᐆᒥᖓ ᐸᓖᓯᑦ ᖁᑭᐅᑦᑎᔭᖅᑐᒥ ᖁᑭᕐᓯᑎᓪᓗᒋ ᐊᖑᑎᒥ.

ᐱᓕᕆᓂᐅᔪᑦ ᐸᓖᓯᒃᑯᓐᓂᑦ ᑲᒪᒋᔭᐅᙱᓗᐊᕐᑐᑦ

ᐅᒃᑑᐱᕆᒥ, ᓄᓇᕗᒥᑦ ᒪᓕᒐᓕᕆᔨᒃᑯᑦ ᑲᑎᒪᔨᖏᑦ ᓇᓗᓇᐃᕐᓯᓚᐅᕐᐳᑦ ᐅᓂᒃᑳᖑᕙᓪᓕᐊᔪᓂᒃ ᐸᓖᓯᒃᑯᑦ ᐊᒃᓱᕈᓗᐊᖃᑦᑕᕐᓂᖏᓐᓄ ᑲᒪᒋᔭᖏᓐᓂᒃ. 

ᒫᓐᓇᓕ, ᐋᑐᕚᒥ ᐸᓖᓯᓄᑦ ᐱᔨᑦᑎᕋᖅᑎᐅᔪᑦ ᓄᓇᕗᑦ ᒐᕙᒪᒃᑯᓐᓄᑦ ᑳᓐᑐᕌᒃᑕᐅᓯᒪᖕᒪᑕ ᕿᒥᕐᕈᐊᖅᑎᑕᐅᓪᓗᑎᒃ ᐸᓖᓯᓄᑦ ᐊᒃᑐᐊᔪᓂᒃ ᐱᑦᑎᐊᙱᓗᐊᕈᑎᐅᓇᔭᖅᑐᓂᒃ, ᒪᑯᑎᑐᓇᖅ ᖁᑭᕆᐊᖃᑦᑕᕐᓂᒃᑯᑦ ᐅᕝᕙᓘᓐᓃᑦ ᑎᒍᔭᐅᓯᒪᔪᓂᒃ ᐃᓅᔪᓐᓃᖃᑦᑕᖅᑐᓂᒃ. ᕿᒥᕐᕈᐊᖅᑎᑕᐅᔪᑦ ᒫᓐᓇ ᑎᓯᐱᕆᒥᑦ ᖁᑭᕐᓴᕐᓂᐅᓚᐅᕐᑐᒥᒃ, ᐊᑕᐅᓯᕐᒧᑦ ᐸᓯᔭᒃᓴᙳᕈᑎᐅᓪᓗᓂ ᑐᖂᑦᑎᓇᓱᖕᓂᕐᒧᑦ, ᖁᑭᕆᐊᑲᑕᖕᓂᕐᒧᑦ ᐊᒻᒪᓗ ᑲᑉᐱᐊᓵᕆᓂᕐᒧᑦ ᓱᒋᐅᑦᑎᓕᔭᖅᖢᓂ.

ᑭᓯᐊᓂᓕ ᐃᓱᒪᓇᕐᒥᔪᖅ ᐅᑯᐊ ᐋᓐᑎᐅᕆᐅᒥ ᐸᓖᓯᓕᕆᔨᒃᑯᑦ, ᐳᑭᖅᑕᓕᐅᙱᒃᑲᓗᐊᖅᖢᑎᒃ, ᐊᔾᔨᒌᒃᑎᑦᑎᔪᓐᓇᕆᐊᒃᓴᖏᓐᓂᒃ ᖃᐅᔨᓴᕐᓂᖏᑦᑎᒍᑦ. ᓄᓇᕗᑦ ᒐᕙᒪᒃᑯᑦ ᐱᐊᓂᒃᓯᐊᓂᒃᑐᓪᓕ ᕿᒥᕐᕈᐊᕐᓂᕐᒥᑦ ᖃᓄᖅ ᐊᓯᖏᓐᓂᒃ ᐱᓕᕆᕝᕕᖃᖅᑐᑦ ᑲᒪᒋᔭᖃᖃᑦᑕᕐᓂᖏᓐᓂᒃ ᐸᓖᓯᒃᑯᑦ ᖃᓄᐃᓕᐅᓗᐊᕈᓯᖏᓐᓂᒃ.

“ᓂᕈᐊᕐᓯᒪᓂᕐᓴᐅᔪᖓᓕ ᐃᖅᑲᓇᐃᔭᖅᑎᐅᙱᑦᑐᓂᒃ ᕿᒥᕐᕈᐊᑎᖃᕐᓂᕐᒥᒃ… ᑭᒃᑯᑐᐃᓐᓇᐃᑦ ᐃᓱᒪᒍᑎᒃ ᐅᕙᑦᑎᓐᓂᒃ ᐅᒃᐱᕈᓱᒍᓐᓇᙱᓐᓂᕐᒥᒃ, ᑕᐃᒪᓕ ᐱᐅᓂᖅᐹᖑᕗᖅ ᐃᖅᑲᓇᐃᔭᙱᑦᑐᒧᑦ ᕿᒥᕐᕈᐊᖅᑕᐅᕙᖕᓂᕐᒥᒃ,” ᔪᐆᓐᔅ ᐅᖃᖅᑐᖅ.

ᑭᓯᐊᓂᓕ ᑕᐃᒪᓐᓇ ᐊᓯᔾᔨᕈᑎ ᐊᑭᖃᕋᔭᕐᒥᖕᒪᑦ ᑮᓇᐅᔭᑎᒍᑦ, ᐊᒻᒪᓗ ᐱᓕᕆᖃᑎᖃᑦᑎᐊᕆᐊᖃᕐᓇᖅᖢᓂ ᒐᕙᒪᒃᑯᓐᓂᒃ, ᐅᖃᖅᑐᖅ. ᔪᐆᓐᔅ ᑲᑎᖃᑎᖃᓚᐅᕐᑐᖅ ᓄᓇᕗᒥᑦ ᒪᓕᒐᓕᕆᔨᒃᑯᑦ ᒥᓂᔅᑕᖓᓂᒃ ᔩᓂ ᐃᕼᐊᓗᐊᒃᒥᑦ ᑕᒪᑐᒪᓂ ᐱᓇᓱᐊᕈᓯᕐᒥᒃ.

ᑕᐃᒪᐃᑦᑐᓐᓇᙱᑉᐸᑦ, ᐊᓯᑲᓐᓂᖓᓕ ᐊᐱᖅᑯᑎᐅᔪᓐᓇᖅᑐᖅ ᐃᒪᓐᓇ: “ᑭᒃᑯᑐᐃᓐᓇᕐᓂᒃ ᐅᒃᐱᕈᓱᓕᖅᑎᑦᑎᔪᓐᓇᖅᐱᑖ ᐱᓕᕆᕝᕕᒃᑕ ᓯᓚᑖᓂᙶᖅᑐᓂᒃ ᖃᐅᔨᓴᖅᑎᑦᑎᖃᑦᑕᖅᑕᑦᑎᓐᓂᒃ?”

“ᐊᑯᓂᐊᓗᒃ ᐱᕈᖅᑎᒐᓱᒐᔭᕐᒪᑦ ᐅᒃᐱᕇᖃᑦᑕᐅᑎᒐᓱᖕᓂᖅ”, ᐅᖃᖅᑐᖅ.

ᔪᐆᓐᔅ ᐅᖃᓪᓚᓚᐅᕐᑐᖅ ᐃᑲᔪᖅᑐᐃᓂᕐᒧᑦ ᐱᓕᕆᐊᖑᕙᒃᑐᓂᒃ ᐸᓖᓯᓄᑦ ᓄᓇᕗᑦ ᓄᓇᓕᖏᓐᓂᒃ, ᑖᒃᑯᓇᓂᓕ ᐊᒥᓱᑦ ᐃᑲᔪᖃᑦᑕᖅᑐᑦ ᐱᙳᐊᖅᑎᓂᒃ ᐊᔪᕈᓐᓃᕐᓇᖅᑎᑦᑎᓂᒃᑯᑦ ᐊᒻᒪᓘᓐᓃᑦ ᑐᒃᓯᐊᕐᕕᒃᒥᑦ ᓈᑦᑏᖑᔭᒃᑯᑦ ᐃᓕᓐᓂᐊᖅᑎᑦᑎᓂᒃᑯᑦ.

“ᐃᑲᔫᑎᐅᓗᐊᙱᑦᑐᓂᒃ ᑐᓴᒐᒃᓴᓕᐊᖑᕙᒃᑲᑦᑕ ᑐᓴᐅᑎᓕᕆᓂᒃᑯᑦ,” ᐅᖃᖅᑐᖅ. “ᐃᓚᒋᔭᕗᑦ ᐃᓚᖏᑦ ᑕᒻᒪᖃᑦᑕᕐᒥᖕᒪᑕ ᐊᒻᒪᓗ ᑕᒪᑐᒧᖓ ᐱᓕᕆᐊᖑᕙᒃᖢᑎᒃ. ᓇᓕᕐᐳᑐᐃᓐᓇᖅ ᑕᐃᒪᐃᖁᔨᓯᒪᙱᑦᑐᒍᑦ ᓈᒻᒪᙱᑦᑐᓂᒃ ᐃᓱᒪᓕᐅᕆᓂᕐᒥᒃ ᐊᒻᒪ ᓱᖁᑎᒋᔭᐅᙱᔾᔪᑎᐅᓗᓂ, ᓲᖃᐃᒻᒪ ᑕᐃᒪᐃᑦᑐᖃᕈᓂ ᐊᑲᐅᒍᓐᓃᕈᑎᐅᑐᐃᓐᓇᖃᑦᑕᖅᑐᖅ ᐊᓯᖏᓐᓄᑦ ᐱᓕᕆᐊᖏᑦᑎᒍᑦ.”

ᓯᕗᓪᓕᕐᐹᕐᓕ ᐱᓕᕆᒋᐊᕐᓂᐊᕐᑕᖓ ᓄᓇᕗᒥᑦ ᐸᓖᓯᐅᔪᑦ ᐱᓕᕆᕝᕕᖏᓐᓂᒃ, ᑕᒫᓂᓗ ᐃᓄᑭᑦᑐᒦᓐᓂᕐᒧᑦ, ᑖᒃᑯᐊ ᐃᓄᑑᖂᔨᓗᐊᓕᖃᑦᑕᖅᖢᑎᒃ, ᐅᖃᖅᑐᖅ.

ᐸᓖᓯᒃᑯᑦ ᐅᖄᓚᕝᕕᐅᒐᔪᓛᖑᕙᒃᑐᑦ ᓯᕗᓪᓕᐅᑎᓐᓇᔭᖅᑕᖏᑦ, ᐅᖃᖅᑐᖅ.

“ᐅᐸᖃᑦᑕᕐᓂᐊᕋᒃᑭᑦ ᓴᓇᖃᑎᒋᖃᑦᑕᖅᑕᕗᑦ, ᓄᓇᓕᖏᓐᓄᐊᕐᓗᖓ ᖃᐅᔨᒪᑎᓪᓗᒋᑦ ᐃᓄᑑᙱᓐᓂᖏᓐᓂᒃ, ᐊᒻᒪᓗ ᖁᐊᕐᓵᕐᓇᖅᑐᒥᐅᙱᑦᑐᖅ ᖃᓄᐃᓐᓇᙱᑦᑐᒥᒃ ᐱᓕᕆᕝᕕᖃᖅᑎᓪᓗᒋᑦ.

“ᐃᒥᖏᑦᑎᒍᑦ ᖃᐅᓄᐃᒍᑎᖃᖅᐸᑕ, ᐃᑲᔪᑦᑎᐊᕈᓐᓇᕋᔭᙱᒻᒪᑕ ᓄᓇᓕᖕᓂᑦ.”

ᑲᔪᓯᔪᒪᔪᖅ ᐱᓕᕆᖃᑎᖃᕐᓗᓂ ᐸᓖᓯᓂᒃ ᐃᖅᑲᓇᐃᔭᖅᑎᖃᓕᕈᓐᓇᕐᓗᑎᒃ ᑭᓇᑐᐃᓐᓇᒥᒃ ᐃᓄᖕᓂ ᐅᖃᕈᓐᓇᖅᑐᓂᒃ ᐃᓄᒃᑐᑦ. ᐱᓕᕆᓕᖅᑎᑦᑎᓂᒃᑯᓪᓕ, ᐅᖃᖅᑐᖅ ᖃᐅᔨᓴᖅᑎᒥᑦ ᐱᓕᕆᓕᖅᑎᑦᑎᓂᕋᖅᖢᓂᒋᑦ ᑲᒪᒋᔭᖃᕋᔭᖅᑐᒥᒃ ᐃᓄᖕᓂᑦ ᐃᖅᑲᓇᐃᔭᖅᑎᒃᓴᐅᓇᔭᖅᑐᓂᒃ, ᐋᕿᒃᓱᐃᓇᔭᖅᖢᓂ ᐃᑲᔫᑎᐅᔪᓐᓇᖅᑐᓂᒃ ᒪᑯᓄᖓ ᐋᓐᓂᐊᕕᓕᐊᕆᐊᖃᕐᓂᕐᑯᑦ, ᐊᖅᑯᑦᑐᓐᓇᐅᑎᓄᑦ ᐊᒻᒪ ᐃᓕᓐᓂᐊᕐᓂᕐᒧᑦ.

ᓄᓇᓕᖕᓂᒡᓕ, ᐃᖅᑲᓇᐃᔭᓕᖅᑎᑦᑎᒐᓱᖕᓂ ᐱᒋᐊᕐᕕᐅᓇᔭᖅᑐᖅ ᐃᓅᓱᒃᑐᓂᒃ ᐱᓕᕆᐊᖃᕈᒥᓇᖅᑐᓂᒃ, ᐊᒻᒪᓗ ᐃᑲᔪᖅᑎᑖᖅᑎᑕᐅᕙᒡᓗᑎᒃ ᑕᒪᑐᒧᖓ, ᐅᖃᖅᑐᖅ.