ᓄᓇᕗᒥᑦ ᓄᓇᓖᑦ ᐃᖃᓗᓕᕆᓂᖅᒥᑦ ᐃᓱᒪᒋᔭᖃᓯᕗᑦ ᑮᓇᐅᔭᓕᐅᕈᑎᒋᓂᐊᕐᓗᒍ

“ᕿᒥᕐᕈᐊᖅᓯᒪᒐᑦᑕ ᓂᐅᕐᕈᑎᖃᕐᕕᐅᔪᓐᓇᖅᑐᓂᒃ ᓄᓇᕐᔪᐊᓕᒫᒥᑦ,” ᐅᖃᖅᑐᖅ ᐊᐅᓚᑦᑎᔨ ᓴᓂᑭᓗᐊᖅᒥ ᐊᖑᓇᓱᒃᑐᓕᕆᔨᒃᑯᓐᓄᑦ

ᓴᓂᑭᓗᐊᖅᒥᐅᑕᖅ ᐊᖑᓇᓱᒃᑎ ᓘᑲᓯ ᐊᔭᕈᑕᐃᓐᓇᖅ ᒥᖅᑯᓕᒃᒥ ᐱᓚᒃᓯᕗᖅ ᓴᓂᑭᓗᐊᑉ ᕿᑭᖅᑕᖏᓐᓂᒃ 2019 ᐅᑭᐊᒃᓵᖓᓂᒃ, ᓄᓇᕗᒥᑦ ᓄᓇᓖ ᖃᐅᔨᓇᓱᒃᑕᖓᑦ ᑮᓇᐅᔭᓕᐅᕈᑎᐅᓕᕈᓐᓇᕆᐊᒃᓴᖓᓂᒃ. (ᐊᔾᔨᙳᐊᖅ ᐅᑯᓇᙵᑦ ᑕᒡ ᓯᓴᓐ/ᐆᒪᔪᓕᕆᔨᕐᔪᐊᒃᑯᑦ ᑲᓇᑕᒥ WWF)

By ᓴᐃᕋ ᕌᔾᔪᔅ

For an English version of this story, see Nunavut communities look to local fisheries for economic growth

ᒥᑭᑦᑐᕈᓗᐃᑦ ᐅᕕᓗᖃᖅᖢᑎᒃ ᐊᒻᒪ ᒪᒪᖅᖢᑎᒃ ᐃᒫᓃᑉᐳᑦ ᒪᑯᓇᓂ ᓴᓂᑭᓗᐊᑉ ᕿᑭᖅᑕᖏᓐᓂᒃ (Belcher Islands).

ᐊᕐᕌᒍᒐᓴᐅᓕᖅᑐᓂᒃ, ᐃᓄᐃᑦ ᓴᓂᑭᓗᐊᖅᒥ ᑕᕆᐅᖅᒥᐅᑕᓂᒃ ᐊᕝᕗᖃᑦᑕᖅᓯᒪᔪᑦ ᒪᑯᓂᖓ Icelandic scallops, ᐊᑎᖃᖅᑎᑕᐅᔪᖅ ᕿᑭᖅᑕᒥᑦ ᓄᓇᓕᒡᔪᐊᓕᖕᓂ ᓴᓂᒧᑦ ᑐᑭᖓᓃᐸᓗᒃᑐᓂᒃ.

ᐅᓪᓗᒥᓕ ᑕᒪᒃᑯᓂᖓ ᐊᖑᓇᓱᒃᑐᑦ ᐊᑐᖃᑦᑕᖅᑐᑦ ᒥᑭᑦᑐᓂᒃ ᐅᒥᐊᓂᒃ, ᐊᒃᖢᓈᓂᒃ, ᖃᑦᑕᕐᓂᒃ ᐊᒻᒪᓗ ᐊᒡᖢᓈᒥ ᐅᓂᐊᖅᓯᔾᔪᑎᒥᒃ ᑕᒪᒃᑯᓂᖓ ᐅᕕᓗᖃᖅᑐᓂᒃ ᐱᓇᓱᒍᑎᓂ 100 ᕖᑦ ᐃᑎᓂᓕᖕᒥᒃ.

ᑖᒃᑯᐊᓕ ᓄᓇᕗᒥᑦ ᓄᓇᓖᑦ ᑕᒪᒃᑯᓂᖓ ᓯᑳᓚᑉᔅᓂᒃ ᐊᑐᐃᓐᓇᐅᓂᖅᓴᐅᑎᑦᑎᔪᒪᔪᑦ ᐊᒻᒪᓗ ᑮᓇᐅᔭᓕᐅᕈᑎᐅᔪᓐᓇᕐᓗᓂ.

1980ᖏᓐᓂᒃ, ᓴᓂᑭᓗᐊᖅᒥ ᐊᖑᓇᓱᒃᑏᑦ ᐱᒋᐊᕈᒪᓕᓚᐅᖅᓯᒪᔪᑦ ᐅᕕᓗᓕᖕᓂᒃ ᐃᖃᓗᓕᕆᔪᒪᓪᓗᑎᒃ, ᑭᓯᐊᓂᓕ ᑖᓐᓇ ᐱᒋᐊᖅᑕᐅᓚᐅᖅᓯᒪᙲᓐᓇᖅᑐᖅ.

ᒫᓐᓇᓕ ᑖᒃᑯᐊ ᓄᓇᓖᑦ ᑕᒪᑐᒥᖓ ᐱᓇᓱᒃᑲᓐᓂᕈᒪᓕᖅᑐᑦ ᐃᑲᔪᖅᑕᐅᓯᒪᓪᓗᑎᒃ ᓄᓇᕐᔪᐊᖅᒥᓐ ᐆᒪᔪᓕᕆᔨᖅᔪᐊᒃᑯᑦ ᑲᓇᑕᒥ ᐃᑲᔫᓯᐊᖅᑖᖅᕕᖓᓂ (WWF Canada) ᐊᒻᒪᓗ ᐆᒪ ᐃᓚᖓᓂᒃ $3.2 ᒥᓕᐊᓐ ᐃᑲᔫᓯᐊᖅᑖᖓᓂᒃ ᒐᕙᒪᑐᖃᒃᑯᓐᓂᒃ.

“ᐱᓕᕆᖃᑎᖃᖅᓯᒪᒐᑦᑕ ᓄᓇᕐᔪᐊᖅᒥᓐ ᐆᒪᒧᓕᕆᔨᖅᔪᐊᒃᑯᓐᓂᒃ ᐊᕐᕌᒎᓕᖅᑐᓂᒃ 5-6-ᖑᓕᖅᑐᓂᒃ ᖃᓄᖅ ᐃᖃᓗᓕᕆᓂᖅ ᐱᓕᕆᐊᖑᔪᓐᓇᕆᐊᒃᓴᖓᓂᒃ ᐃᓄᐃᑦ ᐊᑐᖅᐸᓚᐅᖅᑕᖓᒍᑦ ᐱᑕᖃᐃᓐᓇᕈᓐᓇᕐᓗᓂ,” ᐅᖃᖅᑐᖅ ᓘᑲᓯ ᐊᔭᒍᑕᐃᓐᓇᖅ, ᐊᐅᓚᑦᑎᔨ ᓴᓂᑭᓗᐊᖅᒥ ᐊᖑᓇᓱᒃᑐᓕᕆᔨᒃᑯᓐᓄᑦ.

ᓄᓇᓕᖕᓂ ᐊᖑᓇᓱᒃᑏᑦ ᕿᒥᕐᕈᐊᕈᒪᓚᐅᖅᓯᒪᖕᒪᑕ ᓇᓕᐊᑦ ᐆᒪᔪᐃᑦ ᐱᑕᖃᑦᑎᐊᕐᒪᖔᑦ ᐊᒻᒪᓗ ᐱᔭᐅᔪᒪᓯᒪᖕᒪᖔᑕ ᓄᓇᕗᑦ ᓯᓚᑖᓂ.

“ᓯᕗᓪᓕᕐᒥᓐ ᐃᓱᒪᒋᔭᖃᓚᐅᖅᓯᒪᔪᒍᑦ ᐃᖃᓗᖕᓂᒃ ᐊᒻᒪ ᒥᑎᕐᓂᒃ, ᑭᓯᐊᓂᓕ ᒪᑯᐊ ᓯᑳᓚᑉᔅ ᓄᑖᖑᔪᖅ,” ᐅᖃᖅᑐᖅ.

“ᕿᒥᕐᕈᐊᖅᓯᒪᒐᑦᑕ ᓂᐅᕐᕈᑎᖃᕐᕕᐅᔪᓐᓇᖅᑐᓂᒃ ᓄᓇᕐᔪᖅᐊᒥᒃ.”

ᐃᓚᒋᔭᐅᓪᓗᓂ ᓴᓂᑭᓗᐊᖅᒥ ᒥᑭᓈᖅᓯᒪᔪᒃᑯᑦ ᖃᐅᔨᓇᓱᖕᓂᖅ ᐃᖃᓗᓕᕆᓂᖅᒥᒃ, ᓄᓇᓕᖕᓂᑦ ᐊᖑᓇᓱᒃᐸᒃᑐᑦ ᖃᐅᔨᓴᕐᒥᔪᑦ ᒪᑯᐊ ᐃᒪᖏᓐᓃᑦᑐᑦ ᖁᖅᓱᔫᑦ (sea cucumber) ᐊᒻᒪ ᒥᖅᑯᓕᒃ (sea urchin) ᑮᓇᐅᔭᓕᐅᕈᑎᐅᔪᓐᓇᕆᐊᒃᓴᖏᓐᓂᒃ ᖃᓪᓗᓈᓂᑦ ᓄᓇᕐᔪᐊᖅᒥᓪᓘᓐᓃᑦ ᓂᐅᕕᕈᒪᕙᒃᑐᓂᒃ.

ᑕᒪᑐᒥᖓ ᐱᔪᒥᒐᓴᖃᕐᓂᖅᒧᑦ ᐊᒻᒪ ᐃᑲᔪᖅᑐᖅᑕᐅᓂᖅᒧᑦ ᐱᓕᕆᖃᑎᒋᔭᐅᔪᓂᒃ ᐅᑯᑎᑐᓇᖅ ᓄᓇᕐᔪᐊᖅᒥᑦ ᐆᒪᔪᓕᕆᔨᕐᔪᐊᒃᑯᓐᓂᒃ ᑲᓇᑕᒥᑦ ᐊᒻᒪᓗ ᑎᐅᕆᑑᕆᑎᒍᑦ ᐊᒻᒪ ᒐᕙᒪᑐᖃᑎᒍᑦ, ᐊᔭᒍᑕᐃᓐᓇᖅ ᐅᖃᓚᐅᖅᑐᖅ ᓄᓇᓖᑦ ᐱᔪᓐᓇᖅᓯᓛᖅᓂᖏᓐᓂᒃ ᐃᖃᓗᓕᕆᕝᕕᒃᓴᓂᒃ, ᐊᒻᒪ ᑕᒪᑐᒧᖓ ᐅᒥᐊᕐᒥᒃ, ᐱᓕᕆᕝᕕᒃᓴᒥᒃ ᑖᒃᑯᓂᖓ ᐊᒻᒪᓗ ᓄᑖᒥ ᓄᓇᓕᖕᓂ ᖁᐊᒃᑯᕕᒃᓴᐅᓂᐊᖅᑐᒥᑦ ᑕᒪᒃᑯᓄᖓ.

ᒪᕐᕈᒃᑲᓐᓃᒃ ᓄᓇᕗᒥᑦ ᓄᓇᓕᐅᔫᒃ ᓄᓇᖓᓂᒃ ᐃᖃᓗᓕᕆᓂᕐᒥᒃ ᕿᒥᕐᕈᐊᕐᒥᔫᒃ: ᑭᙵᐃᑦ ᒪᓐᓇ ᖃᐅᔨᓴᖅᖢᑎᒃ ᑮᓇᐅᔭᓕᐅᕋᓱᒍᓐᓇᕐᓂᖅᒥᒃ ᒪᑯᓂᖓ ᑭᖑᒃᐸᖕᓂᒃ ᐊᒻᒪᓗ ᑯᕌᑉᔅᓂᒃ ᑖᔅᓱᒪ ᓄᓇᓕᐅᑉ ᖃᓂᒋᔭᖓᓃᑦᑐᓂᒃ, ᐊᒻᒪ ᐊᕐᕕᐊᓂᒃ ᖃᐅᔨᓇᓱᖕᒥᔪᑦ ᒪᑯᓂᖓ ᑕᓯᖅᒥᐅᑕᓂᒃ ᖃᓕᕋᓕᖕᓂᒃ.

“ᕿᓂᕋᓱᒃᑲᑦᑕ ᑮᓇᐅᔭᓕᐅᕈᑎᐅᔪᓐᓇᖅᑐᓂᒃ ᓂᕿᒋᔭᐅᕙᒃᑐᓂᒃ,” ᐅᖃᖅᑐᖅ ᑕᒡ ᓯᓴᓐ, ᐱᓕᕆᓕᒪᓂᖅᓴᖅ ᑕᕆᐅᖅᒥᐅᑕᐃᑦ ᐃᓂᒋᕙᒃᑕᖏᓐᓂᒃ ᖃᐅᔨᓴᖅᓂᖅᒥᒃ ᐅᑯᓄᖓ ᓄᓇᖅᔪᐊᕐᒥ ᐆᒪᔪᓕᕆᔨᖅᔪᐊᓄᑦ ᑲᓇᑕᒥ, ᒫᓐᓇᓗ ᐱᓕᕆᖃᑎᖃᖅᖢᓂ ᓄᓇᕗᒥᑦ ᐃᖃᓗᓕᕆᓂᖅᒥᒃ ᐱᓕᕆᐊᖃᕈᒪᔪᓂᒃ.

“ᖃᐅᔨᕚᓪᓕᕈᓐᓇᒻᒪᕆᒃᑲᑦᑕ ᖃᐅᔨᒪᔭᐅᔪᓂᒃ ᐊᖑᓇᓱᒃᑎᓂᒃ ᒪᑯᓂᖓ ᑕᕆᐅᖅᒥᐅᑕᓂᒃ,” ᐅᖃᖅᑐᖅ.

“ᓯᕗᓪᓕᖅᐹᒻᒪᕆᒡᓕ, ᑕᒪᒃᑯᐊ ᖃᐅᔨᓇᓱᒃᑲᑦᑕ ᐅᓄᕐᓂᖏᑦ ᓈᒻᒪᒋᐊᒃᓴᖏᓐᓂᒃ ᑮᓇᐅᔭᓕᐅᕈᑎᐅᓇᓱᒡᓗᑎᒃ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ. ᑭᓯᐊᓂᓕᑦᑕᐅᖅ ᖃᐅᔨᒪᔪᒪᖕᒥᒐᑦᑕ ᒪᑐᒥᖓ ᑮᓇᐅᔭᓕᐅᕈᑎᐅᔪᓐᓇᕐᓂᖓᓂᒃ.”

ᐅᑯᐊᓕ ᑲᑎᓪᓗᑎᒃ ᓴᓂᑭᓗᐊᖅ, ᐊᕐᕕᐊᑦ ᐊᒻᒪᓗ ᑭᙵᐃᑦ, ᐃᓱᒪᒋᔭᐅᔪᖅ 35-ᓂᒃ ᐃᖅᑲᓇᐃᔮᒃᓴᖅᑕᖃᕋᔭᕐᓂᖓᓂᒃ ᑖᒃᑯᐊ ᐃᖃᓗᓕᕆᕝᕕᒃᓴᐃᑦ ᐊᐅᓚᑕᐅᓕᖅᐸᑕ.

ᓯᓴᓐ ᐃᓱᒪᔪᖅ ᕿᒥᕐᕈᐊᕈᒪᓪᓗᓂ ᐊᐅᓚᑦᑎᓂᖅᒧᑦ ᐱᓕᕆᐊᖑᔭᕆᐊᖃᕋᔭᖅᑐᓂᒃ, ᓲᕐᓗ ᒪᑯᓂᖓ ᓄᓇᓖᑦ ᐱᔪᓐᓇᐅᑎᑖᕈᑎᒃᓴᖏᑦ ᐊᖏᖅᑕᐅᑎᑕᐅᓂᖏᓐᓂᒃ ᐅᑯᑎᒎᓇᖅ ᑲᓇᑕᒥ ᓂᕿᓂᒃ ᖃᐅᔨᓴᖅᑎᓄᑦ ᓂᐅᕐᕈᑎᖃᕈᓐᓇᕐᓂᐊᖅᒪᑕ ᓄᓇᕗᑦ ᓯᓚᑖᓃᑦᑐᓄᑦ.

ᓄᓇᕐᔪᐊᖅᒥ ᐆᒪᔪᓕᕆᔨᕐᔪᐊᒃᑯᑦ ᑲᓇᑕᒥ ᑐᑭᒧᐊᖅᑎᑦᑎᖕᒥᒻᒪᑕ ᐃᓚᖏᓐᓂᒃ ᐃᖃᓗᖕᓂᒃ ᖃᐅᔨᓴᕈᑎᐅᔪᓂᒃ ᐊᒻᒪᓗ ᐆᒪᔪᕐᓂᒃ ᖃᐅᔨᓴᖅᑎᓂᒃ ᐅᕙᓂ ᒪᒨᕆᐅᓪ ᔫᓂᕘᓯᑎᒥᒃ ᐊᒻᒪᓗ ᐅᕙᓂ Université du Québec à Rimouski.

ᓄᕙᒡᔪᐊᕐᓇᖅ-19 ᐱᔾᔪᑎᒋᔭᐅᓪᓗᓂ ᖃᐅᔨᓴᕐᓂᐅᔪᑦ ᑭᖑᕙᕆᐊᖅᓯᒪᓕᖅᑐᑦ ᑭᓯᐊᓂᓕ ᓄᓇᓕᐅᔪ ᐃᓱᒪᔪᑦ ᐃᑲᔫᑎᑖᖏᓐᓂᒃ ᐊᑐᕈᒪᓪᓗᑎᒃ ᐊᐅᔭᐅᓂᐊᖅᑐᑦ.

ᓴᓂᑭᓗᐊᕐᒥᓪᓕ, ᑭᖑᓪᓕᖅ ᐱᓕᕆᐊᖑᓂᐊᖅᑐᖅ ᐊᔾᔨᓕᐅᕆᑲᑕᒡᓗᑎᒃ ᐃᒫᒍᑦ ᖃᐅᔨᓇᓱᒡᓗᑎᒃ ᐅᓄᕐᓂᖏᓐᓂᒃ ᐱᔭᐅᓇᓱᒍᒪᔪᐃᑦ ᓄᓇᓕᖕᓂᒃ.

“ᒥᑎᑦᑐᒥ ᐱᒋᐊᕈᑎᖃᕐᓂᐊᖅᑐᖑ ᐊᒻᒪᓗ ᑕᕝᕙᙵᑦ ᐱᕈᖅᐸᓪᓕᐊᓗᑕ,” ᐅᔭᒍᑕᐃᓐᓇᖅ ᐅᖃᖅᑐᖅ. “ᑕᒪᓐᓇ ᖃᐅᒃᐸᑦ ᐱᐊᓂᔾᔮᙱᑦᑐᖅ.”

Share This Story

(0) Comments

Join the Conversation

Your email address will not be published. Required fields are marked *

*