ᓄᓇᕗᒥᑦ ᓯᓚᑦᑐᖅᓴᕐᕕᒃ ᓄᖅᑲᖅᑎᑦᑎᕗᖅ ᓯᕗᓪᓕᖅᐹᖅ ᐊᕐᕌᒍ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᒥ ᐅᑭᐊᒃᓵᒧᑦ

ᓯᓚᑦᑐᖅᓴᕐᕕᐅᔪᑦ ᐊᒻᒪ ᓄᓇᓕᖕᓂ ᐃᓕᓐᓂᐊᒃᑲᓐᓂᕐᕕᐅᕙᒃᑐᑦ ᐃᓕᓐᓂᐊᕐᕕᐅᑉ ᐃᓗᐊᓂ ᐃᓕᓐᓂᐊᖅᑎᑦᑎᖃᑦᑕᕐᓂᐊᕐᑐᑦ ᓄᕙᒡᔪᐊᕐᓇᖅ 19 ᐱᑕᖃᙱᒃᑯᓂ ᓄᓇᕗᒥ

ᓄᓇᕗᒥᑦ ᓯᓚᑦᑐᖅᓴᕐᕕᒃ ᓄᑖᓂᒃ ᐃᓕᓴᐃᔨᒃᓴᓄᑦ ᐃᓕᓐᓂᐊᒐᒃᓴᓂ ᐃᓕᓐᓂᐊᖅᑎᑦᑎᔾᔮᙱᑦᑐᑦ ᐅᑭᐊᒃᓵᖅ ᐱᔾᔪᑎᖃᖅᖢᑎᒃ ᐅᐱᕐᒦᖅ ᓈᒻᒪᙱᓕᐅᕈᑎᐅᑲᑕᓚᐅᕐᑐᓄᑦ ᒪᑐᑎᓪᓗᒍ, ᐅᖃᖅᑐᖅ ᓄᓇᕗᒥᑦ ᓯᓚᑦᑐᕐᓴᖅᕕᖕᒧᑦ ᐊᖓᔪᖅᑳᕆᔭᐅᑲᐃᓐᓇᖅᑐᖅ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐ)

By ᐃᐊᒪ ᑐᕌᓐᑐ

For an English version of this story, see Nunavut Arctic College cancels first year of teaching program this fall

ᓄᓇᕗᑦ ᓯᓚᑦᑐᖅᓴᕐᕕᒃ ᒪᑐᐃᒃᑲᓐᓂᕐᐸᓐ ᐅᑭᐊᒃᓵᖅ, ᑐᙵᓱᒃᑎᑦᑎᔾᔮᙱᑦᑐᑦ ᓄᑖᓂᒃ ᐃᓕᓐᓂᐊᖅᑎᒃᓴᓂᒃ ᐅᕗᖓ ᓄᓇᕗᒥᑦ ᐃᓕᓴᐃᔭᒃᓴᐅᓂᕐᒧᑦ ᐃᓕᓐᓂᐊᒐᒃᓴᓂᒃ.

ᓯᓚᑦᑐᖅᓴᕐᕕᒃ ᑐᓴᖅᑎᑦᑎᓚᐅᕐᑐᖅ ᒪᑐᐃᒃᑲᓐᓂᕐᓂᐊᕐᓂᒧᑦ ᐸᕐᓇᐅᑎᖏᓐᓂᒃ ᐋᒐᓯ 11ᒡᒥ ᒪᑐᓚᐅᕐᓯᒪᑎᓪᓗᒍ ᐅᐱᕐᙶᖅ ᓄᕙᒡᔪᐊᕐᓇᖅ-19 ᐃᓱᒫᓘᑎᐅᓂᕐᒧᑦ.

ᐸᕐᓇᐅᑎ ᓇᓗᓇᐃᕐᓯᒪᔪᖅ ᑎᓴᒪᐅᓕᖓᔪᓂᒃ ᒪᑐᐃᒃᑲᓐᓂᕐᓂᕐᒧᑦ ᐊᑐᖅᑕᐅᓂᐊᕐᑐᓂᒃ ᓄᕙᒡᔪᐊᕐᓇᖅ-19 ᐱᑕᖃᕐᕈᓂ ᓄᓇᕗᒥᑦ.

ᕇᐱᑲ ᒥᐅᓐᔅ, ᐊᖓᔪᖅᑳᕆᔭᐅᑲᐃᓐᓇᖅᑐᖅ ᓄᓇᕗᒥᑦ ᓯᓚᑦᑐᖅᓴᕐᕕᒃᒧᑦ, ᐅᖃᓚᐅᕐᑐᖅ ᓯᓚᑦᑐᖅᓴᕐᕕᒃ ᓄᖅᑲᖅᑎᑦᑎᔪᒪᓕᓚᐅᕐᓂᖏᓐᓂᒃ ᓯᕗᓪᓕᖅᐹ ᐊᕐᕌᒍᒧᑦ ᐃᓕᓐᓂᐊᒐᒃᓴᖅ ᐃᓕᓴᐃᔨᒃᓴᐅᓂᕐᒧᑦ ᓲᖃᐃᒻᒪ ᖃᓄᐃᓕᐅᕈᓘᔭᕐᓇᓚᐅᕐᓂᖓᓄᑦ ᐅᐱᕐᙶᖅ ᒪᑐᓚᐅᕐᑎᓪᓗᒍ.

“ᐸᕐᓇᐅᓯᐅᕐᓂᖅ ᓄᑖᓂ ᐱᓕᕆᖃᑎᒋᔭᐅᓂᐊᕐᑐᓂᒃ, ᐃᖅᑲᓇᐃᔮᖅᑖᖅᑎᑦᑎᑲᑕᖕᓂᖅ, ᓇᓗᓇᐃᔭᐃᓂᖅ ᓄᓇᓕᖕᓂᒃ, ᐊᒻᒪ ᐊᓯᖏᑦ ᑕᒪᐅᓈᖅᑐᑦ ᐱᓕᕆᐊᖑᓂᐊᖅᑐᓂᒃ ᐅᑭᐅᖅ ᐊᒻᒪ ᐅᐲᕐᙶᖑᓂᐊᖅᑐᒥᓐ. ᓄᖅᑲᕈᑎᐅᓂᑯᑦ ᐊᒻᒪᓗ ᖃᕋᓴᐅᔭᒃᑯᑦ ᐃᓕᓐᓂᐊᖅᑎᑦᑎᑲᑕᓕᕐᓂ ᐅᐱᕐᙶᖑᓚᐅᕐᑐᖅ ᐃᓱᒪᒍᑎᐅᓕᓚᐅᕐᒪᓐ ᑖᒃᑯᐊ ᐃᖅᑲᓇᐃᔭᖅᑎᑦᑎᔨᐅᔪᑦ ᐱᓕᕆᐊᖃᒻᒪᕆᒡᓗᑎᒃ ᐱᓯᒪᒍᓐᓇᕐᓂᐊᖅᑕᑦᑎᓐᓂᒃ ᐊᕐᕌᒍᓂ ᒪᕐᕉᖕᓂ ᑎᓴᒪᓄᑦ ᐱᓕᕆᐊᒃᓴᓂᒃ ᑲᔪᓯᔪᓐᓇᖁᓪᓗᒋᑦ ᐃᓕᓐᓂᐊᒐᒃᓴᖏᓐᓂᒃ,” ᒥᐅᓐᔅ ᐅᖃᖅᑐᖅ.

ᐊᕐᕌᓂ, ᐃᓕᓴᐃᔨᒃᓴᐅᓂᕐᒧᑦ ᐊᕐᕌᒍ ᑎᓴᒪᒋᔭᐅᔪᖅ ᑭᖑᓪᓕᖅᐹᖑᓪᓗᓂᓗ ᐃᓕᓐᓂᐊᒐᒃᓴᖅ ᐱᓕᕆᐊᖑᓚᐅᕐᑐᖅ ᐃᖃᓗᖕᓂᑦ ᐊᒻᒪ ᑰᒑᕈᒻᒥ. ᐃᓕᓐᓂᐊᓚᐅᕐᑐᑦ ᑎᓴᒪᒋᓕᖅᑕᖓᓂᒃ ᐃᓕᓐᓂᐊᒐᒃᓴᒥ ᐱᐊᓂᒃᓯᒋᐊᖃᖃᑦᑕᕐᒪᑕ ᐃᖅᑲᓇᐃᔭᕐᕕᖕᒥ ᐱᓕᕆᐊᖃᕐᓗᑎᒃ ᐊᓂᒍᐃᓚᐅᙱᓐᓂᖏᓐᓂᒃ. ᑭᓯᐊᓂᓕ ᒪᑐᔭᐅᒋᐊᖃᕐᓂᕐᒧᑦ, ᑖᒃᑯᐊ ᐃᓕᓐᓂᐊᖅᑏᑦ ᐱᐊᓂᒃᓯᔪᓐᓇᓚᐅᙱᑦᑐᑦ ᐃᓕᓐᓂᐊᒐᒃᓴᒥᒃ, ᒥᐅᓐᔅ ᐅᖃᖅᑐᖅ.

“ᐃᑲᔪᖅᑐᐃᓯᒪᔪᒍᑦ ᓱᓕ ᑎᓴᒪᒋᔭᖓᓂ ᐊᕐᕌᒍᒥ ᐃᓕᓐᓂᐊᕐᑐᓂᒃ 2019/20-ᒥ ᐃᓕᓐᓂᐊᕐᓯᒪᔪᓂ ᑰᒑᕈᒻᒥ ᐊᒻᒪ ᐃᖃᓗᖕᓂᑦ ᐱᐊᓂᒃᓯᑎᒐᓱᒃᖢᑎᒍᑦ ᐃᓚᖏᓐᓂᒃ ᐃᓕᓐᓂᐊᒐᒃᓴᖏᓐᓂᒃ ᓄᖅᑲᓚᐅᕐᑕᖏᓐᓂᒃ ᐅᐱᕐᙶᖅ ᓄᖅᑲᖅᑎᓪᓗᒋᑦ. ᑕᐃᒪᓕ, ᑖᒃᑯᐊ ᐱᓕᕆᖃᑎᒋᔭᕗᑦ ᑖᒃᑯᓂᖓ ᐱᓕᕆᖃᑎᖃᕐᓂᖏᓐᓂᒃ ᓄᑖᓂ ᐱᓕᕆᖃᑎᒃᓴᑦᑎᓐᓂ ᐱᔪᓐᓇᙱᓯᒪᕗᒍᑦ.”

ᓯᓚᑦᑐᖅᓴᕐᕕᒃ ᐱᓕᕆᖃᑎᖃᖅᑐᖅ ᐃᓕᓐᓂᐊᕐᓂᓕᕆᔨᒃᑯᓐᓂᒃ ᐃᓂᖃᖅᑎᑦᑎᓇᓱᖕᓂᕐᒥ ᐃᖅᑲᓇᐃᔭᕐᕕᖕᒥ ᐱᓕᕆᕝᕕᒋᓂᐊᖅᑕᖏᓐᓂᒃ ᐅᑯᐊ ᐊᕐᕌᒍ ᑎᓴᒪᖓᓂ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᖅᑎᐅᔪᓄᑦ, ᑖᓐᓇ ᒪᑐᐃᒃᑲᓐᓂᕐᓂᕐᒧᑦ ᐸᕐᓇᐅᑎ ᐅᖃᕐᓯᒪᔪᖅ.

ᐃᓕᓐᓂᐊᖅᑐᑦ ᐱᒋᐊᓕᓵᕐᓗᑎᒃ ᐊᕐᕌᒍ 2 ᐊᒻᒪ 3-ᒥᑦ ᐊᑐᖅᑐᒃᓴᓂᒃ ᒪᓕᑐᐃᓐᓇᕐᓂᐊᖅᑐᑦ, ᐊᒻᒪᓗ ᐃᓕᓐᓂᐊᖅᑎᐅᔪᑦ ᐊᓂᒍᐃᓂᒃᑯᑦ ᐊᕐᕌᒍ 3-ᒥ ᐊᕐᕌᓂ, ᐱᒋᐊᕐᓂᐊᖅᑐᑦ ᐊᕐᕌᒍ 4-ᒥ ᐅᑭᐊᒃᓵᖅ.

ᒥᐅᓐᔅ ᐅᖃᓚᐅᕐᑐᖅ 12 ᐃᓄᐃᑦ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᒐᒃᓴᒧᑦ ᐱᓇᓱᖕᓂᖏᓐᓂᒃ ᑕᒪᑐᒧᖓ ᐊᕐᕌᒍᒧᑦ. ᑕᒪᕐᒥᒃ ᖃᐅᔨᑎᑕᐅᓚᐅᕐᑐᑦ ᓄᖅᑲᖅᑎᑕᐅᓂᖓᓂᒃ ᐊᒻᒪᓗ ᑐᓴᒐᒃᓴᓂᒃ ᑐᓂᔭᐅᓪᓗᑎᒃ ᖃᓄᖅ ᐊᖏᖅᑕᐅᔾᔪᑎᖏᑦ ᐋᖅᑭᒃᓱᕈᓐᓇᕐᒪᖔᒋᑦ.

“ᐱᔪᒪᔾᔪᑎᒃᓴᓂᒃ ᓱᓕ ᕿᒥᕐᕈᐊᕆᐊᖃᖅᑐᑦ, ᑭᓯᐊᓂᓕ ᐱᓇᓱᖕᓂᐊᕈᒪᒍᑎᒃ ᐊᕐᕌᒍᒧᓐ, ᑕᐃᒪᓕ ᐃᑲᔪᑐᐃᓐᓇᕋᔭᖅᑕᕗᑦ,” ᒥᐅᓐᔅ ᐅᖃᖅᑐᖅ.

ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᒐᒃᓴᖅ ᓄᑖᓂᒃ ᐃᓕᓐᓂᐊᖅᑎᓂᒃ ᐱᑲᑕᓕᕐᓂᐊᖅᑐᑦ 2021-ᒥᑦ.

ᐃᓕᓴᐅᔨᒃᓴᐅᓂᕐᒧᑦ ᐃᓕᓐᓂᐊᒐᒃᓴᓕᕆᓂᖅ ᐱᓕᕆᖃᑎᖃᕐᓂᒃᑰᖓᔪᖅ ᐅᑯᓂᖓ ᒪᒨᕆᐅᓪ ᓯᓚᑦᑐᖅᓴᕐᕕᒡᔪᐊᒥᑦ 2019-ᒥᑦ ᐱᒋᐊᖅᖢᑎᒃ. ᓯᕗᓂᐊᓂᓪᓕ ᐱᓕᕆᖃᑎᖃᕐᓂᒃᑰᖓᓚᐅᕐᑐᖅ ᓯᓚᑦᑐᖅᓴᕐᕕᒡᔪᐊᒥᑦ ᕆᔭᐃᓇᒥᓐᔭ

ᐃᓕᓴᐃᔨᓄᑦ ᑲᑐᔾᔨᖃᑎᒌᑦ ᑲᒪᒋᔭᖃᕐᓂᕋᖅᑐᑦ ᐃᓱᒪᓕᐊᕆᔭᐅᔪᒥᒃ

ᔮᓐ ᕚᓐᔪᐊᐃ, ᐊᖓᔪᖅᑳᖅ ᓄᓇᕗᒥᑦ ᐃᓕᓴᐃᔩᑦ ᑲᑐᔾᔨᖃᑎᒌᖏᓐᓄᑦ ᐅᖃᓚᐅᕐᑐᖅ ᑕᒪᑐᒥᖓ ᑐᓴᕆᐅᓚᐅᕐᓂᕋᖅᖢᓂ ᓯᓚᑦᑐᖅᓴᕐᕕᐅᑉ ᐃᓱᒪᓕᐊᖓᓂᒃ ᑐᓴᖅᑎᑕᐅᒐᒥ ᑐᓴᒐᒃᓴᓕᐅᕐᑎᓂᒃ ᑐᓴᕐᕕᐅᔪᒪᑎᓪᓗᒍ.

“ᖃᐅᔨᒪᓚᐅᙱᑦᑎᐊᖅᑐᖓ ᑕᐃᒪᐃᓕᐅᕐᓂᖏᓐᓂᒃ. ᓄᓇᕗᑦ ᓯᓚᑦᑐᖅᓴᕐᕕᒃ ᐅᖃᖃᑎᖃᕐᓯᒪᙱᒻᒪᑕ ᓄᓇᕗᒥᑦ ᐃᓕᓴᐃᔩᑦ ᑲᑐᔾᔨᖃᑎᒌᖏᓐᓂᒃ. ᐅᖃᓪᓚᖃᑎᒌᖕᓂᖅᑕᖃᓚᐅᙱᑦᑐᖅ ᐊᒻᒪᓘᓐᓃᑦ ᐅᖃᖃᑎᖃᕐᓂᖅᑕᖃᓚᐅᙱᑦᑐᖅ ᑕᒪᓐᓇ ᑲᔪᓯᑎᑕᐅᓂᐊᓵᖅᑎᓪᓗᒍ,” ᕚᓐᔪᐊᐃ ᐅᖃᖅᑐᖅ.

ᕚᓐᔪᐊᐃ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᓄᖅᑲᖅᑎᑦᑎᓂᐅᔪᖅ ᐱᔾᔪᑎᐅᓇᓱᒋᓪᓗᓂᐅᒃ ᓄᓇᕗᑦ ᒐᕙᒪᒃᑯᑦ ᑎᑭᐅᑎᓇᓱᒃᑕᖓᓂ ᑭᖑᕙᕆᐊᖅᑎᑦᑎᓇᓱᖕᓂᖏᓐᓂᒃ ᒪᑯᓂᖓ ᐃᓄᒃᑐᑦ ᐅᖃᕈᓐᓇᖅᑐᓂᒃ ᐃᓕᓴᐃᔨᑖᕆᐊᖃᕐᓂᕐᒥᑦ.

“ᐅᖃᐅᓯᐅᓯᒪᔪᕐᓕ ᑐᕌᒐᕆᔭᐅᓇᓱᒃᑐᖅ ᐃᓕᓐᓂᐊᖅᑐᓕᕆᓂᕐᒧᑦ ᓄᓇᕗᒥ ᒫᓐᓇ ᐃᓄᒃᑐᑦ ᐅᖃᕈᓐᓇᖅᑐᓂᒃ ᐃᓕᓴᐃᔨᑖᕋᓱᒡᓗᑎ ᐊᔪᙱᓐᓂᕐᒥᑦᑎᒍᑦ… ᑕᒪᓐᓇᓕ ᑐᕌᒐᕆᔭᐅᔪᒥᒃ ᑭᖑᕙᕆᐊᕈᑎᐅᔪᖅ ᐃᒪᓐᓇ ᐃᓕᓐᓂᐊᒐᒃᓴᓂᒃ ᐃᓕᓐᓂᐊᖅᑎᑦᑎᙱᑦᑎᐊᒻᒪᕆᒡᓗᑎᒃ, ᐅᕝᕙᓘᓐᓃᑦ ᐊᓂᒍᐃᓇᔭᖅᑐᓂᒃ ᐊᕐᕌᒍ ᑎᓴᒪᑦ ᓯᕗᓂᑦᑎᓐᓂᒃ.

ᕚᓐᔪᐊᐃ ᐅᖃᓚᐅᕐᒥᔪᖅ ᑎᑎᖃᑦ ᐊᐅᓪᓚᖅᑎᑕᐅᔪᑦ ᓯᓚᑦᑐᖅᓴᕐᕕᒃᒥᑦ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᖅᑎᐅᓇᔭᖅᑐᓄᑦ ᒪᓂᒻᒪᐃᓯᒪᓂᖓᓂᒃ ᐊᓯᐊᓂᖔᖅ ᐃᓕᓐᓂᐊᕈᓐᓇᕐᓗᑎᒃ ᓯᓚᑦᑐᖅᓴᕐᕕᒃᒥᑦ.

“ᓄᓇᕗᒥᑦ ᓯᓚᑦᑐᖅᓴᕐᕕᒃ ᐃᓱᒪᓕᐅᕆᓚᐅᕐᒪ ᖃᐅᔨᒪᓪᓗᑎᒃ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᖅᑎᐅᔪᒪᔪᓂᒃ ᐊᓯᐊᓂᒃ ᐃᓕᓐᓂᐊᖅᑎᑦᑎᓇᓱᒃᖢᑎᒃ, ᑕᒪᓐᓇᓕ ᐃᓕᓐᓂᐊᕐᓂᓕᕆᔨᒃᑯᑦ ᐱᓇᓱᐊᖅᑕᖓᑦᑕ ᐊᓯᐊᒎᖓᓪᓚᕆᒃᑐᖅ, ᑖᒃᑯᐊᓕ ᒪᕐᕈᐃᓂᒃ ᐅᖃᐅᓯᓕᖕᓂ ᐃᓕᓴᐃᔨᒃᓴᓕᐅᕋᓱᒃᑎᓪᓗᒋᑦ,” ᐅᖃᖅᑐᖅ.

ᐱᖁᔭᖅ 25, ᒪᓕᒐᖅ ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᕐᒥᒃ ᐋᖅᑭᒋᐊᖅᑎᑦᑎᓂᕐᒧᑦ ᐊᒻᒪ ᐃᓄᐃᑦ ᐅᖃᐅᓯᖓᓂᒃ ᓴᐳᔾᔨᓯᒪᓂᕐᒧᑦ ᒪᓕᒐᕐᒥᒃ ᐅᖃᕐᓯᒪᖕᒪ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᐋᖅᑭᒃᓱᐃᓂᐊᕐᓗᓂ ᐊᒻᒪ ᑲᒪᒋᔭᖃᕐᓗᓂ ᖃᓄᐃᓕᐅᕈᑎᒃᓴᓂᒃ ᐱᓯᒪᐃᓐᓇᕈᓐᓇᕐᓂᕐᒥᒃ ᐊᒻᒪ ᐱᑖᖅᐸᓪᓕᐊᓂᕐᒥᒃ ᐃᓄᒃᑐᑦ ᐅᖃᕈᓐᓇᖅᑐᓂᒃ ᐃᓕᓴᐃᔨᒃᓴᓂᒃ ᐊᒻᒪᓗ ᐅᑯᓂᖓ ᓄᓇᕗᑦ ᓯᓚᑦᑐᖅᓴᕐᕕᒃᒥᑦ ᐱᖃᖅᑎᑦᑎᓗᑎᒃ “ᐃᑲᔫᑎᒃᓴᐅᓇᔭᖅᑐᓂᒃ ᒪᑯᓄᖓ ᐃᓄᐃᑦ ᐅᖃᐅᓯᖓᓂᒃ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᒐᒃᓴᓄᑦ.”

“ᓄᓇᕗᑦ ᓯᓚᑦᑐᖅᓴᕐᕕᒃ ᐃᓱᒪᓕᐅᕆᓚᐅᕐᒪᑕ ᐊᖏᒡᓕᒋᐊᖅᑎᑦᑎᔪᒪᙱᖢᑎᒃ ᐃᑲᔫᑎᒃᓴᓂᒃ … ᐊᒻᒪᓗ ᐃᓚᒋᐊᖅᑕᐅᓂᐊᕐᓗᓂ ᓄᓇᕗᒥᑦ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᓄᑦ ᑕᒪᑐᒧᖓ ᐅᑭᐅᕐᒧᑦ ᐱᔾᔪᑎᒋᓪᓗᒍ ᐊᒥᒐᕐᓯᒍᑎᐅᓚᐅᕐᑐᓄᑦ. ᐃᓱᒪᓕᐅᕆᓚᐅᕐᒪᑕ ᐃᓕᓐᓂᐊᒐᒃᓴᓂᒃ ᓄᖃᖅᑎᑦᑎᖔᕐᓗᑎᒃ ᐃᑲᔫᑎᒃᓴᓂᒃ ᐱᑖᖅᑎᑦᑎᙱᖔᕐᓗᑎᒃ.” ᕚᓐᔪᐊᐃ ᐅᖃᖅᑐᖅ.

ᐃᓕᓐᓂᐊᖅᑎᐅᔪᑦ ᐅᖓᓯᒌᖕᓂᖃᖅᑎᑕᐅᕙᒡᓗᑎᒃ 2 ᒦᑕᒥ ᓯᓚᑦᑐᖅᓴᕐᕕᐅᑉ ᐃᓕᓐᓂᐊᕐᕕᖏᓐᓂᒃ

ᐱᓕᕆᓂᖅ 1 ᓯᓚᑦᑐᖅᓴᕐᕕᐅᑉ ᒪᑐᐃᒃᑲᓐᓂᕐᓂᐊᓂᖓᓄᑦ ᐸᕐᓇᐅᑎ ᑲᔪᓯᓂᐊᕐᑐᖅ ᓄᕙᒡᔪᐊᕐᓇᖅ-19 ᐱᑕᖃᙱᓐᓂᕋᖅᑕᐅᒃᐸᑦ ᓄᓇᕗᒥᑦ. ᐃᓕᓐᓂᐊᖅᑎᐅᔪᑦ ᐃᓕᓐᓂᐊᕐᕕᓕᐊᖃᑦᑕᕐᓗᑎᒃ ᐊᒻᒪᓗ ᐃᓂᖃᕐᓂᐊᖅᖢᑎᒃ 2 ᒦᑕᒥ ᐅᖓᓯᒌᖕᓂᓕᖕᓂᒃ. ᐃᓕᓐᓂᐊᕐᑎᐅᔪᑦ ᐃᓕᓐᓂᐊᕐᕕᒃᓴᖃᕐᑎᑕᐅᓂᐊᕐᑐᑦ ᐊᒻᒪᓗ ᐃᒃᓯᕚᕈᓐᓇᕐᓗᑎᒃ ᑕᒪᐃᓐᓂ ᐃᓕᓐᓂᐊᕐᕕᒋᔭᖏᓐᓂᒃ.

ᑕᒪᓐᓇ ᑐᑭᖃᕐᑐᖅ ᐃᓚᖏᑦ ᐃᓕᓐᓂᐊᕐᕕᐅᔪᑦ ᒥᒃᖠᕚᓪᓕᕆᐊᖃᕐᓂᐊᕐᓂᖏᓐᓂᒃ, ᒥᐅᓐᔅ ᐅᖃᖅᑐᖅ.

“ᒪᑯᓄᖓᓂ ᐃᓕᓐᓂᐊᒃᑲᓐᓂᕈᑎᒃᓴᓄᑦ, ᐃᓂᖃᖅᑎᑦᑎᐊᕋᓱᒃᑐᒍᑦ ᑕᒪᐃᓐᓄᑦ ᐃᓕᓐᓂᐊᖅᑎᐅᔪᓄᑦ ᐃᒃᓯᕚᕈᓐᓇᕐᓂᐊᕐᓗᑎᒃ ᐃᓕᓐᓂᐊᕐᕕᖏᓐᓂᒃ.”

ᓯᓚᑦᑐᕐᓴᕐᕕᒃ ᑕᑯᓕᓚᐅᕐᑐᑦ ᐅᓄᕈᓐᓃᖅᐹᓪᓕᕐᓯᔪᓂᒃ ᐃᓕᓐᓂᐊᕈᒪᔾᔪᑎᒃᓴᓂᒃ ᑕᒪᑐᒧᖓ ᐅᑭᐅᕐᒧᑦ, ᒥᐅᓐᔅ ᐅᖃᖅᑐᖅ.

“ᓱᓕ ᖃᐅᔨᓇᓱᒃᑐᒍᑦ ᑭᓱᒧᑦ ᑕᒪᓐᓇ ᐊᒃᑐᐃᒍᑎᖃᓗᐊᕐᒪᖔᑦ ᐊᒻᒪᓗ ᖃᓄᖅ ᑖᒃᑯᓄᖓ ᐊᒃᑐᐃᒍᑎᖃᕐᓂᖏᓐᓂᒃ ᐃᓕᓐᓂᐊᕋᓱᒃᑐᑦ ᐅᓄᙱᓐᓂᖏᓐᓄᑦ ᐊᒻᒪᓗ ᐃᓕᓐᓂᐊᕆᐊᖅᑐᑦ ᐅᓄᕐᓂᖏᓐᓂᖏᓐᓄᑦ,” ᐅᖃᖅᑐᖅ.

ᐱᓕᕆᓂᖅ ᐃᓚᖃᕐᒥᔪᖅ ᓴᓗᒻᒪᕐᓴᐃᖃᑦᑕᒃᑲᓐᓂᕐᓂᕐᒥᒃ. ᓯᓚᑦᑐᖅᓴᕐᕕᒃ ᒪᑐᐃᕐᓂᐊᖅᑐᖅ ᑭᒃᑯᑐᐃᓐᓇᕐᓄᑦ, ᑭᓯᐊᓂᓕ ᐳᓛᑐᐃᓐᓇᖅᑐᑦ ᐊᑎᓕᐅᖃᑦᑕᕆᐊᖃᕐᓂᐊᖅᑐᑦ.

ᐱᓕᕆᓂᖅ 2 ᐊᒻᒪ 3 ᐊᑐᕆᐊᖃᙱᑦᑐᓂᒃ ᐱᑕᖃᕐᓂᕐᓴᐅᓂᐊᖅᑐᖅ. ᐃᓕᓐᓂᐊᖅᑎᐅᔪᑦ ᐅᐸᒍᑎᔪᓐᓇᕐᓂᐊᖅᑐᑦ ᐃᓕᓐᓂᐊᕐᕕᖕᒧᑦ, ᑭᓯᐊᓂᓕ ᐅᐸᒍᑎᖃᑦᑕᕐᓂᖅ ᐋᖅᑭᒃᑕᐅᔪᓐᓇᕐᓂᐊᖅᑐᖅ.

ᒥᐅᓐᔅ ᐅᖃᓚᐅᕐᑐᖅ ᓯᓚᑦᑐᖅᓴᕐᕕᒃ ᐸᕐᓇᒃᓯᒪᓂᖓᓂᒃ ᐊᖏᕐᕋᒥ ᐃᓕᓴᐃᔪᓐᓇᕐᓂᕐᒥᒃ ᑕᐃᒪᐃᑦᑕᕆᐊᖃᕐᓂᕈᑎᒃ.

“ᐊᒥᓱᑦ ᐃᓕᓐᓂᐊᕆᐊᒃᑲᓐᓂᕐᕕᐅᕙᒃᑐᑦ ᖃᕋᓴᐅᔭᒃᑯᑐᐃᓐᓇᖅ ᐱᓕᕆᐊᖃᓕᕋᓗᐊᕐᑎᓪᓗᒋᑦ, ᐱᕕᖃᓗᐊᙱᓐᓂᕐᓴᐅᒐᑦᑕ ᒪᐅᓇ ᐱᓕᕆᔾᔪᑎᓕᕆᓂᒃᑯᑦ ᖃᕋᓴᐅᔭᒃᑰᖏᓐᓇᕆᐊᒃᓴᖅ ᒫᓐᓇ, ᑭᓯᐊᓂᓕ ᑕᒪᑐᒧᖓ ᐸᕐᓇᐅᓯᐅᕐᓯᒪᔪᑦ ᐃᓕᓐᓂᐊᕐᓂᐅᔪᑦ ᑲᔪᓯᑏᓐᓇᕈᓐᓇᕐᓗᒋᑦ ᓄᕙᒡᔪᐊᕐᓇᖅ-19 ᓄᓇᕗᒧᐊᕐᓂᖅᐸᑦ,” ᒥᐅᓐᔅ ᐅᖃᖅᑐᖅ.

ᑎᓴᒪᒋᔭᐅᔪᖅ ᐱᓕᕆᓂᖅ ᐊᑐᖅᑕᐅᓇᔭᖅᑐᖅ ᓄᓇᓕᖕᓂ ᐋᓐᓂᐊᖃᓕᖅᑐᖃᕐᓂᕐᐸᑦ, ᐊᒻᒪᓗ ᑕᒪᕐᒥ ᐃᓕᓐᓂᐊᕐᕖᑦ ᓄᓇᕗᒥᑦ ᒪᑐᔭᐅᓇᔭᖅᖢᓂ ᐅᓪᓗᓂ 14 ᑐᖔᓂᐅᙱᑦᑐᖅ ᐊᒻᒪ ᒪᑐᐃᒃᑲᓐᓂᕐᓗᑎᒃ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᔨ ᑭᓯᐊᓂ ᐱᖁᔨᒃᐸᑦ.

ᑭᐅᔾᔪᑎ ᐃᓕᓐᓂᐊᕐᓂᓕᕆᔨᒃᑯᓐᓂᒃ

ᖃᕋᓴᐅᔭᒃᑯᑦ ᑎᑎᖃᓂᒃ, ᐃᓕᓐᓂᐊᕐᓂᓕᕆᔨᒃᑯᑦ ᐅᖃᓚᐅᕐᑐᑦ “ᑐᑭᓯᓯᒪᓂᖏᓐᓂᒃ ᐃᓱᖃᖅᑎᑦᑎᒍᑎᐅᓂᖓ ᓄᕙᒡᔪᐊᕐᓇᖅ-19 ᐊᐅᓚᑦᑎᓂᕐᒥᒃ ᐊᒻᒪᓗ ᓂᕆᐅᒃᐳᒍᑦ ᑲᔪᓯᔪᓐᓇᕐᓂᐊᕐᓂᕐᒥᒃ ᐱᓕᕆᖃᑎᖃᕈᓐᓇᕐᓂᕐᒥᒃ ᓯᓚᑦᑐᖅᓴᕐᕕᒃᒥᑦ ᐅᑯᑎᒎᓇ ᐱᓕᕆᐊᖃᕐᓂᐊᓗᑎᒃ ᓄᓇᕗᒥᑦ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᒐᒃᓴᓂᒃ (NTEP).”

ᐊᐱᕆᔭᐅᑎᓪᓗᒍ ᖃᓄᖅ ᓄᖅᑲᖅᑎᑕᐅᓂᖓ ᐊᒃᑐᐊᓂᖃᕆᐊᒃᓴᖓᓂ ᐃᓕᓐᓂᐊᕐᓂᓕᕆᔨᒃᑯᑦ ᑎᑭᐅᑎᒐᓱᒃᑕᖓᓂ ᐃᓄᒃᑐᑦ ᐅᖃᕈᓐᓇᖅᑐᓂᒃ ᐃᓕᓴᐃᔨᖃᕈᒪᓂᕐᒥᒃ ᓄᓇᕗᒥᑦ, ᐃᓕᓐᓂᐊᕐᓂᓕᕆᔨᒃᑯᑦ ᐅᖃᓚᐅᕐᑐᑦ ᐊᒃᑐᐃᒍᑎ “ᐋᖅᑭᒃᓱᖅᑕᐅᔪᓐᓇᕐᓂᐊᕐᒪᑕ ᒪᑯᑎᒎᓇ ᐱᓕᕆᖃᑎᒌᖕᓂ ᑲᔪᓯᓂᖓᒍᑦ ᓯᓚᑦᑐᖅᓴᕐᕕᒃᒥᑦ.”

“ᐃᑲᔫᑎᒃᓴᑦ ᑲᓇᑕᐅᑉ ᒐᕙᒪᒃᑯᓐᓂᑦ ᑐᓴᕈᑎᐅᓂᑯ ᓯᑎᐱᕆ 2019-ᒥᑦ, ᐋᖅᑭᒋᐊᕐᓯᒃᑲᓐᓂᕐᓂᕐᒥᒃ ᐊᒻᒪ ᓴᙱᒃᑎᕚᓪᓕᖅᑎᑦᑎᓂᕐᒥᒃ ᐃᓄᒃᑐᑦ ᓄᓇᕗᒥᑦ, ᐊᑐᖅᑕᐅᔪᒃᓴᐅᑎᐅᖕᒪᑦ ᐃᑲᔪᕈᑎᒋᔭᐅᓗᓂ ᓄᓇᕗᑦ ᓯᓚᑦᑐᖅᓴᕐᕕᒃ ᐃᓕᓐᓂᐊᒐᒃᓴᓂᒃ ᐱᓕᕆᐊᖃᐃᓐᓇᕈᓐᓇᖁᓪᓗᒍ ᒪᐅᓇ ᖃᓄᐃᓕᐅᕈᑎᒃᓴᑎᒍᑦ ᐱᕈᖅᐹᓪᓕᕈᑎᐅᓇᔭᖅᑐᓂᒃ ᐱᔪᓐᓇᐅᑎᓕᖕᓂ ᐃᓕᓴᐃᔨᒃᓴᓂᒃ,” ᐃᓕᓐᓂᐊᕐᓂᓕᕆᔨᒃᑯᑦ ᐅᖃᓚᐅᕐᑐᑦ ᖃᕋᓴᐅᔭᒃᑯᑦ ᑎᑎᕋᖅᑕᖏᓐᓂᒃ.

ᐃᓕᓐᓂᐊᕐᓂᓕᕆᔨᒃᑯᑦᑕᐅᖅ ᐅᖃᓚᐅᕐᒥᔪᑦ ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᒐᒃᓴᒥ ᐱᓇᓱᓚᐅᕐᑐᑦ ᐅᖃᖃᑎᖃᕈᓐᓇᕐᓂᖏᓐᓂᒃ ᑖᒃᑯᓂᖓ ᐅᕘᓇ info.edu@gov.nu.ca.

 

Share This Story

(0) Comments