ᓄᓇᕗᒥᑦ ᓱᕈᓰᑦ ᐊᔪᕐᓴᕐᓂᕐᒧᑦ ᐊᒃᑐᖅᑕᐅᓯᒪᓛᖑᔪ ᑲᓇᑕᒥ: ᐅᓂᒃᑳᑦ

ᖁᓂᓕᒃ (10) ᓱᕈᓯᕐᓂ 7-ᐅᔪᐃᑦ ᓂᕿᖃᑦᑎᐊᙱᑦᑐᓃᑦᑐ ᐊᖏᕐᕋᖏᓐᓂᒃ

ᓱᕈᓰᑦ ᓄᓇᕗᒥᑦ ᐊᔪᕐᓴᕐᓂᖅᐹᖑᔪᑦ ᑲᓇᑕᓕᒫᒥᑦ, ᐅᖃᕐᓯᒪᔪᑦ ᓄᑖᑦ ᐅᓂᒃᑳᓕᐊᖑᓂᑯᑦ. ᓱᕈᓰᑦ ᐱᙳᐊᖅᑐᑦ ᓯᓚᒥ ᑕᓗᕐᔪᐊᕐᒥ. (ᐊᔾᔨᓕᐅᕆᓗᔨ ᔮᓇᑕᓐ ᓇᔅ)

By ᐃᐊᒪ ᑐᕌᓐᑐᕐ

For an English version of this story, see Nunavut children experience the highest poverty rate in Canada: report

ᑲᓇᑕᒥᑦ, ᓄᓇᕗᒥᐅᑕᑦ ᓱᕈᓯᖏᑦ ᖁᑦᑎᖕᓂᖅᐹᒦᑦᑐᑦ ᐊᔪᖅᓴᕐᓂᒃᑯᑦ, ᐅᑯᐊ ᓄᑖᑦ ᐅᓂᒃᑳᑦ ᐅᖃᕐᓯᒪᔪᑦ ᐅᕘᓇ 2000-ᒧᑦ ᖃᓄᐃᓕᐅᕈᑎᓂᒃ, ᑲᓇᑕᓕᒫᒥᑦ ᐱᓕᕆᐊᖃᖅᑐᑦ ᓱᕈᓰ ᐃᓚᒌᓪᓗ ᐊᔪᕐᓴᓗᐊᕐᓂᖏᑦ ᐱᔾᔪᑎᒋᓪᓗᒍ.

ᐅᕙᓃᖢᑎᒃ 31.2 ᐳᓴᓐᑎᒥᓐ, ᓄᓇᕗᒥᑦ ᓱᕈᓰᑦ ᐊᔪᕐᓴᕐᓂᖏᑦ ᖁᑦᑎᖕᓂᕐᓴᒻᒪᕆᒃᑐᑦ ᑲᓇᑕᒥᐅᑕᓕᒫᑦ ᒫᓃᑎᓪᓗᒋᑦ 18.6 ᐳᓴᓐᑎᒥᓐ ᒪᑯᓄᖓ ᓱᕈᓯᕐᓄᑦ ᐅᑭᐅᓕᖕᓂ 18 ᑐᖔᓂ, ᐅᑯᑎᒎᓇᕐᓕ ᓱᕈᓰᑦ ᐃᓚᒌᓪᓗ ᐊᔪᕐᓴᕐᓂᖏᓐᓄᑦ ᑲᓇᑕᒥ ᐅᓂᒃᑳᓂᒃ.

ᓱᕈᓰᑦ ᐅᑭᐅᖃᖅᑐᑦ 6 ᑐᖔᓂ ᑲᓇᑕᒥᑦ, ᐊᔪᕐᓴᕐᓂᖏᓐᓄᑦ ᓇᓗᓇᐃᒃᑯᑎᖓ 19.6 ᐳᓴᓐᑎᒦᑦᑐᑦ, ᐅᕝᕙᓘᓐᓃᑦ 462,360 ᓱᕈᓰᑦ.

ᒫᓂᑑᐸ ᑐᒡᓕᕆᔭᐅᔪᖅ ᓱᕈᓰᑦ ᐊᔪᕐᓴᕐᓂᖏᑦᑎᒍ ᒫᓃᖢᑎᒃ 27.9 ᐳᓴᓐᑎᒥᓐ. ᔫᑳᓐ ᐊᑦᑎᖕᓂᖅᐹᖑᔪᖅ 11.9 ᐳᓴᓐᑎᒥᓐ.

ᑲᓇᑕᓕᒫᑦ ᑕᒪᐃᓐᓂ ᑕᐅᑐᒃᖢᒍ, 25 ᐳᓴᓐᑎᖓ ᐃᓄᐃᑦ ᓱᕈᓯᖏᑦ ᐊᔪᕐᓴᖅᑐᓃᑦᑐᑦ, ᐅᓂᒃᑳᑦ ᐅᖃᕐᓯᒪᔪᑦ.

ᐅᓂᒃᑳᖑᔪᑦ ᐅᓄᕐᑐᓂᒃ ᐃᓱᒪᓕᐅᕆᓯᒪᔪᑦ ᐅᑯᐊ ᒐᕙᒪᑐᖃᒃᑯᑦ ᒥᒃᖡᕚᓪᓕᕈᑎᒋᓇᔭᖅᑕᖏᓐᓂᒃ ᓱᕈᓰᑦ ᐊᔪᕐᓴᕐᓂᖏᓐᓂᒃ ᑲᓇᑕᒥ.

ᐅᖃᕐᓯᒪᔪᖅ 6-ᐱᓕᐊᓐᑖᓚᓂ ᐊᑐᖁᔨᓪᓗᑎᒃ ᐊᑐᖅᑐᒃᓴᓂᒃ 2020-ᑎᒍᑦ ᖃᓄᐃᓕᐅᕈᑎᒃᓴᓕᕆᓂᕐᒧᑦ ᐊᔪᕐᓴᕐᓇᓗᐊᕐᓂᐊᓗᒃ ᒥᒃᖠᕚᓪᓕᖅᑎᑕᐅᓇᓱᒡᓗᓂ.

ᐅᓇ ᓇᓗᓇᐃᒃᑯᑎ ᓴᖅᑭᑎᑦᑎᓯᒪᔪᖅ ᓱᕈᓰᑦ ᐊᔪᕐᓴᖅᑎᒋᓂᖏᓐᓂᒃ ᑲᓇᑕᒥ ᑕᐅᑐᙳᐊᖅᖢᒍᓕ ᑲᓇᑕᒥᐅᑕᓕᒫ.

ᐊᓯᖏᑦ ᐃᓱᒪᓕᐅᕈᑎᐅᓚᐅᕐᑐᑦ ᐃᓚᖃᓚᐅᕐᑐᑦ ᐊᖏᒡᓕᕚᓪᓕᖅᑎᑦᑎᓂᕐᒥᒃ ᑲᓇᑕᒥ ᓱᕈᓯᕐᓯᐅᑎᓂᒃ ᐃᑲᔪᕈᑎᐅᓂᐊᕐᓗᓂ ᐊᔪᕐᓴᕐᓇᕐᓂᖅ ᒥᒃᖠᕚᓪᓕᖅᑎᑕᐅᓇᓱᖕᓗᓂ 50 ᐳᓴᓐᑎᒥ 2025 ᑎᑭᓚᐅᖅᑎᓐᓇᒍ, ᐋᖅᑭᒃᓱᐃᓪᓗᑎᒃ ᐋᓐᓂᐊᕕᖕᒥᑦ ᑲᒪᒋᔭᐅᔪᓐᓇᕈᑎᒃᓴᓄᑦ ᐸᕐᓇᐅᑎᓂᒃ, ᐋᖅᑭᒃᓯᓗᑎᒃ ᑮᓇᐅᔭᓕᐅᕈᑎᑦ ᐃᖅᑲᓇᐃᔭᖅᑐᓄᑦ $15.00-ᒥ ᒥᑭᓛᖃᓕᕐᓗᑎᒃ ᐊᒻᒪᓗ ᐱᐅᓯᕚᓪᓕᖅᑎᑦᑎᓗᑎᒃ ᑲᓇᑕᒥ ᐃᒡᓗᓕᕆᓂᕐᒧᑦ ᐃᑲᔫᑎᒃᓴᓕᕆᓂᕐᒥᓐ (National Housing Co-Investment Fund).

ᐱᖁᔨᓯᒪᖕᒥᔪᖅ ᒐᕙᒪᑐᖃᒃᑯᑦ ᐱᓕᕆᐊᖃᒻᒪᕆᒡᓗᑎᒃ ᒥᒃᖠᕚᓪᓕᖅᑎᑦᑎᓂᕐᒥᓐ ᓂᕿᖃᖃᑦᑕᙱᓗᐊᕐᓂᕐᒥ.

ᓄᓇᕗᒥᑦ, 7-ᐅᔪᑦ ᓱᕈᓰᑦ ᖁᓕᓂᒃ ᓂᕿᖃᙱᓗᐊᖃᑦᑕᖅᑐᒦᑦᑐᑦ, ᐅᓂᒃᑳᑦ ᐅᖃᕐᓯᒪᔪᑦ.

2018-ᖑᑎᓪᓗᒍ ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᓯᒪᔪᑦ ᐊᓯᔾᔨᖅᑕᐅᔪᓂᒃ ᐅᕙᓂ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᒥᑦ ᐱᓕᕆᐊᒥᑦ, ᐃᓚᖃᖅᖢᓂ 25 ᐳᓴᓐᑎᒥ ᐊᖏᒡᓕᕚᓪᓕᕈᑎᒃᓴᓂᒃ ᒫᓐᓇ ᐃᑲᔪᕈᑎᒋᔭᐅᔪᓂᒃ ᐃᓚᖏᓐᓄᑦ ᓂᐅᕕᖅᑕᐅᖃᑦᑕᕆᐊᓕᖕᓄᑦ ᒪᑯᑎᑐᓇᖅ, ᐃᒻᒧᒃᒧᑦ ᐊᒻᒪ ᓱᕈᓯᓛᓄᑦ ᐃᒻᒧᖕᓄᑦ.

ᑭᓯᐊᓂᓕ ᓄᓇᕗᑦ ᒐᕙᒪᒃᑯ ᐅᖃᓚᐅᕐᑐᑦ ᑕᒪᑐᒧᖓ ᐱᓕᕆᒃᑲᓐᓂᕆᐊᖃᕐᓂᖏᓐᓂᒃ.

“ᐃᓄᓕᕆᔨᒃᑯᑦ ᖁᕕᐊᓱᒻᒪᕆᓚᐅᕐᑐᑦ ᖃᐅᔨᒐᒥᒃ ᐊᓯᔾᔨᖅᑕᐅᓂᐊᖅᑐᓂᒃ ᐅᕙᓂ ᓂᕿᑦᑎᐊᕙᓕᕆᓂᕐᒥᑦ ᐅᑭᐅᕐᑕᖅᑐᕐᒥ ᐱᓕᕆᐊᒧᑦ ᒪᑯᓂᖓ ᐊᑐᖅᑕᐅᓂᐊᓕᓵᖅᑐᒥᓐ ᓄᑖᒥ ᐊᖑᓇᓱᒃᑎᓄᑦ ᐃᑲᔫᑎᒃᓴᓂᒃ ᐃᑲᔫᓯᐊᒃᓴᓂᒃ ᐊᒻᒪ ᐃᑲᔫᑎᒃᓴᓄᑦ ᐅᒥᐊᕐᔪᐊᒃᑰᖅᑐᕕᓂᕐᓄᑦ. ᑭᓯᐊᓂᓕ, ᐃᓄᓕᕆᔨᒃᑯᑦ ᐃᓱᒪᔪ ᐱᓕᕆᐊᒃᓴᐅᔪᖅ ᐱᐅᓯᕚᓪᓕᒃᑲᓐᓂᕈᓐᓇᕐᓂᖏᓐᓂᒃ ᐊᓯᔾᔨᖅᓯᓂᒃᑯᑦ ᐱᓕᕆᐊᒃᓴᐅᔪᖅ ᐋᖅᑭᒃᓯᒪᓂᖓᒍᑦ ᐊᒻᒪᓗ ᐱᐅᓯᕚᓪᓕᖅᑎᑦᑎᓗᑎᒃ ᓴᖅᑭᔮᑦᑎᐊᖅᑎᑦᑎᓂᕐᒥ ᐱᓕᕆᐊᖑᔪᒥᒃ,” ᐅᖃᓚᐅᕐᑐᖅ ᐅᖃᖅᑎᒋᔭᐅᔪ ᐃᓄᓕᕆᔨᒃᑯᓐᓄᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

2019-ᒥᑦ, ᒐᕙᒪᑐᖃᒃᑯᑦ ᐊᑐᓕᓚᐅᕐᓯᒪᔪᑦ ᐊᔪᕐᓴᕐᓂᕐᒥᑦ ᒥᒃᖠᕚᓪᓕᖅᑎᑦᑎᓂᕐᒧᑦ ᒪᓕᒐᕐᔪᐊᒥᑦ. ᑖᔅᓱᒪ ᓴᖅᑭᑕᐅᓂᖓ ᓴᖅᑭᑎᑦᑎᒍᑎᐅᓚᐅᕐᒥᔪᖅ ᓂᐅᕕᐊᒃᓴᓄᑦ ᓇᓗᓇᐃᒃᑯᑎᓂᒃ Market Basket Measure ᒪᓕᒐᙳᖅᑎᑦᑎᒍᑎᐅᓪᓗᓂ ᓇᓗᓇᐃᒃᑯᑎᒻᒪᕆᐅᓂᐊᕐᓗᓂ ᐊᔪᕐᓴᕐᓇᕐᓂᕐᒥᒃ ᓇᓗᐃᔭᐃᓂᕐᒧᑦ.

ᐅᓂᒃᑳᑦ ᐊᑐᖃᑦᑕᙱᑦᑐᑦ ᒪᑯᓂᖓ ᓂᐅᕕᐊᒃᓴᓄᑦ ᓇᓗᓇᐃᒃᑯᑎᓂᒃ (MBM) ᖃᐅᔨᓇᓱᒃᖢᑎᒃ ᐊᔪᕐᓴᕐᓇᕐᓂᕐᒥᑦ ᑲᓇᑕᒥ. ᑭᓯᐊᓂᓕ ᐊᑐᕐᓯᒪᔪᑦ ᐅᓂᒃᑳᑦ ᑲᑎᕐᓱᒐᕆᔭᐅᔪᓂᒃ ᓱᕈᓯᕐᓯᐅᑎᑖᕈᑎᓂᒃ ᐊᕐᕌᒍᒥ ᑎᑎᕋᐅᓯᐅᕙᒃᑐᓂᒃ (T1 Family File (T1FF)) ᐃᓐᑲᒻ ᑖᒃᓯᓅᖓᔪᓂᒃ ᐅᑯᓇᙵᑦ ᓇᐃᓴᐃᔨᑯᓐᓂᑦ ᑲᓇᑕᒥ.

“ᐅᓇ ᓂᐅᕕᐊᒃᓴᓄᑦ ᓇᓗᓇᐃᒃᑯᑎ MBM ᐋᖅᑭᒃᓯᒍᑎᐅᖕᒪᑦ ᑮᓇᐅᔭᓕᐅᙱᓗᐊᖅᑐᓄᑦ ᐊᑐᖅᑕᐅᓇᔭᖅᑐᓂᒃ ᐱᖁᑎᓄᑦ ᐊᒻᒪ ᐱᔨᑦᑎᕋᐅᑎᓄᑦ ᐃᓚᒌᑦ ᐊᑐᕆᐊᖃᕋᔭᖅᑕᖏᓐᓂᒃ ‘ᓈᒻᒪᒃᑐᒥ’ ᐃᓅᓯᖃᕐᓂᕐᒧᑦ. ᐅᓇ ᓇᓗᓇᐃᒃᑯᑎ ᐃᓚᖃᕐᓯᒪᔪᖅ ᓂᖀᑦ ᐊᑭᖏᓐᓂᒃ, ᐊᓐᓄᕌᓄᑦ, ᐊᖏᕐᕋᕆᔭᒧᑦ, ᐊᐅᓪᓚᕆᐊᖃᕈᑎᓄᑦ ᐊᒻᒪᓗ ᐊᓪᓕᒌᙱᑦᑑᑎᓄᑦ ᐊᑐᖅᑕᐅᖃᑦᑕᕆᐊᓕᖕᓄᑦ.” ᐅᓂᒃᑳᑦ ᐅᖃᕐᓯᒪᔪᑦ.

“ᓂᐅᕕᐊᒃᓴᓄᑦ ᓇᓗᓇᐃᒃᑯᑎᐅᔪᑦ ᐋᖅᑭᒃᑕᐅᓯᒪᔪᖅ 50-ᓄᑦ ᐊᔾᔨᒌᙱᑦᑐᓃᑦᑐᓂᒃ ᓄᓇᓄᑦ ᑲᓇᑕᒥ ᐃᓱᒪᒋᓪᓗᒍ ᓄᓇᓕᖕᓂ ᐃᓅᓇᓱᖕᓂᖅ ᖃᓄᖅ ᐊᑭᖃᖃᑦᑕᕐᒪᖔᑦ. ᑮᓇᐅᔭᓕᐊᕆᔭᐅᕙᓪᓕᐊᔪᑦ ᖃᐅᔨᔭᐅᓇᓱᒃᐸᒃᑐᑦ ᐃᓐᑲᒻ ᑖᒃᓰᒍᑎᑦ ᐲᖅᑕᐅᓚᐅᕐᑎᓪᓗᒋ, ᑖᒃᑯᐊᓗ ᐃᓚᖃᖅᖢᑎᒃ ᒐᕙᒪᒃᑯᓐᓂᒃ ᑮᓇᐅᔭᖅᑖᕈᑎᓂᒃ, ᐊᒻᒪᓗ ᐲᕐᓯᕕᐅᒍᑏ ᐃᓚᖏᓐᓂᒃ ‘ᐊᑐᓗᐊᙱᑦᑐᓄ’ ᐊᑐᖅᑕᐅᔪᕕᓂᕐᓂᒃ.”

ᐃᓚᒌᖑᔪᑦ ᐊᑭᓖᔪᓐᓇᙱᒃᑯᑎᒃ ᓇᓗᓇᐃᒃᑯᑎᐅᔪᓂᒃ ᓄᓇᖏᓐᓄᑦ, ᐃᓱᒪᒋᔭᐅᔪᑦ ᐊᔪᕐᓴᕐᓂᐅᑉ ᐊᑖᒎᖓᓂᖏᓐᓂᒃ.

ᐅᓂᒃᑳᑦ ᐅᖃᕐᓯᒪᖕᒥᔪᑦ ᑖᒃᑯᐊ ᓂᐅᕕᐊᒃᓴᓄᑦ ᓇᓗᓇᐃᒃᑯᑎᐅᔪᑦ ᐃᓱᖃᖅᑎᑕᐅᓂᖏᓐᓂᒃ. ᓲᕐᓗ, ᐊᑐᖅᑎᑕᐅᙱᑦᑐᖅ ᑎᐅᕆᑑᕆᓂᒃ ᐅᕝᕙᓘᓐᓃᑦ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᑲᓇᑕᒥ ᓲᖃᐃᒻᒪ ᓂᐅᕕᐊᒃᓴᓄᑦ ᓇᓗᓇᐃᒃᑯᑎᐅᔪ ᐋᖅᑭᒃᑕᐅᓯᒪᙱᒻᒪᑦ ᑖᒃᑯᓄᖓ ᓄᓇᓕᖕᓄᑦ.

ᐅᓇ ᓇᓗᓇᐃᒃᑯᑎ ᓴᖅᑭᑎᑦᑎᓯᒪᔪᖅ ᐊᒃᑐᐃᒍᑎᐅᓯᒪᔪᓂᒃ ᐆᒧᖓ ᑲᓇᑕᒥ ᓱᕈᓯᕐᓯᐅᑎᓂᒃ ᑲᓇᑕᒥ ᓱᕈᓰᑦ ᐊᔪᕐᓴᕐᓂᖏᓐᓄᑦ ᖃᓄᐃᑉᐸᓪᓕᐊᓂᕐᒧᑦ.

ᓂᐅᕕᐊᒃᓴᓄᑦ ᓇᓗᓇᐃᒃᑯᑎᐅᔪᑦ (MBM) ᒫᓐᓇ ᕿᒥᕐᕈᐊᖅᑕᐅᔪᑦ ᐊᒻᒪᓗ ᓄᑖᙳᕆᐊᕐᓯᒪᔪᓂᒃ ᓂᕆᐅᒃᖢᑎ ᕕᕗᐊᕆ 2020-ᒥᑦ.

ᑕᒪᒃᑯᐊ ᓇᐃᓴᐅᑏᑦ ᖁᕝᕙᓯᒃᑲᓗᐊᖅᖢᑎᒃ, ᐅᓂᒃᑳᓕᐊᖑᓯᒪᔪᑦ ᐅᖃᕐᓯᒪᔪᑦ ᓱᕈᓰᑦ ᐊᔪᕐᓴᖃᑦᑕᕐᓂᖏᑦ ᐊᑦᑎᒃᓯᕚᓪᓕᓂᖓᓂᒃ 2016-ᒥ ᑲᓇᑕᒥ ᓱᕈᓯᕐᓯᐅᑎ ᐃᓚᓕᐅᔾᔭᐅᑎᓪᓗᒋᑦ ᒐᕙᒪᑐᖃᒃᑯᑦ ᐊᐅᓚᑦᑎᔾᔪᑎᒃᓴᖏᓐᓄᑦ.

“2017-ᒥᑦ, 145,730-ᓂᒃ ᐅᓄᕈᓐᓃᖅᐹᓪᓕᕐᓯᒪᓚᐅᕐᑐᑦ ᓱᕈᓰᑦ ᐊᔪᕐᓴᖅᑐᓃᑦᑐᓂ ᐅᕙᙵᓪᓕ 2015-ᖑᓚᐅᕐᑐᒥᓐ, ᑕᒫᓂ ᓱᕈᓯᖅᓯᐅᑎᑦ ᓴᖅᑭᑕᐅᓚᐅᖅᑎᓐᓇᒋ, ᐃᓚᐃᓕᖓᓚᐅᕐᑐᖅ 9.7%-ᒥᑦ ᒥᒃᖠᕚᓪᓕᕐᓯᒪᓂᖓᓂᒃ ᑕᐃᔅᓱᒪᓂ,” ᐅᓂᒃᑳ ᐅᖃᕐᓯᒪᖕᒥᔪᑦ.

ᓄᓇᕗᒥᑦ, ᓱᕈᓰᑦ ᐊᔪᕐᓴᖅᑐᒦᑦᑐᑦ ᐊᑦᑎᒃᓯᕚᓪᓕᓚᐅᕐᑐᖅ 14.2 ᐳᓴᓐᑎᒥ 2015-ᒥᑦ 2017-ᒧᑦ ᐅᓇ ᓴᖅᑭᑕᐅᓚᐅᕐᑎᓪᓗᒍ ᑲᓇᑕᒥ ᓱᕈᓯᕐᓯᐅᑎᑖᕈᑎ.

2016-ᒥᑦ, ᓄᓇᕗᑦ ᒐᕙᒪᒃᑯᑦ ᐱᒋᐊᖅᑎᑦᑎᓚᐅᕐᓯᒪᔪᑦ ᐊᑐᖅᑎᑕᐅᔪᓐᓃᕐᓗᓂ ᑲᓇᑕᒥ ᓱᕈᓯᕐᓯᐅᑎᑖᕈᑎᑦ ᓂᖃᐃᓲᑎᓕᕆᓂᒃᑯᑦ.

2017-ᒥᑦ, ᐱᓕᕆᖃᑎᖃᖅᖢᑎᒃ ᓄᓇᕗᒥ ᑲᑎᒪᔨᓂᒃ ᐊᔪᕐᓴᕐᓂᕐᒥᓐ ᒥᒃᖠᕚᓪᓕᖅᑎᑦᑎᓂᕐᒧᑦ, ᓄᓇᕗᑦ ᐃᓄᓕᕆᔨᖏ ᓴᖅᑭᑎᑦᑎᓚᐅᕐᑐᑦ ᐊᔪᕐᓴᕐᓂᕐᒥᓐ ᒥᒃᖠᕚᓪᓕᖅᑎᑦᑎᓂᒧᑦ ᐸᕐᓇᐅᑎᓂᒃ ᑕᐃᔭᐅᔪᒥᑦ ᒪᑭᒪᓂᖅ ᐸᕐᓇᐅᑎ II.

ᐸᕐᓇᐅᑎ 8-ᓂ ᖃᓄᐃᓕᐅᕈᑎᒃᓴᓂᒃ ᐱᔭᐅᔪᓐᓇᕈᑎᒃ, ᐃᓚᒋᔭᐅᔪᑦ ᑲᑎᒪᔨᓄᑦ ᐊᔪᕐᓴᕐᓂᕐᒥᓐ ᒥᒃᖠᕚᓪᓕᖅᑎᑦᑎᓂᕐᒧᑦ ᐅᒃᐱᕈᓱᒃᑐᑦ ᒥᒃᖠᕚᓪᓕᖅᑎᑦᑎᒐᔭᕐᓂᖓᓂᒃ ᐊᔪᕐᓴᕐᓂᕐᒥᓐ, ᐅᑯᑎᒎᓇᕐᓕ ᒥᓂᔅᑕᐅᑉ 2016/17 ᐊᕐᕌᒍᒧᑦ ᐅᓂᒃᑳᖏᓐᓂᒃ ᐊᔪᕐᓴᕐᓂᕐᒥ ᒥᒃᖠᕚᓪᓕᖅᑎᑦᑎᓂᕐᒧᑦ. ᐅᑯᓂᖓᓕ ᓴᖅᑭᑎᑦᑎᒍᑎᐅᓇᔭᖅᑐᑦ: ᓴᙱᒃᑎᑦᑎᕚᓪᓕᕐᓂᕐᒥᑦ ᑐᙵᕕᐅᔪᖅ ᐅᕘᓇ ᐱᓕᕆᖃᑎᒌᖕᓂᒃᑯᑦ, ᓄᓇᓖᑦ ᐃᓱᒪᓕᐅᕆᓂᕐᓴᐅᓕᕐᓗᑎᒃ, ᓄᓇᓕᖕᓂ ᑮᓇᐅᔭᓕᐅᕈᑎᐅᔪᑦ ᓴᖅᑭᑎᒃᑲᓐᓂᕐᓗᒋᑦ, ᐃᑲᔪᖅᑐᐃᒍᑏᑦ ᒪᒥᓴᕐᓂᕐᒧᑦ ᐊᒻᒪ ᖃᓄᐃᑦᑕᐃᓕᓂᕐᒧᑦ ᓴᙱᒃᑎᒋᐊᕐᓗᒋᑦ, ᐃᓅᓯᓕᒫᒥ ᖃᐅᔨᕙᓪᓕᐊᓂᖅ ᓴᖅᑭᒃᑲᓐᓂᕐᓗᒍ, ᓂᕿᖃᕈᓐᓇᕐᓂᕐᓴᐅᑎᑦᑎᓂᖅ, ᐃᑲᔪᕈᑎᐅᒃᑲᓐᓂᕈᓐᓇᖅᑐᓂᒃ ᓂᖃᐃᓲᑎᓕᕆᓂᕐᒧᑦ ᐱᓕᕆᐊᒃᓴᓂᒃ ᐊᒻᒪᓗ ᐃᒡᓗᓂᒃ ᐊᑐᐃᓐᓇᖅᑕᖃᕐᓂᕐᓴᐅᓗᓂ.

ᐃᓄᓕᕆᔨᒃᑯᑦ ᐅᖃᓚᐅᕐᒥᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐱᓕᕆᖃᑎᖃᕐᓯᒪᓂᖏᓐᓂᒃ ᒐᕙᒪᑐᖃᒃᑯᓐᓂᒃ ᐋᖅᑭᒃᓱᐃᓇᓱᖕᓂᕐᒥ ᐊᔪᕐᓴᕐᓂᕐᒧᑦ ᓇᓗᓇᐃᒃᑯᑎᐅᔪᓐᓇᕋᔭᖅᑐᓂᒃ ᐊᒻᒪᓗ ᖃᓄᐃᓕᐅᕈᑎᒃᓴᑦ ᓄᓇᕗᒻᒥᐅᓄᑦ ᑐᕌᖓᓂᕐᓴᐅᓗᑎᒃ ᐊᒻᒪ ᐃᓕᖁᓯᖏᓐᓄᑦ.

Share This Story

(0) Comments

Join the Conversation

Your email address will not be published. Required fields are marked *

*