ᓄᓇᕗᒥ ᐊᖑᓇᓱᒃᑏ ᓇᓂᓯᒃᑲᓐᓂᕐᐳᑦ ᐊᕐᕕᕕᓂᕐᒥ
ᐊᕐᕕᒃ “ᐊᖏᓂᕐᓴᐅᓚᐅᕐᑐᖅ ᐃᒡᓗᓐᓂᓐ,” ᐅᖃᖅᑐᖅ ᓚᓂ ᐊᕿᒋᐊᖅ ᐸᓂᒐᔭᒃ
ᐋᓐᑐᕉ ᐸᓂᒐᔭᒃ ᓄᑲᖅᖠᖅ ᐊᒻᒪ ᐊᐃᓴᒃ ᐸᓂᒐᔭᒃ ᐊᕐᕕᐅᑉ ᖃᓂᐊᓄᑦ ᑕᑯᒋᐊᕐᐴᒃ ᓇᓂᔭᖓᓂ ᓄᕕᐱᕆᐅᑉ ᓄᙳᐊᓂᒃ ᐃᑦᓱᐊᖅᑐᖅᕕᒃᒥ (Gulf of Boothia), 100 ᑭᓛᒥᑕᓂ ᐅᖓᓯᖕᓂᓕᖕᒥᓐ ᑕᓗᕐᔪᐊᕐᒥ. (ᐊᔾᔨᙳᐊᖅ ᐅᕙᙵᑦ ᓚᓂ ᐊᕿᒋᐊᖅ ᐸᓂᒐᔭᒃ)
For an English version of this story, see Nunavut hunters find another beached bowhead whale carcass
ᓄᕕᐱᕆᐅᑉ ᓄᙳᐊᓂ ᐊᕐᕕᒃ ᓇᓂᔭᐅᔪᖅ ᒫᓂ ᐃᑦᓱᐊᖅᑐᖅᕕᒃᒥ 9-ᒋᔭᐅᓚᐅᕐᐳᖅ ᓇᓂᔭᐅᔪᓂᒃ ᐅᒃᑑᐱᕆᒥ ᐱᒋᐊᕐᖢᓂ: ᑎᓴᒪᓐ ᐊᖑᓇᓱᒃᑎᓄᑦ ᑰᒑᕈᒃᒥ ᓇᓂᔭᐅᓪᓗᑎᒃ, ᑎᓴᒪᒃᑲᓐᓃᑦ ᓇᐅᔮᓂ ᐊᖑᓇᓱᒃᑎᓄᑦ ᐊᒻᒪ ᑖᓐᓇ ᐊᑕᐅᓯᖅ ᐊᖑᓇᓱᒃᑎᓄᑦ ᑕᓗᕐᔪᐊᕐᒥ.
ᓚᓂ ᐊᕿᒋᐊᖅ ᐸᓂᒐᔭᒃ ᑕᓗᕐᔪᐊᕐᒥᐅᑕᖅ ᐅᖃᓚᐅᕐᑐᖅ ᓇᑦᑎᕋᓱᓚᐅᕐᓂᖓᓂᒃ ᐃᑦᓱᐊᖅᑐᖅᕕᒃᒥᑦ, ᒫᓂ 100 ᑭᓛᒥᑕᓂ ᐅᖓᓯᖕᓂᓕ ᓄᓇᖓᑕ ᑎᒫᓂᒃ, ᐅᓇ ᐅᔪᕈᖓ, ᐋᓐᑐᕉ ᐸᓂᒐᔭᒃ ᓄᑲᖅᖠᖅ, ᐅᖃᓚᐅᕐᑐᑦ ᑖᔅᓱᒧᖓ ᑖᓐᓇ ᐊᑖᑕᖓᓗ, ᐊᐃᓴᒃ ᐸᓂᒐᔭᒃ ᑖᔅᓱᒧᖓ ᐅᖃᕐᒪᑕ ᑐᖁᖓᔪᒥ ᐊᕐᕕᒃᑕᖃᕐᓂᕋᖅᖢᓂᐅᑦ ᓯᒡᔭᒥ ᑕᐅᕙᓂᒃᑲᓐᓂᐊᕐᔪᒃ.
ᑖᓐᓇ ᐊᕐᕕᒃ, ᐸᓂᒐᔭᐅᑉ ᐅᖃᐅᓯᕆᓚᐅᕐᑕᖓ “ᐊᖏᓂᕐᓴᐅᓂᖓᓂᒃ ᐃᒡᓗᖓᓂ,” ᐅᓕᓐᓂᐅᑉ ᐅᖓᑖᓃᓚᐅᕐᑐᖅ. ᑖᓐᓇᓗ ᐊᕐᕕᒃ ᓯᒡᔭᒦᓯᒪᖅᑰᔨᓪᓗᓂ ᑕᐃᒪᙵᑦ ᖁᐊᖅᐸᓪᓕᐊᓕᓚᐅᕐᑎᓪᓗᒍ, ᑕᖅᑭᐅᑉ ᐅᖓᑖᓃᓕᕐᑐᖅ, ᐅᖃᖅᑐᖅ.
ᑕᐃᒪᙵᓪᓕ, ᓇᓄᕐᓄᑦ ᐊᒻᒪ ᑎᕆᒐᓂᐊᕐᔪᖕᓄᑦ ᓂᕆᔭᐅᑲᑕᒃᓯᒪᓕᕐᑐᖅ.
ᐃᒻᒪᖄᓪᓘᓐᓃᑦ, ᑖᒃᑯᐊ ᐊᖑᓇᓱᒃᑏ ᑕᐃᑲᓃᑎᓪᓗᒋᑦ, ᐃᓱᒪᓚᐅᕐᑐᑦ ᓇᓄᐃᑦ ᑕᒫᓃᑲᑕᓚᐅᕐᑐᑦ ᐅᑎᕐᓂᐊᕆᐊᒃᓴᖏᓐᓂᒃ ᖃᐅᔨᓇᓱᒡᓗᑎᒃ ᑖᒃᑯᓂᖓ.
“ᐊᒃᓱᐊᓗᒃ ᑕᒪᓐᓇ ᐃᓱᒫᓗᖕᓇᓚᐅᕐᑐᖅ, ᐃᓱᒪᓇᕐᖢᓂ ᓇᓄᖅᑕᖃᑐᐃᓐᓇᕆᐊᖃᕐᓂᖓᓂᒃ, ᖁᕕᐊᓇᕈᓘᔭᓚᐅᕐᑐᖅ, ᑭᓯᐊᓂᓕ ᐆᒻᒪᑎ ᐃᒃᐱᖕᓇᓗᐊᓕᕐᖢᓂ.” ᐸᓂᒐᔭᒃ ᐅᖃᖅᑐᖅ.
ᐊᒻᒪᓗ ᓯᕗᓪᓕᕐᐹᒥ ᐊᕐᕕᖕᒥᓐ ᑕᑯᔭᕆᐊᖅᖢᓂ, ᐅᖃᒃᑲᓐᓂᕐᑐᖅ.
ᐋᕐᓗᒃᓄᑦ ᐊᕐᕖᑦ ᓄᓇᒧᐊᖅᑎᑕᐅᓇᓱᒋᔭᐅᔪᑦ
ᑎᓴᒪᑦ ᐊᕐᕖᑦ ᓄᓇᒦᑦᑐ ᐅᒃᑑᐱᕆᒥ ᓇᓂᔭᐅᓚᐅᕐᑐ ᑰᒑᕉᑉ ᖃᓂᒋᔭᖓᓂᒃ ᐋᕐᓗᖕᓄᑦ ᐱᔭᐅᓇᓱᒋᔭᐅᓚᐅᕐᑐᑦ ᓂᕿᖓ ᖃᓄᐃᓕᖓᓯᒪᓂᖓᓄᑦ.
ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᖃᐅᔨᓴᖅᑕᐅᔪᒃᓴᓂᒃ ᐱᓯᒪᓕᕐᑐᑦ ᑎᓴᒪᓂ ᐊᕐᕕᒃᓂᙶᖅᑐᓂᒃ ᑰᒑᕈᒻᒥ.
ᑭᓯᐊᓂᓕ ᐃᖃᓗᓕᕆᓄᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᖃᐅᔨᓴᕐᑎᖓ ᓯᑏᕝ ᕘᒍᓴᓐ ᐅᖃᓚᐅᕐᑐᖅ ᒫᓂᑑᐸ ᓇᓗᓇᐃᒃᑯᑎᖃᓕᓚᐅᕐᓯᒪᖕᒪᑦ ᐊᐅᐸᖅᑐᒥ ᐆᒧᖓ ᓄᕙᒡᔪᐊᕐᓇᖅ-19-ᒧᑦ ᑖᒃᑯᐊ ᖃᐅᔨᓴᖅᑕᐅᔪᒃᓴᑦ ᐱᔭᐅᓵᕐᑎᓪᓗᒋᑦ ᑕᐃᒪᐃᓐᓂᖓᓄᓪᓗ ᓱᓕ ᕿᒥᕐᕈᐊᕈᓐᓇᓚᐅᙱᑕᖏᑦ.
ᕘᒍᓴᓐ ᐅᖃᓚᐅᕐᑐᖅ ᑕᖅᑭᐅᓚᐅᕐᑐᖅ ᐱᒋᐊᓕᕐᑎᓪᓗᒍ ᖃᐅᔨᓚᐅᕐᓂᖓᓂ ᓇᐅᔮᓂ ᐊᖑᓇᓱᒃᑎᓂᒃ ᑎᓴᒪᓂ ᐊᕐᕕᕕᓂᕐᓂ ᓄᓇᒦᑦᑐᓂᒃ ᓇᓂᓯᔪᓂᒃ.
“ᖃᐅᔨᓴᕈᑎᐅᓂᐊᕐᑐᓂᒃ ᓇᒡᓯᐅᔾᔨᓚᐅᕐᑐᒍ ᑰᕐᑕᐃᕈᔪᐊᒃ ᐊᖑᓇᓱᒃᑐᓕᕆᔨᒃᑯᓐᓄᑦ ᐊᒻᒪᓗ ᓄᑖᒥ ᐱᓕᕆᑎᑦᑎᓪᓗᑕ ᖃᐅᔨᓴᖅᑕᐅᓂᐊᕐᑐᓂᒃ ᑲᑎᕐᓱᐃᓂᐊᕐᑐᒥᓐ,” ᐅᖃᖅᑐᖅ. “ᑭᓯᐊᓂᓕ ᓄᓇᕗᑦ ᖃᓄᐃᓕᐅᖁᔭᐅᔪᓐᓃᓚᐅᕐᓯᒪᖕᒪᑕ ᐊᒻᒪ ᑐᓴᒃᑲᓐᓂᓚᐅᙱᖢᑕ.”
ᓇᓗᓇᕐᒪᓐ ᒫᓐᓇ ᐋᕐᓗᒃᓄᑦ ᑖᒃᑯᐊ ᐊᕐᕖ ᓄᓇᒧᐊᕐᑎᑕᐅᔭᕆᐊᒃᓴᖏᓐᓂ.
ᕘᒍᓴᓐ ᐅᖃᓚᐅᕐᑐᖅ ᑖᒃᑯᐊ ᖃᐅᔨᓴᖅᑕᐅᓂᐊᕐᑐᑦ ᓇᓗᓇᐃᕐᓯᒐᔭᕆᐊᒃᓴᖏᓐᓂᒡᓘᓐᓃᑦ ᓇᓗᓇᕐᓂᕋᖅᖢᓂᐅᒃ.
ᑭᓯᐊᓂᓕ ᒫᔅᓯᒥ, ᕘᒍᓴ ᐃᓚᒋᔭᐅᓚᐅᕐᓯᒪᔪᖅ ᑎᑎᕋᖅᑎᐅᖃᑕᐅᓪᓗᓂ ᖃᐅᔨᓴᕈᑎᓂᒃ ᓴᖅᑭᑕᐅᓂᑯᓂᒃ ᐅᑯᓇᓂ
Proceedings of the National Academy of Sciences ᑕᐃᔭᐅᓪᓗᓂ “ᐋᕐᓗᐃᑦ ᐱᑕᖃᕐᓂᖏᓐᓄᑦ ᐊᕐᕕᖕᓂ ᓯᑯ “Killer whale presence drives bowhead whale selection for sea ice in Arctic seascapes of fear.”
ᑕᕝᕙᓂ ᑎᑎᕋᐅᓯᐅᔪᒥ, ᓇᓗᓇᐃᕐᓯᒍᓐᓇᓚᐅᕐᑐᑦ ᐊᕖ ᐃᑦᓱᐊᖅᑐᖅᕕᒃᒦᑦᑐ ᕿᒫᓚᐅᕐᓯᒪᓂᖏᓐᓂᒃ ᓯᑯᖃᐅᕐᑐᒧᑦ ᐊᒻᒪ ᐃᑲᑦᑐᒧ ᓯᒡᔭᒧ ᑖᒫᓂᓗ ᑖᒃᑯᓄᖓ ᐋᕐᓗᒃᓄᑦ ᐱᔭᐅᓪᓗᑎᒃ, ᐋᕐᓕᕆᔫᓂᕋᖅᑕᐅᓪᓗᑎᒃ.
ᕘᒍᓴᓐ ᐃᓱᒪᓚᐅᕐᑐᖅ ᐊᕐᕖᑦ ᓄᓇᒧᐊᖃᑦᑕᕆᐊᒃᓴᖏᓐᓂ ᕿᒫᓇᓱᒃᖢᑎᒃ. ᑕᕿᓂ ᖃᓂᑦᑐᓂᒃ, ᐋᕐᓗᐃᑦ ᑐᓴᐅᒪᓇᖃᑦᑕᓚᐅᕐᒪᑕ ᐅᒥᐊᓂ ᐱᒋᐊᔭᓐᓂᖏᓐᓂᒃ: ᖃᖓᑦᑎᐊᓵᖑᓚᐅᕐᑐᖅ ᓂᐅ ᔪᐊᒃ ᐴᔅᑦ ᑐᓴᒐᕐᓴᓕᐅᕐᑎᓂ ᐅᓂᒃᑳᖅᑕᖃᓚᐅᕐᑐᖅ ᐃᒪᓐᓇ, ᐅᒥᐊᕐᑐᖅᑎ ᐅᖃᐅᓯᖃᕐᓂᕋᖅᑕᐅᓪᓗᓂ “ᑲᑉᐱᐊᓇᖅᑐᓪᓛᓗᖕᒥ” ᐋᕐᓗᖕᒧᑦ ᐱᒋᐊᖅᑕᐅᓚᐅᕐᓂᖏᓐᓂᒃ ᐳᐊᓱᒎᓪ ᖃᓂᒋᔭᖓᓂ.
(0) Comments