ᓄᓇᕗᒧᑦ ᒪᓕᒐᓕᐅᖅᑎ ᐱᓕᕆᐊᖃᖅᑎᑦᑎᓇᓱᓪᓚᕆᖕᓂᐊᖅᑐᖅ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐊᔪᙱᓐᓂᕐᒧᑦ ᐃᑲᔫᑎᑖᕈᓐᓇᖁᓗᒋᑦ

ᐃᓚᖏ ᒐᕙᒪᑐᖃᒃᑯᓐᓄ ᐃᖅᑲᓇᐃᔭᖅᑐᑦ ᐱᑖᖃᑦᑕᕐᒪᑕ $800ᓂ ᐊᕐᕌᒍᒧ ᖃᐅᔨᒪᓂᖏᓐᓄᑦ ᖃᓪᓗᓈᑐᑦ ᐊᒻᒪ ᐅᐃᕖᑐ

ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᖅ, ᐊᔾᔨᖃᖅᑐᖅ ᑲᑎᒪᕕᔾᔪᕐᕕᒃᒥ ᔫᓂᐅᑎᓪᓗᒍ, ᐅᖃᓚᐅᕐᑐᖅ ᐱᓕᕆᐊᖃᖅᑎᑦᑎᓇᓱᖕᓂᐊᕐᓂᕋᖅᖢᓂ ᒐᕙᒪᑐᖃᒃᑯᓐᓂᒃ ᐅᓇ $800 ᒪᕐᕈᐃᓂ ᐅᖃᐅᓯᖃᕐᓂᕐᒧᑦ ᐃᑲᔫᓯᐊᖅ ᐊᑐᖅᑕᐅᒃᑲᓐᓂᖁᓪᓗᒍ ᐃᖅᑲᓇᐃᔭᖅᑎᓄᑦ ᐅᐃᕖᑐᑦ ᐊᒻᒪ ᖃᓪᓗᓈᑐᑦ ᐅᖃᓪᓚᒃᐸᒃᑐᓄᑦ ᐃᑲᔫᑎᒋᔭᐅᕙᒃᑐ ᐅᑯᓄᖓᓗ ᐱᔭᐅᖃᑦᑕᖁᓪᓗᓂᒋᑦ ᐃᖅᑲᓇᐃᔭᖅᑎᓄᑦ ᓄᓇᖃᖅᑳᖅᑐᑦ ᐅᖃᐅᓯᖓᓂᒃ ᐅᖃᓪᓚᖃᑦᑐᖅᑐᓄᑦᑕᐅᖅ. (ᐊᔾᔨᙳᐊᖅ ᓴᖅᑭᔮᖅᑐᒥ ᐅᕙᙵᑦ ParlVU)

By ᒫᑕᓕᓐ ᕼᐊᐅᕕᑦ

For English version, see Nunavut MP to pressure government to give bilingual bonus to Indigenous language speakers

ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᖅ ᐅᖃᓚᐅᕐᑐᖅ ᐱᓕᕆᐊᖃᖅᑎᑦᑎᓇᓱᖕᓂᐊᕐᓂᕋᖅᖢᓂ ᒐᕙᒪᑐᖃᒃᑯᓐᓂᒃ ᒪᕐᕈᐃᓂ ᐅᖃᐅᓯᖃᕐᓂᕐᒧᑦ ᐃᑲᔫᓯᐊᖅ ᐅᖓᕙᕆᐊᖅᑕᐅᖁᓗᓂᐅᒃ ᒐᕙᒪᑐᖃᒃᑯᑦ ᐃᖅᑲᓇᐃᔭᖅᑎᓄ ᓄᓇᖃᖅᑳᖅᑐᑦ ᐅᖃᐅᓯᖏᓐᓂ ᐊᔪᙱᑦᑐᓄᑦ.

ᐅᓇ ᒪᕐᕈᐃᓂ ᐅᖃᐅᓯᕐᓂ ᐅᖃᕈᓐᓇᕐᓂᕐᒧᑦ ᐃᑲᔫᑎ ᓯᕗᓪᓕᖅᐹᒥᓪᓗ ᓴᖅᑭᑕᐅᓂᑰᓪᓗᓂ 1977ᒥ, ᐃᖅᑲᓇᐃᔭᖅᑎᓂᒃ ᑮᓇᐅᔭᓕᐅᕈᑎᒃᑲᓐᓂᐅᑎᑕᐅᔪᖅ ᐃᖅᑲᓇᐃᔮᓂᒃ ᑲᓇᑕᒥ ᒪᕐᕉᖕᓂ ᐅᖃᐅᓰᖕᓂ ᐊᑐᖅᑕᐅᕙᒃᑐᓂᒃ ᐊᑐᕈᓐᓇᕆᐊᓕᖕᓄᑦ, ᖃᓪᓗᓈᑐᑦ ᐊᒻᒪ ᐅᐃᕖᑐᑦ. ᐅᓇ ᐃᑲᔫᑎᐅᑎᑕᐅᔪᖅ ᐊᑭᑦᑐᕆᐊᓚᐅᕐᓯᒪᙱᑦᑐᖅ ᑕᐃᒪᙵᑦ ᐱᒋᐊᖅᑎᑕᐅᓚᐅᕐᓯᒪᑎᓪᓗᒍ.

ᐅᓇ ᑲᓃᑎᐊᓐ ᐳᕆᐊᔅ (Canadian Press) ᑐᓴᒐᒃᓴᓕᐅᖅᑏᑦ ᐅᓂᒃᑳᓕᐅᓚᐅᕐᒪᑕ ᖃᖓᑦᑎᐊᓵᖅ ᐅᑯᐊ ᑮᓇᐅᔭᓕᕆᔨᒃᑯᑦ ᑲᑎᒪᔨᖏᑦ ᐸᕐᓇᒃᓯᒪᙱᓐᓂᕋᖅᖢᒋᑦ ᐃᑲᔫᑎᒃᓴᖅ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐊᔪᙱᑦᑐᓂ ᐊᑐᓕᖅᑎᑦᑎᓂᐊᕆᐊᒃᓴᒥᒃ, ᓴᖅᑭᑐᖃᕐᓯᒪᒐᓗᐊᖅᖢᓂ ᑐᓴᒐᒃᓴᓂᒃ ᐅᖃᐅᓯᐅᔪᕕᓂᕐᓂᒃ ᐅᕘᓇ ᑲᓇᑕᒥ ᑐᓴᐅᒪᔭᕆᐊᖃᕐᓂᕐᒧᑦ ᐱᔪᓐᓇᐅᑎᑎᒍᑦ. ᐅᓇ ᐅᖃᐅᓯᐅᑲᐃᓐᓇᖅᑐᕕᓂᖅ, ᑎᑎᕋᖅᑕᐅᓯᒪᓪᓗᓂ ᐱᓕᕆᓕᒪᓂᕐᓴᒧᑦ ᑭᒃᑯᓕᒫᓄᑦ ᐱᔨᑦᑎᕋᖅᑎᓂᒃ, ᐅᖃᕐᓯᒪᓚᐅᕐᒪᑦ ᐅᖓᕙᕆᐊᖅᑕᐅᑎᑦᑎᓂᖅ ᐃᑲᔫᑎᓂᒃ ᒪᑯᓂᖓ ᐃᓱᒫᓘᑎᒋᔭᐅᔪᓂᒃ ᓄᓇᖃᖅᑳᖅᑐᑦ ᐃᖅᑲᓇᐃᔭᖅᑎᓄ ᐃᑲᔪᕈᑎᐅᔪᓐᓇᕐᓂᐊᕐᓗᓂ.

“ᐱᓕᕆᑎᑦᑎᓇᓱᒻᒪᕆᖕᓂᐊᖅᑐᓂᒃ,” ᐃᓪᓚᐅᖅ ᐅᖃᓚᐅᖅᑐᖅ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᑕᒪᑐᒧᖓ ᐅᓂᒃᑳᒥ ᐅᖃᐅᓯᖃᖅᖢᓂ.

“ᐅᑯᐊ ᓕᐳᕈᓪ ᒐᕙᒪᒃᑯᑦ ᐅᖃᖃᑦᑕᖅᓯᒪᖕᒪᑕ ᐋᖅᑭᒋᐊᖅᐸᓪᓕᐊᓂᖅ ᐱᒻᒪᕆᐊᓘᓂᕋᖅᖢᓂᔾᔪᒃ. ᐃᑲᔫᑎᐅᔪᓐᓇᖅᑐᓂᒃ ᓄᓇᖃᖅᑳᖅᑐᓂᒃ ᐃᖅᑲᓇᐃᔭᖅᑎᓄᑦ ᐋᖅᑭᒋᐊᕐᓂᖅᒧᑦ ᐃᑲᔪᕈᑎᐅᓇᔭᕐᒥᔪᖅ ᐱᐅᓯᕚᓪᓕᕈᑎᐅᓗᓂ ᐱᔨᑦᑎᕋᐅᑎᓂᒃ ᐃᓄᖕᓄᑦ, ᓄᓇᖃᖅᑳᖅᑐᓄᑦ ᐊᒻᒪᓗ ᐊᓪᓚᖓᔪᓄᑦ ᐅᖃᕈᓐᓇᖅᑐᓂᒃ ᐅᖃᐅᓯᕐᓂ.”

ᐅᑯᑎᒎᓇᕐᓕ ᖃᓂᓛᒃᑯᑦ ᐊᔾᔨᒌᙱᓐᓂᕐᒧᑦ ᐊᒻᒪ ᐃᓚᐅᑎᑦᑎᕙᖕᓂᕐᒧᑦ ᓇᓗᓇᐃᔭᕈᑎᓂᒃ ᑎᑎᕋᐅᓯᐅᓯᒪᔪᓂᒃ ᑲᓇᑕᒥ ᒐᕙᒪᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ, 11,977 ᒐᕙᒪᑐᖃᒃᑯᓐᓄᑦ ᐃᖅᑲᓇᐃᔭᖅᑎᐅᔪᑦ ᓇᓗᓇᐃᓚᐅᕐᓯᒪᔪᑦ ᓄᓇᖃᖅᑳᖅᓯᒪᓂᖏᓐᓂᒃ ᐊᒻᒪᓗ ᑖᒃᑯᓇᙵᑦ 357 ᓇᓗᓇᐃᖅᖢᑎᒃ ᐃᓅᓂᖏᓐᓂᒃ.

ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑎᑎᕋᖅᑕᐅᓯᒪᔪᓂᒃ ᖃᕋᓴᐅᔭᒃᑯᑦ, ᐅᖃᖅᑎᒋᔭᐅᔪᖅ ᒫᑎᓐ ᐹᑦᕚᓐ ᐅᖃᓚᐅᕐᑐᖅ ᑮᓇᐅᔭᓕᕆᔨᒃᑯᑦ ᑲᑎᒪᔨᖏᑦ ᑲᓇᑕᒥ ᐱᓕᕆᕝᕕᐊᓂᒃ ᑲᑎᕐᓱᐃᕙᙱᓐᓂᕋᖅᖢᓂᒋᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐅᖃᓪᓚᒃᐸᒃᑐᓂᒃ ᒐᕙᒪᑐᖃᒃᑯᑦ ᐃᖅᑲᓇᐃᔭᖅᑎᖏᓐᓂᒃ. ᐃᓪᓚᐅᖅ ᐅᖃᓚᐅᕐᑐᖅ ᐅᖃᐅᔾᔭᐅᓚᐅᕐᓂᕋᖅᖢᓂ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐅᖃᕈᓐᓇᖅᑐ ᒐᕙᒪᑐᖃᒃᑯᑦ ᐱᔨᑦᑎᕋᐅᑎᖏᓐᓂᒃ ᒫᓂ 460-ᖏᓐᓃᑦᑐᑦ.

“ᐅᑯᐊ ᐅᓄᙱᑦᑐᕈᓗᐃᑦ ᑕᐅᑐᒃᖢᒋᑦ ᒐᕙᒪᑐᖃᒃᑯᓐᓄᑦ ᐱᔨᑦᑎᕋᐅᑎᓄᑦ ᐃᖅᑲᓇᐃᔭᖅᑎᓕᒫᑦ,” ᐅᖃᕐᑐᖅ. “ᖃᓄᐃᒻᒪᓪᓕᑭᐊᖅ ᑕᒪᓐᓇ ᑕᐅᑐᒃᑕᐅᙱᓚᖅ ᖁᕝᕙᕆᐊᖅᑎᑦᑎᔾᔪᑎᐅᔪᓐᓇᕐᓗᓂ, ᓴᐳᔾᔨᓯᒪᔾᔪᑎᐅᓗᓂ ᐊᒻᒪᓗ ᓴᖅᑭᒋᐊᖅᑎᑦᑎᒃᑲᓐᓂᕈᑎᐅᓗᓂ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ.”

ᐃᓪᓚᐅᖅ ᐅᖃᓚᐅᕐᑐᖅ ᑖᔅᓱᒥᖓ ᐃᑲᔫᑎᐅᕙᒃᑐᒥ ᐱᑕᖃᕈᓐᓃᖅᑎᑦᑎᔪᒪᙱᓐᓂᕋᖅᖢᓂ ᐊᓯᖏᑦ ᑕᐃᒪᐃᖁᔨᒐᓗᐊᖅᑎᓪᓗᒋᑦ, ᐅᖃᐅᓯᖃᖅᖢᑎᒃ ᐃᓅᓇᓱᖕᓂᖅ ᐊᑭᑦᑐᓗᐊᕐᓂᖓᓄᑦ ᐊᒻᒪᓗ ᑭᓱᓕᒫᑦ ᐊᑭᑦᑐᕆᐊᖅᐸᓪᓕᐊᓂᖏᓐᓄᑦ.

“ᐅᓄᕈᓘᔭᖅᑐᓂᒃ ᖃᓄᐃᓕᐅᕈᓘᔭᕈᑎᖃᕆᐊᖃᖅᖢᑎ? ᑕᒪᓐᓇ ᑕᐃᒪᓐᓇ ᐋᖅᑭᒍᑎᐅᔾᔮᖅᑰᔨᒋᙱᓐᓇᒃᑯ,” ᐅᖃᕐᑐᖅ.

“ᑕᑯᔪᒪᒐᓗᐊᕋᒪᓕ ᐊᔾᔨᐅᙱᑎᑦᑎᓂᖅ ᐅᑯᓂᖓ ᐃᓄᖕᓂ, ᐊᓪᓚᓂ ᓄᓇᖃᖅᑳᖅᑐᓂᒃ ᐊᒻᒪ ᐊᓪᓚᖓᔪᓂᒃ ᐅᖃᕈᓐᓇᖅᑐᓂᒃ ᐅᖃᐅᓯᖏᓐᓂᒃ … ᐃᑲᔫᑎᖃᕆᐊᖃᕆᔭᐅᙱᑦᑐᑦ ᓲᖃᐃᓐ, ᐅᖃᓚᒍᓐᓇᙱᒻᒪᑕ ᐊᓯᒃᑲᓐᓂᐊᓂᒃ ᐅᖃᐅᓯᕐᒥ ᑕᒪᒃᑯᓄᖓ ᑎᑭᕋᖅᐸᓪᓕᐊᓂᑯᑦ ᐅᖃᐅᓯᖏᓐᓂᒃ, ᑕᐃᒪᓕ ᑕᒪᓐᓇ ᐊᔾᔨᐅᙱᑎᑦᑎᓂᖅ ᓄᖅᑲᕆᐊᖅᓕᖅᑐᖅ.”

Share This Story

(0) Comments

Join the Conversation

Your email address will not be published. Required fields are marked *

*