ᐅᐱᕐᖔᖑᓚᐅᕐᑐᖅ ᐊᕐᕌᓂ, ᓄᓇᕗᑦ ᐅᖃᓪᓚᒃᑎᖓ ᔫ ᐃᓄᒃ ᓇᖏᖅᑐᖅ ᐃᓯᕆᐊᕐᕕᒃᒥ ᓄᓇᕗᑦ ᒪᓕᒐᓕᕆᕕᒡᔪᐊᖓᓂᒃ ᐊᑐᖅᖢᓂ ᐃᓚᒋᐊᕐᓯᒪᔪᓂ ᐊᓐᓄᕌᕆᔭᖓᓄᑦ: ᕿᓯ ᖁᖓᓯᕈᑎ ᐊᒻᒪ ᑐᒃᑑ ᓇᒡᔪᖏᓐᓂᒃ ᓯᐊᕉᑎᖃᖅᖢᓂ. ᐃᓄᒃ, 61, ᐃᓅᔪᓐᓃᓚᐅᕐᑐᖅ ᑕᓪᓕᕐᒥᖅ, ᒫᑦᓯ 29-ᒥ, ᐋᑐᕚᒥ ᐋᓐᓂᐊᕕᖕᒥ. (ᐊᔾᔨᓕᐅᕆᔨ ᔭᐃᓐ ᔪᐊᔾ)

ᓄᓇᕗᒻᒥᐅᑦ ᐃᓱᒪᒋᔭᖃᕐᐳᑦ ᔫ ᐃᓄᒃᒥ, ᓄᓇᕗᒥᑦ ᒪᓕᒐᓕᐅᕐᑎ, ᒪᓕᒐᓕᕆᕕᒡᔪᐊᒥ ᐅᖃᓪᓚᒃᑎ

“ᑕᖃᐃᕐᓯᑦᑎᐊᕆ, ᐱᖃᓐᓇᕆᔮᒃ. ᑭᖑᓂᖃᕆᔭᐅᓂᐊᖅᑐᑎᑦ ᐅᕙᑦᑎᓐᓄᓕᒫᖅ”

By ᔭᐃᓐ ᔪᐊᔾ

ᐊᐅᓚᖁᑏᑦ ᓇᐸᕈᑕᖏᑦᑕ ᓇᑉᐸᖓᓃᑎᑕᐅᔪᑦ ᓄᓇᕗᑦ ᒪᓕᒐᓕᐅᕐᕕᒡᔪᐊᑉ ᓯᓚᑎᑦᑎᐊᖓᓂ ᐃᖃᓗᖕᓂᑦ ᐃᓱᒪᒋᓪᓗᒍ ᐃᓅᔪᓐᓃᕐᑐᕕᓂᖅ ᔫ ᐃᓄᒃ, ᒪᓕᒐᓕᐅᕐᑎ ᑐᓄᓂᖅᒧᑦ ᐊᒻᒪᓗ ᐅᖃᓪᓚᒃᑎᐅᓪᓗᓂ ᓄᓇᕗᑦ ᒪᓕᒐᓕᕆᓄᑦ.

ᐋᓐᓂᐊᓕᓵᖅᑎᓪᓗᒍ ᐃᓄᒃ, 61, ᐃᓅᔪᓐᓃᓚᐅᕐᑐᖅ ᑕᓪᓕᕐᒥᖅ, ᒫᑦᓯ 29-ᒥ, ᐋᑐᕙᒥᑦ ᐋᓐᓂᐊᕕᒃᒥᑦ.

ᓴᓂᕋᑦᑎᐊᖓᓂ ᒪᓕᒐᓕᕆᕕᒡᔪᐊᑉ ᐊᓯᒃᑲᓐᓂᖓ ᐊᐅᓚᖁᑎ ᐊᒻᒪ ᓇᑉᐸᕈᕐᓯᒪᓪᓗᓂ, ᑖᓐᓇᓕ ᒥᑦᑎᒪᑕᓕᒃ ᕼᐋᒻᒪᓚᒃᑯᑦ ᓇᓗᓇᐃᒃᑯᑎᖓ, ᓄᓇᓕᒃ ᐃᓅᑉ ᑭᒡᒐᖅᑐᓚᐅᕐᑕᖏ ᒪᓕᒐᓕᐅᕐᑎᐅᑎᓪᓗᒍ 2011-ᒥ ᓂᕈᐊᒃᑲᓐᓂᕐᓂᕐᒥᒃ.

ᐃᓄᒃ ᐅᖃᓪᓚᒃᑎᙳᖅᑎᑕᐅᓚᐅᕐᓯᒪᔪᖅ ᓄᕕᐱᕆ 17, 2017-ᒥᑦ, ᒪᑐᐃᙱᓱᖓᖅᑎᓪᓗᒍ ᓄᓇᕗᒥᑦ ᑕᓪᓕᒪᒋᓕᖅᑕᖏᑦ ᑲᑎᒪᔨᕐᔪᐊᑦ ᑲᑎᒪᓂᒃᓴᖓᑕ.

ᑕᐃᒪᙵᓪᓕ, ᐃᓄᒃ ᑕᑯᓕᒪᓇᕐᓯᓚᐅᕐᑐᖅ ᐊᒥᓱᓄᑦ ᓄᓇᕗᒥᐅᓄᑦ ᐅᖓᑖᓄᓪᓗ ᑕᐅᑐᖃᑦᑕᖅᓯᒪᔪᓂᒃ ᒪᓕᒐᓕᕆᕕᒡᔪᐊᖅ ᓴᕿᔮᖅᑎᑕᐅᑲᑕᒃᖢᓂ ᖃᕋᓴᐅᔭᒃᑯᑦ ᐊᒻᒪ ᑕᓚᕖᓴᓐᑯᑦ.

ᐅᖃᓪᓚᒃᑎᐅᓪᓗᓂ, ᒪᓕᒐᓕᕆᕝᕕᒃᒥ ᓈᒻᒪᙱᓕᐅᕈᓘᔭᕐᓇᖅᑎᓪᓗᒍ, ᐃᓄᒃ ᐱᒻᒪᕆᐅᖏᓐᓇᓚᐅᕐᐳᖅ, ᑲᑎᒪᔨᓂᒡᓗ ᐋᕿᒃᓯᒪᑎᑦᑎᓯᒪᓪᓗᓂ.

ᖃᐅᔨᓴᓚᐅᕐᓯᒪᔭᖓ ᒪᓕᒐᓕᐅᕐᑎ ᒥᓂᔅᑕᒧᑦ ᓈᒻᒪᙱᓕᐅᕈᑎᐅᔪᖅ ᐊᒻᒪᓗ ᓯᕗᓕᐅᕐᑎᒥᑦ ᓈᒻᒪᙱᓕᐅᕈᑎᖃᕐᓂᕐᒧᑦ ᐱᒋᐊᕈᑎᒥᑦ, ᐊᒻᒪᓗ ᓂᕈᐊᖅᑎᓪᓗᒋᑦ ᓄᑖᒥᑦ ᓯᕗᓕᐅᕐᑎᒃᓴᒥᑦ ᐊᒻᒪ ᒥᓂᔅᑕᐅᓂᐊᖅᑐᓂᒃ ᔫᓂᐅᓚᐅᕐᓯᒪᔪᒥᑦ.

ᐊᒥᓱᑦ ᓄᓇᕗᒥᑦ ᖁᙱᐊᖅᑎᓪᓗᒋᑦ, ᐃᓄᒃ, ᐅᖃᓪᓚᒃᑎᐅᓂᕐᒥᒍᑦ, ᑐᙵᓱᒃᑎᑦᑎᓚᐅᕐᓯᒪᔪᖅ ᑭᒃᑯᓕᒫᓂᒃ ᐃᓄᒃᑎᑐᑦ ᐃᒪᓐᓇ “ᑐᙵᓱᒋᑦᑎ ᒪᓕᒐᓕᕆᔨᔅᓯᓐᓄᑦ.”

ᐊᐅᓚᖁᑎᖓᑦ ᒥᑦᑎᒪᑕᓕᒃ ᕼᐋᒻᒪᓚᑯᑦ ᓄᓇᕗᑦ ᒪᓕᒐᓕᕆᕕᒡᔪᐊᑉ ᓯᓚᑖᓃᑦᑐᖅ ᓇᐸᕈᑎᖓᑕ ᓇᑉᐸᖓᓃᑎᑕᐅᕗᖅ ᐃᓅᔪᓐᓃᓚᐅᕐᑎᓪᓗᒍ ᓄᓇᓕᖕᓄᑦ ᒪᓕᒐᓕᐅᕐᑎ ᔫ ᐃᓄᒃ.

ᐊᐱᕆᔭᐅᒐᒥ 2018 ᐅᐱᕐᖔᖓᓂ ᐅᐃᒪᓕᓚᐅᙲᓐᓇᕐᓂᖓᓂᒃ, ᐃᓄᒃ ᐅᖃᓚᐅᕐᑐᖅ ᐊᒥᓱᓂᒃ ᑲᑎᒪᔨᐅᖃᑕᐅᓯᒪᓂᕋᖅᖢᓂ ᐊᒥᓱᓄᑦ ᑲᑐᔾᔨᖃᑎᒌᓄᑦ ᑕᒪᓐᓇᓗ ᖃᐅᔨᒪᓕᕈᑎᒋᓂᕋᖅᖢᓂᐅ ᖃᓄᖅ ᐅᖃᖅᑎ ᖃᓄᐃᓕᖓᔭᕆᐊᖃᕐᓂᖓᓂ.

ᓯᕗᓂᐊᓂ ᐃᓄᒃ ᓯᕗᓕᖅᐹᒥᑦ ᓂᕈᐊᖅᑕᐅᓚᐅᙱᓐᓂᖓᓂ ᒪᓕᒐᓕᕆᕕᒡᔪᐊᒧᑦ 2011-ᒥ, ᓄᓇᓯ ᑯᐊᐳᕇᓴᓐᑯᓐᓄᑦ ᐊᖓᔪᖅᑳᖓᓄᑦ ᑐᒡᓕᕆᔭᐅᓚᐅᕐᑐᖅ ᓄᓇᕗᒥᑦ ᐊᐅᓚᑕᐅᔪᓄᑦ 2000-ᒥ 2011-ᒧ.

ᐃᓄᒃ ᓯᕗᓂᐊᓂ ᐃᖅᑲᓇᐃᔭᓚᐅᕐᓯᒪᔪᖅ ᐊᐅᓚᑦᑎᔨᒧ ᐃᑲᔪᖅᑎᐅᓪᓗᓂ ᐊᖓᔪᖅᑳᒧᑦ ᓄᓇᕗᑦ ᑐᙵᕕᒃᑯᓐᓂᑦ 1994-ᒥ 2000-ᒧ.

ᐃᒃᓯᕙᐅᑕᐅᓚᐅᕐᓯᒪᒋᓪᓗᓂ ᕿᑭᖅᑖᓗᒃᒥᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐊᒻᒪᓗ ᑲᑎᒪᔨᐅᖃᑕᐅᓪᓗᓂ ᒥᑦᑎᒪᑕᓕᒃᒥ ᐃᓕᓐᓂᐊᖅᑐᓕᕆᔨᓄᑦ ᑲᑎᒪᔨᓄᑦ.

ᐃᓄᒃ ᓂᕈᐊᖅᑕᐅᒃᑲᓐᓂᓚᐅᕐᓯᒪᔪᖅ ᑭᒡᒐᖅᑐᐃᓂᐊᕐᓗᓂ ᑐᓄᓂᖅ ᐱᖓᔪᒋᔭᖓᓂ ᒐᕙᒪᒃᑯᓐᓂ ᓂᕈᐊᖅᓇᒥ ᐅᒃᑑᐱᕆ 30, 2017-ᒥ.

ᓯᕗᓂᐊᓂ ᒪᓕᒐᓕᕆᔨᕐᔪᐊᖑᓚᐅᕐᑐᓂ, ᐱᓕᕆᐊᖃᓚᐅᕐᑐᖅ ᐅᖃᖅᑎᒧᑦ ᑐᒡᓕᕆᔭᐅᓪᓗᓂ ᐊᒻᒪ ᐃᒃᓯᕙᐅᑕᐅᓪᓗᓂ ᑲᑎᒪᔨᓄᑦ ᑕᒪᐃᓐᓄᑦ.

2014 ᐃᓚᖓᒍᑦ, ᐃᓄᒃ ᒪᕐᕈᐃᓂ ᑭᒡᒐᖅᑐᐃᕝᕕᖃᓕᓚᐅᕐᑐᖅ ᐊᓂᑕᐅᑎᓪᓗᒍ ᐅᖅᑯᒻᒥᐅᑦ ᒪᓕᒐᓕᐅᖅᑎᖓ ᓵᒥᐅᓪ ᓄᕿᖓᖅ.

ᒪᓕᒐᓕᐅᕐᑎᐅᓪᓗᓂ, ᐃᓄᒃ ᓂᐱᖃᖃᑦᑕᓚᐅᕐᑐᖅ, ᐃᓱᒪᒋᔭᒃᓴᓂᒃ ᓴᖅᑭᑦᑎᕙᒃᖢᓂ ᑲᒪᒋᔭᖓᑕ ᐅᖓᑖᒍ, ᒪᑯᑎᑐᓇᖅ ᐃᒡᓗᖃᒃᑲᓐᓂᕆᐊᖃᕐᓂᖅ ᐊᒻᒪ ᐱᓕᕆᕝᕕᒃᓴᑎᐊᕙᒃᑲᓐᓂᕐᓂᒃ.

2015-ᒥ, ᑯᕕᖅᑕᐅᑎᓂᒃ ᓄᓇᓯᐅᑎᓂᒃ ᐊᒥᒐᕐᓯᓕᓚᐅᕐᓯᒪᖕᒪᑕ ᒥᑦᑎᒪᑕᓕᖕᒥ, ᕼᐋᒻᒪᓚᒃᑯᑦ ᐱᓕᕆᔨᒻᒪᕆᖏᑦ ᑐᐊᕕᕐᓇᖅᑐᓕᕆᓕᓚᐅᕐᓯᒪᔪᑦ ᐊᑕᐅᓯᑐᐊᙳᕐᒪᑦ ᑯᕕᖅᑕᐅᑎ ᐱᔨᑦᑎᕋᐅᑎᕋᕈᑎᐅᔪᖅ 1,500-ᖏᓐᓃᑦᑐᓂᒃ ᐃᓄᖕᓂ.

ᐃᓚᖏᑦ ᑕᑕᒍᒡᔨᑲᑕᓕᖅᖢᑎᒃ, ᐊᒻᒪᓗ ᐃᓚᖏ ᐃᒪᖏ ᑯᕕᔪᓐᓇᐃᓪᓕᓗᑎᒃ, ᓲᖃᐃᒻᒪ ᑯᕕᖅᑕᕕᒃ ᖃᑦᑕᐅᔭᕐᔪᐊᖅ ᑕᑕᒃᑯᓂ ᐃᒪᖃᐅᑎᒋᔭᐅᔪᖅ ᖃᒥᖃᑦᑕᕐᒪᑕ.

ᐅᖃᓪᓚᒃᖢᓂ ᒪᓕᒐᓕᕆᕕᒡᔪᐊᕐᒥᑦ, ᐃᓄᒃ ᐅᖃᓚᐅᕐᑐᖅ ᓄᑕᐅᔪᓐᓃᖅᑐᑦ ᐱᖁᑎᑦ ᐱᓕᕆᕝᕖᓪᓗ ᒥᑦᑎᒪᑕᓕᖕᒥ—ᐊᒻᒪᓗ ᐊᓯᖏᓐᓂᒃ ᓄᓇᕗᒥᑦ ᓄᓇᓕᖕᓂᑦ—ᓈᒻᒪᙱᓕᐅᕈᑎᐅᓕᒻᒪᕆᖕᓂᐊᕆᐊᒃᓴᖏᓐᓂᒃ ᓯᕗᓂᑦᑎᓐᓂ.

“ᐱᓇᓱᖁᔨᒻᒪᕆᒃᐳᖓ ᒐᕙᒪᒃᑯᓐᓂ … ᐱᓕᕆᖃᑎᖃᕐᓗᑎᒃ ᓄᓇᓕᖕᓂ ᐊᑯᓂᐊᓗᒃ ᐊᑐᕐᓂᐊᕐᑐᓂᒃ ᐸᕐᓇᐅᓯᐅᕐᓗᑎᒃ ᓄᓇᓕᑦᑕ ᐱᖁᑎᖏ ᓄᑖᖑᓕᕐᓗᑎᒃ, ᑕᐃᒪᓐᓇ ᐊᑐᖁᓇᒋᑦ ᐊᓯᖏᑦ ᓄᓇᓖᑦ ᓄᓇᕗᒥᑦ,” ᐃᓄᒃ ᐅᖃᖅᑐᖅ.

ᓈᑦᑏᖑᔭᓛᕐᓂᐊᒥ, ᐃᓄᒃ ᐃᓅᔪᓐᓃᖅᑐᖅ ᑐᓴᖅᑕᐅᓯᒪᓕᖅᑎᓪᓗᒍ ᐅᓐᓅᓚᐅᕐᑐᒥᒃ, ᐊᒥᓱᑦ, ᐃᓚᖃᖅᖢᑎᒃ ᐃᖃᓗᐃᑦ ᒪᐃᔭᖓᓂ ᒪᑎᓚᐃᓐ ᕆᐊᑦᕗᓐ ᐊᒻᒪ ᐅᑭᐅᖅᑕᕐᑐᕐᒧᑦ ᒥᓂᔅᑕ ᑖᒥᓂᒃ ᓚᐸᓛᖕᒃ, ᐃᓚᖏᓐᓂ ᐃᓱᒪᒋᔭᖃᑦᑎᐊᕐᓂᕋᓚᐅᕐᑐᑦ ᑐᓴᐅᒪᔾᔪᑎᓕᕆᓂᒃᑯ.

ᓯᕗᓕᐅᕐᑎ ᔫ ᓴᕕᑲᑖᖅ ᐅᖃᓚᐅᕐᑐᖅ ᐃᒪᓐᓇ “ᖁᕕᐊᓱᒻᒪᕆᒃᐳᖓ ᔫ ᐱᓕᕆᖃᑎᒋᔪᓐᓇᓚᐅᕋᒃᑯ ᐊᕐᕌᒍᒐᓴᐅᓕᖅᑐᓂᒃ. ᐊᒻᒪᓗ ᐱᓇᓱᒻᒪᕆᓚᐅᕐᓂᕋᖅᖢᓂᐅᒃ ᓄᓇᕗᒧᑦ. “ᑕᖃᐃᕐᓯᑦᑎᐊᕆ, ᐱᖃᓐᓇᕆᔮᒃ. ᑭᖑᓂᖃᕆᔭᐅᓂᐊᖅᑐᑎᑦ ᐅᕙᑦᑎᓐᓄᓕᒫᖅ”.

ᐅᖃᖅᑎᐅᑉ ᑐᒡᓕᖓ ᓯᒥᐅᓐ ᒥᑭᙳᐊᒃ ᐅᖃᓚᐅᕐᒥᔪᖅ ᐃᒪᓐᓇ, ᐅᖃᖅᖢᓂ “ᐅᖃᖅᑎ ᐃᓄᒃ ᐱᔨᑦᑎᕋᑦᑎᐊᓚᐅᕐᑐᖅ ᑭᒡᒐᖅᑐᖅᑕᖏᓐᓂᒃ, ᐊᒻᒪᓗ ᐱᓕᕆᓂᖓᒍᑦ ᑭᒡᒐᖅᑐᐃᑦᑎᐊᖅᖢᓂ.

“ᐃᓱᒪᒋᕙᕗᑦ ᔫ ᐃᓚᖏᑦ ᐊᒻᒪ ᒥᑦᑎᒪᑕᓕᒃᒥᐅᑕᑦ.”

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓ ᐱᔭᐃ ᐊᕿᐊᕈᒃ ᑎᑎᕋᓚᐅᕆᕗᖅ ᓇᒡᓕᒍᓱᖕᓂᕋᖅᖢᓂ ᐃᓄᒃ ᐃᓚᖏᓐᓄᑦ, ᐅᖃᖅᖢᓂ “ᔫ ᓴᐳᔾᔨᓯᒪᓇᓱᒃᑳᓘᓚᐅᕐᑐᖅ ᑭᒡᒐᖅᑐᖅᑕᖏᓐᓂ ᐱᓇᓱᐊᕈᒪᔭᖏᓐᓂᒡᓗ, ᐱᓕᕇᓐᓇᖅᖢᓂ ᖃᓄᐃᓕᐅᕈᑎᒃᓴᐅᓇᔭᖅᑐᓂᒃ ᐊᑐᖅᑕᐅᖏᓐᓇᕈᓐᓇᖅᑐᓂᒃ ᐃᖅᑲᓇᐃᔮᒃᓴᒃᑯ ᒥᑦᑎᒪᑕᓕᒃᒥᐅᓄᑦ. ᐃᓅᔪᓐᓃᕐᓂᖓ ᓄᓇᕗᒻᒥᐅᓂ ᐊᓯᐅᔨᒍᑎᐅᕗᖅ, ᐱᓗᐊᖅᑐᒥᒃ ᒥᑦᑎᒪᑕᓕᒃᒥᐅᓂᒃ.

ᐊᖓᔪᖅᑳ ᐃᓄᐃᑦ ᐅᑭᐅᕐᑕᖅᑐᕐᒥᑦ ᑲᑎᒪᔨᕐᔪᐊᑦ-ᑲᓇᑕᒧᑦ, ᒫᓂᑲ ᐃᐅᓪ-ᑲᓇᔪᒃ, ᐱᓕᕆᖃᑎᖃᓚᐅᕐᒥᔪᖅ ᒪᓕᒐᓕᕆᕕᒡᔪᐊᕐᒥᑦ ᐃᓄᒃᒥᑦ ᐅᖃᓚᐅᕐᒥᔪᖅ “ᔫ ᒪᓕᒐᓕᕆᕕᒡᔪᐊᒥ ᐃᖢᐊᕐᑐᒥ ᐃᒃᐱᒍᓱᓂᖃᖅᑎᑦᑎᓚᐅᕐᑐᖅ.

“ᐅᐱᓐᓇᓚᐅᕐᑐᖅ ᐃᖅᑲᓇᐃᔭᖃᑎᒋᓪᓗᒍ ᐊᕐᕌᒍᒐᓴᒻᒪᕆᖕᓂ. ᐃᓄᒃᑐᑦ ᐅᖃᐅᓯᕐᒥᑦ ᐱᒻᒪᕆᒋᔭᖃᓚᐅᕐᑐᖅ  ᓇᓗᓇᙱᖢᓂ ᐃᓄᒃᑎᑐᑦ ᐅᖃᓪᓚᖃᑦᑕᓚᐅᕐᒪᑦ ᒪᓕᒐᓕᕆᕕᒡᔪᐊᒥᑦ.”

ᐃᓄᒃ ᑭᖑᓪᓕᖅᐹᒥ ᐅᖃᓪᓚᒃᖢᓂ ᒫᑦᓯ 12-ᒥ, ᑲᑎᒪᕕᒃᒦᑯᑖᓚᐅᖅᖢᑎᒃ ᐅᐱᕐᖔᒧᑦ, ᖁᔭᓕᓪᓗᓂ ᑕᒪᐃᓐᓂ ᐱᓕᕆᖃᑕᐅᔪᓂᒃ ᑲᑎᒪᓂᕐᒥ, ᒪᓕᒐᓕᕆᕕᒡᔪᐊᒥᑦ ᐃᖅᑲᓇᐃᔭᖅᑎᓂᒃ ᑐᓵᔨᓂᒡᓗ ᐊᒻᒪ ᐱᓕᕆᔨᐅᕙᒃᑐᓂ ᑲᑎᒪᔨᓄ.

“ᐸᕐᓇᓕᖅᑎᓪᓗᑕ ᐊᖏᕐᕋᑦᑎᓐᓄ ᓄᓇᑦᑎᓂ, ᑕᒪᒃᑕ ᐃᖏᕐᕋᑦᑎᐊᓂᐊᖅᐳᒍ ᐊᒻᒪᓗ ᖁᔭᓐᓇᒦᒻᒪᕆᐊᓗᒃ ᐊᐃᑉᐸᕗᑦ, ᐃᑲᔪᖅᑐᐃᖃᑦᑕᐃᓐᓇᕐᒪᑕ ᐅᕙᑦᑎᓐᓂ,” ᐅᖃᓚᐅᕐᑐᖅ.

“ᐃᓚᑦᑎᓐᓄ ᐊᑯᓂᐊᓗᒃ ᑕᑯᓯᒪᙱᑕᑦᑎᓐᓄ, ᕿᑐᕐᖓᕗᑦ ᐊᒻᒪ ᐃᕐᖑᑕᕗᑦ, ᐊᒻᒪᓗ ᓄᓇᖃᑦᑎᕗᑦ, ᖁᔭᓐᓇᒦᒃ ᐃᑲᔪᖅᑐᐃᖃᑦᑕᐃᓐᓇᕋᔅᓯ. ᖃᐅᔨᒪᒋᑦᑎ ᐱᓕᕆᓇᓱᒻᒪᕆᖃᑦᑕᖅᑐᒍᑦ ᐃᓕᔅᓯᓐᓂ ᑭᒡᒐᖅᑐᐃᓪᓗᑕ.

Share This Story

(0) Comments