ᓄᓇᕗᒻᒥ ᒐᕙᒪᒃᑯᑦ ‘ᐊᒃᓱᕈᖅᐳᑦ ᖃᒥᑎᑦᑎᓂᕐᒥ ᐃᑭᑦᑐᒥ ᐅᓇᐅᑎᓪᓗᒍ ᓱᕈᓯᕐᓂ ᓴᐳᔾᔨᓯᒪᓂᕐᒥ: ᒪᓕᒐᓕᐅᖅᑎ
ᐃᓄᓕᕆᔨᒃᑯᑦ ᐅᖃᐅᓯᖃᖅᐳᖅ ᑲᔪᓰᓐᓇᖅᑐᒥ ᐱᓕᕆᓂᐅᔪᒥ ᐱᐅᓯᒋᐊᖅᑎᑦᑎᓂᕐᒥ ᑎᒍᐊᙳᐊᖃᕐᓂᐅᔪᒥ ᐱᓕᕆᔾᔪᓯᐅᔪᒥ ᑎᑭᐅᑎᕙᓪᓕᐊᑎᓪᓗᒋᑦ ᐊᑯᓂᐅᔪᒥ ᐱᓇᓱᐊᕈᑎᒃᓴᓕᕆᓂᕐᒧᑦ ᐸᕐᓇᐅᑎᒥᒃ
ᐃᓄᓕᕆᔨᒃᑯᑦ ᓵᙵᕗᑦ ᐊᔪᕐᓇᖅᑐᓂ ᐊᐱᖅᑯᑕᐅᔪᓂ ᒪᓕᒐᓕᐅᖅᑎᓂ ᓯᑎᐱᕆ 19 ᐊᒻᒪ 20−ᒥ ᑐᓵᑎᑦᑎᓂᐅᔪᒥ ᓄᑖᙳᕆᐊᖅᑎᑦᑎᓂᕐᒥ ᑲᑎᒪᔨᕋᓛᖑᐃᓐᓇᖅᑐᓄᑦ ᑲᒪᒋᔭᖃᕐᓂᕐᒥ ᒐᕙᒪᐅᔪᓂ ᐊᐅᓚᑕᐅᓂᐅᔪᓂ ᐊᒻᒪ ᐃᓄᓕᒫᓄᑦ ᐱᓕᕆᐊᖑᔪᓂ ᐊᒃᓱᕈᕈᑕᐅᔪᓂ ᐱᐅᓯᒋᐊᖅᑎᑦᑎᓂᕐᒥ ᐱᐅᓂᖓᓂ ᐸᖅᑭᔭᐅᓂᖏᓐᓂ ᑐᓂᔭᐅᕙᒃᑐᓂ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᓴᐳᔾᔭᐅᓯᒪᔪᓂ ᐱᔨᑦᑎᕋᕐᓂᕐᒦᑦᑐᓄᑦ. (ᔨᐊᕝ ᐱᓚᑦᑎᐊᐃᒧᑦ ᐊᔾᔨᓕᐅᖅᑕᐅᔪᖅ)
For English version, see GN ‘struggling to put out a fire’ when it comes to child protection: MLA
ᓄᓇᕘᑉ ᐃᓄᓕᕆᔨᒃᑯᖏᑦ ᐅᖃᐅᓯᒃᓴᓕᐅᓚᐅᖅᐳᑦ ᓯᑎᐱᕆ 20−ᒥ ᐱᖓᔪᖓᓐᓂ ᐱᓇᓱᐊᕐᓂᖏᓐᓂ ᐱᐅᓂᖅᓴᐅᔪᒥ ᓴᐳᔾᔨᓯᒪᓂᕐᒥ ᒪᒃᑯᒃᑐᓂ ᐱᓕᕆᕝᕕᐅᑉ ᐸᖅᑭᔭᖏᓐᓂ — ᐱᓇᓱᐊᕈᑎᒃᓴᓕᕆᓂᕐᒧᑦ ᐸᕐᓇᐅᑎᒥᒃ.
ᓄᑖᙳᕆᐊᖅᑎᑕᐅᓂᐅᔪᒥ ᑎᑭᑉᐳᖅ ᑕᖅᑭᓂ ᑎᓴᒪᓂ ᓱᖂᕐᓂᐅᔪᒥ ᐅᓂᒃᑳᓕᐊᖑᔪᒥ ᑲᓇᑕᐅᑉ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᐱᔾᔪᑎᖃᖅᑐᒥ ᓱᕈᓯᕐᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ ᓄᓇᕗᒻᒥ — ᐱᖓᔪᖓᓐᓂ ᑕᐃᒪᐃᑦᑐᒥᒃ ᐅᓂᒃᑳᓕᐊᖑᔪᒥᒃ ᑕᐃᒪᙵᓂ 2011−ᒥ ᐊᒻᒪ 2014−ᒥ — ᐃᓱᓕᑦᑎᓚᐅᖅᑐᒥ ᓄᓇᕗᒻᒥ ᒐᕙᒪᒃᑯᑦ ᓴᐳᔾᔨᑦᑎᐊᙱᓐᓂᖏᓐᓂ ᐊᒃᑐᖅᑕᐅᓴᕋᐃᑦᑐᓂ ᓱᕈᓯᕐᓂ.
ᒪᓕᒐᓕᐅᖅᑏᑦ ᐱᕕᒃᓴᖃᓚᐅᖅᐳᑦ ᓯᑎᐱᕆ 19 ᐊᒻᒪ 20−ᒥ ᐊᐱᖅᓱᕈᓐᓇᕐᓂᕐᒥ ᐊᒻᒪ ᐱᓗᑎᒃ ᓄᑖᙳᕆᐊᖅᑎᑕᐅᓂᐅᔪᒥ ᑭᓱᓂᒃ ᐱᓕᕆᕝᕕᒃ ᐱᓕᕆᓯᒪᓂᖏᓐᓂ ᑭᐅᓂᕐᒧᑦ ᐅᓂᒃᑳᓕᐊᖑᔫᑉ ᓇᓂᔭᖏᓐᓂ, ᑐᓵᑎᑦᑎᓂᐅᔪᒥ ᑲᑎᒪᔨᕋᓛᖑᐃᓐᓇᖅᑐᓄᑦ ᑲᒪᒋᔭᖃᕐᓂᕐᒥ ᒐᕙᒪᐅᔪᓂ ᐊᐅᓚᑕᐅᓂᐅᔪᓂ ᐊᒻᒪ ᐃᓄᓕᒫᓄᑦ ᐱᓕᕆᐊᖑᔪᓂ ᒪᓕᒐᓕᐅᕐᕕᖕᒥ.
ᐃᓄᓕᕆᔨᒃᑯᑦ ᓈᒻᒪᒃᓴᖅᐳᑦ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᐅᖃᐅᔾᔨᓂᖓᓐᓂ ᐱᓂᕐᒧᑦ “ᑕᒪᒃᑭᖅᑐᒥ ᒐᕙᒪᒃᑯᓐᓂ” ᑐᕌᒐᕆᔭᐅᔪᒥ ᐊᓯᔾᔨᖅᓯᓂᖃᕐᓂᐅᔪᒥ ᐱᕙᓪᓕᐊᑎᑦᑎᓂᕐᒧᑦ ᐱᓇᓱᐊᕈᑎᒃᓴᓕᕆᓂᕐᒧᑦ ᐸᕐᓇᐅᑎᒥᒃ ᐅᖃᐅᓯᒃᓴᖃᕐᓗᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᖅᑲᓇᐃᔭᖅᑐᓕᕆᔨᒃᑯᓐᓂ, ᐊᒻᒪ ᑎᑎᕋᕐᕕᐅᔪᒥ ᑲᓇᑕᐅᑉ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ.
ᐃᓚᐅᖃᑕᐅᓚᐅᕐᒥᔪᒥ ᑐᓵᑎᑦᑎᓂᐅᔪᒥ ᐅᑯᐊᖑᓚᐅᖅᐳᑦ ᒪᐃᒐᓐ ᕼᐊᓐᑦ, ᒥᓂᔅᑕᐅᑉ ᑐᒡᓕᖓ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ; ᔨᒥ ᐅᓈᓕᒃ, ᒥᓂᔅᑕᐅᑉ ᑐᒡᓕᖓ ᒐᕙᒪᓕᕆᔨᒃᑯᓐᓄᑦ; ᑯᕆᔅᑎ ᑯᕉᓂᓐ, ᒥᓂᔅᑕᐅᑉ ᑐᒡᓕᖓ ᐃᖅᑲᓇᐃᔭᖅᑐᓕᕆᔨᒃᑯᓐᓂ; ᐊᒻᒪ ᐋᓐᑐᕉ ᕼᐊᐃᔅ, ᐃᑲᔪᖅᑎᐅᑉ ᑐᒡᓕᖓ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ .
“ᐅᓇ ᐱᓇᓱᐊᕈᑎᒃᓴᓕᕆᓂᕐᒧᑦ ᐸᕐᓇᐅᑎᖓ ᓴᓇᔭᐅᔭᕆᐊᖃᖅᐳᖅ ᐃᓚᒋᔭᐅᔪᓂ ᓄᓇᓕᖕᓂ, ᓇᖕᒥᓂᕆᔭᐅᔭᕆᐊᖃᖅᐳᖅ ᑕᒪᒃᑭᓗᒃᑖᖑᔪᑎᒍᑦ,” ᐅᖃᓚᐅᖅᐳᖅ ᔮᓇᑕᓐ ᐃᐅᓪᔅᕘᑦ, ᒥᓂᔅᑕᐅᑉ ᑐᒡᓕᖓ ᐃᓄᓕᕆᔨᒃᑯᓐᓄᑦ, ᑐᓵᑎᑦᑎᓂᐅᔪᒥ.
ᐃᐅᓪᔅᕘᑦ ᓇᓗᓇᐃᖅᓯᓚᐅᙱᓚᖅ ᓇᓗᓇᐃᖅᑕᐅᓯᒪᔪᒥ ᐱᔭᕇᖅᓯᒪᔭᕆᐊᖃᕐᓂᖓᓂ ᐸᕐᓇᐅᑎ ᐱᔭᕇᖅᓯᒪᔭᕆᐊᖃᕐᓂᖓᓂ.

ᐃᖃᓗᐃᑦ-ᓯᓈᓂ ᒪᓕᒐᓕᐅᖅᑎ ᔮᓂᑦ ᐱᑦᓯᐅᓛ ᐳᕉᔅᑐᕐ ᐊᐱᖅᓱᖅᐳᖅ ᐅᓪᓗᓂ−ᒪᕐᕉᖕᓂ ᑐᓵᑎᑦᑎᓂᐅᔪᒥ ᑐᓂᓯᓂᕐᒥ ᓄᑖᙳᕆᐊᖅᑎᑕᐅᓂᐅᔪᓂ ᐱᓕᕆᐊᖑᔪᓂ ᐱᐅᓯᒋᐊᖅᑎᑦᑎᓂᕐᒧᑦ ᓱᕈᓯᕐᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ ᓄᓇᕗᒻᒥ. (ᔨᐊᕝ ᐱᓚᑦᑎᐊᐃᒧᑦ ᐊᔾᔨᓕᐅᖅᑕᐅᔪᖅ)
ᐱᓕᕆᕝᕕᒃ ᐱᓕᕆᒋᕗᑦ ᑭᐅᓂᕐᒥ ᐃᖅᑲᓇᐃᔭᖅᑎᒃᓴᓄᑦ ᐃᓄᖃᙱᓐᓂᐅᔪᓂ, ᓈᒻᒪᙱᑦᑐᓂ ᐱᓕᒻᒪᒃᓴᖅᓯᒪᔪᓂ, ᓈᒻᒪᙱᑦᑐᓂ ᐱᓕᕆᔾᔪᓯᐅᔪᓂ ᐊᒻᒪ ᐃᖅᑲᓇᐃᔭᖅᑎᓄᑦ ᐊᑦᑕᓇᔾᔭᐃᖅᓯᓯᒪᓂᖏᓐᓂ ᐱᕙᓪᓕᐊᑎᑦᑎᑎᓪᓗᒍ ᐸᕐᓇᐅᑎᒥᒃ, ᐊᒻᒪᓗᑦᑕᐅᖅ ᓴᖅᑭᑎᑦᑎᓂᕐᒥ ᓄᑖᖑᔪᒥ ᐊᕿᑦᑐᓂ ᐱᓕᕆᔾᔪᑎᖏᓐᓂ ᐱᐅᓯᒋᐊᖅᑎᑦᑎᓂᕐᒧᑦ ᑎᑎᖅᑲᖁᑕᐅᔪᓂ−ᐸᖅᑭᓂᕐᒥ ᐊᒻᒪ ᓵᑕᐅᔪᒃᓴᐅᑕᐅᔪᓐᓇᕐᓂᕐᒧᑦ.
“ᓄᓇᕗᒻᒥ ᒐᕙᒪᒃᑯᑦ ᐊᒃᓱᕈᖅᐳᑦ ᖃᒥᑦᑎᓂᕐᒥ ᐃᑭᑦᑐᒥ ᑕᐅᑐᒃᑕᑐᐊᖃᑲᐃᓐᓇᓪᓗᐊᖅᑎᓪᓗᒋᑦ ᖃᐅᒻᒫᖑᔪᓂ ᐃᑭᓚᐅᙱᓐᓂᖓᓂ,” ᐅᖃᓚᐅᖅᐳᖅ ᐃᖃᓗᐃᑦ-ᒪᓂᕋᔭᒃ ᒪᓕᒐᓕᐅᖅᑎ ᐋᑕᒻ ᒪᐃᑦᔅᑑᓐ ᑐᓵᑎᑦᑎᓂᐅᔪᒥ.
ᐃᐅᓪᔅᕘᑦ ᐸᓯᒃᖠᓚᐅᖅᐳᖅ ᖃᓄᐃᓕᖓᓂᐅᔪᒥ ᐱᑕᖃᙱᓗᐊᕐᓂᖓᓂ ᑐᑭᖃᑦᑎᐊᖅᑐᒥ ᒐᕙᒪᒃᑯᓐᓂ ᑭᐅᓂᐅᔪᒥ ᓯᕗᓂᐊᓂ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᐅᓂᒃᑳᓕᐊᖑᔪᓂ.
ᐃᒻᒪᖄ, ᓄᓇᕗᒻᒥ ᒐᕙᒪᒃᑯᑦ ᓴᖅᑭᑎᑦᑎᓚᐅᖅᐳᑦ ᐃᓄᓕᕆᔨᒃᑯᓐᓂᑦ 2013−ᒥ ᑭᐅᓂᕐᒧᑦ ᓯᕗᓪᓕᖅᐸᐅᔪᒥ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᐅᓂᒃᑳᓕᐊᖑᔪᒥ. ᐃᓄᓕᕆᔨᒃᑯᑦ ᓯᕗᓂᐊᓂ ᐊᐅᓚᑕᐅᕙᓚᐅᖅᐳᖅ ᐃᓗᐊᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ.
ᐃᓄᓕᕆᔨᒃᑯᑦ ᓴᖅᑭᑎᑦᑎᓚᐅᖅᐳᑦ ᖃᓄᐃᓕᐅᕐᓂᐅᔪᒥ ᐸᕐᓇᐅᑎᒥᒃ ᑭᐅᓂᕐᒧᑦ ᒪᕐᕈᖓᓂ ᐅᓂᒃᑳᓕᐊᖑᔪᒥ. ᑐᕌᖓᓂᖃᓚᐅᖅᐳᖅ ᐊᖏᒡᓕᒋᐊᖅᑎᑦᑎᓂᕐᒥ ᐃᖅᑲᓇᐃᔭᖅᑎᐅᔪᓂ ᐸᐸᑦᑏᓐᓇᕈᓐᓇᕐᓂᕐᒧᑦ, ᐱᐅᓯᒋᐊᖅᑎᑦᑎᓗᓂ ᐱᓕᒻᒪᒃᓴᓂᐅᔪᒥ ᓯᕗᓂᐊᓂ ᐱᓕᕆᕙᒃᑐᓂ ᐃᖅᑲᓇᐃᔭᖅᑎᓂ ᐊᒻᒪ ᐱᐅᓯᒋᐊᖅᑎᑦᑎᓗᓂ ᐱᓕᕆᐊᖑᔪᓄᑦ ᐊᐅᓚᑕᐅᓂᖓᓂ ᐊᒻᒪ ᑎᑎᕋᖅᓯᒪᔪᓂ ᖃᐅᔨᓴᖅᑕᐅᓂᑯᓂ ᑲᑎᖅᓱᐃᓂᐅᔪᒥ.
ᑭᓯᐊᓂ ᒫᓐᓇᓕᓴᐅᓛᖑᔪᒥ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᐅᓂᒃᑳᓕᐊᖓ ᓇᓗᓇᐃᖅᓯᕗᖅ ᖃᓄᐃᓕᐅᕐᓂᐅᔪᒥ ᐸᕐᓇᐅᑎᒥᒃ ᐊᑑᑎᖃᑦᑎᐊᓚᐅᙱᓐᓂᖓᓂ. ᐅᔾᔨᕆᓚᐅᖅᐳᖅ ᐱᓕᕆᕝᕕᒃ ᑐᓂᓯᔪᓐᓇᓚᐅᙱᓐᓂᖓᓂ ᑕᒻᒪᖅᓯᒪᙱᑦᑎᐊᖅᑐᒥ ᓇᐃᓴᐃᓂᐅᔪᒥ ᐅᓄᕐᓂᐅᔪᓄᑦ ᓱᕈᓯᕐᓂ ᐊᒻᒪ ᒪᒃᑯᒃᑐᓂ ᐸᖅᑭᔭᐅᔪᓄᑦ.
ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᑎᑎᕋᕐᕕᖓ ᐊᐱᕆᓚᐅᕆᕗᑦ ᐃᓄᓕᕆᔨᒃᑯᓐᓄᑦ ᑎᓯᐱᕆ 2022−ᒥ ᖃᐅᔨᒋᐊᒃᑲᓐᓂᕐᓂᕐᒧᑦ ᐅᓄᕐᓂᐅᔪᓂ ᐱᓕᕆᐊᖑᔪᓂ ᐃᕐᙲᓐᓇᑲᐅᑎᒋᒥ, ᐅᖃᐅᓯᖃᖅᖢᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐊᑦᑕᓇᕐᓂᕐᒧᑦ ᐃᓱᒫᓘᑕᐅᔪᓂ ᒪᒃᑯᒃᑐᓄᑦ ᐃᓚᐅᖃᑕᐅᔪᓄᑦ.
ᐅᓂᒃᑳᓕᐊᑉ ᓴᖅᑭᑎᑕᐅᓂᖓᓂ ᒪᐃᒥ, ᐱᓕᕆᕝᕕᒃ ᖃᐅᔨᒋᐊᒃᑲᓐᓂᕐᓂᖃᓚᐅᙱᓚᖅ 52 ᐳᓴᓐᑎᒥ ᑕᐃᒃᑯᓇᙵᑦ ᐱᓕᕆᐊᖑᔪᓂ. ᒐᕙᒪᒃᑯᑦ ᐅᖃᐅᔾᔨᓚᐅᖅᐳᑦ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᑎᑎᕋᕐᕕᖓᓂ ᑲᒪᒋᔭᖃᓚᐅᕐᓂᖏᓐᓂ ᐊᓯᖏᓐᓂ 48 ᐳᓴᓐᑎᖓᓂ ᓇᓗᓇᐃᖅᑕᐅᓯᒪᔪᓂ ᐱᓕᕆᐊᖑᔪᓂ ᑭᓯᐊᓂ ᑐᓂᓯᓚᐅᙱᓚᑦ ᑕᑯᒃᓴᐅᓂᐅᔪᒥ ᐃᑕᔪᖅᓱᐃᓂᕐᒧᑦ ᑕᐃᔅᓱᒥᖓ ᐅᖃᐅᓯᐅᓂᐅᔪᒥ.
“ᓇᒦᑉᐸᑦ ᑕᐃᒃᑯᐊ ᓱᕈᓰᑦ? ᐅᑯᐊ ᓱᕈᓯᓪᓚᕆᐅᕗᑦ, ᐃᓚᒌᓪᓚᕆᐅᕗᑦ. ᐅᑯᐊ ᖃᓄᐃᓕᐅᕐᓂᐅᔪᑦ ᓱᓕ ᑕᐃᑲᓃᑉᐸᖅ ᓄᓇᕐᔪᐊᙳᐊᖑᔪᒥ? ᓇᒦᑉᐸᑦ ᐅᑯᐊ ᓱᕈᓰᑦ ᐅᓗᕆᐊᓇᖅᑐᒦᓐᓂᕋᖅᑕᐅᔪᓂ?” ᐊᐱᕆᓚᐅᖅᐳᖅ ᔮᓂᑦ ᐱᑦᓯᐅᓛ ᐳᕉᔅᑐᕐ, ᒪᓕᒐᓕᐅᖅᑎ ᐃᖃᓗᐃᑦ-ᓯᓈᓄᑦ, ᑐᓵᑎᑦᑎᓂᐅᔪᒥ.
ᐃᐅᓪᔅᕘᑦ ᓇᓗᓇᐃᖅᓯᓚᐅᖅᐳᖅ ᑕᒪᒃᑭᑦ ᖃᓄᐃᓕᐅᕐᓂᐅᔪᓂ ᖃᐅᔨᒋᐊᖅᑕᐅᒃᑲᓐᓂᖅᓯᒪᕗᑦ ᑕᐃᒪᙵᓂ ᐅᓂᒃᑳᓕᐊᑉ ᓴᖅᑭᑎᑕᐅᓂᖓᓂ.
“ᐊᒻᒪᓗ ᐱᓯᒪᕗᖓ ᑕᑯᒃᓴᐅᓪᓚᕆᖕᓂᐅᔪᒥ ᐃᑲᔪᖅᓱᐃᓂᕐᒧᑦ ᑕᐃᔅᓱᒧᖓ ᐃᓱᓕᔾᔪᑕᐅᔪᒧᑦ,” ᐅᖃᓚᐅᖅᐳᖅ.
ᑕᐃᒪᙵᓂ ᐅᓂᒃᑳᓕᐊᑉ ᓴᖅᑭᑎᑕᐅᓂᖓᓂ, ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᑎᑎᕋᕐᕕᖓ ᐅᖃᖃᑎᖃᖅᓯᒪᐃᓐᓇᖅᐳᑦ ᓄᓇᕗᒻᒥ ᒐᕙᒪᒃᑯᓐᓂ ᐱᓕᕆᕝᕕᐅᔪᓂ, ᐱᓗᐊᖅᑐᒥ ᐃᓄᓕᕆᔨᒃᑯᓐᓂᑦ, ᐅᖃᐅᓯᐅᓪᓗᓂ ᐃᑲᔪᖅᑎᐅᔨᐅᔪᒥ ᑐᓖᖓᓂ ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᕼᐊᐃᔅ.
ᑮᓇᐅᔭᓕᐊᖑᕙᒃᑐᓂᒃ ᖃᐅᔨᓴᖅᑎᒻᒪᕆᐅᔪᒥ ᑎᑎᕋᕐᕕᖓ ᓇᐅᑦᑎᖅᓱᐃᓐᓇᖅᐳᑦ ᖃᓄᐃᓕᖓᓂᐅᔪᒥ ᐊᒻᒪ ᐊᑐᓕᖁᔭᐅᓂᓕᐅᕐᓂᐊᖅᖢᑎᒃ ᐱᓕᕆᓂᖅ ᑲᔪᓯᕙᓪᓕᐊᑎᓪᓗᒍ.
“ᐃᓱᐊᓂ, ᐱᔪᓐᓇᖅᑎᑦᑎᔨᐅᙱᓚᒍᑦ ᐋᖅᑭᒃᓯᓂᕐᒥ ᐊᑲᐅᙱᓕᐅᕈᑕᐅᔪᓂ ᓇᓂᔭᑦᑎᓐᓂ ᑮᓇᐅᔭᓕᐊᕆᕙᒃᑕᑦ ᖃᐅᔨᓴᖅᑕᐅᒻᒪᕆᖕᓂᖏᓐᓂ, ᑭᓯᐊᓂ ᐱᓕᕆᖃᑎᖃᕈᒪᕗᒍᑦ ᐱᔾᔪᑎᖃᖅᑐᒥ ᑎᑭᐅᑎᓂᕐᒥ ᐱᐅᔪᒥ ᖃᓄᐃᓕᖓᓂᐅᔪᓄᑦ,” ᕼᐊᐃᔅ ᐅᖃᓚᐅᖅᐳᖅ ᑐᓵᑎᑕᐅᓂᐅᔪᒥ.
(0) Comments