ᓄᓇᕗᒻᒥ ᒐᕙᒪᒃᑯᑦ ᓴᖅᑭᑎᑦᑎᕗᑦ $3.06 ᐱᓕᐊᓐᓂ ᑮᓇᐅᔭᑦ ᐊᑐᖅᑐᒃᓴᓂ ‘ᐊᖏᓗᐊᙱᑦᑐᒥ’ ᑮᓇᐅᔭᐃᑦ ᖄᖏᐅᑎᓂᖏᓐᓂ

For English version, see Nunavut government tables $3.06-billion budget with ‘modest deficit’

ᓄᓇᕗᒻᒥ ᒐᕙᒪᒃᑯᑦ ᐃᓯᖅᐸᓪᓕᐊᕗᑦ ᓄᑖᖑᔪᒥ ᑮᓇᐅᔭᑦ ᐊᑐᖅᑐᒃᓴᓄᑦ ᐊᕐᕌᒎᔪᒧᑦ ᓇᓚᐅᑦᑖᕆᓂᐅᔪᓂ “ᐊᖏᓗᐊᙱᑦᑐᒥ ᑮᓇᐅᔭᐃᑦ ᖄᖏᐅᑎᓂᖏᓐᓂ” $8 ᒥᓕᐊᓐᓂ, ᐅᖃᖅᐳᖅ ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᓗᐊᓐ ᑯᓱᒐᖅ.

ᑯᓱᒐᖅ ᑐᓂᓯᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᑦ ᑮᓇᐅᔭᑦ ᐊᑐᖅᑐᒃᓴᓂ 2023-24−ᒧᑦ ᒪᓕᒐᓕᐅᕐᕕᖕᒥ ᕕᕗᐊᕆ 23−ᒥ. ᑲᑎᓪᓗᒍ ᑮᓇᐅᔭᖅᑖᕆᔭᐅᕙᓪᓕᐊᔪᑦ ᓇᓚᐅᑦᑖᕆᔭᐅᕗᖅ $3.06 ᐱᓕᐊᓐᓂ.

ᒫᓐᓇᐅᔪᒥ, ᐱᔾᔪᑎᖓ ᑮᓇᐅᔭᐃᑦ ᖄᖏᐅᑎᓂᖏᓐᓂ ᐃᓱᒫᓘᑕᐅᓪᓗᐊᙱᓚᖅ, ᐅᖃᐅᓯᐅᓪᓗᓂ ᑯᓱᒐᕐᒧᑦ, ᐅᖃᓚᐅᖅᑐᒥ ᓂᕆᐅᒋᔭᐅᓚᐅᖅᐳᖅ ᒪᓕᒃᑐᒥ $40 ᒥᓕᐊᓐᓂ ᑮᓇᐅᔭᓂ ᐊᒥᐊᒃᑯᔪᓂ ᓄᓇᕗᒻᒥ ᑮᓇᐅᔭᑦ ᐊᑐᖅᑐᒃᓴᓂᑦ ᐊᕐᕌᓂᐅᓚᐅᖅᑐᒥ.

“ᐊᕐᕌᓂ, ᐃᓂᖅᑎᕆᓂᖃᓚᐅᖅᐳᒍᑦ ᑮᓇᐅᔭᐃᑦ ᖄᖏᐅᑎᓂᖃᕐᓂᐅᔪᓂ ᖃᓄᐃᓕᖓᓂᖃᕐᓂᐊᕐᓂᑦᑎᓐᓂ, ᑐᑭᖃᖅᑐᒥ ᐱᓂᕐᒥ ᐊᕐᕌᓂᐅᓚᐅᖅᑐᓂ ᑮᓇᐅᔭᓂ ᐊᒥᐊᒃᑯᔪᓂᑦ, ᐊᒻᒪ ᑕᐃᑰᓈᑦᑎᐊᖅᓯᒪᕗᒍᑦ,” ᐅᖃᓚᐅᖅᐳᖅ.

ᑯᓱᒐᖅ ᐅᖃᓚᐅᖅᐳᖅ ᒐᕙᒪᑐᖃᒃᑯᑦ ᐊᔭᐅᕆᓯᒪᕗᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᐊᒻᒪ ᐅᑭᐅᖅᑕᖅᑐᒥ ᐱᓕᕆᖃᑎᒌᖑᔪᓂ ᐊᓱᕐᓂᖏᓐᓂ ᑮᓇᐅᔭᓂ ᐱᓯᒪᔭᖏᓐᓂ.

“ᐱᙳᐊᕐᓂᐅᔫᑉ ᓯᕗᓂᐊᓃᓚᐅᖅᐳᒍᑦ, ᐄᓪᓚᕆᒃ, ᐊᒻᒪ ᐱᕗᒍᑦ ᐃᓚᖏᓐᓂ ᑮᓇᐅᔭᓂ ᐊᒥᐊᒃᑯᔪᓂᑦ ᓯᕗᓂᐊᓂ ᐊᕐᕌᒎᔪᓂ ᐊᒻᒪ ᐃᓕᓗᒍ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒻᒪᓗ ᐃᓕᓗᒍ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒧᑦ.”

ᓇᓗᓇᐃᖅᓯᒃᑲᓐᓂᓚᐅᖅᐳᖅ ᒫᓐᓇᐅᔪᒥ ᒐᕙᒪᐅᔪᒥ ᑕᐅᑐᒃᑕᑐᐊᖃᑲᐃᓐᓇᕐᓂᖓᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᐃᒡᓗᖃᖅᑎᑦᑎᓂᕐᒧᑦ ᐊᒻᒪ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᓄᓇᕗᒻᒥᐅᓄᑦ.

“ᐋᖅᑭᒃᓯᓚᐅᖅᐳᒍᑦ ᑐᕌᒐᕐᒥ ᓄᓇᓕᑦᑎᓐᓄᑦ ᐃᓂᐅᓂᖏᓐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᒪᒥᓴᕐᓂᕐᒧᑦ, ᐃᓄᑐᖃᐃᑦ ᐃᓐᓇᕈᕐᓗᑎᒃ ᐅᐱᒋᓂᖃᕐᓗᑎᒃ ᐊᒻᒪ ᐃᓕᓐᓂᐊᖅᑎᑦᑏᓐᓇᕐᓗᑎᒃ ᓄᑖᖑᔪᓂ ᐱᐅᓯᖃᑎᒌᖑᔪᓂ ᐱᒻᒪᕆᐅᔪᓂ ᐃᓕᓐᓂᐊᖅᑎᑕᐅᓂᐅᔪᒥ ᑕᐃᔅᓱᒪᓂᑐᖃᕐᒥ,” ᑯᓱᒐᖅ ᐅᖃᓚᐅᖅᐳᖅ ᑮᓇᐅᔭᑦ ᐊᑐᖅᑐᒃᓴᓄᑦ ᐅᖃᐅᓯᒃᓴᓕᐊᖓᓐᓂ.

“ᐊᖏᖅᓯᒪᕗᒍᑦ ᑲᑎᖅᓱᖅᑕᐅᕙᓪᓕᐊᒃᑲᓐᓂᖅᑐᒥ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᐳᖅᐸᓪᓕᐊᑎᑕᐅᓂᖏᓐᓂ ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪ ᐊᖏᒡᓕᒋᐊᖅᑎᑦᑎᓂᕐᒥ ᐃᒡᓗᖃᖅᑎᑦᑎᓂᕐᒥ ᑲᔪᓰᓐᓇᕐᓂᖓᓂ ᑐᓂᓯᓂᕐᒧᑦ ᒪᒃᑯᒃᑐᓂ ᐊᒻᒪ ᐃᓚᖏᓐᓂ ᑐᙵᕕᐅᔪᒥ ᐱᔭᕆᐊᓕᖏᓐᓂ ᓄᓇᕘᑉ ᒪᓕᒃᑐᓂ ᐱᐅᓯᖃᑎᒌᖑᕐᓂᕐᒧᑦ ᓄᓇᓕᖕᓂ ᐱᕈᖅᓴᐃᔨᐅᔪᓄᑦ.”

ᐃᓚᒋᔭᐅᔪᒥ ᒐᕙᒪᒃᑯᑦ ᑮᓇᐅᔭᖅᑖᕆᔭᐅᕙᓪᓕᐊᔪᑦ ᓇᑭᙶᕐᓂᖏᓐᓂ $165 ᒥᓕᐊᓐ−ᖑᕗᑦ ᑖᒃᓯᓂᑦ, $21 ᒥᓕᐊᓐᓂ ᑲᑎᖅᓱᖅᑕᐅᔪᓂ ᐅᕘᓇ ᐃᒡᓗᓕᕆᔨᒃᑯᑦ ᐃᒡᓗᒧᑦ ᐊᑐᖅᑐᐊᕐᓂᕐᒥ ᐊᑭᓕᐅᑕᐅᔪᓂ, ᐊᒻᒪ $78 ᒥᓕᐊᓐᓂ ᐊᓯᖏᓐᓂᙶᖅᑐᓂ.

ᐃᓚᓕᐅᔾᔭᐅᓯᒪᖕᒥᔪᖅ $1.97 ᐱᓕᐊᓐᓂ ᐅᕘᓇ ᐊᖏᓛᖑᔪᒥ ᒐᕙᒪᑐᖃᒃᑯᑦ ᓅᑕᐅᓂᐅᔪᒥ ᐱᓂᖓᓐᓂ, ᓄᓇᕗᒻᒥ ᑮᓇᐅᔭᖃᖅᑎᑕᐅᓂᐅᔪᒥ ᑮᓇᐅᔭᖃᕈᑕᐅᓲᒥᒃ— ᐊᕐᕌᒍᑕᒫᒥ ᖃᓄᐃᓕᖓᓂᖃᙱᑦᑐᒥ ᓅᑕᐅᓂᐅᔪᒥ ᒐᕙᒪᑐᖃᒃᑯᓐᓂ ᐱᖓᓱᓄᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓄᑦ.

ᐊᑐᓂ ᐱᓕᕆᕝᕕᐅᔪᑦ ᑭᐅᓘᑎᖃᕐᓂᐊᖅᐳᑦ ᐸᕐᓇᐅᑎᖏᓐᓂ ᐊᑐᕐᓂᐊᕐᓂᖏᓐᓂ ᑮᓴᐅᔭᖃᖅᑎᑕᐅᓂᕐᒥ ᑐᓂᔭᐅᓂᖏᓐᓂ ᐅᑭᐅᒃᑯᑦ ᐃᒃᓯᕚᕐᓂᐅᔪᒥ ᒪᓕᒐᓕᐅᕐᕕᖕᒥ, ᐱᒋᐊᓚᐅᖅᑐᒥ ᐱᖓᔪᐊᓐᓂ ᐊᒻᒪ ᐊᐅᓚᓪᓗᓂ ᒫᔾᔨᐅᑉ ᐱᒋᐊᕐᓂᖓᓄᑦ.

ᐊᖏᓛᖑᔪᓂ ᑮᓇᐅᔭᖃᖅᑎᑕᐅᓂᐅᔪᓂ ᑐᕌᖅᑎᑕᐅᓂᐊᖅᐳᑦ ᐱᓕᕆᕝᕕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ, ᐊᒻᒪ ᐃᓕᓐᓂᐊᖅᑐᓕᕆᔨᒃᑯᓐᓄᑦ. ᐱᓂᐊᖅᐳᑦ 23.2 ᐳᓴᓐᑎᒥ, 14.5 ᐳᓴᓐᑎᒥ ᐊᒻᒪ 13.5 ᐳᓴᓐᑎᒥ ᒐᕙᒪᒃᑯᑦ ᐊᑐᖅᑕᐅᔪᒃᓴᓂ ᒪᓕᖃᑦᑕᐅᑎᔪᓂ.

ᐱᓕᕆᕝᕕᐅᔪᑦ ᐊᑦᑎᓛᓂ ᑮᓇᐅᔭᑦ ᐊᑐᖅᑐᒃᓴᓄᑦ ᑐᓂᔭᐅᓂᐅᔪᓂ ᐃᓚᖃᖅᐳᑦ ᐊᕙᑎᓕᕆᔨᒃᑯᑦ, ᐊᒻᒪ ᐃᓕᖅᑯᓯᓕᕆᔨᒃᑯᑦ ᐊᒻᒪ ᐃᑦᑕᕐᓂᓴᓕᕆᓂᕐᒧᑦ, ᐱᓕᐊᖅᑐᓂ 1.3 ᐳᓴᓐᑎᒥ ᐊᒻᒪ 1.4 ᐳᓴᓐᑎᒥ ᑮᓇᐅᔭᑦ ᐊᑐᖅᑐᒃᓴᓂᑦ, ᒪᓕᖃᑦᑕᐅᑎᔪᓂ.

ᑯᓱᒐᖅ ᐅᖃᐅᓯᖃᓚᐅᕆᕗᖅ  ᒥᓕᐊᓐᓂ ᐃᓚᒋᔭᐅᓗᓂ ᓄᓇᕗᒻᒥ ᒐᕙᒪᒃᑯᑦ ᑲᑐᔾᔨᓗᓴ ᐱᓕᕆᐊᒃᓴᖓᓐᓂ, ᑕᐅᑐᒃᑕᑐᐊᖃᑲᐃᓐᓇᖅᑐᒥ ᑕᓪᓕᒪᓂ ᐱᓕᕆᓂᐅᔪᓂ, ᐃᓐᓇᕈᖅᐸᓪᓕᐊᓂᕐᒥ ᐅᐱᒋᓂᖃᕐᓗᑎᒃ   ᐊᒻᒪ ᐊᔾᔨᒌᙱᑎᑦᑎᓂᕐᒥ ᓄᓇᓕᖕᓂ ᑮᓇᐅᔾᔭᒃᓴᓂᐅᔪᓂ.

ᓄᑖᖑᔪᑦ ᐊᑐᖅᑕᐅᔪᒃᓴᓂ ᐃᓚᖃᖅᐳᖅ:

• $17.5 ᒥᓕᐊᓐᓂ ᐱᕙᓪᓕᐊᑎᑦᑎᓂᕐᒧᑦ ᒐᕙᒪᒃᑯᑦ ᓇᖕᒥᓂᖃᕐᓂᕐᒧᑦ ᐃᑲᔪᕈᑎᒃᓴᓂ ᐸᕐᓇᐃᓂᕐᒧᑦ ᐱᓕᕆᔾᔪᓯᐅᔪᒥ;
• $12 ᒥᓕᐊᓐᓂ ᑮᓇᐅᔭᓂ ᐊᑭᓖᑎᐅᔪᓄᑦ ᓄᓇᕗᒻᒥᐅᓄᑦ ᑮᓴᐅᔭᓂᒃ ᑭᐳᒃᓯᓂᕐᒥ ᖁᑦᑎᖕᓂᖅᓴᐅᔪᓂ ᐊᑭᓂᑦ ᐃᓚᒋᔭᐅᔪᒥ ᒐᕙᒪᑐᖃᒃᑯᑦ ᐸᐅᕐᒧᑦ ᑖᒃᓯᖓᓐᓂ;
• $7 ᒥᓕᐊᓐᓂ ᓂᖃᐃᓱᕐᓂᕐᒧᑦ ᐃᑲᔪᕐᓂᕐᒧᑦ ᑭᐅᓂᕐᒥ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓂ;
• $6.2 ᒥᓕᐊᓐᓂ ᓄᓇᓕᖕᓂ ᐃᒡᓗᓕᕆᔨᐅᔪᓄᑦ ᐊᐅᓚᑦᑎᓂᕐᒧᑦ ᐊᒻᒪ ᐋᖅᑭᐅᒪᑎᑦᑎᓂᕐᒧᑦ ᓄᑖᖑᔪᓂ ᐃᒡᓗᒃᓴᓂ; ᐊᒻᒪ
• $5 ᒥᓕᐊᓐᓂ ᑐᓂᓯᓂᕐᒧᑦ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᑲᔪᖅᓱᐃᓂᐅᔪᒥ ᐃᓕᓐᓂᐊᖅᑎᓄᑦ ᓄᓇᕗᓕᒫᒥ.