ᓄᓇᕗᒻᒥ ᒪᐃᔭᐃᑦ ᐅᖃᓪᓚᖕᓂᖃᖅᐳᑦ ᓴᙱᓂᐅᔪᓂ ᓄᓇᖃᖅᑎᐅᔪᓂ, ᕼᐋᒻᓚᒃᑯᑦ ᐃᖅᑲᓇᐃᔭᖅᑎᖏᓐᓂ

For English version, see Nunavut mayors speak to strength of residents, hamlet staff

ᐅᖃᓪᓚᖕᓂᑐᐃᓐᓇᓚᐅᙱᓚᖅ, ᐃᓕᓐᓂᐊᕐᓂᕐᒥ ᐊᒻᒪ ᑕᑯᒃᓴᐅᑎᑦᑎᓂᐅᔪᓂ ᓄᓇᕗᒻᒥ ᓄᓇᓖᑦ ᑲᑐᔾᔨᖃᑎᒌᖏᑦᑕ ᐅᓪᓗᓂ-ᐱᖓᓱᓂ ᐊᕐᕌᒍᑕᒫᒥ ᑲᑎᒪᓂᐅᔪᒥ ᐱᓇᓱᐊᕈᓯᐅᓚᐅᖅᑐᒥ ᐃᖃᓗᖕᓂ.

ᓄᕕᐱᕆ 9−ᒥ, ᓄᓇᕘᑉ ᒪᐃᔭᖏᑦ ᐊᒥᖅᑳᓚᐅᖅᐳᑦ ᐅᖃᓪᓚᖕᓂᕐᒥ ᐱᐅᓂᐅᔪᓂ ᐊᒻᒪ ᐊᒃᓱᕈᕈᑕᐅᔪᓂ ᓄᓇᓕᖏᓐᓂ, ᖃᔅᓯᒐᓚᖕᓂ ᐅᐱᒋᔭᖃᖅᖢᑎᒃ ᓄᓇᓕᖏᓐᓂ ᐃᖅᑲᓇᐃᔭᖅᑎᖏᓐᓂ ᐊᒻᒪ ᓄᓇᖃᖅᑎᐅᔪᓂ ᐅᖃᖅᖢᑎᒡᓗ ᕼᐋᒻᓚᖏᑦ ᐱᖃᙱᓗᐊᕐᓂᖏᓐᓂ ᐱᐅᔪᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ.

ᒪᐃᔭᐃᑦ ᐅᖃᐅᓯᒃᓴᓕᐅᓚᐅᖅᐳᑦ ᐊᖅᓴᕐᓃᑦ ᑐᔪᕐᒥᕕᖓᓂ ᐃᖃᓗᖕᓂ, ᑲᒪᒋᔭᖃᓚᐅᖅᑐᒥ ᑲᑎᒪᓂᐅᔪᒥ ᐱᔭᕇᓚᐅᖅᑐᒥ ᓄᕕᐱᕆ 10−ᒥ.

ᒪᐃᔭᐃᑦ ᐅᖃᐅᓯᒃᓴᖏᑦ ᐱᓕᕆᐊᖑᓚᐅᖅᐳᑦ ᑲᑎᒪᔨᓂ ᐅᖃᓪᓚᖕᓂᐅᓚᐅᖅᑐᒥ ᐅᖃᖁᔭᐅᖕᒪᑕ ᐅᖃᐅᓯᖃᕐᓂᕐᒥ ᒪᕐᕉᖕᓂ ᐱᐅᓂᐅᔪᓂ ᐊᒻᒪ ᐊᑕᐅᓯᕐᒥ ᐊᒃᓱᕈᕐᓇᖅᑐᒥ ᓄᓇᓕᖏᓐᓂ.

ᐊᕐᕕᐊᕐᓂ ᒪᐃᔭᖓ ᔫ ᓴᕕᑲᑖᖅ ᓄᑲᖅᖠᖅ ᐅᖃᓚᐅᖅᐳᖅ ᓄᓇᓕᖓ ᖃᐅᔨᒪᔭᐅᕗᖅ ᑐᙵᓇᕐᓂᖅᐹᖑᓂᖓᓂ ᓄᓇᕗᓕᒫᒥ.

“ᑕᒪᓐᓇ ᐱᓐᓇᕆᕙᕗᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ “ᐃᖅᑲᓇᐃᔭᖅᑏᑦ ᕼᐋᒻᓚᒃᑯᓐᓂ ᐃᓚᒋᔫᔮᖅᐸᕗᑦ.”

ᐸᖕᓂᖅᑑᒥ ᒪᐃᔭᖓ ᐃᐊᕆᒃ ᓛᓗᕐ ᐅᖃᓚᐅᖅᐳᖅ ᒪᕐᕉᒃ ᐱᐅᓂᐅᔪᑦ ᓄᓇᓕᖓᓐᓂ ᓄᓇᓕᖕᓂ ᐊᐅᓚᑦᑎᔨᖓ, ᔭᐃᒥ ᐃᕕᒃ ᐊᒻᒪᓗ ᓄᓇᓕᖕᒥᐅᑕᐃᑦ.

“ᐃᓄᖏᑦ. ᐃᓄᖏᑦ — ᐱᔾᔪᑕᐅᕗᖅ ᑕᒫᓃᓯᒪᓐᓂᓐ ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ 20−ᓄᑦ,” ᓛᓗᕐ ᐅᖃᓚᐅᖅᐳᖅ. “ᑐᙵᓇᖅᐳᑦ, ᐃᓕᖕᓂ ᑲᑎᖃᑎᖃᓲᖑᕗᑦ ᐊᒻᒪ ᐅᖃᓪᓚᒍᒻᒪᐅᕗᑦ ᐊᒻᒪ ᐊᑭᓕᖅᓱᖅᑕᐅᓇᑎᒃ ᐃᑲᔪᓲᖑᕗᑦ.”

ᓴᓂᕋᔭᖕᒥ ᒪᐃᔭᖓ ᔭᐃᐱᑎ ᐊᐅᓪᓚᕿᐊᖅ ᐅᖃᓚᐅᖅᐳᖅ ᐱᓐᓇᕆᕙᖓ ᐃᑲᔪᖅᓱᐃᓂᐅᔪᒥ ᐱᕙᒃᑕᖓᓂ ᕼᐋᒻᓚᒃᑯᓐᓂ ᑲᑎᒪᔨᐅᔪᓂ ᐊᒻᒪ ᓄᓇᖃᖅᑎᐅᔪᑦ ᐃᖅᑲᓇᐃᔮᒃᓴᖅᑖᕈᓐᓇᕐᓂᖏᓐᓂ ᐹᕙᓐᓛᓐ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᖓᓂ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ.

“ᖁᔭᓕᓯᒪᕗᒍᑦ ᕼᐋᒻᓚᐅᓪᓗᑕ,” ᐊᐅᓪᓚᕿᐊᖅ ᐅᖃᓚᐅᖅᐳᖅ.

ᐊᑕᐅᓯᐅᔪᒥ ᐱᐅᙱᓐᓂᐅᔪᒥ ᓄᓇᓕᖏᓐᓂ, ᐊᒥᓱᑦ ᒪᐃᔭᐃᑦ ᐅᖃᓪᓚᓚᐅᖅᐳᑦ ᖃᓄᐃᓕᖓᓂᖓᓂ ᐅᕝᕙᓘᓐᓃᑦ ᐱᑕᖃᙱᓗᐊᕐᓂᖓᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ.

ᐃᒡᓗᓕᐅᑉ ᒪᐃᔭᖓ ᐃᕌᔅᒪᔅ ᐃᕙᓗ ᐅᖃᓚᐅᖅᐳᖅ ᓄᓇᓕᒃ ᒍᓛᔾᔪᑖᕆᐊᖃᖅᐳᑦ ᐃᒡᓗᖃᖅᑎᑦᑎᓂᐊᖅᑐᒥ ᐅᖁᒪᐃᑦᑐᓄᑦ ᓄᓇᓯᐅᑎᓄᑦ ᐊᒻᒪ ᖃᑦᑎᕆᔾᔪᑎᒥᒃ ᓄᓇᓯᐅᑎᖓᓐᓂ, ᑲᖏᖅᖢᒑᐱᐅᑉ ᒪᐃᔭᖓ ᐋᓚᓐ ᑯᐊᒫᒃ ᐅᖃᓚᐅᖅᐳᖅ ᕼᐋᒻᓚᖓ ᐅᖁᒪᐃᑦᑐᓂ ᓄᓇᓯᐅᑎᖃᙱᓗᐊᖅᐳᑦ.

ᑭᙵᕐᓂ ᒪᐃᔭᖓ ᑕᐃᒨᓐ ᑐᓐᓄ ᐅᖃᓚᐅᖅᐳᖅ ᓄᓇᓕᖓ ᑐᙵᓇᕐᔪᐊᖅᐳᖅ, ᑭᓯᐊᓂ ᐊᔪᕐᓇᖅᐳᖅ ᐋᖅᑭᐅᒪᑎᑦᑎᓂᕐᒥ ᐃᖅᑲᓇᐃᔭᖅᑎᐅᔪᓂ ᕼᐋᒻᓚᒃᑯᑦ ᑎᑎᕋᕐᕕᖓᓂ ᐱᑕᖃᙱᓗᐊᕐᓂᖓᓄᑦ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᐅᔪᓂ.

ᖃᒪᓂᑦᑐᐊᕐᒥ ᒪᐃᔭᖓ ᕆᔅᓱᑦ ᐊᒃᓵᓂ ᐅᖃᓚᐅᖅᐳᖅ ᓄᓇᓕᖓ ᐊᒃᓱᕉᓴᓲᖑᕗᑦ ᑮᓇᐅᔭᖃᖅᑎᑕᐅᓂᕐᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᓕᕆᐊᒃᓴᐅᔪᓄᑦ, ᐅᖃᐅᓯᖃᖅᖢᓂ 2018−ᒥ ᒪᑐᔭᐅᓂᖓᓂ ᒫᑕ ᑕᓕᕈᖅ ᐃᒡᓗᖁᑎᖓᓐᓂ, ᐃᓄᑐᖃᑦ ᐊᖏᕐᕋᖓᓂ, ᐱᔾᔪᑎᖃᖅᑐᒥ ᐊᑲᐅᙱᓕᐅᕈᑕᐅᔪᓄᑦ ᐃᒡᓗᕐᔪᐊᒧᑦ ᐊᒻᒪ ᐊᐅᓚᑦᑎᔨᖏᓐᓂ.

ᑲᑎᒪᓂᖅ, ᑲᑎᑎᕆᓚᐅᖅᑐᒥ ᓄᓇᓕᖕᓂ ᑲᑎᒪᔨᕐᔪᐊᖑᔪᓂ ᓄᓇᕗᓕᒫᒥ, ᑐᓴᓚᐅᕆᕗᑦ ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᒥ ᓗᐊᕆ ᐃᓪᓚᐅᒻᒥ, ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓᓂ ᐊᓗᑭ ᑰᑦᑎᕐᒥ ᐊᒻᒪ ᐃᖃᓗᖕᓂ ᓄᓇᓕᐸᐅᔭᒥ ᑲᑎᒪᔨᐅᔪᒥ ᐹᓪ ᖁᐊᓴᒥ.

ᓄᕕᐱᕆ 10−ᒥ, ᓄᓇᕗᒻᒥ ᒥᓂᔅᑕᐅᔪᑦ ᑐᓂᓯᓚᐅᖅᐳᑦ ᓄᑖᙳᕆᐊᖅᑕᐅᓂᐅᔪᒥ ᐱᓕᕆᓂᖏᓐᓄᑦ ᓄᓇᓕᖕᓂ ᑭᒡᒐᖅᑐᐃᔨᐅᔪᓄᑦ.