ᓄᓇᕗᒻᒥ ᒪᒃᑯᒃᑐᐃᑦ ᓇᐃᑦᑐᒥᒃ ᑕᕐᕆᔭᒐᒃᓴᓕᐅᓚᐅᖅᑐᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ

ᓯᑕᒪᐅᓪᓗᑎᒃ ᓄᓇᕗᒻᒥᐅᑕᐃᑦ ᒪᒃᑯᒃᑐᑦ ᓇᐃᑦᑐᒥᒃ ᑕᕐᕆᔭᒐᒃᓴᓕᐅᓚᐅᕐᒪᑕ ᐱᕙᓪᓕᐊᔪᓕᕆᓂᐅᔪᒥᒃ ᐱᒻᒪᕆᐅᑎᑕᒥᖕᓂᒃ: ᐃᒻᒥᓃᖃᑦᑕᖁᔨᖖᒋᓐᓂᖅ.

“ᓯᕗᓂᒃᓴᖃᑦᑎᐊᖁᒐᑦᑎᒍ ᒪᒃᑯᒃᑐᐃᑦ ᐊᒻᒪᓗ ᐊᖏᓂᖅᓴᒥᒃ ᐃᑲᔪᖅᑕᐅᓯᒪᓕᖁᓪᓗᑎᒍᑦ,” ᐅᖃᖅᓱᓂ ᐱᓖᒃ ᑎᒪᐃᐅ, ᐃᓚᒋᔭᐅᖃᑕᐅᔪᖅ ᐃᓕᓐᓂᐊᖅᑐᓂᑦ ᑕᕐᕆᔭᒐᒃᓴᓕᐅᖅᑎᐅᓚᐅᖅᑐᓄᑦ.

ᑕᕐᕆᔭᒐᒃᓴᓕᐊᖑᓯᒪᔪᖅ ᑕᐃᔭᐅᕗᖅ ᐱᔾᔪᑎᐅᓗᐊᕐᒪᑦ ᑐᓴᐅᒪᖃᑦᑕᐅᑎᑦᑎᐊᕆᐊᖃᕐᓂᖅ: ᒪᒃᑯᒃᑐᓂᒃ ᓯᕗᓕᖅᑎᖃᖅᓱᑎᒃ ᒪᓕᒐᖁᑏᑦ ᐊᓯᔾᔨᖅᑕᐅᓯᒪᓕᖁᓪᓗᒋᑦ ᐱᓕᕆᐊᖑᔪᖅ. ᒪᒃᑯᒃᑐᐃᑦ ᑕᑯᓐᓇᖅᑎᑦᓯᓚᐅᖅᑐᑦ ᕕᑉᕈᐊᕆ 1-ᖑᑎᓪᓗᒍ ᖃᔪᖅᑐᕐᕕᒃ ᓂᕆᔭᖅᑐᕐᕕᖓᓂ. ᑐᕌᕐᕕᒃᓴᖃᖅᑎᑕᐅᓯᒪᓪᓗᑎᒃ ᐃᓱᒪᓕᐅᕈᑎᖃᖅᓯᒪᓂᕐᒥᓐᓄᑦ ᓄᓇᕗᒻᒥ ᒐᕙᒪᖓ ᐊᖏᓂᖅᓴᐅᔪᒥᒃ ᐊᑐᖃᑦᑕᓕᖁᓪᓗᒋᑦ ᐃᖅᑲᓇᐃᔭᕐᕕᐅᔪᐃᑦ ᑐᓴᒐᒃᓴᖁᑎᒋᔭᒥᓐᓂᒃ ᐊᒥᖅᑲᖃᑦᑕᕆᐊᖃᖅᑎᑕᐅᓂᖏᓐᓂᒃ, ᐋᖅᑭᒃᓱᐊᖑᓯᒪᔪᓂᒃ ᐃᑲᔪᕈᑎᒃᓴᐅᓪᓗᑎᒃ ᑭᒃᑯᑐᐃᓐᓇᐃᑦ ᑎᒥᖁᑎᒋᔭᖏᑦ ᐱᓕᕆᖃᑎᒌᓕᖁᓪᓗᒋᑦ ᓄᓇᓕᐅᔪᓂ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ.

ᒪᓕᒡᓗᒋᑦ ᐅᖃᓕᒫᒐᓕᐊᖑᓯᒪᔪᑦ ᑲᓇᑕᒥᐅᑦ ᐃᓱᒪᓕᕆᔨᖏᑕ ᑎᑎᕋᖅᓯᒪᔪᖁᑎᖏᑦᓂ, ᓯᓚᕐᔪᐊᓕᒫᒥᐅᓂ ᖁᑦᑎᖕᓂᖅᐸᐅᖕᒪᑕ ᐃᒻᒥᓃᖅᖢᑎᒃ ᑐᖁᔾᔪᑎᖃᖃᑦᑕᕐᒪᑕ ᑲᓇᑕᒥᐅᑦ ᐃᓄᖏᑦ, ᐱᓗᐊᖅᑐᒥᒃ ᒪᒃᑯᒃᑐᖁᑎᖏᑦ.

5-ᒥᓂᑦᓯᓪᓗᐊᒥᒃ ᑕᑭᓂᖃᖅᑑᓪᓗᓂ ᑕᕐᕆᔭᒐᒃᓴᓕᐊᖑᓯᒪᔪᖅ ᐱᒋᐊᕈᑎᖃᕐᐳᖅ ᐊᑐᓂ ᓯᑕᒪᐅᓪᓗᑎᒃ ᐃᓕᓐᓂᐊᖅᑎᑦ ᐃᓄᒃᓱᒃ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᖓᓂᑦ ᓇᖕᒥᓂᖅ ᑭᓇᐅᓂᕐᒥᓐᓂᒃ ᓇᓗᓇᐃᖅᓯᓂᖃᖅᑎᓪᓗᒋᑦ ᐊᒻᒪᓗ ᐅᖃᓪᓚᐅᓯᖃᖅᓱᑎᒃ ᖃᓄᐃᒻᒪᑦ ᐱᓕᕆᐊᖑᔪᒃᓴᐃᑦ ᐱᒻᒪᕆᐅᓗᐊᖅᑎᑕᐅᖕᒪᖔᑕ.

ᐅᑯᐊᖑᕗᑦ ᐃᓕᓐᓂᐊᖅᑐᐃᑦ ᔮᔅᒥᓐ ᐃᕕᒃ, ᕌᑰ ᑲᓂᐅᓪ, ᔨᓂᕗᕐ ᒍᐃᓕᐊᒻᔅ ᐊᒻᒪᓗ ᑎᒪᐃᐅ.

ᑕᕐᕆᔭᒐᒃᓴᓕᐊᖑᓯᒪᔪᒥ ᐊᑐᓂᑦ ᐃᓕᓐᓂᐊᖅᑐᐃᑦ ᐅᖃᓪᓚᐅᓯᖃᖅᐸᓪᓕᐊᖃᑎᒌᒃᐳᑦ ᓇᓪᓕᑭᑖᖅᓱᑎᒃ – ᐊᑕᐅᓯᖅ ᐃᓕᓐᓂᐊᖅᑐᑦ ᐅᖃᓪᓚᓯᒋᐊᕐᒪᑦ ᐊᓯᓂᑦ ᐅᖃᓪᓛᓂᒍᔾᔭᐅᕙᒃᑎᓪᓗᒍ.

ᖃᓄᐃᓕᐅᖖᒍᐊᖅᑎᑦᓯᔪᖕᓇᕐᓂᖓᑦ ᑕᑯᒃᓴᐅᑎᑕᐅᖃᑦᑕᕐᒥᔪᖅ ᑕᑯᓐᓇᖅᑕᐅᔪᑎᒍᑦ, ᐃᓕᓐᓂᐊᖅᑐᐃᑦ ᐅᖃᓪᓚᒃᐸᓪᓕᐊᓂᖃᖅᑎᓪᓗᒋᑦ ᐃᓄᒃᓱᖕᒥᒃ ᓴᓇᓕᕐᓂᐊᓵᖅᑎᓪᓗᒋᑦ ᐊᒻᒪᓗ ᓴᓇᔭᐅᕌᓂᒃᓯᒪᓕᖅᑎᓪᓗᒍ.

ᑕᕐᕆᔭᒐᒃᓴᐅᑉ ᐃᓱᐊᓄᑦ ᑎᑭᒻᒪᑕ, ᓇᓗᓇᐃᔭᐃᓯᒪᓕᖅᓱᑎᒃ ᖃᓄᐃᒻᒪᑦ ᐃᒻᒥᓃᖃᑦᑕᖁᔨᖖᒋᓐᓂᖅ ᐱᒻᒪᕆᐅᓗᐊᖅᑎᑕᐅᒻᒪᖔᑦ, ᖃᓄᖅ ᐱᓕᕆᐊᒃᓴᕆᔭᐅᔪᑦ ᐃᑲᔪᕈᑎᐅᓕᕈᖕᓇᕆᐊᖏᑕ ᐊᒻᒪᓗ ᖃᓄᖅ ᐱᐅᓯᒋᐊᖅᑎᑕᐅᓯᒪᓕᕈᖕᓇᕐᒪᖔᑕ ᐊᑐᖅᑕᐅᕙᖕᓂᖏᓐᓂ.

ᑕᕐᕆᔭᒐᒃᓴᓕᐊᖑᓯᒪᔪᑦ ᐃᓱᒪᓕᐅᕈᑎᖃᕐᒪᑕ ᓇᓗᓇᐃᖅᑕᐅᓯᒪᓂᖃᓕᖁᓪᓗᒋᑦ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᒋᔭᐅᔪᑦ ᐱᓕᕆᖃᑎᖃᖅᐸᒃᑐᑦ ᐃᑲᔪᖅᑎᒋᔭᐅᕙᒃᓱᑎᒃ ᒪᒃᑯᒃᑐᓄᑦ, ᐃᒡᓗᒃᓴᖃᖅᑎᑦᓯᓂᐅᕙᒃᑐᓄᑦ ᐊᒻᒪᓗ ᐊᑎᓕᐅᖅᑕᐅᓯᒪᓕᖁᓪᓗᒍ ᐃᑲᔪᕈᑎᒃᓴᐅᕙᒃᑐᑦ ᐱᓯᒪᐃᓐᓇᕋᓱᖕᓂᕐᒥ ᐃᖅᑲᓇᐃᔭᖅᑎᐅᔪᓂᒃ ᐱᓕᕆᐊᒃᓴᐅᔪᓄᑦ ᐃᓚᒋᔭᐅᖃᑕᐅᔪᓕᕆᓂᕐᒥ, ᐊᒻᒪᓗ ᐅᖃᐅᓯᕐᒥ ᑐᓗᖅᑕᕐᕕᐅᕙᒃᑐᓂᒃ ᐊᑐᕈᖕᓃᖅᑎᑦᓯᓯᒪᓕᖁᓪᓗᒋᑦ ᐃᖅᑲᓇᐃᔭᖅᑎᓂ ᐃᓄᒃᑎᑐᑦ ᐅᖃᓪᓚᖃᑎᖃᖅᐸᒃᑐᓄᑦ.

“ᒪᓕᑦᓯᐊᕈᖕᓇᕈᑦᑎᒍ ᑕᒪᒃᑯᐊ ᐃᓱᒪᓕᐅᕈᑎᐅᓯᒪᔪᑦ, ᐃᒻᒥᓃᖃᑦᑕᖅᑐᑦ ᐊᒥᓲᖖᒋᓐᓂᖅᓴᐅᓕᕈᖕᓇᕐᒪᑕ,” ᒍᐃᓕᐊᒻ ᐅᖃᓪᓚᒃᖢᓂ ᑕᕐᕆᔭᒐᒃᓴᓕᐊᖑᓯᒪᔪᒥ.

ᑖᒃᑯᐊ ᑕᕐᕆᔭᒐᒃᓴᓕᐊᖑᔪᑦ ᐱᓕᕆᐊᖑᒋᐊᓚᐅᖅᓯᒪᕗᑦ ᑕᐃᒪ ᑕᐃᕕᑦ ᖁᐊᒐᖅ ᑮᓇᐅᔭᓂᒃ $5,000-ᓂᑦ ᐱᓕᕆᔾᔪᑎᒃᓴᖅᑖᖅᑎᑕᐅᖕᒪ ᔭᐃᓐ ᒐᓛᔅᑲᐅ ᑎᒥᖁᑎᖓᓂᑦ ᐅᑭᐊᒃᓵᖓᓂ 2019 ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒥᒃ ᐱᓕᕆᐊᖃᕈᑎᒃᓴᖏᓂᒃ.

ᑕᒡᕙᖓᑦ ᑐᑭᒧᐊᒍᑎᒃᓴᖃᖅᑎᐅᓪᓗᓂ ᐃᑲᔪᖅᑎᐅᔪᒥᒃ ᐃᓄᒃᓱᒃ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᖓᓂ ᐊᐱᕆᓕᓚᐅᖅᓯᒪᕗᖅ ᐃᓕᓐᓂᐊᖃᑕᐅᔪᓂᒃ ᐱᑕᖃᕆᐊᒃᓴᖓᓂᒃ ᐃᓚᒋᔭᐅᖃᑕᐅᔪᒪᓇᔭᖅᑐᓂᒃ ᐱᓕᕆᐊᖑᔪᒧᑦ. ᑕᒡᕘᓇ ᐃᕕᒃ, ᑲᓂᐅᓪ, ᒍᐃᓕᐊᒻᔅ ᐊᒻᒪᓗ ᑎᒪᐃᐅ ᐃᓚᐅᖃᑕᐅᓕᓚᐅᖅᓯᒪᕗᑦ.

7-ᖏᖅᑕᕐᓱᑎᒃ ᑲᑎᒪᔾᔪᑎᖃᖅᐸᒃᓱᑎᒃ ᖃᐅᔨᓴᐃᓂᕐᒥᓐᓄᑦ ᖃᓄᖅ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᖅ ᐱᓕᕆᓂᖃᕐᕕᐅᓕᕈᖕᓇᕐᒪᖔᑦ, ᑖᒃᑯᐊ ᓯᑕᒪᐅᓪᓗᑎᒃ ᐃᓕᓐᓂᐊᖅᑏᑦ ᓇᓂᓯᓯᒪᓕᓚᐅᖅᑐᑦ ᓄᓇᕗᑦ ᒐᕙᒪᖓᑕ ᐱᓕᕆᐊᕆᔭᕆᐊᖃᖅᑕᖏᑦ ᐊᑐᕐᓂᖃᖅᑑᓗᑎᒃ ᓴᓇᕐᕈᑎᐅᓕᕈᖕᓇᕆᐊᖏᑕ ᐃᒪᓐᓇ ᒐᕙᒪᒃᑯᓐᓂ ᐃᖅᑲᓇᐃᔭᕐᕕᐅᔪᐃᑦ ᐊᑐᓗᐊᖅᐸᖖᒋᓐᓂᖏᑕ ᐊᑐᕈᖕᓇᖅᑕᒥᖕᓂᒃ, ᖁᐊᒐᖅ ᐅᖃᖅᓱᓂ. ᑕᐃᒪᓗ, ᑖᒃᑯᐊ ᐱᓕᕆᖃᑎᒌᒃᑎᔪᑦ ᐃᓱᒪᓕᐅᖅᓯᒪᓕᓚᐅᖅᑐᑦ ᑕᕐᕆᔭᒐᒃᓴᓕᐊᒥᒃᑎᒍᑦ ᐱᓕᕆᐊᖑᔭᕆᐊᖃᖅᑐᑦ ᐱᐅᓯᒋᐊᖅᑎᑕᐅᓯᒪᓕᕈᖕᓇᕐᓂᖏᓐᓄᑦ ᑐᕌᖅᑎᑕᐅᓯᒪᔪᖕᓇᕐᒪᑕ.

ᓲᕐᓗ, ᐃᖅᑲᓇᐃᔭᕐᕕᐅᔪᒥ ᐱᓕᕆᓂᖃᓕᖅᓯᒪᔪᖃᖅᐸᑦ ᑭᓇᑐᐃᓐᓇᒥᒃ ᐃᒻᒥᓃᕈᒪᓂᖃᓕᖅᓯᒪᔪᒥᒃ ᐃᓅᓯᓕᕆᔨᒥᑦ ᐃᑲᔪᖅᑕᐅᓕᕆᐊᖃᖅᑐᒥᒃ, ᐱᓕᕆᐊᖑᔭᕆᐊᓖᑦ ᑐᕌᖓᑎᑕᐅᓯᒪᓕᕈᖕᓇᕐᒪᑕ ᐊᑦᑕᑕᖅᓯᒪᓕᕈᑎᒃᓴᓄᑦ ᐱᓕᕆᔨᐅᔪᒧᑦ, ᖁᐊᒐᖅ ᐅᖃᖅᓱᓂ.

ᓯᑕᒪᐅᔪᓂᑦ ᐃᓕᓐᓂᐊᖅᑐᓂᑦ, ᐃᕕᒃ ᐊᒻᒪᓗ ᑎᒪᐃᐅ ᑕᕐᕆᔭᒐᒃᓴᓕᐅᕈᑎᐅᔪᒥ ᐅᐸᒍᑎᓯᒪᔪᖕᓇᓚᐅᕐᒪᑎᒃ. ᖁᐊᒐᖅ ᑐᑭᒧᐊᒃᑎᑦᓯᔨᐅᑎᓪᓗᒍ ᖃᓄᐃᓕᐅᖅᑎᑦᓯᓂᐅᔪᒧᑦ.

ᐅᔾᔨᕐᓇᖅᑑᓪᓗᑎᒃ ᐅᐸᒍᑎᓯᒪᓚᐅᖖᒋᒻᒪᑕ ᐊᒥᓱᑦ ᒥᓂᔅᑕᐅᔪᐃᑦ ᐊᒻᒪᓗ ᐃᓱᒪᑕᐅᓪᓗᑎᒃ ᒐᕙᒪᒃᑯᓐᓂᑦ ᐃᖅᑲᓇᐃᔭᕐᕕᐅᔪᐃᑦ ᐱᓕᕆᓂᖃᖅᐸᒃᑐᑦ ᐱᓕᕆᐊᕆᔭᐅᔭᕆᐊᓕᖁᑎᓂᒃ, ᖁᐊᒐᐅᑉ ᐅᐸᖃᑕᐅᓯᒪᖁᓪᓗᒋᑦ ᑕᕐᕆᔭᖅᑎᑦᓯᓂᖃᕐᓂᐊᕐᓂᕐᒥᓐᓄᑦ ᑐᓴᖅᑎᓯᒪᓚᐅᖅᑕᖏᑦ. ᑖᒃᑯᐊ ᐱᔾᔪᑎᖃᖅᑎᒋᔭᐅᔪᐃᑦ ᐃᖅᑲᓇᐃᔭᖅᑎᐅᔪᓄᑦ ᐃᓚᒋᔭᐅᓚᐅᖅᐳᑦ ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᓐᓂᑦ, ᐃᖅᑲᖅᑐᐃᕝᕕᓕᕆᔨᒃᑯᓐᓂᑦ, ᐃᓚᒌᒃᑐᓕᕆᔨᒃᑯᓐᓂᑦ ᐊᒻᒪᓗ ᐃᓕᓐᓂᐊᕐᓂᓕᕆᔨᒃᑯᓐᓂᑦ, ᐃᓚᖃᖃᑕᐅᓪᓗᑎᒃ ᓄᓇᕗᒻᒥ ᐃᒡᓗᓕᕆᔨᒃᑯᓐᓂᑦ ᐊᒻᒪᓗ ᐸᓖᓯᒃᑯᓐᓂᑦ.

ᑕᐃᒃᑯᓇᖖᒐᑦ ᖃᐃᖃᑕᐅᖁᔭᐅᓯᒪᓚᐅᖅᑐᓂᑦ, ᐸᓖᓯᒃᑯᓐᓄᑦ ᐃᓱᒪᑕᒻᒪᕆᒃ ᐊᒫᓐᑕ ᔫᓐᔅ ᐊᒻᒪᓗ ᐋᕆᐋᓇ ᕼᐋᕋᒥᓐᓯᒃ, ᐃᓱᒪᑕᒻᒪᕆᐅᔪᖅ ᐃᓚᒌᒃᑐᓂᓕᕆᒃᑯᓐᓂᑦ, ᑭᓯᒥᑐᐊᖅ ᐅᐸᒍᑎᓯᒪᓚᐅᕐᒪᑎᒃ.

ᓇᓕᖏᓪᓘᓐᓃᑦ ᐅᐸᒍᑎᓯᒪᖁᔭᐅᓪᓗᑎᒃ ᑐᓴᖅᑎᑕᐅᓚᐅᖅᑐᑦ ᒥᓂᔅᑕᐅᔪᑦ ᐅᐸᒍᑎᓚᐅᖖᒋᓚᑦ.

ᐅᖃᓪᓚᒃᑎᒋᔭᐅᔪᑎᒍᑦ, ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᒥᓂᔅᑕ ᔮᓐ ᒪᐃᓐ, ᐃᓕᓐᓂᐊᕐᓂᓕᕆᔨᒃᑯᓐᓄᑦ ᒥᓂᔅᑕ ᐹᒥᓚ ᒍᕌᔅ ᐊᒻᒪᓗ ᐃᓚᒌᒃᑐᓕᕆᔨᒃᑯᓐᓄᑦ ᒥᓂᔅᑕ ᒫᒍᕆᑦ ᓇᑲᓱᒃ ᐅᖃᓚᐅᖅᐳᑦ ᐅᐸᒍᑎᓯᒪᔪᖕᓇᓚᐅᖖᒋᓐᓂᕐᒥᓐᓂᒃ ᑕᕐᕆᔭᖅᑎᑦᓯᓂᖃᖅᑎᓪᓗᒋᑦ ᑭᓯᐊᓂᓗ ᑕᑯᓐᓇᕈᒫᕐᓂᕋᖅᓯᒪᓚᐅᖅᑐᑦ ᐅᕝᕙᓘᓃᑦ ᑕᑯᓐᓈᓂᒃᓯᒪᓕᓚᐅᖅᓱᑎᒃ.

ᐃᖅᑲᖅᑐᐃᕝᕕᓕᕆᔨᒃᑯᓐᓄᑦ ᒥᓂᔅᑕ ᑕᐃᕕᑦ ᐊᕿᐊᕈᖅ ᐅᖃᓚᐅᕐᐳᖅ ᐊᑐᐃᓐᓇᐅᓕᕈᖕᓇᓚᐅᖖᒋᓐᓇᒥ ᑭᓯᐊᓂᓗ ᓯᕗᓂᐅᓂᐊᖅᑐᒥ ᑕᕐᕆᔭᒐᒃᓴᓕᐊᖑᓯᒪᔪᒃ ᑕᑯᓐᓈᕈᓐᓇᕈᒪᓂᐊᕋᒥᐅᒃ.

ᓇᑲᓱᖕᒧᑦ ᐅᖃᓪᓚᒃᑎᐅᔪᖅ, ᑭᐊᕆ ᒪᒃᓚᔅᑭ, ᐅᖃᓚᐅᕐᐳᖅ ᐃᓛᒃᑰᖓᓗᓂ ᑕᕐᕆᔭᒐᒃᓴᓕᐊᖑᓯᒪᔪᒥᒃ ᑕᑯᓐᓇᖅᑎᑦᓯᔪᒪᓂᕐᒥᓂᒃ ᐃᖅᑲᓇᐃᔭᕐᕕᐅᔪᒥ ᐃᖅᑲᓇᐃᔭᖅᑐᓕᒫᑦ ᑕᕐᕆᔭᖅᑎᑕᐅᓂᐊᖅᑎᓪᓗᒋᑦ.

ᓄᓇᕗᒻᒥ ᐃᒡᓗᓕᕆᔨᒃᑯᑦ ᑭᐅᓯᒪᓕᕈᖕᓇᓚᐅᖖᒋᒻᒪᑕ ᓄᓇᑦᓯᐊᕐᒥ ᐱᕙᓪᓕᐊᔪᓕᕆᔨᒃᑯᑦ ᑭᐅᓯᒪᓕᕆᐊᖃᕐᕕᖓᓂ ᐅᓪᓗᕐᒥ.

“ᐅᒡᒍᐊᕈᑎᒋᓪᓚᕆᒃᐸᕋ ᐊᒻᒪᓗ ᓂᑲᓪᓗᕐᓇᕆᓪᓗᒍ,” ᑎᒪᐃᐅ ᐅᖃᓚᐅᕐᐳᖅ ᐊᒥᓲᖖᒋᓗᐊᖅᑐᑦ ᐅᐸᒍᑎᓯᒪᓚᐅᕐᓂᖏᓐᓄᑦ ᐱᔾᔪᑎᖃᖅᓱᓂ, ᐅᖃᒃᑲᓐᓂᕐᓱᓂᓗ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᖃᓄᐃᓕᐅᕆᐊᖃᖅᑎᑕᐅᓯᒪᓂᑦ ᑕᕝᕙᐅᒐᓗᐊᖅᑎᓪᓗᒋᑦ, ᐃᓂᖃᑦᓯᐊᖅᑎᑕᐅᔪᖕᓇᓚᐅᕋᓗᐊᕐᒪᑕ ᒥᓂᔅᑕᐅᔪᑦ ᐅᐸᒍᑎᓚᐅᕈᑎᒃ.

“ᒐᕙᒪᓕᕆᔨᐅᔪᑦ ᐅᖃᐅᔾᔨᕙᓐᓂᖏᑦ ᓄᓇᕗᒻᒥᐅᓂᒃ ᒪᒃᑯᒃᑐᐃᑦ ᑐᓴᖅᑕᐅᕙᖕᓂᖏᑕ ᓈᒻᒪᖖᒋᒻᒪᑕ ᐅᖃᑐᐃᓐᓇᖅᐸᖕᓂᖏᑦ, ᑎᒪᐃᐅ ᐅᖃᖅᓱᓂ, ᐅᖃᒃᑲᓐᓂᕆᓪᓗᓂ, “ᐅᖃᐅᓯᒃᓴᒃᑲ ᑐᓴᖅᑕᐅᑐᐃᓐᓇᖁᖖᒋᓐᓇᒃᑭᑦ, ᐱᓕᕆᓂᖃᕐᕕᐅᓕᖁᒐᒃᑭᑦ,”