ᓄᓇᕗᒻᒥ ᓯᓚᑦᑐᖅᓴᕐᕕᒃ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᕈᑎᓂᒃ ᐊᖏᒡᓕᒋᐊᖅᑎᑦᑎᓂᕐᒥ ᖃᐅᔨᓇᓱᒃᑐᑦ

ᐃᓕᓐᓂᐊᕈᑎᒃᓴᖅ ᐃᓕᓐᓂᐊᒃᑲᓐᓂᕈᑎᒃᓴᓂᒃ ᐱᓕᕆᐊᓂᒃ ᐊᐅᓚᑦᑎᓂᕐᒥᒃ, ᓇᖕᒥᓂᖅ ᐊᐅᓚᑦᑎᓂᕐᒥᒃ, ᒥᓂᔅᑕ ᐅᖃᕐᑐᖅ

ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᐹᒥᓚ ᒍᕉᔅ ᐅᖃᓚᐅᕐᑐᖅ ᒪᓕᒐᓕᕆᕕᒡᔪᐊᒥ ᐅᑯᐊ ᓄᓇᕗᒻᒥ ᓯᓚᑦᑐᖅᓴᕐᕕᒃ, ᐱᓕᕆᖃᑎᖃᕐᓂᒃᑯᑦ ᒪᒨᕆᐅᓪ ᓯᓚᑦᑐᖅᓴᕐᕕᐊᓗᖕᒥ, ᖃᐅᔨᓇᓱᓕᕐᒪᑕ ᖃᓄᖅ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᖅᑏᑦ ᑲᔪᓯᒃᑲᓐᓂᕈᑎᒋᔪᓐᓇᖅᑕᖏᓐᓂᒃ ᐸᐃᑉᐹᖅᑖᕋᓱᖕᓂᕐᒧᑦ ᐃᓕᓐᓂᐊᖅᓯᒪᓂᕐᒥᒃ ᐊᒻᒪᓗ ᐃᓕᓐᓂᐊᕌᓂᒃᓯᒪᔾᔪᑎᒃᓴᓂᒃ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᑕᐃᕕᑦ ᓛᕼᐄᑦ

For an English version of this story, please see: Nunavut Arctic College looks to expand management program.

ᓄᓇᕗᒻᒥ ᓯᓚᑐᖅᓴᕐᕕᒃ ᖃᐅᔨᓇᓱᒃᑐᖅ ᐊᖏᒡᓕᒋᐊᖅᑎᑦᑎᓂᕐᒥᒃ ᐊᐅᓚᑦᑎᓂᕐᒧᑦ ᐃᓕᓐᓂᐊᕐᓯᒪᓂᕐᒧᑦ ᓇᓗᓇᐃᒃᑯᑎᑖᕈᑎᒃᓴᓂᒃ ᑕᒪᒃᑯᐊ ᐃᓕᓐᓂᐊᖅᑏᑦ ᐱᕕᖃᕈᓐᓇᕐᓂᕐᓴᐅᓗᑎᒃ ᑎᓴᒪᓂᒃ ᐊᕐᕌᒍᓂᒃ ᐃᓕᓐᓂᐊᕈᑎᒃᓴᓂᒃ ᓇᖕᒥᓂᕆᔭᐅᔪᓄᑦ ᐅᕝᕙᓘᓐᓃᑦ ᐃᓕᓐᓂᐊᕌᓂᒃᓯᒪᔾᔪᑎᓂᒃ ᐊᐅᓚᑦᑎᔨᐅᓂᕐᒧᑦ.

“ᖁᕕᐊᓱᑦᑎᐊᖅᑐᒍᑦ ᑕᒪᓐᓇ ᖃᐅᔨᓇᓱᒃᖢᑎᒍ ᐱᓕᕆᐊᕆᔭᐅᔪᓐᓇᖅᑐᖅ,” ᐃᓕᓐᓂᐊᕐᓂᓕᕆᓂᖅᒧᑦ ᒥᓂᔅᑕ ᐹᒥᓚ ᒍᕉᔅ ᐅᖃᓚᐅᕐᑐᖅ ᒪᓕᒐᓕᕆᕕᒡᔪᐊᕐᒥᓐ ᔫᓂ 10-ᒥ ᑲᑎᒪᑎᓪᓗᒋᑦ ᑖᒃᑯᐊ ᐃᓕᓐᓂᐊᕐᓂᓕᕆᔨᒃᑯᑦ ᐊᐅᓚᔾᔪᑎᒃᓴᖏᓐᓂᒃ ᕿᒥᕐᕈᐊᖅᑎᓪᓗᒋᑦ.

ᑐᕌᒐᕆᔭᐅᓇᓱᒃᑐᖅ ᓄᑖᓂᒃ ᐃᓕᓐᓂᐊᖅᐸᓪᓕᐊᔾᔪᑎᒃᓴᓂᒃ ᓂᕈᐊᕐᕕᐅᔪᓐᓇᖅᑐᓂᒃ, ᐱᓕᕆᖃᑎᖃᕐᓂᐊᖅᖢᑎᒃ ᒪᒨᕆᐅᓪ ᓯᓚᑦᑐᖅᓴᕐᕕᐊᓗᖕᒥ ᓴᐃᓐ ᔮᓐᔅ, ᓂᐅᕙᐅᓐᓛᒦᑦᑐᒥᒃ, ᐸᕐᓈᓂᒃᓯᒪᓗᑎᒃ 2024-2025 ᐊᕐᕌᒍᒥ, ᐅᖃᕐᑐᖅ.

ᒫᓐᓇᓕ ᓄᓇᕗᒻᒥ ᓯᓚᑦᑐᖅᓴᕐᕕᒃ ᐊᕐᕌᒎᖕᓄ ᒪᕐᕉᖕᓄ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᖅᑎᑦᑎᖃᑦᑕᕐᒪᑕ ᐸᐃᑉᐹᖅᑖᕋᓱᖕᓂᕐᒧᑦ ᐊᒻᒪᓗ ᐊᕐᕌᒍ ᐊᑕᐅᓯᕐᒧᑦ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᒐᒃᓴᓂᒃ ᓇᓗᓇᐃᒃᑯᑎᑖᕋᔭᕐᓂᕐᒧᑦ ᑲᖏᖅᖠᓂᖅᒥ. ᐅᑯᐊ ᐃᓕᓐᓂᐊᒐᒃᓴᐃᑦ ᐊᔪᕈᓐᓃᖅᓴᕈᑎᐅᔪᑦ ᐊᐅᓚᑦᑎᔨᐅᓂᕐᒥᒃ ᐊᒻᒪ ᓇᖕᒥᓂᖅ ᐱᓕᕆᐊᒥᒃ ᐊᐅᓚᑦᑎᔪᓐᓇᕐᓂᕐᒧᑦ.

ᐃᓕᓐᓂᐊᕌᓂᒃᓯᒪᓂᖅ ᐱᓕᕆᐊᓂᒃ ᐊᐅᓚᑦᑎᓂᕐᒧᑦ ᓇᖕᒥᓂᖅ ᐊᐅᓚᑦᑎᔨᐅᓂᕐᒧᓪᓘᓐᓃᑦ ᐸᐃᑉᐹᖅᑖᕈᑎᓂᒃ ᐃᓕᓐᓂᐊᖅᑎᓂᒃ ᐱᕕᖃᕈᑎᐅᓕᕈᓐᓇᖅᑐᑦ ᐸᐃᑉᐹᖅᑖᕈᑎᒧᑦ ᐃᓕᓐᓂᐊᕈᑎᓂ ᐱᐊᓂᒃᓯᔪᓄᑦ ᒪᑯᓂᐊ ᐃᓕᓐᓂᐊᒃᑲᓐᓂᕈᑎᓂᒃ ᐱᔪᓐᓇᕐᓯᒃᑲᓐᓂᕐᓗᑎᒃ, ᓄᓇᕗᒻᒥ ᓯᓚᑦᑐᖅᓴᕐᕕᒃᒧᑦ ᐊᖓᔪᖅᑳᖅ ᕇᐱᑲ ᒥᐅᓐᔅ ᐅᖃᓚᐅᕐᑐᖅ.

ᓯᕗᓪᓕᕐᓕ ᐃᓱᒪᒋᔭᐅᓚᐅᕐᑐᖅ ᐋᖅᑭᒃᓱᐃᓂᐊᕐᓗᑎᒃ ᐃᓕᓐᓂᐊᕈᑎᒃᓴᒥ ᐅᓇ ᐃᓕᓐᓂᐊᒃᑲᓐᓂᖅᓯᒪᓂᕐᒧᑦ ᓇᓗᓇᐃᒃᑯᑎ ᒪᑯᓄᖓ ᐱᓕᕆᐊᓄᑦ ᐅᕝᕙᓘᓐᓃᑦ ᓇᖕᒥᓂᖅ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᒃᑲᓐᓂᕈᑎᐅᔪᓐᓇᕋᔭᕐᑐᖅ ᐊᐅᓚᑦᑎᔨᐅᓂᕐᒧᑦ ᐸᐃᑉᐹᖅᑖᕈᑎᓄᑦ ᐃᓕᓐᓂᐊᕈᑎᓂᒃ, ᒥᐅᓐᔅ ᐅᖃᕐᑐᖅ.

ᑭᓯᐊᓂᓕ ᐅᖃᒃᑲᓐᓂᓚᐅᕐᑐᖅ ᓄᓇᕗᒻᒥ ᓯᓚᑦᑐᖅᓴᕐᕕᒃ ᐊᒻᒪ ᒪᒨᕆᐅᓪ ᓯᓚᑦᑐᖅᓴᕐᕕᐊᓗᒃ ᓱᓕ ᐋᖅᑭᒃᓱᐃᔭᕆᐊᖃᕐᒪᑕ ᐱᐊᓂᒍᑎᒃᓴᓂᒃ ᒪᑯᓂᖓ ᖃᓄᐃᑦᑐᑦ ᐃᓕᓐᓂᐊᕈᑏᑦ ᐱᐅᓛᖑᖕᒪᖔᑕ ᓄᓇᕗᒻᒥᐅᓄᑦ ᐃᓕᓐᓂᐊᖅᑎᓄᑦ ᐊᐅᓚᑦᑎᔨᐅᓂᕐᒧᑦ.

ᐋᖅᑭᒃᓱᐃᓇᓱᖕᓂᖅ ᐃᓕᓐᓂᐊᒃᑲᓐᓂᕈᑎᐅᓇᔭᕐᑐᓂᒃ ᐅᖓᑖᓅᖓᖕᒪᑦ ᐊᐅᓚᑦᑎᔨᐅᓂᕐᒧᑦ ᐸᐃᑉᐹᖅᑕᕈᑎᒧᑦ ᐃᓚᒋᔭᐅᓪᓗᓂ ᐊᕐᕌᒍᑦ ᖁᓕᓄᑦ ᑐᑭᓯᖃᑦᑕᐅᑎᓂᕐᒥᒃ ᓄᓇᕗᒻᒥ ᓯᓚᑦᑐᖅᓴᕐᕕᒃ ᐊᒻᒪ ᒪᒨᕆᐅᓪ ᓯᓚᑦᑐᖅᓴᕐᕕᐊᓗᖕᒥ ᐊᑎᓕᐅᓚᐅᕐᓯᒪᔭᖓᓂᒃ 2019-ᒥ.

ᐱᓕᕆᖃᑎᒌᖕᓂᒃᑯᑦ ᐅᑯᐊ ᒪᒨᕆᐅᓪ ᓯᓚᑦᑐᖅᓴᕐᕕᒡᔪᐊᖅ ᐃᑲᔪᕈᑎᒃᓴᖃᖅᑎᑦᑎᔪᖅ ᓯᓚᑦᑐᕐᓴᕐᕕᒃᒥ ᐃᓕᓐᓂᐊᕈᑎᐅᓂᐊᖅᑐᓂᒃ ᓯᓚᑦᑐᖅᓴᕐᕕᒡᔪᐊᒥ ᐃᓕᓐᓂᐊᖅᑕᐅᕙᒃᑐᓂᒃ ᐃᓚᖃᖅᖢᓂ ᓄᓇᕗᒥᑦ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᓂᒃ ᐊᒻᒪᓗ ᐃᓄᓕᕆᓂᕐᒧᑦ ᐃᓕᓐᓂᐊᒃᑲᓐᓂᕈᑎᒃᓴᓂᒃ.

ᑐᓴᒐᒃᓴᓕᐊᖓ ᒍᕉᔅ ᑭᖑᓂᐊᒍᑦ ᐊᐱᖅᑯᑎᖃᕈᑎᐅᓚᐅᕐᑐᖅ ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᖅᑎᒧᑦ ᐋᑕᒻ ᐋᕆᐊᒃ ᓚᐃᑦᓯᑑᓐᓄ, ᐊᐱᕆᓪᓗᓂ ᐅᑯᐊ ᓄᓇᕗᒻᒥ ᓯᓚᑦᑐᖅᓴᕐᕕᒃᑯᑦ ᐱᓕᕆᐊᑎᖃᕐᓂᐊᕐᒪᖔᑕ ᒪᒨᕆᐅᓪ ᓯᓚᑦᑐᖅᓴᕐᕕᐊᓗᖕᒥ ᐊᖏᒡᓕᒋᐊᖅᑎᑦᑎᓂᕐᒥᒃ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᕈᑎᒃᓴᓂᒃ.

ᐅᖃᒃᑲᓐᓂᖅᖢᓂ ᐅᓄᕈᓘᔭᕐᑐᓂᒃ ᐃᖅᑲᓇᐃᔮᒃᓴᖅᑕᖃᕐᓂᖓᓂᒃ ᓄᓇᕗᒥᑦ ᒐᕙᒪᒃᑯᓐᓂᒃ ᐱᓕᕆᐊᓄᑦ ᐊᐅᓚᑦᑎᔨᐅᔪᓐᓇᖅᑐᓄᑦ ᒪᐅᓇ ᓲᕐᓗ ᑮᓇᐅᔭᓕᕆᓂᒃᑯᑦ.

“ᐅᓇ ᐱᒋᐊᕈᑎᒻᒪᕆᒃ ᐅᓄᖅᑐᓂᒃ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐃᓄᖕᓄᑦ.” ᒥᐅᓐᔅ ᐅᖃᕐᑐᖅ ᐅᑯᐊ ᓄᓇᕗᒻᒥ ᓯᓚᑦᑐᖅᓴᕐᕕᒃ ᐊᖏᒡᓕᒋᐊᖅᑎᑦᑎᔪᒪᓂᖏᓐᓂᒃ ᐃᓕᓐᓂᐊᕈᑎᒃᓴᓂᒃ ᓯᓚᑦᑐᖅᓴᕐᕕᐊᓗᖕᒥ ᐃᓕᓐᓂᐊᕈᑎᓄᑦ.

ᐅᑯᐊ ᓄᑖᑦ ᐃᓕᓐᓂᐊᒃᑲᓐᓂᕈᑎᒃᓴᐃᑦ ᓄᓇᕗᒥᑦ ᐃᓕᓐᓂᐊᖅᑎᑦᑎᔾᔪᑎᐅᓂᐊᖅᑐᑦ ᐊᒻᒪᓗ ᐃᓕᓴᐃᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᖅᑲᓇᐃᔭᖅᑎᐅᓗᑎᒃ ᐊᒻᒪ ᒪᒨᕆᐅᓪ ᓯᓚᑦᑐᖅᓴᕐᕕᐊᓗᖕᒥ, ᐅᖃᕐᑐᖅ.

ᖃᓄᐃᓕᐅᕈᑎᒃᓴᑦ ᐃᓚᖃᕐᑐᑦ ᐱᐊᓂᒃᓯᓂᕐᒥᒃ ᓯᓚᑦᑐᖅᓴᕐᕕᐊᓗᖕᒥ ᐸᐃᑉᐹᖅᑖᕈᑎᒃᓴᓂᒃ ᐃᓚᖃᖅᖢᓂ ᐋᖅᑭᒃᓱᐃᓇᓱᖕᓂᕐᒥᒃ ᐃᑲᔫᑎᒃᓴᓂᒃ ᐊᓯᐊᓂᙶᖅᑐᓂᒃ, ᐃᒡᓗᓕᕆᓂᕐᒥᒃ ᐃᓕᓐᓂᐊᖅᑎᓄᑦ ᐊᒻᒪᓗ ᐃᓕᓐᓂᐊᕐᕕᒋᔭᐅᓇᔭᖅᑐᓂᒃ, ᐅᖃᕐᑐᖅ.

“ᐱᓕᕆᐊᒃᓴᖅᑕᖃᕈᓘᔭᕐᒪᓐ ᐱᓕᕆᐊᖑᓇᓱᒃᑑᑦ ᐅᖓᑖᒍᑦ ᐊᑐᖅᑕᐅᔭᕆᐊᓕᖕᓂᒃ,” ᒥᐅᓐᔅ ᐅᖃᕐᑐᖅ.

Share This Story

(0) Comments

Join the Conversation

Your email address will not be published. Required fields are marked *

*