ᓄᓘᔮᑦ ᓄᓇᖓᓂ ᓴᐳᓐᓂᐊᖅᑎᑦ – ᑐᓴᒐᒃᓴᓕᐊᕆᔭᐅᓛᖑᓯᒪᔪᑦ 2021ᒥ

For an English version of this story, please see Nuluujaat Land Guardians — Newsmaker of 2021.

ᓯᑭᑑᖏᓐᓂᒃ ᐅᖅᓴᒃᓴᐃᒐᒥᒃ ᐃᖏᕐᕋᓕᖅᖢᑎᒃ ᐃᑲᕐᕋᒐᓴᒻᒪᕆᖕᓂᒃ ᕿᑭᖅᑖᓘ ᓄᓇᖓᒍᑦ ᐃᓄᖃᙱᑦᑐᒥᒃ ᐊᖅᑯᑎᓕᐊᖑᓯᒪᔪᒧᑦ ᐊᒻᒪᓗ ᒥᑦᑕᕐᕕᓕᐊᖑᓯᒪᔪᒧᑦ.

ᑕᐃᑲᓂ ᑐᑉᐸᒃᓴᖅᖢᑎᒃ ᑖᖅᑐᕈᓗᖕᒥ ᕕᕝᕗᐊᕆᒥ ᐃᑭᒪᑎᑦᑎᓕᓚᐅᕐᓯᒪᔪᑦ ᐊᒻᒪ ᐅᑕᖅᑭᓕᖅᖢᑎᒃ.

ᑕᒪᑐᒥᖓ ᑐᓴᑲᑕᓕᖅᖢᑎᒃ. ᑖᒃᑯᐊᓕ ᐃᓄᐃᑦ ᐃᒻᒥᖕᓂᒃ ᐊᑎᖃᖅᑎᑦᑐᑦ ᓄᓘᔮᑦ ᓄᓇᖓᓂ ᓴᐳᓐᓂᐊᖅᑎᓂ ᓄᓘᔮᑦ ᓴᕕᕋᔭᒃᓴᖅᒥᒃ ᐅᔭᕋᒃᓯᐅᖅᕕᐅᒃ ᐊᖅᑯᑎᖏᓐᓂᒃ ᐊᑐᖅᑕᐅᔪᓐᓇᐃᓪᓕᑎᑦᑎᓚᐅᕐᓯᒪᔪᑦ.

ᓈᒻᒪᒃᓴᓚᐅᕐᓯᒪᙱᒻᒪᑕ ᐊᖏᒡᓕᒋᐊᖅᑕᐅᔪᒪᓂᖓ ᐅᔭᕋᒃᓯᐅᖅᕕᒃ, ᓇᖕᒥᓂᕆᔭᐅᓪᓗᓂ ᐹᕙᓐᓛᓐ ᓴᕕᕋᔭᒃᓴᖅᒥᒃ ᐅᔭᕋᒃᓯᐅᖅᕕᒃ ᑯᐊᐳᕇᓴᓐᑯᓐᓄᑦ. ᑖᓐᓇᓗ ᐊᖏᖅᑕᐅᒃᐸᑦ ᓄᓘᔮᖕᓂ ᓴᕕᕋᔭᒃᓴᓂᒃ 12 ᒥᓕᐊᓐ ᑕᓐᔅᓂ ᐱᕝᕕᐅᖃᑦᑕᓕᕋᔭᖅᖢᓂ ᐊᕐᕌᒍᒥᒃ, ᑕᐃᒪᓐᓇᓗ ᐊᐅᓪᓚᖅᑎᑦᑎᖃᑦᑕᕐᓂᕐᓴᐅᓕᕐᓗᑎᒃ ᐊᒻᒪᓗ ᓴᓇᓂᕐᓴᐅᓕᕐᓗᑎᒃ ᐅᑭᐅᕐᑕᖅᑐᕐᒥᒃ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥᒃ.

ᖃᓄᐃᓕᐅᕈᑎᐅᒃᑲᓐᓂᓕᒑᔪᑦ ᐊᒃᓱᐊᓗᒃ ᐊᕙᑎᒋᔭᒧᑦ ᐊᒃᑐᐃᒍᑎᖃᕋᔭᒻᒪᕆᖕᒪᑦ, ᐃᓄᐃᑦ ᐅᖃᕐᑐᑦ ᓄᓇᖃᖅᑐᑦ ᖃᓂᒋᔭᖓᓂᒃ ᐅᑯᓇᓂ ᒥᑦᑎᒪᑕᓕᒃ, ᐃᒡᓗᓕᒃ ᐊᒻᒪ ᐃᒃᐱᐊᕐᔪᒃᒥ.

ᑖᓐᓇ ᐊᖏᒡᓕᒋᐊᖅᑕᐅᑎᑦᑎᔪᒪᓂᖅ ᐊᖏᕐᑕᐅᒃᐸᑦ, ᐃᓱᒪᖕᒪᑕ ᐅᓄᕐᓯᒃᑲᓐᓂᕋᔭᕐᓂᖏᓐᓄᑦ ᒪᑯᐊ ᐅᒥᐊᑦ, ᓄᓇᓯᐅᑏᑦ ᐊᒻᒪ ᓄᓇᓯᐅᑎᑯᑖᑦ ᑐᒃᑐᓂᒃ ᕿᒫᑎᑦᑎᔾᔪᑎᐅᓕᕋᔭᕐᓂᖓᓂᒃ ᐊᒻᒪᓗ ᕿᓚᓗᒐᕐᓂᒃ ᑑᒑᓕᖕᓂᒃ ᐃᓄᖕᓄᑦ ᓂᕿᒋᔭᐅᖃᒃᑕᖅᑐᓂᒃ.

ᐅᓇ ᑐᒃᓯᕋᕈᑎᒋᔭᐅᔪᖅ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᐅᑯᑎᒎᓈᖅᐸᓪᓕᐊᔪᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᒃᑯᑦ ᑭᒃᑯᓕᒫᓂᒃ ᑲᑎᒪᔾᔪᑎᒋᔭᐅᓇᓱᒃᖢᓂ ᐊᕐᕌᒎᓕᕐᑑᖕᓂ ᒪᕐᕉᖕᓂ, ᐱᓕᕆᐊᖃᖅᐸᓪᓕᐊᓂᕐᓗ ᓈᒻᒪᙱᓕᐅᕈᑎᓂᒃ ᓴᖅᑭᑎᑦᑎᔾᔪᑎᐅᓯᒪᓪᓗᓂ. ᓄᓇᓕᖕᓂ ᓈᒻᒪᒋᔭᐅᙱᓐᓂᖓᓄᑦ ᐊᒻᒪᓗ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᑖᒃᑯᓂᖓ ᑲᑎᒪᑎᑦᑎᑲᑕᒐᓱᖕᓂᐅᔪᓂᒃ ᐊᒃᑐᐃᓂᖃᕐᒪᑕ ᑕᐃᒪᙵᐅᓚᐅᕐᑐᑦ 2019 ᐃᓱᓕᑉᐸᓪᓕᐊᓕᖅᑎᓪᓗᓂ.

ᑲᑎᒪᑎᑦᑎᑲᑕᒃᑎᓪᓗᒋ ᐃᓄᐃᑦ ᓄᓇᖃᖅᑐᑦ ᕿᑭᖅᑖᓘᑉ ᐅᐊᖕᓇᖓᓃᓐᓂᕐᓴᐃᑦ ᓈᒻᒪᒃᓴᙱᔾᔪᑎᖃᓚᐅᕐᒪᑕ ᐹᕙᓛᓐᑯᑦ ᑭᒡᒐᖅᑐᐃᔨᖏ ᑐᓵᓇᓱᙱᑦᑎᐊᕐᓂᖏᓐᓂᒃ ᐃᓱᒫᓘᑎᒋᔭᐅᔪᓂᒃ.

ᑕᐃᒪᐃᓐᓂᖓᓄᑦ ᓄᓇᒥ ᓴᐳᓐᓂᐊᖅᑎᐅᔪᑦ ᑕᐃᔭᐅᓯᒪᔪᑦ ᐃᖅᑲᖅᑐᐃᕕᒃᑯ ᑎᑎᖃᖁᑎᒋᔭᐅᔪᓂᒃ ᐅᑯᐊᖑᓂᕋᖅᑕᐅᓪᓗᑎᒃ ᓇᐃᒪᓐ ᐃᓄᐊᕋᖅ, ᑖᒻ ᓇᕿᑕᕐᕕᒃ, ᔮᓇᑕᓐ ᐱᑎᐅᓛᖅ, ᑯᕆᔅᑕᕗ ᐊᕿᐊᕈᖅ, ᐋᓐᑎ ᑲᓪᓗᒃ, ᔮᓐ ᑑ ᐊᒻᒪ ᔭᐃᓐ ᑑ ᑐᓴᖅᑕᐅᓇᓱᒻᒪᕆᓕᓚᐅᕐᓯᒪᖕᒪᑕ ᐹᕙᓐᓛᓐᑯᓐᓂᒃ ᓯᒥᒡᓗᒍ ᐅᔭᕋᒃᓯᐅᖅᕕᓕᐊᕐᕕᒃ.

ᑕᐃᒪᐃᓕᐅᕐᓂᖓ ᐊᒃᑐᐃᓂᖃᓚᐅᕐᓯᒪᔪᖅ ᓄᓘᔮᖕᓂ ᐅᔭᕋᒃᓯᐅᖅᕕᒃ ᐊᐅᓚᑕᐅᓂᖓᓂᒃ, ᑖᓐᓇᓕ ᖃᖅᑲᖃᐅᖅᑐᒦᑦᑐᖅ, ᖁᐊᕌᓗᖕᒥ ᐊᒻᒪ ᐃᓄᖃᙱᑦᑐᓂ ᕿᑭᖅᑖᓘᑉ ᐅᐊᖕᓇᖓᓂᒃ ᐊᒻᒪᓗ ᓄᓇᒋᔭᐅᔪᓄᑦ ᐅᖓᓯᒋᔭᐅᓪᓗᓂ. ᐅᓄᕈᓘᔭᕐᑐᑦ ᐃᓄᐃᑦ ᐃᖅᑲᓇᐃᔭᖃᑦᑕᖅᑐᑦ ᓄᓘᔮᑦ ᐅᔭᕋᒃᓯᐅᕐᕕᖓᓂᒃ ᖃᖓᓕᒫᖅ ᐊᒻᒪᓗ ᖃᖓᑕᓲᕐᒧᑦ ᐅᐸᒐᒃᓴᐅᕙᒃᖢᓂᒃ ᓂᕿᒃᓴᓄᑦ, ᐋᓐᓂᐊᖅᑐᓕᕆᔾᔪᑎᓄᑦ ᐊᒻᒪ ᐊᐅᓪᓚᕆᐊᖃᖅᑐᓄᑦ.

ᑖᒃᑯᐊ ᒥᑦᑕᕐᕕᓕᕆᔪᓂᒃ ᓄᖅᑲᖅᑎᑦᑎᓚᐅᕐᓯᒪᔪᑦ. ᑭᓇᑐᐃᓐᓇᖅ ᑎᑭᑦᑐᓐᓇᐃᓪᓕᓪᓗᓂ ᐊᐅᓪᓚᕈᓐᓇᐃᓪᓕᓪᓗᓂᓘᓐᓃᑦ. ᑖᒃᑯᐊᓕ ᐅᖃᓚᐅᕐᑐᑦ ᑐᐊᕕᕐᓇᖅᑐᓂᒃ ᐊᔪᙱᑎᑦᑎᓂᕋᐃᓪᓗᑎᒃ.

ᐱᓕᕆᔪᓐᓃᓚᐅᕐᓯᒪᔪᑦ 700-ᖏᓐᓃᑦᑐᑦ ᐃᖅᑲᓇᐃᔭᖅᑏᑦ ᐅᑕᕿᓕᖅᖢᑎ ᐋᖅᑭᒍᑎᐅᓇᓱᒃᑐᒥᒃ. ᑖᒃᑯᐊᓕ ᐱᓇᓱᐊᕈᓯᓕᒫᖅ ᓄᖅᑲᖓᑎᑦᑎᓚᐅᕐᓯᒪᔪᑦ ᐊᒻᒪᓗ ᑲᒻᐸᓂ ᑮᓇᐅᔭᓕᐅᕈᓐᓃᖅᖢᓂ $14 ᒥᓕᐊᓐᑖᓚᓂᒃ.

ᓄᓘᔮᑦ ᓄᓇᖓᓂᒃ ᓴᐳᓐᓂᐊᖅᑏᑦ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᓴᖅᑭᑎᑦᑎᓚᐅᕐᓯᒪᔪᑦ ᓄᓇᕐᔪᐊᕐᒥᐅᓄᑦ, ᐅᑯᐊᓘᓐᓃᑦ ᒍᕇᓐᐲᔅ ᑕᒪᑐᒥᖓ ᓈᒻᒪᒃᓴᙱᔾᔪᑎᖃᓕᓚᐅᕐᓯᒪᓪᓗᑎᒃ ᒪᒃᓴᒻᐳᒡᒥ.

ᔫᓂᒥ ᓄᓇᕗᒧᑦ ᒪᓕᒐᓕᐅᖅᑎᐅᑎᓪᓗᒍ ᒪᒥᓛᖅ ᖃᖅᑲᖅ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᒥ ᑖᓂᐅᓪ ᕚᓐᑐᒥ ᑲᑎᖃᑎᖃᖁᔨᓚᐅᕐᓯᒪᖕᒪᑦ ᑖᒃᑯᓂᖓ ᓄᓇᒥ ᓴᐳᓐᓂᐊᖅᑎᓂᒃ ᑖᓐᓇᓗ ᐊᖏᕈᑎᒋᓚᐅᕐᓯᒪᓪᓗᓂᐅᒃ.

ᑖᓐᓇᑦᑕᐅᖅ ᐊᖅᑯᑎᒥᒃ ᓯᒥᒃᓯᒪᑎᑦᑎᓂᖓ ᐃᖅᑲᖅᑐᐃᔨᓄᑦ ᐱᓕᕆᐊᕆᔭᐅᔾᔪᑎᒋᓚᐅᕐᒥᔭᖓᑦ ᑖᒃᑯᓇᙵᓪᓗ ᐅᑎᖁᔨᔪᓐᓃᖅᖢᑎᒃ ᐅᔭᕋᒃᓯᐅᖅᕕᒃᒧᑦ ᓄᖅᑲᖅᑎᑦᑎᓇᓱᒡᓗᑎᒃ.

ᐅᓇ ᓄᓘᔮᖕᓂ ᐅᔭᕋᒃᓯᐅᖅᕕᒃ ᐊᖏᒡᓕᒋᐊᖅᑕᐅᔪᒪᓂᖓ ᐊᕕᒃᓯᒪᔾᔪᑎᐅᖕᒪᑦ ᐆᑐᓇᖅ ᐅᑯᐊ ᐊᖅᑯᑎᒥᒃ ᓯᒥᒃᓯᒪᑎᑦᑎᓚᐅᕐᑐᑦ — ᐱᓗᐊᖅᑐᒥᒃ ᐊᔪᓕᖅᑎᑦᑎᓪᓗᑎᒃ ᐅᓄᕈᓘᔭᖅᑐᓂᒃ ᐃᓄᖕᓂ ᐅᔭᕋᒃᓯᐅᕐᕕᒃᒥᑦ ᐅᓪᓗᒐᓴᒻᒪᕆᖕᓂᒃ — ᓈᒻᒪᒃᑲᓗᐊᕐᒪᖔᑦ ᓈᒻᒪᓴᙱᔾᔪᑎᐅᓗᓂ.

ᑭᓯᐊᓂᓕ ᓇᓗᓇᙱᑦᑐᖅ ᐃᓱᒪᓕᐅᕈᑎᒋᔭᐅᔪᖅ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᐊᒃᑐᐃᒍᑎᖃᕋᔭᕐᒪᑦ ᑮᓇᐅᔭᓕᐅᕋᓱᖕᓂᒃᑯᑦ, ᐃᓅᖃᑎᒌᖕᓂᒃᑯᑦ ᐊᒻᒪᓗ ᐊᕙᑎᒋᔭᐅᔪᒥᒃ ᐊᒃᑐᐃᒍᑎᖃᕐᓂᐊᕐᓂᖓᓂᒃ ᕿᑭᖅᑖᓗᒃᒥ ᐊᒻᒪᓗ ᓄᓇᕗᒦᑦᑐᓂᒃ. ᐊᖏᖅᑕᐅᒍᓂ ᐅᓄᕐᓂᕐᓴᓂᒃ ᑮᓇᐅᔭᖅᑕᖃᕋᔭᕐᑐᖅ, ᐅᓄᕐᓂᖅᓴᐃᑦ ᖃᓪᓗᓈᑦ ᐊᒻᒪ ᐅᒥᐊᕐᔪᐊᑦ ᑕᒪᐅᙵᖃᑦᑕᓕᕋᔭᖅᑐᑦ ᑕᐃᒪᓐᓇᓗ ᓇᒃᓴᕋᔭᖅᖢᑎᒃ ᐱᐅᔪᓂᒃ ᐊᒻᒪ ᐱᐅᙱᑦᑐᓂᒃ ᖃᓄᐃᓕᐅᕈᑎᐅᓕᕈᓐᓇᖅᑐᓂᒃ. ᐋᒃᑳᖅᑕᐅᒍᓂ, ᐹᕙᓛᓐᑯᑦ ᐅᖃᓚᐅᕐᑐᑦ ᓄᓘᔮᖕᓂ ᐅᔭᕋᒃᓯᐅᖅᕕᒃ ᐃᒃᓯᖕᓇᖅᑕᐅᑐᐃᓐᓇᕆᐊᓕᒃ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑭᒃᑯᓕᒫᓂᒃ ᑐᓴᐅᒪᑎᑦᑎᓂᕐᒧᑦ ᑲᑎᒪᓂᖓᑦ ᐃᓱᓕᓚᐅᕐᓯᒪᔪᖅ ᓄᕕᐱᕆ 6-ᒥ ᐊᒻᒪᓗ ᑕᐃᑲᙵᑦ ᑲᑎᒪᔩᑦ ᐃᓱᒪᓕᐅᕈᑎᒃᓴᓂᒃ ᑐᓂᓯᓂᐊᖅᑐᑦ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᒧᑦ ᑖᓂᐅᓪ ᕚᓐᑐᒧᑦ. ᑭᓯᐊᓂᓕ ᖃᑯᒍ ᐃᓱᒪᓕᐅᕈᑎᐅᔪᑦ ᑐᓴᕈᑎᐅᓇᔭᕆᐊᒃᓴᖏᓐᓂᒃ ᐅᖃᐅᓯᐅᓯᒪᙱᖢᓂ.

ᑭᓯᐊᓂᓕ ᕚᓐᑐᓪ ᑎᑎᕋᐅᓯᖃᕆᐊᖃᓕᕐᓂᐊᖅᑐᖅ ᐋᑐᕚᒥ ᑎᑎᕋᕐᕕᖓᓂᒃ ᐅᖓᓯᒃᑐᓪᓛᓗᒃᒥᑦ ᐅᔭᕋᒃᓯᐅᖅᕕᒃᒥᑦ, ᐃᖅᑲᓇᐃᔭᖅᑎᖏᓪᓗ, ᓄᓇᓕᖕᓄᓪᓗ, ᕿᓚᓗᒐᕐᓄᑦ ᑑᒑᓕᒃᓄ, ᑐᒃᑐᓄᑦ ᐊᒻᒪ ᐊᖑᓇᓱᒃᑎᓄᑦ ᐆᒪᔪᓂᒃ ᐆᒪᔾᔪᑎᖃᖅᑐᓂᒃ ᐃᓚᖏᑦ ᓂᕆᔪᓐᓇᕐᓂᐊᕐᒪᑕ.

ᐅᑯᐊ ᓄᓘᔮᑦ ᓄᓇᖓᓂ ᓴᐳᓐᓂᐊᖅᑎᑦ ᐊᖅᑯᑎᒥ ᓯᒥᒃᓯᒪᑎᑦᑎᓚᐅᕐᓯᒪᔪᑦ ᖃᐅᔨᒪᖁᔨᓪᓗᑎᒃ ᓄᓇᕐᔪᐊᕐᒥᐅᓂᒃ ᑐᓴᖅᑕᐅᑲᑕᙱᓐᓂᖏᓐᓂᒃ ᐊᒻᒪᓗ ᖃᓄᐃᓕᐅᕈᑎᒋᔭᖓᑦ ᖃᓄᐃᓕᐅᖁᔨᓂᕐᒥᒃ ᐅᖃᕈᓐᓇᖅᑐᑐᐊᕐᒥᒃ ᐅᖃᖃᑎᖃᕈᓐᓇᓕᓚᐅᖅᖢᑎᒃ.

ᐊᒻᒪᓗ ᓂᐱᖏᑦ ᑐᓴᐅᒪᔭᐅᔪᓐᓇᓕᓚᐅᕐᓯᒪᓪᓗᑎᒃ ᓄᓘᔮᖕᓂ ᐅᔭᕋᒃᓯᐅᖅᕕᐅᑉ ᒥᒃᓵᓄᑦ ᐊᒻᒪᓗ ᐅᖃᓪᓚᖃᑎᒌᖕᓂᐅᔪᖅ ᐊᒃᑐᕈᑎᖃᓕᕈᓐᓇᖅᖢᓂ ᓄᓇᕗᑦ ᓯᕗᓂᒃᓴᖓᓄᑦ.

ᑕᐃᒪᐃᓐᓂᖓᓄᑦ ᐅᑯᐊ ᓄᓘᔮᑦ ᓄᓇᖓᓂ ᓴᐳᓐᓂᐊᖅᑎᒃᑯᑦ ᑕᐃᔭᐅᔪᒪᔪᑦ ᐅᑯᓄᖓ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐃᒪᓐᓇ ‘ᑐᓴᒐᒃᓴᓕᐅᖅᑎᑦ 2021ᒥ’.