ᓄᕙᒡᔪᐊᕐᓇᖅ-19ᒥ ᐋᓐᓂᐊᖃᕐᑐᑦ ᐅᓄᕐᓯᕚᓪᓕᖅᑐᑦ ᕿᑭᖅᑖᓗᒃᒥ, ᓄᓇᕗᒥᑦ ᒐᕙᒪᒃᑯᑦ ᐅᖃᖅᑐᑦ

For English version, see COVID-19 cases have surged in Qikiqtaaluk region, GN says

ᓄᕙᒡᔪᐊᕐᓇᖅ-19ᒥ ᐋᓐᓂᐊᖃᕐᑐᑦ ᐅᓄᕐᓯᕚᓪᓕᖅᑐᑦ ᕿᑭᖅᑖᓗᒃᒥ, ᓄᓇᕗᒥᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᐅᖃᓚᐅᕐᑐᑦ ᔭᓄᐊᕆ 4ᒥ.

ᐃᖃᓗᐃᑦ ᐊᒃᑐᖅᑕᐅᓗᐊᖅᑐᑦ ᐅᓄᕐᓯᕚᓪᓕᔪᓄᑦ ᕿᑲᕐᓇᐅᓕᖅᑎᓪᓗᒍ, ᓄᓇᕗᒥᑦ ᒐᕙᒪᒃᑯᑦ ᐅᖃᓚᐅᕐᑐᑦ ᑐᓴᒐᒃᓴᑎᒍᑦ.

ᖃᐅᔨᓇᓱᒃᖢᑎᒃ ᐅᓄᕐᓯᕚᓪᓕᖅᑐᓂᒃ, ᓄᓇᕗᒥᑦ ᒐᕙᒪᒃᑯᑦ ᒪᑯᓂᖓ ᖃᐅᔨᓇᓱᒍᑎᖃᓚᐅᕐᑐᑦ PCR ᖃᐅᔨᓴᕈᑎᓄᑦ, ᓄᓇᓕᖕᓂ ᐋᓐᓂᐊᕕᖕᓂ ᖃᐅᔨᓴᖅᑕᐅᓯᒪᔪᓂᒃ ᐊᒻᒪᓗ ᖃᐅᔨᓴᕈᑎᑎᒍᑦ ᖃᐅᔨᑲᐅᖅᑐᕐᓇᖅᑐᓂᒃ ᐅᖃᐅᓯᐅᓯᒪᔪᓂᒃ ᓄᕙᒡᔪᐊᕐᓇᖅ-19ᒧ ᐅᖃᓪᓚᒡᕕᐅᔪᓐᓇᖅᑐᒃᑯᑦ, ᐅᖃᖅᑎᒋᔭᐅᔪᖅ ᓇᐃᑏᓐ ᐴᑎ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᓄᓇᕗᒥᑦ ᒐᕙᒪᒃᑯᑦ ᓄᖅᑲᓚᐅᕐᓯᒪᖕᒪᑕ ᓄᕙᒡᔪᐊᕐᓇᖅ-19ᒥ ᐋᓐᓂᐊᖃᖅᑐᓂᒃ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᓗᕆᐊᓇᕈᓐᓃᕐᓂᕋᐃᓚᐅᕐᓯᒪᑎᓪᓗᒋᑦ ᐊᕐᕌᓂ ᐄᐳᕈᓪ 11ᐅᑎᓪᓗᒍ.

ᓄᕕᐱᕆ 26 ᐊᒻᒪ ᑎᓯᐱᕆ 17 ᐊᑯᓐᓂᖓᓂ ᐱᐊᓱᑦ ᓄᕙᒡᔪᐊᕐᓇᖅ-19ᒥ ᐋᓐᓂᐊᖃᕐᑐᑦ ᐋᓐᓂᐊᕕᖕᒧᐊᖅᑕᐅᓚᐅᕐᓯᒪᔪᑦ, ᓄᓇᕗᒥᑦ ᒐᕙᒪᒃᑯᑦ ᐅᖃᓚᐅᕐᑐᑦ.

ᑎᓯᐱᕆ 15ᒥ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᑦ ᐊᖓᔪᖅᑳᖓ ᓘᒃᑖᖅ ᓵᓐ ᕗᐊᔅᑐᓪ ᐅᔾᔨᕈᓱᖁᔨᓚᐅᕐᑐᑦ ᐅᓄᕐᓯᕙᓪᓕᐊᓂᖓᓂᒃ ᐋᓐᓂᐊᕆᔭᐅᕙᒃᑐᑦ, ᐃᓚᐅᓪᓗᓂ ᓄᕙᒡᔪᐊᕐᓇᖅ-19.

ᐊᐃᑦᑐᖅᓯᑎᑦᑎᑦᑕᐃᓕᓗᑎᒃ ᓄᕙᒡᔪᐊᕐᓇᖅᑐᒥᒃ, ᓄᓇᕗᒥᑦ ᒐᕙᒪᒃᑯᑦ ᐅᖃᓚᐅᕐᒥᔪᑦ ᑲᐱᔭᐅᖃᑦᑕᖁᔨᓪᓗᑎᒃ ᐊᒻᒪ ᑲᐱᔭᐅᒃᑲᓐᓂᕐᐸᒡᓗᑎᒃ ᐊᔪᓐᓇᕈᓐᓃᕌᖓᑦ, ᐅᖓᓯᒌᒃᑐᑎᐅᑲᑕᒡᓗᑎᒃ, ᑕᓗᐊᕐᓯᒪᕙᒡᓗᑎᒃ ᕿᖓᖏᑦ ᐊᒻᒪ ᖃᓂᖏᑦ ᐋᓐᓂᐊᕕᖕᒦᑎᓪᓗᒋ5 ᐊᒻᒪᓗ ᐃᓄᑑᓐᓇᖅᑐᒦᑉᐸᒡᓗᑎᒃ ᐋᓐᓂᐊᖅᑰᔨᓕᕌᖓᑕ.

ᓄᕙᒡᔪᐊᕐᓇᖅ-19 ᒥᒃᓵᓄᑦ ᐅᖄᓚᒡᕕᖃᖅᑐᑦ ᐊᑐᐃᓐᓇᐅᕙᒃᖢᓂ ᓇᒡᒐᔾᔭᒥ ᐅᓪᓗᑐᐃᓐᓇᕐᒧᑦ 10ᒥ ᐅᓪᓛᒃᑯᑦ 8ᒧ ᐅᓐᓄᒧᑦ ᐆᒥᖓ 1-888-975-8601 ᑭᓇᑐᐃᓐᓇᒧᑦ ᐋᓐᓂᐊᖃᕐᓂᕋᖅᑕᐅᓯᒪᔪᒧᑦ ᐅᕝᕙᓘᓐᓃᑦ ᐃᓱᒫᓘᑎᖃᖅᑐᓄᑦ ᓄᕙᒡᔪᐊᕐᓇᖅ-19 ᒥᒃᓵᓂ.