ᓇᑉᐸᓪᓗᐊᖏᑦ ᓄᓇᕕᒃ ᐃᓐᓇᖏᑦ ᓴᐳᔾᔭᐅᓯᒪᓕᖅᐳᑦ ᓄᕙᒡᔪᐊᕐᓇᖅ-19-ᒧᑦ, ᐱᓕᕆᔨᒻᒪᕇᑦ ᐃᓱᒪᔪᑦ

“ᑎᑭᐅᑎᔪᒪᒐᑦᑕ ᐅᓄᕐᓂᖅᓴᓂᒃ ᐊᓐᓇᐅᒪᔪᓐᓇᕐᓂᖅᓴᓂᒃ. ᐅᓄᖅᓯᑎᒃᑲᓐᓂᕆᐊᖃᕋᑦᑕ ᑲᐱᓯᒃᑲᓐᓂᖅᓂᖅᒥᒃ,” ᓄᓇᕕᒃᒧᑦ ᐋᓐᓂᐊᖃᕐᓇᙱᑦᑐᓕᕆᓂᖅᒧᑦ ᑐᑭᒧᐊᖅᑎᑦᑎᔨ ᐅᖃᖅᑐᖅ

ᐃᓄᒃᔪᐊᒃᒥᐅᑕᑦ ᐅᑕᖅᑭᔪᑦ ᑲᐱᔭᐅᓂᐊᕐᓂᖏᓐᓂᒃ ᑭᖑᓪᓕᖅᐹᒥᒃ ᓄᓇᓕᖕᓂ ᑲᐱᓯᑲᑕᓐᓇᐅᑎᓪᓗᒍ ᒪᐃ 1-ᒥᑦ. (ᐊᔾᔨᙳᐊᖅ ᐅᑯᓇᙶᖅᑐᑦ NRBHSS)

By ᓴᐃᕋ ᕌᔾᔪᔅ

For an English version of this story, see Half of Nunavik’s adults now protected against COVID-19, officials estimate

ᓯᒥᐅᓂ ᓇᓗᒃᑐᕈᒃ ᑲᐱᔭᐅᕌᓂᑦᑎᐊᖅᑐᖅ ᐊᓐᓇᐅᒪᔾᔪᑎᒃᓴᒧᑦ ᐆᒧᖓ ᓄᕙᒡᔪᐊᕐᓇᖅ-19.

ᐃᓄᒃᔪᐊᒃ ᒪᐃᔭᖓ ᑐᒡᓕᖓᓂᒃ ᑲᐱᔭᐅᓚᐅᖅᑐᖅ ᒪᑑᓇᒥ ᑲᐴᑎᒧᑦ ᓄᓇᕕᒃᒥ 1,800-ᓂᒃ ᐃᓄᖃᖅᑐᒥᑦ, ᑭᖑᓪᓕᖅᐹᖅ 14-ᓂ ᓄᓇᓕᖕᓂ ᓄᓇᕕᒃᒥ ᑐᒡᓕᐊᓂᒃ ᑲᐱᔭᐅᔪᓂᒃ.

ᓇᓗᒃᑐᕈᒃ ᐅᖃᓚᐅᖅᑐᖅ ᐃᓗᐊᕐᓂᖅᓴᐅᓕᕐᓂᕋᖅᖢᓂ ᓴᐳᑎᓯᒪᓕᕋᒥ ᐋᓐᓂᐊᖅᑖᕐᓇᖅᑐᒧᑦ, ᑭᓯᐊᓂᓕ ᐅᖃᕈᓐᓇᙱᑦᑐᖅ ᐊᓯᖏᓐᓄᑦ ᓄᓇᖃᑎᖏᓐᓂᒃ.

ᓯᕗᓪᓕᕐᒥᑦ ᑲᐱᔭᐅᑲᑕᓕᖅᑎᓪᓗᒋ ᐅᑭᐅᒃᑲᓐᓂᖅ, 29 ᐳᓴᓐᑎᑐᐃᓐᓇᐃ ᐃᓄᒃᔪᐊᖅᒥᐅᑦ ᑲᐱᔭᐅᔪᒪᓚᐅᖅᑐᑦ — ᐊᑦᑎᖕᓂᖅᐹ ᑲᐱᔭᐅᔪᓂᒃ ᓄᓇᕕᒃᒥᑦ 14-ᓂᒃ ᓄᓇᓕᖕᓂᑦ.

ᓇᓗᒃᑐᕈᒃ ᐅᖃᓚᐅᖅᑐᖅ ᒫᓂ 374 ᓄᓇᖃᖅᑐᑦ ᑲᐱᔭᐅᔭᕐᑐᕐᓂᕋᓚᐅᖅᑕᖏᑦ ᐱᓇᓱᐊᕈᓯᐅᓚᐅᖅᑐᒥᓐ.

“ᐃᓱᒪᔪᓪᓕ ᑕᒪᑐᒥᖓ ᐱᓕᕆᐊᖃᕐᓂᖅᓴᐅᒐᑦᑕ ᑕᒪᑐᒪᓂ,” ᐅᖃᖅᑐᖅ.

“ᖃᐅᔨᒪᔪᖓ ᐃᑲᔪᕈᑎᖏᓐᓂᒃ ᑕᑯᑲᐅᑎᒋᔾᔮᙱᑦᑐᒍᑦ. ᑭᓯᐊᓂᓕ ᑕᐃᒪᐃᖁᔭᕋ ᐃᓅᖃᑎᓐᓄᑦ ᐅᕙᓂ.”

ᓇᓗᒃᑐᕈᒃ ᐅᖃᓚᐅᖅᑐᖅ ᐃᓚᖃᕐᓂᕋᖅᖢᓂ ᐊᒻᒪ ᐱᖃᓐᓇᖃᕐᓂᕋᖅᖢᓂ ᓴᓂᑭᓗᐊᖅᒥᑦ, ᓲᕐᓗ, ᑕᑯᓚᐅᙱᑕᖏᓐᓂᒃ ᐊᕐᕌᒎᑉ ᐅᖓᑖᓂᒃ — ᑕᐃᒪᙵᑦ ᐃᓄᐃᑦ ᖃᖓᑕᓲᖓ ᓄᖅᑲᓚᐅᖅᓯᒪᖕᒪᑦ ᖃᖓᑕᓲᑦ ᓴᓂᑭᓗᐊᓕᐊᖅᐸᒃᑐᑦ ᐊᒻᒪ ᑕᐃᑲᙶᖅᐸᒃᑐᑦ.

ᒪᐃᔭ ᐃᓱᒪᔪᖅ ᐅᓄᕐᓂᖅᓴᐃᑦ ᑲᐱᔭᐅᒃᐸᑕ ᑕᐃᒪᓕ ᖃᓄᐃᓕᐅᖁᔭᐅᙱᑦᑐᑦ ᐅᓄᕈᓐᓃᖅᓂᕐᓴᐅᓇᔭᕆᐊᒃᓴᖏᓐᓂᒃ ᓄᓇᓕᖕᓂ ᑕᖅᑭᓂᒃ ᐊᒡᒋᖅᑐᓂᒃ.

“ᐃᓱᒪᔪᖓᓕ ᐃᓄᖕᓂ ᑲᐱᔭᐅᖁᔨᑲᑕᒃᖢᑕ,” ᐅᖃᖅᑐᖅ. “ᑭᓯᐊᓂᓕ ᐃᓚᖏᑦ ᑲᐱᔭᐅᔾᔮᙱᑦᑐ ᐊᖅᑯᒃᑲᓗᐊᕈᒃᑭᑦ ᐋᓐᓂᐊᕕᖕᒧᑦ.”

ᓄᓇᕕᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᓄᓕᕆᔨᒃᑯᑦ ᐅᖃᒪᐅᕐᑐᑦ ᐋᓐᓂᐊᓯᐅᖅᑏᑦ ᑲᐱᓯᓚᐅᕐᓂᕋᖅᖢᒋᑦ 3,545-ᓂ ᑐᒡᓕᖓᓂᒃ ᑲᐱᔭᐅᔪᓂᒃ ᒪᑑᓇ ᑲᐴᑎᒧᑦ ᐊᐃᑉᐸᖓᓂᒃ ᐱᓕᕆᐊᖑᑎᓪᓗᒍ.

2,350-ᓂᒃ ᓯᕗᓪᓕᕐᒥᒃ ᑲᐱᓯᑲᑕᒪᐅᖅᓯᒪᔪᑦ ᓄᓇᕕᒻᒥᐅᓂᒃ ᓯᕗᓂᐊᒍᑦ ᑲᐱᔭᐅᓚᐅᕐᓯᒪᙱᑦᑐᓂᒃ.

ᑭᓯᐊᓂᓕ ᕿᓚᒥᐅᓗᐊᕐᒪᑦ ᐳᓴᓐᑎᖏᑦᑎᒍᑦ ᓄᓇᕕᒃᒥ 9,000-ᖏᓐᓂᒃ ᐃᓐᓇᕐᓂᒃ ᑲᐱᔭᐅᓯᒪᔪᖃᓕᕆᐊᒃᓴᖓᓂᒃ.

ᑕᐃᒪᐃᔾᔪᑎᖃᖅᑐᕐᓕ ᐱᓕᕆᔨᒻᒪᕆᐅᔪᑦ ᓱᓕ ᓇᐃᓴᐅᑎᓂᒃ ᖃᐅᔨᔭᕆᐊᖃᕐᒪᑕ ᓄᓇᖃᙱᑦᑐᓂᒃ — ᐃᖅᑲᓇᐃᔭᖅᑎᐅᑲᐃᓐᓇᖅᑐᑦ — ᑲᐱᔭᐅᓚᐅᖅᑐᑦ, ᐅᖃᖅᑐᖅ ᓘᒃᑖᖅ ᒧᕆ ᕋᓴᑦ, ᓄᓇᕕᒃᒧᑦ ᐋᓐᓂᐊᖃᕐᓇᙱᑦᑐᓕᕆᓂᖅᒥᒃ ᑐᑭᒧᐊᖅᑎᑦᑎᔨ.

ᕋᓴᑦᓕ ᐃᓱᒪᔪᖅ, ᓇᑉᐸᓪᓗᐊᖏᑦ ᓄᓇᕕᒃᒥᑦ ᓴᐳᔾᔭᐅᓯᒪᓕᕋᓱᒋᓪᓗᓂᒋᑦ ᓄᕙᒡᔪᐊᕐᓇᖅ-19-ᒧᑦ.

“ᓯᕗᓪᓕᖅ ᒫᓂ 80 ᐳᓴᓐᑎᖏᓐᓂᒃ ᓴᐳᔾᔨᓯᒪᔪᓐᓇᕈᓂ, ᐊᒻᒪᓗ 95 ᐳᓴᓐᑎᓂᒃ ᑐᒡᓕᖓᓄᑦ ᑲᐴᑎᒧᑦ ᑕᐃᒪᓕ ᐃᓱᒪᔪᓐᓇᖅᑐᒍᑦ ᓇᑉᐸᓪᓗᐊᖏᑦ ᐃᓐᓇᐃᑦ ᓴᐳᔾᔭᐅᓯᒪᓕᕆᐊᒃᓴᖏᓐᓂᒃ ᓄᕙᒡᔪᐊᕐᓇᖅ-1ᒧᑦ,” ᐅᖃᖅᑐ.

“ᐃᓱᒪᔪᖓᓕ ᑕᐃᒪᐃᓐᓂᐃᑎᑦᑐᓐᓇᖅᓯᒐᑦᑎᒍᑦ.”

ᐅᓇ ᓱᓕ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦᑕ ᑎᑭᐅᑎᓇᓱᒃᑕᖓᓄᑦ 75 ᐳᓴᓐᑎᒧᑦ ᓱᓕ ᐅᖓᓯᒃᓴᖅᑐᖅ ᓄᓇᕕᒻᒥᑦ.

ᕋᓴᑦ ᐅᖃᓚᐅᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔨᒻᒪᕆᖏᑦ ᖃᐅᔨᓇᓱᖕᓂᐊᖅᑐᑦ ᓄᓇᓕᖕᓂ ᑲᐱᔭᐅᓂᖅᓴᐅᓚᐅᖅᑐᓂᒃ ᑲᐱᓯᑲᑕᖕᓇᐅᑎᓪᓗᒍ ᖃᐅᔨᓇᓱᒡᓗᑎᒃ ᑕᒪᑐᒧᖓ ᐃᓕᔾᔪᑎᒋᔭᖏᓐᓂᒃ.

“ᓱᓕ ᑐᑭᓯᔪᒪᔪᒍᑦ ᖃᓄᐃᒻᒪᑦ ᐃᓚᖏᑦ ᐃᓄᐃᑦ ᑲᐱᔭᐅᔪᒪᙱᑦᑕᕆᐊᒃᓴᖓᓂᒃ ᑕᒪᑯᒧᖓ ᐃᑲᔪᑦᑎᐊᖅᑎᓪᓗᒍ ᐊᒻᒪᓗ ᐅᓗᕆᐊᓇᙱᖢᓂ,” ᐅᖃᖅᑐᖅ.

“ᑕᐃᒪᐃᓐᓂᖓᓄᓪᓕ ᑕᒪᓐᓇ ᑲᐱᔭᐅᔪᓐᓇᕐᓂᖅ ᒪᓂᒪᑎᑕᐅᖏᓐᓇᕐᓂᐊᖅᑐᖅ ᓄᓇᓕᖕᓂᑦ.”

ᓄᓇᕕᒻᒥᐅᑦ ᐅᖄᓚᔪᓐᓇᖅᑐᑦ ᓄᓇᖏᓐᓂᒃ ᐋᓐᓂᐊᕕᖕᓄᑦ ᖃᖓᑐᐃᓐᓇᖅ ᐃᓂᒃᓴᓕᐅᕈᒪᓗᑎᒃ ᑲᐱᔭᐅᓂᖅᒧᑦ, ᐅᖃᖅᑐᖅ.

ᕋᓴᑦ ᐅᖃᓚᐅᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᖃᐅᔨᓇᓱᖕᓂᖏᓐᓂᒃ ᑲᐱᓯᑲᑕᖕᓂᖅᒥᒃ ᓄᓇᕕᒻᒥ ᐃᓅᓱᒃᑐᓂᒃ ᐅᑯᐊ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖏᓚᐅᕐᓂᖏᓐᓄᑦ ᐊᑐᖅᑕᐅᔪᓐᓇᕐᓂᖓᓂᒃ ᕙᐃᔪ ᓄᕙᒡᔪᐊᕐᓇᖅ-19-ᒧᑦ ᑲᐴᑎ ᓱᕈᓯᕐᓄᑦ ᐅᑭᐅᓕᖕᓄᑦ 12 ᖁᓛᓄᑦ.

ᓱᓕ ᖃᒡᓯᒐᓴᖕᓂᒃ ᐃᓂᖃᕈᓐᓇᕐᓂᖅᒧᑦ ᑐᓗᕈᑎᓂᒃ ᐃᓱᒪᒋᔭᖃᕆᐊᖃᕐᓇᖅᒪᑦ, ᐅᖃᖅᑐᖅ, ᐃᓱᒪᒋᓪᓗᒍ ᕙᐃᓱ ᑲᐴᑎ ᐊᔾᔨᒋᙱᑕᖓᒍᑦ ᐸᐸᑕᐅᔭᕆᐊᖃᕐᓂᖏᓐᓂᒃ ᐅᑯᓇᙵᓪᓕ ᒪᑑᓇᒥ, ᐊᒻᒪᓗ ᖃᓄᖅ ᐋᖅᑭᒃᓱᐃᓇᔭᕆᐊᒃᓴᖏᓐᓂᒃ ᐃᓕᓐᓂᐊᕐᕕᖕᒥᑦ ᑲᐱᓯᑲᑕᖕᓂᖅᒧᑦ ᖃᓄᐃᓕᐅᕈᑎᐅᓂᐊᖅᑐᓂᒃ ᐊᐅᔭᖅ ᖃᒡᓕᖅᑎᓪᓗᒍ.

“ᐅᓇ ᐱᕕᒃᓴᐅᖕᒪᑦ ᐅᓄᕐᓂᖅᓴᓄᑦ ᐃᓄᖕᓄᑦ ᑐᓴᖅᑕᐅᓇᓱᒡᓗᓂ,” ᕋᓴᑦ ᐅᖃᖅᑐᖅ.

“ᑎᑭᐅᑎᔪᒪᒐᑦᑕ ᐅᓄᕐᓂᖅᓴᓂᒃ ᐊᓐᓇᐅᒪᔪᓐᓇᕐᓂᖅᓴᓂᒃ. ᐅᓄᖅᓯᑎᒃᑲᓐᓂᕆᐊᖃᕋᑦᑕ ᑲᐱᓯᒃᑲᓐᓂᖅᓂᖅᒥᒃ [ᑎᑭᓪᓗᒍ 75 ᐳᓴᓐᑎ], ᑕᑯᔪᒪᙱᒃᑯᑕ ᐋᓐᓂᐊᖅᑖᖅᑐᓂᒃ ᓄᓇᕕᒃᒥᑦ, ᑖᓐᓇ ᑐᕌᒐᕆᔭᕗᑦ,”

“ᐃᓱᒪᒐᑦᑕ ᖃᓄᐃᑦᑕᐃᓕᒪᔾᔪᑎᐅᔪᑦ ᐃᓚᖏᑦ ᐊᑐᕈᓐᓇᕐᓯᔪᒪᓪᓗᒋᑦ,” ᕋᓴᑦ ᐅᖃᒃᑲᓐᓂᖅᑐᖅ. “ᐊᒻᒪᓗ ᐅᑐᕈᓐᓇᓕᕐᓗᑕ ᐃᓅᓯᕆᖃᑦᑕᓚᐅᖅᑕᑦᑎᓐᓄᑦ ᐃᓚᒌᖕᓂᒃᑯ.”

Share This Story

(0) Comments

Join the Conversation

Your email address will not be published. Required fields are marked *

*