ᓇᒡᓕᖕᓇᕐᑐᖅ ᓄᓇᕗᒥᑦ ᐃᓐᓇᑐᖃᖅ ᔫᓐ ᐅᑲᓕᒃ ᑲᓚᖓᖕᐳᒡ ᐃᓅᔪᓐᓃᕐᑐᖅ ᐅᑭᐅᖃᓕᖅᖢᓂ 105-ᓂᒃ

ᓄᓇᕗᒥᑦ ᐊᕐᕌᒍᒐᓴᖕᓂᒃ ᐃᖅᑲᐅᒪᓇᕈᑎᓂᒃ ᐊᒻᒪ ᖃᓄᐃᓕᐅᓕᒪᓂᐅᔪᓂᒃ ᐊᓯᐅᔨᓚᐅᕐᐳᑦ ᐱᓇᓱᐊᕈᓯᐅᓚᐅᕐᑐᒥ, ᐅᓇ ᔫᓐ ᐅᑲᓕᒃ ᑲᓚᖓᖕᐳᒡ, 105, ᐃᓅᔪᓐᓃᖅᑎᓪᓗᒍ ᐅᖅᓱᖅᑑᕐᒥᑦ ᑲᒪᒋᔭᐅᖏᓐᓇᕆᐊᓕᖕᓄ ᐃᓐᓇᑐᖃᕐᓂ ᐱᓕᕆᕝᕕᖕᒥ ᔭᓄᐊᕆ 8-ᖑᑎᓪᓗᒍ.

ᐃᓚᒋᔭᐅᔪᖅ ᕿᑎᕐᒥᐅᓂᒃ ᐃᓐᓇᑐᖃᕆᔭᐅᔪᓂᒃ, ᑲᓚᖓᖕᐳᒡ ᐊᖓᔪᒃᖠᖅᐹᖑᔪᒃᓴᐅᓚᐅᕐᑐᖅ ᓄᓇᕗᒥᑦ ᐃᓅᓱᖓᕐᑎᓪᓗᒍ. ᕿᒪᐃᔪᖅ ᐊᒥᓱᒻᒪᕆᖕᓂ ᐃᓚᒌᓕᕐᓯᒪᔪᓂᒃ ᐃᓄᑉᐱᐊᓂᒃ ᐊᓛᔅᑲᒥ ᒪᐅᖓ ᕿᑎᕐᒥᐅᓄᑦ ᓄᓇᕗᒥᑦ.

“ᐊᔪᙱᑦᑐᐊᓘᓚᐅᕐᑐᖅ. ᒥᕐᓱᐃᓐᓇᐅᔭᕐᖢᓂ ᐊᒻᒪᓗ ᐃᓄᐃᑦ ᓂᕿᖏᓐᓂ ᓂᕇᓐᓇᐅᔭᕐᖢᓂ,” ᑲᓚᖓᖕᐳᒡ ᐃᕐᖑᑕᖓ, ᓚᔅᓕ ᐋᓐ ᑲᓚᖓᖕᐳᒡ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐃᙱᑲᑕᒃᖢᓂ ᖁᕕᐊᒋᓚᐅᕐᒥᔭᖓ. ᐃᖏᐅᓯᖅ ᐱᓐᓇᕆᓂᖅᐹᕆᓚᐅᕐᑕᖓ ᖃᖓᑦᑎᐊᓂᒃ ᐅᓇ “You Are My Sunshine,” ᐃᕐᖑᑕᖓ ᐅᖃᖅᑐᖅ.

ᐃᓅᓕᕐᕕᐊᓄᑦ ᓇᓗᓇᐃᒃᑯᑎᖓᒍᑦ, ᑲᓚᖓᖕᐳᒡ ᐃᓅᓚᐅᕐᓯᒪᔪᖅ ᔫᓂ 1, 1914-ᒥᑦ ᐅᓗᒃᕼᐊᒃᑑᒥᑦ, ᐊᑎᖃᖅᑎᑕᐅᓂᑯ ᕼᐆᒪᓐ ᐊᐃᓚᓐᒥ, ᐊᒻᒪᓗ ᖁᒡᓗᖅᑑᒥᑦ ᐊᑯᓂᐊᓗᒃ ᓄᓇᖃᖅᖢᓂ.

1932-ᒥ, ᐅᐃᑖᓚᐅᕐᓯᒪᔪᖅ ᐋᓐᑐᕉ ᑲᓚᖓᖕᐳᔅ, ᓄᑲᖅᖠᖅᐹᖅ ᐃᕐᓂᖏᓐᓂᒃ ᐆᒪ ᑯᕆᔅᑎᐊᓐ ᔪᐊᒐᓐᓴᓐ ᑲᓚᖓᖕᐳᔅ, ᑐᓴᐅᒪᔭᐅᑦᑎᐊᖅᑐᖅ ᑎᐊᓐᒫᒃᒥᐅᑕᕕᓂᖅ ᒥᑭᒋᐊᖅᑎ, ᓂᐅᕕᖅᑎ ᐊᒻᒪ ᐊᕐᕙᒐᓱᒃᑎᕕᓂᖅ. ᐋᓐᑐᕉ ᑲᓚᖓᖕᐳᒡ ᐃᓅᔪᓐᓃᓚᐅᕐᓯᒪᔪᖅ 1982-ᒥ.

ᐋᒐᓯ 2012-ᒥ, ᐃᐊᑦᓇ ᐃᓚᐃᐊᔅ, ᑲᒥᓯᓇᐅᑎᓪᓗᒍ ᓱᓕ ᓄᓇᕗᒧᑦ, ᑐᓂᓯᓚᐅᕐᓯᒪᔪᖅ ᑲᒥᓯᓇᐅᑉ ᑐᓐᓂᖅᑯᓯᐊᖓᓂᒃ ᑲᓚᖓᖕᐳᒡᒧᑦ.

ᐅᓇ ᑐᓐᓂᖁᓯᐊᖅ ᐃᓕᓴᕐᓯᒍᑎᐅᓚᐅᕐᓯᒪᔪᖅ ᐃᓅᓯᓕᒫᖓᓂᒃ ᐊᔪᕈᓐᓃᕐᓴᖅᑎᑦᑎᓯᒪᓂᖓᓂᒃ ᒥᕐᓱᕐᓂᕐᒥᒃ, ᕿᓚᐅᔾᔭᕐᓂᕐᒥᒃ ᐊᒻᒪ ᓱᕈᓯᕐᓂᒃ ᐱᕈᕐᓴᐃᓂᕐᒥ.

“ᐃᓐᓇᑐᖃᐅᓛᖑᓪᓗᓂ ᖁᒡᓗᖅᑑᒥ, ᓴᖅᑭᑎᑦᑎᓯᒪᓚᐅᕐᑐᖅ ᐃᓅᓯᖃᑦᑎᐊᕐᓂᕐᒥᒃ ᖃᓄᐃᙱᓐᓂᒃᑯᑦ ᐊᒻᒪᓗ ᐊᓯᒥᓂᒃ ᐱᔪᒪᓕᖅᑎᑦᑎᓯᒪᕙᒃᖢᓂ,” ᐃᓚᐃᐊᔅ ᑕᐃᔅᓱᒪᓂ ᑕᐃᒪᐅᓕᓚᐅᕐᓯᒪᔪᖅ.

ᑲᓚᖓᖕᐳᔅ ᐃᓐᓇᕈᖅᐸᓪᓕᐊᓪᓗᓂ, ᓇᓪᓕᐅᑎᕝᕕᒋᔭᖏᑦ ᖁᕕᐊᓲᑎᒻᒪᕆᐅᖃᑦᑕᓚᐅᕐᑐᑦ ᐆᑐᓇᖅ 100-ᓂ ᐅᑭᐅᖃᓕᖅᑎᓪᓗᒍ 2014-ᒥᑦ, ᖁᒡᓗᖅᑑᕐᒥᐅᑕ ᓂᕆᔭᒃᓴᓂᒃ ᓇᒃᓴᖅᖢᑎᒃ ᑲᑎᖃᑎᒌᒃᑎᓪᓗᒋ ᐱᙳᐊᕐᕕᖕᒥᑦ ᑖᔅᓱᒧᖓ.

ᐊᒻᒪᓗ 2018-ᒥᑦ, ᐅᖅᓱᖅᑑᕐᒥᑦ ᑲᒪᒋᔭᐅᖏᓐᓇᕆᐊᓕᖕᓂ ᐱᓕᕆᕝᕕᐅᑉ ᐃᖅᑲᓇᐃᔭᖅᑎᖏᑦ ᖁᕕᐊᓲᑎᖃᖅᑎᓪᓗᒋᑦ ᑖᔅᓱᒪ 104 ᐊᕐᕌᒍᒋᓕᖅᑕᖏᓐᓂᒃ ᑮᒃᑐᖅᖢᑎᒃ ᐊᒻᒪ ᑎᑕᒃᑐᖃᑲᑕᒃᖢᓂ ᐅᖅᓱᖅᑐᕐᒥᐅᓂᒃ.

ᑕᐃᔅᓱᒪᓂ ᐊᕐᕌᒍᒥ, ᖁᒡᓗᖅᑑᕐᒧᑦ ᒪᓕᒐᓕᐅᕐᑎ ᒦᓚ ᑲᒥᒍᐊᒃ ᓇᖏᕐᓯᓪᓗᓂ ᓄᓇᕗᒥᑦ ᒪᓕᒐᓕᕆᕕᒡᔪᐊᒥ ᖁᕕᐊᓲᑎᖃᓚᐅᕐᓯᒪᔪᖅ ᑲᓚᖓᖕᐳᒡ ᐃᓅᓯᑯᑖᖓᓂᒃ.

“ᑕᓪᓕᕐᒥᐅᓚᐅᕐᑐᖅ, ᐅᓇ ᐃᓐᓇᑐᖃᑦᑎᐊᕚᓗᒃ, ᐊᓈᓇᑦᑎᐊᕆᓚᐅᕐᑕᒪ ᓇᓕ ᑲᓄᕙᒃ ᕼᐃᑯᒃ ᐱᖃᓐᓇᕆᓚᐅᕐᑕᖓ, ᖁᕕᐊᓲᑎᖃᓚᐅᕐᒪᓐ 104 ᐊᕐᕌᒍᖓᓂᒃ. ᐅᖃᖅᑏᑦ, ᖁᕕᐊᓱᒻᒪᕆᒃᐳᖓ ᐅᖅᓱᖅᑑᕐᒥᐅᑦ ᖁᕕᐊᓱᖃᑎᖃᕈᓐᓇᓚᐅᕐᒪᑕ ᐅᓪᓗᖓᓂᒃ,” ᑲᒥᖑᐊᒃ ᐅᖃᓚᐅᕐᑐᖅ ᔫᓂ 6, 2018-ᒥᑦ.

ᑲᒥᖑᐊᒃ ᐅᖃᓚᐅᕐᒥᔪᖅ ᐱᐅᒻᒪᕆᒐᔭᓚᐅᕐᓂᖓᓂᒃ ᑖᓐᓇ ᖁᕕᐊᓲᑎᖃᕈᓐᓇᓚᐅᕐᐸᑦ ᐃᓚᖏᓪᓗ ᖁᒡᓗᖅᑑᒥ, ᑕᕝᕙᓂᓗ ᕼᐋᒪᓚᒃᑯᑦ ᓄᓇᕗᑦ ᒐᕙᒪᒃᑯᓐᓂ ᐱᔪᒪᓯᒪᓪᓗᑎᒃ ᐃᒡᓕᖃᖅᑐᒥ 24-ᓂ ᐃᓐᓇᒃᑯᕕᒃᓴᒥᒃ ᓄᓇᓕᖕᓂᒃ.

ᑲᓚᖓᖕᐳᒡ ᐃᓚᖏᑦ ᐃᓗᕕᕐᓯᐅᕐᓂᐊᖅᑐᑦ ᖁᒡᓗᖅᑑᒥᑦ ᐱᖓᑦᓯᐅᓕᕐᐸᑦ, ᓚᔅᓕ ᐋᓐ ᑲᓚᖓᖕᐳᒡ ᐅᖃᓚᐅᕐᑐᖅ.