ᓈᓚᐅᑎᒧᑦ ᑲᑎᙵᓂᐅᔪᑦ ᖁᕕᐊᑉᐳᑦ ᐱᒋᐊᖅᑎᑦᑎᓂᐊᕐᓂᖏᓐᓂ ᐃᖃᓗᖕᓂ ᓈᓚᐅᑎᖏᓐᓄᑦ

For English version, see Radio group eager to hit Iqaluit’s airwaves

ᓄᐊ ᐸᐸᑦᓯ ᑐᓂᓯᔪᒪᕗᖅ ᐅᓄᕐᓂᖅᓴᓂ ᓄᓇᓕᖕᓂ ᓈᓚᐅᑎᖃᕐᓂᕐᒥ ᐃᖃᓗᖕᓄᑦ.

ᐊᖓᔪᖅᑳᕆᔭᐅᔪᖅ ᑕᓯᐅᔭᕐᔪᐊᖅ ᑐᓴᐅᒻᒥ, ᓈᓚᐅᑎᒧᑦ ᑲᑐᔾᔨᖃᑎᒌᖑᔪᓂ, ᐱᓵᓚᐅᖅᐳᖅ ᐃᑲᔪᖅᓱᐃᓂᓪᓚᕆᐅᔪᒥ ᓄᓇᓕᐸᐅᔭᒥ ᐃᑲᔪᖅᓱᐃᓂᐅᔪᒥ ᐱᒋᐊᕈᑎᖓᓄᑦ.

ᑲᑎᒪᔨᐅᔪᑦ ᐊᓂᒍᐃᓚᐅᖅᐳᑦ ᐱᒋᐊᕈᑕᐅᔪᒥ ᐅᖃᐅᓯᐅᔪᒥ ᑲᑎᒪᔨᒃᑯᑦ ᑲᑎᒪᓂᖓᓂ ᔫᓂ 13−ᒥ.

“ᐅᒃᐱᕈᓱᒃᐳᖓ ᐱᒻᒪᕆᕐᔪᐊᖑᓂᖓᓂ ᐱᓂᑦᑎᓐᓂ [ᓄᓇᓕᖕᓂ ᐅᖃᓪᓚᒡᕕᐅᔪᒥ],” ᐸᐸᑦᓯ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᐅᓪᓗᕐᒥ ᐊᓂᒍᓚᐅᖅᑎᓪᓗᒍ ᑲᑎᒪᓂᐅᓚᐅᖅᑐᒥ.

ᐸᐸᑦᓯ ᐅᖃᓚᐅᖅᐳᖅ ᐅᖃᓪᓚᒡᕕᖃᕋᓗᐊᖅᑎᓪᓗᒍ ᐃᖃᓗᖕᓂ, ᐱᒻᒪᕆᐅᕗᖅ ᐃᓄᒃᑎᑐᑦ ᓈᓚᐅᑎᒥ ᐱᓕᕆᐊᖃᕐᓂᖓᓂ ᑕᐅᑐᒃᑕᑐᐊᖃᑲᐃᓐᓇᖅᑐᒥ ᐃᖃᓗᖕᓂᑐᐊᖅ. ᐃᓚᒋᐊᖅᓯᓚᐅᖅᐳᖅ ᐊᓯᖏᓐᓂ ᓄᓇᓕᐅᔪᓂ ᓄᓇᓕᖕᓂ ᓈᓚᐅᑎᖃᖅᐳᑦ ᐊᒻᒪ ᐃᖃᓗᖕᓂ ᑕᐃᒪᐃᑦᑐᖅᑖᖁᒋᕙᖏᑦ.

ᓄᓇᓕᖕᓂ ᓈᓚᐅᑎᖃᕐᓂᖅ ᑐᓂᓯᔪᓐᓇᖅᐳᖅ ᐃᓕᓐᓂᐊᖅᑐᓕᕆᓂᕐᒧᑦ ᑐᓴᖅᑕᐅᔪᒃᓴᓂ, ᓯᓚᒧᑦ ᓄᑖᙳᕆᐊᖅᑎᑕᐅᓂᐅᔪᓂ ᐊᒻᒪ ᐱᕕᒃᓴᖃᕐᓂᐅᔪᓂ ᓇᖕᒥᓂᕆᔭᐅᔪᓄᑦ ᐃᓚᐅᑎᑦᑎᓂᕐᒥ ᓄᓇᓕᖕᓂ ᐃᓄᒋᐊᖑᔪᓄᑦ, ᐸᐸᑦᓯ ᐅᖃᓚᐅᖅᐳᖅ.

ᐱᕕᒃᓴᐅᔪᓐᓇᕆᕗᖅ ᐅᓂᒃᑳᖅᑐᐊᕐᓂᕐᒧᑦ, ᑐᓂᓯᓂᕐᒥ ᐃᓂᐅᔪᒥ ᐃᓄᑐᖃᕐᓄᑦ ᑐᓂᓯᓂᖏᓐᓂ ᐅᓂᒃᑳᖅᑐᐊᓂ ᒪᒃᑯᖕᓂᖅᓴᐅᔪᓄᑦ ᐱᐅᓯᖃᑎᒌᖑᔪᓄᑦ ᐊᒻᒪ ᐅᑎᒧᑦ. ᑐᓂᓯᓂᕐᒥ ᑐᓴᖅᑕᐅᔪᒃᓴᓂ ᐱᒻᒪᕆᐅᕗᖅ ᐊᑐᕐᓂᕐᒥ ᐃᓄᒃᑎᑐᒻᒥ ᐃᓚᒋᔭᐅᖕᒪᑦ ᓄᓇᕗᒻᒥ ᐊᖏᕈᑕᐅᔪᒥ, ᐸᐸᑦᓯ ᐅᖃᓚᐅᖅᐳᖅ.

ᐃᓚᒋᐊᖅᓯᓚᐅᖅᐳᖅ ᐊᑐᓕᖅᑎᑦᑎᓂᕐᒥ ᐊᑐᕐᓂᖅᓴᐅᓂᐅᔪᒥ ᐃᓄᒃᑎᑐᒻᒥ ᓈᓚᐅᑎᒃᑯᑦ “ᐱᔭᕆᐊᖃᕐᓂᑦᑎᓐᓂ ᒫᓐᓇᐅᔪᒥ ᐊᒻᒪᓗ ᓯᕗᓂᒃᓴᒧᑦ ᐱᐅᓯᖃᑎᒌᖑᔪᓄᑦ.”

ᒫᓐᓇᐅᔪᒥ ᑕᓪᓕᒪᓂ ᐃᓚᒋᔭᐅᔪᖃᖅᐳᖅ ᑕᓯᐅᔭᕐᔪᐊᖅ ᑐᓴᐅᑦ ᓈᓚᐅᑎᒧᑦ ᑲᑐᔾᔨᖃᑎᒌᖑᔪᓂ. ᐃᓄᐃᑦ ᓄᓇᖃᖅᓯᒪᔪᓂ ᐃᖃᓗᖕᓂ ᐊᕐᕌᒍᓪᓗᐊᒥ ᐃᓚᐅᖃᑕᐅᔪᓐᓇᖅᐳᑦ ᑲᑐᔾᔨᖃᑎᒌᖑᔪᒥ.

ᒫᓐᓇ ᑕᓯᐅᔭᕐᔪᐊᖅ ᑐᓴᐅᑦ ᐱᒋᐊᕈᓐᓇᖅᓯᑎᑕᐅᓯᒪᓕᕐᓂᖓᓂ ᓄᓇᓕᐸᐅᔭᒥ ᐱᒋᐊᕐᓂᕐᒥ ᑮᓇᐅᔭᓂᒃ ᐱᕈᖅᓴᐃᓂᐅᔪᒥ, ᐱᓕᕆᕙᓪᓕᐊᓕᖅᐳᑦ $500,000 ᑐᕌᒐᒃᓴᖓᓂ, ᐸᐸᑦᓯ ᐅᖃᓚᐅᖅᐳᖅ.

ᒫᓐᓇᐅᔪᒥ, ᑲᑐᔾᔨᖃᑎᒌᖑᔪᖅ ᑕᐅᑐᒃᑕᑐᐊᖃᑲᐃᓐᓇᖅᐳᖅ ᐱᓕᕆᐊᒃᓴᐅᔪᓂ ᓲᕐᓗ ᑮᓇᐅᔭᖅᑖᖅᑎᑕᐅᓂᐅᔪᒥ, ᐱᓕᕆᔾᔪᑎᓂ ᐊᒻᒪ ᐃᒡᓗᒃᓴᒥ, ᐊᒻᒪᓗᑦᑕᐅᖅ ᐊᓯᖏᓐᓂ ᐃᖅᑲᓇᐃᔮᖑᔪᓂ ᓲᕐᓗ ᐱᓕᒻᒪᒃᓴᐃᓂᕐᒥ ᐃᓄᖕᓂ ᓈᓚᐅᑎᒧᑦ.

ᑲᑐᔾᔨᖃᑎᒌᖑᔪᖅ ᐊᐅᓚᓂᐊᖅᐳᖅ ᑮᓇᐅᔭᓕᐅᕋᓱᐊᙱᓪᓗᑎᒃ ᑲᑐᔾᔨᖃᑎᒌᖑᔪᒥ, ᐸᐸᑦᓯ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᓴᖕᒥᓂᕆᔭᙳᑐᐃᓐᓇᕆᐊᖃᖅᐳᖅ ᓯᕗᓂᒃᓴᒥ.

ᑭᓯᐊᓂ ᒫᓐᓇᐅᔪᒥ, ᐅᖃᓚᐅᖅᐳᖅ ᑐᕌᒐᒃᓴᓪᓗᐊᑕᖓ ᓇᓗᓇᐃᖅᓯᓂᕐᒥ ᓈᓚᐅᑎᖓ “ᐱᓕᕆᑦᑎᐊᕈᓐᓇᕐᓂᐊᕐᓂᖓᓂ.”

“ᐱᒻᒪᕆᐅᕗᖅ ᓄᓇᓕᐅᔪᖅ ᐃᓚᐅᓂᖓᓂ, ᐊᒻᒪᓗᑦᑕᐅᖅ ᒪᒃᑯᒃᑐᖁᑎᕗᑦ,” ᐸᐸᑦᓯ ᐅᖃᓚᐅᖅᐳᖅ.

ᑲᑎᒪᔨᒃᑯᓐᓂ ᑲᑎᒪᓂᐅᔪᒥ, ᒪᐃᔭᐅᑉ ᑐᖏᓕᖓ ᑲᐃᔪᓪ ᓴᐳᑦ ᐅᖃᓚᐅᖅᐳᖅ ᑭᓇᑐᐃᓐᓇᖅ ᓄᓇᖃᖅᓯᒪᔪᒥ ᐊᓯᖏᓐᓂ ᓄᓇᓕᐅᔪᓂ ᓄᓇᕗᒻᒥ ᖃᐅᔨᒪᕗᑦ ᖃᓄᖅ ᐱᒻᒪᕆᐅᓂᖓᓂ ᐅᖃᓪᓚᒡᕕᖃᕐᓂᖓᓂ. ᐃᓚᒋᐊᖅᓯᓚᐅᖅᐳᖅ ᐱᑕᖃᖅᐸᒌᖅᑐᓂ ᐅᖃᓪᓚᒡᕕᐅᔪᓂ ᐃᖃᓗᖕᓂ ᐱᓕᕆᑦᑎᐊᓲᖑᕗᑦ, “ᐱᓪᓚᕆᐅᕗᖅ” ᐱᖃᕐᓂᕐᒥ ᓄᓇᓕᖕᓂ ᐅᖃᓪᓚᒡᕕᖃᓪᓚᑦᑖᕐᓂᖓᓂ ᐱᓕᕆᕙᒃᑐᓂ ᐱᓕᕆᐊᖑᓂᐅᔪᓂ ᐊᒻᒪ ᐋᔩᖃᑎᒌᖕᓂᐅᔪᓂ.

“ᐊᖏᔪᒻᒪᕆᐊᓘᓪᓗᓂ ᐃᓚᑰᓂᐅᕗᖅ ᐃᓚᒋᔭᐅᔪᒥ ᐃᖃᓗᖕᓂ ᐊᒥᓱᓄᑦ ᐊᕐᕌᒍᓄᑦ ᐊᒻᒪ ᖁᕕᐊᕐᔪᐊᖅᐳᖓ ᐱᓪᓚᕆᙳᕐᓂᐊᓂᖓᓂ,” ᓴᐳᑦ ᐅᖃᓚᐅᖅᐳᖅ.