ᐃᓄᒃᑎᑐᑦ Dec 2, 2021 – 5:21 pm EST

ᓗᐊᕆ ᐃᓪᓚᖅ ᐊᐱᕐᓱᕈᑎᖃᕐᑐᖅ ᓕᐳᕈᓪ ᒐᕙᒪᖓᓂᒃ ᐃᓄᑐᖃᐃᑦ ᑲᒪᒋᔭᐅᔭᕆᐊᖃᕐᓂᖏᓐᓄᑦ – ᐃᓄᒃᑎᑐᑦ ᐅᖃᓪᓚᒃᓱᓂ

ᒐᕙᒪᑐᖃᒃᑯᓐᓂ ᓄᓇᕗᒻᒧᑦ ᑭᒡᒐᖅᑐᖅᑎ ᐅᖃᓪᓚᐅᓯᖃᓚᐅᕐᐳᖅ ᐃᓄᑐᖃᐃᑦ ᑲᒪᒋᔭᐅᔭᕆᐊᖃᕐᓂᖏᓐᓄᑦ ᐱᔨᑦᓯᕋᕈᑎᑕᖃᖖᒋᓗᐊᕐᓂᖓᓂᒃ ᐊᕕᒃᑐᖅᓯᒪᓂᓕᒫᒥ ᐊᒻᒪᓗ ᑎᓕᕆᓪᓗᓂ ᒐᕙᒪᑐᖃᒃᑯᓐᓂᑦ ᐃᑲᔪᖅᑕᐅᓯᒪᓕᕆᐊᖃᕐᓂᖏᑕ

ᒐᕙᒪᑐᖃᒃᑯᓐᓂ ᓄᓇᕗᒻᒧᑦ ᑭᒡᒐᖅᑐᖅᑎ ᓗᐊᕆ ᐃᓪᓚᐅᖅ ᐃᓄᒃᑎᑐᑦ ᐅᖃᓪᓚᒍᓐᓇᕐᓂᕐᒥᓂᒃ ᐊᑐᓚᐅᖅᐳᖅ ᒥᓂᔅᑕᐃᑦ ᑲᑎᒪᕕᒡᔪᐊᕐᕕᖓᓂ ᓯᕗᓪᓕᖅᐹᒥᒃ ᓄᕕᐱᕆ 26-ᒥ, ᑎᓕᐅᕆᓪᓗᓂᒋᑦ ᓕᐳᕈᓪ ᒐᕙᒪᖓᑦ ᐃᓄᑐᖃᐃᑦ ᑲᒪᒋᔭᐅᔭᕆᐊᖃᕐᓂᖏᓐᓄᑦ ᓄᓇᕗᒻᒥ ᐱᔾᔪᑎᒋᓪᓗᓂᒋᑦ. (Screenshot from ParlVU)

By ᔨᐊᕝ ᐱᓚᑦᑎᐄ

For an English version of this story, see Lori Idlout presses Liberals on elder care — in Inuktitut

ᒐᕙᒪᑐᖃᒃᑯᓐᓂ ᓄᓇᕗᒻᒧᑦ ᑭᒡᒐᖅᑐᖅᑎ ᓂᓪᓕᐅᓯᖃᓚᐅᕐᐳᖅ ᐱᔾᔪᑎᒋᓪᓗᓂᒋᑦ ᐃᓄᑐᖃᐃᑦ ᑲᒪᒋᔭᐅᔭᕆᐊᖃᕐᓂᖏᓄᑦ ᐊᐱᖅᓱᕈᑎᖃᖅᓱᓂ ᓯᕗᓪᓕᖅᐹᒥᒃ ᐃᓄᒃᑎᑐᑦ ᐅᖃᓪᓚᒃᓱᓂ ᐊᐱᖅᑯᑎᒃᓴᒥᓂᒃ ᒥᓂᔅᑕᐃᑦ ᑲᑎᒪᕕᒡᔪᐊᕐᕕᖓᓂ ᓄᕕᐱᕆ 26-ᒥ.

NDP-ᑯᓐᓄᑦ (ᐃᓐᑏᐲ) ᒐᕙᒪᑐᖃᒃᑯᓐᓂ ᓄᓇᕗᒻᒧᑦ ᑭᒡᒐᖅᑐᖅᑎ ᓄᓇᑦᓯᐊᕐᒥ ᐱᕙᓪᓕᐊᔪᓕᕆᔨᒃᑯᓐᓄᑦ ᐅᖃᓚᐅᕐᐳᖅ ᓄᕕᐱᕆ 24-ᒥ ᐃᓄᒃᑎᑑᕐᓗᓂ ᐅᖃᓪᓚᒍᒪᓂᐊᕋᒥ ᑐᓵᔨᖃᕈᓐᓇᖅᑎᑕᐅᓂᐊᕈᓂ.

ᐊᐱᖅᑯᑎᒃᓴᖃᖅᑐᑦ ᐱᕕᒃᓴᖃᖅᑎᑕᐅᑎᓪᓗᒋᑦ ᓄᕕᐱᕆ 26-ᒥ, ᐊᐱᖅᑯᑎᖃᓚᐅᕐᐳᖅ ᖃᓄᐃᒻᒪᑦ ᐃᓄᑐᖃᐃᑦ ᑲᒪᔨᖃᖅᑎᑕᐅᖖᒋᓗᐊᕐᒪᖔᑕ ᓄᓇᕗᒻᒥ, ᐊᒻᒪᓗ ᐊᐱᕆᓪᓗᓂᒋᑦ ᓕᐳᕈᓪ ᒐᕙᒪᖓᑦ ᖃᓄᖅ ᐱᓕᕆᓂᖃᕐᓂᐊᕐᒪᖔᑕ ᐃᑲᔪᕈᑎᒃᓴᖃᖅᑎᑦᑎᓂᕐᒥᒃᑎᒍᑦ.

“ᓄᓇᕗᒻᒥ ᐃᓄᑐᖃᖁᑎᕗᑦ ᐊᐅᓪᓚᖅᑎᑕᐅᖃᑦᑕᕐᒪᑐ [ᐊᒻᒪᓗ] ᕿᒪᐃᑎᑕᐅᕙᒃᖢᑎᒃ ᐃᓚᒋᔭᒥᖕᓂᑦ, ᓄᓇᒋᔭᑐᖃᒥᓐᓂᑦ ᐊᒻᒪᓗ ᓄᓇᓕᒋᔭᒥᓐᓂᑦ ᐱᔾᔪᑎᒋᓪᓗᒍ ᐊᕕᒃᑐᖅᓯᒪᓂᐅᔪᒥ ᑲᒪᒋᔭᐅᕕᒃᓴᓂᒃ ᐱᓯᒪᓕᕈᖕᓇᖅᐸᖖᒋᓐᓇᒥᒃ,” ᐅᖃᖅᖢᓂ, ᐃᓄᒃᑎᑐᑦ, ᐅᖃᓪᓚᒃᐸᓪᓕᐊᔭᖏᑦ ᑐᑭᓕᐅᖅᑕᐅᕙᓪᓕᐊᓪᓗᑎᒃ ᖃᓪᓗᓈᑎᑐᑦ ᐊᒻᒪᓗ ᒍᐃᒍᐃᑎᑐᑦ. ᐃᓪᓚᐅᖅ ᐅᖃᒃᑲᓐᓂᓚᐅᕐᐳᖅ “ᓈᓴᒐᒃᓴᐅᖖᒋᑦᑐᓂᒃ” ᐱᑕᖃᖅᑎᑦᓯᓂᐊᕐᓂᕋᖃᑦᑕᕐᓯᒪᔫᒐᓗᐊᑦ ᒐᕙᒪᒃᑯᑦ ᑲᑎᒪᕕᒡᔪᐊᕐᕕᖓᓂᑦ ᐊᒻᒪᓗ ᑭᓯᐊᓂᓗ “ᒥᑭᑦᑐᒻᒪᕆᑯᓗᖕᒥᑦ ᐱᑕᖃᖖᒋᑦᑎᐊᒻᒪᕆᒃᐸᒃᖢᑎᒃᓗ” ᓴᖅᑮᓯᒪᓕᖅᐸᒻᒪᑕ ᐃᑲᔪᕈᑎᒃᓴᐅᓂᐊᖅᑐᓂᒃ ᐃᓄᑐᖃᕐᓄᑦ.

“ᑲᓇᑕᒥ ᐊᖏᔪᖅᑳᕐᔪᐊᖑᔪᖅ ᐅᐱᒍᓱᓕᕐᓂᐊᖅᐸ ᐃᓄᑐᖃᕐᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐊᒻᒪᓗ ᐅᑭᐅᖅᑕᖅᑐᒥᐅᑕᓕᕆᔨᒃᑯᑦ ᑲᑎᒪᔨᕋᓛᖏᓐᓂᒃ, ᐊᒻᒪᓗ ᐅᖃᓚᐅᖅᑕᒥᓂᒃ ᐱᓕᕆᓂᖃᓕᖅᑎᑦᑎᓂᐊᖅᐸ ᓱᒃᑲᓕᖅᑎᑦᑎᒋᐊᕐᓂᕐᒥᒍᑦ ᓴᓇᔭᐅᓯᒪᓕᕐᓂᒃᓴᖏᑕ ᐊᑯᓃᖅᑐᒧᑦ ᑲᒪᒋᔭᐅᕝᕕᐅᔪᒃᓴᓂᒃ ᐊᒻᒪᓗ ᐃᓄᑐᖃᐅᔪᓄᑦ ᐃᒡᓗᖁᑎᒋᔭᐅᔪᒃᓴᓂᒃ ᓄᓇᕗᒻᒥ?” ᐊᐱᕆᓪᓗᓂ.

ITK Job Opportunties, Senior Policy Advisor, MMIWG

ᑲᓇᑕᒥ ᐊᖏᔪᖅᑳᕐᔪᐊᖅ ᔭᔅᑎᓐ ᑐᕉᑑ ᑕᐃᒪᐅᖃᑕᐅᓚᐅᖖᒋᒻᒪᑦ ᐊᐱᖅᑯᑎᒃᓴᖃᖅᑐᑦ ᐱᕕᒃᓴᖃᖅᑎᑕᐅᑎᓪᓗᒋᑦ ᓄᕕᐱᕆ 26-ᒥ. ᒪᓕᒃᓗᒋᑦ ᖃᐅᑕᒫᑦ ᐱᓕᕆᐊᒃᓴᕆᕙᒃᑕᖏᓄᑦ ᑎᑎᕋᖅᑕᐅᓯᒪᕙᒃᑐᑦ, ᑲᑎᒪᖃᑎᖃᓚᐅᕐᒪᑦ ᒪᓐᑐᕆᐋᓪᒥ ᒪᐃᔪᕐᒋᔭᐅᔪᒥᒃ ᕙᓕᕆ ᐸᓛᓐᑦ, ᑲᓇᑕᐅᑉ ᐅᐊᖕᓇᖓᓄᐊᕐᓂᐊᓵᕐᓂᕐᒥᓂ ᑕᑯᔭᖅᑐᐃᓯᒪᓗᓂ ᐳᕈᑎᔅ ᑲᓚᒻᐱᐊᒥ ᐃᒥᕐᒥᑦ ᖄᒥᕝᕕᐅᓗᐊᖅᓯᒪᓪᓗᑎᒃ ᐊᒃᓱᕈᓕᖅᓯᒪᓂᖃᖅᑐᓄᑦ ᐊᒃᑐᖅᑕᐅᓯᒪᓂᒥᓐᓂᑦ.

ᐅᑭᐅᖅᑕᖅᑐᒥᐅᑕᓕᕆᔨᒃᑯᓐᓄᑦ ᒥᓂᔅᑕ ᑖᓂᐅᓪ ᕚᓐᑖᓪ ᑭᐅᔨᐅᓚᐅᕐᐳᖅ ᐃᓪᓚᐅᑉ ᐊᐱᖅᑯᑎᒋᔭᖓᓄᑦ, ᐅᖃᖅᖢᓂ ᐱᓕᕆᖃᑎᒋᓂᐊᕋᒥᐅᒃ ᐋᖅᑭᒋᐊᖅᑕᐅᓯᒪᓕᖁᓪᓗᒋᑦ ᐱᔾᔪᑕᐅᓕᖅᓯᒪᔪᑦ ᐃᓄᑐᖃᓕᕆᓂᕐᒥ ᐱᓕᕆᐊᒃᓴᐅᓕᖅᓯᒪᓪᓗᑎᒃ.

“ᓴᕆᒪᒋᕙᕋ ᓯᕗᓪᓕᖅᐹᒻᒪᕆᐅᓪᓗᖓ ᒥᓂᔅᑕᒋᔭᐅᓪᓗᖓ ᐅᑭᐅᖅᑕᖅᑐᒥᐅᑕᓕᕆᔨᒃᑯᓐᓂ ᑐᓴᖅᑕᐅᑎᑦᑎᓯᒪᓕᕆᐊᕐᓂᕐᒧᑦ ᐃᒡᓗᕐᔪᐊᓕᐅᕈᑎᒃᓴᓂᒃ, ᐃᒡᓗᓕᕆᔾᔪᑎᒃᓴᓂᒃ, ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ, ᐃᓄᑐᖃᓕᕆᓂᕐᓄᑦ,” ᐅᖃᖅᖢᓂ.

ᑕᐃᒪᓐᓇ ᑭᐅᓯᒪᓕᓚᐅᕐᓂᖅ ᓯᕗᓪᓕᖅᐸᐅᖖᒋᒻᒪᑦ ᓕᐳᕈᓪ ᒐᕙᒪᖓᑦ ᓇᓗᓇᐃᓪᓚᕆᒃᑐᒃᑯᑦ ᑭᐅᔾᔪᑎᖃᖅᐸᖖᒋᓐᓂᖓᑦ ᐊᐱᖅᑯᓯᐅᔪᓄᑦ ᐱᔾᔪᑎᖃᖅᑎᓪᓗᒋᑦ ᐃᓄᑐᖃᐃᑦ ᑲᒪᒋᔭᐅᓕᕆᐊᖃᕐᓂᖏᓐᓄᑦ. ᒥᓂᔅᑕᐃᑦ ᑎᓕᔭᐅᓯᒪᓕᖅᑐᓄᑦ ᓴᖅᑮᓯᒪᓕᕐᓂᕐᒥᓄᑦ ᐅᒃᑐᐱᕆᐅᑎᓪᓗᒍ, ᑐᕉᑑ ᐊᔾᔨᑲᓴᖓᓂᒃ ᑭᐅᔾᔪᑎᖃᓚᐅᕐᒥᒻᒪᑦ ᓄᓇᑦᓯᐊᕐᒥ ᐱᕙᓪᓕᐊᔪᑦ ᑐᓴᒐᒃᓴᓕᕆᔨᖏᓐᓄᑦ.

“ᑲᔪᓯᑎᑦᑎᓯᒪᓂᐊᖅᑐᒍᑦ ᐱᓕᕆᐊᖃᖅᑎᐅᖃᑕᐅᓗᑕ … ᑮᓇᐅᔭᓂᒃ ᕿᑐᕐᖏᐅᖅᑎᑦᓯᓂᒃᑯᑦ ᐃᒡᓗᕐᔪᐊᓕᐅᕈᑎᒃᓴᓂᒃ, ᐃᒡᓗᓕᕆᔾᔪᑎᒃᓴᓂᒃ, ᐃᑲᔪᕈᑎᒃᓴᓂᒃ ᐊᒃᑐᖅᑕᐅᓴᕋᐃᑦᑐᓪᓗᑎᒃ ᐃᓄᑐᖃᐃᑦ ᐱᔪᓐᓇᐅᑎᖃᕐᓂᖏᓂᒃ ᐊᕕᒃᑐᖅᓯᒪᓂᓕᒫᒥ, ᐊᒻᒪᓗ ᓲᖃᐃᒻᒪ, ᑲᓇᑕᓕᒫᒥ,” ᑐᕉᑑ ᐅᖃᓕᖅᓱᓂ.

ᐃᓪᓚᐅᖅ ᐅᖄᓚᐅᑎᐊᓛᑎᒍᑦ ᑐᓴᖅᑎᑦᑎᓚᐅᕐᐳᖅ ᖁᕕᐊᓱᒃᑲᒥ ᐊᐱᖅᑯᑎᒃᓴᒥᓂᒃ ᐊᐱᕆᔪᓐᓇᖅᑎᑕᐅᓚᐅᕋᒥ ᐅᖃᐅᓯᖓᑦ ᐃᓄᐃᑦ ᐊᑐᖅᓱᓂᐅᒃ.