ᓘᕆ ᐃᓪᓚᐅᖅ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐃᒡᓗᒃᓴᓄᑦ ᐃᑲᔪᖅᑕᐅᔪᒪᓚᐅᕐᑐᖅ ᐃᓄᒃᑎᑐᑦ ᐅᖃᓪᓚᒃᖢᓂ ᒪᓕᒐᓕᕆᕕᒡᔪᐊᕐᒥᒃ

ᓄᓇᕗᑦ ᐊᓐᑏᐲᑯᓐᓄᑦ ᒪᓕᒐᓕᐅᖅᑎ ᐅᖃᓚᐅᕐᑐᖅ ᐱᓕᕆᖃᑎᖃᕈᓐᓇᕐᓂᐊᕋᓱᒋᓪᓗᓂ ᓄᓇᖃᖅᑳᖅᑐᓕᕆᓂᕐᒧᑦ ᒥᓂᔅᑕᒥ ᒫᒃ ᒥᐊᓗ ᐊᑕᐅᓯᕐᒥᒃ ᑐᕌᒐᖃᕐᓂᖏᓐᓄ

By ᔨᐊᕝ ᐱᐊᓯᐃ

For an English version of this story, see Lori Idlout calls for mental health and housing support in Inuktitut House of Commons speech

ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᖅ ᒐᕙᒪᑐᖃᒃᑯᓐᓂ ᐱᓇᓱᖕᓂᖅᑕᐅᖁᔨᔪᖅ ᐃᒡᓗᑖᖅᑎᑦᑎᒃᑲᓐᓂᕐᓗᑎᒃ ᐊᒻᒪ ᐱᐅᓂᕐᓴᒥ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᓂᕆᒥᒃ ᐃᓄᒃᑎᑐᑦ ᐅᖃᓪᓚᒃᖢᓂ ᑎᓯᐱᕆ 2ᖑᑎᓪᓗᒍ ᒪᓕᒐᓕᕆᕕᒡᔪᐊᕐᒥ.

ᐃᓪᓚᐅᖅ ᐱᒋᐊᕈᑎᖃᓚᐅᕐᑐᖅ ᓂᐱᐅᓂᐊᕐᓂᕋᖅᖢᓂ ᓄᓇᕗᒥᐅᓄᑦ, ᓄᓇᖃᖅᑳᖅᑐᓄᑦ, ᐊᓪᓚᖓᔪᓄᑦ ᐊᒻᒪ ᐃᓄᖕᓄᑦ.

ᑕᐃᒪᐃᓕᓚᐅᕐᖢᓂ ᐅᖃᐅᓯᖃᓕᓚᐅᕐᒥᔪᖅ ᑭᖑᕚᕇᒃᑐᑦ ᓈᒻᒪᙱᓕᐅᕈᑎᖃᐅᕐᓂᖏᓐᓂᒃ ᒪᑯᓇᙶᖅᑐᓂᒃ ᐃᓕᓐᓂᐊᕆᐊᖅᑐᖅᕕᐅᕙᓚᐅᕐᑐᓄᑦ, ᐊᒻᒪᓗ ᐅᓄᒻᒪᕆᒃᑐᑦ ᓄᓇᖃᖅᑳᖅᑐᑦ, ᐱᓗᐊᕐᑐᒥ ᓄᓇᕗᒥᑦ, ᐃᓱᒪᖏᑦᑎᒍᑦ ᐋᓐᓂᐊᖃᓕᕐᓯᒪᓂᖏᓐᓂᒃ ᐊᒻᒪᓗ ᐃᒻᒥᓃᖃᑦᑕᓗᐊᖅᖢᑎᒃ.

“ᖁᕕᐊᓇᙱᑦᑐᓂᒃ ᐊᑐᖃᑦᑕᖅᓯᒪᒐᑦᑕ ᒪᐅᓈᖓᔪᓂᒃ ᐃᓕᓐᓂᐊᕆᐊᖅᕕᐅᕙᓚᐅᕐᑐᓄᑦ,” ᐅᖃᖅᑐᖅ. “ᐅᓇ ᐃᔨᕐᓯᒪᑎᑕᐅᓇᓱᖕᓂᖅ ᖃᓄᐃᓕᐅᕈᑎᐅᓯᒪᔪᓂᒃ ᐅᓄᓗᐊᖅᑐᓂᒃ ᓄᓇᖃᖅᑳᖅᑐᓂᒃ, ᐊᓪᓚᖓᔪᓂᒃ ᐊᒻᒪ ᐃᓄᖕᓂᒃ ᐊᑐᓗᐊᕈᑎᐅᔭᑦᑐᓂᒃ ᐊᑐᕈᑎᐅᓗᐊᓕᕐᒪ ᐊᒻᒪᓗ ᐅᓄᓗᐊᖅᑐᐊᓗᐃᑦ ᐃᒻᒥᓃᖅᓯᒪᓪᓗᑎᒃ.”

ᐃᓪᓚᐅᖅ ᐅᖃᐅᓯᖃᓚᐅᕐᒥᔪᖅ ᑐᓴᖃᑦᑕᖅᓯᒪᓂᖓᓂᒃ “ᐅᓂᒃᑳᓂᒃ ᐋᓐᓂᕈᑎᐅᓯᒪᔪᓂᒃ ᐊᒻᒪ ᓂᕆᐅᒍᑎᐅᓯᒪᔪᓂᒃ” ᓄᓇᕗᒥᑦ ᒪᑯᓇᙵᑦ ᐊᔪᖅᓴᖃᑦᑕᖅᑐᓂᒃ, ᑭᓯᐊᓂᓕ ᓯᕗᓂᒃᓴᖏᓐᓂᒃ ᓂᕆᐅᒋᔭᖃᑦᑎᐊᖅᑐᓂᒃ. ᐅᖃᓚᐅᕐᒥᔪᖅ ᒐᕙᒪᒃᑯᑦ ᐃᒡᓗᖃᖅᑎᑦᑎᒃᑲᓐᓂᖁᓪᓗᒋᑦ ᐅᑭᐅᕐᑕᖅᑐᕐᒥᒃ, ᐱᓗᐊᖅᑐᒥᓐ ᐃᓐᓇᑐᖃᕐᓄᑦ ᐊᒻᒪ ᐊᔾᔨᐅᙱᑎᑕᐅᕙᒃᑐᓂᒃ.

“ᓄᓇᕗᒻᒥᐅᑕᐃᑦ ᑐᑭᓯᓯᒪᔪᑦ ᖃᓄᐃᓕᐅᕈᑎᒃᓴᖅᑕᖃᐅᕐᓂᖓᓂᒃ ᓄᓇᓕᖏᓐᓂᒃ ᓴᙱᒃᑎᑉᐹᓪᓕᕈᑎᐅᔪᓐᓇᖅᑐᓂᒃ ᐊᒻᒪᓗ ᐱᐅᓯᕚᓪᓕᕈᑎᐅᔪᓐᓇᖅᑐᓂᒃ ᑭᖑᓪᓕᐅᓂᐊᖅᑐᓄᑦ,” ᐅᖃᖅᑐᖅ.

“ᐱᕕᖃᕐᓂᓐᓂᒃ ᐱᓕᕆᖃᑎᖃᕈᒪᔪᖓ ᐃᓕᖅᑯᓯᑦᑎᒍᑦ, ᒪᓕᒐᓕᕆᓂᕐᒥᒃ ᑐᑭᓯᐅᒪᓂᕐᒧᑦ ᐊᒻᒪ ᐃᓅᓯᕐᒧ ᐃᓱᒪᒋᔭᑦᑎᒍ ᐱᓕᕆᖃᑎᒌᒍᓐᓇᕐᓂᐊᕋᑦᑕ ᓈᒻᒪᙱᓕᐅᕈᑎᓂᒃ ᐋᖅᑭᒃᓱᐃᓇᓱᖕᓂᕐᒧᑦ.”

ᐅᖃᓪᓚᒡᕕᖓ ᐃᓱᓕᓕᕐᑎᓪᓗᒍ ᐅᖃᓚᐅᕐᒥᔪ ᒐᕙᒪᒃᑯᑦ ᐊᖏᖁᓪᓗᓂᒋᑦ ᐆᒥᖓ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐅᖃᓚᐅᕐᑕᖓᓂᒃ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ.

ᐅᖃᓪᓛᓂᒃᑎᓪᓗᒍ, ᓄᓇᖃᖅᑳᖅᑐᓕᕆᓂᕐᒧᑦ ᒥᓂᔅᑕ ᒫᒃ ᒥᐊᓗ ᐅᖃᕈᓐᓇᖅᑎᑕᐅᓚᐅᕐᑐᖅ ᐊᐱᕆᓗᓂᓘᓐᓃᑦ ᐃᓪᓚᐅᖅᒥ ᐅᖃᐅᓯᖏᓐᓄᑦ. ᒥᐊᓗ ᖁᔭᓕᓚᐅᕐᑐᖅ ᐃᓪᓚᐅᖅᒥᒃ ᐅᖃᓪᓚᒍᓐᓇᓚᐅᕐᓂᖓᓂᒃ ᐊᒻᒪᓗ ᖁᔭᒋᓪᓗᓂᒋᑦ ᑐᓵᔨᓂᒃ ᑐᓴᖅᑕᐅᔪᓐᓇᓚᐅᕐᓂᖓᓂ ᒪᓕᒐᓕᕆᕕᒡᔪᐊᕐᒥᓐ.

“ᒪᓕᒐᓕᕆᔨᐅᖃᑕᐅᔫᑉ ᐅᖃᖅᑕᖏᓐᓂᒃ ᑐᑭᓯᓂᓐᓂ ᐅᖃᕈᒪᓪᓗᖓ,” ᒥᐊᓗ ᐅᖃᖅᑐᖅ. “ᐅᖃᐅᓯᖏᑦ ᑖᔅᓱᒪᙶᓚᐅᕐᒪᑕ.”

ᒥᐊᓗ ᐅᖃᓪᓛᓂᒃᑎᓪᓗᒍ, ᐃᓪᓚᐅᖅ ᖁᔭᒋᓚᐅᕐᒥᔭᖓ ᐅᖃᐅᓯᖏᓐᓄᑦ. ᐃᓪᓚᐅᖅ ᐅᖃᓚᐅᕐᑐᖅ “ᑖᔅᓱᒥᖓ ᐱᓕᕆᖃᑎᖃᕈᓐᓇᕐᓂᐊᕋᓱᒋᓪᓗᓂ,” ᐊᒻᒪᓗ ᐱᓕᕆᖃᑎᖃᕈᓐᓇᕐᓗᓂ ᑕᒪᐃᓐᓂᓕᒫᖅ ᓕᐳᕈᒃᑯᑦ ᒥᓂᔅᑕᖏᑦ ᐊᒻᒪ ᒪᓕᒐᓕᕆᔨᐅᖕᒥᔪᑦ.

ᐃᓪᓚᐅᖅ ᐅᖃᓪᓛᓂᓚᐅᕐᑐᖅ ᒪᓕᒐᓕᐅᖅᑎᓂᒃ ᓄᓇᖃᖅᑳᖅᑐᓂᒃ ᐱᓕᕆᖃᑎᖃᖁᔨᓪᓗᓂ. “ᐃᓚᒋᔭᐅᔪᑦ ᑐᓵᖃᑦᑕᕆᐊᖃᕐᒪᑕ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓂᒃ ᐊᒻᒪ ᐱᓕᕆᖃᑎᖃᕐᓗᑎᒃ, ᒪᑯᓂᖓᓗᑦ ᐊᑐᐊᒐᕐᓂᒃ ᐊᓯᔾᔨᖅᓯᓂᒃᑯᑦ ᐱᐅᓯᕚᓪᓕᕈᑎᐅᓂᐊᖅᑐᓂᒃ ᑖᒃᑯᐊ ᐃᓅᓯᖏᓐᓄᑦ,” ᐅᖃᓚᐅᕐᑐᖅ

ᐅᓇ ᐃᓪᓚᐅᖅ ᐊᐃᑉᐸᖓᓂ ᐃᓄᒃᑎᑐᑦ ᐅᖃᓪᓚᓚᐅᕐᑐᖅ. ᓄᕕᐱᕆ 26-ᒥ ᐊᐱᕆᓚᐅᕐᓯᒪᖕᒪᑦ ᓕᐳᕈᒃᑯᓐᓂ ᐃᓐᓇᒃᑯᕕᒃᑕᖃᖅᑎᑦᑎᔪᓐᓇᕐᒪᖔᑦ ᓄᓇᕗᒦᑦᑐᓂᒃ.

Share This Story

(0) Comments