ᓛᒐ ᑐᔪᕐᒥᕕᒃ ᑲᔪᓯᔪᖅ ᐱᓇᓱᒍᑎᓂᒃ ᓄᑖᒧᑦ ᐋᑐᕚᒥ ᑐᔪᕐᒥᕕᒃᓴᒧᑦ

For an English version of this story, please see: Larga Baffin resumes application for new Ottawa facility.

ᓛᒐ ᑐᔪᕐᒥᕕᒃ ᑲᔪᓯᔪᖅ ᐱᓇᓱᒍᑎᒋᓚᐅᕐᑕᖏᓐᓂᒃ ᓄᑖᒥ ᑐᔪᕐᒥᕕᒃᒥ ᐋᑐᕚᒥ ᓴᓇᔪᒪᔾᔪᑎᒃᓴᑦ ᓄᖃᖓᑎᑕᐅᓚᐅᖅᑎᓪᓗᒋᑦ ᔭᓄᐊᕆᒥ, ᐅᖃᓚᐅᕐᑐᖅ ᐋᑐᕚᒥ ᓄᓇᓕᐸᐅᔭᓄᑦ ᑲᑎᒪᔨ ᑕᐃᐋᓐ ᑏᓐᔅ.

ᑏᓐᔅ, ᑖᓐᓇ ᓄᓇᒋᔭᐅᔪᓂᒃ ᑭᒡᒐᖅᑐᐃᔨᐅᔪᖅ ᓴᓇᕝᕕᐅᓂᐊᕈᒪᔪᓂᒃ 220-ᓂ ᐃᒡᓗᕈᓯᖃᕐᑐᒥ ᑐᔪᕐᒥᕕᒃᓴᒥᒃ, ᐅᖃᕐᓯᒪᓚᐅᕐᑐᑦ ᒫᔅᓯ 10-ᒥ ᑎᑎᕋᖅᑕᐅᔪᕕᓂᕐᓂᒃ ᑖᒃᑯᐊ ᓛᒐ ᑐᔪᕐᒥᕕᒃ ᑲᔪᓯᑎᑦᑎᓂᐊᕐᓂᕋᖅᖢᑎᒃ ᐱᓇᓱᒍᑎᓂ ᐊᒻᒪᓗ ᐃᓚᒋᐊᕐᓯᔪᒪᙱᖢᑎᒃ ᓯᕗᓪᓕᕐᒥᒃ ᐱᓇᓱᒍᑎᒋᒪᐅᕐᑕᖏᓐᓂᒃ.

ᓛᒐ ᑐᔪᕐᒥᕕᒃ ᐱᓇᓱᒍᑎᖏᓐᓂᒃ ᓄᖅᑲᖅᑎᑦᑎᓚᐅᑲᓚᐅᕐᓯᒪᖕᒪᑕ ᔭᓄᐊᕆᒥ ᓄᓇᓕᖕᓂ ᑐᓴᕋᓱᒃᑎᓪᓗᒋᑦ ᐱᓕᕆᐊᒧᑦ, ᑖᒃᑯᐊ ᐃᑲᔫᑎᐅᓇᔭᕐᓂᖏᓐᓂᒃ ᓄᓇᓕᖕᓂᒃ ᐊᒻᒪ ᐋᓐᓂᐊᖅᑐᓕᕆᓂᕐᒥᒃ ᓄᓇᕗᒻᒥᐅᓂᒃ ᕿᑭᖅᑖᓘᑉ ᒥᒃᓵᓂᙶᖅᑐᓂᒃ ᐋᑐᕚᒦᓐᓂᖏᓐᓂᒃ ᐋᓐᓂᐊᕕᖕᒥ ᑲᒪᒋᔭᐅᔭᖅᑐᖅᓯᒪᓂᖏᓐᓂᒃ.

ᐅᓇ ᑐᔪᕐᒥᕕᒃᓴᖅ ᐅᕙᓃᓐᓇᔭᖅᖢᓂ ᕼᐊᓐ ᑲᓚᑉ ᐊᖅᑯᑎᒥᒃ ᐅᓄᕐᓂᕐᓴᓂᒃ ᐃᒡᓕᖃᓕᕋᔭᕐᑐᖅ “ᐅᓄᕐᓯᕙᓪᓕᐊᓂᖏᓐᓄᑦ ᐊᑐᕆᐊᖃᕐᑐᑦ” ᐱᔨᑦᑎᕋᐅᑎᖏᓐᓂᒃ, ᐅᖃᕐᓯᒪᓚᐅᕐᑐᑦ ᐸᕐᓇᐅᑎᓄᑦ ᐅᓂᒃᑳᕆᔭᐅᔪᑦ.

ᔭᓄᐊᕆᒥ, ᑏᓐᔅ ᐅᖃᓚᐅᕐᓯᒪᔪᖅ ᓄᓇᓕᐸᐅᔭᐃᑦ ᐋᑐᕚᒥ ᐸᕐᓇᐅᑎᓕᕆᔨᖏᑦ ᐃᓱᒪᒋᔭᖏᓐᓂᒃ ᑎᑎᖃᓂᒃ ᑐᓂᓯᓚᐅᕐᒥᔪᑦ ᓛᒐ ᑐᔪᕐᒥᕕᒃᒧᑦ ᐃᓱᒫᓘᑎᒋᔭᐅᔪᓂᒃ ᐱᓇᓱᒍᑎᓃᑦᑐᓂᒃ ᐅᑯᓇᙵᑦ ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᓄᓇᓕᖕᓄᑦ. ᐃᓱᒪᓚᐅᕐᑐᖅ ᓛᒐ ᑐᔪᕐᒥᕕᒃ ᑕᒪᑐᒧᖓ ᑭᐅᔾᔪᑎᖏᓐᓂᒃ ᐱᓂᐊᕋᓱᒋᓪᓗᑎᒃ ᑎᑎᕋᖅᑕᐅᓯᒪᔪᓂᒃ “ᐊᒡᒋᖅᑐᓂᒃ ᐱᓇᓱᐊᕈᓯᕐᓂᒃ” ᑖᓐᓇᓗ ᐸᕐᓇᐅᑎᓕᕆᓂᕐᒥᒃ ᐱᓕᕆᔾᔪᑎᐅᓕᕐᓂᐊᖅᖢᓂ.

ᑏᓐᔅ ᐅᖃᓚᐅᕐᒥᔪᖅ ᑭᒃᑯᓕᒫᓂᒃ ᑲᑎᒪᑎᑦᑎᔪᒪᓪᓗᓂ ᐄᐳᕈᓪ ᕿᑎᐊᓂᒃ ᓄᓇᖃᖅᑐᑦ ᐊᐱᕐᓱᕈᓐᓇᕐᓂᐊᓗᑎᒃ ᐊᒻᒪ ᐃᓱᒫᓘᑎᖏᓐᓂᒃ ᐅᖃᕈᓐᓇᕐᓂᐊᕐᓗᑎ ᐅᑯᓄᖓ ᓛᒐ ᑐᔪᕐᒥᕕᒃᒧ ᐊᒻᒪ ᑐᔪᕐᒥᕕᓕᐅᕐᓂᕐᒧᑦ ᑭᒡᒐᖅᑐᐃᔨᓄᑦ.

“ᖃᐅᔨᒪᒐᒪ ᓄᓇᓖᑦ ᐅᓄᕈᓘᔭᕐᑐᓂᒃ ᐊᐱᖅᑯᑎᖃᕐᒪᑕ ᑭᐅᔭᐅᓯᒪᙱᑦᑐᓂᒃ ᓛᒐ ᑐᔪᕐᒥᕕᐅᑉ ᒥᒃᓵᓄᑦ ᐊᒻᒪᓗ ᖃᐅᔨᔪᒪᒃᑲᓐᓂᖅᖢᑎᒃ ᑖᒃᑯᐊ ᑲᑐᔾᔨᖃᑎᒌᑦ ᒥᒃᓵᓄᑦ ᐊᒻᒪᓗ ᑐᔪᕐᒥᕕᓕᐊᕆᔭᐅᔪᒪᔪᒥᒃ. ᑲᑎᒪᑎᑦᑎᓂᐊᕋᒪ ᓛᒐ ᑐᔪᕐᒥᕕᒃᑯᓐᓄᑦ ᐱᓕᕆᔨᐅᔪᓂᒃ ᑭᒃᑯᓕᒫᓂᒃ ᑲᑎᒪᑎᑦᑎᓚᐅᙱᓐᓂᑦᑎᓐᓂᒃ,” ᐅᖃᖅᑐᖅ ᑏᓐᔅ.

ᒪᓚᐃᔭ ᔨᐅ, ᓛᒐ ᑐᔪᕐᒥᕕᒃᒧᑦ ᐊᖓᔪᖅᑳᖅ, ᑭᐅᑲᑕᓚᐅᙱᑦᑐᖅ ᑕᒪᑐᒧᖓ ᐊᐱᕐᓱᖅᑕᐅᔪᒪᑎᓪᓗᒍ.