ᓛᒐ ᕿᑭᖅᑖᓗᒃ ᒥᒃᖠᒋᐊᖅᑎᑦᑎᕗᖅ ᐸᕐᓇᐅᑎᓂ ᑭᓯᐊᓂ ᐃᓐᓄᒍᓐᓇᕐᓂᖓᓂᐅᙱᑦᑐᖅ ᓄᑖᖑᔪᒥ ᐃᒡᓗᕐᔪᐊᒧᑦ

For English version, see Larga Baffin shrinks plans but not capacity for new building

ᓛᒐ ᕿᑭᖅᑖᓗᒃᑯᑦ ᑐᒃᓯᕋᖅᑕᖓᑦ ᓄᑖᖑᔪᖅ ᐃᒡᓗᕐᔪᐊᖅ ᐋᑐᕚᒥ ᐃᓗᓕᖃᕐᓂᐊᖅᐳᖅ ᐅᓄᙱᓐᓂᖅᓴᐅᔪᓂ ᐃᒡᓗᕈᓯᓂ ᓯᕗᓪᓕᐅᔪᒥ ᐸᕐᓇᒃᑕᐅᓚᐅᕐᓂᖓᓂ ᑭᓯᐊᓂ ᐃᓂᒃᓴᖃᕐᓂᐊᖅᐳᖅ 350−ᓄᑦ ᐱᓕᕆᔾᔪᔾᔭᐅᕙᒃᑐᓄᑦ, ᐅᖃᖅᑎᐅᔪᒥ ᐅᖃᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ.

ᐃᓅᓕᓴᖅᑕᐅᓂᕐᒧᑦ ᑐᔪᕐᒥᕕᒃ ᐃᒡᓗᕐᔪᐊᖅ, ᕿᓚᒻᒥᐅᔪᒥ ᐃᒡᓗᖃᖅᑎᑦᑎᕙᒃᑐᒥ ᓄᓇᕗᒻᒥᐅᓂ ᐊᐅᓪᓛᖅᑐᓄᑦ ᐋᑐᕚᒧᑦ ᐊᓯᐊᒎᖅᑐᒥ ᐃᓅᓕᓴᖅᑕᐅᓂᕐᓂ, ᐊᖏᖅᑕᐅᓚᐅᖅᐳᑦ ᐋᑐᕚᒥ ᓄᓇᓕᐸᐅᔭᒥ ᑲᑎᒪᔨᖏᓐᓂ ᔫᓂ 2022−ᒥ ᓴᓇᓂᕐᒥ ᐊᖏᓂᖅᓴᐅᔪᒥ ᐃᒡᓗᕐᔪᐊᒥ ᖃᓂᒋᔭᖓᓂ Hunt Club Road ᐊᒻᒪ Sieveright Avenue−ᒥ.

ᓄᑖᖑᔪᖅ ᐃᓂᒃᓴᐅᔪᖅ ᐃᓄᖃᕈᓐᓇᕐᓂᐊᖅᐳᖅ 350−ᓂ ᐱᓕᕆᔾᔪᔾᔭᐅᕙᒃᑐᓄᑦ, ᐅᓄᖅᓯᒋᐊᖅᑐᒥ 195−ᓂ ᑐᔪᕐᒥᔪᓐᓇᖅᑐᓂ ᒫᓐᓇᐅᔪᒥ Richmond Road ᐃᓂᒋᔭᖓᓂ.

ᓛᒐ ᕿᑭᖅᑖᓗᖕᒥ ᓯᕗᓪᓕᐅᔪᒥ ᑐᒃᓯᕋᐅᑎᖓ ᖃᐃᖁᔨᓂᖃᓚᐅᖅᐳᖅ 220−ᓂ ᐃᒡᓗᕈᓯᓕᖕᓂ 6-ᓂ ᖁᓕᕇᖑᔪᓂ ᐃᒡᓗᕐᔪᐊᒥ. ᑭᓯᐊᓂ, ᓄᑖᙳᕆᐊᖅᑎᑕᐅᓯᒪᔪᖅ ᐸᕐᓇᐅᑎ ᖃᐃᖁᔨᓂᖃᖅᐳᖅ 176−ᓂ ᐃᒡᓗᕈᓯᕐᓂ ᑕᓪᓕᒪᓂ ᖁᓕᕇᖕᓂᖃᖅᑐᒥ.

ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐊᐃᑉᕆᓕ 22−ᒥ, ᓛᒐ ᕿᑭᖅᑖᓗᒃ ᐅᖃᖅᑎᖓ ᐱᐅᓪ ᒪᑰᑎ ᐅᖃᓚᐅᖅᐳᖅ ᒥᒃᖠᒋᐊᖅᑕᐅᓂᐅᔪᒥ ᖁᑦᑎᖕᓂᖓᓂ ᐊᒻᒪ ᐃᒡᓗᕈᓯᕐᓂ ᐱᔾᔪᑎᖃᖅᐳᖅ ᐊᓯᔾᔨᕐᓂᐅᔪᒥ ᑐᓐᓂᖅᓴᖅᑕᐅᓂᖓᓂ ᐃᒡᓗᒥᐅᖃᑎᒌᒃᑐᓄᑦ ᐃᒡᓗᕈᓯᕐᓂ ᐊᒻᒪ ᐃᒡᓗᒥᐅᖃᑎᖃᙱᑦᑐᓂ ᐃᒡᓗᕈᓯᐅᔪᓂ ᐊᒻᒪ ᐊᒃᑐᐃᓪᓗᐊᙱᓚᖅ ᐅᓄᕐᓂᐅᔪᓂ ᐱᓕᕆᔾᔪᔾᔭᐅᕙᒃᑐᓂ ᐃᒡᓗᕐᔪᐊᖅ ᐃᓄᖃᕈᓐᓇᕐᓂᖓᓂ.

“ᕿᒥᕐᕈᓂᕐᒥ ᐊᐅᓚᓂᖓᓄᑦ ᐱᔭᕆᐊᖃᕐᓂᐅᔪᓂ ᐃᓂᒃᓴᒧᑦ, ᐃᓱᒪᓕᐊᖑᓚᐅᖅᐳᖅ ᑕᐃᒪᐃᒐᔪᖕᓂᐅᔪᒥ ᑕᑯᒃᓴᐅᓂᖓᓂ ᐃᓅᓕᓴᖅᑕᐅᓂᕐᒧᑦ ᑐᔪᕐᒥᕕᐅᔪᒥ ᐱᓕᕆᔾᔪᔾᔭᐅᕙᒃᑐᓂ ᐊᓯᔾᔨᖅᓯᒪᕗᖅ ᑕᐃᒪᙵᓂ ᓯᕗᓪᓕᕐᒥ ᐸᕐᓇᐃᕙᓪᓕᐊᓂᑦᑎᓐᓂ ᓄᑖᖑᔪᒥ ᐃᒡᓗᕐᔪᐊᒥ ᐊᕐᕌᒍᑦ 7−ᖑᓕᖅᑐᓂ ᖄᖏᖅᓯᒪᓕᖅᑐᓂ,” ᒪᑰᑎ ᐅᖃᓚᐅᖅᐳᖅ.

ᐃᓚᒋᐊᖅᓯᓚᐅᖅᐳᖅ ᐅᑯᐊ ᐊᓯᔾᔨᕐᓂᐅᔪᑦ ᐃᓂᒋᔭᖓᓂ ᐸᕐᓇᐅᑎᖓᓂ ᑐᒃᓯᕋᕐᓂᐅᔪᒥ ᐱᒋᐊᖅᑎᑕᐅᓚᐅᖅᐳᑦ ᓛᒐ ᕿᑭᖅᑖᓗᖕᒧᑦ.

ᐱᓗᐊᖅᑐᒥ, ᒪᑰᑎ ᐅᖃᓚᐅᖅᐳᖅ, ᐅᓄᕐᓂᐅᔪᓂ ᐱᓕᕆᔾᔪᔾᔭᐅᕙᒃᑐᓄᑦ ᐃᓄᑑᓪᓗᑎᒃ ᐊᐅᓪᓛᖅᐸᒃᑐᓄᑦ ᑕᐅᑐᒃᖢᒍ ᑕᐃᒃᑯᐊ ᒪᓕᒃᑎᖃᖅᐸᒃᑐᓄᑦ “ᐊᓯᔾᔨᕐᔪᐊᖅᓯᒪᕗᖅ” ᐅᓄᕐᓂᖅᓴᐅᔪᓂ ᑎᑭᑉᐸᒃᑐᓂ ᐃᒡᓗᕐᔪᐊᒧᑦ ᒪᓕᒃᑎᖃᖅᖢᑎᒃ.

“ᐅᓇ ᓴᖑᓂᐅᔪᒥ ᐱᔭᕆᐊᖃᕐᓂᐅᔪᒥ ᐊᑕᐅᓯᖅᓯᐅᑎᒥᒃ ᐃᓄᖃᕈᓐᓇᖅᑐᓂ ᐃᒡᓗᕈᓯᐅᔪᓂ ᑕᐃᑯᖓ ᐊᖏᓂᖅᓴᐅᔪᒥ ᐱᔭᕆᐊᖃᕐᓂᐅᔪᒥ ᒪᕐᕉᖕᓄᑦ ᐃᓄᖃᕈᓐᓇᖅᑐᒥ ᐃᒡᓗᕈᓯᐅᔪᓂ ᐃᓄᖃᕈᓐᓇᕐᓂᖓᓂ ᑎᑭᐅᑎᔪᒧᑦ 350−ᓂ ᐃᓄᖕᓂ ᐊᑕᐅᑦᑎᐅᔪᒥ,” ᐅᖃᓚᐅᖅᐳᖅ.

ᐋᑐᕚᒥ ᓄᓇᓕᐸᐅᔭᒥ ᑲᑎᒪᔨ ᔭᓯᑲ ᐳᕌᑦᓕ, ᑭᒡᒐᖅᑐᐃᔪᒥ Gloucester-Southgate ᐱᓕᕆᕝᕕᐅᔪᒥ ᐃᒡᓗᕐᔪᐊᖅ ᓴᓇᔭᐅᓂᐊᕐᓂᖓᓂ, ᐅᖃᓚᐅᖅᐳᖅ ᓄᑖᙳᕆᐊᖅᑎᑕᐅᓂᐅᔪᒥ ᐃᑭᐊᖅᑭᕕᖓᓂ ᐊᐃᑉᕆᓕ 19−ᒥ ᓛᒐ ᕿᑭᖅᑖᓗᒃ ᑎᑎᕋᖅᓯᒪᕗᑦ ᓇᐃᓈᕆᓯᒪᔪᒥ ᐊᓯᔾᔨᕐᓂᐅᔪᓂ ᓯᕗᓪᓕᐅᔪᒥ ᐸᕐᓇᐅᑎᖓᓄᑦ ᐃᓂᒃᓴᖓᓂ ᐸᕐᓇᐅᑎᖓᓂ ᑐᒃᓯᕋᐅᑕᐅᔪᒥ ᑐᓂᔭᐅᓂᐊᖅᑐᒥ ᓄᓇᓕᐸᐅᔭᒧᑦ. ᑕᐃᒪᐃᒐᔪᒃᑐᒥ, ᐃᓂᒃᓴᖓᓂ ᐸᕐᓇᐅᑎᑦ ᑕᑯᒃᓴᐅᑎᑦᑎᕙᒃᐳᑦ ᐃᓂᖓᓂ ᓱᓇᑐᐃᓐᓇᓄᑦ ᓲᕐᓗ ᐃᒡᓗᕐᔪᐊᓂ, ᓴᓂᕌᓂ ᐱᓱᒡᕕᒃᓴᓂ, ᓄᓇᓯᐅᑎᓄᑦ ᐃᓂᒃᓴᐅᔪᓂ ᐊᒻᒪ ᓄᓇᓕᕆᓂᖓᓂ ᓄᓇᖁᑎᒋᔭᐅᔪᒥ.

ᐳᕌᑦᓕ ᐅᖃᓚᐅᖅᐳᖅ ᐊᓯᔾᔨᕐᓂᐅᔪᑦ ᐱᒋᐊᖅᑎᑕᐅᓚᐅᕆᕗᑦ ᓄᓇᓕᖕᓂ ᐅᖃᐅᓯᒃᓴᓕᐊᖏᓐᓂ ᐃᓄᓕᒫᑎᒍᑦ ᐅᖃᖃᑎᖃᕐᓂᐅᔪᑎᒍᑦ.

ᐊᓯᔾᔨᕐᓂᐅᔪᑦ ᑎᑭᓚᐅᖅᐳᑦ ᑕᖅᑭᒐᓴᖕᓂ ᐋᓐᑎᐊᕆᐅ ᓄᓇᒥ ᒪᓕᒐᓕᐅᖅᑎᐅᔪᓂ ᖁᔭᓈᖅᓯᑎᓪᓗᒋᑦ ᐊᔪᐃᓐᓇᕆᐊᒃᑲᓐᓂᕐᓂᕐᒥ ᐅᕙᙵᑦ Upper Hunt Club ᓄᓇᓕᖕᓂ ᑲᑐᔾᔨᖃᑎᒌᖑᔪᓂ ᔫᓂ 2023−ᒥ ᐊᑭᕋᖅᑐᓚᐅᖅᑐᓂ ᐃᒡᓗᕐᔪᐊᖅ ᐃᓂᖃᕐᓂᖓᓂ Hunt Club Road ᐊᒻᒪ Sieveright Avenue ᐊᐳᖃᑦᑕᐅᑎᓲᓂ, ᐅᖃᐅᓯᖃᖅᑐᓂ ᐃᓱᒫᓘᑕᐅᔪᓂ ᐃᖏᕐᕋᓂᐅᔪᓂ ᓄᓇᓯᐅᑎᓂ ᐊᒻᒪ ᐊᖏᓂᖓᓂ ᐃᒡᓗᕐᔪᐊᒥ.

ᓛᒐ ᕿᑭᖅᑖᓗᒃ ᓂᕆᐅᒋᔭᐅᓚᐅᖅᐳᖅ ᑐᓂᓯᓂᖏᓐᓂ ᐃᓂᒋᔭᖓᓂ ᐸᕐᓇᒍᑎᓪᓚᕆᖓᓂ ᐊᐅᓚᑦᑎᓂᕐᒧᑦ ᑐᒃᓯᕋᐅᑎᖓᓐᓂ ᓄᓇᓕᐸᐅᔭᒧᑦ ᐊᐃᑉᕆᓕᐅᑉ ᓄᙳᐊᓄᑦ.

ᒪᑰᑎ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ “ᓇᑉᐸᖅᑎᕆᕙᓪᓕᐊᔪᒪᓂᖏᓐᓂ ᑕᒪᑐᒪᓂᐅᔪᒥ ᐊᕐᕌᓂᐅᓂᐊᖅᑐᒥ.”