ᓯᑳ ᕼᐊᓚ ᑐᖂᑦᑎᓂᕐᒧᑦ ᐃᖅᑲᖅᑐᖅᑕᐅᕝᕕᒃᓴᖓ ᐋᖅᑭᒃᑕᐅᕗᖅ ᐊᕐᕌᒎᓂᐊᖅᑐᒧᑦ

For English version, see Date for murder trial in death of Kugluktuk actress pencilled in for 2024

ᓯᑳᑦ ᕼᐊᓚ ᐃᖅᑲᖅᑐᖅᑕᐅᓂᐊᖅᑐᖅ ᑐᖂᑦᑎᓂᕐᒧᑦ ᐊᒧᕈᑦ ᒪᒃᑖᓄᑦᒥ, ᑖᔅᓱᒪ ᑎᒥᖓ ᓇᓂᔭᐅᓚᐅᕐᓯᒪᔪᖅ ᒪᐃ 3, 2021-ᒥ ᐃᒡᓗᕋᓛᕐᒥ ᖁᒡᓗᖅᑑᑦ ᓯᓚᑎᐊᓃᑦᑐᒥ.

ᐃᖅᑲᖅᑐᖅᑕᐅᓂᐊᕐᒥᔪᖅ ᑐᖂᑦᑎᓇᓱᓚᐅᕐᓂᖓᓂᒃ ᐊᓯᒃᑲᓐᓂᖓᓂᒃ ᐃᓄᖕᒥ, ᑖᓐᓇᓕ ᐊᑦᒪᓐᑕᓐᒧᑦ ᐊᐅᓪᓚᖅᑎᑕᐅᓚᐅᕐᓯᒪᔪᖅ ᐋᓐᓂᐊᕕᒃᒧᑦ. ᐊᒻᒪᓗ ᕼᐊᓚ ᐸᓯᔭᒃᓴᐅᑎᑕᐅᖕᒥᔪᖅ ᖁᓄᔪᕐᓂᐊᕐᓂᕐᒥᒃ.

ᑎᒍᔭᐅᓚᐅᕐᓯᒪᔪᖅ ᐊᒻᒪ ᐸᓯᔭᒃᓴᙳᖅᑎᑕᐅᓪᓗᓂ ᐅᒃᑑᐱᕆ 15, 2021ᒥ.

ᒪᒃᑖᓄᑦ ᖃᐅᔨᒪᔭᐅᓚᐅᕐᑐᖅ ᐱᒍᐊᓚᐅᕐᓂᖓᓂᒃ ᒧᕌᓐᑕ ᐊᑕᑕᕼᐊᒃ ᐅᕙᓂ The Grizzlies, ᐅᓇ 2018ᒥ ᑕᕐᕆᔭᒐᓕᐊᖑᓚᐅᕐᓯᒪᔪᖅ ᓚᑯᕌᔅᒥ ᐱᙳᐊᖅᑎᓂᒃ ᖁᒡᓗᖅᑑᖅᒥ ᑖᒃᑯᐊᓗ ᐃᒻᒥᓃᖅᑐᓂ ᐃᓚᐃᕐᑕᐅᓯᒪᓪᓗᑎᑦ ᐊᒻᒪ ᑕᐃᒪᐃᑎᑦᑎᑦᑕᐃᓕᒪᓪᓗᑎᒃ ᓄᓇᓕᖕᓂ.

ᐃᖅᑲᖅᑐᖅᑕᐅᑎᑦᑎᔪᑦ ᓗᐊᐃᔭᕆᔭᖏᑦ ᐊᒻᒪ ᕼᐊᓚ ᐃᖃᓗᐃᑦ ᐃᖅᑲᖅᑐᐃᕕᖓᓂᒃ ᑕᑯᖃᑦᑕᐅᑎᓚᐅᕐᑐᑦ ᓄᕕᐱᕆ 30ᒥ ᐅᓇ ᐃᖅᑲᖅᑐᐃᔨ ᓲᓴᓐ ᓵᔅᕗᐊᑦᓗ ᐅᖃᐅᓯᖃᖅᖢᑎ ᖃᑯᒍ ᓇᓂᓗ ᐃᖅᑲᖅᑐᖅᑕᐅᓂᐊᕐᒪᖔᑦ.

ᐃᖅᑲᖅᑐᖅᑕᐅᕝᕕᒃᓴᖓ ᐋᖅᑭᒃᑕᐅᓚᐅᕐᑐᖅ ᒪᐃ 21ᒥ ᒪᐃ 31ᒧ, 2024 ᖁᒡᓗᖅᑑᖅᒥ. ᐅᑯᐊ ᐅᓪᓗᐃᑦ ᓇᓗᓇᐃᕐᑕᐅᑦᑎᐊᕐᓂᐊᖅᑐᑦ ᔭᓄᐊᕆ 8ᒥ.

ᐃᖅᑲᖅᑐᖅᑕᐅᑎᑦᑎᔪᓄᑦ ᓗᐊᐃᔭ ᐃᐊᒪ ᐹᔅ ᐅᖃᓚᐅᕐᑐᖅ ᒪᕐᕉᖕᓂ ᐱᓇᓱᐊᕈᓰᖕᓂ ᐱᓕᕆᐊᕆᔭᐅᖁᓚᐅᕐᓂᕋᖅᖢᓂᐅᒃ ᖁᒡᓗᖅᑑᖅᒥ ᓲᖃᐃᒻᒪ ᖃᓄᐃᓕᐅᕈᑎᕕᓃᑦ ᓄᓇᓕᖕᓂ ᐊᑐᖅᑕᐅᔪᓐᓇᕋᔭᕐᒪᑕ ᐃᖅᑲᖅᑐᐃᔨᓄᑦ. ᐅᖃᓚᐅᕐᑐᖅ ᐸᓖᓯᒃᑯ ᐃᖅᑲᖅᑐᖅᑕᐅᔪᓐᓇᕐᓂᖓ ᖁᒡᓗᖅᑑᖅᒥ ᐅᓗᕆᐊᓇᙱᓐᓂᕋᖅᖢᒍ.

ᕼᐊᓚᐅᑉ ᓗᐊᐃᔭᖓ ᐅᕌᑉ ᕗᐊᕋᓐ, ᐃᖃᓗᖕᓂ ᐃᖅᑲᖅᑐᖅᑕᐅᖁᔨᓚᐅᖅᑑᒐᓗᐊᖅ.

ᕼᐊᓚ ᓴᖅᑭᓚᐅᙱᑦᑐᖅ ᐃᖅᑲᖅᑐᐃᕕᖕᒧᑦ ᐊᔾᔨᓕᐅᕈᑎᒍᓪᓘᓐᓃᑦ.