ᓯᓚ ᐅᖅᑰᓯᓂᖓ ᐅᓗᕆᐊᓇᕈᑎᐅᑐᐃᓐᓇᕆᐊᓕᒃ ᓂᕿᓂᒃ ᐱᐅᔪᓐᓃᖅᑎᑦᑎᑐᐃᓐᓇᕆᐊᖃᕐᓂᖓᓂᒃ: ᓄᓇᕕᒃᒥ ᐋᓐᓂᐊᖃᕐᓇᙱᑦᑐᓕᕆᔨᖏᑦ

For English version, see Warm weather raises risk of botulism in meats, Nunavik public health director advises

ᑕᒪᓐᓇ ᐱᒋᐊᕐᕕᖃᖃᑦᑕᖅᑐᖅ ᐱᓕᕆᕝᕕᐅᔪᑦ ᖄᖏᓐᓂᒃ ᐃᓗᑐᓂᕐᒦᑦᑐᓂᒃ. ᑕᒪᓐᓇ ᐱᒋᐊᕈᑎᖃᕈᓐᓇᕐᑐᖅ ᓈᒻᒪᓈᕐᓯᒪᒍᓂᒃ ᓯᓚᒧᑦ ᐊᒻᒪᓗ ᑕᒪᒃᑯᐊ ᒥᑭᑦᑐᓪᓛᓗᐃᑦ ᐆᒪᔪᐃ ᐱᕈᓕᕈᓐᓇᕐᒪᑕ ᐋᓐᓂᐊᕐᓇᖅᑐᙳᖅᐸᓪᓕᐊᓗᓂ ᐊᒻᒪ ᑐᖁᓐᓇᖅᑐᖃᓕᕈᑎᐅᔭᖢᑎᒃ.

“ᐃᓗᑐᓂᐅᔪᑦ ᐃᒍᓇᖅᐸᓪᓕᐊᓂᕐᒧᑦ ᓇᓂᑐᐃᓐᓇᐅᕐᒪᑕ ᒪᑯᓇᓂᓘᓐᓃᑦ ᓴᓂᕐᓂ ᐳᔪᕐᓂ,” ᐅᖃᕐᑐᖅ ᕙᐃᔅᑲ ᐅᕆᔅᓱ, ᐋᓐᓂᐊᖃᕐᓇᙱᑦᑐᓕᕆᔨᓄᑦ ᑐᑭᒧᐊᖅᑎᑦᑎᔨ ᐅᑯᓄᖓ ᓄᓇᕕᒃᒥ ᓄᓇᓕᓕᒫᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᒪᔨᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ, ᑭᓯᐊᓂᓕ “ᑭᓯᐊᓂᓕ ᓯᓚ ᖃᓄᐃᓕᖓᓂᖓᓄᑦ ᑕᒪᒃᑯᐊ ᐱᑕᖃᕐᓂᖅᓴᐅᕙᖕᒪᑕ ᑕᕆᐅᕐᒥᐅᑕᕐᓂᒃ ᓂᕐᔪᑎᓂᒃ.”

ᑕᖅᑭᐅᓚᐅᕐᑐᒥᓐ ᑲᑎᒪᔩᑦ ᓄᓇᕕᒻᒥᐅᓂᒃ ᐅᔾᔨᕈᓱᖁᔨᒻᒪᕆᓚᐅᕐᑐᑦ ᓂᕿᓄᑦ ᑐᖁᓐᓇᖅᑐᖃᑐᐃᓐᓇᕆᐊᒃᓴᖏᓐᓂᒃ ᓲᖃᐃᒻᒪ ᐋᓐᓂᐊᓕᕈᑎᐅᔭᓐᓂᕐᓴᐅᖕᒪᑕ ᓯᓚ ᐅᖅᑰᓂᕐᓴᐅᓕᕌᖓᑦ.

ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ, ᐅᕆᔅᓱ ᑐᓴᖅᑎᑦᑎᒋᐊᒃᑲᓐᓂᓚᐅᕐᑐᖅ ᓂᖀᑦ ᐃᒍᓇᔭᕐᓂᖏᓐᓂᒃ ᐊᒻᒪ ᑕᕆᐅᕐᒥᐅᑕᓂᒃ ᐱᐅᔪᓐᓃᕈᑎᐅᔭᓐᓂᖏᓐᓂᒃ. ᐅᖃᖅᖢᓂ ᐃᓗᑐᓂᐅᔪᑦ ᐱᒋᐊᕐᕕᐊᔭᒻᒪᑕ ᐋᓐᓂᐊᓕᕐᓇᖅᑐᓂᒃ ᐱᕈᖅᑐᓄᑦ ᓯᓚ ᖃᓄᐃᓕᖓᓂᖓ ᒪᓕᒃᖢᓂ — ᐃᓚᒋᔭᐅᓪᓗᓂ ᐃᒍᓇᕐᓯᐊᕆᔭᐅᔪᑦ ᑕᕆᐅᕐᒥᐅᑕᕐᓂᒃ.

“ᓂᕿᒥ ᐃᓗᑐᓃᑦ ᐆᓇᖅᑐᒦᓕᕌᖓᑕ ᐊᓂᕐᓂᖃᕐᓇᙱᑦᑐᒥ, ᑖᒃᑯᐊ ᐃᓗᑐᓃᑦ ᐱᕈᕐᕕᐅᓕᔭᒻᒪᑕ ᐋᓐᓂᐊᕐᓇᖅᑐᓕᖕᓂ,” ᐅᖃᕐᑐᖅ. “ᐊᒻᒪᓗ ᐱᐅᔪᓐᓃᕈᑎᓂᒃ ᓴᖅᑭᑎᑦᑎᓕᖅᐸᒃᖢᑎᒃ ᐃᒍᓇᕈᑎᐅᔭᑦᑐᓂᒃ.”

ᑕᐃᒪᐃᑎᑦᑎᓂᐊᕐᓗᓂ, ᐅᓇ ᐅᕆᔅᓱ ᐅᖃᓚᐅᕐᑐᖅ ᓂᖀᑦ ᖁᐊᒃᑯᕕᖕᒦᑦᑕᕆᐊᖃᕐᓂᖏᓐᓂᒃ ᐱᕈᕐᕕᐅᓕᔾᔮᙱᒻᒪᑕ. ᑕᐃᒪᐃᒃᑲᓗᐊᕐᐸᓪᓘᓐᓃᑦ, ᑕᒪᒃᑯᐊ ᓂᖀᑦ ᖁᐊᖑᒐᓗᐊᖅᐸᑕ ᐆᓯᒪᒐᓗᐊᖅᐸᑕᓘᓐᓃᑦ ᐃᓗᑐᓂᐅᔪᑦ ᐱᑕᖃᐃᓐᓇᖃᑦᑕᕐᒪᑕ ᓂᕿᒥ.

“ᐱᒻᒪᕆᐊᓗᒃ ᑕᒪᒃᑯᐊ ᓂᖀᑦ ᐱᔭᐅᓂᖏᓐᓂᒃ ᓄᓇᓕᖕᓄᐊᕋᓱᖕᓂᖏᓐᓄᑦ ᓂᕿ 4 ᓯᐊᓯᐊᔅᒦᑦᑕᕆᐊᓖᑦ ᑐᖔᓂᓪᓘᓐᓃᑦ,” ᐅᖃᕐᑐᖅ. “ᐃᓱᒪᒐᓗᐊᕈᕕᑦ ᐱᓕᕆᕝᕕᒋᔭᐃᑦ ᓴᓗᒪᓇᓱᒋᓗᒍ ᑕᐃᒪᓕ ᐱᑕᖃᖅᑐᒃᓴᐅᔪᑦ ᐃᓗᑐᓂᐅᔪᓂᒃ ᐃᓚᖓᒍᑦ.”

ᖃᐅᔨᒪᔭᐅᑦᑎᐊᕐᒪ ᐊᖑᓇᓱᒃᑎᐅᕙᒃᑐᓄᑦ ᒪᑯᐊ ᑕᕆᐅᕐᒥᐅᑕᐃᑦ ᓂᖀᑦ ᑕᐃᒪᐃᓕᕌᖓᑦ ᐱᐅᔪᓐᓃᔭᓐᓂᖏᓐᓂᒃ.

“ᐅᓇ ᖃᐅᔨᒪᔭᐅᙱᓐᓇᐅᔭᕐᑐᖅ ᓄᓇᓕᖕᓂ ᑕᐃᒪᙵᓕᒫᖅ,” ᐅᕆᔅᓱ ᐅᖃᕐᑐᖅ. “ᐃᓐᓇᐃ ᐊᖓᓇᓱᖃᑦᑕᖅᑐᑦ ᑕᕆᐅᕐᒥᐅᑕᕐᓂ ᖃᐅᔨᒫᓂᒃᑐᑦ. ᐃᓄᐃᑦ ᐊᐱᖅᑯᑎᒃᓴᖃᖅᐸᑕ ᐱᐅᔪᓐᓃᕐᓇᖅᑐᒥ ᓂᕿᒧᑦ, ᑕᐃᒪᓕ ᑕᒪᓐᓇ ᑐᓴᐅᒪᔭᐅᔭᕆᐊᓕᒃ.”

ᐅᖃᒃᑲᓐᓂᓚᐅᕐᑐᖅ, “ᑭᓇᑐᐃᓐᓇᖅ ᓂᕆᒍᓂ ᓂᕿᒥ ᐱᐅᔪᓐᓃᕐᓯᒪᔪᒥᒃ ᑕᐃᒪᓕ ᐃᑲᕐᕋᓂᒃ 6 ᐊᓂᒍᖅᐸᑦ ᐅᓪᓗᓄᑦ ᑕᓪᓕᒪᓄ ᑎᑭᓪᓗᒍ ᐃᒃᐱᒋᔭᐅᓇᔭᕐᑐᖅ.”

ᐋᓐᓂᐊᕐᓇᖅ ᓄᑭᒃᑎᒎᖃᑦᑕᖅᑐᖅ ᑭᓯᐊᓂᓕ ᑲᒪᒋᔭᐅᔪᓐᓇᖅᑐᖅ ᑲᒪᒋᔭᐅᑲᐅᑎᒋᒃᐸᑕ.

“ᑕᒪᓐᓇ ᓂᕆᔭᐅᕙᓪᓕᐊᔪᓂ ᐱᒋᐊᕐᕕᓕᒃ, ᑖᓐᓇ ᐃᓄᒃ ᓇᔾᔨᕆᓇᔭᖅᑐᖅ, ᒥᕆᐊᒃᓴᕐᓕᕐᓗᓂᓘᓐᓃᑦ ᐅᕝᕙᓘᓐᓃᑦ ᐊᕿᑦᑐᖅᓱᓕᕐᓗᓂ.”

ᐅᕆᔅᓱ ᐅᖃᕐᑐᖅ. “ᖃᓄᑎᒋ ᓂᕆᓂᖏᓐᓄᑦ ᑕᒪᓐᓇ ᓄᑭᒃᑰᑲᐅᖅᑐᕈᓐᓇᕐᑐᖅ. “ᐱᒋᐊᕋᔭᖅᖢᓂ ᑮᓇᕐᒥ. ᑖᓐᓇ ᐃᓄᒃ ᑕᑯᔪᓐᓇᑦᑎᐊᕈᓐᓃᕐᓗᓂ ᐅᕝᕙᓘᓐᓃᑦ ᒪᕐᕉᖕᓂ ᑕᑯᑲᑕᓕᕐᓗᓂ.”

ᑭᖑᓂᐊᒍᓪᓕ, “ᖃᓂᕐᓂ ᐃᒡᒋᐊᕐᓄᐊᕈᓂ ᐄᓯᔪᓐᓇᐃᓪᓕᕋᔭᕐᑐᑦ ᐊᒻᒪ ᐅᖃᓪᓚᒍᓯᖓ ᑐᑭᖃᑦᑎᐊᖅᑰᔨᔪᓐᓃᖅᖢᓂ.”

ᑐᑯᓐᓇᑐᐃᓐᓇᕆᐊᓕ ᐊᓂᕐᓵᕈᑎᓄᐊᖅᐸᑦ. “ᑕᐃᒪᓐᓇ ᐃᓄᒃ ᐊᓂᕐᓵᕈᓐᓇᐃᓪᓕᓇᔭᕐᑐᖅ,” ᐅᕆᔅᓱ ᐅᖃᕐᑐᖅ. “ᐱᒻᒪᕆᐊᓗᒃ ᑖᓐᓇ ᖃᐅᔨᔭᐅᑲᐅᖅᑐᕐᐸᑦ ᐅᓗᕆᐊᓇᓪᓚᕆᓕᓚᐅᙱᓐᓂᖓᓂᒃ ᑲᐱᔭᐅᓂᒃᑯᑦ.”

ᐅᓇ ᐱᐅᔪᓐᓃᕈᑎᒧᑦ ᐃᒍᓇᕐᓄ ᑲᐱᔭᐅᔾᔪᑎᒃᓴᑦ ᐊᑐᐃᓐᓇᐅᔪᑦ ᐋᓐᓂᐊᕕᖕᓂ ᓄᓇᕕᒃᒥ.

1971ᒥ ᐱᒋᐊᖅᖢᓂ 169 ᓄᓇᕕᒃᒥ ᐃᒍᓇᕐᒧᑦ ᐱᐅᔪᓐᓃᕈᑎᖃᕐᓯᒪᖕᒪᑕ. ᖃᓂᓐᓂᕐᓴᒃᑯᓪᓕ, ᐊᑕᐅᓯᕐᒥ ᒪᕐᕉᖕᓂᓪᓘᓐᓃᑦ ᐋᓐᓂᐊᖅᑐᖃᓕᖃᑦᑕᖅᑐᖅ ᐊᕐᕌᒍᒥ, ᐅᖃᕐᑐᖅ.

“ᐊᕐᕌᒎᓕᕐᑐᓂᒃ 30ᓂ ᒪᕐᕉᖕᓂ ᑕᒪᑐᒧᖓ ᐃᓅᔪᓐᓃᕐᓯᒪᔪᖃᕐᑐᖅ,” ᐅᕆᔅᓱ ᐅᖃᕐᑐᖅ.