ᐊᔪᕆᕐᓱᐃᔨ ᐃᐊᑦᒪᓐ ᔭᐃᒻᔅ ᐱᐊᒃ. ᖃᐅᔨᒪᔭᐅᔪᖅ “ᐅᖃᒻᒪᒃ,” ᐅᕝᕙᓘᓐᓃᑦ ᐅᖃᓪᓚᑦᑎᐊᒃᑳᓗᒃ, ᒪᑐᐃᕐᓯᓂᑯ ᓯᕗᓪᓕᖅᐹᕐᒥ ᐋᖕᓕᑲᓐᑯᑦ ᑐᒃᓯᐊᕐᕕᖓᓂ ᕿᑭᖅᑖᓗᒃᒥᑦ. (ᕼᐋᐳ ᑲᑎᕐᓱᒐᖏᓐᓂᒃ)
ᓯᕗᓪᓕᖅᐹᖑᖃᑕᐅᔫᑦ ᐅᒃᐱᖅᑐᓕᕆᔨᐅᒃ ᐃᓄᒃᑎᑐᑦ ᐊᔪᕈᓐᓃᕐᓴᕈᑎᖏᑦ
For an English version of this story, see Taissumani, July 18: A Pioneer Missionary’s Guide to Learning Inuktitut
1901-ᒥ ᐊᔪᕆᕐᓱᐃᔨ ᐃᐊᑦᒪᓐ ᔭᐃᒻᔅ ᐱᐊᒃ ᐅᐸᒃᑕᐅᓚᐅᕐᓯᒪᕗᖅ ᑐᒃᓯᐊᕐᕕᖓᓂ ᐸᓛᒃᓕᐊᑦ ᕿᑭᖅᑕᒥ ᐆᒧᖓ ᒪᒃᑯᒃᑐᒧᑦ ᐃᖕᓚᓐᒥᐅᑕᒧᑦ, ᐃᐊᑦᒍ ᒍᕇᓐᓯᐅᑦ. ᐱᐊᒃ ᐃᓕᓐᓂᐊᖅᑎᑦᑎᕙᓪᓕᐊᓂᖓᒍᑦ, ᑭᓇᑐᐃᓐᓇᖅ ᓄᑖᖅ ᐊᔪᕆᕐᓱᐃᔨ ᓯᕗᓕᖅᐹᒥᒃ ᐱᓕᕆᐊᕆᔭᕆᓚᐅᕐᑕᖓᑦ ᐃᓄᒃᑎᑐᑦ ᐊᔪᕈᓐᓃᕐᓴᕐᓗᑎᒃ.
ᔭᓄᐊᕆ 26, 1902-ᒥ, ᐱᐊᒃ ᑎᑎᕋᖅᐸᓪᓕᐊᔭᖏᓐᓂᒃ ᐅᖃᐅᓯᖃᓚᐅᕐᑐᖅ ᖃᓄᖅ ᐊᑐᖃᑦᑕᕐᒪᖔᑦ ᐃᑲᔪᕈᑎᐅᓂᐊᕐᑐᓂᒃ ᒍᕇᓐᓯᐅᑦ ᐅᖃᐅᓯᕐᒥ ᐊᔪᕈᓐᓃᕐᓴᖅᑎᓪᓗᒍ, ᐊᒻᒪᓗ ᐃᒻᒥᓂ ᐃᓕᓐᓂᐊᖅᐸᓪᓕᐊᒍᑎᒋᓂᐊᖅᑕᖏᓐᓂᒃ, ᑎᑭᓚᐅᕐᓯᒪᒐᓗᐊᖅᑎᓪᓗᒍ ᐸᓛᒃᓕᐊᑦᒧ ᐅᖃᓪᓚᒍᓐᓇᖅᖢᓂ ᐊᕐᕌᒍᓂ ᐊᕙᑎᓂᒃ ᑯᐸᐃᒃ ᐅᐊᖕᓇᖓᓃᓯᒪᓂᖓᓄᑦ.
“ᐊᑐᖅᑕᐅᑦᑎᕈᓐᓇᕐᑐᖅ ᐃᓄᖕᒥ ᓂᐱᒋᔭᐅᓂᖓᓄᑦ. ᐃᓄᖕᒥ ᐱᖃᑎᖃᐃᓐᓇᐅᔭᖅᑐᒍᑦ, ᐊᒻᒪᓗ ᐊᔾᔨᒌᙱᑦᑐᓂᒃ ᐃᓄᖕᓂ ᐃᓕᓴᐃᑎᑦᑎᕙᑦᖢᑕ, ᑕᐃᒪᐃᑎᓪᓗᑕ ᑐᕿᖃᙱᑦᑐ ᐃᓄᒃ ᑐᑭᓯᔪᓐᓇᕈᓂ ᐃᓄᖕᒥᒃ, ᑕᐃᒪᓕ ᑕᒪᐃᓐᓂᒃ ᑐᑭᓯᔪᓐᓇᖅᐳᖅ.”
ᐅᓇ ᐅᖃᐅᓯᑦᑎᐊᕙᒃ. ᐃᒪᐃᓕᖓᒡᒍᖕᒪᑦ ᑕᒪᕐᒥᒃ ᐃᓄᐃᑦ ᐊᔾᔨᒌᒥᑦ ᐃᓕᓴᐃᔨᐅᔪᓐᓇᙱᒻᒪᑕ.
ᑕᒪᓐᓇᓕ ᓇᓗᓇᐃᕈᑎᐅᕗᖅ ᓈᒻᒪᙱᓕᐅᕈᑎᐅᓚᐅᕐᑐᓂᒃ ᒫᓐᓇᓕᓴᕐᓄᑦ ᐃᓕᓐᓂᐊᖅᑐᓕᕆᓂᕐᒥᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᐊᕐᕌᒎᓕᖅᑐᓂᒃ 30-ᓂ ᐅᖓᑖᓂᓪᓘᓐᓃᑦ. ᐃᓄᒃᑎᑐᑦ ᐃᓕᓐᓂᐊᖅᑕᐅᕙᓚᐅᖏᒃᑲᓗᐊᖅᑎᓪᓗᒍ ᓇᓕᐊᓐᓂᒃ ᒍᕇᖑᔪᓂᒃ, ᐊᒥᓱᑦ ᐃᓕᓐᓂᐊᕐᕖᑦ ᓄᓇᓕᖕᓂ ᐃᑲᔪᖅᑎᓂᒃ ᐃᓐᓇᑐᖃᕐᓂᒡᓘᓐᓃᑦ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᖃᑦᑕᓚᐅᕐᑐᑦ ᐱᓇᓱᐊᕈᓯᕐᒥ ᖃᔅᓰᑐᐃᓐᓇᖅᖢᑎᒃ.
ᐃᓱᒪᒋᔭᐅᓂᖓ ᐃᒪᐃᓕᖓᓚᐅᕐᒪᑦ, ᐊᑕᐅᓯᖅ ᐃᓄᒃ ᐃᓄᒃᑎᑑᕈᓐᓇᕈᓂ, ᑕᐃᒪᓕ ᐃᓕᓐᓂᐊᖅᑎᑦᑎᔪᓐᓇᕐᐳᖅ. ᐊᓕᐊᓚᐃᑦ, ᐃᓛᓐᓂ ᑕᐃᒪᐃᖃᑦᑕᓚᐅᕐᒪᑦ.
ᑭᓯᐊᓂᓕ ᑕᐃᒪᐃᖏᓐᓂᕐᓴᐅᓚᐅᕐᒪᑦ. ᐃᓕᓐᓂᐊᖅᑎᑦᑎᔨᐅᔪᑦ ᑕᐃᒪᐃᓕᐅᕐᐸᙱᒻᒪᑕ ᖃᓪᓗᓈᑐᑦ ᐅᖃᓪᓚᒍᓐᓇᖅᑐᓂᒃ ᓂᕈᐊᒐᓱᒃᑎᓪᓗᒋᑦ. ᖃᓄᐃᒻᒪ ᑕᐃᒪᓕᐅᕆᐊᖃᖅᐸᑦ ᐃᓄᒃᑎᑐᑦ ᐱᓕᕆᐊᖑᑎᓪᓗᒍ?
ᐱᐊᒃ ᑕᒫᓃᓱᖓᖅᑎᓪᓗᒍ, ᐃᓕᓐᓂᐊᖅᓯᒪᔪᖅᑕᖃᓚᐅᙱᒻᒪᑦ ᐃᓄᒃᑎᑐᑦ ᐃᓕᓴᐃᔨᓂᒃ. ᑭᓯᐊᓂᓕ ᐃᓚᖏᑦ ᐃᓄᐃᑦ ᐃᓕᓴᐃᔪᓐᓇᕐᓂᕐᓴᐅᓚᐅᕐᒪᑕ ᐃᓚᖏᓐᓂᒃ. ᑕᒪᓐᓇᓕ ᐃᓚᖓᑦ ᐱᔾᔪᑎᒋᓚᐅᕐᑕᖓ ᐊᔾᔨᒌᒃᑎᑦᑎᕙᙱᓐᓂᕐᒥᒃ ᒍᕇᓐᓯᐅᑦ ᐃᓕᓐᓂᐊᖅᑎᑦᑎᔨᖏᓐᓂᒃ.
“ᐅᖃᐅᓯᐅᕙᖕᓂᖓ ᐃᒪᓐᓇᐅᓂᕋᖅᑕᐅᓯᒪᔪᖅ:—ᐃᓚᖓᓂ ᐃᓕᓐᓂᐊᕐᑕᖓᓂᒃ ᒥᔅᑕ ᒍᕇᓐᓯᐅᑦ ᐃᓕᑦᑎᕗᖅ ᐃᓚᖓᓂ ᐅᖃᐅᓯᕐᒥ ᖃᓄᐃᓕᐅᕐᓂᕐᒧᑦ, ᐊᒻᒪᓗ ᐊᓯᖓᓂ ᐃᓚᒋᐊᕈᑎᐅᕙᒃᑐᒥ. ᐃᓚᒋᐊᕈᑎᑦ ᖃᐅᔨᓴᐅᑎᒃᑯᑦ, ᓇᓃᓐᓂᕐᒧᑦ, ᐊᒻᒪᓗ ᐊᐱᕐᓱᕐᓂᖅᑕᖃᖅᐸᒃᖢᓂ ᐃᖅᑲᐅᒪᓕᕈᓐᓇᕐᓂᕐᒧᑦ. ᐅᓇ ᑕᐃᒪᓐᓇ ᐋᕿᒃᓯᒪᓂᖅ ᕿᓚᒥᐅᓂᕐᓴᖅ ᐃᓕᓐᓂᐊᕐᑐᒥ ᐅᖃᓪᓚᒍᓐᓇᕈᑎᐅᓂᕐᓴᖅ ᐃᓗᐃᑦᑑᓕᖓᔪᓂᒃ ᐅᖃᐅᓯᕐᓂᒃ, ᐊᒻᒪᓗ ᐊᐱᕐᓱᕈᓐᓇᕐᓂᕐᓴᐅᓕᖅᖢᓂ ᐊᒻᒪᓗ ᐃᓄᖕᓂ ᐅᖃᖃᑎᖃᕐᓂᕐᓴᐅᓕᕐᓗᓂ.”
ᑕᕝᕘᓇ ᐅᖃᓪᓚᐅᔾᔨᒍᑎᒃᑯᑦ, ᓇᓗᓇᙱᓚᖅ ᐱᐅᒃ ᐃᓱᒪᓚᐅᕐᓂᖓᓂᒃ ᐃᓄᒃᑎᑐᑦ ᐅᖃᓪᓚᒃᑕᐅᕙᖕᓂᖓᓂᒃ ᖃᓪᓗᓈᑎᑑᖓᔪᑎᑐᑦ, ᐊᒻᒪᓗ ᓇᓗᓇᐃᔭᐃᓪᓗᓂ ᐊᔾᔨᒌᒃᑑᑎᐅᓂᖏᓐᓂᒃ ᐊᑐᖅᑕᖏᑦ.
ᑕᐃᒪᓐᓇ ᐃᓚᖏᓐᓄᑦ ᐃᑲᔪᕈᓐᓇᖅᑐᖅ. ᑕᐃᒃᑯᐊᓕ ᐱᔪᓐᓇᓪᓚᕆᒃᐳᑦ ᐅᖃᐅᓯᕐᒥ ᐃᓕᑦᑎᔪᓐᓇᖅᑐᑦ ᐃᔾᔪᐊᓯᕙᖕᓂᒃᑯᑦ ᐊᒻᒪᓗ ᑐᑭᓯᔪᓐᓇᖅᖢᑎᒃ ᐃᓱᒪᒃᓴᖅᓯᐅᙱᖢᑎᒃ.
ᑭᓯᐊᓂᓕ ᑕᐃᒪᓐᓇ ᐃᓕᑦᑎᔪᓐᓇᖅᑐᑦ ᐱᑕᖃᓗᐊᙱᒻᒪᑕ. ᐃᓛᑎᒍᑦ ᐃᓱᒪᒃᓴᖅᓯᐅᕆᐊᖃᖃᑦᑕᕋᑦᑕ, ᐊᒻᒪᓗ ᑖᓐᓇ ᐋᕿᒃᓱᓕᖅᖢᒍ ᐃᓱᒪᒃᑯᑦ ᑎᑎᖃᑎᒍᓪᓘᓐᓃᑦ.
ᐅᖃᐅᓯᓕᕆᓂᖅ ᖁᕕᐊᒋᒻᒪᕆᒃᑲᒃᑯ. ᐃᓚᖏᑦ ᑕᒪᑐᒥᖓ ᐱᐅᒃᓴᙱᓪᓚᕆᒃᑐᑦ. ᐅᖃᐅᓯᕆᓵᖅᑕᒃᑲ ᐱᐊᒃ ᖃᓄᐃᓕᐅᕈᓯᕕᓂᖏᑦ. ᑭᓯᐊᓂᓕ ᐅᓪᓗᒥ ᐃᓕᓐᓂᐊᕐᑎᐅᔪᑦ ᐃᖕᒥᖕᓄᑦ ᐃᑲᔪᕈᓐᓇᓛᒃᑰᕋᓱᒃᐸᒡᓗᑎᒃ.
“ᑲᑎᕐᓱᒐᐃᑦ ᐅᖃᐅᓰᑦ. ᐅᑯᐊ, ᐊᔪᕐᓇᙱᓐᓂᖓᒍᑦ, ᐱᔭᐅᓯᒪᔪᑦ ᐆᒪᙵᑦ ᒥᔅ ᒍᕇᓐᓯᐅᑦ ᐃᓄᖕᓄᑦ ᐅᖃᐅᓯᕐᓂᒃ, ᐊᒻᒪᓗ ᐋᕿᒋᐊᕐᓯᒪᓪᓗᑎᒃ ᐃᓱᒪᒧᑦ ᐋᖅᑭᒻᒪᕆᓚᐅᖅᑎᓐᓇᒍ.”
ᐅᖃᐅᓰᑦ ᑎᑎᕋᖅᑕᐅᓯᒪᔪᑦ ᑐᙵᕕᓪᓚᕆᐅᕗᑦ ᐅᖃᐅᓯᕐᒥᒃ ᐃᓕᓐᓂᐊᕐᓂᕐᒧᑦ. ᐃᓕᓐᓂᐊᕐᓗᓯ ᐊᒥᓱᒻᒪᕆᖕᓂ ᐅᖃᐅᓯᕐᓂᒃ, ᑭᖑᓂᐊᒍᑦ ᑖᒃᑯᐊ ᐅᖃᐅᓰᑦ ᐋᕿᒃᓱᑲᑕᓕᕐᓗᒋᑦ, ᐊᔪᕈᓐᓃᕐᓴᕈᑎᒋᓗᒋᑦ ᐅᖃᐅᓯᕐᒥ ᐃᓕᓐᓂᐊᕐᐸᓪᓕᐊᔭᒃᑯᑦ.
ᐃᖅᑲᐅᒪᔪᓐᓇᑦᑎᐊᒻᒪᕆᒃᑯᕕ ᑭᓯᐊᓂ, ᑎᑎᕋᖅᐸᓪᓕᐊᕙᒡᓗᒋᑦ ᐅᖃᐅᓰᑦ ᐊᔪᕈᓐᓃᕐᓴᕈᑎᒋᖃᑦᑕᕐᓂᐊᕋᕕᒋᑦ. ᐃᓚᖏᑦ ᐃᓄᐃᑦ ᐅᖃᐅᓯᕐᓂ ᐃᓕᑦᑎᓂᕐᓴᐅᕙᖕᒪᑕ ᖃᓄᐃᑉᐸᓪᓕᐊᒍᓯᒃᑯᑦ—ᐃᓚᒌᖕᓂᖅ, ᓂᕐᔪᑏ, ᓄᓇᐅᑉ ᖃᓄᐃᓕᖓᓂᖏᑦ, ᐃᒃᐱᒋᔭᐅᕙᒃᑐᑦ—ᐅᖃᐅᓰᑦ ᐊᔾᔨᒌᙱᑦᑑᑎᓂᒃ ᐋᕿᒋᐊᖅᑕᐅᔪᓐᓇᕐᒪᑕ.
ᐊᓯᖏᑦ ᐃᓕᑦᑎᔪᓐᓇᖅᑐᑦ ᑕᐃᒪᓐᓇᒥᐊᖅ, ᑭᓯᐊᓂᓕ ᑎᑎᕋᖅᑕᐃᓐᓇᕆᕙᒃᖢᒋᑦ. ᐅᓇ ᐱᓕᕆᓂᑦᑎᐊᕙᒃ ᒪᓕᒍᒥᓇᕐᖢᓂ, ᐱᓗᐊᕐᑐᒥᒃ ᐅᖃᐅᓯᕐᒥ ᐃᓕᓐᓂᐊᓕᓵᖅᐸᓪᓕᐊᓗᓂ.
“ᐊᔪᕈᓐᓃᕐᐸᓪᓕᐊᓂᖅ ᐅᖃᓕᒫᕐᓂᒃᑯᑦ. ᐃᓄᒃᑕᖃᖅᑐᑦ ᐅᖃᓕᒫᕈᓐᓇᑦᑎᐊᖅᑐᒥᑦ ᐱᓕᕆᔪᓐᓇᖅᑐᒥ.”
ᖃᐅᔨᓯᒪᔭᒃᑯᓪᓕ, ᐅᖃᓕᒫᕆᐅᕐᓴᓂᖅ ᓈᒪᓈᕐᓯᒪᔭᕆᐊᖃᖅᑐᖅ, ᑭᓯᐊᓂᓕ ᐅᖃᓪᓚᑲᑕᒍᓐᓇᕐᓯᓯᒪᓕᕐᓗᓂ,
“ᑎᑎᕋᖅᐸᓪᓕᐊᖃᑦᑕᖅᑕᕗᑦ ᖃᓄᐃᓕᐅᕈᓰ ᐃᓄᖕᓂ ᐅᕙᑦᑎᓐᓄᑦ ᐅᖃᐅᓯᐅᔪᑦ, ᐅᕝᕙᓘᓐᓃᑦ ᑎᑎᕋᖁᓪᓗᑎᒍ ᐃᓅᓯᖏᓐᓄᑦ ᐊᒃᑐᐊᔪᓂᒃ, ᐅᒃᐱᕐᓂᕐᒥᒃ, ᐊᓯᖏᓐᓂᒡᓗ. ᐅᑯᐊ ᑐᑭᓕᐅᕆᕙᒃᖢᑎᒍᑦ ᐊᒻᒪ ᐋᕿᒃᓱᖅᐸᒃᖢᑎᒍᑦ ᐊᑑᑎᖏᑦᑎᒍᑦ. ᐊᔾᔨᒌᙱᑦᑐᓂ ᖃᐅᔨᕚᓪᓕᕐᓇᖅᑐᖅ ᑕᐃᒪᓐᓇ ᐃᓕᓐᓂᐊᕐᖢᓂ, ᐱᒻᒪᕆᐊᓛᕐᓕ ᑕᒻᒪᕐᓯᒪᙱᑦᑐᑦ ᐅᖃᐅᓰᑦ, ᑕᒪᓐᓇᓗ ᐱᒻᒪᕆᐊᓛᖑᓪᓗᓂ.”
ᖁᕕᐊᓇᕋᔭᙱᓛᖅ ᑕᒪᒃᑯᐊ ᑎᑎᕋᖅᑕᐅᓯᒪᓂᑯᑦ ᐃᓅᓯᕆᔭᐅᔪᒥ ᐸᐸᑕᐅᓯᒪᒃᐸᑕ ᓂᓇᑭᐊ? ᑭᓯᐊᓂᓕ ᑕᐃᒪᐃᑕᐅᓯᒪᖅᑰᔨᙱᒻᒪᑕ. ᐃᑲᔫᑎᑦᑎᐊᕙᐅᔪᒃᓴᐅᔪᕕᓃᑦ ᐱᐊᒃᒧᑦ ᐊᒻᒪ ᒍᕇᓐᓯᐅᑦᒧᑦ ᐅᖃᓪᓚᒍᓐᓇᕐᓯᕙᓪᓕᐊᓂᒃᑯᑦ.
ᐱᐊᒃ ᖃᓄᐃᓕᐅᕐᐸᓪᓕᐊᓂᑯᖏᑦᑕ ᐃᓱᖏᓐᓂ ᖃᓄᖅ ᐃᑲᔪᖃᑦᑕᓚᐅᕐᓂᖓᓂ ᒍᕇᓐᓯᐅᑦᒥ ᐃᓄᒃᑎᑐᑦ ᐊᔪᕈᓐᓃᕐᓴᖅᑎᓪᓗᒍ ᐅᖃᐅᓯᕐᓂᒃ, ᐅᔾᔨᕆᓯᒪᓪᓗᓂ ᓲᕐᓗ ᐊᑕᐅᓯᖅ ᐅᖃᐅᓯᖅ ᓈᒻᒪᙱᓐᓂᖓᓂ ᑕᒪᐃᓐᓄ—ᐃᓄᐃᓪᓗ ᐊᔾᔨᒌᙱᑦᑐᓂᒃ ᐃᓕᑦᑎᒍᓯᖃᕐᓂᖏᓐᓂᒃ: “ᐃᓚᖏᑦ ᐊᔪᕆᕐᓱᐃᔨᐅᖃᑎᒃᑲᑦ ᐊᔾᔨᒋᙱᑕᖓᓂᒃ ᐱᓕᕆᔾᔪᑎᖃᑐᐃᓐᓇᕆᐊᓖᑦ ᐱᐅᓂᕐᓴᓂᒡᓘᓐᓃᑦ.”
ᐅᔾᔨᕆᓯᒪᓚᐅᕐᒥᔪᖅ ᐃᓄᒃᑎᑐᑦ ᐊᔪᕈᓐᓃᕐᓂᖅ, ᐊᓯᖏᑦᑎᑐᑐᐃᓐᓇᖅ ᐅᖃᐅᓯᕐᑎᑐᑦ, ᑭᓄᐃᓵᕆᐊᖃᕆᐊᖃᕐᓂᖓᓂᒃ ᐊᒻᒪ ᐱᓕᕆᐊᕇᓐᓇᕆᐊᖃᖅᖢᓂ.
ᑕᐃᔅᓱᒪᓂ ᑎᑎᕋᐅᓯᖃᕐᕕᐅᕙᒃᑐᖅ ᖃᓄᐃᓕᐅᕈᑎᕕᓂᑐᖃᕐᓂᒃ. ᑭᐊᓐ ᕼᐋᐳ ᐃᒻᒪᓕᓴᓕᕆᔨᐅᖕᒪᑦ ᐊᒻᒪ ᑎᑎᕋᖅᑎᐅᓪᓗᓂ ᐅᑭᐅᕐᑕᖅᑐᕐᒦᖢᓂ ᐊᕐᕌᒍᑦ 50 ᐅᖓᑖᓂ. ᐅᖃᓕᒫᒐᓕᐅᕐᓂᑯ ᐆᒥᖓ “Minik, the New York Eskimo” ᐊᒻᒪ “Thou Shalt Do No Murder,” ᐊᓯᖏᓐᓂᒡᓗ ᐅᖃᓕᒫᒐᕐᓂ. ᐅᖃᐅᓯᒃᓴᖃᖅᐲ? ᐅᕗᖓ ᑎᑎᕋᕈᓐᓇᖅᑐᓯ ᐊᒻᒪ ᐊᐱᕐᓱᕈᓐᓇᖅᖢᓯ kennharper@hotmail.com.
(0) Comments