ᓴᓂᑦ ᑲᑎᒪᔨᕋᓛᖏᑦ ᐅᑭᐅᕐᑕᖅᑐᕐᒧᑦ, ᐅᓂᒃᑳᓂᒃ ᓴᕿᑕᐅᔪᓂᒃ ᔫᓂ 11-ᒥ, ᐱᖁᔨᓯᒪᔪᑦ ᒐᕙᒪᑐᖃᒃᑯᑦ ᐅᑭᐅᕐᑕᖅᑐᕐᒥ ᐃᒡᓗᓄᑦ ᐊᑐᕐᓂᕐᓴᐅᖁᔭᐅᓪᓗᑎᒃ ᐊᒻᒪᓗ ᓴᙱᓂᖃᖅᑎᑦᑎᓂᕐᓴᐅᓗᑎᒃ ᐅᑭᐅᕐᑕᖅᑐᕐᒥᑦ ᒐᕙᒪᐅᔪᓂᒃ.

ᓴᓂᑐᐃ ᐅᖃᖅᑐᑦ ᑲᓇᑕ ᐱᓂᕐᓴᐅᔭᕆᐊᖃᕐᓂᖓᓂᒃ, ᐊᑐᕐᓂᕐᓴᐅᓗᑎᒃ ᑮᓇᐅᔭᓂᒃ ᐅᑭᐅᕐᑕᖅᑐᕐᒥᓐ

“ᐅᑭᐅᕐᑕᖅᑐᕐᒥ ᓄᓇᖃᖅᑐᑦ ᓇᓗᓇᐃᕐᑕᐅᕗᑦ ᐃᓚᐅᑎᑕᐅᙱᓐᓂᖏᓐᓂᒃ ᑮᓇᐅᔭᑎᒍᑦ”

By ᔨᒻ ᐱᐅᓪ

For an English version of this story, see Senators say Canada must do more, spend more in the Arctic

ᐅᖃᖅᖢᑎᒃ ᑲᓇᑕᐅᑉ ᐅᑭᐅᕐᑕᖅᑐᖓ ᓈᒻᒪᙱᓕᐅᕈᑎᖃᓂᖓᓂᒃ ᐊᑯᓂᐊᓗᒃ ᓱᖁᑎᒋᔭᐅᕙᙱᓐᓂᕐᒥᒃ ᐊᒻᒪ ᐃᓱᒪᒋᔭᐅᙱᓐᓂᕐᒥᒃ, ᓴᓂᑦ ᑲᑎᒪᔨᕋᓛᖏᑦ ᐅᑭᐅᕐᑕᖅᑐᕐᒧ, ᐅᓂᒃᑳᓕᐊᑎᒍᑦ ᓴᖅᑭᑕᐅᓚᐅᕐᑐᓂᒃ ᐱᓇᓱᐊᕈᓯᐅᓚᐅᕐᑐᒥ, ᐅᖃᐅᔾᔨᓯᒪᕗᑦ ᒐᕙᒪᑐᖃᒃᑯ ᓴᓇᓂᕐᓴᐅᖁᓪᓗᒋᑦ, ᐊᔪᕈᓐᓃᕐᓴᖅᑎᑦᑎᓂᕐᓴᐅᓗᑎᒃ ᐊᒻᒪ ᑮᓇᐅᔭᓂᒃ ᐊᑐᕐᓂᕐᓴᐅᓗᑎᒃ ᑲᓇᑕᐅᑉ ᐅᑭᐅᕐᑕᖅᑐᖓᓄᑦ.

“ᓄᓇᕐᔪᐊᖑᖕᒪᑦ ᒫᓐᓇᓕᓴᐅᓕᕐᑐᑦ ᓄᓇᕐᔪᐊᑉ ᓴᓂᖅᑯᑐᐃᓐᓇᑲᑕᐃᓐᓇᖅᖢᓂᐅᒃ,” ᑲᓐᓲᕕᑎᕝ ᓴᓂᑐ ᑕᓂᔅ ᐹᑐᓴᓐ, ᑲᑎᒪᔨᕋᓛᑦ ᐃᒃᓯᕙᐅᑕᖓ, ᐅᖃᓚᐅᕐᑐᖅ ᑐᓴᒐᒃᓴᓕᐅᕐᑎᓄᑦ ᐋᑐᕚᒥ.

ᑖᓐᓇ ᐃᓱᒪᓂᐅᔪᖅ ᐅᖃᐅᓯᐅᓯᒪᖕᒥᔪᖅ ᑲᑎᒪᔨᕋᓛᑦ ᐅᓂᒃᑳᖏᓐᓂᒃ, ᑖᓐᓇᓗ ᐋᕿᒃᓱᖅᑕᐅᓯᒪᓪᓗᓂ ᑕᑯᔭᐅᓯᒪᓂᒃᑯᑦ ᐊᔾᔨᒌᙱᑦᑑᑎᓂᒃ ᑕᐅᑐᒃᓯᒪᔪᓂᒃ, ᐃᓚᖃᖅᖢᑎᒃ ᐊᒥᓱᓂᒃ ᐅᑭᐅᕐᑕᖅᑐᕐᒥᐅᓂᒃ ᐊᒻᒪ ᓄᓇᖃᖅᑳᖅᑐᓂᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᐅᖃᓪᓚᖃᑎᖃᖅᑎᓪᓗᒋᑦ ᑲᑎᒪᔨᕋᓛᓄᑦ ᐅᑭᐅᕐᑕᖅᑐᕐᒥ ᐳᓚᕋᖅᑎᓪᓗᒋᑦ ᐊᒻᒪᓗ ᑲᑎᒪᑎᑦᑎᓂᐅᔪᓂᒃ ᐋᑐᕚᒥᓐ.

“ᒪᑯᓇᙵᑦ ᓂᕿᖃᑦᑎᐊᙱᓐᓂᕐᒥᒃ ᐃᓕᓐᓂᐊᕈᓐᓇᕈᑎᓄᑦ ᐊᒻᒪ ᐋᓐᓂᐊᖃᖅᑕᐃᓕᓂᒃᑯᑦ, ᐃᓅᓇᓱᐊᕐᓂᖅ ᐊᑭᑐᔪᐊᓘᑎᓪᓗᒍ, ᐊᒻᒪᓗ ᓄᑕᐅᔪᓐᓃᖅᐸᓪᓕᐊᔪᑦ ᐅᕝᕙᓘᓐᓃᑦ ᐱᑕᖃᙱᓗᐊᖅᑐᑦ ᐃᒡᓗᐃᑦ, ᐅᑭᐅᕐᑕᖅᑐᕐᒥᐅᑕᑦ ᓄᓇᖃᖅᑐᑦ ᓇᓗᓇᐃᕐᑕᐅᕗᑦ ᐃᓚᐅᑎᑕᐅᙱᓐᓂᖏᓐᓂᒃ ᑮᓇᐅᔭᑎᒍᑦ. ᑲᓇᑕ ᑭᙳᓪᓕᐅᓯᒪᒃᑲᓐᓂᕐᓯᒪᕗᖅ ᑕᐅᑐᙳᐊᖅᖢᒋᑦ ᐊᓯᖏᑦ ᐅᑭᐅᕐᑕᖅᑐᕐᒥᑦ ᓄᓇᓕᒡᔪᐊᑦ, ᑕᐃᒃᑯᐊᓕ ᑮᓇᐅᔭᑲᓪᓚᖕᓂᒃ ᐅᑭᐅᕐᑕᖅᑐᕐᒥᐅᓂᒃ ᐊᑐᖅᐸᒃᑎᓪᓗᒋᑦ,” ᐅᓂᒃᑳᑦ ᐅᖃᕐᓯᒪᔪᑦ.

ᐃᓄᐃᑦ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᓈᒻᒪᙱᓕᐅᕈᑕᖃᕐᒪᑕ ᐊᒥᓱᓄᑦ, ᐃᓚᒋᓪᓗᒋᑦ ᓈᒻᒪᙱᓗᐊᕐᑐᖅ ᖃᕋᓴᐅᔭᒃᑯᑦ ᐊᑦᑕᑕᕈᓐᓇᐅᑎᑦ, ᓂᖀᑦ ᐊᑭᑐᓗᐊᕐᓂᖏᑦ, ᐃᒡᓗᐃᑦ ᓈᒻᒪᙱᓗᐊᕐᓂᖏᑦ ᓴᓇᓯᒪᓂᖏᑦᑎᒍᑦ ᐊᒻᒪ ᐅᓄᙱᓗᐊᕐᓂᖏᑦᑎᒍᑦ, ᐊᒻᒪᓗ ᐃᓕᓐᓂᐊᖅᑎᑕᐅᓯᒪᑦᑎᐊᙱᓗᐊᕐᓂᖅ.

“ᐱᐅᓂᕐᓴᐃᑦ ᐃᖅᑲᓇᐃᔮᒃᓴᑦ ᖃᓪᓗᓈᓂ ᓄᓇᖃᖅᑐᓄᑦ ᐱᔭᐅᓂᕐᓴᐅᓪᓗᑎᒃ, ᓲᖃᐃᒻᒪ ᐊᔪᕈᓐᓃᕐᓴᕈᑎᒃᓴᑦ ᐊᒻᒪ ᐃᓕᓐᓂᐊᕈᑎᒃᓴᐅᓇᔭᖅᑐᑦ ᐅᑭᐅᕐᑕᖅᑐᕐᒥᐅᓄᑦ ᐱᑕᖃᙱᓗᐊᕐᒪᑕ,” ᐹᑐᓴᓐ ᐅᖃᖅᑐᖅ.

ᐅᑭᐅᕐᑕᖅᑐᕐᒥ ᐃᒡᓗᒃᓴᓄᑦ ᑮᓇᐅᔭᒃᑯᕕᒃᓴᖅ?

ᐊᑕᐅᓯᖅ ᕿᒥᕐᕈᐊᖅᑕᐅᓯᒪᓂᐅᓗᐊᖅᑐᖅ ᐅᓂᒃᑳᓂᒃ ᐅᓇ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᑭᓱᖃᙱᓗᐊᕐᓂᖅ—ᐃᖏᕐᕋᔾᔪᑎᓕᕆᓂᒃᑯᑦ, ᐆᒻᒪᖁᑎᓕᕆᓂᒃᑯᑦ ᐊᒻᒪ ᑐᓴᐅᒪᔾᔪᑎᓕᕆᓂᒃᑯ—ᑕᒪᒃᑯᐊ ᐊᒥᓱᓂᒃ ᓈᒻᒪᙱᓕᐅᕈᑎᓂᒃ ᑐᓴᐅᒪᑎᑦᑎᔾᔪᑎᐅᑎᓪᓗᒋᑦ.

“ᖃᐅᔨᒪᔪᓯ, ᐅᑭᐅᕐᑕᖅᑑᑉ ᐱᕈᖅᐸᓪᓕᐊᒍᓐᓇᕐᓂᖓ ᐱᓕᕆᔾᔪᑎᒃᓴᖃᕈᑎᒃᓴᓂᒃ ᐱᑕᖃᕐᓗᓂ,” ᐹᑐᓴᓐ ᐅᖃᖅᑐᖅ.

ᐱᑕᖃᕆᐊᖃᕐᓂᖅ ᐅᓄᕐᓂᕐᓴᓂᒃ ᐊᒻᒪ ᐱᐅᓂᕐᓴᓂᒃ ᐱᖁᑎᒃᓴᓂ ᐱᑕᖃᕆᐊᖃᕐᓂᕐᓴᐅᒻᒪᕆᓕᕐᐳᖅ ᒫᓐᓇ ᐱᖁᑎᒋᔭᐅᔪᑦ ᓱᕋᒃᐸᓪᓕᐊᓂᖏᓐᓄᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᐅᓂᒃᑳᑦ ᐅᖃᕐᓯᒪᔪᑦ.

ᑕᐃᒪᐃᓐᓂᖓᓄᑦ, ᐃᓚᖓᑦ ᑲᑎᒪᔨᕋᓛᑦ 30-ᖏᓐᓂᒃ ᐃᓱᒪᓕᐊᖏᓐᓂᒃ ᐅᖃᐅᔾᔨᓯᒪᔪᖅ ᒐᕙᒪᑐᖃᒃᑯᑦ ᐱᓕᕆᖃᑎᖃᖁᔭᐅᓪᓗᑎᒃ ᓄᓇᖃᖅᑳᖅᑐᑦ ᐊᒻᒪ ᑎᐅᕆᑑᕆᐅᔪᑦ ᒐᕙᒪᖏᓐᓂᒃ ᐋᕿᒃᓱᐃᓗᑎᒃ ᐅᑭᐅᕐᑕᖅᑐᕐᒥ ᐱᖁᑎᒃᓴᓄᑦ ᑮᓇᐅᔭᒃᑯᕕᐅᓇᔭᖅᑐᓂᒃ.

ᐋᕿᒃᑕᐅᒍᓂ, ᑖᓐᓇ ᐱᖁᑎᒃᓴᓄᑦ ᑮᓇᐅᔭᒃᑯᕕᐅᓇᔭᖅᑐᖅ ᐃᑲᔪᕈᑎᐅᓇᔭᖅᑐᖅ ᓴᓇᔭᐅᕙᓪᓕᐊᓂᖏᓐᓂᒃ ᓄᑖᑦ ᐱᖁᑎᒃᓴᑦ ᐊᒻᒪᓗ ᐃᑲᔪᕈᑎᐅᓗᓂ ᐋᕿᒃᓱᐃᓂᕐᒥᒃ ᐊᒃᑐᐃᒍᑎᐅᔪᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᖁᑎᒋᔭᐅᔪᓂᒃ, ᐅᓂᒃᑳᑦ ᐅᖃᕐᓯᒪᖕᒥᔪᑦ.

ᐊᒥᓱᒻᒪᕇᑦ ᐃᓱᒪᓕᐊᕆᔭᐅᖕᒥᔪᑦ ᑐᕌᖓᓚᐅᕐᑐᑦ ᑮᓇᐅᔭᓕᐅᕐᓂᒃᑯᑦ ᐱᕙᓪᓕᐊᔪᓕᕆᓂᕐᒥᒃ, ᐃᓕᓐᓂᐊᕐᓂᓕᕆᓂᕐᒥᒃ ᐊᒻᒪ ᐊᔪᕈᓐᓃᕐᓴᓕᕆᓂᕐᒥᒃ, ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐋᕿᒋᐊᕈᑎᐅᓇᔭᖅᑐᓂᒃ, ᓴᓇᐅᒐᓕᕆᓂᕐᒥᒃ ᐊᒻᒪ ᐃᓕᖁᓯᓕᕆᓂᕐᒥᒃ, ᐊᓯᐅᑎᑦᑎᑦᑕᐃᓕᓂᕐᒥᒃ, ᖃᐅᔨᓴᖅᑐᓕᕆᓂᕐᒥᒃ, ᐱᖏᖕᓇᖅᑐᓕᕆᓂᕐᒥᒃ ᐊᒻᒪᓗ ᓴᐳᓐᓂᐊᕐᑐᓕᕆᓂᕐᒥᑦ ᑲᓇᑕᒥᑦ.

ᑐᕉᑑ ᒐᕙᒪᖓᑦᑕ ᐅᑭᐅᕐᑕᖅᑐᕐᒧᑦ ᐋᕿᒃᓱᕐᓯᒪᔭᖓᑦ ᓱᓕ ᓴᖅᑭᑕᐅᓚᐅᙱᑦᑐᖅ

ᓴᓂᑦ ᐋᕿᒃᓯᓚᐅᕐᓯᒪᖕᒪᑕ ᐅᑭᐅᕐᑕᖅᑐᕐᒧᑦ ᑲᑎᒪᔨᕋᓛᓂᒃ ᐱᖁᔨᕗᖔᕈᑎᒥᒃ ᐊᓂᒍᐃᑎᑦᑎᓚᐅᖅᑎᓪᓗᒋ ᓯᑎᐱᕆ 2017-ᒥᑦ ᐱᒋᐊᖅᑕᐅᓂᑯᒥᑦ ᓵᓕ ᕗᐊᑦᒧᑦ, ᑕᐃᔅᓱᒪᓂ ᓕᐳᕈᑯᓐᓄᑦ ᓴᓂᑑᑎᓪᓗᒍ. ᕗᐊᑦ ᐅᑭᐅᕐᑕᖅᑐᕐᒧᑦ ᑲᑎᒪᔨᕋᓛᓄᑦ ᓯᕗᓪᓕᖅᐹᖑᓪᓗᓂ ᐃᒃᓯᕙᐅᑕᕆᔭᐅᓚᐅᕐᓯᒪᔪᖅ ᑭᓯᐊᓂ ᓴᓂᑦ ᕿᒪᖕᒪᒍ 2018-ᒥᑦ ᐊᖑᔪᖅᑳᙳᖅᑎᓪᓗᒍ ᓄᓇᕕᒃᒥᑦ ᒪᑭᕕᒃᑯᓐᓄᑦ.

ᓯᕗᓪᓕᕐᒥᑦ ᐱᒋᐊᕈᑎᕕᓂᖓ ᐅᓇ ᐃᓱᒪᓕᐅᕆᑎᑦᑎᒍᑎᐅᓗᓂ ᓕᐳᕈᓪ ᒐᕙᒪᒃᑯᑦ ᓄᑖᖅ ᐅᑭᐅᕐᑕᖅᑐᕐᒧᑦ ᐊᑐᐊᒐᒧᑦ ᐋᕿᒃᓯᒪᒍᑎᐅᓂᐊᕐᑐᒥᒃ, ᐱᒋᐊᖅᑎᑕᐅᓂᑯ ᑲᓇᑕᒧᑦ ᐊᖓᔪᖅᑳᖅ ᔭᔅᑎᓐ ᑐᕉᑑ ᑐᓴᖅᑕᐅᒍᑎᒋᓚᐅᕐᓯᒪᔭᖓ ᑎᓯᐱᕆ 2016-ᖑᑎᓪᓗᒍ.

ᐱᐊᓂᒃᑕᐅᒍᓂ, ᑖᓐᓇ ᐊᑐᐊᒐᒧᑦ ᖃᓄᐃᓕᖓᒍᑎᒃᓴᖅ ᐊᑐᖅᑕᐅᖔᕋᔭᖅᑐᖅ ᓯᑏᕙᓐ ᕼᐋᐴᑉ ᑲᓐᓲᕕᑎᕝ ᒐᕙᒪᖓᑦᑕ 2009-ᒥᑦ ᐅᑭᐅᕐᑕᖅᑐᕐᒧᑦ ᖃᓄᐃᓕᐅᕈᑎᒃᓴᖏᓐᓂᒃ ᐊᒻᒪᓗ ᕼᐋᐴᑉ 2010-ᒥᑦ ᐅᖃᐅᓯᕕᓂᖓ ᑲᓇᑕᐅᑉ ᐅᑭᐅᕐᑕᖅᑐᖓᓂᑦ ᓄᓇᖃᙱᑦᑐᓄᑦ ᐊᑐᐊᒐᖏᓐᓂᒃ.

ᕕᕝᕗᐊᕆᐅᓚᐅᕐᑐᖅ, ᑭᐅᕈᓕᓐ ᐸᓇᑦ, ᒥᓂᔅᑕ ᒐᕙᒪᑐᖃᒃᑯᑦ-ᓄᓇᖃᖅᑳᖅᑐᓪᓗ ᐱᓕᕆᖃᑎᒌᖕᓂᖏᓐᓄᑦ, ᐅᖃᓚᐅᕐᑐᖅ ᐅᑭᐅᕐᑕᖅᑐᕐᒧᑦ ᖃᓄᐃᓕᖓᒍᑎᒃᓴᖅ ᓴᕿᑕᐅᓛᕋᓱᒋᓪᓗᓂᐅᒃ ᔫᓂᐅᓕᕐᐸᑦ.

ᐊᒻᒪᓗ ᒫᑦᓯᐅᓚᐅᕐᑐᒥᓐ, ᑖᒥᓂᒃ ᓚᐸᓛᖕᒃ, ᑕᐃᔅᓱᒪᓂ ᐅᑭᐅᕐᑕᖅᑐᕐᒧᑦ ᒥᓂᔅᑕᐅᑎᓪᓗᒍ, ᐅᖃᓚᐅᕐᓯᒪᖕᒪᑦ ᐱᔾᔪᑎᑐᐊᖑᓂᕋᖅᖢᓂᐅᒃ ᑭᖑᕙᕆᐊᖅᓯᒪᓂᖓ ᐊᑐᐊᒐᓂᒃ ᓴᖅᑭᑎᑦᑎᓂᖅ ᐆᒥᖓ ᐃᓚᖏᑦ ᐅᑭᐅᕐᑕᖅᑐᕐᒥᑦ “ᐱᓕᕆᖃᑎᒋᔭᐅᔪᑦ” ᕿᒥᕐᕈᐊᕐᓂᖏᓐᓂᒃ ᐅᑭᐅᕐᑕᖅᑐᕐᒧᑦ ᐊᑐᐊᒐᐅᑉ ᖃᓄᐃᓕᖓᓂᒃᓴᖓᓂᒃ ᐊᒻᒪᓗ ᑎᑎᕋᖅᐸᓪᓕᐊᓪᓗᑎᒃ ᓇᖕᒥᓂᖅ ᐅᖃᐅᓯᖏᓐᓂᒃ.

ᐃᓚᖓᓪᓕ ᐱᓕᕆᖃᑎᒋᔭᐅᔪᑦ ᐅᑯᐊ ᐃᓄᐃᑦ ᑕᐱᕇᑦ ᑲᓇᑕᒥ. ᑐᓴᒐᒃᓴᓕᐊᕆᔭᐅᓚᐅᕐᑐᒥᓐ ᐱᓇᓱᐊᕈᓯᐅᓵᖅᑐᒥᓐ, ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᓚᐅᕐᒪᑕ “ᐊᖏᓚᐅᕐᓂᕋᖅᖢᑎᒃ ᐃᓄᐃᑦ ᓄᓇᖓᓄᑦ ᑎᑎᕋᐅᓯᖃᕐᑐᒥᑦ” ᐃᓚᒋᔭᐅᓂᐊᕐᓗᓂ ᐅᑭᐅᕐᑕᖅᑐᕐᒧᑦ ᐊᑐᐊᒐᒥ ᖃᓄᐃᓕᖓᓂᐅᓂᐊᖅᑐᒥᓐ.

ᐱᔪᓐᓇᕐᓂᖃᖅᑎᑕᐅᒃᑲᓐᓂᕐᓗᑎᒃ ᐅᑭᐅᕐᑕᖅᑐᕐᒥ ᒐᕙᒪᐅᔪᑦ

ᑖᒃᑯᐊᓕ ᖃᓄᐃᓕᐅᕐᓂᖏᑦᑎᒍᑦ, ᐹᑐᓴᓐ ᐊᒻᒪᓗ ᑲᑎᒪᔨᕋᓛᑦ ᐃᒃᓯᕙᐅᑕᐅᑉ ᑐᒡᓕᖓ, ᐃᓐᑎᐸᓐᑕᓐᔅ ᓴᓂᑐ ᐸᑐᕇᓯᐊ ᐴᕕ ᒫᓂᑑᐸᒥᐅᑕᖅ, ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᐱᓕᕆᔭᕆᐊᖃᕐᓂᖏᓐᓂᒃ ᐱᔪᓐᓇᕐᓂᖃᖅᑎᑦᑎᒃᑲᓐᓂᕐᓂᕐᒥᒃ ᓄᓇᖃᖅᑳᖅᑐᓂᒃ ᐊᒻᒪ ᓄᓇᖃᖅᑳᙱᑦᑐᓂᒃ ᐅᑭᐅᕐᑕᖅᑐᕐᒥᐅᓂᒃ.

“ᑐᕌᒐᕆᔭᐅᓗᐊᕐᑐᕐᓕ, ᐅᕙᑦᑎᒍᑦ ᑲᑎᒪᔨᕋᓛᑎᒍᑦ, ᐃᒪᓐᓇᐅᔭᕆᐊᖃᖅᑐᖅ ᓱᒃᑲᐃᑦᑐᒥᒃ ᐃᓱᒪᓕᐅᕆᕙᓪᓕᐊᓂᖅ ᐅᑭᐅᕐᑕᖅᑐᕐᒥᐅᓄᑦ ᐱᓕᕆᐊᖑᕙᓪᓕᐊᓗᑎᒃ ᐅᑭᐅᕐᑕᖅᑐᕐᒥᑦ ᐱᓕᕆᕝᕕᐅᔪᓂᒃ—ᐃᓱᒪᓕᐅᕆᔭᐅᔪᑦ ᐅᑭᐅᕐᑕᖅᑐᕐᒧᑦ ᐅᑭᐅᕐᑕᖅᑐᕐᒥᙶᕆᐊᖃᕐᒪᑕ,” ᑖᒃᑯᐊᒃ ᒪᕐᕉᒃ ᓴᓂᑑ ᐅᖃᓚᐅᕐᑑᒃ ᐱᒋᐊᕈᑎᐊᓂᒃ ᐅᓂᒃᑳᓕᐅᒍᔫᑉ.

ᑕᒪᓐᓇ ᐃᓱᒪᒋᓪᓗᒍ, ᐹᑐᓴᓐ ᐅᖃᓚᐅᕐᑐᖅ ᓈᒻᒪᒍᓱᓗᐊᙱᓐᓂᕋᖅᖢᓂ ᒐᕙᒪᑐᖃᒃᑯᑦ ᐊᑐᕐᑎᓪᓗᒋ ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᑎᑦᑎᔨᐅᓂᐊᕐᓗᑎ ᒐᕙᒪᑐᖃᒃᑯᑦ ᐃᑲᔫᓯᐊᖓᓂᒃ ᑐᕌᖓᔪᒥᒃ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐊᓯᖏᓐᓄᑦ ᐃᓱᒫᓘᑎᓄᑦ.

“ᐃᑲᔪᖅᑐᐃᓯᒪᒻᒪᕆᒃᑲᒪ ᓄᓇᕗᑦ ᒐᕙᒪᒃᑯᑦ ᓯᕗᓪᓕᐅᔭᕆᐊᖃᕐᓂᖏᓐᓂᒃ ᐋᓐᓂᐊᖃᖅᑕᐃᓕᓂᕐᒥᒃ ᐊᒻᒪ ᐃᓄᓕᕆᓂᕐᒥᒃ ᐊᒻᒪ ᒪᓕᒐᓕᕆᓂᕐᒥᑦ ᐊᒻᒪᓗ ᓄᓇᓕᖕᓂᑦ ᒐᕙᒪᓕᕆᓂᐅᔪᓂᒃ ᐱᓕᕆᔨᒻᒪᕆᐅᓗᑎᒃ ᓄᓇᕗᒥᑦ,” ᐹᑐᓴᓐ ᐅᖃᖅᑐᖅ.

ᐅᓇᐅᒐᓗᐊᖅᑎᓪᓗᒍ ᐅᑭᐅᕐᑕᖅᑐᕐᒥᑦ ᐱᖁᑎᒃᓴᓄᑦ ᑮᓇᐅᔭᒃᑯᕕᒃᓴᖅ, ᑲᑎᒪᔨᕋᓛᑦ ᐊᓯᖏᓐᓂᒃ ᐃᓱᒪᓕᐊᖏᑦ ᐅᑯᓂᖓ ᐃᓚᖃᖅᑐᑦ:

  • ᐋᕿᒃᓯᓗᑎᒃ ᒐᕙᒪᑐᖃᒃᑯᑦ ᖃᓄᐃᓕᐅᕈᑎᒃᓴᓂᒃ ᒪᑯᐊ ᒐᕙᒪᑐᖃᒃᑯᑦ ᖃᓄᐃᓕᐅᕈᑎᖏᑦ ᑎᐅᕆᑑᕆᐅᔪᑦ ᐊᒻᒪ ᓄᓇᖃᖅᑳᖅᑐᑦ ᒐᕙᒪᐅᖏᓐᓄ ᐱᔭᐅᕙᓪᓕᐊᓂᐊᕐᓗᑎᒃ.
  • ᑮᓇᐅᔭᖅᑕᖃᒃᑲᓐᓂᕐᓗᓂ ᐊᑐᓕᖅᑎᑦᑎᒍᑎᒃᓴᓂᒃ ᑕᒪᐃᓐᓂᒃ ᓄᓇᑖᕈᑎᓄᑦ ᐊᖏᕈᑎᓃᑦᑐᓂᒃ, ᐊᒻᒪᓗ ᑮᓇᐅᔭᖃᖅᑎᑦᑎᓗᑎᒃ ᓄᓇᐅᑉ ᐊᑐᖅᑕᐅᓂᖓᓄᑦ ᐸᕐᓇᐅᑎᒃᓴᓕᕆᓂᕐᒥᒃ ᐊᒻᒪᓗ ᒪᓕᒐᓕᕆᔨᐅᓂᐊᖅᑐᓂᒃ ᑲᑎᒪᔨᓂᒃ.
  • ᐋᕿᒃᓯᓗᑎᒃ ᐊᐅᓚᑎᖃᑦᑕᐅᑎᓂᒃᑯᑦ ᖃᓄᐃᓕᐅᕈᑎᒃᓴᓂᒃ ᐅᑯᓂᖓ ᓄᓇᖃᖅᑳᖅᑐᑦ ᐊᒻᒪ ᑎᐅᕆᑑᕆᓄᑦ ᒐᕙᒪᐅᔪᓂᒃ ᐅᑭᐅᕐᑕᖅᑑᑉ ᓯᒡᔭᖏᓐᓃᑦᑐᓄᑦ.
  • ᐋᕿᒃᓱᐃᓗᑎᒃ ᐊᑕᐅᓯᕐᒥᓐ ᑐᑭᓕᐅᕈᑎᐅᓂᐊᖅᑐᒥᓐ “ᐋᑎᒃᒧᑦ.”
  • ᐊᐱᕆᓗᑎᒃ ᑲᓇᑕᒥᑦ ᖃᐅᔨᓴᖅᑐᓕᕆᓂᕐᒧᑦ ᑲᑎᒪᔨᕐᔪᐊᓂᒃ (NRC) ᐋᕿᒃᓱᐃᖁᓗᒋᑦ ᐃᒡᓗᓕᐅᕐᓂᕐᒧᑦ ᒪᓕᒐᐅᓂᐊᖅᑐᓂᒃ ᐅᑭᐅᕐᑕᖅᑐᕐᒧᑦ ᓈᒻᒪᓈᕐᓯᒪᔪᓂᒃ.
  • ᐊᑐᓕᖅᑎᑦᑎᓗᑎᒃ ᖃᓄᐃᓕᐅᕈᑎᒃᓴᐅᓂᐊᖅᑐᓂᒃ ᐋᕿᒋᐊᖅᐹᓪᓕᖅᑎᑦᑎᓇᓱᖕᓂᕐᒥᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒃᑐᐃᒍᑎᐅᔪᓂᒃ ᒪᑯᑎᒎᓇᖅ ᐃᒡᓗᖁᑎᒋᔭᐅᔪᓂᒃ, ᐱᓕᕆᐊᖃᑲᐅᑎᒋᓗᑎᒃ ᐃᒡᓗᖃᙱᓗᐊᕐᓂᕐᒥᒃ ᐅᑭᐅᕐᑕᖅᑐᕐᒥᓐ, ᐊᒻᒪ ᐊᕐᕌᒍᑕᒫᑦ ᐅᓂᒃᑳᓕᐅᖅᐸᒡᓗᑎᒃ ᓄᓇᓕᖕᓄᑦ, ᓄᓇᖃᖅᑳᖅᑐᑦ ᐊᒻᒪ ᑎᐅᕆᑑᕆᐅᔪᑦ ᒐᕙᒪᖏᓐᓄᑦ ᐊᒃᑐᐃᒍᑎᐅᕙᓪᓕᐊᔪᓂᒃ ᒐᕙᒪᑐᖃᒃᑯᑦ ᐊᑐᖅᐸᓪᓕᐊᔭᖏᓐᓂᒃ ᐃᒡᓗᒃᓴᓄᑦ.
  • ᐃᑲᔪᖅᑐᐃᓗᑎᒃ ᓄᓇᖃᖅᑳᖅᑐᑦ ᐅᕝᕙᓘᓐᓃᑦ ᑎᐅᕆᑐᕆᓄᑦ ᒐᕙᒪᐅᔪᓂᒃ ᐊᖏᒡᓕᒋᐊᖅᑎᑦᑎᓂᒃᑯᑦ ᐃᑲᔫᑎᒃᓴᓂᒃ ᐃᓐᓇᕐᓂᒃ ᐃᓕᓐᓂᐊᖅᑎᑦᑎᓂᕐᒥᒃ ᐅᑭᐅᕐᑕᖅᑐᕐᒥᓐ, ᐃᓕᓐᓂᐊᖅᑎᐅᔪᓪᓗ ᐃᓕᓐᓂᐊᕈᓐᓇᕐᓗᑎᒃ ᐅᖃᐅᓯᑐᖃᖏᑦᑎᒍᑦ, ᐊᒻᒪᓗ ᐃᑲᔪᖅᑐᐃᓗᑎᒃ ᓄᓇᕗᑦ ᒐᕙᒪᒃᑯᓐᓂᒃ ᐋᕿᒃᓱᐃᓂᕐᒥᒃ ᔫᓂᕘᓯᑎᒃᓴᒥᑦ (ᓯᓚᑦᑐᖅᓴᕐᕕᒡᔪᐊᒥᑦ) ᐅᑭᐅᕐᑕᖅᑑᑉ ᑲᓇᖕᓇᖓᓂᒃ.
  • ᐊᑐᒃᑲᓐᓂᕐᓗᑎᒃ ᑮᓇᐅᔭᓂ ᐆᒧᖓ ᑲᓇᑕᒥ ᐃᑦᑕᕐᓂᓴᓕᕆᔨᒃᑯᑦ ᐅᑭᐅᕐᑕᖅᑐᕐᒥᐅᑦ ᑐᓴᐅᒪᔾᔪᑎᓕᕆᓂᕐᒧᑦ ᐱᓕᕆᐊᖏᓐᓂᒃ.
  • ᐱᓕᕆᖃᑎᖃᕐᓗᑎᒃ ᓄᓇᖃᖅᑐᓂᒃ, ᓄᓇᖃᖅᑳᖅᑐᑦ ᐊᒻᒪ ᑎᐅᕆᐅᕆᐅᔪᑦ ᒐᕙᒪᖓᓐᓂᒃ ᐋᕿᒃᓱᐃᕙᓪᓕᐊᓂᕐᒥᑦ ᐊᑐᖅᑕᐅᔪᓐᓇᖅᑐᓂᒃ ᓄᓇᓕᖕᓂ ᓴᓇᐅᒐᓕᕆᕕᒃᓴᓂᒃ, ᐃᓕᖁᓯᓕᕆᓂᕐᒧᑦ ᐊᒻᒪ ᐅᖃᐅᓯᓕᕆᓂᕐᒧᑦ.
  • ᐋᕿᒃᓱᐃᓗᑎᒃ ᖃᓄᖅ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᑦ ᓂᐱᖃᕈᓐᓇᕈᓐᓇᕐᓂᖏᓐᓂᒃ ᒐᕙᒪᑐᖃᒃᑯᑦ ᖃᐅᔨᓴᖅᑐᓕᕆᓂᕐᒧᑦ ᐊᒻᒪ ᐅᑭᐅᕐᑕᖅᑐᕐᒥᑦ ᖃᐅᔨᓴᕐᓂᕐᒧᑦ ᐱᓕᕆᐊᕆᔭᖏᓐᓂᒃ.
  • ᑮᓇᐅᔭᓂᒃ ᐃᑲᔪᕐᓗᑎᒃ ᐋᕿᒃᓱᐃᕙᓪᓕᐊᓂᕐᒥᒃ ᐃᒡᓗᒃᓴᓂᒃ ᐊᒻᒪ ᓄᓇᖃᖅᑳᖅᑐᑦ ᐊᕙᑎᓕᕆᓂᕐᒧᑦ ᑲᒪᔨᐅᓕᕈᓐᓇᕐᓂᕐᒧᑦ ᖃᓄᐃᓕᐅᕈᑎᒃᓴᓂᒃ ᐃᑲᔪᖅᑐᐃᓂᕐᒥᓐ ᐊᓯᐅᑎᑦᑎᑦᑕᐃᓕᓂᓕᕆᓂᕐᒥᓐ.
  • ᐋᕿᒃᓱᐃᓗᑎᒃ “ᐱᓕᕆᓪᓚᕆᒍᓐᓇᖅᑐᓂᒃ ᒐᕙᒪᓕᕆᔾᔪᑎᒃᓴᓂᒃ” ᐋᕿᒃᓱᐃᒍᑎᐅᓂᐊᖅᑐᓂᒃ ᖃᓄᐃᓕᐅᕈᑎᓂᒃ ᑲᓇᑕᐅᑉ ᐅᑭᐅᕐᑕᖅᑐᖓᑕ ᑕᕆᐅᖏᓐᓂᒃ, ᐃᓚᖃᕐᓗᓂ ᐅᒥᐊᕐᔪᐊᒃᑯᑦ ᐃᖏᕐᕋᕝᕕᐅᕙᒃᑐᓂᒃ ᐊᒻᒪᓗ ᓇᐅᑦᑎᐅᒃᑯᒫᓕᕆᓂᕐᒧᑦ ᖃᓄᐃᓕᐅᕈᑎᒃᓴᓂᒃ, ᐅᑭᐅᕐᑕᖅᑐᕐᒥᐅᑕ ᐃᓚᐅᑎᑕᐅᓗᑎᒃ ᐱᓕᕆᖃᑕᐅᓗᑎᒃ ᐅᑭᐅᕐᑕᖅᑐᕐᒥ ᒐᔭᒪᓕᕆᔨᐅᔪᓂᒃ ᐊᒻᒪ ᓄᓇᓕᖕᓂᑦ.
  • ᐊᖏᒡᓕᒋᐊᖅᑎᑦᑎᓗᑎᒃ ᐃᑲᔫᑎᒃᓴᓂᒃ ᓄᓇᖃᖅᑳᖅᑐᓂᒃ ᐱᓕᕆᖃᑕᐅᙱᓐᓇᖅᐸᒃᑐᓂᒃ ᐅᑭᐅᕐᑕᖅᑐᕐᒥᑦ ᑲᑎᒪᔨᕐᔪᐊᓂᒃ.
  • ᐃᓕᓴᕐᓯᓯᒪᓗᑎᒃ “ᑐᐊᕕᕐᓇᖅᑐᒥᑦ ᐱᔭᐅᔭᕆᐊᓕᖕᓂᑦ” ᐱᐅᓯᕚᓪᓕᖅᑎᑦᑎᒐᓱᖕᓂᕐᒥᑦ ᐱᖏᖕᓇᖅᑐᓕᕆᓂᕐᒥᒃ ᐊᒻᒪ ᑐᐊᕕᕐᓇᖅᑐᓕᕆᓂᕐᒧᑦ ᐱᓕᕆᕝᕕᐅᔪᓂᒃ ᐅᑭᐅᕐᑕᖅᑐᕐᒥᓐ.
Share This Story

(0) Comments