ᓴᓂᑭᓗᐊᕐᒥ ᐊᖑᓇᓱᒃᐸᒃᑐᑦ ᐱᔪᓐᓇᙱᑦᑐᑦ ᐊᐅᓪᓚᖅᑎᑦᑎᔾᔪᑎᓂᒃ ᐊᓯᐊᓄᑦ ᓄᓇᓕᖕᓄᑦ ᒪᑯᓄᖓ ᓇᓄᐃᑦ ᐊᒥᖏᓐᓄᑦ: ᒪᓕᒐᓕᐅᖅᑎ

For English version, see Sanikiluaq hunters can’t get international exports for polar bear hides: MLA

ᒐᕙᒪᑐᖃᒃᑯᑦ ᐱᓕᕆᖃᑎᖃᖅᑐᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᓄᓇᕗᒥᑦ ᒐᕙᒪᒃᑯᓐᓂᒃ ᐋᖅᑭᒃᓱᐃᓇᓱᒃᖢᑎᒃ ᐊᐅᓚᑦᑎᔪᓐᓇᕐᓂᕐᒥᒃ ᓄᓇᐃᑦ ᐊᓯᐊᓄᑦ ᐊᐅᓪᓚᖅᑎᑦᑎᓂᐊᕐᓂᕐᒧᑦ ᐱᔪᓐᓇᐅᑎᓂᒃ ᑕᓯᐅᔭᕐᔪᐊᑉ ᓂᒋᐊᓃᑦᑐᓄᑦ ᒪᑯᓄᖓ ᓇᓄᐃᑦ ᐊᒥᖏᓐᓄᑦ, ᐅᖃᕐᑐᖅ ᑲᓇᑕᒥ ᐊᕙᑎᓕᕆᔨᒃᑯᑦ ᒥᓂᔅᑕᖓ.

ᑲᓇᑕᒥ ᒐᕙᒪᒃᑯᑦ ᒪᓕᒐᓕᕆᓂᒃᑯᑦ ᓇᓕᒧᒌᒃᑎᑦᑎᓇᓱᖕᒪᑕ ᓴᐳᔾᔨᓯᒪᓇᓱᖕᓂᕐᒥ ᐅᓗᕆᐊᓇᖅᑐᒦᑦᑐᓂᒃ ᐆᒪᔪᓂᒃ ᒪᑐᒧᖓ ᐊᖑᓇᓱᒃᑎᑦᑎᖃᑦᑕᕐᓂᕐᒥᒃ ᓇᓄᕐᓂᒃ, ᐅᖃᓚᐅᕐᑐᖅ ᐊᕙᑎᓕᕆᓂᕐᒧᑦ ᐊᒻᒪ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᒥᓂᔅᑕ ᓯᑏᕙᓐ ᒋᐊᐳᑦ.

“ᑐᑭᓯᓯᒪᒐᑦᑕ ᑕᒪᐅᓇᑦᑕᐃᓐᓇᖅ ᓄᓇᕗᒥᑦ ᓇᓄᐃᑦ ᐱᑐᐃᓐᓇᐅᓗᐊᙱᓐᓂᖏᓐᓂᒃ ᐊᓯᖏᓐᓃᑦᑐᓂᓪᓕ ᒪᑯᓄᖓ ᐅᓗᕆᐊᓇᖅᑐᒦᑦᑐᓂᒃ ᐆᒪᔪᓂᒃ,” ᐅᖃᓚᐅᕐᑐᖅ ᒫᔅᓯ 16ᒥ ᑐᓴᒐᒃᓴᑎᒍᑦ ᐃᖃᓗᖕᓂ.

“ᑕᐃᒪᓕ ᐱᓕᕆᖃᑎᖃᕐᑐᒍᑦ ᒐᕙᒪᒃᑯᓐᓂ ᐊᒻᒪ ᐊᔾᔨᒌᙱᑦᑐᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᑕᒪᑐᒥᖓ ᖃᓄᖅ ᐋᖅᑭᒃᓯᔪᓐᓇᕐᒪᖔᑦᑕ.”

ᐅᖃᐅᓯᒃᓴᖃᕈᓘᔭᑲᑕᓚᐅᕐᑐᑦ ᓄᓇᕗᑦ ᒪᓕᒐᓕᕆᕝᕕᐊᓂᒃ ᒫᔅᓯ 13ᒥ ᐆᒧᖓ ᓄᓇᕐᔪᐊᕐᒧᑦ ᐊᐅᓪᓚᖅᑎᑦᑎᔪᓐᓇᕐᓂᕐᒧᑦ ᐱᔪᓐᓇᐅᑎᓂᒃ ᓇᓄᐃᑦ ᐊᒥᖏᓐᓄᑦ.

ᑕᓯᐅᔭᕐᔪᐊᖅᒧᑦ ᒪᓕᒐᓕᐅᖅᑎ ᑖᓂᐅᓪ ᖃᕝᕕᒃ ᐊᐱᕆᓚᐅᕐᑐᖅ ᑕᐃᕕᑦ ᐊᕿᐊᕈᖅᒧᑦ ᐊᕙᑎᓕᕆᓂᕐᒧᑦ ᒥᓂᔅᑕᐅᓚᐅᕐᓂᖓᓂᒃ ᑖᒃᑯᐊ ᐱᓕᕆᐊᒃᓴᐃᑦ ᐊᓯᙳᖅᑎᑕᐅᓚᐅᖅᑎᓐᓇᒋᑦ ᒫᔅᓯ 15ᒥ, ᖃᐅᔨᒪᔭᕆᐊᒃᓴᖓᓂᒃ ᒐᕙᒪᑐᖃᒃᑯᓐᓂᒃ ᐊᐅᓪᓚᑦᑎᑦᑎᓂᕐᒧᑦ ᐱᔪᓐᓇᐅᑎᓂᒃ ᐱᓇᓱᒃᑐᑦ ᐱᔪᓐᓇᓚᐅᙱᓐᓂᖏᓐᓂᒃ ᓇᓄᐃᑦ ᐊᒥᖏᓐᓂᒃ ᐱᔭᐅᓂᑯᓂᒃ ᑕᓯᐅᔭᕐᔪᐊᑉ ᓂᒋᖅᐸᓯᐊᓂᒃ.

“ᐊᖑᓇᓱᖃᑦᑕᕐᓂᖅ ᐱᒻᒪᕆᐊᓘᑎᖃᕐᒪᑦ ᑮᓇᐅᔭᓕᐅᕋᓱᖕᓂᕐᒧᑦ ᐊᒻᒪ ᐃᓕᖅᑯᓯᒃᑯᑦ ᑭᒡᒐᖅᑐᖅᑕᓐᓄᑦ,” ᖃᕝᕕᒃ ᐅᖃᓚᐅᕐᑐᖅ ᓄᓇᖓᑕ ᒥᒃᓵᓄᑦ, ᓴᓂᑭᓗᐊᖅ.

ᐊᕿᐊᕈᖅ ᑭᐅᓚᐅᕐᑐᖅ ᐅᖃᖅᖢᓂ ᐊᕙᑎᓕᕆᔨᒃᑯᑦ ᖃᐅᔨᓚᐅᕐᓂᕋᖅᖢᓂᒋᑦ ᕕᕝᕗᐊᕆᐅᑎᓪᓗᒍ. ᐅᖃᐅᓯᕆᓪᓗᓂᐅᒃ “ᐃᓱᒪᒋᔭᐅᑐᐃᓐᓇᕐᓂᒃᑯᑦ ᐃᓱᒪᓕᐊᕆᔭᐅᔪᖅ ᐊᐅᓪᓚᖅᑎᑦᑎᖃᑦᑕᖁᔨᙱᖢᑎᒃ ᐱᐅᔪᐊᓗᖕᓂ ᓇᓄᐃᑦ ᐊᒥᖏᓐᓂᒃ ᓴᓂᑭᓗᐊᕐᒥ.”

“ᐅᓇ ᓈᒻᒪᙱᓗᐊᕐᑐᖅ ᐊᐅᓪᓚᖅᑎᑦᑎᔪᓐᓇᐃᓪᓕᑎᑦᑎᓂᖏᑦ.”

ᐊᕿᐊᕈᖅ ᐊᐱᖅᓱᖅᑕᐅᔪᒪᓚᐅᙱᒻᒪ ᓲᖃᐃᒻᒪ ᐊᕙᑎᓕᕆᔨᓄᑦ ᒥᓂᔅᑕᐅᔪᓐᓃᓚᐅᕐᒪᑦ.

ᔪᐊᓇ ᖁᐊᓴ, ᐱᓇᓱᐊᕈᓯᐅᓚᐅᕐᑐᒥᒃ ᐊᕙᑎᓕᕆᓂᕐᒥᒃ ᐱᓕᕆᐊᖃᓕᓚᐅᕐᑐᖅ, ᐊᒻᒪ ᑭᐅᑲᑕᒍᒪᓚᐅᙱᒻᒪᑦ ᑭᓯᐊᓂ ᕿᒥᕐᕈᐊᓚᐅᕐᓗᓂᐅᒃ ᑖᓐᓇ ᐱᓕᕆᐊᒃᓴᖅ.

ᓄᓇᕐᔪᐊᕐᒥ ᓇᓄᕐᓂ ᓂᐅᕐᕈᑎᖃᖃᑦᑕᕐᓂᖅ ᑲᓇᑕᒥ ᑐᑭᒧᐊᖅᑕᐅᖃᑦᑕᕐᒪᑦ ᐅᑯᓄᖓ ᓄᓇᕐᔪᐊᕐᒥ ᓂᐅᕐᕈᑎᖃᖃᑦᑕᕐᓂᖅᒧᑦ ᐊᓯᐅᑐᐃᓐᓇᕆᐊᓕᖕᓂ ᐆᒪᔪᓂᒃ ᓄᓇᒥᙶᖅᑐᑐᓂᒃ ᐊᒻᒪ ᐱᕈᖅᑐᓂᒃ, ᑕᐃᔭᐅᖕᒥᔪᖅ CITES ᐊᖏᖃᑎᒌᒍᑎ.

ᐃᓱᒪᓕᐅᕆᔪᖃᓚᐅᙱᑦᑐᖅ ᖃᓂᑦᑐᒃᑯᑦ ᑐᓂᓯᖃᑦᑕᖁᔨᙱᓐᓂᕐᒥᒃ ᐊᐅᓪᓚᖅᑎᑦᑎᓂᕐᒧᑦ ᐱᔪᓐᓇᐅᑎᓂᒃ ᓇᓄᕐᓂ ᑕᓯᐅᔭᕐᔪᐊᑉ ᓂᒋᐊᓂᙶᖅᓯᒪᔪᓂᒃ, ᑎᑎᕋᓚᐅᕐᑐᖅ ᐊᕙᑎᓕᕆᓂᕐᒧᑦ ᐊᒻᒪ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᐅᖃᖅᑎᒋᔭᐅᔪᖅ ᓵᒥᐅᓪ ᓚᕚᓐᑕᐃᓐ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑭᓯᐊᓂᓕ ᒐᕙᒪᑐᖃᒃᑯᑦ ᐱᓯᒪᑐᐃᓐᓇᖅᑐᑦ ᐱᑖᕋᓲᑎᒋᔭᐅᔪᓂᒃ ᓲᖃᐃᒻᒪ ᐅᑯᐊ ᐱᓕᕆᔨᒋᔭᐅᔪᑦ ᐅᑯᓄᖓ ᐊᕙᑎᓕᕆᓂᕐᒧᑦ ᐊᒻᒪ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᖃᐅᔨᒪᙱᒻᒪᑕ ᓄᓇᕐᔪᐊᒥ ᓂᐅᕐᕈᑎᖃᖃᑦᑕᕆᐊᒃᓴᖅ ᐅᓗᕆᐊᓇᕆᐊᒃᓴᖓᓂᒃ ᓇᓄᕐᓄᑦ, ᐅᖃᓚᐅᕐᑐᖅ.

ᐱᓕᕆᕝᕕᐅᔪᖅ ᒫᓐᓇ ᕿᒥᕐᕈᐊᖅᑐᑦ “ᑐᓴᒐᒃᓴᒃᑲᓐᓂᕐᓂᒃ” ᖃᐅᔨᓇᓱᒃᖢᑎᒃ ᓄᓇᕐᔪᐊᕐᒥ ᓂᐅᕐᕈᑎᖃᖃᑦᑕᕐᓂᕐᒧᑦ ᐊᒃᑐᐃᔾᔪᑎᐅᓇᔭᖅᑐᓂᒃ, ᐊᒻᒪᓗ ᐃᓱᒪᓕᐅᕆᓂᐊᖅᖢᑎᒃ ᑐᓂᓯᖃᑦᑕᕐᓂᐊᕆᐊᒃᓴᖅ ᐋᒃᑲᓘᓐᓃᑦ ᐱᔪᓐᓇᐅᑎᓂᒃ.

ᓚᕚᓐᑕᐃᓐ ᐅᖃᖃᓚᐅᕐᑐᖅ ᑎᓴᒪᑦ ᐊᐅᓚᑦᑎᑦᑎᓂᕐᒧᑦ ᐱᔪᓐᓇᐅᑎᑦ ᑐᓂᔭᐅᓚᐅᕐᓯᒪᔪᑦ ᑕᓯᐅᔭᕐᔪᐊᑉ ᓂᒋᐊᓂ ᓇᓐᓄᒃᑕᐅᓯᒪᔪᓂᒃ 2020-21ᒥ ᐊᖑᓇᓱᖕᓇᐅᑎᓪᓗᒍ. ᐅᑯᓇ ᐱᓇᓱᖕᓂᑯᑦ ᐅᖃᐅᔾᔭᐅᓚᐅᕐᑐᑦ ᖃᐃᖁᔭᐅᓪᓗᑎᒃ ᖃᑯᒍᒃᑲᓐᓂᐅᓕᕐᐸᑦ.

ᒐᕙᒪᒃᑯᑦ ᑐᓂᓯᓚᐅᕐᓯᒪᔪᑦ 109 ᐊᐅᓪᓚᖅᑎᑦᑎᓂᕐᒧᑦ ᐱᔪᓐᓇᐅᑎᓂᒃ ᓇᓄᐃᑦ ᐊᒥᖏᓐᓂᒃ ᑕᐃᔅᓱᒪᓂ.

ᐊᓯᖏᑦ ᓇᓄᐃᑦ ᐱᔪᓐᓇᐅᑎᑖᕈᑎᐅᔪᓐᓇᕐᑐᑦ ᐊᐅᓪᓚᖅᑎᑦᑎᓂᐊᕐᑐᓂᒃ, ᐅᖃᕐᑐᖅ.