ᓴᓂᑭᓗᐊᖅ ᓂᕆᐅᖕᓂᖃᕐᔪᐊᖅᐳᖅ ᓄᑖᖑᔪᒥ ᐱᔭᕇᖅᑕᐅᓵᖅᑐᓂ ᑐᓚᒃᑕᕐᕕᖕᓂ

For English version, see Sanikiluaq has high hopes for newly completed docks

ᓴᓂᑭᓗᐊᑉ ᓄᑖᖑᔪᑦ ᑐᓚᒃᑕᕐᕕᒃᓴᑦ ᐃᒪᕐᒧᐊᖅᑕᐅᓂᐊᖅᐳᑦ ᐊᕐᕌᒎᓂᐊᖅᑐᒥ, ᓂᕆᐅᖕᓂᐅᕗᖅ ᐱᔨᑦᑎᕋᕐᓂᐊᕐᓂᖏᓐᓂ ᐅᐸᒃᑕᕐᕕᐅᓂᖓᓂ ᐳᓚᕋᖅᑐᓄᑦ ᓂᐅᓂᖏᓐᓂ ᐊᒻᒪ ᐱᔪᓐᓇᖅᑎᑦᑎᓗᓂ ᓄᓇᓕᖕᓂ ᓴᖅᑭᑎᑦᑎᓂᕐᒧᑦ ᐃᖃᓗᓕᕆᓂᕐᒥ.

ᑐᓚᒃᑕᕐᕕᒃᓴᑦ, ᕿᓚᒡᕕᒃᓴᖃᖅᑐᑦ 32−ᓄᑦ ᐅᒥᐊᕐᓄᑦ, ᐱᔭᕇᖅᑕᐅᓚᐅᖅᐳᑦ ᓯᑎᐱᕆ 4−ᒥ. ᓄᓇᒥ ᑐᖅᑯᖅᑕᐅᓯᒪᕗᑦ ᒫᓐᓇᐅᔪᒥ ᐅᑭᐅᖅᐸᓪᓕᐊᑎᓪᓗᒍ.

ᐅᒥᐊᖅᑐᖅᑏᑦ ᐊᓕᐊᓇᐃᒋᔭᖃᔾᔮᙱᒃᑲᓗᐊᖅᑎᓪᓗᓕᒋᑦ ᑐᓚᒃᑕᕐᕕᒃᓴᕐᓂᑦ ᑕᒪᑐᒪᓂ ᐊᕐᕌᒎᔪᒥ, ᕼᐋᒻᓚᒃᑯᑦ ᐊᐅᓚᑦᑎᔨᒻᒪᕆᖓ ᕌᓐ ᓛᑦ ᓵᙵᕗᖅ ᓯᕗᓂᒃᓴᒧᑦ ᐊᒻᒪ ᖃᓄᐃᑦᑐᓐᓇᕐᓂᐊᕐᓂᖓᓂ ᖁᕝᕙᕆᐊᖅᑎᑦᑎᔪᓐᓇᕐᓂᐊᕐᓂᖓᓂ ᓄᓇᓕᖕᓂ ᑮᓇᐅᔾᔭᒃᓴᓂᐅᔪᒥ.

“ᑕᒪᕐᒥᒃ ᐃᓱᒪᒋᔭᐅᓂᐅᔪᖅ ᓂᐅᕕᐊᒃᓴᖃᕆᐊᖅᑐᕐᓗᑎᒃ ᐃᖃᓗᓕᕆᓂᕐᒥ ᒪᑲᒪᑎᑕᐅᓗᓂ ᐊᒻᒪ ᐊᐅᓚᓗᓂ ᐅᕙᓂ ᐊᒻᒪᓗ ᓴᖅᑭᑎᑦᑎᓂᕐᒥ ᐃᓚᖏᓐᓂ ᐃᖅᑲᓇᐃᔮᖑᔪᓂ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐳᒃᑕᓛᖅᑐᑦ ᑐᓚᒃᑕᕐᕕᒃᓴᑦ ᐱᔪᓐᓇᖅᑎᑦᑎᑐᐃᓐᓇᔾᔮᙱᓚᖅ ᓄᓇᓕᖕᓂ ᐊᖑᓇᓱᖕᓂᐅᔪᒥ ᓂᕿᒃᓴᓂ ᐊᒻᒪ ᐃᓚᖏᓐᓄᑦ, ᐱᔭᕆᐊᖃᖅᑕᑦᑎᓐᓂ ᓂᕿᒃᓴᖃᑦᑎᐊᙱᓐᓂᐅᔪᒧᑦ, ᑭᓯᐊᓂ ᑐᕌᖅᑎᑦᑎᑐᐃᓐᓇᕆᐊᖃᖅᐳᑦ ᐊᖏᓂᖅᓴᐅᔪᒥ ᐃᖃᓗᓕᕆᓂᕐᒥ ᒪᑭᒪᔾᔪᑕᐅᔪᓐᓇᖅᑐᓂ ᑕᐃᒪᐃᑉᐸᖏᓐᓂᖏᑎᑐᑦ ᐸᖕᓂᖅᑑᒥ ᐊᒻᒪ ᐊᓯᖏᓐᓂ ᓄᓇᓕᐅᔪᓂ.”

ᑲᑭᕙᒃ ᑲᑐᔾᔨᖃᑎᒌᖑᔪᓂ ᐊᑭᓖᓚᐅᖅᐳᑦ ᐊᑭᖓᓂ ᕼᐋᒻᓚᒃᑯᓐᓂ ᐃᖅᑲᓇᐃᔭᖅᑎᑦᑎᓂᕐᒥ ᐃᓕᓐᓂᐊᖅᑎᓂᑦ ᓴᓇᓂᖏᓐᓂ ᑐᓚᒃᑕᕐᕕᒃᓴᓂᑦ.

ᓛᑦ ᓇᓗᓇᐃᖅᓯᓚᐅᕆᕗᖅ ᖃᓄᐃᑦᑐᓐᓇᕐᓂᐊᕐᓂᖓᓂ ᐊᑐᕐᓂᕐᒥ ᐅᓯᑲᑦᑕᕐᓂᕐᒧᑦ.

ᓴᓂᑭᓗᐊᑉ ᐃᓂᖓ ᑲᖏᖅᓱᐊᓗᖕᒥ ᖃᓂᐸᓗᒃᐳᖅ ᓄᓇᕕᖕᒥ ᓄᓇᓕᐅᔪᓂ ᐅᒥᐅᔭᕐᒧᑦ, ᑰᔾᔪᐊᕌᐱᒃ ᐊᒻᒪ ᐃᓄᒃᔪᐊᕐᒧᑦ.

ᐊᒥᓱᓂ ᐃᓚᒌᖑᔪᓄᑦ ᑲᑎᙵᓂᖃᕐᓂᐅᔪᓂ ᐱᑕᖃᖅᑐᓂ ᐅᑯᓇᓂ ᓄᓇᓕᐅᔪᓂ, ᓛᑦ ᑕᑯᕗᖅ ᑐᓚᒃᑕᕐᕕᒃᓴᕕᐅᔪᓂᑦ ᐊᑦᑕᓇᙱᓪᓗᓂ ᑎᑭᕝᕕᐅᔪᓐᓇᕐᓂᖓᓂ ᐃᓄᖕᓄᑦ ᐊᐅᓪᓛᖅᑐᓄᑦ ᐳᓚᕋᕐᓂᕐᒧᑦ.

ᓛᑦ ᑐᙵᓱᒃᑎᑦᑎᔪᒪᒋᕗᖅ ᐃᓄᖕᓂ ᖃᓪᓗᓈᑦ ᓄᓇᖓᓐᓂ ᓴᓂᑭᓗᐊᕐᒧᑦ.

ᐃᓚᖏᑦ ᓄᓇᕗᒻᒥ ᓄᓇᓕᐅᔪᑦ ᐱᔨᑦᑎᕌᓂᒃᐳᑦ ᐳᓚᕋᖅᑐᓄᑦ ᐅᒥᐊᕐᔪᐊᓄᑦ. ᐅᒥᐊᕐᔪᐊᓄᑦ ᑭᓴᖅᓯᒪᔪᓂ ᑲᖏᖅᓱᐊᓗᖕᒥ, ᓄᑖᖑᔪᖅ ᑐᓚᒃᑕᕐᕕᒃᓴᑦ ᐱᔨᑦᑎᕋᕈᓐᓇᕐᓂᐊᖅᐳᑦ ᐃᓂᐅᓗᓂ ᓂᐅᓂᕐᒧᑦ ᓴᓂᑭᓗᐊᕐᒥ.

“ᐃᓴᒃᓯᒪᕗᖓ ᐱᓕᕆᖃᑎᒋᕙᒃᑕᑦᑎᓐᓄᑦ ᐳᓚᕋᖅᑐᓕᕆᓲᓄᑦ ᐊᒻᒪ ᖃᐅᔨᑎᓯᒪᕙᒃᑲ ᒪᑐᐃᖓᓂᑦᑎᓐᓂ ᖃᓄᐃᓕᐅᕐᓂᐅᔪᒧᑦ ᐊᒻᒪ ᐊᓕᐊᓇᐃᒍᓱᑦᑎᑦᐊᕋᔭᖅᐳᒍᑦ ᐊᑕᐅᓯᐅᔪᒥ ᐅᒥᐊᕐᔪᐊᕐᓂ ᑭᓴᖅᓯᒪᓂᖓᓂ ᑲᖏᖅᓱᑦᑎᓐᓂ,” ᓛᑦ ᐅᖃᓚᐅᖅᐳᖅ.

“ᐃᓕᓯᒍᕕᑦ ᓴᓇᓯᒪᔪᓂ ᐅᕝᕙᓘᓐᓃᑦ ᐆᒃᑑᑎᒃᓴᒥ ᐃᓕᔭᐅᓗᓂ ᓇᖕᒥᓂᖃᖅᑎᐅᔪᓄᑦ ᐱᕈᖅᐸᓪᓕᐊᔪᓐᓇᕐᓂᖏᓐᓂ, ᐃᓄᐃᑦ ᐅᕗᙵᕐᓂᐊᖅᐳᑦ ᐊᒻᒪ ᑕᐃᒪᐃᓐᓂᐊᖅᐳᒍᑦ.”