ᓴᓗᒪᔪᖅ, ᐱᓕᕆᖃᑎᒌᖕᓂᖅ ᓄᓇᒥ ᑭᓱᒃᓴᓄᑦ ᐱᕙᓪᓕᐊᑎᑦᑎᓂᖅ ᐱᒻᒪᕆᐅᔪᖅ ᐅᑭᐅᖅᑕᖅᑑᑉ ᓯᕗᓂᒃᓴᖓᓂᑦ

ᐊᔩᖃᑎᒌᒍᑕᐅᑎᓪᓗᒍ ᓄᓇᕘᑖᕈᑎ 30 ᐊᕐᕌᒍᑦ ᐅᖓᑖᓂ, ᑕᐅᑐᒐᖃᓚᐅᕋᑦᑕ ᓄᓇᕘᒧᑦ ᐱᓕᕆᑦᑎᐊᖅᑐᑐᑦ, ᓇᖕᒥᓂᖅ ᑮᓇᐅᔭᓕᐅᕈᓐᓇᖅᑐᑐᑦ ᓇᖕᒥᓂᖅ ᐊᑐᖅᖢᒋᑦ ᑭᓱᒃᓴᖁᑎᖏᑦ ᓄᓇᒥᖔᖅᑐᑦ.  ᓴᓇᓚᐅᖅᑐᒍᑦ  ᓱᖅᑯᐃᓇᖅᑐᒥᒃ  ᒪᓕᑦᑎᐊᕆᐊᓕᖕᒥᒡᓗ  ᐱᓕᕆᔾᔪᓯᕐᓂᒃ  ᓴᓇᓂᕐᓄᑦ  ᓴᐳᔾᔨᔪᓂᒃ  ᐃᓄᐃᑦ  ᓄᓇᖏᓐᓂᒃ  ᐃᓕᖅᑯᓯᑐᖃᖏᓐᓂᒡᓗ.  ᑲᒻᐸᓃᑦ ᐃᓚᐅᔪᒪᔪᑦ ᓴᓇᓂᕐᓄᑦ ᓄᓇᕘᒥ ᒪᓕᒋᐊᖃᖅᑎᑕᐅᔪᑦ ᑖᒃᑯᓄᖓ ᐱᓕᕆᔾᔪᓯᕐᓄᑦ –  ᓇᓕᐊᖕᓂᑐᐃᓐᓇᖅ ᑭᑭᑦᑎᖏᓪᓗᑎᒃ.

ᐹᕙᓐᓚᓐ ᓴᕕᕋᔭᒃᓴᓂᒃ ᐅᔭᕋᖕᓂᐊᕐᕕᖏᑕ ᓄᓘᔮᖕᓂᑦ ᐅᔭᕋᖕᓂᐊᕐᕕᖓ ᐊᑐᖅᐳᖅ ᐅᒃᐱᕆᔭᑦᑎᓐᓂᒃ ᐊᒃᓱᕉᑎᒋᓚᐅᖅᑕᑦᑎᓐᓂᒃ.  ᑮᓇᐅᔭᑎᒍᑦ ᐊᐅᓚᑦᑎᔨᐅᓪᓚᕆᒃᖢᓂ ᐅᑭᐅᖅᑕᖅᑐᒧᑦ, ᑲᒻᐸᓂᐅᔪᖅ ᐅᔭᕋᖕᓂᐊᕐᓂᐅᑉ ᑭᖑᓪᓕᐊᓄᑦ ᐊᖏᒡᓕᒋᐊᕐᓂᖓ ᐱᕕᖃᖅᐳᖅ ᐊᓯᔾᔨᐅᑎᒃᑲᓐᓂᕐᓄᑦ ᐃᓅᓯᕐᒧᑦ ᑮᓇᐅᔭᑎᒍᓪᓗ ᖃᓄᐃᓕᖓᓃᑦ ᐅᑭᐅᖅᑕᖅᑑᑉ ᑲᓇᖕᓇᖓᓂᑦ.  ᐱᖃᓯᐅᔾᔨᒋᓪᓗᓂ ᑕᐃᒪᓐᓇᑎᒋᐅᓚᐅᖅᓯᒪᖏᑦᑐᒥᒃ ᐃᓄᐃᑦ ᐃᓚᐅᓂᖏᓐᓄᑦ ᐱᓕᕆᓂᐅᑉ ᐊᐅᓚᑕᐅᓂᖏᓐᓄᑦ.

ᐹᓪ ᖁᐊᓴ ᓯᕗᓕᖅᑎᐅᓚᐅᖅᓯᒪᔪᖅ ᓄᓇᕘᒧᑦ ᒫᓐᓇ ᑎᓕᐅᖅᑎᓪᓗᐊᑕᙳᖅᖢᓂ ᓯᕗᓕᖅᑎᓪᓗᐊᑕᕐᒧᑦ ᐹᕙᓐᓚᓐ ᓴᕕᕋᔭᒃᓴᓄᑦ ᐅᔭᕋᖕᓂᐊᕐᕕᖏᑕ ᑯᐊᐳᕇᓴᖓᓄᑦ. (ᐊᔾᔨᙳᐊᖅ ᐹᕙᓐᓚᓐᑯᓐᓂᑦ)

ᐹᕙᓐᓚᓐᑯᑦ ᑲᑎᒪᑎᑦᑎᖃᑦᑕᖅᓯᒪᕗᑦ ᓄᓇᓕᖕᓂᑦ ᐅᓄᖅᑐᐃᖅᓱᓪᓚᒃᖢᑎᒃ ᑐᓴᕋᓱᒃᖢᑎᒃ ᐃᓄᖕᓂᑦ ᓴᖅᑭᔮᑦᑎᐊᖁᓪᓗᒋᓪᓗ ᓵᑕᐅᔪᓐᓇᕐᓗᑎᒡᓗ.  ᑖᒃᑯᐊ ᐅᖃᖃᑎᒌᖕᓃᑦ ᓴᖅᑭᔾᔪᑕᐅᓯᒪᕗᑦ ᐊᓯᔾᔩᕐᔪᐊᕐᓂᕐᓂᒃ ᐹᕙᓐᓚᓐᑯᑦ ᐊᐅᓚᓂᖏᓐᓄᑦ.  ᔪᓚᐃᖑᓚᐅᖅᑐᒥ, ᐱᔾᔪᑕᐅᓪᓗᓂ ᐃᓄᖕᓂᑦ ᑐᓴᖅᑕᐅᔪᑦ, ᐹᕙᓐᓚᓐᑯᑦ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓇᕐᒥᓂᒃ ᑭᖑᕙᖓᑎᑦᑎᓚᐅᖅᑐᑦ ᓯᑯᓯᐅᔾᔮᖏᓐᓇᒥᒃ.  ᖃᓄᖅᑑᓚᐅᖅᑐᑦ ᖃᐅᔨᓴᕐᓂᕐᓂᑦ ᖃᐅᔨᔭᐅᔪᑦ ᖃᐅᔨᔭᐅᒐᒥᒃ 2020-ᒥᑦ ᐅᓄᖏᓐᓂᖅᓴᐅᓂᕋᐃᔪᑦ ᕿᓚᓗᒐᓂᒃ ᑕᓯᐅᔭᕐᒥᑦ 2019 ᓴᓂᐊᓂ.  ᖃᐅᔨᒪᒐᑦᑎᒍᑦ ᐱᓕᕆᓂᒃᑲᓐᓂᒃᓴᐃᑦ 2021-ᒥ ᐱᔭᕇᖅᑕᐅᓇᓱᒡᓗᒍ ᒥᑦᑎᒪᑕᓕᐅᑉ ᑐᓚᒃᑕᕐᕕᖓ, ᑐᑭᓯᔭᐅᖏᑦᑐᓂᒡᓗ ᐊᒃᑐᐃᓂᖃᕐᓂᐊᕐᓂᖏᑦ ᕿᓚᓗᒐᓂᒃ, ᐹᕙᓐᓚᓐᑯᑦ ᓄᖅᑲᖅᑎᑦᑎᓚᐅᑲᓚᐅᖅᑐᑦ ᐱᓕᕆᐊᓂᒃ ᐊᐅᓚᑕᒥᓂᒃ.

ᑕᐃᒪᓐᓇ ᐋᖅᑭᒋᐊᕐᕕᖃᐃᓐᓇᖅᑐᒥᒃ ᐊᐅᓚᑦᑎᓂᖅ ᐊᐅᓚᓲᖑᕗᑦ.  ᖃᐅᔨᓴᐃᓪᓚᕐᔪᐊᖅᖢᑎᒃ, ᐱᖃᓯᐅᔾᔨᓪᓗᑎᒃ ᐃᓄᐃᑦ ᑕᕝᕗᖓᑲᐅᑎᒋ ᐊᐅᓚᑦᑎᓂᕐᓂᒃ, ᐊᒃᑐᐃᓗᐊᔾᔭᐃᒃᑯᑎᒥᒃ ᖃᐅᔨᒍᑎᒃ ᐃᑲᔫᑎᖃᖏᑦᑐᒥᒃ, ᑲᑐᔾᔨᖃᑕᐅᔪᖅ ᑲᒻᐸᓂ ᐋᖅᑭᒋᐊᕈᑎᓂᒃ ᕿᓂᕆᐊᓕᒃ.  ᐅᔭᕋᖕᓂᐊᕐᓂᐅᑉ ᑭᖑᓪᓕᐊ ᓴᖅᑭᑦᑎᓇᔭᖅᑐᖅ ᐹᕙᓐᓚᓐᑯᑦ ᐊᖏᖅᓯᒪᓂᖏᓐᓂᒃ ᐋᖅᑭᒋᐊᕈᓐᓇᖅᑐᓄᑦ ᐊᐅᓚᑦᑎᓂᕐᓄᑦ ᓵᑕᐅᑲᐅᑎᒋᔪᓐᓇᕐᓗᑎᒡᓗ ᐊᐅᓚᑦᑎᔨᓄᑐᐊᖑᖏᑦᑐᖅ ᐃᓄᖕᓄᑦᑕᐅᖅ ᑭᓯᐊᓂ.

ᐃᓗᐃᑦᑐᒃᑯᑦ, ᐹᕙᓐᓚᓐᑯᑦ ᓈᓚᒃᑐᑦ ᓄᓇᓕᖕᓂᒃ.  ᐊᖏᕋᔭᓚᐅᖏᑦᑐᖓ ᐃᓚᐅᔪᒪᓗᖓ ᐹᕙᓐᓚᓐᑯᓐᓄᑦ ᑖᓐᓇ ᐅᒃᐱᕆᖏᒃᑯᒃᑯ.

ᑭᖑᓪᓕᖅᐹᖑᖃᑕᐅᓪᓗᑕ ᐃᓅᔪᑎᒍᑦ ᐃᓕᖅᑯᓯᑐᖃᖅ ᐊᑐᖅᖢᒍ ᐊᐅᓚᔾᔭᐃᖃᑕᐅᓪᓗᖓᓗ ᓄᓇᕘᒥᒃ, ᐅᒃᐱᕈᓱᒃᑐᖓ ᓄᓇᕘᑉ ᐊᓯᔾᔨᑲᐅᖅᑐᕋᓱᒋᓪᓗᒍ.  ᑮᓇᐅᔭᑎᒍᑦ ᓴᓇᓃᑦ ᐃᓄᐃᓪᓗ ᐃᓱᒪᖅᓱᖅᖢᑎᒃ ᐊᖑᓇᓱᒃᑐᑦ ᐊᑕᐅᑦᑎᒃᑰᕈᓐᓇᖅᓯᕗᑦ.  ᐋᒃᑳᖅᑐᑦ, ᓲᖃᐃᒻᒪ, ᐅᖃᖅᑐᑦ ᐃᓄᐃᑦ ᐊᓐᓇᐅᒪᓚᐅᖅᑐᑦ ᐊᕐᕌᒍᒐᓴᒡᔪᐊᓄᑦ ᐊᖏᔪᒃᑯᑦ ᐊᑐᒐᒃᓴᓂᒃ ᓴᓇᔪᖃᕋᓂ, ᐊᓐᓇᐅᒪᓂᐊᖅᖢᑎᒡᓗ ᐊᕐᕌᒍᓴᓄᑦ ᓱᓕ ᓴᓇᔪᖃᖏᓪᓗᓂ.  ᑖᓐᓇ ᓇᓗᓇᖏᑦᑎᐊᖅᑐᖅ.  ᑭᓯᐊᓂ ᑖᓐᓇ ᑎᑭᓐᓇᓱᓪᓗᐊᖅᐸᕗᑦ?  ᐊᓐᓇᐅᒪᑐᐃᓐᓇᕐᓗᓂ?  ᖁᑦᑎᖕᓂᖅᓴᓄᓪᓘᓐᓃᑦ ᐱᓇᓱᒋᐊᖃᖅᐱᑕ?

ᐅᓄᖅᑐᑦ ᐃᓄᖁᑎᕗᑦ ᐊᒃᓱᕈᕐᓇᓪᓚᒃᑐᒃᑰᖅᑐᑦ –  ᐊᔪᖅᓴᕐᓃᑦ, ᒪᒃᑯᒃᑐᑦ ᐃᓅᓯᕐᒥᓂᒃ ᑭᐱᓯᔪᑦ, ᓂᕿᖃᖏᑦᑐᑦ, ᐃᒡᓗᖃᖏᑦᑐᑦ ᐃᓕᓐᓂᐊᖅᓯᒪᖏᑦᑐᓪᓗ.  ᐱᓕᕆᓃᑦ ᐹᕙᓐᓚᓐᑯᑎᑐᑦ ᑭᒡᒐᖅᑐᐃᔪᑦ ᐱᕕᒃᓴᕐᔪᐊᓂᒃ ᓵᖁᓪᓗᒋᑦ ᑖᒃᑯᐊ ᐊᒃᓱᕉᑏᑦ ᐅᓄᓪᓚᒃᑐᓂᒡᓗ ᑮᓇᐅᔭᓂᒃ ᐃᓚᓕᐅᑎᔾᔪᑎᒋᓗᒋᑦ ᓄᓇᕘᒧᑦ.  ᐅᔭᕋᖕᓂᐊᕐᓂᐅᑉ ᑭᖑᓪᓕᐊ ᐊᖏᖅᑕᐅᒍᓂ, ᐅᖓᑖᓂ $2 ᐱᓕᐊᓐ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐊᑭᓕᕈᑕᐅᓂᐊᖅᑐᑦ ᐃᓄᐃᑦ ᑎᒥᖏᓐᓄᑦ 2038-ᒧᑦ, ᐱᖃᓯᐅᓪᓗᒋᑦ ᐅᖓᑖᓂ $1 ᐱᓕᐊᓐ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ $1.4 ᐱᓕᐊᓐᓗ ᓄᓇᕗᑦ ᑐᙵᕕᒃ ᑎᒥᖁᑖᓐᓄᑦ.  ᑖᒃᑯᐊ ᖄᖓᒍᑦ $700 ᒥᓕᐊᓐᑲᓴᑦ ᑖᒃᓯᓄᑦ ᓄᓇᕘᒧᑦ $1.4 ᐱᓕᐊᓐᓗ ᑲᓇᑕᐅᑉ ᒐᕙᒪᖓᓄᑦ. ᐊᑐᒐᒃᓴᓕᕆᔪᖃᕇᖅᑎᓪᓗᑕ ᑮᓇᐅᔭᓕᐅᖅᑐᓂᒃ ᐊᕝᕙᖓᑕ ᐊᕝᕙᓪᓗᐊᖓᓂᒃ ᓄᓇᕘᑉ ᑮᓇᐅᔭᖏᑎᒍᑦ ᕼᐋᓐᓇᓚᖏᓐᓃᑦᑐᓂᒃ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᔪᒥᒃ ᐱᕕᖃᕐᓗᓂ ᐃᖅᑲᓇᐃᔭᖅᑎᑦᑎᔪᓐᓇᕐᓂᕐᓂᒃ ᕼᐋᓐᓇᓚᖏᓐᓃᑦᑐᓂᒃ ᐊᖏᒡᓕᒋᐊᒃᑲᓐᓂᕐᓃᑦ ᑲᔪᓯᒍᓂ, ᑎᓕᐅᖅᑕᐅᓂᕐᓗᒃᑲᔭᖅᑐᒍᑦ ᑐᙵᓱᒃᑎᑦᑎᐊᖏᒃᑯᑎᒍᑦ.  ᑲᑐᔾᔨᖃᑎᒌᕗᑦ ᐱᓕᕆᐊᒥᓂᒃ ᐱᓕᕆᓲᖑᓪᓗᓂ ᐊᐅᓚᑦᑎᔨᐅᓪᓗᓂ ᑲᑐᔾᔨᖃᑎᒌᑦᑎᐊᖅᓯᒪᓪᓗᓂ ᐃᓄᐃᑦ ᓴᐳᑎᓪᓗᒋᑦ ᓄᓇᕗᑦ, ᐃᒥᕗᑦ, ᐃᓕᖅᑯᓯᑐᖃᕗᓪᓗ.

ᐃᓕᖅᑯᓯᑐᖃᕗᑦ ᐱᕐᔪᐊᖑᓛᖑᕗᑦ, ᑭᓯᐊᓂ ᐃᓅᔪᑎᒍᑦ ᑐᙵᓱᒃᑎᑦᑎᔭᕆᐊᖃᖅᐳᒍᑦ ᐃᓚᖓᒍᑦ ᐊᓯᔾᔨᕐᓂᕐᓂᒃ ᑲᑐᔾᔨᖃᑎᒋᓗᒋᑦ ᑲᒻᐸᓃᑦ ᑮᓇᐅᔭᑎᒍᑦ ᐱᕈᖅᓴᐃᔪᑦ, ᐃᖅᑲᓂᔮᖃᖅᑎᑦᑎᔪᑦ, ᑮᓇᐅᔭᑎᒍᑦ ᐊᔪᖅᓴᙱᑎᑦᑎᔪᑦ ᐊᕙᑎᓕᕆᓂᕐᓄᓪᓗ ᐸᖅᑭᔨᐅᑎᑦᑎᔪᓂᒃ ᐃᓅᓯᑦᑎᓐᓂᒃ ᐃᑲᔫᑕᐅᔪᓐᓇᖅᑐᓂᒃ.  ᐃᑳᕐᕕᐅᔪᖅ ᓯᕗᓂᒃᓴᑦᑎᐊᕙᐅᓂᖅᓴᒧᑦ ᐃᒃᐱᒍᓱᒃᖢᓂ ᕿᒪᒃᑕᑦᑎᓐᓂᒃ.

ᐹᓪ ᖁᐊᓴ ᐊᖓᔪᖅᑕᐅᑎᐅᓂᖅᓴᐅᓪᓗᓂ ᐅᖃᐅᔾᔨᒋᐊᖅᑎ ᐹᕙᓐᓛᓐ ᓴᕕᒃᓴᓂᒃ ᐅᔭᕋᖕᓂᐊᖅᑏᑦ ᑐᐊᐳᕇᓴᖓᓄᑦ ᐊᖏᔪᖅᑳᒧᑦ ᐳᕋᐃᐊᓐ ᐱᓂᒧᑦ. ᓯᕗᓕᖅᑎᐅᓚᐅᖅᓯᒪᔪᖅ ᓄᓇᕘᒻᒧᑦ ᐊᒻᒪᓗ ᒪᓕᒐᓕᐅᖅᑎᐅᓚᐅᖅᓯᒪᓪᓗᓂ, ᐅᖃᖅᑎᑦᑎᔨᐅᓚᐅᖅᓯᒪᓪᓗᓂᓗ ᑕᓪᓕᒪᒋᓕᖅᑕᖓᓂᖕ ᒪᓕᒐᓕᐅᕐᕕᖕᒥᑦ.