ᓴᖃᓕᐊᓯ ᑯᓄᒃ ᐱᓕᕆᖃᖅᐳᖅ ᐊᖓᒃᑯᓕᕆᓂᕐᒥᒃ ᓇᐃᑦᑐᒥ ᑕᕐᕆᔭᒐᓕᐊᖓᒍᑦ

1980-ᖏᓐᓂ, ᐃᓄᒃ ᐃᓐᓇᑐᖃᖅ ᐅᓂᒃᑳᓚᐅᕐᓯᒪᔪᖅ ᑕᕐᕆᔭᒐᓕᐅᖅᑎᒧᑦ ᓴᖃᓕᐊᓯ ᑯᓄᒃᒧᑦ ᐆᒥᖓ ᐃᓅᓱᒃᑐᕉ ᐊᕐᓇᖅ ᐊᔪᕈᓐᓃᖅᓴᖅᑐᖅ ᐊᖓᒃᑰᔪᓐᓇᖅᓯᓂᕐᒥᒃ ᐊᓈᓇᑦᑎᐊᖓᓂᒃ.

ᐊᓱᐃᓛᒃ ᐊᕐᕌᒍᑦ ᐱᖓᓱᑦ ᓯᕗᓂᐊᓂᒃ, ᑖᓐᓇ ᖃᐅᔨᒪᔭᐅᑦᑎᐊᖅᑐᖅ ᓄᓇᕗᒥᑦ ᑕᕐᕆᔭᒐᓕᐅᖅᑎ ᑖᔅᓱᒥᖓ ᑎᑎᕋᐅᔭᒐᐅᓪᓗᓂ ᐋᖅᑭᒃᓱᐃᕙᓪᓕᐊᓕᓚᐅᕐᓯᒪᖕᒪᑦ ᑕᕐᕆᔭᒐᓕᐊᕆᓪᓗᓂᐅᒃ ᑖᓐᓇᓗ ᓄᐊᑦ ᐊᒥᐊᓕᑲᒧᑦ ᓴᖅᑭᑎᑕᐅᓂᐊᖅᖢᓂ ᑐᕌᓐᑐᒥ ᓄᓇᕐᔪᐊᕐᒥ ᑕᕐᕆᔭᒐᕐᓄᑦ ᖁᕕᐊᓲᑎᖃᕐᓇᒥ ᑕᒪᑐᒪᓂᒃ ᑕᖅᑭᒥ.

ᓴᖃᓕᐊᓯ ᑯᓄᒃ ᐅᖃᓚᐅᕐᑐᖅ ᑭᖑᓪᓕᖅᐹᖅ ᑕᕐᕆᔭᒐᓕᐊᖓ ᐅᑎᖅᑎᑦᑎᔾᔪᑎᒋᓇᓱᖕᓂᕋᖅᑕᖓ ᒎᑎᓕᕆᓂᖅ ᐱᑕᖃᓚᐅᖅᓯᒪᑎᓐᓇᒍ ᐅᒃᐱᕐᓂᕆᔭᐅᓚᐅᕐᓯᒪᔪᕕᓂᕐᒥᒃ. (ᐊᔾᔨᙳᐊᖁᑎᒋᔭᐅᔪᖅ)

ᑯᓄᒃ ᐅᖃᓚᐅᕐᑐᖅ ᐅᓇ ᐊᖓᒃᑯᒃᓴᔭᐅᔪᖅ: ᐊᖓᒃᑰᑉ ᐃᑲᔪᖅᑎᖓ ᓴᖅᑭᓗᐊᓕᓚᐅᕐᓯᒪᔪᖅ ᐅᓂᒃᑳᕐᒥᙶᖅᖢᓂ —ᓱᖃᐃᒻᒪ ᐃᓱᒪᒋᖃᑦᑕᓚᐅᕐᓯᒪᒐᒃᑯ — ᐊᒻᒪᓗ ᐅᖃᐅᓯᖃᕈᒪᓂᕐᒥᒃ ᐃᓄᐃᑦ ᐅᒃᐱᕈᓱᒍᑎᒋᓚᐅᕐᓯᒪᔭᖓᓂᒃ ᐊᑐᕐᓗᓂ ᐅᓂᒃᑲᐅᓯᐅᕈᑎᐅᕙᓕᖅᑐᒥᒃ — ᑎᑎᕋᐅᔭᒐᖅᑎᒍᑦ.

“ᐊᕐᕌᒎᓕᖅᑐᓂᒃ 100-ᓂᒃ, ᒎᑎᓕᕆᓂᖅ ᐃᓄᐃᑦ ᐃᓕᖅᑯᓯᖓᓂᒃ ᓱᕋᒃᑎᕈᑎᐅᓚᐅᕐᓯᒪᖕᒪᑦ ᐊᒻᒪ ᐊᖓᒃᑰᓂᕐᒥᒃ, ᐊᒻᒪᓗ ᑕᒪᓐᓇ ᓄᖅᑲᖅᑎᑦᑎᓯᒪᓂᐅᔪᖅ ᐊᒻᒪ ᐅᓂᒃᑳᓂᒃ ᐊᔮᔮᕈᓯᕐᓂᒃ ᓄᖅᑲᖅᑎᑦᑎᔾᔪᑎᐅᒋᓪᓗᓂ,” ᐅᖃᖅᑐᖅ. “ᐅᓇ ᑐᒃᓯᐊᕐᕕᒃᒥᑦ ᐅᖃᐅᓯᐅᕙᓚᐅᖅᓯᒪᙱᑦᑐᖅ ᐱᕈᖅᓴᖅᑎᓪᓗᖓ.”

ᑕᕝᕙᓂᓕ ᑕᕐᕆᔭᒐᓕᐊᕆᔭᐅᔪᒥᒃ, ᐊᖑᓂ ᐋᓐᓂᐊᖅᑐᖅ ᓱᕋᐃᕗᖅ ᐊᑐᕆᐊᖃᙱᑕᖓᓂᒃ ᐊᒻᒪᓗ ᒪᒥᓴᖅᑕᐅᔭᕆᐊᖃᓕᖅᖢᓂ ᐊᖓᒃᑯᕐᒧᓐ. ᑖᓐᓇ ᐃᓅᓱᒃᑐᖅ ᐊᕐᓇᖅ ᐊᓈᓇᑦᑎᐊᖓᓗ ᐃᖏᕐᕋᔭᒃᑑᑦ “ᐊᑖᒍᑦ” ᖃᐅᔨᓇᓱᒃᖢᑎᒃ ᐊᖑᑎᐅᑉ ᐋᓐᓂᐊᕈᑎᖓᓂᒃ.

“ᐃᒻᒪᑲᓪᓚᒡᓕ, ᖃᓪᓗᓈᖅᑕᖃᓚᐅᕐᓯᒪᑎᓐᓇᒍ ᑕᒫᓂᒃ, ᐊᖓᒃᑯᐃᑦ ᓘᒃᑖᕆᔭᐅᕙᓚᐅᕐᓯᒪᖕᒪᑕ ᐋᓐᓂᐊᖅᑐᓂᒃ ᖃᓄᐃᑦᑐᓐᓃᖅᑎᑦᑎᓇᓱᒃᖢᑎᒃ,” ᐅᖃᖅᑐᖅ.

ᓴᖅᑭᑎᑦᑎᓯᒪᔪᖅ ᐃᓄᐃᑦ ᐃᓕᖅᑯᓯᖓᓂᒃ “ᓴᖅᑭᔮᖅᑎᑕᐅᙱᑦᑐᒥᓐ” ᒫᓐᓇᐅᓕᕐᑐᖅ, ᐅᖃᖅᑐᖅ.

“ᐃᓄᐃᑦ ᐅᒃᐱᕋᓱᖕᒪᑕ ᐱᖓᓱᓂᒃ ᐊᖓᔪᖅᑳᓂᒃ: ᐃᒪᕐᒥᐅᑕᓄᑦ, ᓄᓇᒥᐅᑕᓄᑦ ᐊᒻᒪᓗ ᓯᓚᒥᐅᑕᓄᑦ. ᒎᑎᓕᕆᓂᒃᑯᓪᓕ ᑕᒪᒃᑯᓂᖓ ᐅᖃᐅᓯᖃᙱᑦᑐᑦ. ᑭᓯᐊᓂᓕ ᐊᕐᕌᒍᓂᒃ 4,000-ᓂᒃ ᑕᒪᓐᓇ ᐃᓄᖕᓄᑦ ᐅᒃᐱᕆᔭᐅᓚᐅᕐᓯᒪᔪᖅ. ᑕᐃᒪᓕ ᑕᐃᒪᐅᔪᒃᓴᐅᕗᑦ ᓱᓕ; ᓱᓕ ᑕᐃᒪᐃᑦᑐᖅ ᐊᓯᙳᓚᐅᕐᓯᒪᙱᑦᑐᖅ.”

ᑯᓄᒃ ᐱᓕᕆᖃᑎᖃᖃᑦᑕᓚᐅᖅᑐᖅ ᑎᑎᕋᐅᔭᒐᖅᑎᓂᒃ ᑐᕌᓐᑐᒥ, ᐅᖃᖅᖢᓂ ᖃᓪᓗᓈᓄᙵᐅᔭᕆᐊᖃᕐᓂᖓᓂᒃ ᐃᓄᐃᑦ ᐃᓕᖅᑯᓯᖓᓂᒃ ᐃᓕᓐᓂᐊᖅᑎᑦᑎᔭᖅᑐᖅᖢᓂ ᑕᒪᒃᑯᐊ ᑎᑎᕋᐅᔭᒐᕆᔭᐅᔪᑦ ᓱᓕᓂᕐᓴᐅᓇᔭᕐᒪᑕ ᐊᒥᒃᑐᖅᒧᑦ, ᐅᑯᓂᖓ ᐃᓚᖃᖅᖢᑎᒃ ᐃᒃᐱᐊᕐᔪᒃᒥᑦ, ᒥᑦᑎᒪᑕᓕᒃ, ᐃᒡᓗᓕᒃ, ᓴᓂᕋᔭᒃ ᐊᒻᒪ ᓇᐅᔮᓂ.

“ᐃᑲᔪᖃᑦᑕᕆᐊᖃᓚᐅᕋᒃᑭᑦ ᐊᒻᒪᓗ ᖁᕕᐊᓇᕈᓘᔭᖅᖢᓂ,” ᐅᖃᖅᑐᖅ, ᐅᖃᒃᑲᓐᓂᖅᖢᓂ ᖃᐅᔨᑎᑦᑕᕆᐊᖃᓚᐅᕐᓂᖏᓐᓂᒃ ᕿᒻᒦᑦ ᐊᓄᖏᑦ ᖃᓄᐃᓕᖓᓂᖏᓐᓂᒃ. “ᖁᕕᐊᓇᕈᓘᔭᓚᐅᕐᑐᖅ ᖃᐅᔨᕙᓪᓕᐊᓪᓗᓂ ᖃᓄᐃᓕᐅᖃᑦᑕᖅᑕᖏᓐᓂᒃ. ᑲᒪᓇᖅᑐᐊᓗᒃ.”

ᐊᖓᒃᑯᓴᔭᐅᔪᖅ: ᐊᖓᒃᑰᑉ ᐃᓕᓐᓂᐊᖅᑎᖓ ᓴᖅᑭᑎᑕᐅᕌᓂᒃᓯᒪᓕᖅᑐᖅ ᐃᐅᕈᑉᒥᑦ, ᓵᓚᒃᓴᕐᓂᑰᓪᓗᓂ ᐃᓕᓴᕆᔭᐅᔾᔪᑎᒥᒃ ᐆᒥᖓ Annecy International Animation Film Festival ᕗᕌᓐᓯᒥ ᐊᐅᔭᐅᔪᖅ.

ᐅᓇ ᑕᕐᕆᔭᒐᓕᐊᖅ, ᐅᑯᓂᖓ ᐱᙳᐊᖅᑎᖃᖅᖢᓂ ᒫᑎᓚᐃ ᐃᕙᓗ, ᓘᓯ ᑐᓗᒑᕐᔪᒃ ᐊᒻᒪ ᔮᑭ ᖁᓐᓄᑦ ᓴᖅᑭᔮᖅᑎᑕᐅᓛᖅᑐᑦ ᑐᕌᓐᑐᒥ ᑕᕐᕆᔭᒐᕐᓄᑦ ᖁᕕᐊᓲᑎᖃᕐᓇᒥᓐ ᓯᑎᐱᕆ 10-ᒥᑦ.

ᐅᓇ ᑕᕐᕆᔭᒐᓕᐊ ᐱᓕᕆᐊᕆᒃᑲᓐᓂᕐᑕᖓ ᑯᓅ, 63-ᓂ ᐅᑭᐅᖃᓕᖅᖢᓂ, ᐅᖃᓚᐅᕐᑐᖅ ᐅᓂᒃᑳᓕᐅᒃᑲᓐᓂᕈᓐᓇᔾᔮᕋᓱᒋᔪᓐᓃᖅᖢᓂ ᑖᔅᓱᒪ ᑭᖑᓂᐊᒍᑦ.

“ᐃᓈᓘᓕᖅᖢᖓ … ᐱᐊᓂᖕᓂᐊᓕᕋᒪ,” ᐅᖃᖅᑐᖅ. “ᐊᒻᒪᓗ ᑕᕝᕙᐅᔪᓐᓃᕋᓗᐊᕈᒪ ᑕᒪᒃᑯᐊ ᐊᓯᓐᓄᑦ ᐱᓕᕆᐊᖑᔭᕆᐊᖃᕐᓂᐊᖅᑐᑦ. ᑕᐃᒪᓕ ᖃᐅᔨᑎᑦᑎᓇᓱᒃᖢᖓ ᐊᔾᔨᒌᙱᑦᑑᑎᐅᓂᖏᓐᓂᒃ ᑕᕐᕆᔭᒐᓕᐅᕐᓂᖅ.

“ᐊᖓᒃᑯᕐᓂᒃ ᐅᓂᒃᑳᖅᑕᖃᐅᒃᑲᓐᓂᕐᒥᖕᒪᑦ. ᐅᓇᓕ ᐊᑕᐅᓯᑐᐊᑯᓗ.”