ᓴᖅᑭᑎᑦᑎᓂᕐᒥ ᐊᑦᑕᓇᙱᑦᑐᓂ ᐃᓂᐅᔪᓂ ᐊᖑᑕᐅᖃᑎᒥᓂ ᐊᕐᓇᐅᖃᑎᒥᓂ ᐊᐃᑉᐸᖃᖅᐸᒃᑐᓄᑦ ᐃᓄᖕᓂ ‘ᐱᔭᐅᔭᕆᐊᖃᕐᔪᐊᖅᐳᖅ,’ ᐅᖃᖅᐳᖅ Pride−ᑯᓐᓄᑦ ᐃᑲᔪᖅᓱᐃᔨᐅᔪᓂ

For English version, see Creating safe spaces for queer Inuit ‘very much needed,’ says Pride advocate

ᓂᑭ ᑯᒪᒃᓯᐅᑎᒃᓴᖅ ᓯᕗᓪᓕᕐᒥ ᖃᐅᔨᒪᕗᖅ ᐱᒻᒪᕆᐅᓂᖓᓂ ᓴᖅᑭᑎᑦᑎᓂᕐᒥ ᐊᑦᑕᓇᙱᑦᑐᓂ ᐃᓂᐅᔪᓂ ᐃᓄᖕᓄᑦ.

ᕿᒫᓚᐅᖅᑎᓪᓗᒍ ᐋᓐᓂᖅᓯᕆᕙᒃᑐᒥ ᐃᒡᓗᒥᐅᖃᑎᒥᓂ ᒪᒃᑯᒃᑎᓪᓗᒍ, ᐊᑯᓂᐸᓗᒃ ᐅᐃᓂᐱᐊᒡ ᐊᖅᑯᑎᖓᓂᕐᒥᐅᑕᐅᓪᓗᓂ ᐊᒻᒪ ᐊᑐᕐᓂᕐᒥ ᑐᖁᓂᐅᔪᒥ ᓇᒡᓕᒋᕐᔪᐊᖅᑕᖓᓂ ᓄᑲᖓᓂ ᐊᒻᒪ ᑲᑕᔾᔭᖃᑎᒋᕙᒃᑕᖓᓂ ᔭᓯᑲ ᒪᐃᑯᔅᒥ 2001−ᒥ, ᑯᒪᒃᓯᐅᑎᒃᓴᖅ ᐃᓚᒋᓕᖅᑎᓯᒪᕙᖓ ᐃᓅᓯᖓᓂ ᐃᑲᔪᖅᓱᐃᓂᖓᓂ ᐃᓄᖕᓂ.

“ᐃᓅᓯᒪᕗᖓ ᓈᒻᒪᒃᑐᓂ ᐊᔾᔨᒌᙱᑦᑐᓂ ᐃᓅᓯᐅᔪᓂ ᓇᐃᑦᑐᒥᒃ ᐃᓅᓯᓐᓂ ᑕᐃᓐᓇᑦᑕᐃᓐᓇᐅᓂᕐᒧᑦ ᐃᓅᓗᖓ ᐊᑦᑕᓇᙱᓪᓗᖓ ᐊᓯᖏᓐᓄᑦ ᐃᓄᖕᓄᑦ,” ᐅᖃᓚᐅᖅᐳᖅ.

“ᑕᐃᒪᓐᓇ ᐃᓕᖅᑯᓯᑐᐃᓐᓇᕆᖅᑰᖅᐸᕋ.”

ᑕᒪᓐᓇ ᐱᔪᒪᓂᐅᔪᖅ ᑐᕌᖅᑎᑦᑎᓚᐅᖅᐳᖅ ᑯᒪᒃᓯᐅᑎᒃᓴᓂᑦ ᓇᓂᓯᖃᑎᖃᕐᓂᕐᒥ ᓯᕗᓪᓕᖅᐸᐅᔪᒥ ᐃᓄᖕᓄᑦ ᐃᑲᔪᕐᕕᒃᓴᒥ, ᑐᙵᓱᒋᒻᒥ, ᐊᑐᐃᓐᓇᖃᖅᑎᑦᑎᔪᒥ ᐱᔨᑦᑎᕋᕐᓂᐅᔪᓂ ᐃᓄᖕᓄᑦ ᓅᑉᐸᓪᓕᐊᔪᓄᑦ ᐃᓅᓯᕐᒥ ᓄᓇᓕᐸᐅᔭᒥ.

ᑲᑐᔾᔨᖃᑎᒌᖓ ᐃᑲᔪᓲᖑᕗᖅ ᐃᓄᖕᓂ ᐱᓂᖏᓐᓂ ᐊᑭᑐᓗᐊᙱᑦᑐᓂ ᐃᒡᓗᒃᓴᓂ, ᐊᑐᐃᓐᓇᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᐃᓅᖃᑎᒌᖑᔪᓄᑦ ᐱᔨᑦᑎᕋᕐᓂᐅᔪᒥ, ᓇᓂᓯᓂᕐᒥ ᐃᖅᑲᓇᐃᔮᒃᓴᓂ ᐊᒻᒪ ᑐᒃᓯᕋᕐᓂᕐᒧᑦ ᓂᖃᐃᓱᕐᓂᕐᒧᑦ. ᑐᓂᓯᓲᖑᒋᕗᖅ ᐃᓕᖅᑯᓯᐅᔪᒥ ᖃᓄᐃᓕᐅᕐᓂᐅᔪᓂ ᐊᒻᒪ ᐃᓕᓐᓂᐊᕐᓂᐅᔪᓂ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐊᙳᑎᓚᐅᖅᐳᑦ ᑯᒪᒃᓯᐅᑎᒃᓴᕐᒧᑦ ᑕᖅᑭᐅᑉ ᐱᒋᐊᕐᓂᐸᓗᐊᓂ ᐋᑐᕚᒥ, ᐃᓚᐅᖃᑕᐅᑎᓪᓗᒍ ᓯᕗᓪᓕᖅᐹᑦᑎᐊᒥ Pride ᑲᑎᒪᓂᐅᔪᒥ ᑲᒪᒋᔭᐅᔪᒥ ᑐᙵᓱᕝᕕᖓᑦ ᐃᓄᖕᓄᑦ.

ᑯᒪᒃᓯᐅᑎᒃᓴᖅ, ᒫᓐᓇ ᐃᓱᒻᒥᖅᑐᐃᔨᐅᔪᖅ ᑐᙵᓱᒋᑦ ᐃᓄᖕᓄᑦ ᐃᑲᔪᖅᑕᐅᕕᖕᒥ, ᐃᒻᒥᓂᒃ ᐊᕐᓇᐅᖃᑎᒥᓂ ᐊᐃᑉᐸᖃᖅᐸᒃᐳᖅ ᐊᒻᒪ ᑐᑭᓯᐅᒪᕗᖅ ᐱᒻᒪᕆᐅᓂᖓᓂ ᓴᖅᑭᑎᑦᑎᓂᕐᒥ ᐱᕕᒃᓴᖃᕐᓂᐅᔪᓂ ᑲᑎᖃᑎᖃᕐᓂᕐᒧᑦ ᐃᓄᖕᓄᑦ ᓇᓗᓇᐃᖅᓯᓲᓂᒃ 2SLGBTQ+. 2S ᑐᑭᖃᖅᐳᖅ “ᒪᕐᕉᖕᓂ-ᑕᕐᓂᓕᕐ,” ᐅᖃᐅᓯᐅᔪᖅ ᑐᕌᖓᔪᒥ ᐊᖑᑕᐅᖃᑎᒥᓂ ᐊᕐᓇᐅᖃᑎᒥᓂ ᐊᐃᑉᐸᖃᖅᐸᒃᑐᓄᑦ ᓄᓇᖃᖅᑳᖅᓯᒪᔪᓄᑦ ᑭᓇᐅᓂᖏᓐᓂ.

“ᐱᔭᐅᔭᕆᐊᖃᓪᓚᕆᒃᐳᖅ, ᐊᒻᒪ ᖃᐅᔨᒪᕗᖓ ᐊᖏᒡᓕᕐᔪᐊᕐᓂᐊᕐᓂᖓᓂ ᐃᓄᒋᐊᖕᓂᐅᔪᑦ ᐊᖑᑕᐅᖃᑎᒥᓂ ᐊᕐᓇᐅᖃᑎᒥᓂ ᐊᐃᑉᐸᖃᖅᐸᒃᑐᓄᑦ ᐃᓗᖕᓂ ᐅᓄᖅᑐᒻᒪᕆᐊᓘᕗᑦ,” ᐅᖃᓚᐅᖅᐳᖅ ᑲᑎᒪᓂᐅᔪᒥ, ᑲᑎᖃᑎᖃᖅᑎᑦᑎᓚᐅᖅᑐᒥ 24−ᒐᓚᖕᓂ ᐊᖑᑕᐅᖃᑎᒥᓂ ᐊᕐᓇᐅᖃᑎᒥᓂ ᐊᐃᑉᐸᖃᖅᐸᒃᑐᓄᑦ ᐃᓄᖕᓂ ᐃᓚᐅᖃᑕᐅᔪᓂ ᑲᓇᑕᓕᒫᒥ ᑕᑯᒃᓴᐅᑎᑦᑎᓂᕐᓄᑦ ᐊᒻᒪ ᐃᓕᓐᓂᐊᕐᓂᐅᔪᓂ ᑐᕌᖓᔪᒥ ᓇᓂᓯᓂᕐᒥ ᐱᓕᕆᓂᐅᔪᓂ ᐃᓚᐅᑎᑕᐅᔪᓐᓇᕐᓂᕐᒧᑦ ᐊᒻᒪ ᑐᙳᓇᕐᓗᓂ ᐃᓂᐅᓗᓂ.

“ᐊᖏᔪᒥ ᐃᓱᒪᓂᖃᑦᑎᐊᙱᓚᖅ ᐊᖑᑕᐅᖃᑎᒥᓂ ᐊᕐᓇᐅᖃᑎᒥᓂ ᐊᐃᑉᐸᖃᖅᐸᒃᑐᓄᑦ ᐃᓄᖕᓂ ᐱᔾᔪᑎᖃᖅᑐᒥ ᐊᔾᔨᒌᓕᖅᑎᑕᐅᓇᓱᐊᕐᓂᐅᔪᒥ ᐊᑐᐊᒐᓂ ᐊᒻᒪ ᐃᒃᓯᕋᕐᔪᐊᓂ ᓄᓇᓕᖕᓄᐊᖅᑐᓄᑦ ᐊᒻᒪ ᓱᕋᑦᑎᕆᓪᓗᑎᒃ ᐃᓕᖅᑯᓯᑦᑎᓐᓂ ᐊᒻᒪ ᐃᓅᓯᕆᓚᐅᖅᐸᒃᑕᑦᑎᓐᓂ,” ᐅᖃᓚᐅᖅᐳᖅ.

“ᒫᓐᓇ ᐃᓱᒪᓂᖃᑦᑎᐊᙱᓚᖅ [ᐊᖑᑕᐅᖃᑎᒥᓂ ᐊᕐᓇᐅᖃᑎᒥᓂ ᐊᐃᑉᐸᖃᖅᐸᒃᑐᓄᑦ] ᐱᐅᙱᓐᓂᖓᓂ.”

ᒪᒃᑯᒃᑐᓄᑦ ᐊᖑᑕᐅᖃᑎᒥᓂ ᐊᕐᓇᐅᖃᑎᒥᓂ ᐊᐃᑉᐸᖃᖅᐸᒃᑐᓄᑦ ᐃᓄᖕᓄᑦ ᓄᓇᖃᖅᑐᓂ ᐃᓄᑭᑦᑐᓂ ᓄᓇᓕᖕᓂ, ᐊᔪᕐᓇᓗᐊᕈᓐᓇᖅᐳᖅ ᐆᒪᓇᓱᐊᕐᓂᕐᒥ ᒪᑐᐃᖓᓗᓂ, ᐅᖃᓚᐅᖅᐳᖅ, “ᑐᓴᐅᒪᓴᕋᐃᒻᒪᑕ ᐊᒃᓱᕈᕈᕋᓗᐊᖅᖢᓂ ᐊᑦᑕᓇᔾᔭᐃᖅᓯᒪᓇᓱᐊᕐᓂᕐᒥ.”

“ᖁᔭᓕᕐᔪᐊᖅᐳᖓ ᐊᒥᓱᓂ ᐃᓄᒃᑕᖃᕐᓂᖓᓂ ᐅᕙᓂ ᐃᒃᓯᕚᖅᑐᓂ ᑲᑉᐱᐊᑦᑕᐃᑦᑑᓪᓗᑎᒃ ᐃᓚᒋᔭᐅᓂᖏᓐᓂ ᑲᑎᒪᓂᐅᔪᒥ ᐆᑐᓇᖅᑐᑦ, ᐅᑎᕐᓂᐊᕋᓗᐊᖅᑎᓪᓗᒋᑦ ᐊᖏᕐᕋᒥᓄᑦ ᐊᒻᒪ ᐊᑲᕆᔭᐅᙱᑐᐃᓐᓇᕆᐊᖃᖅᖢᑎᒃ ᐊᖓᔪᖅᑳᖏᓐᓂ ᐅᕝᕙᓘᓐᓃᑦ ᐃᓚᖏᓐᓂ ᐋᓪᓚᓂᓪᓘᓐᓃᑦ,” ᑯᒪᒃᓯᐅᑎᒃᓴᖅ ᐅᖃᓚᐅᖅᐳᖅ.

“ᓂᕆᐅᒃᐳᒍᑦ ᑲᑎᙵᓂᐅᔪᖅ ᐃᓚᐅᖃᑕᐅᓚᐅᖅᑐᓂ ᐱᓇᓱᐊᕈᓯᐅᓚᐅᖅᑐᒥ ᓂᓪᓕᕆᐊᒃᑲᓐᓂᕐᓂᐊᕐᓂᖏᓐᓂ ᓂᐱᑦᑎᓐᓂ ᐊᒻᒪ ᓄᓇᓕᐅᓗᑎᒃ ᓂᐱᖃᙱᑦᑐᓄᑦ.”

ᐊᑐᖅᖢᓂ ᓂᐱᖓᓂ ᐃᑲᔪᖅᓱᐃᓂᕐᒥ ᐊᓯᖏᓐᓂ ᐃᓄᖕᓂ ᐱᓕᕆᓂᖓᒍᑦ ᑐᙵᓱᒋᒻᒥ ᑐᕌᖅᑎᑦᑎᓂᖃᓚᐅᖅᐳᖅ ᐊᑦᑎᖅᑕᐅᓂᖓᓂ ᑕᒪᑐᒪᓂ ᐊᕐᕌᒎᔪᒥ ᐸᐅᒃᑑᑎᑦ ᐃᓄᖕᓄᑦ ᐊᕐᓇᓄᑦ ᑲᓇᑕᒥ ᐃᓅᓪᓗᓂ ᐊᕐᓇᐅᓂᖓᓂ ᐊᕐᕌᒍᒥ.

“ᐅᐱᓐᓇᖅᐳᖅ ᑐᓂᔭᐅᓂᖓᓂ ᑕᐃᔅᓱᒥᖓ ᑕᐃᒎᓯᐅᔪᒥ, ᑭᓯᐊᓂ ᐊᑕᐅᑦᑎᒃᑯᑦ, ᐃᒃᐱᒍᓱᖕᓇᕆᕙᕋ ᐊᒃᓱᕈᒃᑲᓐᓂᕐᓗᖓ ᐱᓕᕆᔭᕆᐊᖃᕐᓂᓐᓂ,” ᐅᖃᓚᐅᖅᐳᖅ.

ᐱᕕᒃᓴᖃᕐᔪᐊᕐᓂᐊᖅᐳᖅ ᑯᒪᒃᓯᐅᑎᒃᓴᒧᑦ ᐊᒃᓱᕈᕐᓗᓂ ᐱᓕᕆᓂᕐᒧᑦ ᑐᙵᓱᒋᒻᒥ ᑎᑭᑉᐸᓪᓕᐊᔪᓂ ᐊᕐᕌᒍᓂ ᐊᖏᒡᓕᕙᓪᓕᐊᑎᓪᓗᒍ.

2023 ᓄᙳᐊᓂ, ᑲᑐᔾᔨᖃᑎᒌᖑᔪᖅ ᒪᕐᕈᐃᓪᓗᐊᖅᑐᒥ ᐊᖏᒡᓕᒋᐊᕐᓂᐊᖅᐳᖅ ᒫᓐᓇᐅᔪᒥ ᐃᖅᑲᓇᐃᔭᖅᑎᖏᓐᓂ 23−ᓂ 50−ᑲᓴᖕᓄᑦ ᐊᒻᒪ ᓅᓐᓂᐊᖅᐳᖅ ᑎᑎᕋᕐᕕᖓᓐᓂ ᒫᓐᓇᐅᔪᒥ 1,200-ᑭᑉᐹᕆᒃᑐᒥ-ᐃᓯᒐᓪᓗᐊᓂ ᐃᓂᐅᔪᒥ 17,000-ᑭᑉᐹᕆᒃᑐᒥ-ᐃᓯᒐᓪᓗᐊᓂ ᐃᒡᓗᕐᔪᐊᒧᑦ, ᐅᖃᓚᐅᖅᐳᖅ.

ᐊᓯᖏᓐᓂ ᐱᓕᕆᐊᒃᓴᐅᔪᓂ ᐃᓚᖃᖅᐳᖅ ᐊᖏᒡᓕᒋᐊᖅᑐᒥ ᐱᓕᕆᐊᖑᔪᒥ ᐃᓄᖕᓄᑦ ᓱᕈᓯᕐᓄᑦ ᐃᓕᑦᑎᓂᖏᓐᓂ ᐱᖅᑯᓯᑐᖃᖅᑎᒍᑦ ᐅᖃᐅᓯᖓᓐᓂ, ᐊᕐᓇᓄᑦ ᕿᒫᕕᖕᒥ, ᐃᓄᖕᓄᑦ ᐃᒡᓗᖃᖅᑎᑕᐅᓂᖏᓐᓂ ᐱᓕᕆᐊᖑᔪᒥ ᐊᒻᒪ ᐱᓕᕆᖃᑎᖃᕐᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᐅᔪᒥ ᑲᓇᑕᒥ ᐃᑲᔪᖅᓱᐃᑦᑎᐊᒃᑲᓐᓂᕐᓂᕐᒧᑦ 17,000−ᐸᓗᖕᓂ ᐃᓄᖕᓄᑦ ᐊᐅᓪᓛᖅᐸᒃᑐᓂ ᐅᐃᓂᐱᐊᒡᒧᑦ ᐊᕐᕌᒍᑕᒫᒥ ᐃᓅᓕᓴᖅᑕᐅᔭᖅᑐᕐᓗᑎᒃ.

ᑯᒪᒃᓯᐅᑎᒃᓴᖅ ᐸᕐᓇᒃᑭᕗᖅ ᓴᓇᓂᕐᒥ ᐊᑑᑎᖃᑦᑎᐊᒃᑲᓐᓂᖅᑐᒥ ᑲᑎᖅᓱᖅᑕᐅᓯᒪᔪᓂ ᑎᑎᕋᖅᓯᒪᔪᓂ ᖃᓪᓗᓈᑦ ᓄᓇᖓᓐᓂ ᐃᓄᖕᓄᑦ ᐅᐃᓂᐱᐊᒡᒥ. ᐅᓄᕐᓂᖅᓴᐅᔪᒥ 500−ᓂ ᐃᓄᖕᓂ ᑎᑎᕋᖅᓯᒪᔪᓂ ᑐᙵᓱᒋᒃᑯᑦ ᐃᓚᒋᔭᐅᔪᓂ ᑲᑎᖅᓱᖅᑕᐅᓯᒪᔪᓂ ᑎᑎᕋᖅᓯᒪᔪᓂ, ᑭᓯᐊᓂ ᐅᖃᓚᐅᖅᐳᖅ ᐃᓱᒪᓂᖃᑦᑎᐊᙱᓚᖅ ᖃᔅᓯᓂ ᐃᓄᖕᓂ ᓄᓇᖃᓪᓚᕆᖕᓂᖏᓐᓂ ᓄᓇᓕᐸᐅᔭᒥ.

ᑭᓪᓕᓯᓂᐊᖅᑎᓂ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᑲᑎᖅᓱᖅᑕᐅᓯᒪᔪᓂ ᑭᓪᓕᓯᓂᐊᖅᑎᒃᑯᑦ ᑲᓇᑕᒥ “ᐱᓕᕆᔾᔪᓯᐅᙱᓚᖅ ᐱᓕᕆᑦᑎᐊᖅᑐᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ,” ᐅᖃᓚᐅᖅᐳᖅ.

“ᑭᒃᑯᓕᒫᑦ ᐅᒃᐱᕈᓱᖕᓂᖃᙱᓚᑦ ᒐᕙᒪᐅᔪᒥ ᓇᖕᒥᓂᖅ ᑐᓴᒐᒃᓴᖏᓐᓂ; ᑭᒃᑯᓕᒫᑦ ᖃᐅᔨᒪᙱᓚᑦ ᐱᒻᒪᕆᐅᓂᖓᓂ ᐱᓯᒪᓂᕐᒥ ᑕᐃᒃᑯᓂᖓ ᑕᑕᑎᕆᐊᓕᖕᓂ.”

ᐸᕐᓇᐅᑎ ᑲᑎᖅᓱᐃᓂᕐᒥ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᓇᓚᐅᑦᑎᐊᖅᑐᒥ ᑕᑯᒃᓴᐅᑎᑦᑎᔪᒥ ᐅᓄᕐᓂᐅᔪᓂ ᐃᓄᖕᓂ ᓄᓇᓕᐸᐅᔭᒥ ᐊᒻᒪ ᐊᑐᖅᐸᒃᑐᓂ ᑐᓴᒐᒃᓴᓂ ᐊᑐᐃᓐᓇᖃᕐᓂᕐᒧᑦ ᑮᓇᐅᔭᖃᖅᑎᑕᐅᒃᑲᓐᓂᕐᓂᐅᔪᒧᑦ ᐱᔨᑦᑎᕋᕐᓂᕐᒧᑦ ᐊᒻᒪ ᐃᑲᔪᕈᑎᒃᓴᓄᑦ.

“ᐃᓅᓯᓕᒫᓐᓂ ᓂᐱᖏᖅᑎᑕᐅᓯᒪᕗᖓ. ᓂᐱᖃᓚᐅᙱᓚᖓ ᓱᕈᓯᑐᐃᓐᓇᐅᒐᒪ ᐸᖅᑭᔭᐅᓪᓗᖓ ᐅᕝᕙᓘᓐᓃᑦ ᓄᓇᖃᖅᑳᖅᓯᒪᔪᒥ ᐃᓅᕗᖓ ᐊᖅᑯᑎᒥᐅᑕᐅᓪᓗᖓ,” ᐅᖃᓚᐅᖅᐳᖅ.

“ᐱᕋᔭᒃᑕᐅᕙᓪᓕᐊᑎᓪᓗᒋᑦ ᐃᓄᐃᑦ, ᐃᑲᔪᖅᓱᐃᓂᖅᓴᐅᓂᐊᖅᐳᖓ ᑕᐃᒃᑯᓄᖓ.”