ᔩᓐ ᐋᒐᔅᑏᓐ ᐱᒋᐊᕆᐊᖅᑎᑦᑎᕗᖅ ᕿᕐᓂᕐᑕᑦ ᑕᕿᖓᓂᒃ ᐃᖃᓗᖕᓂᑦ

ᔩᓐ ᐋᒐᔅᑏᓐ, ᑲᓇᑕᒥ ᓯᕗᓕᖅᐹᖅ ᕿᕐᓂᕐᑕᖅ ᐊᕐᓇᖅ ᓂᕈᐊᖅᑕᐅᓂᑯ ᕼᐊᐅᔅ ᐊᕝ ᑳᒪᓐᔅᓄᑦ, ᐃᖃᓗᐃᑦ ᐅᓇᑕᖅᑐᒃᓴᙳᐊᑦ ᐃᒡᓗᖓᓂ ᑕᓪᓕᒻᒥᐅᓚᐅᕐᑑᑉ ᐅᓐᓄᖓᓂᒃ, ᓄᓇᓕᐸᐅᔭᐃᑦ ᐱᒋᐊᓕᖅᑎᑦᑎᑎᓪᓗᒋᑦ ᕿᕐᓂᕐᑕᑦ ᐊᑐᕐᓂᑯᕕᓂᖏᓐᓄᑦ ᑕᕿᒥᒃ.ᖁᕕᐊᓲᑎᖃᕐᓂᖅ, ᑐᙵᓲᑎᐅᔪᖅ ᓄᓇᕗᒥᑦ ᕿᕐᓂᕐᑕᑦ ᐊᑐᕐᓂᑯᕕᓂᖏᓐᓄᑦ ᑲᑐᔾᔨᖃᑎᒌᓄᑦ, ᐱᒋᐊᕈᑎᖃᓚᐅᕐᐳᑦ ᖃᓄᐃᓕᐅᕈᓘᔭᖅᑎᑦᑎᓪᓗᑎᒃ ᐃᖃᓗᖕᓂ ᖁᕕᐊᓲᑎᖃᖅᖢᑎᒃ ᖃᓄᐃᓕᐅᕈᑎᕕᓂᕐᓂᒃ ᑲᓇᑕᒥ ᕿᕐᓂᕐᑕᐃᑦ ᖃᓄᐃᓕᐅᕐᐸᓪᓕᐊᓂᒃᒧᑦ ᐊᒻᒪ–ᒫᓐᓇ ᐊᔾᔨᐅᙱᑎᑦᑎᓂᐅᕙᒃᑎᓪᓗᒍ.

ᐋᒐᔅᑏᓐ ᐅᖃᐅᓯᖃᕐᓂᕐᓴᐅᓚᐅᕐᑐᖅ ᐱᒻᒪᕆᐅᓂᖓᓂᒃ “ᖁᕕᐊᓲᑎᖃᕐᓂᕐᒥᑦ ᕿᕐᓂᕐᑕᓂᒃ ᑲᓇᑕᒥ ᐊᔾᔨᒌᙱᑦᑑᑎᐅᓂᒃᑯᑦ,” ᐅᖃᓪᓚᓚᐅᕐᒥᔪᖅ ᐊᔾᔨᐸᓗᐊᓂᒃ ᐊᒃᓱᕈᑎᖃᕐᓯᒪᓂᖏᓐᓂᒃ ᕿᕐᓂᕐᑕᑦ-ᑲᓇᑕᒥᐅᑦ ᓄᓇᓕᖏᓐᓂᒃ ᐊᒻᒪ ᐃᓄᖕᓂᒃ.

ᐊᒻᒪᓗ, ᐅᐸᒍᑎᓯᒪᔪᓂᒡᓗ ᓴᖏᓂᕐᓴᐅᖁᔨᓪᓗᓂ ᐊᔾᔨᒌᙱᑎᑦᑎᓂᕐᒥᒃ ᐱᓕᕆᐊᖑᓯᒪᐃᓐᓇᐅᔭᖅᑐᒥᑦ ᓄᓇᓕᖃᑎᒌᒃᑎᑕᐅᓕᕐᓂᒃᑯᑦ.

“ᐅᖃᐅᓯᖃᓕᕌᖓᑦᑕ ᕿᕐᓂᕐᑕᑦ ᖃᓄᐃᓕᐅᕈᓯᕕᓂᖏᓐᓂᒃ, ᐅᖃᐅᓯᖃᖅᐳᒍᑦ ᑲᓇᑕᐅᑉ ᖃᓄᐃᓕᐅᕈᓯᕕᓂᐊᓂᒃ,” ᐅᖃᖅᑐᖅ, ᑕᑖᑲᓴᑦᑎᐊᖅᑐᒧᑦ ᐃᒡᓗᕈᓯᕐᒦᑦᑐᓂᒃ ᐃᓚᖃᖅᖢᑎᒃ ᐱᖓᓱᓂᒃ ᒪᓕᒐᓕᐅᕐᑎᓂᒃ, ᓄᓇᕗᑦ ᑲᒥᓯᓇᖓᓂᒃ ᐊᒻᒪ ᐃᖃᓗᐃᑦ ᒪᐃᔭᖓᓂᒃ.

ᕿᕐᓂᕐᑕᑦ ᖃᓄᐃᓕᐅᕈᓯᕕᓂᖏᓐᓄᑦ ᐃᑲᔪᖅᑐᐃᔨᒻᒪᕆᒃ

ᕿᕐᓂᕐᑕᓂᒃ ᑲᓇᑕᒥᐅᑕᖃᓕᕐᓯᒪᖕᒪᑦ 1604-ᒥᑦ ᐱᒋᐊᖅᖢᓂ, ᐅᓇ ᒫᑎᐅ ᑕᑳᔅᑕ ᐅᒥᐊᕐᔪᐊᒧᑦ ᖃᐅᔨᓴᖅᑎᐅᑎᓪᓗᒍ ᐆᒧᖓ ᓵᒥᐅᓪ ᑎ ᓴᒻᐸᓚᐃᓐᓄᑦ, ᐅᖃᖅᑐᖅ ᐋᒐᔅᑏᓐ.

ᐆᑐᓇᖅ ᑕᑳᔅᑕᑐᑦ, ᐋᒐᔅᑏᓐ ᐃᓚᒋᔭᐅᓯᒪᒻᒪᕆᒃᐳᖅ ᑲᓇᑕᒥ ᕿᕐᓂᕐᑕᐃᑦ ᐊᑐᕐᓂᑯᕕᓂᖏᓐᓄᑦ, ᐊᒻᒪᓗ ᐱᔾᔪᑎᐅᓪᓗᓂ ᑲᓇᑕᒥ ᐃᓕᓐᓂᐊᖅᑎᑦᑎᔨᐅᔪᑦ ᑕᒪᑐᒥᖓ ᐃᓕᓐᓂᐊᖅᑎᑦᑎᕙᒃᐳᑦ ᐊᒃᓱᓪᓘᓐᓃᑦ ᑕᕿᒥᑦ ᐊᕐᕌᒍᒥᑦ.

ᑲᒪᒋᔭᖃᖅᓚᐅᕐᓯᒪᔪᖅ ᑎᓕᐅᕆᓂᕐᒥᒃ ᑲᓇᑕᒥ ᒪᓕᒐᓕᕆᔨᕐᔪᐊᓂᒃ ᕕᕝᕗᐊᕆ ᐃᓕᓴᕆᔭᐅᕝᕕᐅᓂᐊᕐᓗᓂ ᕿᕐᓂᕐᑕᑦ ᖃᓄᐃᓕᐅᕈᓯᕕᓂᖏᓐᓄᑦ 1995-ᒥᑦ.

ᐋᒐᔅᑏᓐ ᓂᕈᐊᖅᑕᐅᓚᐅᕐᓯᒪᔪᖅ 1993-ᒥᑦ ᐊᒻᒪ ᒪᓕᒐᓕᕆᕕᒡᔪᐊᒦᖃᑕᐅᓪᓗᓂ ᑎᑭᖢᒍ 2006. ᓯᕗᓂᐊᓂᒡᓕ ᒪᕐᕈᑐᐃᓐᓈᒃ ᕿᕐᓂᕐᑖᒃ ᐊᖑᑏ ᒪᓕᒐᓕᕆᕕᒡᔪᐊᕐᒦᖃᑕᐅᓯᒪᔪᑦ.

ᑕᒪᓐᓇᐅᒐᓗᐊᕐᑎᓪᓗᒍ, ᐋᒐᔅᑏᓐ ᒪᓕᒐᓕᕆᕕᒡᓗᐊᕐᒥ ᑎᑎᕋᖅᑎᐅᓚᐅᕐᓯᒪᔪᖅ ᑲᓇᑕᐅᑉ ᐊᖓᔪᖅᑳᖓᓄᑦ, ᒥᓂᔅᑕᐅᓪᓗᓂ ᐃᓕᖁᓯᖃᑎᒌᙱᓐᓂᕐᒧᑦ ᐊᒻᒪ ᐊᕐᓇᓄᑦ ᑐᕌᖓᔪᓄᑦ, ᐊᒻᒪᓗ ᒪᓕᒐᓕᕆᕕᒃᒥᑦ ᐅᖃᖅᑎᒧᑦ ᑐᒡᓕᕆᔭᐅᓪᓗᓂ. ᐊᔾᔨᒌᒃᑎᑦᑎᓂᕐᒧᑦ ᑲᒥᓯᓇᐅᓚᐅᕐᓯᒪᔪᖅ ᓯᕗᓪᓕᖅᐹᖑᓪᓗᓂ, ᑲᒪᒋᔭᖃᖅᖢᓂ ᐊᔾᔨᒌᒃᑎᑦᑎᕙᖕᓂᕐᒥᒃ ᐊᒻᒪ ᓴᕿᔮᖅᑐᒃᑯᑦ ᐱᓕᕆᐊᖃᕐᓂᕐᒥᒃ.

ᐋᒐᔅᑏᓐ ᐃᓕᓴᕆᔭᐅᔾᔪᑎᓂᒃ ᑐᓂᔭᐅᓯᒪᔪᖅ ᒪᓕᒐᓕᕆᓂᕐᒥᒃ ᐱᓕᕆᐊᖃᕐᓯᒪᓂᖓᓂᒃ ᒪᓕᒐᓕᕆᓂᒃᑯ ᐊᒻᒪ ᐱᖁᔭᓕᕆᓂᒃᑯᑦ ᒪᓕᒐᓕᕆᓂᕐᒥᒃ.

ᐊᒻᒪᓗ, ᓄᓇᓕᐸᐅᔭᓂᒃ ᕿᑲᐅᔭᕐᕕᒃᒥ, ᐃᓕᓐᓂᐊᕐᕕᐊᓗᒃ ᐊᒻᒪ ᐊᕐᓇᓄᑦ ᐃᓕᓐᓂᐊᕐᕕᒃ ᐊᑎᖃᖅᑎᑕᐅᖕᒥᔪᑦ ᑖᔅᓱᒥᖓ.

10-ᒥᓂᓪᓗᐊᓂ ᓯᑕᕙᓂ ᐳᓈᑦ ᓄᓇᕗᒥᑦ ᕿᕐᓂᕐᑕᑦ ᖃᓄᐃᓕᐅᕈᓯᕕᓂᖏᓐᓄᑦ ᑲᑐᔾᔨᖃᑎᒌᓂᙶᖅᑐᖅ ᑖᔅᓱᒥᖓ ᐅᖃᐅᓯᖃᓚᐅᕐᑐᖅ ᖃᓄᐃᓕᐅᕈᓯᕕᓂᖏᑦ ᐅᖃᐅᓯᕆᓪᓗᓂᒋᑦ.

ᐋᒐᔅᑏᓐ ᐱᓇᓱᐊᖅᑎᓪᓗᒍ ᑲᓇᑕ ᐃᓕᓴᖅᓯᓯᒪᔭᕆᐊᖃᕐᓂᕐᒥᒃ ᑕᕿᒥᒃ ᑐᕌᖓᓗᓂ ᕿᕐᓂᕐᑕᑦ ᖃᓄᐃᓕᐅᕈᓯᕕᓂᖏᓐᓂᒃ, ᐃᑲᔪᖅᑕᐅᔭᕆᐊᖃᓚᐅᕐᓯᒪᔪᖅ 300 ᐅᖓᑖᓂᒃ ᐃᓄᖕᓂᒃ.

ᑕᐃᔅᓱᒪᓂᓕ, ᐅᖃᓚᐅᕐᑐᖅ ᑕᓪᓕᕐᒥᐅᑉ ᐅᓐᓄᖓᓂᒃ, ᐊᐱᕆᔭᐅᓚᐅᕐᓯᒪᔪᖅ, “ᑕᐃᒪᓕ ᖃᐅᓪᓗᖅᑐᑦ ᐊᑐᕐᑕᕕᓂᖏᓐᓄᑦ ᑕᕿᕐᑕᖃᕐᓂᐊᕆᕚ?”

“ᐅᕙᒍᑦ ᓄᓇᑐᖃᕆᙱᑕᑦᑎᓐᓂᒃ ᓄᓇᖃᓕᖅᑎᑕᐅᓂᕐᑎᒍᑦ ᐊᒻᒪᓗ ᐅᕙᒍᑦ ᓄᓇᖃᑎᒌᓕᖅᑎᑕᐅᓂᑯᑎᒍᑦ ᐊᑐᕐᓯᒪᒐᑦᑎᒍᑦ, ᑕᐃᒪᓐᓇᑦᑕᐃᓐᓇ ᐊᑐᕐᓯᒪᕗᒍᑦ,” ᐋᒐᔅᑏᓐ ᐅᖃᖅᑐᖅ.

ᐊᔾᔨᒌᙱᑦᑐᓂᒃ ᐃᓕᖁᓯᖃᕐᓂᕐᒧᑦ ᓄᓇᓕᖕᓂ ᖃᓄᐃᓕᐅᕈᓯᖅ

ᐅᓐᓄᒃ ᐱᒋᐊᓚᐅᕐᑐᖅ ᖁᓪᓕᕐᒥ ᐃᑯᒻᒪᒃᓯᓪᓗᓂ ᐅᕉᑕ ᐅᖔᓛᖅ, ᑖᓐᓇᓗ ᖁᓪᓕᐅᑉ ᐃᓕᖁᓯᐊᓂᒃ ᐅᓂᒃᑳᖅᖢᓂ. ᑭᖑᓂᐊᒍᑦ ᕿᓚᐅᑎᓄᑦ ᓱᒃᑲᓕᓪᓗᓂ ᕿᓚᐅᔾᔭᓚᐅᑲᒃᖢᓂ ᑲᓚᐃᑕᓐ ᒍᕆᕝᔅ ᐊᒻᒪᓗ ᐃᖃᓗᐃᑦ ᐊᔪᕆᕐᓱᐃᔨᖓ ᑎᒻ ᓚᕗᐊᓪ ᑐᒃᓯᐊᖅᖢᓂ.

ᓇᐃᑦᑐᒥᒃ ᑕᕐᕆᔭᓚᐅᑲᒃᖢᑎᒃ ᕿᕐᓂᕐᑕᑦ ᖃᓄᐃᓕᐅᕈᓯᕕᓂᖏᓐᓂᒃ ᑲᓇᑕᒥ ᐅᑯᓇᙵᑦ ᐋᕿᒃᑕᐅᔪᒥᑦ ᐃᖃᓗᖕᓂᑦ ᑕᕐᕆᔭᒐᒃᓴᓕᐅᖅᑎᓄᑦ ᔭᓯᓐᑐ ᐋᓐᑐᕋᐃᑦ ᒫᑭ ᐊᒻᒪ ᐊᐃᐳᕋᕼᐊᒻ ᓲᓕᒪᓐ.

ᒍᕇᕝᔅ ᐊᒻᒪ ᐱᙳᐊᓚᐅᑲᒃᖢᓂ ᖃᓄᐃᓕᐅᓕᓵᖅᑎᓪᓗᒋᑦ, ᐃᒪᓐᓇ ᐃᒪᕐᒥ ᑯᕕᓯᕙᒃᖢᓂ ᐱᕈᕐᓯᐊᒧᑦ ᐃᓄᖕᓂ ᖁᙱᐊᖅᑐᓂᒃ ᓯᕗᕚᖏᑦᑕ ᐊᑎᖏᓐᓂᒃ ᑕᐃᓯᔪᖃᕌᖓᑦ.

“ᖁᔭᒋᕙᕗᑦ ᓯᕗᕚᕆᔭᐅᔪᑦ ᖃᐅᔨᒪᙱᑕᕗᑦ ᐊᑎᖏᒍᑦ, ᑭᓯᐊᓂᓕ ᐊᔪᕐᓇᙱᑎᑦᑎᖕᒪᑕ ᑕᕝᕙᓃᒍᓐᓇᕐᓂᕐᒥᒃ ᓄᓇᓕᖕᓂᑦ, ᐅᕙᓂ, ᖁᕕᐅᓲᑎᖃᕐᑎᓪᓗᑕ,” ᐅᖃᖅᑐᖅ ᒍᕇᕝᔅ ᐅᖃᖅᑐᖅ.

“ᖁᔭᓐᓇᒦᕐᐳᒍᑦ, ᐃᒥᕆᑦᑎ ᐃᒥᕈᓱᒍᓐᓃᕐᓗᓯ.”

ᑭᓇᑐᐃᓐᓇᒥᒃ ᐅᖃᖁᔨᓕᕐᑎᓪᓗᖑ ᖁᙱᐊᖅᑐᓂᒃ ᓯᕗᕚᖓᓂᒃ ᑕᐃᓯᔪᒪᔪᒥᑦ ᖁᕕᐊᓱᒃᑲᔭᖅᑐᒥᒃ ᑕᐃᒪᓐᓇ ᖁᕕᐊᓲᑎᖃᕐᓂᕐᒥᒃ, 15 ᐃᓄᐃᑦ ᑐᕐᖢᓚᕐᐳᑦ ᐊᑎᕐᓂᒃ ᐊᔾᔨᒌᙱᑦᑐᓂᙶᖅᑐᓂᒃ ᓄᓇᓂ.

ᐊᑐᓂ ᐊᑎᕐᓄᑦ, ᐱᕈᕐᓯᐊᖅ ᐃᒻᒥᖅᐸᒃᖢᓂᐅᒃ.

ᐊᔾᔨᒌᒃᑐᓂᑦ ᑐᑭᓯᐅᒪᖃᑎᒌᖕᓂᖅ

ᑕᐃᕕᑎ ᔪᐊᓇᓯ, ᓄᓇᕗᑦ ᐃᓕᖁᓯᓕᕆᔨᒃᑯᑦ ᒥᓂᔅᑕᖓ, ᐱᒋᐊᓕᖅᑎᓪᓗᒋᑦ ᐅᖃᓪᓚᒃᑎᐅᓚᐅᕐᐳᖅ, ᐅᖃᖅᖢᓂ ᐊᔾᔨᒌᙱᔾᔪᑎᐅᕙᒃᑐᑦ ᕿᕐᓂᕐᑕᐃᑦ ᓵᙵᕙᒃᑕᖏᑦ ᐊᒻᒪ ᐃᓄᖕᓄᑦ ᑕᐃᒪᓐᓇᑦᑕᐃᓐᓇᖅ ᐃᒃᐱᒋᔭᐅᔭᒃᐳᖅ.

“ᐃᓱᒪᔪᖓᓕ ᐊᔾᔨᒌᓂᒃ ᑐᑭᓯᐅᒪᓂᕐᒥ,” ᔪᐊᓇᓯ ᐅᖃᖅᑐᖅ.

“ᖃᐅᔨᒪᙱᑦᑐᒃᓴᐅᔪᓯ, ᑭᓯᐊᓂᓕ ᓯᕗᓕᐅᕐᑎᐅᔪᑦ ᐱᕙᓪᓕᐊᑎᑦᑎᓂᕐᒥᒃ ᓄᓇᕗᒥᑦ ᓄᓇᑖᕈᑎᓂᒃ ᐊᖏᕈᑏᑦ ᐱᒋᐊᕈᑎᖃᓕᓚᐅᕐᓯᒪᔪᑦ ᐊᔾᔨᒌᒃᑎᑦᑎᓂᒃᑯᑦ ᐱᔪᓐᓇᐅᑎᖃᕐᓂᕐᒧᑦ ᐱᒋᐊᕈᑎᕕᓂᕐᓂᒃ.”

ᐊᒻᒪᒃᑲᓐᓂᖅ, ᐃᖃᓗᐃᑦ ᒪᐃᔭᖓ ᒪᑎᓚᐃᓐ ᐅᕆᐊᑦᕗᓐ ᐅᖃᓪᓚᓚᐅᕐᑐᖅ ᐱᒻᒪᕆᐅᓂᖓᓂᒃ ᖁᕕᐊᓲᑎᖃᕐᓂᕐᒥᒃ ᕿᓂᕐᑕᐃᑦ ᐃᑲᔪᕈᑎᕕᓂᖏᓐᓂᒃ.

“ᐊᕐᕌᒍᑦ ᐊᒥᓲᓗᐊᙱᑦᑐᖅ ᐊᓂᒍᕐᓯᒪᓕᕐᑐᑦ ᐊᐱᕆᔭᐅᓚᕐᓯᒪᓪᓗᖓ ᐊᔾᔨᐸᓗᐊᓂᒃ ᑐᙵᓱᒃᑎᑦᑎᔨᐅᖁᔭᐅᓪᓗᖓ, ᐅᔾᔨᕆᓚᐅᕐᓯᒪᙱᓐᓇᒪᑕ ᕿᕐᓂᖅᑕᐃᑦ ᓄᓇᑦᑎᓐᓂᑦ ᐊᒥᓱᙳᕐᓯᒪᓕᕐᓂᖏᓐᓂᒃ ᕿᓚᒥᐊᓗᒃ,” ᐅᕆᐊᑦᕗᓐ ᐅᖃᖅᑐᖅ.

“ᐅᔾᔨᕆᓕᕋᒪ ᕿᕐᓂᕐᑕᐃᑦ ᐃᖃᓗᖕᓂ ᐅᓂᕐᓯᕚᓪᓕᕐᓂᖏᓐᓂᒃ ᒫᙵᑦ ᖁᓕᑦ ᐅᖓᑎᑦᑎᐊᖓᓂᑦ, 50-ᓄᑦ, ᒪᐅᖓᓗ 250 ᐊᕐᕌᒍᓂ ᐅᓄᙱᑦᑐᓂᒃ ᐅᐊᑲᓪᓚᕈᓘᓪᓗᓂ. ᐊᒻᒪᓗ ᖃᐅᔨᒪᓇᕐᓯᓪᓗᓂ ᐃᓄᐃᑦ ᑕᒪᐅᖓ ᑎᑭᑦᑐᒪᓂᖏᓐᓂᒃ.”

ᐅᖃᐅᓯᖃᓚᐅᕐᒥᔪᖅ ᐊᔾᔨᒌᐸᓗᖕᓂᒃ ᐊᒃᓱᕈᕈᑎᖃᕐᓯᒪᓂᖏᓐᓂᒃ ᐊᒻᒪ ᒫᓐᓇ ᐊᒃᓱᕉᑎᒋᔭᐅᔪᑦ ᑕᒪᐃᓐᓂ ᕿᕐᓂᕐᑕᓄᑦ ᐃᓄᖕᓄᓪᓗ ᐊᑐᕆᐊᖃᖃᑦᑕᖅᑕᖏᑦ.

“ᐊᔾᔨᒌᙱᑦᑑᑎᐅᓂᖅ ᐱᒻᒪᕆᐊᓘᔪᖅ ᓲᖃᐃᒻᒪ ᑲᑎᑦᑕᕌᖓᑦᑕ ᓴᙱᓂᕐᓴᐅᖃᑦᑕᕋᑦᑕ. ᐅᕙᑦᑎᓐᓂᑦ ᐃᓱᒪᒌᖃᑦᑕᐅᑎᑦᑎᐊᕈᓐᓇᕐᓯᒍᑦᑕ ᐊᒻᒪ ᐊᔾᔨᒌᙱᑎᑦᑎᓂᖅ ᓄᖃᖅᑎᑕᐅᒍᓂ, ᐃᓱᒪᒋᔭᖃᓕᕐᓯᒪᓂᓪᓗ, ᑕᐃᒪᓕ ᑐᑭᓯᔪᓐᓇᕋᔭᖅᑐᒍᑦ ᐱᖃᓐᓇᖃᕐᓂᑦᑎᓐᓂᒃ ᐊᒻᒪ ᐃᑲᔪᖅᑎᖃᕈᓐᓇᕐᓂᑦᑎᓐᓂᒃ ᐊᒻᒪᓗ ᐃᑲᔪᖅᑐᐃᔨᖃᕐᓂᑦᑎᓐᓂᒃ.”