ᔭᒦᑦ ᓯᖕ ᓂᕿᑦᑎᐊᕙᓕᕆᔨᒃᑯᑦ ᐅᑭᐅᕐᑕᖅᑐᕐᒥ ‘ᐋᖅᑭᒃᓱᖅᑕᐅᒃᑲᓐᓂᕆᐊᖃᕐᑐᖅ’ ᐃᖃᓗᖕᓃᑎᓪᓗᒍ ᐅᖃᓚᐅᕐᑐᖅ

For the English version of this story, see Jagmeet Singh calls for Nutrition North ‘overhaul’ during Iqaluit visit.

ᐃᖃᓗᖕᓂ ᐅᒃᑑᐱᕆ 20-ᐅᑎᓪᓗᒍ ᒐᕙᒪᑐᖃᒃᑯᑦ ᐊᓐᑏᐲᒃᑯᑦ ᓯᕗᓕᐅᖅᑎᖓ ᔭᒦᑦ ᓯᖕ ᐋᖅᑭᒃᓱᐃᒃᑲᓐᓂᕆᐊᖃᕐᓂᕋᐃᓚᐅᕐᑐᖅ ᓂᕿᑦᑎᐊᕙᓕᕆᔨᒃᑯᑦ ᐅᑭᐅᕐᑕᖅᑐᕐᒥᑦ, ᐅᖃᖅᖢᓂ ᓂᕿᑖᕕᐅᕙᒃᑐᑦ ᓂᐅᕕᕐᕖᑦ ᑮᓇᐅᔭᓂᒃ ᐱᑲᑕᑐᐃᓐᓇᕐᓂᕋᖅᖢᓂᒋᑦ.

ᓯᖕ ᓄᓇᕗᑦ ᐊᖓᔪᖅᑳᖃᕐᕕᐊᓃᓚᐅᕐᑐᖅ ᓯᕗᓪᓕᖅᐹᒥ 2021-ᒥ ᑕᐃᑲᓃᓚᐅᕐᓯᒪᓪᓗᓂ, ᐱᖃᑎᖃᖅᖢᓂ ᐊᓐᑏᐲᒃᑯᓐᓄᑦ ᒪᓕᒐᓕᐅᖅᑎᒥ ᓄᓇᕗᒧᑦ ᓘᕆ ᐃᓪᓚᐅᖅᒥ ᓄᓇᓕᖕᓄᐊᖅᑎᓪᓗᒍ. ᓄᓕᐊᖓᓂ ᐱᖃᑎᖃᓚᐅᕐᑐᖅ ᒍᑭᐅᕋᓐ ᑲᐅᕐᒥ, ᐊᒻᒪ ᐸᓂᖓᓂᒃ ᐊᕐᕌᒍᖃᓕᖅᑐᒥᒃ.

ᑐᓴᒐᒃᓴᓕᐅᕐᓇᒧᑦ ᑲᑎᒪᑎᓪᓗᒋ ᓯᖕ ᐅᖃᓚᐅᕐᑐᖅ ᓂᕿᑦᑎᐊᕙᓕᕆᔨᒃᑯᑦ ᐅᑭᐅᕐᑕᖅᑐᕐᒥ (Nutrition North) — ᒐᕙᒪᑐᖃᒃᑯᑦ ᐃᑲᔫᑎᖓ ᐊᑭᒃᖠᒋᐊᕈᑎᐅᓇᓱᒃᖢᓂ ᓂᕿᑦᑎᐊᕙᖕᓂ ᐅᑭᐅᕐᑕᖅᑐᕐᒥ — ᓱᕋᒃᓯᒪᓂᕋᖅᖢᓂᐅᒃ ᓲᖃᐃᒻᒪ ᓂᐅᕕᖅᐸᒃᑐᑦ ᐊᑭᒃᖠᒋᐊᖅᑐᓂ ᑕᑯᕙᙱᒻᒪᑕ.

“ᒐᕙᒪᑐᖃᒃᑯᑦ ᐃᑲᔫᑎᖓ ᓂᐅᕕᕐᕕᖃᖅᑐᒧᐊᖃᑦᑕᕐᒪᑦ, ᓂᐅᕕᕐᕕᒃᒧᐊᖅᖢᓂᓗ, ᐊᒻᒪᓗ ᓂᕿᑖᕐᕕᒃ ᐃᓱᒪᒋᔭᐅᓪᓗᓂ ᐊᑭᒃᖠᒋᐊᖅᑎᑦᑎᓇᔭᕐᓂᖏᓐᓂᒃ ᑭᓯᐊᓂᓕ ᑕᐃᒪᐃᓕᐅᙱᒻᒪᑕ,” ᓯᖕ ᐅᖃᕐᑐᖅ.

“ᐊᑭᖏ ᖁᑦᑎᓗᐊᖅᑐᐊᓘᖕᒪᑕ ᑕᐃᒪᓕ ᓂᕿᑦᑎᐊᕙᓕᕆᔨᒃᑯᑦ ᐅᑭᐅᕐᑕᖅᑐᕐᒥ ᐃᓚᒌᓄᑦ ᐊᑐᖅᑕᐅᔪᓐᓃᖅᐸᒃᖢᑎᒃ, ᐃᓄᕐᓄᐊᕈᓐᓃᖅᖢᑎᒃ ᐱᔭᕆᐊᖃᓪᓚᕆᒃᑐᓄᑦ.”

ᐊᐱᕐᓱᖅᑕᐅᑎᓪᓗᒍ ᓯᖕ ᐅᖃᒻᒪᕆᓚᐅᙱᑦᑐᖅ ᐅᓇ ᓄᑖᖅ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᖃᓄᐃᓕᖓᓂᐊᕐᒪᖔᑦ. ᐅᖃᖅᖢᓂ ᐱᓕᕆᐊᒃᓴᓂ, ᐋᖅᑭᒃᑕᐅᓯᒪᓂᕆᓚᐅᕐᑕᖓ, ᐋᖅᑭᒃᓯᒪᓚᐅᙱᒻᒪ ᓂᐅᕕᖅᐸᒃᑐᑦ ᐃᓱᒪᒋᔭᐅᙱᖢᑎᒃ.

“ᐅᓇ ᐋᖅᑭᒃᑕᐅᓂᑯ ᑐᓂᓯᕙᒡᓗᓂ ᓂᐅᕕᕐᕕᖃᖅᑐᓂᑦ ᐃᓱᒪᒋᔭᕋ ᓈᒻᒪᙱᓗᐊᕐᓂᖓᓂᒃ,” ᓯᖕ ᐅᖃᕐᑐᖅ.

“ᐃᓱᒪᔪᖓᓕ ᐃᓄᖕᓂ ᑐᑭᓯᐅᒪᔭᕆᐊᖃᕐᓂᑦᑎᓐᓂᒃ ᐱᔭᕆᐊᖃᖅᑕᖏᓐᓂᒃ, ᓇᐅᒃᑯᓪᓗ ᐊᑯᑦᑐᓂᖃᕐᓂᖓᓂᒃ … ᐊᑭᒋᑎᑕᐅᔪᓪᓗ ᖁᑦᑎᓗᐊᖅᑐᐊᓘᓂᖏᓐᓂᒃ ᐊᒻᒪᓗ ᐋᖅᑭᒃᓱᒃᑲᓐᓂᓕᕐᓗᒍ ᐱᓕᕆᐊᒃᓴᓯ ᑕᒪᒃᑯᐊ ᐃᓄᐃᑦ ᐃᑲᔫᑎᑖᖅᐸᓕᕐᓗᑎ ᐱᕙᕆᐊᖃᖅᑕᖏᓐᓄᑦ.”

ᓯᖕ ᐊᓐᑏᐲᖏᑦ ᑎᓴᒪᒋᔭᐅᖕᒪᑕ ᐃᒃᓯᕙᐅᑕᖃᓪᓚᕆᒃᑐᓂᒃ ᒪᓕᒐᓕᕆᕕᒡᔪᐊᖅᒥᑦ (House of Commons), ᑭᓯᐊᓂᓕ ᐊᖏᖃᑎᒌᒃᓯᒪᔪᑦ ᑲᓇᑕᒧᑦ ᐊᖓᔪᖅᑳᑉ ᔭᔅᑎᓐ ᑐᕉᑑᑉ ᓕᐳᕈᓪ ᒐᕙᒪᒃᑯᖏᓐᓂᒃ ᐅᑯᐊ ᓕᐳᕈᐃ ᐊᖓᔪᖅᑳᖑᓂᐊᕐᓗᑎᒃ ᑎᑭᓪᓗᒍ 2025 ᑭᖑᓪᓕᕐᒥ ᓂᕈᐊᕐᓂᖃᓕᖅᐸᑦ.

ᑕᐃᒪᓐᓇᓗ ᓕᐳᕈᒃᑯᑦ ᐊᖏᕐᓯᒪᔪᑦ ᒪᓕᒐᓕᐅᕈᑎᒋᓂᐊᕐᓗᒋᑎ ᐃᓚᖏᑦ ᐊᓐᑏᐲᒃᑯᑦ ᓯᕗᓪᓕᐅᑎᖁᔭᖏᑦ ᐱᓗᐊᖅᑐᒥ ᑭᒍᑎᓕᕆᓂᕐᒧᑦ ᐊᒻᒪ ᐃᔭᒐᕆᔭᐅᖁᔭᐅᔪᓄᑦ ᐊᑐᐊᒐᐃᑦ.

ᓯᖕ ᐅᖃᓚᐅᕐᑐᖅ ᐅᓇ ᐋᖅᑭᖃᑎᒌᒃᓯᒪᓂ ᐃᑲᔪᕈᑎᐅᓯᒪᔪᖅ ᓄᓇᕗᒻᒥᐅᓂᒃ.

ᐱᒃᑯᒋᔭᖃᒻᒪᕆᖕᓂᕋᖅᖢᓂ ᐃᓪᓚᐅᖅᒥ, ᓯᖕ ᐃᒻᒥᓂ ᑕᒪᓐᓇ ᓴᖅᑭᑎᓯᒪᓂᕋᓚᐅᕐᑕᖓ ᑮᓇᐅᔭᖅᑖᖅᑎᑕᐅᔪᓐᓇᕐᓂᖏ $214 ᒥᓕᐊᓐ ᑖᓚᓂ ᐃᖃᓗᐃᑦ ᐃᒪᖃᕈᑎᖓ ᐋᖅᑭᒋᐊᖅᑕᐅᖁᓪᓗᓂᐅᒃ ᐄᐳᕈᓪ 2022-ᒥ.

“ᐱᓕᕆᐊᕆᔭᐅᑎᒻᒪᕆᓚᐅᕋᑦᑎᒍᑦ ᐃᒪᓕᕆᓂᕐᒧᑦ ᐱᖁᑎᓕᕆᓂᖅ ᐃᖃᓗᖕᓂ,” ᓯᖕ ᐅᖃᕐᑐᖅ.

ᔭᓄᐊᕆ 2022-ᒥ, ᐱᓇᓱᐊᕈᓯᑲᓪᓚᐃᑦ ᐊᓂᒍᖅᑎᓪᓗᒋ ᐃᖃᓗᐃᑦ ᐃᒪᖓ ᐱᐅᔪᓐᓃᕐᓯᒪᑎᓪᓗᒍ ᐅᑯᐊ ᐊᓐᑏᐲᒃᑯᑦ ᒐᕙᒪᑐᖃᒃᑯᓐᓂ ᑐᓂᓯᖁᔨᓚᐅᕐᓯᒪᖕᒪᑕ $180 ᒥᓕᐊᓐ ᑖᓚᓂ ᓴᓇᔾᔪᑎᐅᓂᐊᖅᑐᓂᒃ ᓄᓇᓕᐸᐃᔭᐃᑦ ᐃᒪᖃᕈᑎᐊᓂ.

ᓯᖕ ᐅᖃᓚᐅᕐᒥᔪᖅ “ᓂᕿᓄᑦ ᓂᐅᕕᐊᒃᓴᓄ ᐅᑎᖅᑎᑕᐅᔾᔪᑎ” — ᐅᕝᕙᓘᓐᓃᑦ ᔩᐊᔅᑏᒥ (GST) ᐅᑎᕐᑎᑕᐅᔾᔪᑎ — ᐃᓚᒋᔭᐅᑎᑕᐅᓚᐅᖅᑐᖅ ᑭᖑᓪᓕᖅᐹᓂ ᒐᕙᒪᑐᖃᒃᑯᑦ ᐊᐅᓚᔾᔪᑎᒃᓴᓕᕆᑎᓪᓗᒍ ᐊᑐᖅᑕᐅᓇᔭᓚᐅᙱᑦᑐᖅ ᐊᓐᑏᐲᒃᑯᑦ ᐃᑲᔪᓚᐅᙱᑉᐸᑕ.

ᐃᓪᓚᐅᖅ ᐱᒃᑯᒋᔭᖃᕐᓯᒪᓚᐅᕐᒥᔪᖅ ᐊᓐᑏᐲᒃᑯᑦ ᖃᓄᐃᓕᐅᕈᑎᕕᓂᖏᓐᓂᒃ ᐊᐅᓚᔾᔪᑎᓕᕆᓂᒃᑯᑦ ᑭᓯᐊᓂᓕ ᐅᖃᖅᖢᓂ ᒥᑭᓛᒃᑯᑦ ᐊᒃᑐᐃᓂᖃᕐᓂᖓᓂᒃ ᐃᓄᖕᓂ ᐅᑭᐅᕐᑕᖅᑐᕐᒥᐅᑕᓂᒃ.

“ᖃᓄᐃᓕᐅᕈᑎᓕᒫᑦ ᒐᕙᒪᒃᑯᑦ ᐱᓕᕆᐊᕆᔭᖏ ᓴᖅᑭᑕᐅᓯᒪᔪᑦ ᐅᑯᐊ ᓂᐅ ᑎᒧᑯᕌᑎᒃᑯᑦ (ᐊᕐᑏᐲᑯᑦ) ᑎᓕᐅᕆᖃᑦᑕᕐᓯᒪᓂᖏᓐᓄᑦ,” ᓯᖕ ᐅᖃᕐᑐᖅ.

“ᐅᑯᐊ ᒐᕙᒪᐅᔪᑦ ᑎᓕᐅᕆᖃᑦᑕᕐᓂᐊᕋᑦᑎᒍᑦ ᐃᑲᔫᑎᒃᓴᖃᖅᑎᓪᓗᒋᑦ ᓄᓇᕗᒥᐅᑕᓂᒃ: $500 ᒥᓕᐊᓐ ᑖᓚᓂ ᐃᑲᔫᑎᖃᖅᑎᑦᑎᓇᓱᒡᓗᑕ 3,000-ᓂ ᐃᒡᓗᓕᐅᒐᒃᓴᓄᑦ 2030 ᑎᑭᓚᐅᖅᑎᓐᓇᒍ.”

ᓯᕗᓂᒃᓴᒥ ᑕᐅᑐᒃᖢᓂ, ᓯᖕ ᐅᖃᓚᐅᕐᑐᖅ ᐊᓐᑏᐲᖏᑦ ᐱᓕᕆᐊᖃᕐᓂᖏᓐᓂᒃ ᐊᓂᒍᖅᑎᑦᑎᓇᓱᒃᖢᓂ ᒪᓕᒐᕐᓂᒃ ᐱᔾᔪᑎᖃᖅᑐᒥᒃ ᐃᓱᒫᓘᑎᒋᔭᐅᔪᓂᒃ ᐃᓚᖃᖅᖢᑎᒃ ᐃᒡᓗᓕᕆᓂᕐᒧᑦ ᐱᓕᕆᔨᐅᖃᑕᐅᕙᒃᑐᑦ ᐊᒻᒪᓗ ᖃᖓᑕᓲᕐᓂ ᐊᑐᖃᑦᑕᖅᑐᑦ ᐱᔪᓐᓇᐅᑎᖏᓐᓂᒃ.

ᐅᖃᖃᑎᖃᓚᐅᙱᓐᓂᖓᓂᒃ ᑐᓴᒐᒃᓴᓕᐅᖅᑎᓂᒃ ᓯᖕ ᑲᑎᖃᑎᖃᓚᐅᕐᑐᖅ ᓯᕗᓕᐅᖅᑎᒥᒃ ᐸᐅᓗᓯ ᐊᕿᐊᕈᖅᒥ ᐊᒻᒪᓗ ᒪᓕᒐᓕᐅᖅᑎᓂᒃ ᑐᓴᕋᓱᒃᖢᓂ ᓄᓇᕗᒥᑦ ᓯᕗᓪᓕᐅᔭᕆᐊᓕᖕᓂᒃ. ᑲᑎᖃᑎᖃᕈᒪᓚᐅᕐᒥᔪᖅ ᑲᑐᔾᔨᖃᑎᒌᓂᒃ ᐊᒻᒪᓗ ᐃᓚᖏᓐᓂᑦ ᓂᐅᕈᓯᒪᖃᑎᖃᑐᐃᓐᓇᕐᓗᓂ.

“ᑕᒫᙵᑦ ᐱᔪᒪᔭᕋᓕᒃ ᐅᑭᐅᕐᑕᖅᑐᕐᒥᐅᑕ ᐅᓂᒃᑳᖏᑦ ᑐᓴᕈᒪᓪᓗᒋ ᑖᒃᑯᐊᓗ ᐋᑐᕚᒧᑦ ᑐᓴᖅᑕᐅᑎᓐᓂᐊᕐᓗᒋ,” ᓯᖕ ᐅᖃᕐᑐᖅ.