ᕼᐊᓐᓇᓚᖏᓐᓂ ᓂᕈᐊᖅᑕᐅᔪᓄᑦ ᐃᓂᒃᓴᐅᔪᓂ ᐱᕕᒃᓴᖃᖅᐳᑦ ᓄᓇᕗᒻᒥ

For English version, see Ready, set run: Hundreds of elected positions up for grabs in Nunavut

ᓱᒃᑲᓴᐅᑎᓂᖅ ᐱᒋᐊᖅᐳᖅ ᐃᓐᓄᒃᓯᓂᕐᒥ 498−ᖑᔪᓂ ᓂᕈᐊᖅᑕᐅᓯᒪᔪᓄᑦ ᐃᓂᒃᓴᐅᔪᓄᑦ ᓄᓇᕗᓕᒫᒥ.

ᐃᓄᐃᑦ ᒪᐃᔭᙳᕋᓱᒍᒪᔪᓂ, ᑲᑎᒪᔨᓄᑦ, ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂ ᐅᕝᕙᓘᓐᓖᑦ ᐃᓂᐅᔪᒥ ᐊᑕᐅᓯᐅᔪᒥ 12−ᖑᔪᓂ ᐃᒥᐊᓗᓕᕆᔨᒃᑯᑦ ᑲᑎᒪᔨᕋᓛᖏᓐᓄᑦ ᓄᓇᕗᓕᒫᒥ ᐃᓕᓯᓪᓚᕆᒍᓐᓇᖅᐳᑦ ᓂᕈᐊᒐᒃᓴᐅᓂᖏᓐᓂ ᓂᕈᐊᕐᓂᕐᓄᑦ ᐱᓕᕆᐊᖑᓂᐊᖅᑐᓂ ᐊᑐᓂ ᓄᓇᓕᐅᔪᒥ ᐅᒃᑐᐱᕆ 23−ᒥ.

“500−ᐸᓗᖕᓂ ᐃᓄᖃᙱᓐᓂᐅᔪᓂ ᐃᓐᓄᒃᑎᑦᑎᓇᓱᐊᕐᓂᑦᑎᓐᓂ ᕿᑎᐊᓂ ᑎᓴᒪᐅᔪᓂ ᓵᓚᖃᕋᓱᐊᕐᓂᐅᔪᓂ, ᑕᐃᒪᐃᒻᒪᑦ ᒪᓕᒐᓕᐅᖅᑎᒧᑦ ᓂᕈᐊᕐᓂᐅᔪᒥ ᐃᓐᓄᒃᓯᓇᓱᑐᐃᓐᓇᖅᐳᒍᑦ 22−ᖑᔪᓂ,” ᐅᖃᓚᐅᖅᐳᖅ ᑕᔅᑎᓐ ᕗᕋᑦᓚᓐᑦ, ᓄᓇᕘᑉ ᓂᕈᐊᖅᑎᑦᑎᓂᕐᒧᑦ ᐊᖓᔪᖅᑳᖓ.

“ᐅᓄᐸᓗᒃᑐᓂ ᓵᓚᖃᕋᓱᐊᕐᓂᖃᖅᐳᖅ ᑕᒪᑐᒪᓂ ᓂᕈᐊᕐᓂᐅᔪᒥ.”

ᓄᓇᕘᑉ ᑭᖑᓪᓕᖅᐹᖑᔪᒥ ᓂᕈᐊᕐᓂᐅᓚᐅᖅᑐᒥ 2019−ᒥᐅᓚᐅᖅᐳᖅ. 43−ᓂ ᓂᕈᐊᒐᒃᓴᑭᓗᐊᕐᓂᖏᓐᓂ ᐃᓕᔭᐅᑐᐃᓐᓇᖅᑐᓂ, ᑐᑭᖃᖅᑐᒥ ᓂᕈᐊᒐᒃᓴᐅᔪᒥ ᓵᓚᖃᖅᐳᖅ ᐃᓂᒃᓴᐅᔪᒥ ᐊᓯᐊᓂ ᓂᕈᐊᒐᒃᓴᖅᑕᖃᙱᓐᓂᓚᐅᙱᒻᒪᑦ.

ᐅᓪᓗᓂ-ᑕᓪᓕᒪᓂ ᐱᕕᒃᓴᖃᖅᐳᖅ ᓂᕈᐊᒐᒃᓴᐅᔪᓂ ᓂᕈᐊᒐᒃᓴᙳᖅᑎᑕᐅᓂᖏᓐᓂ. ᐱᕕᒃᓴᖃᖅᐳᑦ ᐅᓪᓗᑐᐃᓐᓇᒧᑦ 2 ᐅᓐᓄᓴᒃᑯᑦ ᓄᓇᓕᖕᓂ ᓯᕿᙳᔭᖓᓂ ᐅᖃᐅᓯᖃᕐᓂᕐᒥ ᓂᕈᐊᒐᒃᓴᙳᕐᓂᖓᓂ ᖃᐅᔨᒋᐊᕐᓗᓂ ᓄᓇᓕᖕᓂ ᓂᕈᐊᖅᑐᓕᕆᔨᐅᔪᒧᑦ.

ᓂᕈᐊᕐᓂᖅ ᓄᓇᕗᑦ ᓄᑖᙳᕆᐊᖅᑎᑦᑎᓂᐊᖅᐳᖅ ᐃᑭᐊᖅᑭᕕᖓᓐᓂ “ᖃᐅᑕᒫᐸᓗᖕᒥ: ᑎᑎᕋᕐᓂᕐᒧᑦ ᓂᕈᐊᒐᒃᓴᐅᔪᓂ ᐅᖃᑐᐊᕌᖓᑕ, ᕗᕋᑦᓚᓐᑦ ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ ᑲᖏᖅᖠᓂᕐᒥ ᑎᑎᕋᕐᕕᖓᓂ.

ᐊᑐᓂ ᕼᐋᒻᓚᐅᔪᑦ ᑲᒪᒋᔭᒃᓴᖃᖅᐳᑦ ᐊᐅᓚᑦᑎᓂᖏᓐᓂ ᓇᖕᒥᓂᖅ ᓂᕈᐊᕐᓂᐅᔪᓂ. ᓂᕈᐊᕐᓂᖅ ᓄᓇᕗᑦ — ᕗᕋᑦᓚᓐᑦ ᑲᑐᔾᔨᖃᑎᒌᖓ — ᑐᓂᓯᕙᒃᐳᖅ ᐃᑲᔪᖅᓱᐃᓂᕐᒥ, ᐅᖃᐅᔾᔪᐃᓂᕐᒥ ᐊᒻᒪ ᒪᓕᒐᑎᒍᑦ ᐅᖃᐅᔾᔨᓂᐅᔪᒥ ᐃᑲᔪᕐᓂᕐᒧᑦ ᓄᓇᓕᖕᓂ ᒪᓕᖕᓂᖏᓐᓂ ᓄᓇᕗᒻᒥ ᓂᕈᐊᕐᓂᕐᒧᑦ ᒪᓕᒐᖓᓐᓂ.

ᑕᒪᒃᑭᒐᓚᐃᑦ ᕼᐋᒻᓚᐅᔪᑦ ᓂᕈᐊᕐᓂᖃᕐᓂᐊᖅᐳᑦ ᑕᒪᒃᑭᓄᑦ ᐃᓂᒃᓴᐅᔪᓄᑦ ᐊᑕᐅᑦᑎᒃᑯᑦ ᐊᒻᒪ ᑕᐃᑲᓂᑦᑕᐃᓐᓇᖅ ᐅᓪᓘᔪᒥ — ᐅᒃᑐᐱᕆ 23−ᒥ.

“ᐊᑕᐅᓯᐅᔪᒥ-ᓄᖅᑲᕐᓂᐅᔪᒥ ᐱᕕᒃᓴᐅᓂᐊᖅᐳᖅ ᓂᕈᐊᖅᑎᐅᔪᒧᑦ,” ᕗᕋᑦᓚᓐᑦ ᐅᖃᓚᐅᖅᐳᖅ.

ᕿᑭᖅᑕᕐᔪᐊᖅ, ᑕᓗᕐᔪᐊᖅ ᐊᒻᒪ ᑲᖏᖅᖠᓂᖅ ᐱᓕᕆᓂᐊᖅᐳᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᑲᑎᒪᔨᐅᔪᓄᑦ ᓂᕈᐊᕐᓂᐅᔪᒥ ᐊᓯᐊᒎᖅᑐᒥ ᓄᓇᓕᖕᓂ ᓂᕈᐊᕐᓂᐅᔪᓂᑦ.

ᓂᕈᐊᕐᓂᖅ ᓄᓇᕗᒻᒥ ᐋᖅᑭᐅᒪᑎᑦᑎᕙᒃᐳᑦ ᐃᓕᓯᒪᐃᓐᓇᕐᓂᐊᖅᑐᒥ ᓂᕈᐊᖅᑎᐅᔪᓄᑦ ᑎᑎᕋᖅᓯᒪᓂᐅᔪᒥ, ᑐᑭᖃᖅᑐᒥ ᑭᓇᑐᐃᓐᓇᖅ ᓂᕈᐊᖅᓯᒪᔪᒥ ᓄᓇᓕᖕᓂ ᐅᕝᕙᓘᓐᓃᑦ ᓄᓇᕗᒻᒥ ᓂᕈᐊᕐᓂᐅᔪᒥ ᐃᓕᓯᒫᓂᓪᓗᐊᖅᐳᖅ ᑎᑎᕋᖅᓯᒪᓂᐅᔪᓂ.

ᒫᓐᓇᐅᔪᒥ, 18,000−ᐸᓗᖕᓂ ᐊᑎᖅᑕᖃᖅᐳᖅ ᓕᕈᐊᖅᑎᐅᔪᓄᑦ ᑎᑎᕋᖅᓯᒪᓂᐅᔪᒥ, ᑭᒡᒐᖅᑐᐃᔪᒥ ᐱᖓᓱᓪᓗᐊᓂ−ᑎᓴᒪᓂ ᓄᓇᕘᑉ ᐃᓐᓇᐅᓂᖏᓐᓂ ᐅᓄᕐᓂᖏᓐᓂ.

ᐊᔪᕐᓇᙱᓚᖅ ᐃᓄᖕᓄᑦ ᐃᓚᓕᐅᔾᔭᐅᓂᖏᓐᓂ ᑎᑎᕋᖅᓯᒪᓂᐅᔪᒧᑦ, ᕗᕋᑦᓚᓐᑦ ᐅᖃᓚᐅᖅᐳᖅ. ᑎᑎᕋᖅᑕᐅᓯᒪᙳᑦᑐᒥ ᓂᕈᐊᖅᑎᐅᔪᒥ ᐊᐱᕆᔪᓐᓇᖅᐳᖅ ᓄᓇᓕᖕᓂ ᓂᕈᐊᖅᑐᓕᕆᔨᐅᔪᒧᑦ ᐃᓚᔭᐅᓂᖓᓂ ᑎᑎᕋᖅᑕᐅᓯᒪᓂᐅᔪᒧᑦ. ᓴᖅᑭᑦᑐᓐᓇᕆᕗᑦ ᓂᕈᐊᕐᕕᐅᔪᒧᑦ ᓂᕈᐊᕐᓂᕐᒧᑦ ᐅᓪᓗᖓᓂ ᐊᒻᒪ ᐃᓚᔭᐅᓗᑎᒃ.

2019−ᒥ ᕼᐋᒻᓚᐅᔪᓂ ᓂᕈᐊᕐᓂᐅᔪᓄᑦ, ᓂᕈᐊᖅᑐᓄᑦ ᓴᖅᑭᑦᑐᓄᑦ 47 ᐳᓴᓐᑎᐅᓚᐅᖅᐳᖅ, ᐊᔾᔨᐸᓗᒋᓚᐅᖅᑕᖓᓂ ᒐᕙᒪᑐᖃᒃᑯᑦ ᓂᕈᐊᕐᓂᖓᓂ ᐱᓕᕆᐊᖑᓚᐅᖅᑐᒥ ᑕᐃᑲᓂᑦᑕᐃᓐᓇᖅ ᐅᓪᓗᖓᓂ.

ᐃᓚᖏᓐᓂ ᐊᓯᔾᔨᕐᓂᐅᔪᓂ ᐊᑐᓕᖅᐳᑦ ᐅᒃᑐᐱᕆ 23−ᒧᑦ ᓂᕈᐊᕐᓂᐅᔪᒥ ᑕᐅᑐᒃᖢᒍ 2019−ᖑᓚᐅᖅᑐᒥ. ᓂᕈᐊᕐᓂᖅ ᓄᓇᕗᑦ ᐲᖅᓯᓯᒪᕗᑦ ᐊᓯᒥᒃ ᓂᕈᐊᕈᓐᓴᖅᑎᑦᑎᓂᐅᔪᒥ, ᑐᑭᖃᖅᑐᒥ ᓂᕈᐊᖅᑎᐅᔪᑦ ᑭᓇᑐᐃᓐᓇᒥᒃ ᓂᕈᐊᖅᓯᔪᓐᓇᐃᓪᓕᕗᑦ ᓂᕈᐊᖅᑎᑦᑎᓂᕐᒥ ᑭᒡᒐᖅᑐᖅᑕᐅᓗᓂ.

ᐃᓇᖏᖅᑕᐅᓂᖓᓂ, ᐊᖏᒡᓕᒋᐊᖅᑎᑦᑎᓯᒪᕗᖅ ᕗᕋᑦᓚᓐᑦ ᑕᐃᔭᖓᓂ “ᑐᐊᕕᕐᓇᖅᑐᒥ ᓂᕈᐊᕐᓂᐅᔪᒥ,” ᐊᑐᐃᓐᓇᐅᔪᒥ ᐃᓄᖕᓄᑦ ᓄᓇᓕᖕᓃᔾᔮᙱᑦᑐᓂ ᓂᕈᐊᕐᓂᕐᒧᑦ ᐅᓪᓗᖓᓂ.

ᑕᒪᓐᓇ ᑐᑭᖃᖅᐳᖅ ᑭᓇᑐᐃᓐᓇᖅ ᐃᖅᑲᓇᐃᔭᖅᑐᒥ ᐃᖃᓗᓕᕆᓂᕐᒧᑦ ᐅᒥᐊᕐᔪᐊᒧᑦ ᐅᕝᕙᓘᓐᓃᑦ ᐊᐅᓪᓛᓯᑳᓪᓚᒋᐊᖃᖅᑐᒥ ᐋᓐᓂᐊᕕᓕᐊᕐᓂᕐᒧᑦ ᑎᑎᕋᕈᓐᓇᕐᓂᐊᖅᐳᑦ ᓂᕈᐊᕐᓂᖓᓂ ᐅᖃᓘᑎᒃᑯᑦ.

ᑎᑎᖅᑲᒃᑯᕕᒃᑯᑦ ᓂᕈᐊᕐᓂᖅᑕᖃᕆᕗᖅ ᐊᑲᐅᔪᒥ ᐃᓕᓐᓂᐊᖅᑎᓄᑦ ᐃᓕᓐᓂᐊᖅᑐᓂ ᓄᓇᕘᑉ ᓯᓚᑖᓂ, ᐋᓐᓂᐊᕕᓕᐊᖅᑐᓄᑦ ᐊᐅᓪᓛᖅᓯᒪᔪᓄᑦ ᐊᒻᒪ ᐊᓄᓪᓚᒃᓯᖅᑐᓄᑦ. ᑐᒃᓯᕋᕈᓐᓇᖅᐳᑦ, ᐱᒋᐊᕐᓗᑎᒃ ᓇᒡᒐᔾᔭᐅᒥ, ᓂᕈᐊᕈᑎᒃᓴᒥ ᓇᒃᓯᐅᔾᔭᐅᓂᖓᓂ ᑕᑕᑎᕆᔪᓐᓇᖅᑕᖓᓂ ᐊᒻᒪ ᐅᑎᖅᑎᑕᐅᓗᓂ ᓈᓴᖅᑕᐅᖃᓯᐅᑎᓂᕐᒧᑦ.

ᐃᓱᓕᕝᕕᒃᓴᖓ ᑐᒃᓯᕋᕐᓂᕐᒧᑦ ᑎᑎᖅᑲᒃᑯᕕᒃᑯᑦ ᓂᕈᐊᕐᓂᕐᒧᑦ ᐅᒃᑐᐱᕆ 16−ᖑᕗᖅ, ᐱᓇᓱᐊᕈᓯᐅᑉ ᓯᕗᓂᐊᓂ ᓂᕈᐊᕐᓂᕐᒧᑦ, ᕗᕋᑦᓚᓐᑦ ᐅᖃᓚᐅᖅᐳᖅ, ᐱᔾᔪᑎᖃᖅᑐᒥ ᓂᕈᐊᕐᓂᕐᒧᑦ ᓴᓇᔨᐅᔪᑦ ᐱᕕᒃᓴᖃᖅᑎᑕᐅᔭᕆᐊᖃᕐᒪᑕ ᐊᐅᓪᓚᖅᑎᑕᐅᓂᖓᓂ ᐊᒻᒪ ᐅᑎᖅᑎᑕᐅᓂᖓᓂ.

2019−ᒥ, 150 ᐃᓄᖕᓂ ᓂᕈᐊᓚᐅᖅᐳᑦ ᑎᑎᖅᑲᒃᑯᕕᒃᑯᑦ ᓂᕈᐊᕐᓂᒃᑯᑦ.

“ᐊᒥᓲᓗᐊᙱᓚᑦ, ᑭᓯᐊᓂ ᐱᔪᓐᓇᖅᐳᒍᑦ ᐃᓕᓐᓂᐊᖅᑎᓂ, ᐋᓐᓂᐊᕕᓕᐊᖅᑐᓄᑦ ᐊᐅᓪᓈᖅᓯᒪᔪᓄᑦ ᐊᒻᒪ ᐊᓄᓪᓚᒃᓯᖅᑐᓄᑦ ᓂᕈᐊᕈᒪᔪᓄᑦ,” ᕗᕋᑦᓚᓐᑦ ᐅᖃᓚᐅᖅᐳᖅ.