ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓪᓚᖃᑎᖃᒃᑲᓐᓂᕈᒪᔪᑦ ᐹᕙᓐᓛᓐᑯᓐᓂᒃ ᐅᓗᕆᐊᖅᓵᕆᓂᖏᓐᓄᑦ ᒪᑐᓯᑐᐃᓐᓇᕆᐊᖃᑎᓐᓂᒃ ᓄᓘᔮᖕᓂ ᐅᔭᕋᒃᓯᐅᖅᕕᒃᒥᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓱᒪᔪᑦ ᐹᕙᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃ ᓴᖅᑭᑦᑎᒃᑲᓐᓂᕈᓐᓇᕐᓗᑎᒃ ᑐᓴᒐᒃᓴᒃᑲᓐᓂᕐᓂᒃ ᐸᕐᓇᐅᑎᖏᓐᓅᖓᔪᓂᒃ ᐱᓕᕆᐊᖏᓐᓂ ᓄᖅᑲᖅᑎᑦᑎᕚᓪᓕᕋᓱᖕᓂᖏᓐᓂᒃ ᓄᓘᔮᖕᓂ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᒃᒥᑦ, ᐅᖃᓚᐅᖅᑐᖅ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ ᔨᐅᕆᒪᐃᐊ ᒍᕉᕝᔅ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᑖᒃᑯᐊ ᐊᑐᖅᑐᐊᖅᑎᑦᑎᔨᐅᔪᑦ ᓄᓇᒥ ᐅᔭᕋᒃᓯᐅᖅᕕᐅᔪᒥᓐ, ᑎᑎᖃᖅᑖᓚᐅᕐᒪᑕ ᐊᒻᒪᓗ ᑭᐅᓯᓪᓗᑎᒃ ᖃᖓᑦᑎᐊᓵᖅ ᑎᑎᕋᖅᑕᐅᔪᕕᓂᖅᓂᒃ ᐹᕙᓐᓛᓐᑯᓐᓂᒃ, ᒍᕉᕝᔅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐅᖃᓚᐅᕐᑐᖅ ᑲᑐᔾᔨᖃᑎᒌᖑᔪᑦ ᐅᑯᐊ ᐹᕙᓐᓛᓐᑯᓐ “ᐅᖃᖃᑎᖃᕈᒪᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑐᑭᓯᑎᑦᑎᒃᑲᓐᓂᕐᓂᐊᕐᒪᑕ ᐃᓗᓕᕆᔭᐅᔪᓂᒃ ᑎᑎᕋᖅᑕᐅᓯᒪᔫᑉ ᐊᒻᒪᓗ ᖃᓄᐃᓕᕈᑎᐅᔪᓂᒃ ᓄᓘᔮᖕᓂᒃ ᐱᓕᕆᐊᒧᑦ.”

ᑎᑎᖃᖅ ᑎᑎᕋᐅᓯᖃᓚᐅᕐᑐᖅ ᐊᔾᔨᑦᑕᐃᓐᓇᐸᓗᖏᓐᓂᒃ ᑐᓴᒐᒃᓴᖃᖅᖢᓂ ᐱᐊᓂᐅᑉ ᐄᐳᕈᓪ 30-ᒥᑦ ᑎᑎᕋᓚᐅᖅᓯᒪᔭᖏᓐᓂᒃ ᐃᖅᑲᓇᐃᔭᖅᑎᓄᑦ ᐊᒻᒪᓗ ᐊᖏᖃᑎᒌᒍᑎᑎᒍᑦ ᐃᖅᑲᓇᐃᔭᖅᑎᐅᔪᓄᑦ ᓴᓇᕝᕕᖕᒥ, ᐅᖃᓚᐅᖅᑐᖅ ᐹᕙᓐᓛᓐᑯᑦ ᐊᐅᓚᑦᑎᔨᖓ ᑎᒍᒥᐊᖅᑎᓄᑦ ᐱᓕᕆᐊᒃᓴᓕᕆᔨᖓ, ᕼᐊᑐ ᓯᒪᐃᐅᔅ.

ᐱᐊᓂᐅᑉ ᑎᑎᕋᖅᑕᖏᑦ ᐅᖃᖅᓯᒪᓚᐅᖅᑐᑦ ᑎᒍᒥᐊᖅᑎᐅᔪᑦ ᑮᓇᐅᔭᑎᒍᑦ ᐃᑲᔪᕈᑎᓂᒃ ᑐᓂᓯᔾᔮᔪᓐᓃᕐᓂᖏᓐᓂᒃ ᐊᖏᒡᓕᒋᐊᖅᑎᑦᑎᒍᑎᒃᓴᓄᑦ ᓄᓘᔮᖕᓂ, ᐱᔾᔪᑎᖃᖅᖢᓂ ᑭᖑᕙᕆᐊᖅᑕᐅᑲᑕᖕᓂᖏᓄᑦ ᕿᒥᕐᕈᐊᕐᓂᖅᒧᑦ ᐱᓕᕆᓂᖅᒥᒃ ᐊᒻᒪᓗ ᓈᒻᒪᒃᓴᙱᓐᓂᖅᒧᑦ ᐊᖏᒡᓕᒋᐊᕈᒪᓂᖏᓐᓂᒃ.

ᐱᐊᓂ ᐅᖃᓚᐅᕐᒥᔪᖅ ᓯᕗᓂᒃᓴᒥᒃ ᓴᕕᕋᔭᒃᓴᐃᑦ ᐊᑭᒃᖠᒋᐊᖅᑕᐅᑐᐃᓐᓇᕆᐊᖃᕐᓂᖏᓐᓄᑦ ᑮᓇᐅᔭᓕᐅᕈᑎᐅᔪᓂᒃ ᐊᓯᐅᔨᑐᐃᓐᓇᓕᕋᔭᕐᓂᖏᓐᓂᒃ, ᑕᐃᒪᓕ ᑖᒃᑯᐊ ᑲᒻᐸᓂᐅᔪᑦ ᐃᒪᐃᓕᐅᓕᕋᔭᖅᖢᑎᒃ “ᐱᓕᕆᕙᓪᓕᐊᓕᕐᓗᑎᒃ ᒥᒃᖠᕙᓪᓕᐊᖅᑎᑦᑎᓂᖅᒥᒃ ᐊᑭᓕᐅᑎᐅᕙᒃᑐᓂᒃ ᐊᒻᒪᓗ ᐊᑐᖅᐸᓪᓕᐊᔭᖏᓐᓂᒃ ᐊᓯᐊᒎᖅᑎᖔᓕᕐᓗᒋᑦ.”

ᒫᓐᓇᒧᓪᓕ, ᑕᒪᒃᑯᐊ ᑮᓇᐅᔭᖅᑖᕆᔭᐅᕙᓪᓕᐊᔪᑦ ᐅᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑯᓐᓄᑦ ᐅᕙᙵᑦ ᓄᓘᔮᖕᓂ ᐅᔭᕋᒃᓯᐅᖅᕕᖕᒥᓐ ᐅᕙᓃᑦᑐᒥ ᕿᑭᖅᑖᓘᑉ ᐅᐊᖕᓇᖓᓂᒃ, ᓈᒻᒪᖕᓂᕋᖅᑕᐅᔪᖅ: ᐅᓇ ᐃᓄᐃᑦ ᐊᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ ᑮᓇᐅᔭᖅᑖᖅᑎᖅᑎᒍᑎᐅᕙᒃᑐᖅ ᒥᓕᐊᓐᑲᓛᓗᖕᓂᒃ ᐊᕐᕌᒍᑕᒪᓐ ᑲᑐᔾᔨᖃᑎᒌᓄᑦ.

ᐆᒃᕕᐅᓪ, ᐋᓐᑎᐅᕆᐅᒥ ᑐᙵᕕᓕᒃ ᐅᔭᕋᒃᓯᐅᖅᕕᒃ ᐲᖅᑕᐅᕙᓪᓕᐊᔪᓂᒃ ᑕᐃᒪᓐᓇᑦᑕᐃᓐᓇᖅ ᓇᓕᒧᖓᓂᒃ ᐲᔭᐃᒃᑲᓐᓂᕈᒪᖕᒪᑕ ᐅᔭᕋᒃᓯᐅᖅᕕᒃᒥᑦ, ᐊᒻᒪᓗ ᓴᓇᔪᒪᓪᓗᑎᒃ 110 ᑭᓛᒥᑕ ᑕᑭᓂᓕᖕᒥᒃ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥ ᓄᓘᔮᖕᓂᑦ ᓄᓘᔮᑦ ᑭᙳᐊᓄᑦ ᐊᒻᒪᓗ ᐅᒥᐊᕐᔪᐊᒃᑰᖅᑎᑦᑎᕙᖕᓂᖏᓐᓂᒃ ᐅᓄᖅᓯᕚᓪᓕᖅᑎᑦᑎᓗᑎᒃ ᒪᐅᖓ 176 ᐊᕐᕌᒍᒥᑦ. ᐅᓇ ᑐᒃᓯᕋᕈᑎ ᐱᓕᕆᐊᖑᕙᓪᓕᐊᔪᖅ ᑭᒃᑯᓕᒫᓄᑦ ᑐᓴᐅᒪᔾᔪᑎᓕᕆᓂᒃᑯᑦ ᐅᑯᓇᙵᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑐᔾᔨᖃᑎᒌᑦ ᑲᑎᒪᔨᖏᑦᑎᒍᑦ.

ᒫᔅᓯᒥᓐ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᑦ ᐊᓂᒍᐃᑎᑦᑎᓚᐅᖅᓯᒪᖕᒪᑕ ᐃᑲᔪᕈᒪᙱᖢᑎᕐ ᐊᖏᒡᓕᒋᐊᖅᑎᑦᑎᓂᖅᒧᑦ ᒫᓐᓇ ᖃᓄᐃᓕᖓᓂᕆᔭᖓᓂᒃ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᖃᑎᖃᑲᑕᒍᒪᔪᑦ ᓱᓕ ᐹᕙᓐᓛᓐᑯᓐᓂᒃ ᐱᐅᓯᕚᓪᓕᖅᑎᒐᓱᒡᓗᒍ ᐱᓕᕆᐊᕆᔭᖓᑦ “ᒪᓕᒃᓯᒪᔪᓐᓇᕐᓂᐊᖅᒪᑦ ᐃᓄᐃᑦ ᑕᐅᑐᙳᐊᖅᓯᒪᔭᖓᓂᒃ ᓇᓕᒧᒌᓕᖅᑎᑦᑎᓯᒪᓂᖅᒥᒃ ᐊᕙᑎᒋᔭᒧᑦ ᐊᒃᑐᐃᔾᔪᑎᒋᔭᐅᔪᑦ ᐅᑯᓄᖓ ᑮᓇᐅᔭᓕᐅᕋᓱᖕᓂᖅᒧᑦ ᐱᕕᒃᓴᐅᔪᓐᓇᖅᑐᓂᒃ,” ᒍᕉᕝᔅ ᐅᖃᖅᑐᖅ.

ᐅᑯᓄᖓᓕ ᐹᕙᓐᓛᓐᑯᓐᓄᑦ, ᓯᒪᐃᐅᔅ ᐅᖃᓚᐅᖅᑐᖅ ᑲᒻᐸᓂᐅᔪᑦ ᐃᑲᔪᖅᑐᖅᑕᐅᒃᑲᓐᓂᕈᒪᓂᕋᖅᖢᓂᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᓐᓄᑦ ᐊᒻᒪ ᐊᓯᖏᓐᓄᑦ ᑕᒫᓃᑦᑐᓄᑦ. ᕕᕝᕗᐊᕆᐅᑎᓪᓗᒍ, ᐊᖑᓇᓱᒃᑏᑦ ᓄᖅᑲᖅᑎᑦᑎᓯᒪᓚᐅᖅᓯᒪᔪᑦ ᐅᔭᕋᒃᓯᐅᖅᕕᒃᒥᑦ ᓴᐳᔾᔨᓯᒪᓇᓱᖕᓂᖅᒧᑦ ᐊᕙᑎᒋᔭᐅᔪᓂᒃ ᐊᒃᑐᐃᒍᑎᐅᔪᓄᑦ.

ᐅᓇ ᓄᖃᖅᑎᑦᑎᓯᒪᓂᖓ ᐃᓱᓕᓕᓚᐅᖅᓯᒪᔪᖅ ᐱᓇᓱᐊᕈᓯᖅ ᐊᓂᒍᖅᑎᓪᓗᒍ ᐅᑯᐊ ᐹᕙᓐᓛᓐᑯᑦ ᓄᓇᕗᒥᑦ ᐃᖅᑲᖅᑐᐃᕕᒃᑯᓐᓂᒃ ᐃᑲᔪᖅᑐᐅᔾᔪᑎᑖᕈᒪᓕᖅᑎᓪᓗᒋᑦ.

“ᑲᔪᓯᓂᐊᖅᑐᒍᑦ ᐱᓕᕆᖃᑎᖃᐃᓐᓇᕐᓗᑕ ᓄᓇᖃᖅᑐᓂᒃ ᐊᒻᒪᓗ ᑕᒪᐃᓐᓂᒃ ᑎᒍᒥᐊᖅᑎᐅᔪᓂᒃ ᖃᓄᖅ ᑕᒪᑐᒥᖓ ᓯᕗᒧᑦ ᐱᓕᕆᔪᓐᓇᕐᓂᖅᒥᒃ, ᐊᒻᒪᓗ ᑕᐃᒪᐃᓕᐅᕈᒪᑦᑎᐊᖅᖢᑕ,” ᓯᒪᐃᐅᔅ ᐅᖃᖅᑐᖅ.

ᐅᔭᕋᒃᓯᐅᕐᕕᒃᑯᑦ ᑐᒃᓯᕋᕈᑎᖓ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᐊᖏᖅᑕᐅᔭᕆᐊᖃᕐᓂᕋᖅᑕᖓ, ᐊᒻᒪᓗ ᐃᒪᐃᖁᔨᓪᓗᑎᒃ “ᓇᓗᓇᐃᔭᒃᑲᓐᓂᖅᓯᒪᔪᓂᒃ” ᖃᑯᒐᑦ ᑲᑎᒪᑎᑦᑎᓂᐅᓂᐊᖅᑐᖅ ᐊᖏᒡᓕᒋᐊᖅᑎᑦᑎᔪᒪᓂᖅᒧᑦ ᐱᐊᓂᒃᑕᐅᓛᕆᐊᒃᓴᖓᓂᒃ. ᐅᓇ ᑐᓴᐅᒪᑎᑦᑎᓂᖅᒧᑦ ᑲᑎᒪᑎᑦᑎᓂᖅ ᓄᖅᑲᖅᑎᑕᐅᓕᓚᐅᖅᓯᒪᖕᒪᑦ ᐄᐳᕈᒥᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅᒥᒃ ᐋᓐᓂᐊᖅᑖᖅᑐᖃᖅᑎᓪᓗᒍ ᐃᖃᓗᖕᓂᑦ.

ᐃᓱᖃᕈᓐᓇᐃᓪᓕᑎᓪᓗᒍ ᐱᔪᓐᓇᐅᑎᑖᖅᑎᑦᑎᓂᖅᒧᑦ ᐱᓕᕆᓂᐅᔪᖅ ᖃᓂᑦᑐᒃᑯᑦ, ᐹᕙᓐᓛᓐᑯᑦ ᐋᖅᑭᒃᓯᓕᓚᐅᖅᑐᑦ ᐱᓕᕆᔾᔪᑎᓂᒃ ᐊᖏᒡᓕᒋᐊᖅᑎᑦᑎᓂᖅᒧᑦ ᐅᒥᐊᕐᔪᐊᒃᑯᑦ ᐊᐅᓪᓚᖅᑎᑦᑎᔪᒪᓕᖅᖢᑎᒃ ᐊᐅᔭᐅᓂᐊᖅᑐᖅ.

“ᐊᑭᓕᐅᑎᐅᓇᔭᖅᑐᑦ ᑖᒃᑯᓂᖓ ᐊᐅᓪᓚᖅᑎᑦᑎᓂᐊᕐᓗᓂ ᐊᒻᒪᓗ ᖃᑯᒍᒃᑲᓐᓂᖅ ᐅᑎᖅᑎᑦᑕᕆᐊᖃᕐᓂᐊᕐᓗᒋᑦ ᖄᖏᐅᑎᓇᔭᓗᐊᙱᑦᑐᑦ ᐊᑭᓕᖅᓱᖅᑕᑦᑎᓐᓂ ᒫᓐᓇ ᑕᒫᓃᓐᓂᖏᓐᓄᑦ ᐊᕐᕌᒍᒧᑦ.” ᓯᒪᐃᐅᔅ ᐅᖃᖅᑐᖅ.

“ᐊᑭᓕᐅᑎᒃᓴᖅᑕᖃᕈᓘᔭᕐᒪᑦ ᐊᒃᑐᐊᔪᓂᒃ ᑖᒃᑯᐊ ᓄᖃᖓᑐᐃᓐᓇᕐᓂᖏᑦᓄᑦ, ᑕᐃᒪᓕ ᐃᓱᒪᓕᐅᕆᔭᕆᐊᖃᕋᑦᑕ ᒫᓐᓇ ᐅᓲᖃᐃᒻᒪ ᐆᒧᖓ ᐅᒥᐊᕐᔪᐊᓕᕆᓂᖅᒧᑦ. ᑕᐃᒪᓐᓇᓕ ᓈᒻᒪᓛᖑᓕᓚᐅᖅᑐᖅ.”

ᓄᓘᔮᖕᓂ ᐅᔭᕋᒃᓯᐅᖅᕕᒃ ᐃᖅᑲᓇᐃᔭᖅᑎᑦᑎᓚᐅᖅᑐᑦ 300 ᐅᖓᑖᓂᒃ ᓄᓇᕗᒻᒥᐅᑕᓂᒃ ᐊᖏᕐᕋᖅᑎᑕᐅᓚᐅᙱᑎᓪᓗᒋᑦ ᒫᔅᓯᐅᓚᐅᖅᑐᒥ ᓄᕙᒡᔪᐊᕐᓇᖅ-19 ᐱᒋᐊᖁᓇᒍ ᓄᓇᕗᒥ, ᑭᓯᐊᓂᓕ ᑖᓐᓇ ᐅᔭᕋᒃᓯᐅᖅᕕᒃ ᓈᒻᒪᙱᓕᐅᕈᑎᖏᓐᓂᒃ ᐱᓕᕆᐊᖃᖅᑐᑦ.