ᕿᑭᖅᑖᓘᑉ ᐅᐊᖕᓇᖓᓂᑦ ᐊᖑᓇᓱᒃᑏᑦ ᐊᕐᕌᒍᓂ ᖁᓕᓂᒃ ᓄᖅᑲᖓᑎᑕᐅᖁᔨᔪᑦ ᐹᕙᓐᓛᓐ ᐅᔭᕋᒃᓯᐅᖅᕕᐅᑉ ᐊᖏᒡᓕᒋᐊᕈᒪᓂᖓᓂᒃ

ᐱᖓᓱᐃᑦ ᕿᑭᖅᑖᓘᑉ ᐅᐊᖕᓇᖓᓂ ᐊᖑᓇᓱᒃᑐᓕᕆᔩᐅᔪᑦ ᓄᖅᑲᖅᑎᑕᐅᖁᔨᔪᑦ ᓴᕕᕋᔭᒃᓴᒥᑦ ᓴᖅᑭᑎᑦᑎᕙᓪᓕᐊᓂᕐᒥᒃ ᐹᕙᓐᓛᓐ ᓴᕕᕋᔭᒃᓴᒥᒃ ᓄᓘᔮᖕᓂ ᐅᔭᕋᒃᓯᐅᕐᕕᒃᒥᑦ.

ᐊᖑᓇᓱᒃᑐᓕᕆᔨᒃᑯᑦ ᓴᓂᕋᔭᒃᒥ, ᐃᒡᓗᓕᒃ ᐊᒻᒪ ᐃᒃᐱᐊᕐᔪᒃᒥ ᐅᑯᓂᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ ᓄᖅᑲᖅᑎᑦᑎᓯᒪᖁᔭᐅᓪᓗᑎᒃ ᐅᔭᕋᒃᓯᐅᕐᕕᒃᒥᑦ ᐊᖏᒡᓕᒋᐊᕈᒪᓂᖓᓂᒃ ᐊᕐᕌᒍᓂᒃ ᖁᓕᓂᒃ.

ᐃᓱᒪᓕᐅᕆᓚᐅᕐᒥᔪᑦ ᐊᕙᑦᑎᓕᕆᔨᒃᑯᑦ ᐃᓱᒪᓕᐅᖁᔭᐅᓪᓗᑎᒃ ᐅᔭᕋᒃᓯᐅᕐᕕᐅᑉ ᐊᖏᒡᓕᒋᐊᕈᒪᓂᖓ ᓄᖅᑲᖓᑎᑕᐅᓚᐅᑲᒡᓗᓂ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑲᒪᒋᔭᖃᖅᑐᑦ ᖃᐅᔨᓴᖃᑦᑕᕐᓂᕐᒥᒃ ᐃᓅᖃᑎᒌᖕᓂᒃᑯᑦ ᐊᒻᒪ ᑮᓇᐅᔭᓕᐅᕋᓱᖕᓂᒃᑯᑦ ᐊᒃᑐᐃᒍᑎᐅᔪᓂᒃ ᐱᕙᓪᓕᐊᓂᕐᒧᑦ ᐱᓕᕆᐊᓄᑦ, ᒪᑯᑎᑐᓇᖅ ᐅᔭᕋᒃᓯᐅᕐᕕᒃ ᐊᖏᒡᓕᒋᐊᕐᓂᖓᓂᒃ ᐊᒻᒪᓗ ᐃᓱᒪᓕᐅᕆᕙᒃᖢᑎᒃ ᒐᕙᒪᑐᖃᒃᑯᓐᓄᑦ ᑕᒪᒃᑯᐊ ᑐᒃᓯᕋᐅᑎᐅᔪᑦ ᐊᖏᖅᑕᐅᔭᕆᐊᖃᕐᒪᖔᑕ.

ᓴᓂᕋᔭᒃᒥ ᐊᒻᒪ ᐃᒡᓗᓕᒃᒥ ᐊᖑᓇᓱᒃᑐᓕᕆᔨᒃᑯᑦ ᑖᒃᑯᓂᖓ ᑲᒻᐸᓂᐅᔪᓂᒃ ᐃᒡᓗᓕᐅᖁᔨᙱᑦᑐᑦ ᐊᒻᒪᓗ ᐃᒃᓴᕐᕕᒃᒥ ᐊᐅᓚᑦᑎᖁᔨᙱᑦᑐᑦ ᑲᖏᖅᖢᔪᐊᕐᒥᒃ. ᑖᒃᑯᐊ ᑲᒻᐸᓂᐅᔪᑦ ᐱᓕᕆᐊᒧᑦ ᐱᔪᓐᓇᐅᑎᑖᓚᐅᕐᓯᒪᔪᑦ ᑕᐃᒪᓐᓇ ᓴᓇᔪᓐᓇᖅᖢᑎᒃ 2012-ᒥ.

ᐊᖑᓇᓱᒃᑐᓕᕆᔨᒃᑯᑦ ᑖᒃᑯᓂᖓ ᐅᖃᐅᓯᖃᓚᐅᕐᓯᒪᔪᑦ ᐱᐊᓂᓕᕐᑎᓪᓗᒋᑦ ᐅᖃᐅᓯᖏᓐᓂᒃ ᐅᑯᓄᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᔭᓄᐊᕆ 10-ᖑᑎᓪᓗᒍ.

ᒫᓐᓇᓕ, ᐹᕙᓐᓛᓐᑯᑦ ᐱᔪᓐᓇᖅᑎᑕᐅᖕᒪᑕ 6 ᒥᓕᐊᓐ ᑕᓐᔅᓂ ᓴᕕᕋᔭᒃᓴᓂᒃ ᐊᐅᓪᓚᖅᑎᑦᑎᔪᓐᓇᖅᖢᑎᒃ ᓄᓘᔮᑦ ᕿᙳᐊᓂᒃ. ᑖᒃᑯᐊ ᑲᒻᐸᓂᐅᔪᑦ ᐊᐅᓪᓚᖅᑎᖃᑦᑕᖅᑕᖏᓐᓂᒃ ᐅᓄᕐᓯᕚᓪᓕᖅᑎᑦᑎᔪᒪᖕᒪᑕ ᐊᒻᒪᓗ ᓴᓇᓗᑎᒃ 110 ᑭᓛᙵᑕᓂ ᑕᑭᓂᓕᖕᒥ ᓄᓇᓯᐅᑎᑯᑖᖕᒧᑦ ᐊᖅᑯᑎᒥᒃ ᐅᔭᕋᓯᐅᕐᕕᐅᓪᓗ ᐊᒻᒪ ᓄᓘᔮᑦ ᕿᙳᐊᓄᑦ ᐊᒻᒪᓗ ᐃᒃᓴᕐᕕᓕᐅᕐᓗᑎᒃ.

ᐊᕐᕌᒎᒃ ᒪᕐᕉᒃ ᐊᓂᒍᖅᑎᓪᓗᒍ ᐅᑯᐊ ᑲᑎᒪᔩᑦ ᑭᒃᑯᓕᒫᓃᒃ ᑲᑎᒪᑎᑦᑎᓚᐅᕐᓯᒪᑎᓪᓗᒋᑦ ᑐᒃᓯᕋᐅᑎᒋᔭᐅᔪᒥᒃ ᐅᔭᕋᒃᓯᐅᖅᕕᒃᒥᑦ ᐊᖏᒡᓕᒋᐊᕈᒪᔾᔪᑎᓂᒃ, ᐊᖑᓇᓱᒃᑏᑦ ᑭᒡᒐᖅᑐᐃᔨᖏᑦ ᑲᔪᓯᔪᑦ ᐃᓱᒫᓘᑎᖏᓐᓂᒃ ᐊᑕᑎᒋᔭᒧᑦ ᐊᒃᑐᐃᒍᑎᐅᔪᓂᒃ ᐅᔭᕋᒃᓯᐅᖅᕕᒃᒧᑦ.

ᐃᒃᐱᐊᕐᔪᒃᒥᑦ ᐃᑲᔪᕐᑎᑦ ᐊᖑᓇᓱᒃᑎᒃᑯᑦ ᐃᒃᓯᕙᐅᑕᖓ ᖃᐅᒪᔪᖅ ᐆᔪᑯᓗᒃ ᐅᖃᓚᐅᕐᑐᖅ ᐊᖏᒡᓕᒋᐊᖅᑎᑦᑎᓂᕐᒧᑦ ᐊᒃᑐᐃᒍᑎᐅᓂᐊᖅᑐᑦ “ᐅᐊᑲᓪᓚᓗᐊᕌᓘᓕᒑᖕᒪᑕ.”

“ᐅᔾᔨᕈᓱᑦᑎᐊᕆᐊᖃᕋᑦᑕ ᐊᒻᒪᓗ ᑐᑭᓯᓯᒪᑦᑎᐊᕐᓗᑕ ᐊᒃᑐᐃᒍᑎᐅᔪᓂᒃ ᒫᓐᓇ ᐊᐅᓚᑕᐅᔪᓂᒃ ᐊᒻᒪᓗ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐋᖅᑭᒋᐊᖅᑎᑦᑎᓂᕐᒥᒃ ᓈᒻᒪᙱᓕᐅᕈᑎᓂᒃ ᐊᒃᑐᐃᒍᑎᓂᒃ ᑕᒪᓐᓇ ᓯᕗᒧᑦ ᐱᓕᕆᐊᖑᓕᓚᐅᙱᓐᓂᖓᓂᒃ ᐊᒻᒪ ᐊᖏᒡᓕᒋᐊᖅᑕᐅᓚᐅᙱᓐᓂᖓᓂᒃ,” ᐆᔪᑯᓗᑦ ᑎᑎᕋᓚᐅᕐᑐᑦ ᐊᖑᓇᓱᒃᑎᒃᑯᑦ ᐅᖃᐅᓯᖏᓐᓂᒃ.

ᑲᖏᖅᑐᒑᐱᒃᒥ ᒪᐃᔭ ᐋᓚᓐ ᑯᐊᒪᒃ ᐊᒻᒪ ᓇᖕᒪᐅᑕᖅ ᐊᖑᓇᓱᒃᑎᒃᑯᑦ ᐃᒃᓯᕙᐅᑕᖓ ᐊᐱᐅᓯ ᐋᐸᒃ, ᐅᖃᓪᓚᒃᑎᓪᓗᒋᑦ ᐅᖃᐅᓯᖃᓪᓚᕆᓚᐅᙱᑦᑐᑦ ᖃᓄᐃᓕᐅᖁᔨᔾᔪᑎᓂᒃ.

ᑭᓯᐊᓂᓕ ᐅᖃᓚᐅᕐᑐᑦ ᑕᒪᒃᑯᐊ ᓄᓇᓖᑦ ᐊᒃᑐᖅᑕᐅᓯᒪᔪᑦ ᐱᕕᖃᖅᑎᑕᐅᔭᕆᐊᖃᕐᓂᖏᓐᓂᒃ ᖃᐅᔨᓇᓱᒡᓗᑎᒃ ᑕᒪᒃᑯᐊ ᕿᓚᓗᒐᐃᑦ ᑑᒑᓖᑦ ᐊᒻᒪ ᐊᓯᖏᑦ ᐊᕙᑎᒋᔭᒧᑦ ᓈᒻᒪᙱᓕᐅᕈᑎᐅᔪᑦ ᐱᔾᔪᑎᖃᕆᐊᒃᓴᖏᓐᓂᒃ ᐅᔭᕋᒃᓯᐅᕐᓂᕐᒧᑦ ᐊᐅᓪᓚᖅᑎᑕᐅᖃᑦᑕᖅᑐᓂᒃ ᐅᓄᖅᓯᕚᓪᓕᖅᑎᑦᑎᓚᐅᙱᓐᓂᖏᓐᓂᒃ.

ᐅᕗᓇᓕ ᓄᓇᕗᒻᒥ ᐸᕐᓇᐅᓯᐅᕐᓂᕐᒧᑦ ᐊᒻᒪ ᐱᓕᕆᐊᒧᑦ ᖃᐅᔨᓴᕐᓂᕐᒧᑦ ᒪᓕᒐᖅᑎᒍᑦ, ᐅᑯᐊ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᔪᓐᓇᕐᓂᖃᕐᒪᑕ ᐃᓱᒪᓕᐅᕆᔪᓐᓴᕐᓗᑎᒃ ᓲᕐᓗ ᓄᖃᖓᑎᑦᑎᓚᐅᑲᖕᓂᕐᒥᒃ ᒐᕙᒪᑐᖃᒃᑯᑦ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᖓᓄᑦ, ᑖᓐᓇᓗ ᐊᖏᕈᓐᓇᖅᖢᓂ ᐊᑐᖁᔭᐃᔪᓂᒃ ᑖᓐᓇ ᐱᓕᕆᐊᖑᔪᖅ ᐊᖏᖅᑕᐅᓯᒫᓂᒃᑲᓗᐊᖅᐸᑦ.

ᑭᐅᕋᓐ ᑲᔅᑕᓗ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᑲᑎᒪᔨᓄᑦ ᐅᖃᓚᐅᕐᑐᖅ ᑭᖑᓪᓕᖅᐹᒥ ᑲᑎᒪᔩᑦ ᑐᓂᔭᐅᓚᐅᕐᓯᒪᔪᑦ ᓄᖃᖅᑎᑦᑎᖁᔨᓯᒪᔾᔪᑎᓂᒃ ᐆᒧᖓ ᐊᕇᕙᒃᑯᑦ ᑭᒡᒐᕕᒃ ᔪᕇᓂᐊᒻᒧᑦ ᐅᔭᕋᒃᓯᐅᕐᕕᒃᒧᑦ, ᑖᓐᓇᓗ ᐊᖏᖅᑕᐅᓚᐅᕐᓯᒪᙱᖢᓂ.

ᑲᔅᑕᓗ, ᐅᖃᕈᓐᓇᓚᐅᙱᑦᑐᖅ ᐹᕙᓐᓛᓐᑯᑦ ᑐᒃᓯᕋᐅᑎᖓᓄᑦ, ᐅᖃᓚᐅᖅᑐᖅ ᑲᑎᒪ ᑐᓂᓯᓚᐅᕐᓯᒪᙱᓐᓂᕋᖅᖢᓂᒋᑦ ᐱᓕᕆᔪᓐᓇᐅᑎᒥ ᓄᖅᑲᖅᑎᑦᑎᔾᔪᑎᖃᕈᓐᓇᖅᑐᒥᒃ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏ ᐃᑲᔪᖅᑐᐃᓯᒪᙱᑦᑐᑦ ᐊᖏᒡᓕᒋᐊᕈᒪᔾᔪᑎᒥᒃ, ᐊᒻᒪᓗ ᐊᒃᑐᐃᒍᑎᐅᓇᔭᖅᑐᓂᒃ ᐅᖃᕐᓯᒪᒋᓪᓗᑎᒃ ᐊᖑᓇᓱᒃᑎᓄᑦ ᐅᖃᐅᓯᐅᓯᒪᔪᓂᒃ.

ᐅᔭᕋᒃᓯᐅᕐᕕᒃ ᐱᓕᕆᐊᖃᖅᐸᓪᓕᐊᔪᖅ ᒪᐅᖓ 30 ᒥᓕᐊᓐ ᑖᓐᔅ ᐱᓕᕆᐊᖃᓕᕐᓂᕐᒥᒃ ᐊᒻᒪᓗ ᐃᓄᐃᑦ ᓱᓕ ᖃᐅᔨᓇᓱᒃᑐᑦ ᐅᓇ 6 ᒥᓕᐊᓐ ᑕᓐ ᐱᓕᕆᐊᖑᕙᒃᑐ ᐊᕙᑎᒋᔭᒧᑦ ᖃᓄᐃᑉᐸᓪᓕᐊᓂᖓᓂᒃ, ᐅᖃᕐᓯᒪᓚᐅᕐᑐᑦ ᐊᖑᓇᓱᒃᑏᑦ ᐅᖃᐅᓯᖏᑦ ᐃᓱᐊᒍᑦ.

“ᐃᓄᐃᑦ ᖃᐅᔨᕙᓪᓕᐊᓕᑕᐃᓐᓇᕐᒪᑕ ᐊᒃᑐᐃᒍᑎᖏᓐᓂᒃ ᐱᓕᕆᐊᕆᔭᐅᕙᓪᓕᐊᔫ,” ᐅᖃᕐᓯᒪᔪᑦ ᑎᑎᖃᑦ, ᐃᓚᖃᖅᖢᓂ ᐃᓱᒫᓘᑎᖃᖅᐸᓪᓕᐊᓂᖏᓐᓂᒃ ᐅᑯᐊ ᐹᕙᓐᓛᓐᑯᑦ ᐋᖅᑭᒋᐊᕈᑎᒋᓇᓱᒃᑕᖏᑦ ᓄᓇᒥ ᐊᑐᕈᑎᖃᙱᓐᓂᖏᓐᓂᒃ.

ᐃᓚᖏᑦ ᑲᑐᔾᔨᖃᑎᒌᑦ ᐊᒻᒪ ᕼᐋᒻᒪᓚᐅᔪᑦ ᐊᒃᑐᖅᑕᐅᓯᒪᔪᑦ ᐃᑲᔪᖅᐸᓪᓕᐊᓕᕐᑐᑦ ᐊᖏᒡᓕᒋᐊᕈᒪᓂᕐᒥᒃ. ᒥᑦᑎᒪᑕᓕᒃᒥ ᒪᐃᔭ ᔮᓱᐊ ᐋᕆᐊᒃ, ᕼᐋᒻᒪᓚᒃᑯᑦ ᐅᖃᐅᓯᒃᓴᖏᑦᑎᒍᑦ ᓇᓗᓇᐃᔭᐃᓚᐅᕐᑐᖅ ᐃᑲᔪᕈᑎᓂᒃ ᐅᔭᕋᒃᓯᐅᖅᕕᒃ ᓄᓇᓕᖕᓄᐊᖅᓯᒪᓕᖅᑕᖏᓐᓂᒃ ᐅᕝᕙᓘᓐᓃᑦ ᓄᓇᓕᖕᓄᐊᕐᓂᐊᑐᐃᓐᓇᖅᑕᖏᓐᓂᒃ, ᐃᓚᖃᖅᖢᓂ $16 ᒥᓕᐊᓐ ᑖᓚᐃ ᐊᑭᓕᐅᑎᐅᓯᒪᓕᕐᑐᑦ ᓄᓇᖃᖅᑐᓄᑦ ᑕᐃᒪᙵᓂᒃ 2015-ᒥ ᐊᒻᒪᓗ ᐱᓂᐊᕐᓂᕋᕐᓯᒪᔭᖓ ᐅᓇ $10 ᒥᓕᐊᓐ ᑖᓚᑐᖅᑐᖅ ᐃᓄᖕᓄᑦ ᐊᔪᕈᓐᓃᖅᓴᕐᕕᒃᓴᑦ ᐊᖏᒡᓕᒋᐊᖅᑕᐅᔪᒪᓂᖓ ᐊᖏᖅᑕᐅᒃᐸᑦ.

ᑭᖑᓪᓕᖅᐹᒥ ᑐᓯᓂᔪᓐᓇᕐᕕᖓᑦ ᐅᑯᐊ ᐹᕙᓐᓛᓐᑯ ᔭᓄᐊᕆ 24-ᖑᔪᖅ. ᑲᑎᒪᔨᑦ ᐃᓱᒪᓕᐅᕆᓂᐊᖅᖢᑎᒃ ᑐᓴᒐᒃᓴᐃᑦ ᓈᒻᒪᖕᒪᖔᑕ ᐃᓱᒪᓕᐅᕆᓂᐊᕐᓗᑎᒃ ᐊᒻᒪᓗ ᑲᑎᒪᓂᕐᒥᒃ ᐃᓱᓕᑦᑎᑦᑎᓗᑎᒃ.

ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕ ᑖᓂᐅᓪ ᕚᓐᑐᓪ ᑕᒪᑐᒥᖓ ᐊᖏᖅᑎᐅᓂᐊᖅᑐᖅ ᐋᒃᑳᕐᓗᓂᓘᓐᓃᑦ ᑲᑎᒪᔨᓂ ᐃᓱᒪᓕᐊᖑᔪᓂᒃ ᐱᓚᐅᕐᑎᓪᓗᒍ.