ᕿᑭᖅᑖᓘᑉ ᐅᐊᖕᓇᖓᓂ ᐃᓄᐃᑦ ᑲᑐᔾᔨᖃᑎᒌᖑᑎᑕᐅᔪᑦ ᐊᐱᖅᑯᑎᖃᕐᓂᐊᕐᑐᑦ ᐅᔭᕋᒃᓯᐅᕐᕕᒃ ᐊᖏᒡᓕᒋᐊᖅᑕᐅᔪᒪᓂᖓᓄᑦ

“ᓄᓇᖃᑎᕗᑦ ᑐᕐᖢᓛᑲᑕᒃᑑᒐᓗᐊᑦ ᑭᓯᐊᓂᓕ ᑐᓵᔭᐅᔪᓐᓇᙱᑦᑐᑦ,” ᐅᖃᖅᑐᖅ ᐃᒡᓗᓕᒃᒥ ᒪᐃᔭᖓ

ᐅᓇ ᐅᒥᐊᕐᔪᐊᖅ ᐊᐅᓪᓚᖅᐸᓪᓕᐊᓕᖅᑐᖅ ᐹᕕᓐᓛᓐ ᑐᓚᒃᑕᕐᕕᐊᓂᒃ ᓄᓘᔮᑦ ᕿᙳᐊᓂᒃ. ᕿᑭᖅᑖᓘᑉ ᐅᐊᖕᓇᖓᓂ ᓄᓘᔮᑦ ᐅᔭᕋᒃᓯᐅᕐᕕᐅᑉ ᖃᓂᒋᔭᖓᓃᑦᑐᑦ ᓄᓇᓕᖕᓂᒃ ᐱᓕᕆᖃᑎᒌᖑᔪᑦ ᑲᑐᔾᔨᖃᑎᒌᑦ ᐃᓱᒫᓘᑎᖃᓗᐊᕐᑐᑦ ᑐᒃᓯᕋᐅᑎᒋᔭᐅᔪᖅ ᐅᓄᕐᓯᕚᓪᓕᕈᑎᐅᓇᔭᕐᓂᖓᓂᒃ ᐅᒥᐊᕐᔪᓂᒃ ᐊᒃᑐᐃᒍᑎᖃᕋᔭᕐᒪᖔᑦ ᕿᓚᓗᒐᕐᓂᒃ ᑑᒑᓕᖕᓂᒃ ᑕᒪᐅᓈᖃᖅᑕᑦᑐᓂᒃ ᐅᐱᕐᙶᖑᓕᕌᖓᑦ. ᒫᓐᓇᒧᓪᓕ ᐅᑯᐊ ᐹᕕᓐᓛᓐᑯᑦ ᑕᒪᒃᑯᓂᖓ ᐃᓱᒫᓘᑎᓂᒃ ᐅᖃᐅᓯᖃᕈᓐᓇᙱᑦᑐᑦ, ᑲᑐᔾᔨᖃᑎᒌᑦ ᐅᖃᖅᑐᑦ. (ᐊᔾᔨᙳᐊᖁᑎᒋᔭᐅᔪᖅ)

By ᒦᒐᓐ ᑎᐅᓕᖕ
ᓄᓇᓕᖕᓂ ᑐᓴᒐᒃᓴᓕᕆᓂᕐᒧᑦ ᐱᓕᕆᐊᓄᑦ ᑐᓴᒐᒃᓴᓕᐅᕐᑎ

For an English version of this story, see North Baffin Inuit form new group to raise concerns about proposed mine expansion

ᓯᕗᓕᐅᕐᑎᐅᔪᓂᒃ ᑕᓪᓕᒪᓂᑦ ᕿᑭᖅᑖᓘᑉ ᐅᐊᖕᓇᖓᑕ ᓄᓇᓕᖏᓐᓂ ᑲᑎᖃᑎᒌᖕᓂᐊᓕᕐᑐᑦ ᐃᒪᐃᑦᑑᓂᐊᕐᓗᑎᒃ ᕿᑭᖅᑖᓘᑉ ᐅᐊᖕᓇᖓᓄᑦ ᑲᑐᔾᔨᖃᑎᒌᖑᓕᕐᓗᑎᒃ ᐃᓱᒫᓘᑎᒋᔭᐅᔪᓂᒃ ᑐᓴᖅᑎᑦᑎᔨᐅᓂᐊᕐᓗᑎᒃ ᓈᒻᒪᓛᖑᒋᔭᖏᓐᓂᒃ ᐃᓄᖕᓄᑦ ᐅᑯᓄᖓ ᐅᔭᕋᒃᓯᐅᕐᕕᒃᒧᑦ ᐊᒻᒪᓗ ᑲᑐᔾᔨᖃᑎᒌᓄᑦ ᑭᒡᒐᖅᑐᐃᔨᐅᑎᑕᐅᔪᓂᒃ ᑖᒃᑯᓄᖓ.

ᐃᓱᒫᓘᑎᒋᔭᐅᔪᑦ ᑐᓴᖅᑕᐅᙱᑉᐸᑕ, ᑖᒃᑯᐊ ᑲᑐᔾᔨᖃᑎᒌᒃᑐᑦ ᐅᖃᕐᓯᒪᔪᑦ ᐹᕕᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᒃ ᑯᐊᐳᕇᓴᒃᑯᑦ ᐊᐅᓚᑕᖏᑦ ᓄᓘᔮᖕᓂ ᐅᔭᕋᒃᓯᐅᕐᕕᒃᒥ ᓄᖅᑲᖅᑎᑕᐅᓂᐊᕐᓂᖏᓐᓂᒃ.

“ᐅᓇ ᑐᓴᒐᒃᓴᖅ ᑕᐃᒪᐃᓯᒪᐃᓐᓇᖅᑐᖅ ᑕᐃᒪᙵᑦ ᐹᕕᓐᓛᓐ ᐱᒋᐊᓚᐅᕐᓯᒪᖕᒪᑦ—ᐱᓕᕆᖃᑎᖃᕈᔅᓯ ᐃᓄᖕᓂ ᑲᔪᓯᑦᑎᐊᕐᓂᐊᖅᑐᓯ. ᐃᓄᑑᓗᓯ ᐱᓕᕆᒍᔅᓯ, ᑲᑕᑐᐃᓐᓇᕐᓂᐊᕐᑐᓯ,” ᐅᖃᖅᑐᖅ ᐃᐅᕆᒃ ᐆᑐᕙᒃ, ᐃᒃᓯᕙᐅᑕᖅ ᒥᑦᑎᒪᑕᓕᒃᒥᑦ ᐊᖑᓇᓱᒃᑐᓕᕆᔨᓄᑦ.

ᒥᑦᑎᒪᑕᓕᒃ, ᐃᒡᓗᓕᒃ, ᑲᖏᖅᑐᒑᐱᒃ, ᐃᒃᐱᐊᕐᔪᒃ ᐊᒻᒪᓗ ᓴᓂᕋᔭᒃ ᖃᓂᒃᓴᓛᖑᖕᒪᑕ ᓄᓘᔮᖕᓂ ᐅᔭᕋᒃᓯᐅᕐᕕᒃᒧᑦ. ᐃᓄᐃᑦ ᑖᒃᑯᓇᓂ ᓄᓇᖃᖅᑐᑦ ᐅᔾᔨᕆᓯᒪᓂᕋᕐᒪᑕ ᕿᓚᓗᒐᐃᑦ ᑑᒑᓖᑦ ᐊᒻᒪ ᑐᒃᑐᐃᑦ ᐅᔭᕋᒃᓯᐅᕐᕕᖕᒧᑦ ᐊᒃᑐᖅᑕᐅᓯᒪᓂᖏᓐᓂᒃ ᑕᐃᒪᙵᑦ ᐱᒋᐊᓚᐅᕐᓯᒪᖕᒪᑦ 2015-ᒥᑦ.

“ᑎᑎᖃᑦ ᒫᓐᓇ ᓴᖅᑭᑕᐅᑲᑕᒃᑐᑦ ᐊᔾᔨᖃᙱᒻᒪᑕ ᓄᓇᓖᑦ ᑕᐅᑐᒃᐸᓪᓕᐊᔭᖏᓐᓂᒃ,” ᐅᖃᖅᑐᖅ ᒧᓕᓐ ᕋᓰᓄᔅ, ᐃᒡᓗᓕᒃᒥ ᒪᐃᔭ.

“ᓄᓇᖃᑎᕗᑦ ᑐᕐᖢᓛᑲᑕᒃᑑᒐᓗᐊᑦ ᑭᓯᐊᓂᓕ ᑐᓵᔭᐅᔪᓐᓇᙱᑦᑐᑦ,” ᐅᖃᖅᑐᖅ.

ᐹᕕᓐᓛᓐᑯᑦ ᐸᕐᓇᐅᑎᖓ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᒫᓐᓇ ᖃᐅᔨᓴᖅᑕᐅᕙᓪᓕᐊᖕᒪᑦ ᐊᕙᑎᓕᕆᓂᒃᑯᑦ. ᐊᖏᒡᓕᒋᐊᖅᑎᑦᑎᓂᖅ ᓄᖃᖅᑎᑕᐅᓚᐅᕐᑐᖅ ᓲᖃᐃᒻᒪ ᓄᓇᓕᖕᓂ ᓯᕗᓕᐅᕐᑎᐅᔪᑦ ᕿᑭᖅᑖᓘᑉ ᐅᐊᖕᓇᖓᑕ ᓄᓇᓕᖏᓐᓂᒃ ᓈᒻᒪᒃᓴᓚᐅᙱᒻᒪᑕ ᑐᓴᒐᒃᓴᕆᔭᐅᔪᓂᒃ ᐅᔭᕋᒃᓯᐅᕐᕕᖕᒥᑦ ᐋᖅᑭᒋᐊᕈᑎᒋᓇᔭᖅᑕᖏᓐᓂᒃ ᐊᒃᑐᐃᒍᑎᐅᔪᓂᒃ ᐆᒪᔪᓂᒃ ᑕᒫᓃᑉᐸᒃᑐᓂᒃ.

ᕿᑭᖅᑕᓂ ᐃᓄᐃᑦ ᑲᑐᔨᖃᑎᒌᖏᑦ ᒪᓕᒐᖅᑎᒍᑦ ᑭᒡᒐᖅᑐᐃᔨᐅᔪᑦ ᐃᓄᖕᓂᒃ ᑖᒃᑯᓇᓂ ᓄᓇᓕᖕᓃᑦᑐᓂᒃ. ᑭᓯᐊᓂᓕ, ᕿᑭᖅᑖᓘᑉ ᐅᐊᖕᓇᖓᓂᒃ ᓄᓇᓖᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑎᓕᐅᓚᐅᕐᓂᖏᓐᓂᒃ ᐃᓄᖕᓂᒃ ᓇᓗᓇᐃᕐᓯᓂᕐᒥᒃ ᐊᖏᕈᑎᓂᒃ ᐅᑯᐊᓗᑦ ᐹᕕᓐᓛᑯᑦ ᔪᓚᐃ ᐱᒋᐊᓕᓵᕐᓯᒪᑎᓪᓗᒍ ᐅᖃᖃᑎᖃᓚᐅᙱᖢᑎᒃ ᓄᓇᓕᖕᓂᑦ ᑕᒫᓃᑦᑐᓂᒃ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑕᒪᑐᒥᖓ ᑕᐃᒪᐃᓯᒪᙱᓐᓂᕋᖅᑐᑦ. ᐅᖃᖅᑎᒋᔭᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᖃᕋᓴᐅᔭᒃᑯ ᑎᑎᕋᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᓇᓗᓇᐃᔭᐃᓯᒪᓪᓗᓂ ᐅᓪᓗᕐᓂᒃ ᑲᑎᒪᔾᔪᑎᖃᕈᑎᓂᒃ ᐋᖅᑭᒃᓱᖅᑕᐅᓯᒪᓪᓗᑎᒃ ᓄᓇᓕᖕᓂᑦ ᐊᔾᔨᒌᖏᑦᑐᓂᒃ ᑲᑐᔾᔨᖃᑎᒌᓂᒃ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑦᑎᒍᑎᖏᑦ ᖃᓄᐃᓕᐅᒐᒃᓴᖏᓐᓂᒃ, ᐅᖃᕐᓯᒪᓪᓗᓂ ICA ᓇᓗᓇᐃᔭᖅᑕᐅᓯᒪᓚᐅᕐᓂᖓᓂ “ᐅᖃᐅᓰᑦ ᖃᓄᐃᓕᖓᓂᖏᑦᑎᒍᑦ.”

ᑭᓯᐊᓂᓕ ᕋᓰᓄᔅ ᐅᖃᓚᐅᕐᒥᔪᖅ ᑕᐃᒪᐃᓕᐅᓚᐅᕐᓂᖏᓐᓂᒃ ᐅᑯᓂᖓ ᐃᓄᐃᑦ ᑐᓴᐅᒪᔭᐅᑎᑕᐅᓂᐊᕐᓂᖏᓐᓄᑦ ᐊᖏᕈᑎᓂᒃ ᐊᑎᓕᐅᓚᐅᕐᑎᓪᓗᒋᑦ. “ᐅᖃᖃᑎᒌᖕᓂᐅᖃᑦᑕᙱᒻᒪ ᐊᑎᓕᐅᕐᑕᐅᔪᖃᓚᐅᕐᑎᓪᓗᒍ,” ᐅᖃᖅᑐᖅ. “ᐅᓇᓕ ᓴᖅᑭᑎᑦᑎᓂᐅᔪᖅ.”

ᐊᑎᓕᐅᖅᑕᐅᓚᐅᕐᓂᖓ ᐅᓇ ᐃᓄᐃᑦ ᑐᓴᐅᒪᔭᐅᑎᑕᐅᕐᓂᐊᕐᓂᖏᓐᓄᑦ ᐊᖏᕈᑎ, ᐅᑯᐊ ᕿᑭᖅᑖᓘᑉ ᐅᐊᖕᓇᖓᓂ ᓄᓇᓕᖕᓄᑦ ᑲᑐᔾᔨᖃᑎᒌᖕᓂᒃ ᐅᖃᓪᓚᑲᑕᒍᑎᐅᓕᓚᐅᕐᑐᖅ ᐊᑕᐅᓯᖅᑎᑑᖓᓪᓗᑎᒃ ᓯᕗᓪᓕᖅᐹᒥᓐ.

ᑖᒃᑯᐊ ᑲᑐᔾᔨᖃᑎᒌᖑᔪᑦ ᐅᑯᓂᖓ ᐃᓚᖃᖅᑐᑦ ᕼᐋᒻᒪᓚᒃᑯᓐᓄᑦ ᓯᕗᓕᐅᕐᑎᓂᒃ ᐊᒻᒪ ᐃᒃᓯᕙᐅᑕᕆᔭᐅᔪᓂᒃ ᐊᖑᓇᓱᒃᑎᓕᕆᔨᓄᑦ ᓄᓇᓕᖕᓂᑦ ᑖᒃᑯᓇᓂ ᑕᓪᓕᒪᓂᒃ ᑕᒪᐃᓐᓂᒃ.

ᐆᑦᑐᕙ ᐅᖃᓚᐅᕐᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑎᓕᐅᕐᓚᐅᕐᓂᕋᖅᖢᓂᒋᑦ ᐆᒥᖓ ᐃᓄᐃᑦ ᑐᓴᐅᒪᔭᐅᑎᑕᐅᓂᐊᕐᓂᖏᓐᓄᑦ ᐊᖏᕈᑎᓂᒃ ᐅᖃᖃᑎᖃᓚᐅᙱᖢᑎᒃ ᐃᓄᖕᓂᒃ ᖃᐅᔨᒪᔪᓂᒃ ᐊᒃᑐᐃᒍᑎᐅᔪᓂᒃ ᐅᔭᕋᒃᓯᐅᕐᕕᒃᒧᑦ, ᐊᒻᒪᓗ ᑕᐃᒪᐃᓐᓂᖓᓄᑦ ᑖᒃᑯᐊ ᑲᑐᔾᔨᖃᑎᒌᖑᔪᑦ ᐃᓄᖕᓂ ᑭᒡᒐᖅᑐᐃᙱᓐᓂᖏᓐᓂᒃ.

“ᐃᒪᓐᓇᐅᖂᔨᖕᒪᑕ ᓇᖕᒥᓂᕐᒥᓂᒃ ᐊᐅᓚᑦᑎᑐᐃᓐᓇᖅᖢᑎᒃ,” ᐅᖃᖅᑐᖅ.

ᕿᑭᖅᑖᓘ ᐅᐊᖕᓇᖓᓂ ᓄᓇᓕᖕᓂ ᑲᑐᔾᔨᖃᑎᒌᖑᔪᑦ ᐱᓕᕆᖃᑎᖃᕈᒪᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᖃᐅᔨᕚᓪᓕᕐᓂᐊᕐᒪᑕ ᖃᓄᖅ ᑖᓐᓇ ᐊᖏᒡᓕᕚᓪᓕᖅᑎᑦᑎᓂᖅ ᖃᓄᐃᓕᖓᓇᔭᕆᐊᒃᓴᖓ ᓄᓇᓕᖕᓄᑦ.

ᐊᖏᒡᓕᒋᐊᖅᑎᑦᑎᓂᖅ ᐃᒪᐃᓕᖓᔪᖅ “ᑭᖑᕚᒃᓴᓕᕇᖕᓅᖓᖕᒪᑦ ᐃᓱᒪᓕᐊᖑᔪᖅ,” ᐅᖃᖅᑐᖅ ᕋᓰᓄᔅ.

“ᖃᐅᔨᓚᐅᕐᑎᓪᓗᑕ ᑭᓱᓂ ᐊᓯᐅᔨᓇᔭᕐᓂᑦᑎᓐᓂᒃ ᐊᒻᒪ ᑭᓱᓂ ᐱᔪᓐᓇᕋᔭᕐᓂᑦᑎᓐᓂᒃ ᑕᐃᒪᓕ ᓄᓇᓕᖕᓄᐊᑲᑕᒡᓗᑕ ᐅᖃᖃᑎᖃᖃᑦᑕᕐᓂᐊᕐᑐᒍᑦ,” ᐅᖃᖅᑐᖅ.

ᑖᒃᑯᐊᓕ ᕿᑭᖅᑖᓘᑉ ᐅᐊᖕᓇᖓᓂ ᓄᓇᓕᖕᓄᑦ ᑲᑐᔾᔨᖃᑎᒌᖑᔪ ᖃᐅᔨᓚᐅᕐᑎᓪᓗᒋᑦ ᐃᓄᖕᓂ ᓄᓇᓕᖕᓃᑦᑐᓂ ᖃᓄᐃᑦᑐᓂᒃ ᐱᔪᒪᖕᒪᖔᑦ, ᑕᐃᒪᓕ ᑐᓴᖅᑕᖏᑦ ᑐᓴᖅᑕᐅᑎᑕᐅᓇᔭᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ, ᑖᒃᑯᐊᓗ ᐹᕕᓐᓛᓐᑯᓐᓂᒃ ᑐᓴᖅᑎᑦᑎᓕᕐᓗᑎᒃ, ᕋᓰᓄᔅ ᐅᖃᖅᑐᖅ.

ᑖᒃᑯᐊ ᑲᑐᔾᔨᖃᑎᒌᒃᑐᑦ ᖃᐅᔨᒪᖁᔨᔪᑦ ᐅᔭᕋᒃᓯᐅᕐᓂᕐᒥᒃ ᓈᒻᒪᒃᓴᙱᓐᓂᕋᙱᖢᑎᒃ. “ᓈᒻᒪᒃᑐᒃᑯᑦ ᐱᓕᕆᐊᕆᓚᐅᕐᓚᕗ,” ᐅᖃᖅᑐᖅ ᔫᓱᐊ ᐋᕆᐊᒃ, ᒥᑦᑎᒪᑕᓕᒃᒥᑦ ᒪᐃᔭᐅᔪᖅ. “ᓂᕐᔪᑏᑦ ᐊᒃᑐᖅᑕᐅᒍᑎᒃ ᑮᓇᐅᔭᓄᑦ ᐅᑎᖅᑎᑕᐅᔾᔮᙱᑦᑐᑦ.”

ᐹᕕᓐᓛᓐᑯ ᐊᖏᒡᓕᒋᐊᖅᑎᑦᑎᔪᒪᖕᒪᑕ ᐊᕐᕌᒍᒥ ᐲᔭᕐᐸᓪᓕᐊᕙᒃᑕᖏᓐᓂᒃ ᐊᒻᒪ ᐊᐅᓪᓚᖅᑎᑉᐸᓪᓕᐊᖃᑦᑕᖅᑕᖏᓐᓂᒃ ᓴᕕᕋᔭᒃᓴᓂᒃ ᐅᑯᓇᙵᑦ 6 ᒥᓕᐊᓐ ᑕᓐᔅᓂᑦ 12 ᒥᓕᐊᓐ ᑕᓐᔅᓄᑦ. ᑕᐃᒪᐃᑦᑐᓐᓇᕐᓂᐊᕐᓗᑎᒃ, ᓴᓇᔪᒪᖕᒪᑕ ᓄᓇᓯᐅᑎᑯᑖᒧᑦ ᐊᖅᑯᑎᒥᒃ ᓴᕕᕋᔭᒃᓴᒥ ᐅᓯᑲᖅᑕᕈᑎᐅᓂᐊᕐᑐᒥᒃ ᐅᔭᕋᒃᓯᐅᕐᕕᖕᒥᑦ ᐅᕗᖓ ᓄᓘᔮᑦ ᕿᙳᐊᓄᑦ, ᐊᒻᒪᓗ ᐅᒥᐊᕐᔪᐊᒃᑰᖅᑐᒃᓴᓂᒃ ᐅᓄᕐᓯᕚ[ᓕᖅᑎᑦᑎᓗᑎᒃ ᑭᓴᕐᕕᒃᒧᑦ.

ᓄᓇᓖᑦ ᒫᓐᓇ ᖃᐅᔨᒪᓗᐊᙱᒻᒪᑕ ᖃᓄᖅ ᑕᒪᓐᓇ ᐊᒃᑐᐃᒍᑎᐅᒃᑲᓐᓂᕋᔭᕆᐊᒃᓴᖓᓂᒃ ᐆᒪᔪᓂᒃ ᐊᖑᓇᓱᖃᑦᑕᖅᑕᖏᓐᓂᒃ, ᐱᓗᐊᕐᑐᒥᓐ ᕿᓚᓗᒐᕐᓂᒃ ᑑᒑᓕᖕᓂᒃ ᐊᒻᒪ ᑐᒃᑐᓂᒃ. ᐃᓱᒫᓘᑎᐅᔪᕐᓗ ᑖᒃᑯᐊ ᓂᕐᔪᑏᑦ ᑕᒪᐅᙵᖃᑦᑕᕈᓐᓃᕋᔭᕐᓂᖏᓐᓂᒃ, ᐊᒻᒪᓗ ᐃᓚᒋᔭᐅᓗᑎᒃ ᓄᓇᒥ ᖃᐅᔨᒪᓂᖅ, ᐃᓕᖅᑯᓯᖅ ᐊᒻᒪ ᐅᖃᐅᓰᑦ, ᕋᓰᓄᑦᔅ ᐅᖃᖅᑐᖅ.

“ᓄᓇᓖᑦ ᐃᓱᒪᓕᐅᕆᔨᐅᔭᕆᐊᖃᖅᑐᑦ ᓯᕗᒧᑦ ᐱᕙᓪᓕᐊᓂᐊᕈᒪᒍᑎᒃ,” ᐅᖃᖅᑐᖅ.

ᑖᒃᑯᐊ ᑲᑐᔾᔨᖃᑎᒌᖑᔪᑦ ᑲᑎᕐᓱᐃᕙᓪᓕᐊᔪᑦ ᖃᓄᐃᓕᐅᖁᔭᐅᔾᔪᑎᕕᓂᕐᓂᒃ ᐅᑯᓇᙵᑦ ᐹᕕᓐᓛᓐᑯᓐᓂᒃ ᑐᓂᔭᐅᓯᒪᒧᓂᒃ, ᕋᓰᓄᑦ ᐅᖃᖅᑐᖅ, ᐊᒻᒪᓗ ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᑐᓂᔭᐅᓂᐊᖅᖢᑎᒃ.

ᐱᓕᕆᐊᖃᕐᒥᔪᑦ ᑲᑐᔾᔨᓪᓗᑎᒃ ᑐᓴᕋᓱᒃᖢᑎᒃ ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᒃᓴᒧᑦ ᐸᕐᓇᒃᐸᓪᓕᐊᓪᓗᑎᒃ. ᐃᓱᒪᖕᒪᑕ ᐃᒪᓐᓇ ᐅᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᖃᑎᖃᕈᓐᓇᖁᓪᓗᒋᑦ ᕿᑭᖅᑖᓘᑉ ᐅᐊᖕᓇᖓᓂ ᓄᓇᓖᑦ ᑲᑐᔾᔨᖃᑎᒌᓂᒃ ᐊᒻᒪ ᑭᒡᒐᖅᑐᐃᓂᐊᕐᓗᑎᒃ ᐃᓱᒪᒋᔭᖏᓐᓂᒃ ᐅᔭᕋᒃᓯᐅᕐᕕᒃᒧᑦ. ᑕᐃᒪᐃᔾᔮᙱᑉᐸᑦ, ᕋᓰᓄᔅ ᐅᖃᖅᑐᖅ, ᑕᐃᒪᓕ ᑖᒃᑯᐊ ᑲᑐᔾᔨᖃᑎᒌᖑᔪ ᐅᖃᕈᓐᓇᕐᕕᖃᕈᒪᓂᕐᒧᑦ ᐱᔪᓐᓇᕈᓐᓇᕐᓂᐊᕈᒪᔪ ᐃᖕᒥᖕᓂᒃ ᑭᒡᒐᖅᑐᐃᔪᓐᓇᕐᓂᐊᕐᒪᑕ ᖃᐅᔨᓴᖅᐸᓪᓕᐊᓂᕐᒥᒃ ᐱᓕᕆᐊᖃᖅᑎᓪᓗᒋᑦ.

ᒫᓐᓇᓕ ᓄᓇᓖᑦ ᐊᒻᒪ ᐊᖑᓇᓱᒃᑐᓕᕆᓂᕐᒧᑦ ᑲᑐᔾᔨᖃᑎᒌᖑᔪᑦ ᐱᔪᓐᓇᕐᓂᖃᕐᒪᑕ ᐊᑐᓂ ᐅᖃᕈᓐᓇᕐᕕᖃᕈᓐᓇᕐᓂᕐᒥᒃ. ᐃᒪᐃᑦᑐᓐᓇᕐᓂᐊᕈᒪᖕᒪᑕ ᓇᓗᓇᐃᔭᐃᓗᑎᒃ ᐊᐱᖅᑯᑎᒃᓴᓂᒃ ᐊᒻᒪ ᐃᓱᒫᓘᑎᐅᔪᓂᒃ ᑭᒃᑯᓕᒫᓄᑦ ᑕᒫᓂ ᐊᒻᒪᓗ ᓴᖅᑭᑎᓪᓗᓂᔾᔪᒃ ᑲᑐᔾᔨᖃᑎᒌᖕᓂᒃᑯᑦ ᐊᒻᒪ ᑕᐃᒪᓐᓇ ᑐᓴᖅᑕᐅᔪᓐᓇᕐᓂᐊᕐᓗᑎᒃ.

“ᑕᑯᖃᑦᑕᕋᑦᑎᒍᑦ ᐅᒥᐊᕐᔪᐊᑦ ᖃᐅᑕᒫᓐ,” ᐆᑦᑐᕙᒃ ᐅᖃᖅᑐᖅ. “ᐅᑯᐊ ᐹᕕᓐᓛᓐ ᐃᓄᖏᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐅᖃᖃᑎᖃᖃᑦᑕᖅᑐᑦ ᐊᒻᒪᓗ ᓄᓇᖃᙱᖢᑎᒃ ᒥᑦᑎᒪᑕᓕᒃᒥᑦ, ᑕᐃᒪᓕ ᑕᑯᖃᑦᑕᙱᑦᑐᑦ ᐊᒃᑐᐃᒍᑎᐅᕙᒃᑐᓂᒃ. ᑕᐅᑐᑐᐃᓐᓇᕐᒪᑕ ᑮᓇᐅᔭᖅᑖᕆᕙᓪᓕᐊᔭᖏᓐᓂᒃ.”

ᐅᓇ ᑕᐅᑐᒃᖢᒍ ᐃᓱᒪᓕᐊᕆᔭᐅᓂᖅ ᐊᖏᒡᓕᒋᐊᖅᑎᑦᑎᔪᒪᓂᖅ ᑭᖑᕚᒃᓴᒃᓅᖓᓂᖓᓄᑦ, ᐋᕆᐊᒃ ᐅᖃᓚᐅᕐᑐᖅ ᑕᒪᓐᓇ ᑐᐊᕕᖅᑕᐅᔭᕆᐊᖃᙱᓐᓂᖓᓂᒃ.

“ᐅᔭᕋᒃᓯᐅᕐᕕᒃ ᒪᑐᒍᓂ ᑕᐃᒪᓕ ᒪᑐᓗᓂ,” ᐋᕆᐊᒃ ᐅᖃᖅᑐᖅ. “ᓴᕕᕋᔭᒃᓴᖅ ᐱᑕᖃᕈᓐᓃᔾᔮᙱᒻᒪᑦ. ᑕᐃᒪᓕ ᖃᓄᐃᒻᒪ ᑐᐊᕕᖅᐸ?”

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᐱᖅᓱᖅᑕᐅᔪᒪᓚᐅᙱᑦᑐᑦ ᑭᓯᐊᓂᓕ ᐅᖃᖅᑎᒋᔭᐅᔪᖅ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᖃᓂᒃ ᓂᕆᐅᖕᓂᕋᖅᖢᑎᒃ ᐱᓕᕆᖃᑎᖃᕐᓂᐊᕐᓂᕐᒥᒃ ᐊᒃᑐᖅᑕᐅᓯᒪᔪᓂᒃ ᓄᓇᓕᖕᓂᒃ.

Share This Story

(0) Comments