ᕿᒥᕐᕈᐊᕐᓂᐅᔪᖅ ᖃᐅᔨᔾᔪᑎᐅᕗᖅ ᐸᓖᓯᒃᑯᑦ ‘ᐸᓯᔭᒃᓴᐅᓚᐅᙱᓐᓂᖏᓐᓂᒃ’ ᑭᙵᓂ ᐊᖑᑎᓂ ᖁᑭᖅᓯᓂᕐᒥᒃ

For English version, see Review finds RCMP officers ‘justified’ in shooting Kinngait man

ᐸᓯᔭᒃᓴᓕᕆᔨᒃᑯᑦ ᑲᓇᑕᒥ ᐱᐊᓂᓚᐅᕐᑐᑦ ᖃᐅᔨᓴᖅᑕᖏᓐᓂᒃ ᒪᕐᕉᒃ ᐸᓖᓰᒃ ᑭᙵᓂ ᖁᑭᕐᓯᓚᐅᖅᑎᓪᓗᒋᑦ ᐊᖑᑎᒥ ᐊᕐᕌᓂᐅᓚᐅᕐᓯᒪᔪᖅ ᐅᖃᖅᖢᑎᒃ ᖃᓄᐃᓕᐅᕈᑎᖏᓐᓂᒃ ᐸᓯᔭᒃᓴᐅᓚᐅᙱᓐᓂᖏᓐᓂᒃ.

ᑕᖅᑭᐅᓚᐅᕐᑐᖅ ᐸᓯᔭᒃᓴᓕᕆᔨᒃᑯᑦ ᑐᓴᒐᒃᓴᓕᐅᓚᐅᕐᑐᑦ ᕿᒥᕐᕈᐊᕈᑎᒋᓚᐅᕐᑕᖏᓐᓂᒃ ᐸᓖᓯᒃᑯᑦ ᐅᓂᒃᑳᖏᓐᓂᒃ ᒪᕐᕉᒃ ᐸᓖᓰᒃ ᖁᑭᖅᓯᓚᐅᕐᓯᒪᑎᓪᓗᒋᑦ ᕿᙵᓂ ᐅᒃᑑᐱᕆ 15, 2021-ᒥ.

ᐸᓖᓯᒃᑯᑦ ᐃᒻᒥᒃᑰᖓᔪᒥᒃ ᖃᐅᔨᓴᓚᐅᕐᓯᒪᖕᒪᑕ ᖁᑭᖅᓴᖅᑐᕕᓂᕐᓂᒃ. ᖃᐅᔨᔭᐅᓂᑯᑦ ᐸᓯᔭᒃᓴᓕᕆᔨᓄᑦ ᕿᒥᕐᕈᐊᖅᑕᐅᓚᐅᕐᓯᒪᓪᓗᑎᒃ.

ᖁᑭᕐᓴᕐᓂᖅ ᐋᓐᓂᕐᓯᔾᔪᑎᐅᓚᐅᕐᓯᒪᔪᖅ 30-ᓂ ᐊᕐᕌᒍᓕᖕᒥ ᐊᖑᑎᒥ. ᐸᓯᔭᒃᓴᓕᕆᔨᒃᑯᑦ ᐅᖃᕈᒪᓚᐅᙱᑦᑐᑦ ᑖᔅᓱᒧᖓ ᐸᓯᔭᒃᓴᐅᑉ ᐊᑎᖓᓂᒃ ᑐᓴᒐᒃᓴᖏᑦᑎᒍᑦ.

ᑭᓯᐊᓂᓕ, ᓄᓇᑦᓯᐊᕐᒥ ᐱᕙᓪᓕᐊᔪᑦ ᓯᕗᓂᐊᓂ ᐅᓂᒃᑳᓕᐅᓚᐅᕐᓯᒪᖕᒪᑕ ᐸᐱᓇ ᐲᑕᐅᓛᓯ, 30-ᓂ ᐅᑭᐅᓕᒃ ᑕᐃᔅᓱᒪᓂ, ᑎᒍᔭᐅᓚᐅᕐᓯᒪᖕᒪᓐ ᐅᒃᑑᐱᕆ 15, 2021-ᒥ, ᐊᒻᒪᓗ ᐸᓯᔭᒃᓴᙳᖅᑎᑕᐅᓪᓗᓂ ᓱᒋᐅᑎᖃᕐᓂᖓᓂᒃ ᖁᐊᕐᓵᕐᓇᖅᑐᒧᑦ ᐊᑐᕈᒪᓂᕐᒧᑦ, ᐱᓯᒪᓂᖓᓂᒃ ᓱᒋᐅᑎᒥᒃ ᐱᓯᒪᖁᔭᐅᓯᒪᙱᖢᓂ, ᑐᕌᖅᑎᓐᓂᕐᒥᒃ ᖁᑭᐅᑎᒥᒃ, ᐊᒻᒪᓗ ᒪᕐᕉᖕᓂ ᐸᓯᔭᒃᓴᐅᔾᔪᑎᓂᒃ ᖁᑭᐅᑎᒥ ᐅᔾᔨᕐᓱᑦᑎᐊᕋᓂ ᐊᑐᕐᓂᖓᓂᒃ.

ᐸᓖᓯᒃᑯᑦ ᓯᕗᓪᓕᕐᒥ ᑕᒻᒪᖅᖢᑎᒃ ᓇᓗᓇᐃᕐᓯᓚᐅᕐᓯᒪᔪᑦ ᐲᑕᐅᓛᓯᒥ ᐊᔾᔨᒋᙱᑕᖓᓂᒃ ᓯᕗᓕᕐᒥ ᐊᑎᖃᕐᓂᕋᖅᑕᐅᓪᓗᓂ. ᑎᑎᕋᖅᑕᐅᕙᓪᓕᐊᓯᒪᔪᑦ ᐱᔭᐅᓚᐅᕐᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᓇᕗᒥᑦ ᐃᖅᑲᖅᑐᐃᔨᒃᑯᓐᓂ ᓴᖅᑭᑎᑦᑎᓯᒪᓚᐅᕐᑐᑦ ᐲᑕᐅᓛᓯ ᑕᒻᒪᖅᖢᑎᒃ ᐃᖅᑲᖅᑐᐃᕕᒃᑎᒍᑦ ᓇᓗᓇᐃᖅᑕᐅᓯᒪᓚᐅᕐᓂᖓᓂᒃ.

2021-ᒥ ᖃᓄᐃᓕᐅᕈᓯᕐᒥ, ᐸᓖᓯᒃᑯᑦ ᐅᖃᐅᓯᐅᔪᒥᒃ ᖁᑭᕆᐊᑲᑕᒃᑐᒥ ᑕᑯᔭᕐᑐᓕᓚᐅᕐᓯᒪᖕᒪᑕ ᐸᓖᓯᒃᑯᑦ ᑎᑎᕋᕐᕕᖓᑕ ᓯᓚᑖᓂ ᐊᒻᒪᓗ ᑭᙵᐃᑦ ᐃᓄᖏᑦ ᐃᓯᕐᓯᒪᖁᔭᐅᓪᓗᑎᒃ.

ᐸᓯᔭᒃᓴᓕᕆᔨᒃᑯᑦ ᐋᖅᑭᒃᓯᓚᐅᕐᑐᑦ “ᖃᓄᐃᓕᐅᕈᑎᐅᔪᖅ ᐊᓖᓯᑦ ᐱᓕᕆᐊᖃᖅᑐᑦ ᐊᓯᖏᓪᓗ ᐸᓖᓯᐅᔪᑦ ᐊᒻᒪ ᑭᒃᑯᑐᐃᓐᓇᐃᑦ ᑲᑉᐱᐊᓇᖅᑐᒦᓚᐅᕐᓯᒪᓂᖏᓐᓂᒃ,” ᐅᓂᒃᑳᑦ ᐅᖃᕐᓯᒪᓚᐅᕐᑐᖅ.

ᑖᓐᓇ ᐃᓄᒃ ᐅᖃᐅᓯᐅᓚᐅᕐᑐᖅ ᑐᕌᕐᑎᕐᓂᕋᖅᑕᐅᓪᓗᓂ ᐃᓕᓐᓂᐊᖅᑐᓄᑦ ᓄᓇᓯᐅᑎᒧᑦ ᓱᕈᓯᖃᐅᖅᑐᒥ, ᐸᓖᓯᒃᑯᑦ ᑎᑎᕋᕐᕕᖓᓄᑦ ᐊᒻᒪᓗ ᐸᓖᓯᓄᑦ.

“ᐸᓖᓯᒃᑯᑦ ᑲᑉᐱᐊᓱᓚᐅᕐᒪᑕ ᑖᓐᓇ ᐃᓄᖃᕕᖕᒧᐊᕐᓂᐊᕋᓱᒋᔭᐅᓪᓗᓂ ᖁᑭᐅᑎᓕᔭᕐᓗᓂ. ᑕᐃᒪᐃᓕᐅᕐᓂᖓᓄᑦ, ᓈᒻᒪᑐᐃᓐᓇᓚᐅᕐᐳᖅ ᐊᒻᒪᓗ ᒪᓕᒐᖅᑎᒍᑦ ᐸᓯᔭᒃᓴᐅᙱᖢᑎᒃ ᐸᓖᓯᒃᑯᑦ ᑯᑭᕐᓴᓕᕐᒪᑕ ᐃᒻᒥᖕᓂ ᐊᒻᒪ ᐊᓯᖏᓐᓂᒃ ᓴᐳᔾᔨᓯᒪᓇᓱᒃᖢᑎᒃ,” ᐅᓂᒃᑳᖅ ᐅᖃᕐᓯᒪᓚᐅᕐᑐᖅ.

ᐸᓯᔭᒃᓴᓕᕆᔨᒃᑯᑦ ᐅᓂᒃᑳᖏᓐᓂᒃ ᐱᐊᓂᒃᓯᓚᐅᕐᑐᑦ ᑖᓐᓇ ᖁᑭᕐᓴᕐᓂᖓᑦ ᓇᓗᓇᐃᕐᑕᐅᓯᒪᓂᖓᓂᒃ ᐃᓚᖓ 25-ᒥ ᐱᕋᔭᒃᑐᓕᕆᓂᕐᒧᑦ ᒪᓕᒐᓂᒃ, ᑕᕝᕙᓂᓗ ᐅᖃᕐᓯᒪᓪᓗᓂ ᐸᓖᓯᒃᑯᑦ ᐊᒃᓱᕈᕈᓐᓇᕐᓂᖏᓐᓂᒃ ᐃᓚᖏᒍᑦ ᖃᓄᐃᓕᐅᕈᑎᐅᔪᓂᒃ.

ᐱᓇᓱᒻᒪᕆᖕᓂᖏ, ᓲᕐᓗ ᖁᑭᕆᐊᕐᓗᓂ, ᑖᓐᓇ ᐸᓖᓯ ᐱᔾᔪᑎᖃᑦᑎᐊᕆᐊᓕᒃ ᑕᐃᒪᓐᓇ ᐱᔭᕆᐊᖃᕐᓂᕐᒥᓂᒃ “ᐃᖕᒥᖕᓂ ᓴᐳᑎᓯᒪᓂᕐᒧᑦ ᐅᕝᕙᓘᓐᓃᑦ ᐊᓯᖏᓐᓂᒃ ᓴᐳᔾᔨᓯᒪᓂᕐᒧᑦ, ᑭᒃᑯᑐᐃᓐᓇᕐᓂᓪᓗ, ᑐᖁᑎᑦᑎᑦᑕᐃᓕᓂᕐᒧᑦ ᐅᕝᕙᓘᓐᓃᑦ ᑎᒥᒃᑯᑦ ᐋᓐᓂᖅᑕᐅᑎᑦᑎᑦᑕᐃᓕᓂᕐᒧᑦ,” ᐅᓂᒃᑳᑦ ᐅᖃᕐᓯᒪᓚᐅᕐᑐᑦ.

ᑕᐃᒪᐃᓐᓂᖓᓄᑦ, ᐸᓯᔭᒃᓴᓕᕆᔨᒃᑯᑦ ᐅᖃᓕᓚᐅᕐᑐᑦ ᑖᒃᑯᐊᒃ ᐸᓖᓰᒃ ᖁᑭᕐᓴᓚᐅᕐᑑᑦ ᐸᓯᔭᒃᓴᐅᔾᔪᑎᒃᓴᖃᙱᓐᓂᖏᓐᓂᒃ ᐱᕋᔭᖕᓂᒃᑯᑦ.

ᑎᓯᐱᕆ 14, 2021-ᒥ, ᐲᑕᐃᓛᓯ ᐸᓯᔭᒃᓴᐅᓂᕋᓚᐅᕐᓯᒪᔪᖅ ᓱᒋᐅᑎᖃᕐᓂᖏᒥᓂ ᖁᐊᕐᓵᕐᓇᖅᑐᒦᑎᑦᑎᓇᓱᒃᖢᓂ, ᖁᑭᐅᑎᒥᒃ ᐱᓯᒪᓂᕐᒧᑦ ᐱᓯᒪᖁᔭᐅᙱᑎᓪᓗᒍ ᐊᒻᒪᓗ ᑐᕌᖅᑎᕐᓂᕐᒥᒃ ᖁᑭᐅᑎᒥᒃ, ᐅᖃᓚᐅᕐᑐᑦ ᐸᓯᔭᒃᓴᓕᕆᔨᒃᑯᑦ ᐅᖃᓪᓚᒃᑎᖓ ᓈᑕᓕ ᐆᓪ. ᑖᒃᑯᐊ ᒪᕐᕉᒃ ᐸᓯᔭᒃᓴᐅᔾᔪᑎᐅᔫᒃ ᐲᖅᑎᑕᐅᑐᐃᓐᓇᓕᓚᐅᕐᑑᒃ.

ᐲᑕᐅᓛᓯ ᐃᖅᑲᖅᑐᖅᑕᐅᓚᐅᕐᓯᒪᔪᖅ ᑕᖅᑭᓂᒃ 18-ᓂ ᑎᒍᔭᐅᓯᒪᓂᐊᕐᓗᓂ ᐊᒻᒪᓗ ᑕᖅᑭᓂᒃ 24-ᓂ ᐱᕋᔭᒃᑕᐃᓕᓗᓂ ᐊᒻᒪᓗ ᖁᑭᐅᑎᒥ ᐱᓯᒪᖁᔭᐅᙱᖢᓂ.