ᕿᒥᕐᕈᔨᐅᔪᑦ ᑲᑎᒪᔨᖏᑦ ᐋᒃᑳᖅᐳᑦ ᐹᕙᓐᓛᓐᑯᓐᓄᑦ

For English version, see Review board says no to Baffinland

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᒪᐃᖁᔨᓂᓕᐅᖅᓯᒪᕗᑦ ᒐᕙᒪᑐᖃᒃᑯᑦ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᖓ ᑖᓂᐅᓪ ᕚᓐᑎᐅᓪ ᐊᖏᙱᓐᓂᖏᓐᓂ ᐹᕙᓐᓛᓐᑯᑦ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᖓᑕ ᑎᒥᖁᑕᐅᔪᓂ ᑐᒃᓯᕋᖅᑕᖏᓐᓂ ᓄᓘᔭᕐᓂ ᐅᔭᕋᖕᓂᐊᕐᕕᖕᒧᑦ ᐊᖏᒡᓕᒋᐊᖅᑕᐅᓂᖓᓂ, ᐅᖃᖅᖢᓂ ᓱᔪᐃᑎᑦᑎᑐᐃᓐᓇᕆᐊᖃᕐᓂᖓᓂ ᑕᕆᐅᕐᒥ ᐳᐃᔨᐅᔪᓂ, ᑐᒃᑐᓂ ᐊᒻᒪ ᐊᓯᖏᓐᓂ ᐆᒪᔪᓂᑦ.

ᐱᓕᕆᐊᒃᓴᐅᔪᖅ ᐊᒃᑐᐃᑐᐃᓐᓇᕆᐊᖃᖅᐳᖅ ᐆᒪᔪᓂ ᐊᒻᒪ ᐃᖃᓗᖕᓂ ᓇᔪᖅᐸᒃᑕᖏᓐᓂ ᓄᓇᕘᑉ ᓯᓚᑖᓂ — ᐱᐅᙱᑦᑐᓂ ᐊᒃᑐᐃᓂᐅᔪᓐᓇᖅᑐᓂ “ᓈᒻᒪᒃᑐᒥ ᓄᖅᑲᖅᑎᑕᐅᔪᓐᓇᕋᔭᙱᑦᑐᓂ, ᒥᒃᖠᒋᐊᖅᑎᑕᐅᓂᖓᓐᓂ, ᐅᕝᕙᓘᓐᓃᑦ ᓱᖏᐅᔾᔭᐅᓂᖓᓂ ᐊᐅᓚᑕᐅᓗᓂ” ᐅᕘᓇ ᐹᕙᓐᓛᓐᑯᑦ ᒫᓐᓇᐅᔪᒥ ᐸᕐᓇᐅᑎᖓᓐᓂ, ᐅᖃᓚᐅᖅᐳᖅ ᑲᑎᒪᔨᓄᑦ ᐃᒃᓯᕙᐅᑕᖓ ᒫᔾᔪᕆ ᑲᕕᖅ ᑲᓗᕋᖅ.

“[ᐊᖏᒡᓕᒋᐊᖅᑕᐅᓂᖓ] ᐱᑎᑦᑎᑐᐃᓐᓇᕆᐊᖃᖅᐳᖅ ᐊᖏᐸᓗᒃᑐᒥ ᓱᔪᐃᓐᓇᖅᑐᒥ ᐆᒪᔪᐃᑦ ᓄᖅᑭᐅᕐᕕᖏᓐᓂ ᐊᒃᑐᐃᓂᐅᔪᓂ ᐳᐃᔨᐅᔪᓄᑦ ᐊᒻᒪ ᐃᖃᓗᖕᓄᑦ, ᑐᒃᑐᓄᑦ ᐊᒻᒪ ᐊᓯᖏᓐᓂ ᓄᓇᒥᐅᑕᓄᑦ ᐆᒪᔪᓄᑦ,” ᐅᖃᓚᐅᖅᐳᖅ ᑲᑎᒪᔨᒃᑯᓐᓂ ᐅᖃᐅᓯᒃᓴᓕᐊᖏᓐᓂ.

“ᐊᒻᒪ ᐅᑯᐊ ᐊᒃᑐᐃᓂᐅᔪᑦ ᑐᕌᖅᑎᑦᑎᔪᓐᓇᖅᐳᑦ ᐃᓚᒋᔭᐅᔪᒥ ᐊᖏᐸᓗᒃᑐᒥ ᓱᔪᐃᓐᓇᖅᑐᒥ ᐊᒃᑐᐃᓂᐅᔪᓂ ᐃᓄᖕᓄᑦ ᐊᖑᓇᓱᒃᐸᖕᓂᖏᓐᓂ, ᐃᓕᖅᑯᓯᒧᑦ, ᓄᓇᒥ ᐊᑐᕐᓂᕐᒧᑦ ᐊᒻᒪ ᓂᕿᒃᓴᖃᑦᑎᐊᕐᓂᕐᒧᑦ ᓄᓇᕗᒻᒥ.”

ᑲᑎᒪᔨᒃᑯᑦ ᓴᖅᑭᑎᑦᑎᓚᐅᖅᐳᑦ ᐃᓱᒪᓕᐊᖓᓐᓂ ᒪᐃ 13−ᒥ, ᐃᓱᓕᑦᑎᔪᒥ ᐊᕐᕌᒍᓂ−ᑎᓴᒪᓂ ᕿᒥᕐᕈᔭᐅᓂᖓᓂ ᐱᓕᕆᓂᐅᔪᒥ ᑕᑯᓚᐅᖅᑐᒥ ᐃᓄᓕᒫᓄᑦ ᑐᓵᓂᐅᔪᒥ ᐅᓂᐊᖅᑕᐅᓯᒪᔪᒥ ᕿᑎᐊᓂ 2019−ᒥ ᐊᒻᒪᓗ 2021−ᒧᑦ ᐱᔾᔪᑕᐅᔪᒥ ᓄᕙᒡᔪᐊᕐᓇᖅ-19−ᒧᑦ ᐊᒻᒪ ᐱᓕᕆᐊᒃᓴᓕᐅᕐᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ.

ᕚᓐᑎᐅᓪ ᑎᑎᕋᕐᕕᖓ ᐅᓪᓗᓂ 90−ᓂ ᓴᖅᑭᑕᐅᓚᐅᕐᓂᖓᓂ ᐊᑐᖁᔭᐅᓇᔭᖅᑐᒥ ᕿᒥᕐᕈᓂᕐᒧᑦ ᑲᑎᒪᔨᒃᑯᑦ ᐊᑐᖁᓇᔭᖅᑕᖓᓂ ᐊᒻᒪ ᐊᖏᖅᓯᓗᓂ ᐅᕝᕙᓘᓐᓃᑦ ᐋᒃᑳᕐᓗᓂ ᐱᓕᕆᐊᒃᓴᐅᔪᒥ.

ᐅᖃᐅᓯᒃᓴᓕᐊᖑᔪᒥ ᓴᖅᑭᑎᑕᐅᔪᒥ ᕿᓚᒻᒥᐅᔪᒥ ᑲᑎᒪᔨᒃᑯᑦ ᐅᖃᐅᓯᒃᓴᓕᐊᖓᓐᓂ, ᐹᕙᓐᓛᓐᑯᑦ ᐅᖃᓚᐅᖅᐳᖅ ᖁᒃᓴᓪᓚᓚᐅᖅᐳᑦ ᐊᒻᒪ ᐊᐃᑦᑖᕈᓱᓚᐅᖅᐳᑦ ᐃᓱᒪᓕᐊᖑᔪᒥ.

“ᑐᒃᓯᕋᐅᑎᕗᑦ … ᑐᙵᕕᖃᖅᐳᖅ ᐊᕐᕌᒍᒐᓴᓂ ᖃᐅᔨᓴᖅᑕᐅᕐᔪᐊᕐᓂᐅᔪᒥ ᐊᒻᒪ ᐅᓂᒃᑳᖅᓯᒪᑦᑎᐊᖅᑐᒥ ᖃᐅᔨᓴᕐᓂᕐᒧᑦ ᖃᐅᔨᓴᐃᓂᐅᔪᒥ, ᐊᒻᒪᓗ ᐊᖏᐸᓗᒃᑐᒥ ᓄᓇᓕᖕᓂ ᐃᑲᔪᖅᓱᐃᓂᖃᖅᐳᖅ ᑐᙵᕕᖃᖅᑐᒥ ᐊᕐᕌᒍᒐᓴᓂ ᐅᖃᖃᑎᖃᕐᓂᐅᔪᓂ ᐃᓄᖕᓂ ᐊᒻᒪ ᓄᓇᓕᖕᓂ,” ᐅᖃᓚᐅᖅᐳᖅ ᐊᐅᓚᑦᑎᔨᒻᒪᕆᒃ ᐳᕋᐃᔭᓐ ᐸᓂ.

“ᐊᐱᕆᓂᐊᖅᐳᒍᑦ ᒐᕙᒪᑐᖃᒃᑯᓐᓂ ᐃᓱᒪᒃᓴᖅᓯᐅᕆᓂᕐᒥ ᑕᒪᒃᑭᓂ ᑕᑯᒃᓴᐅᓂᐅᔪᓂ ᐊᒻᒪ ᐅᖃᐅᓯᒃᓴᓕᐊᓂ ᐊᒻᒪ ᐊᖏᕐᓂᕐᒥ … ᑐᒃᓯᕋᐅᑕᐅᔪᒥ ᓇᓕᒧᑦᑐᒥ ᐊᒻᒪ ᐱᔾᔪᑎᖃᑦᑎᐊᖅᑐᒥ ᖃᓄᐃᓕᖓᓂᐅᔪᓂ.”

ᐆᒃᕕᐅᓪᒥ-ᑐᙵᕕᓕᖕᒥ ᐅᔭᕋᖕᓂᐊᕐᕕᖕᒥ ᑲᒻᐸᓂᐅᔪᖅ ᒫᓐᓇᐅᔪᒥ ᓄᓇᓯᐅᑎᒃᑯᑦ ᐅᓯᓲᖑᕗᑦ 6 ᒥᓕᐊᓐ ᑕᓐᓂ ᓴᕕᕋᔭᒃᓴᒥ ᐊᕐᕌᒍᑕᒫᒥ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ ᕿᙳᐊᓄᑦ, ᐊᒻᒪ ᐅᒥᐊᕐᔪᐊᒃᑯᑦ ᐅᓯᓲᖑᕗᑦ ᐅᕘᓇ ᑕᓪᓗᕈᑎᐅᑉ ᐃᒪᖓᒍᑦ ᐸᐸᑦᑏᓐᓇᕐᓂᕐᒧᑦ ᐃᓂᐅᔪᒥ.

ᒪᕐᕈᐃᓪᓗᐊᖅᑐᒥ ᑕᐃᔅᓱᒥᖓ ᐊᕐᕌᒍᑕᒫᒥ ᓴᕕᕋᔭᒃᓴᒥ ᐊᓂᐊᑎᑦᑎᓂᐅᔪᒥ 12 ᒥᓕᐊᓐ ᑕᓐᓄᑦ, ᓇᑉᐸᖅᑎᕆᓗᑎᒃ ᖄᒃᑲᓐᓂᐊᒍᑦ ᑐᓚᒃᑕᕐᕕᖕᒥ, ᐊᒻᒪ ᓴᓇᓗᑎᒃ 110-ᑭᓛᒥᑐᒥ ᓄᓇᓯᐅᑎᑯᑖᖕᒧᑦ ᐊᖅᑯᑎᖓᓂ ᐅᔭᕋᖕᓂᐊᕐᕕᖕᒥ ᕿᙳᐊᓄᑦ.

ᑕᐃᒪᙵᓂ ᓯᕗᓪᓕᖅᐸᐅᔪᒥ ᑐᓵᑎᑕᐅᓕᐅᔪᒥ ᓄᖅᑲᖅᑎᑕᐅᓚᐅᕐᓂᖓᓂ 2019−ᒥ, ᐹᕙᓐᓛᓐᑯᑦ ᐊᓯᔾᔩᓯᒪᕗᑦ ᓯᕗᓪᓕᖅᐹᖓᓂ ᑐᒃᓯᕋᐅᑎᒥᓂᒃ ᐃᑲᔪᖅᓯᖅᑕᐅᓇᓱᐊᕐᓂᕐᒧᑦ ᕼᐋᒻᓚᐅᔪᓂ, ᐊᒻᒪ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᒃᑯᓐᓂᓪᓗ ᑲᑐᔾᔨᖃᑎᒌᖑᔪᓂ ᐊᒃᑐᖅᑕᐅᓯᒪᔪᓄᑦ ᓄᓇᓕᖕᓂ.

ᐃᓚᖏᑦ ᐊᓯᔾᔨᕐᓂᐅᔪᑦ ᐃᓚᖃᖅᐳᑦ ᓱᒃᑲᐃᑦᑐᒥ ᐊᖏᒡᓕᒋᐊᖅᐸᓪᓕᐊᓂᐅᔪᒥ 168−ᓄᑦ ᓴᕕᕋᔭᒃᓴᓂ ᐊᒡᔭᖅᑕᐅᓂᐅᔪᓂ ᐃᖏᕐᕋᓂᐅᔪᓂ ᐊᑐᓂ ᐅᓯᑲᑦᑕᕐᓂᕐᒧᑦ ᐊᐅᔭᐅᔪᒥ, ᐊᖏᖅᓯᒪᓂᐅᔪᒥ ᐅᓯᑲᑦᑕᖃᑦᑕᙱᓐᓂᕐᒧᑦ ᑭᓯᐊᓂ ᓯᑯ ᐊᑕᔪᖅ ᓄᓇᒧᑦ ᓱᕋᒃᐸᑦ, ᐊᒻᒪᓗ ᐅᑭᓖᓂᕐᒧᑦ ᐸᐃᕆᕝᕕᖕᓄᑦ ᐅᕝᕙᓘᓐᓃᑦ ᓄᓇᓕᖕᓂ ᒍᓛᔾᔪᓄᑦ.

ᓯᕗᓂᐊᓂ ᒪᐃ 13−ᒧᑦ ᐅᖃᐅᓯᒃᓴᓕᐊᖑᔪᒥ, ᐹᕙᓐᓛᓐᑯᑦ ᐅᖃᓚᐅᖅᐳᖅ ᐱᒍᓂ ᐊᖏᖅᑕᐅᓂᕐᒥ ᓂᕆᐅᓚᐅᖅᐳᑦ ᐅᔭᕋᖕᓂᐊᕐᕕᒃ ᐊᑭᓖᓇᔭᕐᓂᖏᓐᓂ $2.4 ᐱᓕᓐᓂᐸᓗᖕᓂ ᓄᓇᕗᒻᒥ ᑐᙵᕕᒃᑯᓐᓄᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᓇᖏᖅᑕᕐᓂᓂ ᐃᓅᓯᓕᒫᖓᓐᓂ ᐅᔭᕋᖕᓂᐊᕐᕕᖕᒥ, ᐊᒻᒪ ᐱᕈᖅᑎᑦᑎᓗᑎᒃ $680 ᒥᓕᐊᓐᓂ ᑮᓇᐅᔭᖅᑖᕆᔭᐅᕙᓪᓕᐊᔪᓂ ᓄᓇᕗᒻᒥ ᒐᕙᒪᒃᑯᓐᓄᑦ.

ᐊᖏᖅᑕᐅᙱᑉᐸᑦ, ᐹᕙᓐᓛᓐᑯᑦ ᐅᖃᓚᐅᖅᐳᖅ, ᕿᓚᒻᒥᐅᔪᒥ ᒪᑐᓚᐅᑲᒃᓯᔭᕆᐊᖃᕋᔭᖅᐳᑦ ᐅᔭᕋᖕᓂᐊᕐᕕᖕᒥ

ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᕐᒥ, ᕚᓐᑖᓪ ᖁᔭᓕᓚᐅᖅᐳᖅ ᑲᑎᒪᔨᓂ ᐊᒻᒪ ᐃᓚᐅᖃᑕᐅᔪᓂ ᐱᓕᕆᓂᖏᓐᓄᑦ ᐊᒻᒪ ᐅᖃᓚᐅᖅᐳᖅ ᕿᒥᕐᕈᓇᖕᓂᐊᖅᐳᖅ ᐅᓂᒃᑳᓕᐊᒥ ᐱᓕᕆᖃᑎᒋᔭᒥᓂᑦ.

“ᐃᓱᒪᓕᐅᕆᓂᐊᖅᐳᑦ ᒪᓕᒃᑐᒥ ᓈᒻᒪᒃᑐᒥ ᐱᓕᕆᓂᖃᓚᐅᖅᑎᓪᓗᒋᑦ ᐊᒻᒪ ᑕᒪᒃᑭᐅᒪᔪᒥ ᖃᐅᔨᓴᐃᓂᐅᔪᒥ, ᐃᓚᖃᖅᑐᒥ ᐱᔭᒃᓴᐅᔪᒥ ᐅᖃᖃᑎᖃᕐᓂᕐᒥ ᑭᐅᔭᐅᓯᒪᒍᓂ ᐋᒃᑲᓘᓐᓃᑦ,” ᑎᑎᕋᓚᐅᖅᐳᖅ.