ᖁᐊᓴ ᓄᖅᑲᕐᓂᐊᓕᕐᑐᖅ ᐃᓂᒃᓴᓕᐅᕐᓗᓂ ᓄᑖᓂᒃ ᓯᕗᓕᐅᕐᑎᒃᓴᓂᒃ

ᒪᓕᒐᓕᐅᖅᑎ ᐅᖃᖅᑐᖅ ᓯᕗᓂᑦᑎᓐᓂ ᒪᓕᒐᓕᕆᔨᐅᔪᑦ ‘ᓯᓚᑖᓄᑦ ᕿᒥᕐᕈᐊᖅᐸᓪᓗᑎᒃ’

ᐹᓪ ᖁᐊᓴ ᔪᓚᐃᒥ ᐊᔾᔨᓕᐅᕐᑐᐅᓂᑯ ᐅᕙᓂ, ᓄᖅᑲᓚᐅᕐᑐᖅ ᒪᓕᒐᓕᐅᖅᑎᐅᔪᒪᔪᓐᓃᖅᖢᓂ ᐊᒡᒍᒧ. (ᐊᔾᔨᙳᐊᖁᑎᖓ ᑕᐃᕕᑦ ᕕᐊᓐ)

By ᑕᐃᕕᑦ ᓛᕼᐄᑦ

ᐊᒡᒍᒧᑦ ᒪᓕᒐᓕᐅᖅᑎ ᐹᓪ ᖁᐊᓴ ᐅᖃᓚᐅᕐᑐᖅ ᓄᖅᑲᕐᓂᐊᓕᕐᓂᕋᖅᖢᓂ ᐃᓂᒋᔭᒥᓂᒃ ᓄᓇᕗᒥᑦ ᒪᓕᒐᓕᕆᕕᒡᔪᐊᒥ ᑕᒪᒃᑯᐊ ᐊᓯᖏᑦ ᓄᓇᖓᓃᑦᑐᑦ ᒪᓕᒐᓕᕆᓂᕐᒥᒃ ᐃᓚᐅᔪᓐᓇᕐᓂᐊᕐᒪᑕ.

ᒫᓐᓇ ᐅᖃᖅᑎᒋᔭᐅᔪᖅ ᒪᓕᒐᓕᕆᕕᒡᔪᐊᕐᒥᒃ ᐊᒻᒪ ᓯᕗᓕᐅᖅᑎᐅᓚᐅᖅᓯᒪᔪᖅ ᓄᓇᕗᒧᑦ ᑐᓴᖅᑎᑦᑎᓚᐅᕐᒪᓐ ᐱᓇᓱᐊᕈᓯᐅᓚᐅᖅᑐᒥᓐ ᓄᖅᑲᕐᓂᐊᓕᕐᓂᕐᒥᓂᒃ ᐋᒐᓯ 13-ᒥ.

ᖁᐊᓴ ᐅᖃᓚᐅᕐᑐᖅ ᐃᖃᓗᖕᓂ ᓄᓇᖃᕐᓂᕋᓕᖅᖢᓂ ᐊᕐᕌᒎᓕᖅᑐᓂᒃ 8-ᓂᒃ, ᑭᒡᒐᖅᑐᖅᑕᖏᓪ ᐅᕙᓃᑎᓪᓗᒋᑦ ᐃᒡᓗᓕᒃᒥᑦ ᐊᒻᒪ ᕿᑭᖅᑖᓘᑉ ᐅᐊᖕᓇᖓᓂ.

“ᐃᓱᒪᓚᐅᕋᒪ ᐊᑲᐅᓂᖅᓴᐅᓇᔭᕐᓂᖓᓂᒃ ᐊᒡᒍᒥᐅᑦ ᒪᓕᒐᓕᐅᖅᑎᖃᕈᑎᒃ ᓄᓇᖃᑎᖓᓂᒃ,” ᐅᖃᖅᑐᖅ.

ᐃᓱᒪᒋᔭᐅᕈᓘᔭᕐᓯᒪᓕᕐᒪᓐ ᑲᓇᑕᒧᑦ ᐊᖓᔪᖅᑳᕐᔪᐊᖅ ᔭᔅᑎᓐ ᑐᕉᑑ ᓂᕈᐊᕐᓇᐅᓛᖅᑐᒥᒃ ᑐᓴᖅᑎᑦᑎᓵᓕᓛᕆᐊᒃᓴᖓᓂᒃ ᑕᒪᑐᒪᓂ ᐊᕐᕌᒍᒥ, ᐊᒻᒪᓗ ᐅᓇ ᓄᓇᕗᒧᑦ ᒪᓕᒐᓕᐅᖅᑎ ᒪᒥᓛᖅ ᖃᖅᑲᖅ ᓂᕈᐊᒐᒃᓴᐅᔾᔮᔪᓐᓃᖅᖢᓂ. ᖁᐊᓴ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐃᓱᒪᒋᔭᖃᙱᓐᓂᕐᒥᓂᒃ ᐃᓂᖓᓄᑦ ᓂᕈᐊᒐᒃᓴᐅᔪᒪᓂᕐᒥᒃ.

ᑭᓯᐊᓂᓕ ᐅᖃᓚᐅᕐᑐᖅ ᓱᓕ ᓄᖅᑲᙱᓐᓂᖓᓂᒃ ᓄᓇᕗᒥᑦ ᐃᑲᔪᕋᓱᖕᓂᒃᑯᑦ, ᑕᐃᒪᐃᓕᐅᕈᒪᓪᓗᓂᓗ ᒪᓕᒐᓕᕆᓂᕐᒥᒃ ᐃᓱᒫᓘᑎᖃᕐᓇᙱᓪᓗᓂ.

“ᓂᓪᓕᕈᓐᓇᕐᓂᐊᕋᒪ ᐃᓱᒫᓘᑎᒋᔭᐅᓐᓂᒃ ᐅᕝᕙᓘᓐᓃᑦ ᐱᓕᕆᐊᖑᔭᕆᐊᓕᖕᓂᒃ ᐃᓱᒫᓗᙱᓪᓗᖓ ᐅᖃᕆᐊᖃᖅᑕᓐᓂᒃ ᐅᕝᕙᓘᓐᓃᑦ ᐅᖃᕆᐊᖃᙱᑕᓐᓂᒃ,” ᐅᖃᖅᑐᖅ ᖁᐊᓴ.

ᖁᐊᓴ, 69, ᐃᓚᒋᔭᐅᓚᐅᕐᓯᒪᔪᖅ ᐋᔩᖅᑎᒋᔭᐅᔪᓂᒃ ᓄᓇᕗᒥᑦ ᓄᓇᖄᕈᑎᓄᑦ ᐊᖏᕈᑎᓂᒃ ᐱᓕᕆᐊᖃᓕᕐᑎᓪᓗᒋᑦ, ᓄᓇᕗᒥᑦ ᐱᒋᐊᕈᑎᐅᓂᑯᒥᒃ. ᐊᖓᔪᖅᑳᖑᓚᐅᕐᓯᒪᔪᖅ ᓄᓇᕗᑦ ᑐᙵᕕᒃᑯᓐᓄᑦ ᐊᒻᒪᓗ ᓯᕗᓂᐊᒍᑦ ᐅᑯᐊᖑᑎᓪᓗᒋᑦ ᑐᙵᕕᒃᑯᑦ ᑲᑐᔾᔨᖃᑎᒌᑦ ᓄᓇᕗᒥᑦ.

ᖁᐊᓴ ᓯᕗᓪᓕᖅᐹᒥᒃ ᓂᕈᐊᖅᑕᐅᓚᐅᖅᓯᒪᔪᑦ ᐊᒡᒍᒧᑦ 2013-ᖑᑎᓪᓗᒍ, ᐊᒻᒪᓗ ᐃᓕᓐᓂᐊᕐᓂᓕᕆᓂᖅᒧᑦ ᒥᓂᔅᑕᐅᓚᐅᖅᓯᒪᓪᓗᓂ ᐊᒻᒪ ᓯᕗᓕᐅᖅᑎᐅᓚᐅᕐᓯᒪᓪᓗᓂ.

ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕᐅᓪᓗᓂ, ᖁᐊᓴ ᐊᑐᓕᖅᑎᑦᑎᒋᐊᓚᐅᖅᓯᒪᔪᖅ ᐊᓯᙳᕈᑎᒃᓴᓂᒃ ᓄᓇᕗᒥᑦ ᐃᓕᓐᓂᐊᖅᑐᓕᕆᓂᕐᒥᒃ ᐃᒪᐃᓕᖓᓗᓂ ᒪᕐᕈᐃᓂᒃ ᐅᖃᐅᓰᖕᓂ ᐱᓕᕆᐊᖃᕐᓗᑎᒃ ᓄᓇᕗᓕᒫᒥ, ᑭᓯᐊᓂᓕ ᑖᓐᓇ ᒪᓕᒐᙳᖅᑎᑕᐅᓇᓯᒃᑐᖅ ᐊᓂᒍᖅᑎᑕᐅᔪᓐᓇᓚᐅᖅᓯᒪᙱᒻᒪᑦ ᐃᓄᐃᑦ ᑕᒪᑐᒥᖓ ᐃᑲᔪᖅᑐᐃᙱᓗᐊᕐᓂᖏᓐᓄᑦ.

ᖁᐊᓴ ᓂᕈᐊᕆᔭᐅᓚᐅᕐᓯᒪᔪᖅ ᑲᑎᒪᔨᐅᖃᑎᖏᓐᓄᑦ ᓯᕗᓕᐅᖅᑎᐅᖁᔭᐅᓪᓗᓂ 2017-ᒥ ᓂᕈᐊᕐᓇᐅᑎᓪᓗᒍ, ᑭᓯᐊᓂᓕ ᑖᔅᓱᒥᖓ ᐱᓕᕆᐊᖃᖁᔨᔪᓐᓃᓚᐅᖅᓯᒪᔪᑦ ᑖᒃᑯᐊ ᔫᓂ 2018-ᒥ ᐅᒃᐱᕆᔭᐅᒻᒪᕆᒍᓐᓃᕐᓂᖅᒧᑦ.

ᒐᕙᒪᒃᑯᓐᓃᓚᐅᕐᓂᖓ ᐃᓕᓐᓂᐊᕈᑎᒋᔪᓐᓇᓚᐅᖅᑕᖓᒎᖅ, ᖁᐊᓴ ᐅᖃᓚᐅᖅᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐱᓇᓱᐊᕈᓯᐅᓚᐅᕐᑐᒥᓐ, ᐃᓱᒪᒋᓪᓗᓂᐅᒃ ᒪᓕᒐᓕᕆᓂᕐᒧᑦ ᖃᓄᐃᓕᐅᖃᑦᑕᕐᓯᒪᔭᖏᓐᓂᒃ. ᐅᖃᓚᐅᕐᑐᖅ ᑐᑭᓯᕚᓪᓕᕐᓂᕋᖅᖢᓂ ᖃᓄᖅ ᒪᓕᒐᓕᕆᓂᖅ ᐱᓕᕆᐊᖑᕙᖕᒪᖔᑦ, ᖃᓄᖅ ᓄᓇᓖᑦ ᐊᐅᓚᑕᐅᕙᖕᒪᖔᑕ ᐊᒻᒪᓗ ᒪᓕᒐᒃᓴᓕᐅᕐᓂᖅᒥᒃ.

ᖁᐊᓴ ᐅᒃᐱᕈᓱᒃᑐᖅ ᒥᓂᔅᑕᐅᓚᐅᕐᓂᖓ ᐃᓕᓐᓂᐊᕐᓂᓕᕆᓂᕐᒧᑦ ᑕᕝᕘᓇᓗ ᐱᓕᕆᐊᖃᓛᖑᓯᒪᓪᓗᓂ, ᐃᓚᖃᓚᐅᕐᓯᒪᔪᖅ ᓄᓇᕗᑦ ᓯᓚᑦᑐᖅᓴᕐᕕᒃᒥᓐ ᐃᓕᓐᓂᐊᒐᒃᓴᓂᒃ ᐅᓄᕐᓯᕚᓕᖅᑎᑦᑎᓂᕐᒥᒃ. ᐅᖃᒪᐅᕐᒥᔪᖅ ᓄᓇᕗᒥᑦ ᓯᓚᑦᑐᖅᓴᕐᕕᒡᔪᐊᒥ ᐱᑕᖃᓕᖅᑎᑦᑎᓇᓱᓚᐅᕐᓂᖓᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᓕᕆᔨᐅᑎᓪᓗᒍ, ᑖᓐᓇ ᓱᓕ ᑕᐃᒪᐃᑦᑐᓐᓇᖅᓯᖁᔭᖓ.

ᒪᓕᒐᓕᕆᓂᒃᑰᙱᑦᑐᕐᓕ, ᖁᐊᓴ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᑭᒡᒐᖅᑐᐃᔪᓐᓇᕐᓂᖅᓴᐅᓗᑎᒃ ᐃᓄᖕᓂᒃ.

ᓄᓇᕗᒥᑦ ᒐᕙᒪᒃᑯᑦ ᐅᓂᒃᑳᖏᑦ ᐅᖃᖅᓯᒪᓚᐅᕐᒪᑕ ᐅᕙᓂ ᒫᔅᓯ 2021-ᒥ, ᓇᑉᐸᖏᑦ (50 ᐳᓴᓐᑎ) ᓄᓇᕗᒥᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑐᑦ ᐃᓅᓂᖏᓐᓂᒃ. ᐅᓇ ᓄᓇᕗᒥᐅᑕᑦ ᐃᓄᖏᑦ ᐅᓄᕐᓂᖏᑦ ᑕᐅᑐᒃᖢᒍ, 85 ᐳᓴᓐᑎᒋᔭᐅᑎᓪᓗᒋᑦ ᓄᓇᕗᓕᒫᒥᑦ 2016-ᒥ ᑭᖑᓪᓕᖅᐹᒥᑦ ᓇᐃᓴᐃᔨᒃᑯᑦ ᑲᓇᑕᒥ (StatsCanada) ᑕᒪᑐᒥᖓ ᐱᓕᕆᐊᖃᕐᓂᖏᑦᑎᒍᑦ.

“ᐅᓇ ᐃᒪᐃᓕᖓᔭᕆᐊᖃᕋᓗᐊᕐᒪᓐ 85 ᐳᓴᓐᑎᖏᑦ ᐃᖅᑲᓇᐃᔭᖅᑎᒋᔭᐅᔪᑦ ᒐᕙᒪᒃᑯᓐᓄᑦ ᐃᓅᓗᑎᒃ,” ᖁᐊᓴ ᐅᖃᖅᑐᖅ.

ᓄᓇᕗᒥᑦ ᐃᓄᒋᔭᐅᔪᑦ ᐃᓇᐅᓗᐊᙱᒻᒪᑕ, ᐊᕐᕌᒍᖃᖅᑐᑦ 25 ᑐᖔᓂᒃ ᓇᑉᐸᕆᔭᐅᓪᓗᐊᖅᖢᑎ ᐃᓄᓕᒫᑦ ᑕᐅᑐᒃᖢᒋᑦ ᓄᓇᕗᒦᑦᑐᑦ.

“ᑖᒃᑯᐊ ᐃᓱᒪᒋᓂᕐᓴᐅᔭᕆᐊᖃᕋᑦᑎᒍᑦ ᖃᓪᓗᓈᓂᙶᖅᑐᑦ ᐃᓱᒪᒋᙱᓐᓂᕐᓴᐅᓗᒋᑦ,” ᐅᖃᖅᑐᖅ ᖁᐊᓴ, ᐅᖃᒃᑲᓐᓂᖅᖢᓂ ᐅᒃᐱᕈᓱᖕᓂᖓᓂᒃ ᐃᓅᓱᒃᑐᑦ ᐃᖅᑲᓇᐃᔮᓄᑦ ᐸᕐᓇᒃᑕᐅᔪᓐᓇᕋᔭᕐᓂᖏᓐᓂᒃ ᒪᑯᓄᑦ ᐋᓐᓂᐊᓯᐅᖅᑎᐅᓂᕐᒧᑦ ᐊᒻᒪ ᐃᓕᓴᐃᔨᐅᔪᓐᓇᕐᓂᕐᒧᑦ.

“ᐅᓇ ᑭᖑᓪᓕᕐᓂᒃ ᒪᓕᒐᓕᕆᔨᐅᓂᐊᖅᑐᓂᒃ ᐅᖃᐅᓯᐅᔭᕆᐊᖃᖅᑐᑦ ᐊᒻᒪ ᐱᓕᕆᐊᖑᓗᓂ.”

ᓯᕗᓂᒃᓴᑦᑎᓐᓄᓪᓕ, ᖁᐊᓴ ᓄᓇᕗᒥᑦ ᓇᖕᒥᓂᖅ ᓇᖏᕈᓐᓇᖅᓯᓂᖅᓴᐅᖁᔨᔪᖅ, ᐅᖃᖅᖢᓂ ᑕᐃᒪᓐᓇ ᐱᔾᔪᑎᖃᓗᐊᖅᖢᑎᒃ ᐱᒋᐊᖅᑎᑦᑎᔾᔪᑎᐅᓚᐅᖅᓯᒪᓂᖓᓂᒃ ᓄᓇᕗᒥᑦ. ᐊᒻᒪᓗ, ᓄᓇᕗᑦ ᑎᐅᕆᑑᕆᐅᔪᓐᓃᕐᓗᓂ ᐳᕌᕕᓐᓯᑎᑐᑦ ᐋᖅᑭᒃᑕᐅᖔᓛᕐᓗᓂ.

ᑕᐃᒪᐃᓕᐅᕐᓂᐊᖅᐸᑕᓕ, ᖁᐊᓴ ᐅᖃᓚᐅᕐᑐᖅ ᓄᓇᕗᒥᑦ ᓄᓇᓖᑦ ᐱᑖᖅᑐᕆᐊᖃᕋᔭᕐᒪᑕ — ᒪᒥᓴᕆᐊᖃᕐᓂᖅ ᓄᓇᓕᖕᓂ ᐅᖃᐅᓯᐅᖃᑦᑕᖅᓯᒪᖕᒪᓐ, ᐅᖃᖅᑐᖅ, ᓄᓇᖃᖅᑐᐃᑦ ᓱᕋᒃᑎᖅᑕᐅᕌᓪᓚᓚᐅᖅᑎᓪᓗᒋᑦ ᒪᐅᓇ ᑲᓇᑕᒥ ᐃᓕᓐᓂᐊᖅᕕᓕᐊᕆᐊᖅᕕᕕᓂᖅᑎᒍ. ᐊᒻᒪᓗ ᐅᖃᒃᑲᓐᓂᖅᖢᓂ ᐃᒡᓗᓂᒃ ᐱᑕᖃᕆᐊᖃᒻᒪᕆᖕᓂᖓᓂᒃ ᑕᒫᓂ ᐱᓕᕆᕝᕕᐅᔪᓐᓇᖅᑐᓂᒃ.

“ᑕᑯᒃᑲᓐᓂᕆᐊᖃᕋᑦᑕ ᓄᓇᓕᖕᓂ ᐊᐅᓚᑕᐅᔪᓂᒃ ᖃᓄᐃᓕᐅᕈᑎᒃᓴᓂᒃ ᐊᒻᒪᓗ ᓄᓇᓖᑦ ᐱᓕᕆᑎᑕᐅᒃᑲᓐᓂᕐᒥᓗᑎᒃ ᑕᒪᐅᓇ,” ᖁᐊᓴ ᐅᖃᖅᑐᖅ.

ᓄᓇᕗᑦ ᑕᒪᒃᑯᓂᖓ ᑎᑭᐅᑎᓂᐊᕈᑎᒃ, ᖁᐊᓴ ᐅᖃᓚᐅᕐᑐᖅ ᓄᓇᕗᑦ ᐃᓄᖕᓂᒃ ᐃᓱᒪᔪᓐᓇᖅᑐᓂᒃ ᐊᓯᐊᒎᕈᓐᓇᕈᑎᓂᒃ ᐱᑕᖃᕆᐊᖃᕐᓂᖓᓂᒃ.

“ᐃᓱᒪᒻᒪᕆᒃᑐᖓᓕ ᑭᖑᓪᓕᖅ ᒪᓕᒐᓕᐅᖅᑎ (ᐊᒡᒍᒧᑦ) ᐱᓕᕆᐊᖓᑕ ᓯᓚᑖᒍ ᐊᖏᓂᕐᓴᒥᒃ ᐃᓱᒪᔪᓐᓇᕐᓂᐊᕐᓗᓂ,” ᐅᖃᖅᑐᖅ.

“ᐃᓱᒪᒻᒪᕆᒃᑐᖓ ᑭᖑᓪᓕᖅ ᒪᓕᒐᓕᐅᖅᑎ ᓯᓚᑖᓄᑦ ᐃᓱᒪᔪᓐᓇᕐᓂᐊᕐᓗᓂ ᒪᓕᙱᓐᓂᕐᓴᐅᓗᓂ ᐋᖅᑭᒃᑕᐅᓯᒪᔪᓂᒃ.”

Share This Story

(0) Comments

Join the Conversation

Your email address will not be published. Required fields are marked *

*